Удалтэм калык

Удмурт Дунне
By Удмурт Дунне 30 августа, 2011 12:37

Удалтэм калык

 Пичи Пурга ёросысь Брангуртлэн историезлы, отысь калыклы сӥзьыса, «Бурановский сельсовет. История и современность» книга потӥз. Сое дасязы Пичи Пурга черкогуртысь историлы дышетӥсь Валентина Зорина но Яган-Докья гуртысь дышетӥсь Анна Вологжанина. Соослы юрттӥськизы Павел Чушъялов, Людмила Посадова, Владимир Байсаров, Арсентий Ивашкин, Кузьма Кузнецов но Юлия Миронова. Книга поттэмын «Удмуртия» издательствоын.

Книга кие кутымон пӧрмем. Нош пуштросэз макем узыр! Вылбамаз адско гуртлэн чебер интыосыз, тодмо адямиосыз. Нырысетӥ бамаз Брангурт палъёслэн картазы суредамын. Азьвыл аръёсы та сельсоветэ 10 пичи гурт пыре вылэм. Котькуд гуртлэн кылдэмез сярысь гожъямын.

1900-тӥ-1924-тӥ  аръёсы Сарапул уездысь Брангуртысь Дун-чылкыт Тройчалы сӥзем черкын ужамын тодмо удмурт этнограф, тодосчи, баӵко Григорий Верещагин.

Вашкала дырысен тапалъёслэн данъяськонзы луэ Яган базар. Шутэтскон нуналъёсы отчы дӥськутэн, пудоен но бакча сиёнъёсын вуз карыны ветло вылэм. Али ке но та базарзылы бырыны уг сёто.

Брангуртъёс данъясько татын вордскем адямиосынызы: кылбурчи но радиожурналист Виктор Ивашкин, суредасьёс Николай Быков но Зоя Лебедева, Пичи Пургаысь «Маяк» редакциын кема аръёс ӵоже ужам корреспондент Кузьма Кузнецов. Та музъем вылын ик, Пуро-Можга гуртын, пичи дырыз ортчиз кылбурчилэн но журналистлэн Эрик Батуевлэн. Яган-Докья шор ёзо школаын дышетскиз калык писатель Кирилл Ломагин. Брангуртын вордскемын тодосчи-лингвист Константин Баушев. Будэ ини мукетыз но тодосчизы — Анастасия Чушъялова. Настя та вакытэ Москваын улэ но дышетске.

Брангурт муниципал кылдытэтын Социалистической Ужысь Геройзы но вань. Со — Антонида Жигулёва. Та нылкышно кема аръёс ӵоже скал кыскись луыса ужамын. Октябрь Революцилэн орденэныз пусъемын комбайнёр Александр Бабин. Горд Кизили орденэн — Михаил Ефремов. Со кема аръёс «10 лет УАССР» нимо совхозын трактор-машинаосты тупатъян мастерскоен кивалтӥз. Уноез ужасьёссы Ленин нимо, Ужысь Горд Знамя, «Знак Почёта» орденъёсын но медальёсын пусъемын.

Брангурт сельсоветысь тросэз воргоронъёс войнае кошкизы. Уноез соос пӧлысь бырыны шедизы. Кылсярысь, Яган-Докья гуртын 143 адями быремын, Брангуртын — 116, Пуро-Можгаын — 82.

Берло аръёсы гуртлэсь данзэ эшшо но ӝутӥзы песянайёс.

Книгае пыртэмын школаын дышетскись нылпиослэн но ужъёссы. Соос котькуд гуртысь, пересьёслэсь юалляськыса, удмурт семьяослэсь воршудъёссэс но бӧляк нимъёссэс гожъяллям.

Любовь Тихонова.

 

 

Удмурт Дунне
By Удмурт Дунне 30 августа, 2011 12:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<