Улон ачиз вераны куре

Удмурт Дунне
By Удмурт Дунне 31 августа, 2011 10:31

Улон ачиз вераны куре

 

Егит гожъяськись С. Самсонов.

«Писательлэн пӧсь сюлэмысьтыз потӥсь ӟырдыт кылыз калык пӧлын туннэ чузъяськыны, солы юрттыны, аслаз синмаськымон геройёсыз сямен, выль синмын улыны но ужаны дышетыны кулэ. Тросгес мед луозы чебересь, устоесь очеркъёсмы. Зэмос чеберлыко произведенилы тупасьёсыз гинэ мед кузёяськозы «очерк» рубрика улэ печатламъёсыз.

Документальной очеркъёсын ӵош книга ӝажы вылэ, со ӧртӥ жингрес гурен жильыртыса, мед лыктозы мукет амалэн гожтэмъёсыз но».

Тазьы гожтӥз «Молот» журналэ 50 ар талэсь азьло Удмуртиысь калык писатель Семён Александрович Самсонов «Очерк сярысь малпанъёсаз», угось та жанр сюлэмызъя луиз солы.

50-тӥ аръёслэн пумазы элькун газетъёсын но журналъёсын ӵем поталлязы солэн очеркъёсыз, лэчыт но сюлэмшугъяськытӥсь ужпумъёсъя статьяосыз, веросъёсыз. Нырысетӥ книгаез но — 1969-тӥ арын «Удмуртия» издательствоын 65 бамен потэм «Азьлане сюрес» бичетэз — нимаз очерклэсь кылдытэмын. Писательлэн 60 арес тырмон вакытаз лыдӟисьёс кие вуиз «Адямилы но бурдъёс кулэ» очеркъёсын бичетэз. С. Самсонов маде удмурт музъем вылын вордскем но будэм сӥё-дано, батыр адямиос, писательёс, тодосчиос, со вакытэ гурт улон сярысь. П. Поздеев литературоведлэн чакламезъя, С. Самсоновлэн очеркъёс бордын ужамез мукет литературной жанръёс борды басьтӥськыны аспӧртэмлыко выж луиз но, со ӧз ни кышка веросъёс, повестьёс но романъёс борды кутскыны.

1960-тӥ-1970-тӥ аръёсы ни С. Самсонов йыг-йыг султӥз дано удмурт писательёслэсь, классикъёслэсь Кедра Митрейлэсь, Григорий Медведевлэсь, Михаил Коноваловлэсь, Пётр Блиновлэсь, Михаил Петровлэсь, Трофим Архиповлэсь, Геннадий Красильниковлэсь лёгем сюрессэс азинтӥсьёс радэ.

Со радэ пыртӥзы сое «Азьлане сюрес», «Тӧллы пумит», «Тау тыныд, адями», «Шунды выллань, нунал азьлань» очеркъёсыз; «Шур мед бызёз!», «Пус», «Корзина», «Ӟиллё» но мукет трос веросъёсыз; «Гожтӥсько тыныд сопал дуннее», «Яратӥсько тонэ», «Тугаськем бугор», «Выжыкыл ӧвӧл та» но мукет повестьёсыз, «Дыдыкъёс бус пӧлы уг йыромо» романэз, писательёс сярысь мадёсъёсыз но трос мукет произведениосыз. Тросэз ужъёсыз берыктэмын мукет кылъёсы.

Семён Александровичлы сётэмын Удмурт АССР-ысь Кун премия. Со кивалтӥз шаерысьтымы Писательёслэн огазеяськонэнызы. РСФСР-ысь Писательёслэн огазеяськонзылэн правлениезлэн секретарез вал но СССР-ысь Гожъяськисьёслэн огазеяськонзылэн правленияз быръемын вал.

Зэм, отчыозь сюрес вакчи но, капчи но ӧй вал. Со сярысь Семён Самсонов ачиз вераз витьтон арес тырмон юбилеяз 1981-тӥ арын куарусён толэзе сое ӟечкыланы лыктэм калык азьын:

— Гажано эшъёсы, — шуиз со. — Бадӟым тау тӥледлы — тӥ туннэ монэным артэ. Мон шудо, тӥледын артэ ужай но ужасько шуыса, тӥ пӧлын мон улӥсько но гожъяськисько.

Та дырозь мон малы ке аслам аресэ но ужаме сярысь ӧй ик малпаськылы. Нош али аслэсьтым юасько: кызьы тон, Семён, улӥд та ӝыны даур улондэ? Монэным огъёзъёслэн улонзы огкадьгес, дыр: нырысь вакчи шудо пинал дыр, собере секыт ожмаськон вакыт. Егит пиос гуртъёсын зэмос ужасьёс луизы. Война кутскыку, мыным дас арес вал. Бубымы фронтэ кошкиз. Семья сярысь сюлмаськонъёс анайлы но ньыль пиналъёс пӧлысь бадӟымезлы, мыным, кылизы.

Мон дышетски кут кутаны. Анай соосты колхоз пудоослы гурезе ву тубытъянъяз кык нуналскын пӧськытъяз. Мон, Некрасовлэн «пичи мужикез» сямен, киям кутоно луи тӥр но пила. Пичи дӧдьыен гуртэ но фермае пу вайылӥ, тулыс но гужем кутсконо луи геры но усы борды, почта нуллӥ. Синвуме но ичи ӧй кисьты.

Малы мон со сярысь али тодам вайисько?

Верало ук, уродзэ тодэ вайытэк, ӟечсэ уд вала. Война вылтӥ мон аслэсьтым калыкме адӟи тужгес кышкыт но секыт вакытэ. Со дыре ик тужгес ӝутскем мылкыдо но кужмо луон вакытэ. Война вылтӥ пинал дыры сярысь мон мади «Милям гуртмы — Тыло» очеркысьтым одӥгезлэн героелэн нимыныз.

Литература пала мон кыстӥськи пичиысен. Туж яратылӥ Дёби Иван возьмаськисьлэсь выжыкыл мадемъёссэ кылзыны. Школаын мыло-кыдо сочинениос гожъялляй. Яратылӥ математикаез но. Можга педучилищее пыри вал, но войнаен сэрен семьяын шуг-секытъёс кылдӥзы, дышетскеме ӧз луы. Ужай колхозын счётовод луыса, нош дышетскон бордаз ялан кыскиз. Пыри фельдшере дышетскыны. Со дыре ик ветлӥ педучилищелэн литкружоказ. Гожъяй кылбуръёс. Ысъяй соосты газетъёсы. Куд-огзэ ёрос газетъёсын печатлаллязы.

1962-тӥ арын монэ витьымтэ шорысь ӧтизы «Советской Удмуртия» газетлэн редакцияз. Дэмлазы отын ужаны. Г. Красильниковен, В. Михайловен одӥг кабинетэ пуктӥзы, артэ ужазы Т. Архипов, В. Широбоков. Соос луизы мынам нырысетӥ дышетӥсьёсы. Нырысетӥ веросме адӟиз И. Гаврилов, нырысетӥ очеркме «Молот» журналэ гожтыны дэмлаз               М. Петров.

Писательёслэн огазеяськоназы пыреме бере ни мон дышетски вылӥ литературной курсъёсын. Отын дышетскытозям гожтӥ «Кам вадьсын гудыръя» но «Тугаськем бугор» повестьёсме.

Та удысын ужатозям, вал вормонъёс но, янгышъёс но, озьы ке но мон понна со туж бадӟым шумпотон. Зэм, гожъяськон уж капчи ӧвӧл. Ӝӧк сьӧры котькуд пуксемам мыным потэ, али гинэ кадь гожъяськыны кутскисько, нош планъёсы туж бадӟымесь: гожтоно геологъёс, война вылтӥ гуртлэн улэмез но ужамез сярысь романъёс, Париж коммунае пыриськем улосчимы Михаил Сажин, солэн тодмоез Лариса Чемоданова сярысь но мукет. Та малпанъёсме быдэстыны тыршо 70 арес тырмонэлы. Азьпалан  трос на уже. Со — бадӟым шуд…

* * *

Семён Александрович малпанъёссэ быдэстыны быгатӥсь адями вал. Но солы 62 аресозь гинэ улыны сётэмын вылэм.

Самсонов югыт дуннеез адӟиз 1931-тӥ арын 1-тӥ куарусёнэ Пичи Пурга ёросысь Тыло гуртын. Татын будӥз, татын дышетскиз, татын калыксэ тодӥз, татысь шедьтӥз, тодматскиз вуоно геройёсыныз. Книгаоссэ гожтэмез бере татчы ветлӥз лыдӟисьёсыныз соос сярысь вераськыны. Выль рукописьёссэ библиотекарьёс пыр гуртоосызлы сётъяз, мед лыдӟозы, мед вералозы, кызьы пӧрмем солэн выль пӧрамез, печатламлэсь азьло мед вералозы, со тупатъяны вуоз на. Паймымон вал соиз: огшоры лыдӟисьёс, гуртын ужасьёс шонер дунъет сётыны быгатылӥзы. Тодам лыктэ  Пичи Пурга ёросысь Бобья-Учаын «Дыдыкъёс бус пӧлы уг йыромо» книга сярысь вераськемзы.

Лыдӟисьёс но критикъёс та романэз потэмез бере ик синйылтӥзы, сэрттӥзы-пертчизы, дунъет сётӥзы, гожъязы, асьме дӥньын гинэ ӧвӧл, Москваын но. Писательлэн прозаезлэн социально-психологической пуштросэз, солэн сэзь, ӟырдыт, чидасьтэм геройёсыз, гурт улонэз конфликт пыр возьматон бордазы кыско. 1979-тӥ арын РСФСР-ысь Писательёслэн союззылэн прозая кенешонэз ортчиз Ижын. Самсоновлэн произведениосызъя отын вераськизы Удмуртиысь тодосчиос Роза но Даниил Яшинъёс, Москваысь М. Чернолусский, С. Залыгин писательёс. Соос пусйизы: автор ӟеч тодэ гуртэз, колхоз улонэз, вала солэсь кулэяськонъёссэ, шӧдэ вылезлэсь пушйыны кутскемзэ. Со гожъя толлоез, туннэез но ӵуказеез сярысь. Писатель улэ «улон ачиз вераны куре» ӧтён улсын.

* * *

 Токма уг верало, дыр: адями малпа, нош улон ачизъя лэсьтэ. 1993-тӥ арын 16-тӥ инвожое Бобья шур возь вылын Гырон быдтонлы сӥзем шулдыръяськонын Семён Александровичлэсь интервью басьтӥ, со луиз берпуметӥез интервьюэз.

Нунал юри тупатэм кадь шулдыр вал, интыез но суредам кадь чебер. Писатель тӧдьы кепкаен но саесъёссэ гырпумозяз пужаллям тӧдьы дэремен. Со кыӵе ке воргоронэн вераськыса сылэ. Мылкыдзы умой, шӧдске. Мон доразы мынӥ но аслам куронэным вазиськи. Семён Александрович ӧжыт пумитъяськиз ик. Ойдо, пе, сӥзьыллы кельтомы, соку ик выль гожтэмысьтым люкетъёссэ но радио пыр лыдӟомы. Мон, куараме чурытгес карыса, шуи: соку Гербер сярысь веран вужмоз.

Соку, пе, давай гожты.

— Мон яратӥсько калыкен ӵош ветлыны, — вераз со. — Автобусын нылъёс кырӟаса лыктӥзы, быдэс улонэ син азям ортчиз. Туэ таӵе шулдыръяськонысь гинэ адӟиськод на калыклэсь огъя мылкыдзэ. Али адямиос нимазыгес уло, нош татын соос огазьын. Ог-огзылы верало ужамзы, мылкыдзы сярысь. Татын ведь мынам гуртэ, мынам яратоно музъеме, тодмо адямиос, соос монэ бордазы кыско. Соин ик —  таза-а мон, висисько-а, шулдыр-а, зоре-а — соосын ӵош луэм потэ, мон лыктӥсько доразы.

Ужаны соос быгато, но сюлмаськонъёссы но трос. Тани Тыло гуртэ ик. Соос быгатӥзы неперспективнойысь потыны. Соиз умой. Табере малпасько: кылёно-а соослы «Молния» колхозэ ик яке нимаз улыны но ужаны оскалтоно? Азьлогес нимазъяськем фермаос куанермыны кутскизы. Фермаоссэс тупатъяны но кужымы уг тырмы. Сюлэм вӧсь луэ, сое адӟыса. Туала улонлы дунъет сётыны но али валаны уг на луы. Шулдыръяськонзэ но, куректонзэ но ӟеч-ӟеч валаны кулэ ай.

Семён Александрович Самсоновен интервью «Арня ӵукна» радиожурналын 1993-тӥ арын 23-тӥ инвожое чузъяськиз, 8 но ӝыны минут кыстӥськиз. Толэзь но ӝыны ортчыса, сыӵе ик шулдыр нуналэ калык сое келяз пыраклы кӧлон интыяз.

Милитина Гаврилова, Удмуртиысьдано журналист.

Удмурт Дунне
By Удмурт Дунне 31 августа, 2011 10:31