Тэк улыса купырмод

Удмурт Дунне
By Удмурт Дунне 30 августа, 2011 12:25

Иванов кузпалъёс кыкназы ик вордскемын Пичи Пурга ёросын. Николай Иванович — Улын Юриын, нош Антонида Михайловна — Гужношурын (Поӵышын). Та гуртъёслэн виссы кыдёкын ик ӧвӧл ке но, егитъёс городын пумиськизы-тодматскизы. Ай Ижын гинэ ӧвӧл — Глазовын. 40 ар талэсь азьло соос кооперативной училищеын дышетскизы. Тоня отчы вуз карисе  мынӥз, нош Коля — бухгалтере. Поездын мынон-бертон сяменызы ик егитъёс умой-умой тодматскизы. Училищезэс йылпумъяса, нылашез асьсэ ёросысь ик Вуж Мӧнья гуртэ ужаны келязы, нош Коляез Иже — «Удмуртпотребсоюзэ» — ӧтизы, соку ик ревизоре пуктӥзы. Арлэсь кема ог-огзылэсь палэнын улыса, егитъёс ӧз чидалэ — огазеяськизы, улыны Иже выжизы.

Отӥяз Николай Ивановичлы трамвайно-троллейбусной управление валтӥсь бухгалтерлэсь интызэ ӵектӥзы. Та удысын со, шутэтскыны потытозяз, тыршиз. Нош Антонида Михайловна книгаос пушкы выйиз.

— Макем тунсыко уже вал, — тодаз вае нылкышно. — Вакытэз сыӵе тупаз, адямиос соку книгалы туж но туж кулэяськылӥзы, трос лыдӟиськылӥзы. Ми доры юри лыкто вал предприятиос, нимаз адямиос. Кулэ луись книгаез басьтон понна вазь ӵукна ик черодэ султылӥзы. Мода сыӵе вал — стенкаоссэс книгаосын тырмытъязы. Табере егитъёс соосты кулэ уг ни каро.

Кузпалъёс кыкназы но ужысь ветеранъёс. Антонида Михайловна яратоно удысаз 32 ар тыршиз. Николай Иванович — солэсь но уногес. Гужемзэ сад-бакчаязы кыштыр бергало. Вазь тулыс ик отчы улыны мыно. Николай Иванович егит дырысеныз  мушъёс котырын берга.

— Чечыеным ваньзэсты утялтӥ, — егит дырзэ тодаз вае воргорон. — Выжыямы котьку но муш вордӥзы бере, мон со сямлэсь ӧй куштӥськы. Адямиез утялтыса, мушъёс, пе, эшшо но тросгес чечызэс сёто, шуо вал пересьёсмы. Ма, мынам вынъёсы но гужгетӥсьёсты вордо. Антонида Михайловналэн но котьмаиз удалтэ.

Кузпалъёс ныл но пи будэтӥзы. Пичиез — Ниназы — Ижын улэ. Со но анай-атаезлэсь адӟем кариз: товаровед луиз, Ижысь кооперативной техникумез йылпумъяз. Саша пизы, УдГУ-ысь математика факультетэз йылпумъяса, Москваын ужаз. Семья кылдытыса, алигес улыны выжиз Оренбурге, кузпалызлы матэгес. Николай Ивановичлэн но Антонида Михайловналэн Лёва нуныкайзы вордӥськиз. Сое адӟемзы потыса, кузпалъёс сюлэммы путӥське ини, шуо.

— Юри палъёсы табере шер вуылоно ини, — гуртсэ тодаз вае воргорон. — Тазалык лябӟыны кутскиз. Пыдъёс ветлэмысь дугдыны шӧтало ини. Вордӥськем интыос ноку но сюлэмысь уз потэ. Кыӵе мон яратӥсько со интыосме, али ке но уйвӧтъёсам шур дуртӥ гольык пыд бызьылэмме адӟисько. Таӵе ик эшъёсыным визнаса пукиськом кадь, ыбылӥськылыса шудӥськом. Кызьы пие сокем кыдёкын улыны чида — паймисько, мон армиын но вордскем гуртэлэсь, анай-атаелэсь но ӵош шудэм эшъёсылэсь мӧзмыса бырисько вал. Туала егитъёс музонэсьгес ик, вылды.

— Удмурт адями — со ӝикыт адями, — кузпалыз сярысь ӟеч кылъёс вера Николай Иванович. — Тоняе мынам туж ческыт пӧра. Юрт котырмес но бакчамес чылкыт возе. Нош толалтэлы кӧня банкаосы кияр но помидор ворса, компот лэсьтэ. Ужам ужез юнме уг луы, калыклы со ӟеч карыны яратэ, собере, толалтэзэ тыро банкаоссэ чисто бускельёсмылы но ӵыжы-выжыосмылы сётъя.

Антонида Михайловна яратэ сяськаосты но. Кыӵеез но соос бакчазэ уг шулдырто! Шумпотон ваё аслыз но, коркаез вӧзтӥ ортчись адямилы но. Бер сӥзьылозь Ивановъёс сад-бакчаязы уло, татын, городын сярысь, шоканы ик качпигес, шуо кузпалъёс.

— Куд-ог бускель кышноос сямен подъезд азьын пукыны уг яратӥськы, мар нош дырез токма быдтод?! Коть мар ке киужен-а, мар-а выре вал, чик дауре, ужлы ёрмыса, кылзэс шерыса, пуко ук. Мынам одӥг минутме но, часме но токма быдтэме уг поты. Телевизор учкон сямен но киосы выро: пыдвыл яке пӧзьы керттӥсько. ӟустариез кесяса но мар но со пӧрмытыны луэ ук. Мылкыд гинэ мед луоз, уж ачиз сюроз. Мар мында выж лёгет керттӥ ини. Уж лачак, ноку но со уз быры, медаз но быры. Вазен пересьёс юнме шуиллямтэ ук: уж быре ке, адями купырмонлы сётӥське.

Любовь Тихонова.

Туспуктӥз автор.

Удмурт Дунне
By Удмурт Дунне 30 августа, 2011 12:25