Нырысьсэ тубыса синмаськон

Удмурт Дунне
By Удмурт Дунне 30 августа, 2011 12:28

Нырысьсэ тубыса  синмаськон

 

Байгурезь йылысен.

Байгурезь тодам кылиз ужея — нырысетӥ съёмкаос дыръя ик. Дэбес музъем вылэ вуим Иван Данилов режиссёрен. Ми соку Степан Широбоков кылбурчи но Яков Иванов суредась сярысь сюжет дасяськом вал.

Йӧно Байгурезь вылэ тубим черкогурт палтӥз, нялмытгес бамалтӥз. Сылӥськом пирамида йылын кадь: пыд уламы горд сюйлэсь меӵ борддор, нош котырак синмаськымон чебер инкуазь. Вуоно сюжетэ сярысь малпаськыса, гурезь бамалысь боры бичасько, одӥг, кык, куинь… Кытысь ке ӧвӧл дорам, быжзэ сэзъяса, вуиз пуны. Вӧзам пуксиз, лякыт синъёсыныз сак учке. Со татын утись выллем, лэся, эскере: ӟеч адями вуиз-а куное яке ӧз-а? Нош мон учкисько со пуны шоры но сюжетме малпасько, кылъёсме верасько. Ньыльпыдо эше сак кылзэ, валась мурт сямен шорам учке. Ас поннам малпасько, мар сокема ӝегало операторъёс. Оло, инкуазьлэн чеберезлы палёмизы-а яке такеме вуыса, одӥг кутскемен плёнка вылэ пуктыны тыршо писпуосты, шурез, инбамез. Малпанъёсме уретӥз ваче пу борды кокам но кортэн дыбыртэм куара. Пуны кышкаса пегӟиз. Учкисько но, ӵош ужась эшъёсы вуо, синъёсазы кышкан каръяськемын. Соос малпаллям, мон кионэн вераськисько. Сьӧсез уллян понна бодыос кутӥллям, кивалтослы кин мар шедьтэм.

Та учыр дыръя ик тодам лыктӥз Алексей Ермолаев. Крымын шутэтскыкуз, кузпалы Корадаг гурезь йылысь киммерийской нимаськись кузялпотэз бича вылэм. Та ческыт зыно турынэз со винае тыре вал. ӵапак соку дораз вуэм бадӟым сьӧд пуны. Кытчы, пе, мынэ А. Ермолаев, отчы ик ньыльпыдо но. Со куспын кышномурт бызьыса лыктэм, пунылэн кузёез вылэм. Утӥсьмы туж лек, мон малпай, со тӥледыз куртчылӥз-кесяз ини…

Нош Байгурезь вылэ ми тубам на ай со нунал Степан Широбоковен. Та кылбурчиез мон тодам вайисько ӟечен гинэ. Яков Иванов сярысь верало солэн ужъёсыз. Дорамы утисько «Удмурт кызьпуос», «Сяськаос», «Удмурт тыпы» суредъёсыз. ӵапак кызьпуосызлы ик синмаськизы Москваысь «Останкино» телекомпаниысь ужасьёс. Та картиназэ соослы но суреданы куризы. Яков Ивановлэн котькуд ужез синмаськымон. Кылсярысь, кузпалызлэн портретэз. Со сьӧд дэремен тӧдьы сяськаос пӧлын, ӝоген луоз анай. Учкиськод шораз но уд ӵыдӥськы синъёстэ воштыны. Байгурезьысь сяська выллем. Нош Яков Иванович, удмурт вӧсясьлэн внукез, со чеберез валам сяна, вашкалаосмылэсь культуразэс, вӧсьсэс, чеберлыксэс уте.

Удмурт шаер шуо ке, кинлэн ма син азяз пуксе, вылды: визылась Кам но Чупчи шуръёс, пиштӥсь италмас, ӵыж-горд кисьмам палэзь… Нош мынам одно ик тодам лыктэ йӧно но кужмо Байгурезь.

Нина Ермолаева.

 

Удмурт Дунне
By Удмурт Дунне 30 августа, 2011 12:28