Сарвадэ кут али, уроме

Удмурт Дунне
By Удмурт Дунне 30 августа, 2011 12:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сарвадэ кут али, уроме

 Ижкарысь Кибашлыослэн центразы усьтӥськиз адӟытон. Ньыль ар вис каремзы бере асьсэлэсь выль ужъёссэс возьматыны вайизы Дэбес ёросысь кибашлыос.

Дэбес ёросын кибашлыослэн центрзы ужаны кутскиз 1992-тӥ арын. Сое возьмаса кадь улӥзы шыкысъёсын кыллись бичаса яке ӝуткаса куэм ӝӧккышетъёс, пыдлёгетъёс, шобретъёс, пулэсь, кызьпу туйлэсь, ньӧрлэсь  арбериос но мукет тӥрлык.

Та арбериослэсь улонзэс кузёмытон но выльдон борды шумпотыса басьтӥськизы мыло-кыдо муртъёс. Дэбесысь киужъёсъя юртлэн кивалтӥсез  Михаил Николаев ас котыраз люказ ужаны быгатӥсь адямиосты.

Усточиос, кызьпу туез пужыятыса, вандылыса, сарваос, шкатулкаос лэсьто. Та удысэз азинто Т. Дерендяева но Н. Перевозчиков. Соослэн пичиесь но бадӟымесь сарваоссы сяськаос выллем. Соосты коть али тырмыты курегпузэн, пызен, кеньырен яке бича отчы узы, боры, эмезь.

Пуэз выль сямен суредан амал шедьтӥз методист С. Владыкина. Со кузяла вандэм пу вылтӥ морилкаен «пужъятэ» инкуазез, вашкала выжыкыл суредъёсты. Учкисьёслы но дунъясьёслы яразы куролэсь лэсьтэм мунёос. Соос висъясько йыг-йыг луэменызы, чебер, кильтро дӥсенызы, чылкыт ымнырынызы. Е. Чермянина но С. Наговицына, сюлэмзэс поныса, тыршиллям соос котырын.

Вашкала дыръя Дэбес палан одӥг корка но, дыр, ӧй вал лякиё шобретъёстэк. Адӟытонын но трос арбериос кылдытэмын басма пилетъёслэсь. Соосты синмаськымон лякылӥллям Н. Минина но О. Загумёнова. Вашкалаослэсь адӟем карыса, кибашлыос вуриллям бадӟым но пичи миндэр пуйыос, ӝӧк вылэз чеберъян салфеткаос, суредъёс. Ваньзэ сое кутыны луэ корка пушез чеберъяны.

Великтэм, Ымусьтон выллем вӧсяськон праздникъёс дыръя гуртын улӥсьёс корказэс чылкытатэм бере мудоръёс, укно янакъёс вылэ ошылозы вал куэм-пужыятэм, чеберъям кузьшетъёсты, ӝӧк вылъёсы валёзы бичаса, трос выртэн куэм чибориё, горд, лыз буёло ӝӧккышетъёсты. Соос корка пушез шулдырто, пырись муртлы но куноослы шуныт мылкыд кузьмало. Вашкала сямъёсты кутыса, туала пужыосын чеберъяса, ӵушконъёс, ӝӧккышетъёс но шортдэремъёс куэм Н. Поздеева. Синмаськоно быгатэмезлы.

Усточиослэн быгатонлыкъёссы но азинсконъёссы ас кожазы уг лыкто. Соосын ортчытъяло семинаръёс, мастер-классъёс. Соку тодмо луэ, кыӵе гуртъёсын, кыӵе удысъя ужало кибашлыос. Дэбес ёросысь усточиос доразы но мукет ёросъёсын, элькунын ортчись одӥг адӟытонэз но уг кельто. Сое возьмато тау карон гожтэтъёс, дипломъёс, данъян грамотаос.

Милитина Гаврилова.

Туспуктӥз Владимир Беломорских.

Удмурт Дунне
By Удмурт Дунне 30 августа, 2011 12:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<