Укно улын уяло юсьёс

Удмурт Дунне
By Удмурт Дунне 10 августа, 2011 08:28

Укно улын уяло юсьёс

 

Котькуд тулыс Ижысь Т. Барамзина урамысь 66 номеро корка котыр выльдӥськыны ӧдъя. Будосъёслэсь сяськаямзэс возьманы корка азе «пересьёс» пуксё. Кыдёкысен учкыса, зэмзэ ик, соос улэпесь, кожалод. Нош матэ вуыса, валаськод: корка азьын — мунёос. Соослы туэ сяськаослэсь улӟемзэс кема гинэ возьмано луиз, июнь толэзе уйёс кезьытэсь вал, маде огез та чеберез лэсьтӥсь Нина Зуева.

Мунёослы мӧзмыт ӧвӧл. Пичи гинэ тыметын «ӟазегпиос» уяло, «крокодил» но тани, вуысь потыса, шунды азьын кылле.

— Сад-бакчае ӧвӧл, но сяськаосын кызё аръёс пала вырисько ни, — шуэ Нина Зуева. — Соосты будэтӥсько укно улам — улӥсько нырысетӥ этажын. Азбар котырме выжыкылысь геройёсын шулдыр карисько на.

Укмыс этажъем коркан  улӥсьёс ялан паймыса учко чебер пӧрмытэм интыез. Нина Гавриловналэн верамезъя, нырысь араз гинэ, пе, быдэ вуымтэос укылтэмъяськизы. Но табере нокинлэн но киыз уг ӝутскы чеберез тур-пар карыны.

— Кылем арын мыным 70 арес тырмиз, секытгес йӧтэ азбар котырмес утялтыса возьыны, — шуэ Н. Зуева. — Но ярам, али мыло-кыдо юрттӥське Людмила Губанова. Татын улӥсьёс Людмила Сергеевнаез корка кузёлы бырйизы.

Ас вакытаз Нина Гавриловна фельдшер луыса ужаз Ижысь 73 номеро школаын, Людмила Сергеевна — автозаводын. Пенсие потыса но, тэк улыны ӧз чидалэ. Чеберез кылдытыны нокыӵе коньдон кулэ ӧвӧл, мылкыд гинэ мед луоз, лыдъяло соос. Урамысь костаськись арбериосты, нылпи шудонъёсты синйылто ке, соку ик уже куто — ваньзэ асьсэ киосынызы лэсьто. Тани куштэм питранлэсь чебер юсь пӧрмиз, кулэтэм дӥськутъёс выжыкылысь геройёслы яразы. Огез жаль: мыло-кыдо воргоронъёс юртамы ӧвӧл, шуо соос.

Мон но та корка котырын улӥсько. Полина внучкаеным  потӥськомы ке, нырысь ик мунёосын ӟечбуръяськиськом, собере вуын уясь шудонъёсты кутылӥськом. Соосын шудыны нокинлы но алэмын ӧвӧл.

Та чебер корка котырысь берло аръёсы уд адӟы ни юисьёсты, соос но возьдасько шулдыр интыез саптаны. Озьы та нылкышноослэн сюлмаськеменызы, татын улӥсьёслы амалтэк ӟеч сямъёс пыӵало.

Устинов ёросын таӵе инты одӥг гинэ. Арлы быдэ ортчылӥсь азбар ӵошатсконъёсын  ёросын солы 1-тӥ инты сёто. Артэ улӥсь адямиослэн вань урод мылкыдъёссы тӧлӟо, та чеберез адӟыса. Нош нылкышноос   шуныт кылъёслэсь асьсэлы шумпотон басьто. Кивалтӥсьёс Н. Зуевалэсь но Л. Губановалэсь ас мылкыд каремзыя тыршемзэс вунэтыса уг кельто, мукетъёссэ но соослэсь адӟем карыны ӧтё.

Татьяна Банникова.

Туспуктӥз Владимир Беломорских.  

Удмурт Дунне
By Удмурт Дунне 10 августа, 2011 08:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<