Яркыт ӝутскон но шыпыт пукон

Удмурт Дунне
By Удмурт Дунне 30 августа, 2011 11:25

Яркыт ӝутскон но  шыпыт пукон

 

Финляндиын

Выльдӥськон вакытъёсы улон воштӥськемъя ӧжыт лыдъем фин-угор калыкъёс йырзэс ӝутӥзы. Тырмоз, пе, гондыр гуын кадь улыны, кыре потоно.

Та вакытъёсы ик вордӥськиз фин-угор театръёслэн фестивальзы. Но аръёс ортчемъя та фестивальлэн тылсиосыз бездыны кутскизы. Малы озьы луиз?

Фин-угор театръёслэсь фестивальзэс радъян пумысен нырысь ик кылпум поттылэм Ижысь «Интеграл» театрысь режиссёр Евгений Столов. Та сярысь верам со Национальной библиотекаысь Галина Калининалы. Мон ӵем вуылӥсько вал та библиотекае. Огпол Галина Павловна поттылӥз фестиваль кылдытон сярысь. Кенешим нырысь ик пумиськыны Удмурт театрысь артистъёсын. Галина Павловна сыӵе чебер вераськиз: мадиз фестивалез ортчытон пумысен, мон но ас малпанме кисьтӥ.

Куд-огез ӧз оскелэ, маке пӧрмоз шуыса. Нош ми кыским Театр удысын ужасьёслэн огазеяськонэнызы со вакытэ кивалтӥсез Олег Никитинэз, культурая министрез Анетта Сидороваез, солэсь воштӥсьсэ Аверьян Христофоровез. Та чиновникъёс малпанмес умоен лыдъязы. Театр но лӧптӥз. Нош кыӵе спектакль возьматоно? Соку репертуарамы чылкак удмурт пьесаос ӧй вал. ӟуч яке кунсьӧр кылысь берыктэмъёсыз гинэ. Бырйизы О. Нил драматурглэсь «Сирпу саюлын яратон» пьесазэ. Берыктӥз Борис Саушкин, пуктӥсь режиссёрез луиз В. Короленко нимо ӟуч театрысь Юрий Фараджулаев. Уж бугырскиз. Огкылэ вуэмын вал: фестивалез ортчытоно Ижевскын 1992-тӥ арын тулыс, ӧтёно вань фин-угор театръёсты, ӟеч пумитано, куноятоно. Правительство висъяз коньдон.

Фин-угор театръёслэн «Эшъяськон» нырысетӥ фестивальзы туж шулдыр ортчиз. Арнялэсь кема мынӥз со. Жюрие кыскемын вал валтӥсь драматургъёс, нош тӧроез луиз туж тодмо башкир поэт, драматург, писатель Мустай Карим. Мон та фестивальын бадӟым дунъет басьтӥ: пиосмурт ролез шудэме понна премия сётӥзы.

Со-а ӧй вал шумпотон? Нош кӧня пумиськонъёс, эшъяськон кусыпъёс герӟаськизы!

Фестивальын мыным туж кельшиз эстон фольклор коллектив. Со возьматӥз кык пичи миниатюра. Огез — вашкала удмуртъёслэн улэмзы сярысь Игнатий Гавриловлэн материалэзъя, мукетыз — чукчаос сярысь. Ваньмыз туж паймытӥз учкисьёсыз.

Мон эстон коллективез дорам куное ӧтьылӥ, туж кельшиз соослы пыжем картошка, сылалтэм кубиста, губи. Куноос пӧлын вал улосчимы Ольга Александрова — али ханты-манси театрен кивалтӥсь. Шулдыр пуким, вераським, кырӟам удмурт но эстон кылын.

Озьы Удмурт шаер ортчытӥз театръёслэсь нырысетӥ фин-угор фестивальзэс. Нош кык ар ортчыса, фестиваль радъяськиз Финляндиын. Отчы ветлӥмы Пётр Захаровлэн «Эбга» спектакленыз. Удмурт театр нырысьсэ потӥз кунгож сьӧры! Мынӥмы поездэн, собере — автобусэн.

Сюрес вольыт, котыр нюлэс чылк-чылк, одӥг пограм, някырскем писпу но уг адӟиськы, интыен-интыен писэн-писэн люкам пу кылле, плёнкаен шобыртэмын. Сюрес вылэ пужей потӥз, автобус дугдӥз, возьмаз кошкемзэ. Паймод но бырод. Тӥни кытын порядок!

Вуим Нурмес городэ. Татын вазь ӵукна сайкамы но: шунды пиштэ асьме палан кадь ик. Укно азе султӥ, пырак артэ, ог 20-30 метр кемын, бадӟым ву, оло зарезь, оло ты. Чорыгась бере, сьӧрам визнанэ но вань, соку ик дӥсяськи но кыре потӥ. Син азям ты, паллян палаз ӝужыт гурезь, бур палаз вӧл-вӧл нюр инты, одӥг-одӥг чечегъёс лобало. Шыпыт ярдуре васьки, нумыр утчасько, ӧвӧл. Кӧня ке дыр ортчыса, вань эшъёс вуизы. Ваньзы нумыр утчало — ӧвӧл нокытын. Сылӥмы, котыр омырен пачыласа.

Огаз концертын куинь мусо нылъёс кырӟало фин кылын, нош гурез туж тодмо потэ, удмуртлы кельше. Йырам шуккиз: ма та «Зарни меда, азвесь меда». Та нылъёсын пумиським. Ваньмы ӵош кырӟам — одӥг куплетсэ финъёс, мукетсэ ми удмурт сямен. Радиое но гожтӥзы. Ой, кыӵе пумитазы, чабизы соку! Юрт ик пилиськыны турттэ вал кадь. Сыӵе тыпыр-тапыр лёгало, чабо, серекто.

Али ке но мынам ваньмыз сюлмам, йырам, син азям. «Эбга» спектакльмес кык пол возьматӥм школалэн залаз. Учкисьёс ог 300-400 адями. Спектакль удмурт кылын, учкисьёслэн киязы пьесалэн пуштросэз, фин кылэ вакчияк берыктыса, сётэмын. Но сое лыдӟись ӧвӧл — артистъёс туж быгатыса шудо: Валя Моисеева, Кадим Галиханов но мукетъёсыз. Спектакль пумын вань калык, интыысьтыз султыса, ог 10-15 минут сылӥз, дыр, чабыса.

Собере город площадьын концерт. Куазь жаль-жаль зоре. Ми возьматыны кулэ удмурт сюанэз, мон — вӧсясь, бадӟым тӧдьы тушен, кузь чебер тӧдьы пужыё дӥсен, выль кен — Валя Чернова. Эмеспи — Валерий Мадзеков. Потӥм дӥсяськыса, вашкала сямъя. Мон дуно азвесь подносын кык чарка аракы нуисько, выль кен — быдэс черык. Мон кенэз но эмеспиез сектасько, шудбур сӥзьыса, кисьтӥсько кырым зарни коньдон. Табере учкись калыкез сектаны выриськом. Но ваньзы палэнско. Ум валаське: мар луиз, маке умойтэмзэ лэсьтӥм шат? Одӥгез фин воргорон милемлы ӟуч сямен сипыртӥз: нырысь ик, пе, город мэрлы чарка сётэ. Кивалтӥсь доры зор ултӥ бызим. Калык шораз учке. Мэр юиз, кырым коньдонзэ подносэ кисьтӥз. Собере ваньмыз люкаськемъёс озьы ик лэсьтӥзы, милям аракымы ӧз тырмы.

Финляндиын ик Ольга Александровамы «Куинь сюан гуръёс» моноспектаклез возьматӥз. Туж зол вал.

Куинетӥез фестиваль ортчиз Марий Элын. Отчы нуим Егор Загребинлэн «Эштэрек» пьесаезъя спектаклез. Собере вань фестивальёс отын ортчылӥзы ни.

ӝож. Коньдон сярысь сюлмаськон медаз ӵушы вал чеберлык доры кыстӥськонэз. Марий Элысь театр кызьы ке быгатэ ук фестивальёс радъяны…

Геннадий Соловьёв.

 

Удмурт Дунне
By Удмурт Дунне 30 августа, 2011 11:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<