Ыштон мында юрттэт

Удмурт Дунне
By Удмурт Дунне 2 августа, 2011 10:55

 Макем ӟеч быдэсъясько Удмурт Республикалэн Президентэзлэн косонъёсыз? Кызьы радъясько Пугачёво каргуртэз тупатъян ужъёс? Кыӵеен адӟиське азьлань улонзы кунлэн бурд улаз ужась СМИ-ослэн? Та но мукет юанъёслы пыр-поч валэктон сётӥз Удмурт Республикалэн Президентэзлэн но Правительстволэн Администрациенызы кивалтӥсь Александр ГОРЯИНОВ.

Пичи Пурга ёросысь Пугачёво каргуртын пуштонъёс бере кык толэзь ортчиз ни, но отын улӥсьёс гань-гань кариськыны ӧз быгатэ на. Калык сюлмаське: кызьы юртъер котыр тупатъямын луоз, висъяськоз-а та ужъёслы коньдон но мукет.

— Та нуналъёсы Пугачёвое вуылыкум, 272 адями пӧлын юалляськон ортчытӥмы: мар соосты шугъяськытэ та вакытэ? — шуиз А. Горяинов. — Валэктонъёссэс кылзыса, тодӥмы: адямиос доры уг вуы ивор. Интыысь кивалтӥсьёс тае санэ уг басьто, шӧдске. Соин ик ми огъя малпанэ вуимы: каргуртын улӥсьёс борды юнматоно юристъёсты. Соос рос-прос валэктозы, кытчы вазиськоно, шуом, изъянмем юртъерлы компенсация басьтон понна, кыӵе документъёс дасяно.

Каргуртын уноез улӥсьёс ваньбурзы изъянмем, пуштылонъёсын йырин тазалыксы лябӟем пумысен судэ вазиськылӥзы. Но шуг-секытъёс кылдылӥзы тани ма ласянь: Пугачёво каргуртысь военной частьлэн кивалтӥсьёсыз — администрациез — интыяськемын Свердловск улосын — Центральной военной округлэн штаб-квартираяз. Валамон, судэ иск сётэм котькуд мурт отчы вуылыны уз пӧрмыты. Нялтас вераса, та нуналъёсы Свердловск улосысь судын эскеремын вал Пугачёво каргурт пумысен нырысетӥез вазиськон. Кызьы со йылпумъяськиз — шараяськоз  матысь дыре.

Пугачёвоын лэсьтӥськон ужъёслы ваньзэ-ӧвӧлзэ кулэ луоз 2 миллиард пала коньдон. Кытысь но ку вуоз со? Та юанлы тыро-пыдо валэктон шедьтыны та дырозь секыт вал. Президент А. Волков трос пол пумиськылӥз Правительстволэн Тӧроеныз В. Путинэн. Табере тодмо ни: Пугачёвоез тупатъянлы висъяськоз 2 миллиард манет.

Коньдон кошкоз юртъер котыръёсты, социальной объектъёсты тупатъянлы, улон интытэк кылемъёслы сэрег висъянлы. Таӵеослэн лыдзы — 112 семья. Соослы чик ӝегатскытэк улон инты сётӥськоз. Та вакытэ Пугачёво каргурт улэ огдырлы пуктэм котельноен но электростанциен. Соин ик кезьытъёс кутскемлэсь азьло шуныт сётонэз, электрокужым вуттонэз рос-прос радъяно.

Кивалтӥсь ватсаз на: судэ вазиськонлэн кулэлыкез ӧвӧл. Таӵе амалэз калык кутӥз огыр-бугыр вакытэ, куке тодмо ӧй вал на, кин юрттоз шуге-леке шедемъёслы, ку уксё вуоз. Та нуналлы со юрттэтэз витьыны гинэ кылиз на. Сое басьтон понна банкын счёт усьтоно. Уксё висъяськоз сомында, кӧня ыштон адӟиз соиз я таиз семья. Юрттэтлэн быдӟалаеныз соглаш кариськымтэос вазиськыны быгатозы судэ.

Вераськонъёс вӧлмизы вал: страхованиея огазеяськонъёс пумит, пе, луо изъянмем ваньбур понна компенсация тырыны. А. Горяинов валэктӥз: таӵе учыръёс та дырлы шараямын ӧвӧл. Страхованиея компаниос калыклы юрттыны уг пумитъясько, документъёсты бичан гинэ кема кыстӥське.

 * * *

Россилэн Президентэз Д. Медведев федерал парламентлы берпуметӥ вазиськоназ пусйиз вал: кунлэн ваньбураз луыны кулэ ӧвӧл «заводъёс, газетъёс но пароходъёс». Кун чотэ пырись СМИ-ос та кылъёсты ас вылазы басьтӥзы. Озьыен, кун юрттэтлэсь соос палэнтэмын луозы?

А. Горяинов шуиз: та пумысен юнме пӧсекъяно ӧвӧл. Кунысьтымы котькуд субъект ачиз чаклалоз, кыӵе огазеяськонъёсты бурд улаз кельтоно, нош кудзэ нимаз карыса умойгес луоз. Кун СМИ-ос быдэсъяло кун заказэз — возьмато властьлэсь ужамзэ, со понна коньдон басьто. Тазьы ик луоз азьланяз но.

Удмурт Республикаысь Президентлэн но Правительстволэн Администрацизы бадӟым саклык висъя административной выльдӥськонлы. Калыклы луонлык кылдытоно кун властьысь ёзъёсы, дорысьтыз потатэк, Интернет пыр вазиськыны. Электрон амал вылэ нырысь ик выжтоно 19 услугаез. Тае чакламын вал туэ 1-тӥ августозь йылозяз-пумозяз вуттыны. Но кызьы ивортӥз А. Горяинов, та уж кӧнялы ке ӝегалоз.

 

 

Удмурт Дунне
By Удмурт Дунне 2 августа, 2011 10:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<