Муш

Удмурт Дунне
By Удмурт Дунне 10 августа, 2011 10:10

Муш

 

Та воргорон вань сюлмыныз висе спорт понна. Ачиз но соин эшъяське. Толалтэ, сӥзьыл но тулыс котькуд нунал сямен адӟод солэсь алнаш сюресъёстӥ бызьылэмзэ. Бордаз кыскиз пизэ но. ӵошенназы пӧртэм ӵошатсконъёсы пырисько. Соин, лэся, ялан малпалляй: Виталий Башкиров ваньмон дырзэ быдэсак спортлы гинэ сӥзе, дыр.

Алигес мон та адямиез аслым воксё мукет ласянь усьтӥ. Со туж мыло-кыдо мушкась вылэм. Мушъёсын вырон мылкыд Виталийлы школа дырысен ик пыӵам. Асангуртын улыкум ай, весь вожъяськылӥ, пе, эшелэн семьяязы муш вордэмзылы. Соослэн ӝӧк вылысьтызы чечызы ноку бырылымтэ. Соку ини пияш малпам: будӥ ке, мынам но озьы луоз.

Кутскон сётӥз Эгра ёросысь варматаез.  Таид но мушъёсын выре. Эмеспиезлэсь мылкыдъёссэ шӧдыса, кӧня ке умортозэ кузьмаз.

— Али бакчаям ог 30 умортое, — веранзэ мытэ В. Башкиров. — Мукет мушкасьёсын ӵошатыса, вазь на ушъяськыны, та удысын мон тэтэ гинэ карисько ай. Огзэ рос-прос тодӥсько ни: мушъёс трос саклык висъямез кулэ каро. Соин ик гужемме соосынгес ортчытӥсько. Тулыс ик фацелия кизи. Мушъёс туж ярато солэсь сяськаоссэ. Озьы ик умортоос котыре пӧртэм писпуос, куакъёс мерттыны тыршисько. Угось соос сяськаяськыку, мушъёс котыразыгес лобало. Палдыкузы но та писпуос борды ик бинисько.

Али Интернетысь трос пайдаё ӵектонъёс шедьтыны луоно. Мушъёсты утялтон пумысен отысь аслым унозэ басьтӥсько. Ачим но куддыръя эскерон ортчытӥсько. Кылсярысь, мушъёсты толйытон интыысь кейёсты быдтон понна сир сутӥсько. Туж юрттэ кадь потэ. Тазьы карыны дэмласал мукетъёсызлы но. Тыро семьяё вуж уморто вӧзы мумытэк кылем мушъёсты выль умортое поттӥсько. Озьы соос пумен юнмало.

Виталийлэн азьланезлы туж бадӟымесь малпанъёсыз. Муш бакчаез котыре корка пуктыны мылкыдыз вань. Кыдёкын ик ӧвӧл ошмес бызе. Тазэ но Башкиров утялтэм, котыртэм ини.

— Тулыс но гужем туж шулдыр луэ татын. Жаг турынъёсыз но уг ишкиськы, — шуэ Виталий, — соос но сяськаяськыкузы пайда ваё, мушъёс отысь но асьсэлы чечы бичало.

Башкировлы огназ секыт луысал. Но солы юрттэ семьяез.

Кылем арын куазь кӧс улэмен, ужбергатӥсь ыштонъёс адӟиз. Вить гектар вылэ мерттэм картофкаез туж векчи кылиз. Но Виталий ӝожтӥськыса улыны дышемын ӧвӧл. Оске: тыршиз ке, пайдаез одно ик луоз. Нош ужаны со быгатэ. Мушъёсыз сямен ик, вазь ӵукнаысен бер ӝытозь берга аслаз хозяйствояз.

Людмила Сурчакова.

Туспуктӥз автор.

Удмурт Дунне
By Удмурт Дунне 10 августа, 2011 10:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<