Пунэмен улонлэсь уд пегӟы

Удмурт Дунне
By Удмурт Дунне 24 августа, 2011 13:06

Пунэмен улонлэсь уд пегӟы

 

Мувӧй кыскиськом ке но, бусьтыр ум улӥське.

— Экономикаын кризис ӧз на йылпумъяськы, солы пумит — вылез йырвисён вуыны быгатоз. Россиысь ММВБ но РТС биржаослэн индексъёссы куашкало. Зарнилэн дуныз нуналмысь будэ. Таӵе югдурен валче дуннеысь экономистъёс юзыр-кезьыр луо, — вераз журналистъёслы Удмуртиысь Правительстволэн Тӧроезлэн воштӥсез, коньдон ужпумъёсъя министр Валерий Богатырёв.

Озьы ке но таиз ар экономикае одӥг пуньы чечызэ пыртӥз. Республикалэн бюджетаз 20 процентлы тросгес табыш вуиз. Уго тросгес уксё лыктэ прибыльлы выт чотын. Туэ ӝыны ар ӵоже бадӟым пайда ваё транспорт, машина но оборудование поттон удыс, ку но кулэсь арбериос, пыдкутчан дасясь предприятиос, корт ӵыжатон но кортлэсь тӥрлык лэсьтӥсь производствоос.

Но жаляса верано, выт чотын вуэм коньдонлэсь бадӟым люкетсэ — 64,5 процентсэ — келяськомы Россилэн бюджетаз. Озьы «ӟеч лу» шуэмын 29,5 миллиард манетлы. Югдур тазьы берытске берло 5 ар ӵоже. Азьло 60 процентэз табыш республикае кыле вал, федерал бюджетэ сётылӥм 40 процентсэ. Собере асьмелэн кивалтӥсьёсмы ик Россиысь министръёс доры йыбыртъяны ветло, уксё курыса. Озьы Россилэн кисыысьтыз асьмелы туэ сётӥзы ни 6 миллиард манет.

Берло куинь арзэ Удмуртия улэ кредитъёс чотын. Отын номыр кышкытэз ӧвӧл, тросэз улосъёс таӵе амалэз быръё, шуэ Валерий Богатырёв. Россиысь 10 улос гинэ — мувӧй но газ кыскись регионъёс — странамылы донор чот луо. Соин соос гинэ кредитъёсы уг пыро.  Нош Удмуртилэн кредитъёсыз — 11 миллиард манет тыр. Со сяна, вань на ӝегатэм тыриськонъёсыз — 230 миллион манет. Но таиз но югдур тупатске, шуэ министр, угось кылем арын гинэ Удмуртилэн дыраз ворсамтэ кредитъёсыз 517 миллион  манет вал.

Озьыен, кыӵе луоз выль арлы бюджет? Кӧня манетлы пунэме пырыны чаклало кивалтӥсьёс? Валерий Богатырёв шуэ: дефицит 15 процентлэсь трос луыны кулэ ӧвӧл. Нош кредитъёс басьтыны луэ асьмелэн доходъёсмы мында ик. Удмуртилэн та пумысен йырвисёнэз уз луы — пунэмъёсты берыктыны быгатэмезъя республикамылэн рейтингез вылӥын.

Елена Скворцова.

 

Удмурт Дунне
By Удмурт Дунне 24 августа, 2011 13:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<