Пунэм шумпотон

Удмурт Дунне
By Удмурт Дунне Август 10, 2011 08:55

Пунэм шумпотон

 

Ижысь Михаил Кузнецов пичи дырысеныз синмаськылӥз киужен вырись адямиослы. Кутъёс-кудыос кутась атайзэ, пыдвыл-пӧзьыос керттӥсь анайзэ, пужъятскись апайёссэ ёртыса возиз: дышетэ монэ но! Соосыз шуылӥзы: пук вӧзамы учкыса — дышод. Озьы Миша нокин адӟымтэ дыръя семьяосызлэсь йылпумъямтэ киужъёссэс кияз кутылӥз.

Одӥгез гинэ солы акылес потылӥз: атайзы шур дурысь бадьпу ньӧръёс но кыз выжыос вайыны косылӥз. Соослэсь со, кема куасьтыса, кудыос керттылӥз. Та арбериосызлы паймыса ик бырод — вань тылпоттон кадь пичиосыз но, сандык быдӟаосыз но.

Пичи Миша киужлы ӝог дышиз. Школае мыныкуз, вань эшъёссэ паймытӥз: керттӥськиз, пужъятскиз, песьтэр-сумкаос керттылӥз-вурылӥз. Ай муртъёслы но кӧня киужъёс лэсьтӥз! Бӧрысь дышетскиз на бадьпу ньӧръёслэсь мудрон вазаос керттыны. Таосызлы тужгес, пе, синмасько нылкышноос.

Михаил Никитьевич, шутэтскыны потытозяз, Ижысь электромеханикая заводын плотник луыса ужаз. Ма гинэ ӧз лэсьты со отын! Киыз котьмалы мынэ бере, Кузнецовез кивалтӥсьёс гажазы, уно синпель кузьымъёс но таукаронъёс сётъязы. Одӥг пол воргорон «Шулдыр ӝыт» ансамбльысь Анатолий Ушаковлы пырак концертысен кудызэ кузьмаз. Ну, шумпотӥз ук артист. Табере, пе, мон, тае киысьтым куятэк, нюлэскы ветло.

Михаил Никитьевичлэн кык комнатаен квартираез быдэсак бадьпу ньӧръёсын, кыз выжыосын, чебересь кудыосын, вазаосын тырмытэмын. Ньыль этажъем коркась вань бускельёссэ керттэм арбериосыныз шумпоттэм ини. Санкт-Петербургын улӥсь Оля нылыз но, Артём нуныкаез но кузьымтэк ӧз кыле.

— Ма, киужъёсы кытын но ӧвӧл ни, дыр, — шуэ воргорон. — Тани Ижысь 59 номеро школае адӟытонэ но нуллӥзы. Мар лэсьтӥсько, ваньзэ калыклы кузьмасько. Чик жаль ӧвӧл. Адями киужезлэсь шумпотон гинэ басьтыны мед быгатоз. Но берло аръёссэ ньӧр нуллонлэсь аналски ини — пыдъёсы лябӟизы.

* * *

Куды яке мукет арбери кутэмлэсь азьвыл нырысь ик дасяно ӟеч ньӧр. Чигись бадьпулэсь сяна, вань мукет писпуослэсь вайёссэс уже кутыны луэ. Мыно одӥг-кык аръем ньӧръёс, нош векчи киужъёслы одӥг аръем пушъетъёс. Керттӥськонын сямен ик соосты олокызьы но куасалляны луэ. Бадьпу вайёсты бичано кузьёссэ, векчиоссэ, шонеръёссэ но капчи куасалскисьёссэ. Быръёно сыӵеоссэ, ниыса чилясь мед адскозы.   

Куды кутыны мыно 60-70 сантиметр вайёс, но вандон интытӥзы 5-8 миллиметрлэсь зӧк медаз луэ. Озьы ик чаклано вайлэсь шорсюлэмзэ: со мултэс зӧк ке, вылаз ик, курень-горд буёло ке, чигись луэ.

Кудылы вайёсты дасяны луэ быдэс ар ӵоже, но сое кутӥсьёс ӵемгес  вандыло тулыс но сӥзьыл. Тулыс пушъетлэн капчиен куэз нииське, нош гужем-сӥзьыл дасямъёссэ одӥг-кык арня вуын коттыса возёно. Но корт арбериосын эн пачкатэ.

Дырез ӝогомытон понна коттыса возёнэз воштыны луэ пӧзьтонэн. Одӥг-кык час пӧзьтыса, вайёсты пуртыысь утялтоно но сӥятоно, собере кузэ нионо.  

 

 

 

Удмурт Дунне
By Удмурт Дунне Август 10, 2011 08:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<