Уралысь Бродвей

Удмурт Дунне
By Удмурт Дунне 23 августа, 2011 12:08

Уралысь Бродвей

 

Конжак из - Уралысь огез ӝужыт гурезь - зарезь вадьсын 1 сюрс 569 метре кыстӥське. Йылаз нуись сюрес кыстӥське 21 иськем. Интыяськемын Свердловск областьысь Кытлым посёлок дорын. Нимамын вогул выжыысь Конжаков пӧйшурасьлэн нимыз-тулызъя, солэн юртаез гурезь выжыын сылэ вылэм. Ижлэсь та гурезь 850 иськемын.

Малы мон такеме лыктӥ, кытчы тубисько, вамышлы быдэ ӵемтылыса, ма понна асме курадӟытӥсько? Тыбыр сьӧрын ог сизьым килограмм рюкзак, пыд улын изъёс, соослэн лэчыт сэрегъёссы пыдпыдэсэ мертасько. Шутэтскысал али шуныт зарезь дурын, кӧтме шунды шоры урдыса. Сплавын но тавысь сокем секыт ӧй йӧтысал: шуныт дӥсен, сиёнэн туйнам песьтэръёсты шур кузя васькытысал пыж… Тазьы асме оло жаляса, оло тышкаськыса тубисько уйпал Уралысь Конжак из нимаськись гурезе.

Суредасьёслэн кушсы, Палэсмуртлэн карез

Гурезь выжыын инкуазь асьме уйпал ёросын кадьгес: котырак тэль, но пичи дырысен тодмо писпуос пӧлын отын но татын адскыло кедръёс. Соослэн саюлазы тӧл-кезьытлэсь ватско палэзьпуос — шунды шоры мычо кисьманы кутскем емышсэс. Вамышлы быдэ пумисько лазег, сюбег шуръёс — ӟольгыри пыд коттымон гинэ, вузы юзмыт — пинь долка, ческыт но дун. Турын уг буды, дылькез ӧвӧл, соин-а, мар-а чорыгез но, вукибыез но уг адӟиськы. Ярдурысен кылыны уг луы тыныд вазиськемез: вольыт кӧльыос вылтӥ гурезь уллань зол бызись шурлэн жильыртэмез адями куараез соге.

Гурезь выжыысь шурлэн ярдураз.

Вамышъяськом кык адями тэрымон сюрес кузя. Гурезьёс кыдёкын, бус пыр сямен гинэ адӟисько. Котырак писпуос, соос борды ошылэмын горд басма юдэсъёс — сюрестэ уд ышты. Сюресэз бен сюрес кадь ӧвӧл: нырысь изъёс мыжык быдӟаесь вал, ог вить иськеме тубыса, йыр быдӟаесь луизы ини. Нош нюжтӥськоно на эшшо дас куать иськеме! Та сюрес кузя арлы быдэ бызьыло, пе, быдэс Европаысь нюк-гопъёсты гажась спортсменъёс-марафонецъёс, кык сюрс пала адями люкаське ньыльдон кык иськемез ортчон понна. Соин шутэтскон интыос утялтэмын: консерва банкаос, бутылкаос огинэ люкамын, тылскем бервыл котыръёсын ӟусъёс шуккемын, ӝӧкъёс интые инъямын лӥялъёс. (Визь-кенеш: консерва банкаос туж умой ӝуало, соин ик соосты тылскеме куяно.) Куд-ог нюлэс кушъёслэн нимъёссы пул вылэ гожтэмын, кылсярысь, Суредасьёслэн кушсы.

Тямысэтӥ иськемысь тэлез мон нимасал Палэсмуртлэн карез: котырак сьӧд-сьӧд — писпуос вылысьтыз-вылаз будо, выжыоссы, зӧк кыйёс сямен, музъем валлин кыстӥсько, пыдэз нокытчы мертчытыны. Нокытын  небыт му ӧвӧлэн писпуос возисько, изъёс борды кырмиськыса. Выжы азьло небытак ӟыгыртэ кадь кӧльыез, собере кекатэ, кекатэ… Б-р-р… Ужастик пуктыны нокыӵе павильон кулэ ӧвӧл, декорация дась.

Вышкы быдӟа изъёс пӧлын.

Озьы инкуазьлы паймыса, берпуметӥ кужыммес поттыса, шутэтскыса-шутэтскыса шок-пуль ортчим дас вить иськемез. Со понна кулэ луиз быдэс нунал. Тямыс часын ӝыт вуим стоянкае. Татын ми ортчытом кыкетӥ уймес. Бускельёсмы но трос гинэ: кинъёс ке Конжак гурезьысь васько ини, мукетъёсыз, ми сямен, тубо. GPS-мы ивортӥз, зарезь вадьсын ми тямыс сю метр кемын шуыса. Шокан уг пытсаськы, сюлэм гадьысь уг тэтчы, пыдъёс гинэ коскамын, иське, тямыс сю метр — со туж ик вылӥын ӧвӧл, омырын кислород тырме. Мае возьматоз ини ӵуказе нунал?

Сиён пӧран но мунчое пырон

Поход — со кужымдэ чаклан, быгатонлыкъёстэ волятон, инкуазен огкыл утчан. Татын ӧвӧл кивалтӥсьёс но подчинённойёс, узыръёс но начаръёс. Конжак гурезь дорын, валамон, тросгес шутэтско (мон шуысал, тазалыксылэсь юн луэмзэ эскеро) Пермь но Екатеринбург палъёс. Но ми пумиським Белоруссиысь, Брестысь лыктэмъёсын но. Бадӟым группаосын (ог дасо адямиен) лыкто егитъёс.

Пилем пушкын.

Ми  семьяен тазьы ветлӥськом бере, пайми пермьёслы: анай-атай, дас но сизьым аресъем пиос но песянайзы гурезьёсын кык арня ини, пе. Котырысь вань гурезь йылъёсы тубаллям, пӧртэм интыосын кӧлаллям. Озьы ке но дӥсьсы чылкыт, иське, кезьыт вуэн ке но мисьтасько. Нош мае сиё? Та палан одӥг гурт но ӧвӧл, магазинэ нуналлы быдэ уд ветлы. Ми, куинь нуналлы потэмъёс, сьӧрамы кык рюкзакен тушёнка, кеньыр-макарон тубтӥськом, канфеттэк но улэммы уг луы. Нош таос кык арня кӧс ӝук вылын! Со понна чеберлыкез адӟим, пе, пиосмес дышетӥм инкуазен ваче син кыльыны, урод сямъёссэс вормыны. Тӥ, дэмлало выль тодмоосмы, та сюрес вылысь коже, татын кырсь,  калыкез трос — Бродвейлэсь номырин пӧртэм ӧвӧл. Мынэлэ Серебрянской гурезь котыре, отын шыпыт.

Краснотурьинскысь (та город кӧня ке дасо иськемын) мӧйы воргорон Конжаке куинетӥзэ тубай ини, пе, йылозяз ӧй вуы на, но арлы быдэ кӧня ке метрлы ке но вылӥегес нюжтӥськисько. Мукетыз пиосмурт — тушез пурысьтамын, киосаз куас бодыос —  гурезе тубисько, пе, 55 аресме пумитаны, сьӧрам шампанской тубтӥсько. Сое огнады юоды-а, юасько. Мынам арескам, шуэ, гурезь кеч кадь тэтчаны мылкыд карисьёсты уд шедьты ни. Бордамы сиськыны чортӥськомы вал но, пумит луиз, шампанскойме, пе, гурезь йылэ вуытозь, уг усьты.

Пӧртэм сямо адямиосты огазея поход. Нырысетӥ нуналаз ик шӧдӥське: адями ас кужымезлы оскиське яке дышемын мукетъёс вылын ворттылыны.

Лудкеч адямилэсь уг кышка.

Кылсярысь, нылкышноосты огазея яке люке сиён пӧран. Тылскем вылын нуналаз куинь пол шыд-ӝук пӧзьтыса, кӧё-вӧё тусьты-пуньыез миськыса, сьӧд-сьӧд суэсь пуртыосты сузяса, кал быре. Но суч-суч жадем бере, ӝыт сиськыку, мылкыдмес ӝутэ актрисамы. Жингрес куараеныз удмурт кырӟан кырӟаса, шудыса-серектыса куноятэ, пичи сектаське но.

Бизнесменшамы нырысетӥ нуналысен ик вылтӥяськыны кутскиз. Котелокты борды, пе, киы суаське, ӵынатэм чайды гурӟылытэ… «Мыным но шыддэс вае» шуисьлэн кузяз мукетъят мед ветлозы ини Турциысь  официантъёс-утялскисьёс.  Аслам но бен сьӧлыке вань: вож чайлэсь быремзэ шӧдыса, кӧня ке пакетсэ кисыям ватӥ. Ваньмыз кофе юизы, мон — пеймытын — чай.

Воргоронъёслэсь сямзэс шарая… мунчо. Шонерзэ ке, сое лэсьтон но эстон. Ог дасо изъёсты шур дуре ог-огзы вылэ тыроно, улӥяз гурлы сямен пась кельтыса. Отчы тылсконо но дугдылытэк час ӵоже эстоно. Син азяды пуктӥськоды-а, кӧня пу кулэ! Вот тэль кузя пу утчан, дасян ик жуммытэ пиосты. Эшшо мунчоез «пуктоно» на, татын котькудӥз визьмо кариське, косъяське, кесяське, оскон ик ӧвӧл, мунчозы куке-соку пӧрмоз шуыса. Озьы вырыса, бызьылыса шеде самой валасез воргорон — соку ини уж пӧзе, син куспын мунчо пӧрме. Горд луытозь ӟырдам изъёс котыртӥ  шудон коркалы выллем  шукко вайыжъёс, вылтӥз но урдэстӥз шобырто паськыт клёнкаен, кортӵоген йыгаса. (Визь-кенеш: сьӧрады басьтэ скотч — клёнка вискытӥ пасьёсты лякылыны.) Озьы дас метр клёнкалэсь пӧрме мунчо. Курадӟем, пӧсям понна кузьым — нылкышноослэсь азьло веникен шуккиськон!

Пиос бере черод вуэ кышноослы-нылъёслы но. Изъёс вылэ ву кисьтӥськод, пӧсьлы чидатэк, черектӥськиськод, кедр но кызьпу вайёслэсь керттэм венникен шуккиськиськод но, клёнка борддорез ӝутыса, бызьыса кыре потӥськод,  шуре кӧльыос вылэ выдӥськод — вуэз кезьыт, инмысь шорад учкись тыр толэзь кадь… Собере нош ик пыриськод шоканы луонтэм пӧсе.  Дас вить иськемез тубыса пумем мугор озьы пумен небӟе. ӵуказе эшшо куатьсэ вормоно на шуыса малпан уг ни кышкаты.

Бурдъёстэк лобан

«Ночевала тучка золотая на груди утёса великана…» Милям но гурезямы М. Лермонтовлэн пилемез кӧлэм. Но турист понна со шумпотон вылымтэ. ӵуказеяз ӵукна  кульчоё бус чурыт миндэр вылысьтыз улӥе гылӟиз но,  кыдыраны кутскиз, воксё кезьыт луиз. Но милям одӥг интыетӥ куинь пол котыръяськыны луонлыкмы ӧвӧл, гурезез туннэ ик вормоно. Шуныт курткаосын, резина сапегъёсын нош ик  потӥм кӧльы сюрес вылэ. (Визь-кенеш:  резина пыр изъёс вӧсь каро пыдтышкез, кулэ  зӧк подошваен котмисьтэм кроссовки.) Таяз радэ тубиськом буш киын, палаткаосмес, мукет котырмес кельтӥм кӧлэм интыямы. Татын ваньмыз озьы ог-огзылы оско, лушкаськон понна  сонякеме тубонэз ӧвӧл угось, басьтыны но номыре. Вариж пась кельтэм палаткаостӥ, сиён утчаса, ворттыло кузь быжо урдоос (бурундукъёс) гинэ.

Зарезь вадьсы одӥг иськеме тубиды ини, ивортӥз визьмо GPS. Иське, сюреслэн 17-тӥ километраз вуимы ини. Мискинь кызьпуос, кыӵе соос татын шушесь: вайёссы икыр-кукыр, ӝуен шобырскемын, выжыоссы музъем вылэ тэтчемын, пуштыр-пуштыр будыны писпуослэн моӵсы уг тырмы: музъем начар, куазь кезьыт. Август шорын эмезь, кудымульы  вуымтэ на, уз но кисьмалэ ни, вылды, угось ӝоген татын лымы усёз. Озьы емыш понна сюлмаськонъям вуимы воксё мукет инкуазе. Писпуос бере кылизы, пыд улын кыӵе ке куакъёс гинэ будо на. ӝуждалазы ог куамын-ньыльдон сантиметр, куаръёссы тодмотэмесь, сяськаян вакытсы — котырес гурыоссы ошиськемын. Со, пе, карликовой кызьпу но бадьпу, валэктӥз «ботаникмы», озьы нимаськомы камеразэ киысьтыз куясьтэм телережиссёрез, будосъёс сярысь со трос тодэ. Нош тӥни — живокость, шуэ. Гырлы выллем лыз сяська — бакча возисьёс сое дельфиниум нимало — кызьпулэсь ӝужыт! Тундраез адӟон понна Полярной круг сьӧры мынонэз ӧвӧл вылэм.

Озьы инкуазьлы паймыса, ӧм шӧдылэ гурезь йылэ вуэммес. Но со нокыӵе йыл вылымтэ —  куинь гурезьёс вискын ог кык иськеме кыстӥське ӵошкыт инты, географъёс сое плато шуо. Но ма таӵе: пыд улысь изъёс ышизы, кылдӥз сыръясь инты, буй-буй ӝуе пыдлёгозь выёно. Тани кытысен кутско вылэм гурезь уллань бызись шуръёс. Шат дас тямыс иськеме тубим вуэз коланы?! Но горд лентаен тодмостэм сюрес азьпала ӧте. Иське, отын маке тодмотэмез, сюлэмез ыркак карисез. Тани маке чильк-вальк кисьтаське. Гуштылыса-гуштылыса вожмаськыса сямен азьпала мынӥськом. Огезлэн гурезьлэн ӵошкыт бамалаз тэркы сямен кылле ты. Малы отысь вуэз уллань уг бызьы? Кызьы сыӵе  вылӥын люкаське сомында ву?

ӝуй шӧдтэк шорысь пыкъяськиз изъёсы. Горд лентаос табере нош ик нуо выллань. Отын, изъёс но пурысь инбам сяна, номыр ӧвӧл. Изъёс — вышкы быдӟаесь! Тубиськод, соосты киын, пыдесын маялляса. Пиелы тодаз выйытӥсько уйпал Уралын улэм П. Бажовлэсь выжыкылъёссэ. Татӥ али но бызьылэ, дыр, пичи пужей — Серебряное копытце, пыд улысьтыз дуно изъёс поттэ. Ойдо огзэ ке но шедьтом, дэмласько. Жаляса верано,  милем шедьылӥзы пурысьёсыз гинэ. Мырдэм но кызьы синйылтӥм пурысен-вожен сураськемзэ. Сое пие кисыяз понӥз. Дунозэ шедьтон понна изъёслэсь лушкем кылзэс тодоно, дыр, Данила мастер кадь.

Улӥе кылиз ты. Сюлэм турк-турк тэтча, оло жадьыса, оло адӟылымтэзэ шӧдыса. Пилем ыркыт бусэн пыриз ым но ныр пушкы. Пыд йылысь погыртыны ӧз вормы но кыштырак улӥе васькиз, ты вадьсын бӧрдӥз. Ми кылим шундыен ваче син! Пилемлэсь вылӥын! Тани тазьы бурдъёстэк лобаны кыстӥсько вылэм адямиос гурезь йылъёсы.

Та нуналэ жадён пыд  йылысь вазь ӝыт ик погыртӥз. Кӧлӥм, кезьытэз шӧдылытэк. «Ма понна гурезьёсы вуим — быдэстӥм» малпанэн. Куинетӥ нуналаз дасяським гурезь выжые васькыны. Кык уй кӧлэм интымы пӧрмиз дорлы, со котырысь шурен но гурезен люкиськыны ик жаль. Кузь сюрес вылэ потэмлэсь азьло ӝот-ӝот сиськоно, угось ку ай шыд ӟузьылыны кылдоз. Котомкаосмес бугыръям — ӝытозь сиёнмы уз окмы. Нылкышноослы сырен нянен но яралоз, нош воргоронъёсты пӧсь сиёнтэк уд возьы, секыт котырез васькытон соос вылэгес усе угось.

Милесьтым азьвыл татын улэмъёс коръёслэсь шуккем ӝӧк вылэ кельтӥллям пирдан — пластик бутылкае понэм тари кеньыр. Со милемыз утиз бутерброд вылын улонлэсь. Тау сюлмо адямиослы! Ми но пунэме ӧм кыле — вуоно гурезьчиослы кельтӥм мунчо клёнкамес.

Быдэс нунал ӵоже васькытозямы, таки ӧй вала, гурезе тубыны-а, отысь питыраны-а капчигес. Тубон эскере кужымзэс сарвылъёслэсь, васькыку шальтырало пыдессинъёс. (Визь-кенеш: ӝужыт гурезьёсын тодматсконлэсь возиськоно сюлмынызы, тэтчась вирзӥбетэн, пыдъёсынызы курадӟисьёслы.)

Походмы улалтӥз: шуккиськыны ӧм шеде, куазь лапак ӧз зоры, со гинэ ма — мунчое кык пол пырим. Гурезьысь васькытэм кудымульылэсь варенняеным чай юон сяменызы воргоронъёсмы ӝыны ар малпаськозы ини вуоно гужем кытчы шонтон сярысь. Лыз-вож луэм пыдтышъёсы куректэмысь дугдӥзы ке, мон но бордазы итӥсько. Вуылымтэ дуннеос, вормымтэ шуг-секытъёс трос ай.

Туспуктӥз Лев Вахитов.

 

Удмурт Дунне
By Удмурт Дунне 23 августа, 2011 12:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<