Ӟукыртӥсь ёзвиос, яке Малы кырыжало чиньыос?

Удмурт Дунне
By Удмурт Дунне Август 10, 2011 10:13

Ӟукыртӥсь ёзвиос,  яке Малы кырыжало чиньыос?

 

Висён уг жаля бадӟымъёсты но, пичиосты но.

Ӟечбуресь, «Удмурт дуннеын» ужасьёс. Куинь арня талэсь азьло киысьтым ёзвиосы юнме шорысь висьыны кутскизы, чиньыосы тӧрназы, нокытчы ӧй шуккылы, вӧсь ӧй кары ке но. Собере  нимтэмчиньые но чӧльые кырыжазы, табере туж висё, ӵукнаосы уката ик. Висись киыным скал но кыскеме, секыт но ӝуткаме уг луы. Вералэ вал, малы чиньыос кырыжало?

Екатерина Кузьмина.

Алнаш ёрос.

 Та юанэз ми сётӥмы Удмурт Республикаысь Диагностикая центрысь врач-ревматологлы Альфия Мингалеевалы.

— Талэн кӧня ке мугъёсыз луыны быгато. Кылсярысь, киысь, озьы ик быдэс мугорысь ёзвиосты курадӟыто артрит (полиартрит) но артроз (остеоартроз) висёнъёс.

Артрит — со одӥг, полиартрит кӧня ке ёзвилэн черламез (воспалениез). Сыӵе дыръя адямилэн температураез ӝутске, пыдесъёсыз, пельпумъёсыз яке киысьтыз лыосыз юнме шорысь висьыны кутско, ӵукна султыкуз, соосын выртэмез уг луы, шутэтскыкуз но ёзвиосыз лурккетыса висё, тӧрнало. Полиартрит (ёзви пыктон) кӧня ке пумо луэ: инфекциен кылдэмез, аллергия бере кузёяськисез, кристалл полиартрит но ревматоидной нимаськисез.

Вакчияк верано ке, нырысетӥез кылдэ кынмаса (ОРЗ, ОРВИ, ангина), кӧтэ йӧтыса висем бере. Ёзвиосты озьы ик ярато гонорея, хламидиоз висёнъёс. Куд-ог дыръя адямиос полиартритэн черламзэс уг валало. Кылсярысь, кынмаса висё, ньылонзэс дыраз йӧнато ке, артритсы но басыла, малы ке шуоно инфекцилэсь быжзэ пачкато. Та висёнэн пичиос но, бадӟымъёс но черлало. Кристалл полиартритэн тросгес висё арлыдоос. Ёзвиосы пӧртэм сылалъёс люкасько, вирын йылэ мочевой кислота. Ревматоидной нимаськисьсэ быдэсак эмъяны уг луы ни, пыдес, кус, тыбыр, пельпум ёзвиосты кортнам сяна, со пуштӥрлык борды но кутске.

Пӧртэм полиартритэз пӧртэм сямен эмъяло. Соин нырысь ик висёнлэсь мугзэ шараяны кулэ. Со понна чиньыысь но вирсэрысь вир басьто, черлам ёзвиез снимок лэсьто. Инфекциен герӟаськемзэ йӧнато воспалениез вормись таблеткаосын-мазьёсын: найз, ибупрофен, диклофенак, вольтарен, пироксикам но мукет препаратъёсын. Ревматоиднойзэ (хроническойзэ) вормыны кулэ луозы ини базисной препаратъёс, метотрексат, сульфасалазин кадьёсыз. Эмъюмъёсын сяна, врач дэмла тазалыкез юнматыны калык амалъёсын: турын-куаръёсын, чечыен.  Иназ мынэ физиолечение, курортын йӧнатӥськон.

 * * *

Тросэз малпало: артрит но артроз — огкадь висёнъёс. Но соос одӥг выжыысь потэмын ӧвӧл. Лыдӟисьёслы валамон мед луоз шуыса, тазьы вераны луэ: мар йылпумъяське ит кылпумен (бронхит, тонзиллит, фарингит, гепатит), со — воспаление. Нош оз кылпум (кылсярысь, остеохондроз) возьматэ ёзвиосын воштӥськонлэсь (обмен веществ) сӧриськемзэ-тугаськемзэ. Артроз ӧвӧл герӟаськемын воспалениен, солэн кылдон мугез — куажымлэн (хрящлэн) черламез. Соин сэрен ёзвиос вольытэсь уг луо ни, соос вогыриё, венё-венё карисько, ог-огзы вылтӥ гылӟыны уг вормо. Озьы куажым вужме, пилиське, соин ик секыт ужаку, бызьылыку, ёзвиосмы жадё, вӧсь луо, ӟукырто. Ӵукна султыку яке куазь воштӥськыку, мугор уг кылзӥськы, чиньыос уг выро, собере ини ӧраз пыро. Куд-ог дыръя артроз кылдэ таза ёзвиын но, адями кема но шутэтскытэк секыт ужа ке, озьы ик суй-пыд вольтчон, шуккон, тӥяськон учыръёс бере. Та через пичиос уг тодо, висён кырмиське  35-40 аресъемъёс борды, нош 60 арес бере ваньзы сямен соин курадӟо.

Артрит  но артроз — пӧртэм висёнъёс бере, эмъяно но соосты пӧртэм сямен. Та рад диклофенак, пироксикам кадь эмъюмъёс уз юрттэ. Соос вӧсь луэмез палэнтозы но уз йӧнатэ.  Артроз дыръя врач эмъяськыны косэ терафлекс, хондроитин, структум, артра кадь препаратъёсын. Соос куажымлы кыкетӥ улон сёто.

Ёзвиосты шугъяськыто ке, одно ик вазиськоно эмъясь доры, малы ке шуоно висёнлэсь мугзэ шараяно, соку гинэ йӧнатӥськемды пайдаё луоз. Ӵем дыръя луэ озьы но: нырысь адями висе артритэн, собере бордаз кырмиське артроз. яке артрозэн курадӟе, бӧрысь мукетыз бинялске.

Ёзвиосты тау карозы, парем турын-куаръёсын (золотой ус, люгы, кызьпу куаръёс, чебервирсин-сабельник) эшъяськиды ке, соосты юыны но, висись интые зыраны но луоз, озьы ик вунэтоно ӧвӧл гимнастика сярысь.

 

 

 

Удмурт Дунне
By Удмурт Дунне Август 10, 2011 10:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<