Шуг-секытэз вормись «Победа»

Удмурт Дунне
By Удмурт Дунне 31 августа, 2011 10:28

Шуг-секытэз вормись «Победа»

 

СПК-лэн кузёез А. Возняков.

Ува ёросысь 16 эштосъёс но кӧня ке крестьян-фермер хозяйствоос пӧлысь одӥгез огсыр азинскисез но котькыӵе шуг-секытъёсты вормисез луэ «Победа». Со интыяськемын ёрослэн шундыӝужан палаз, центрез — Мушковай черкогурт.

Гурт хозяйстволэн историез кутскиз кылем даурын. 1930-тӥ арын кылдытэмын вал «Красное знамя» артель. Бӧрысь со луиз «Победа» колхоз. Пу контораез 100 арлэсь кема йыг-йыг сылэ. Азьло отын церковно-приходской школа вылэм. Али пушкыз туала куронъёсъя ӟеч-ӟеч выльдэмын, укноосыз бадӟымесь.

СПК-лэн кузёез Александр Возняков татын 27-тӥ арзэ ужа ни, 15-тӥ арзэ кивалтэ хозяйствоен.

— Александр Прокопьевич, Вавож палъёсын вордскыса но будыса, быдэс улондэс сӥзиды Ува ёрослы, мушковай но пужмезь-тукля калыклэсь улон-вылонзэ умоятонлы. Уд жаляське-а?

Валтӥсь агроном Т. Воронова.

— Сыӵе малпан йырам ӧз но пыралля. Котькуд адями улонын ас интызэ шедьтыны мед быгатоз. Асьмеды озьы дышетӥзы. Кытын вордскид, отын ик ярад, шуо. Но ваньмызлэн озьы уг луы ук. Маин пӧртэм вавож но ува калык? Номырин ӧвӧл. Сояз но, таяз но уло музъемез яратӥсь адямиос. Соослы кулэ быгатӥсь кивалтӥсьёс но специалистъёс. Малы ке-а берло 10-15 аръёс ӵоже асьмелэн тросэз гурт хозяйствоос куашказы. Мугез тодмо: кивалтӥсьёс асьсэ кисызэс тырмытон сярысь гинэ сюлмаськизы. Государстволэн но сюлмаськемез тыро-пыдо уг адӟиськы. Матысь дыре гурт пумысен кун политика ӧз ке воштӥськы, азьланьын умоесь воштӥськонъёс луозы шуыса, оскон ӧвӧл. Золъёсыз хозяйствоос азинскозы, шоро-куспоосыз мырдэм но кызьы возиськозы, лябъёсыз куашкалозы. Асьмелэн али ке но гурт удысъя закон кутымтэ на.

Мон кызь сизьыметӥ тулысэз бусыын пумитай ни. Одӥгез но одӥг кадь ӧй вал, маин ке но висъяське, маин ке но пӧртэм луэ. Туэзэ урод уд шуы. Механизаторъёсмы кысык бусы ужъёсты вакчи дыр куспын быдэстӥзы. Табере тыршемзы син азьын: юосмы чебересь. Йыдымес ӝог утялтӥм, гектарысьтыз 12 центнер шедиз, кылем арын сярысь, 2 пол трос. Мукет культураосъя но урожаймы сыӵе ик. Нош кукурузамы 2 метрлэсь ӝужыт будэмын. Сое, куроен сураса, силосэ тыром. Ӟеч жалем сиён луоз. Оглом вераса, одӥг пудо йырлы быдэ ичизэ 26-27 центнер кормовой единица сиёнмы люкаськоз.

Нимысьтыз верало: милям муосмы, ёросысь вань хозяйствоосын ӵошатыса, тужгес начаресь — луо но луовыл уго, Пужмезь-Тукля бригадаын гинэ горд сюй пырыез вань. Озьы но ваньзэ чидаськом-вормиськом, музъем ужасьёс ваньзэ лэсьто пудо вордонэз азинтон понна.

Механизатор Н. Потёмкин.

Музъем уж милям оскемын усто специалистлы — валтӥсь агрономлы Татьяна Вороновалы. Со туэ дорамы ужаны лыктӥз Сьӧлта ёросысь. Соку ик улон инты сётӥм. Татьяна Николаевна бадӟым саклык висъя ӟеч, таза но сортовой кидыс уськытонлы. Али «Раушан» йыды будэтӥськом, «Аргамак» сезьы, «Фаленская-4» ӟег. Гыроно-кизёно муосмы 2 сюрс 500 гектар. Со пӧлысь 1080 гектар басьто тысё но пуртэсо юос, кылемез — 1420 гектар —  трос но одӥг аръем турынъёс. Ми трос йӧл-сӥль поттӥськом бере, музъем ужасьёс пудо вордонэз азинтон вылысь ваньзэ лэсьто.

Музъем ужанэз умоятон, та удысэ выль амалъёсты пыӵатон понна ялан выльдӥськом гырон-кизён техникамес. Кылем арын басьтӥм Новосибирскын поттэм «Лидер-3,6» БКМ усы. Сое сётӥм усто механизаторлы Николай Потёмкинлы. Туэ та агрегатлэн ляб интыосыз шараяськизы, сое эскерыны заводысь специалистъёс вуылӥзы.

Эштосамы али куинь комбайн возиськом. «Палессеен» ужа Александр Лукин. «Нива-эффект» комбайнъёсын — Алексей Агафонов но Александр Коновалов. Куиньназы оскымон механизаторъёс.

Пудо сиён дасянын но выль амалъёсты кутӥськом. Кизем турынъёсты, 2-3 час шупатыса, тӧдьы плёнкаен рулонэ биниськом. Озьы туж ӟеч сиён — сенаж — пӧрме. Али 1 сюрс 130 тонна дасямын ни. Турынэз косилка-плющилкаен турнаськом но мускытсэ 60-70 процентозь вуттӥськом.

Юосты кизёнын-аранын но пудо сиён дасянын котьку синмаськымон тыршо шофёръёс Анатолий Титов но Владимир Дементьев. Ваньзэ бусыын ужасьёсты но пудо возьмасьёсты нуналаз 2 пол пӧсь сиёнэн сюдӥськом. Нуназе сиськемзы понна 10 манет тыро, нош ӝытазе дунтэк сюдӥськом. Адямиослы со туж кельше. Воргоронъёс, сьӧразы сиён нуллыса, уг курадӟо ни.

— Пудо вордон вылын быдэс эштос возиське.

Скал кыскисьёс Л. Чучалова, И. Вахрушева, С. Блинова, С. Потёмкина.

— Йӧл-сӥль поттонэз арысь аре ӧй ке будэтысалмы, ӧй быгатысалмы выль техника басьтыны. Соин ик та удыс понна быдэс ар ужало механизаторъёс но мукетъёсыз. Озьы луонлык кылдэ арлы быдэ пудо уллёмес йылэтыны. Али милям 990 йыр пала сюро таза пудомы, со пӧлысь 345-ез — скалъёс. Туэ 7 толэзьскын котькуд скаллэсь 2 сюрс 923 килограмм йӧл кыским, нош али нуналаз 13,5 килограмм потэ, яке кылем арын та дырен ӵошатыса, 2 но ӝыны килограммлы тросгес кыскиськом.

Бадӟымез фермамы Мушковайын. Соин 15-тӥ арзэ кивалтэ ни Надежда Люкина. Татын 180 йыр скалъёс интыямын. Соосты 6 дояркаос утялто, кык вошъясьёссы вань. Умой ужа молокопровод, йӧл сӥятон танк, миксер. Скал кыскисьёслэн матысь юрттӥсьсы луэ Анатолий Дементьев. Усто механизатор МТЗ-80 тракторен тол но, гужем но фермаын тырше, пудо сюдэ. Дояркаос куспазы вожмаськыса йӧл кыско. Соос пӧлысь котьку сямен азьпал радын ветло Зоя Петрова, Павел Белорусов, Зоя Егорова, Анна Салтыкова но Алина Морозова. Эшъёсызлэсь бере уг кыльы егит доярка Надежда Романова. Соос вылын быдэс ферма возиське.

Пужмезь-Тукля фермаысь но дояркаос мылысь-кыдысь тыршо. Быдэс коллективлэн ӟеч ужаменыз хозяйство сьӧд-тӧдьы выжы скал вордонъя племрепродуктор луиз ни. Азьланьын, оло, племзавод но луом. Нош матысь ужпуммы — араз скаллы быдэ 5 сюрс килограмм йӧл кысконо. Сыӵе малпанэн улэ котькудӥз доярка, пудо сюдӥсь, специалист.

Геннадий Романов.

Туспуктӥз Владимир Беломорских.

Удмурт Дунне
By Удмурт Дунне 31 августа, 2011 10:28