Маин муш пӧртэм «витьлэсь»?

Удмурт Дунне
By Удмурт Дунне 31 августа, 2011 10:25

Маин муш  пӧртэм «витьлэсь»?

 

Нылпиез визьман сярысь огкадь сюлмасько мумы-бубы но, дышетӥсь но.

Дышетон удысын воштӥськонъёс улонэ калленэн пыӵаны ӧдъяло ини. Выль стандартъёсты ас вылазы нырысь ик шӧдозы покчи классъёсын дышетӥсьёс, туэ 1-тӥ классэ лыктӥсьёс но соослэн анай-атайёссы. Дасесь-а талы соос? Та пумысен кенешиськом Дышетӥсьёслэсь тодон-валанзэс будэтонъя институтысь выль ГОСТ-ъёсты улонэ пыӵатонъя лабораторилэн кивалтӥсеныз Ольга Винокурен.

— Воштӥськонъёс нырысь ик шӧдӥськозы дышетӥсьёс вылын. Соос быдэсак выльдоно луозы ужан манерзэс. Али шуиськом: пинал школае лыктэ тодон-валанъёс басьтыны. Но быгатэ-а со визьзэ улонын кутыны — та дышетӥсез ӧз сюлмаськытылы. Куд-ог дышетон учреждениос тыршо, тросгес мед луозы «4»-ёслы, «5»-ёслы дышетскись пиналъёс шуыса. Соин ик лябъёсызлэсь мозмытскыны, соосты мукет школаосы келяны выро — городъёсын та туж зол шӧдӥське.

Выль стандартъя дышетӥсь-ёслы котькуд пинал огкадь тунсыко луыны кулэ — ӟеч-а со дышетске, уг-а — та шоры учконо ӧвӧл. Нылпиез нырысь ик ассэ улонын шедьтыны, малпанъёссэ-мылкыдъёссэ шара вераны дышетыны кулэ. Лыдэ басьтоно котькуд пиналлэсь аспӧртэмлыкъёссэ, быгатонлыкъёссэ.

— Озьыен, покчи классъёсын дышетскись ӧз ке но тоды кык пол кык ньыль шуыса, сокем кышкыт ӧвӧл?

— Меӵак озьы вераны уг яра, но пичияк зэмлыкез вань. Шуом, нылпи тодоз таблицаез, но тодэмзэ кулэ дыръяз кутыны уг пӧрмыты ке, ушъяны сое вазь ӧвӧл меда? Выль кабъёсъя — вазь. Соин ик дышетӥсь тодон сётон сярысь гинэ сюлмаськыны кулэ ӧвӧл. Со нырысь ик пиналлы котьмаин тунсыкъяськон мылкыд пыӵатыны мед быгатоз.

Дышетӥсьёслэсь тодон-валанъёссэс будэтонъя институтмы пыр берло толэзьёсы республикаысьтымы ваньмыз сямен покчи классъёсын визьнодасьёс ортчизы ни. Соослы выль ужан амалъёс ӵектӥськом. Шуиськом: пиналъёс урокын дышетӥсьлэсь кушаса сётэм малпанъёссэ гинэ азинто ке, иське, татын вуж манеръя тодон-валан сёто на. Нылпиос шумпричесь, ас малпанъёссэс вераны уг кышкало, выль темаослы асьсэос йылпумъянъёс лэсьто, верало мар выльзэ тодӥзы, мае тодэмзы потэ на — иське, урок выль кабъёслы тупа ни. Дышетӥсь табере ӧжытгес вераськыны кулэ, нылпиослы дыр мед кельтоз. Таӵе урокъёсын пукыса, малпан кылдэ: классын пиналъёс туж визьмоесь, нош дышетӥсь — бордазы, кулэ дыръя юрттӥське гинэ.

Кызьы малпаськоды, кыӵе пиналъёс улонын асьсэды капчиенгес шедьтозы: дышетӥсьлэн ымаз учкыса пукисьёсыз-а яке асьсэ малпанъёссылы кузё луисьёсыз-а?

— Мыным потэ: республикаысьтымы тросэз дышетӥсьёс урокъёссэс вазенгес ик выль сямен радъяны кутскизы ни.

— Зэмен но, Ижысь куд-ог дышетон учреждениос, шуом, Гуманитарной лицей, 29-тӥ лицей, выль стандартъёслэсь потэмзэс возьмаса, ӧз улэ. Гуртъёсысь школаосъя вераны уг быгатӥськы, но нимаз дышетӥсьёс тачак. Дорамы курсъёсы вуыло соос, ужан амалъёсынызы шумпотто. Соослы мукет сямен ужаны кутсконэз но ӧвӧл.

Выль  куронъёсты кылдытӥсь-ёслэн малпамзыя, воштӥськонъёс секытгес йӧтозы школаын кема аръёс ӵоже ужамъёслы. Огласянь, озьы, дыр. Мукет ласянь, дышетӥсьёсмы визьмоесь, тыршисесь — ваньзэ вормозы, кышканы соослы номырлэсь. Дышетон программаос трослы ик уг воштӥсько, темаосты гинэ мукет сяменгес сётоно.

Валано сое: кыӵе ке агай-апайёс, ужлы ёрмемысь, воштӥськонъёсты ӧз малпалэ —  выль вакытъёс выль куронъёс пукто. Дышетон удысын пӧртэм воштӥськонъёс дэмлаллязы ни. Соос пӧлысь выль стандартъёс — сюлэмыя. Соосын тодматсконлы кылем арын отпускме быдтӥ. Воштӥськонъёслы сӥзем литература туж трос, гожтэмын валамон кылын. Дышетӥсьёслэн мылкыдзы вань ке, ас понназы но соосын тодматскыны быгатозы.

— Дышетон программаос али пӧртэм пумоесь, соос ваньзы ик выль куронъёслы тупало-а?

— Кыӵе программая ужалозы — быръёзы асьсэос дышетӥсьёс. Но соос понна та выль ӧвӧл ни —  учебникъёс кемалась пӧртэмесь. Шаерысьтымы дышетӥсьёс тужгес синмасько «Школа России», «Перспектива», «Начальная школа XXI века», «2100» программаослы. Но вань на Занковлэн, Виноградовлэн системаоссы но мукет. Та программаослы чаклам учебникъёс ваньмыз ик кун перечене сюремын, выль стандартъёсъя отчы ватсанъёс пыртэмын. Пуштроссы туж ик воштӥськымтэ. Но дышетӥсьлы юрттон вылысь пусйылэмын, кудъёссэ заданиосты нылпиослы группаен, кудъёссэ парен яке нимаз быдэстоно.

Анай-атайёс мед тодозы: дышетон программаос пӧртэмесь ке но, нылпиослэн тодон-валанъёссы ар пумын огкадь луозы.

— Ольга Дмитриевна, татчыозь пиналлэсь тодон-валанзэ дунъясь одӥг мурт вал — дышетӥсь. Табере нылпи ассэ ачиз дунъяны кулэ, шуо…

— Зэмен но, дышетӥсь юрттэм улсын пинал ачиз валаны дышетскоз: мар солэн ӟеч пӧрме ни, мар бордын ужано на.

Басьтом таӵе учырез. Нылпиос дышетско гожъяськыны — суредало бодыос. Дышетӥсь партаос вискытӥ ортче но пусъе тужгес ӟеч ужъёсты — та вашкала манеръя. Выль сямен тазьы луыны кулэ: нылпиос гожъёсты суредало но ужзэс быдэстэм бере шкала суредало. Бодыоссы огкадь выдэмын ке, шкалазы вылэ пус пукто, огкадь ӧвӧлгес ке выдэмын — пусэз пукто шкалалэн шораз. Дышетӥсь пиналэн соглаш луыкуз, солэсь пуссэ горд пастаен котыртэме пыртэ. Кыксылэн но малпанзы одӥг кадь — иське, нылпи ассэ дунъяны пӧрмытэ ни.

Отӥяз дышетӥсь но нылпиос ӵошен малпаськыны быгатозы: кызьы дунъяны луэ на та гожъёсты. Огкадь выдэм сяна, соослэн ӝуждалазы но одӥг кадь луыны кулэ, висъёссэс чаклано на… Котькудӥз понна нимаз дунъет сётоно. Озьы пинал ачиз валалоз ни: ма бордын солы ужано на. Анай-атайёс но пиналзы борды уз тэбине, кыӵе оценка басьтӥз шуыса, юано луозы: марлы дышид туннэ школаын?

Классысь классэ выжемъя куронъёс воштӥськозы. Нош дунъян амалъёс кылёзы. Задачаез лэсьтыкузы, кылсярысь, нимысьтыз балл пуктыны луоз текстэз шонер валам, вакчи запись лэсьтэм, чотам, задачаез эскерем понна но мукет. Макем тросгес баллэз люкаськиз нылпилэн, сокем оскысагес вераны быгатоз, задачаосты лэсьтыны быгатэ ни шуыса. Со дыре ик аслэсьтыз ляб интыоссэ но адӟоз — валалоз, та бордын ужано на. Вазен пиналлы «3» пукто ке, малпа ни вал, задачаосты лэсьтыны чик уг быгаты шуыса. «5» басьтэ ке, номыр бордын тыршонэз ӧвӧл ни, кожа.

— Озьы ке но четвертьёс пумын, ар йылпумъяськыку, нылпиослы отметкаос пуктылозы ик, вылды?

— Нырысетӥ классын — уз. Куд-ог школаосын 4-тӥ классозь но уг пуктыло. Мон малпасько, со туж умой. «5» басьтыны луэ, муртлэсь тетрадьысьтыз лушкаськыса но. Нош пиналлэн тодон-валанэз будӥз-а? Ӧз. Озьы со алдаськыны гинэ дышиз. Нылпизэс 1-тӥ классэ келясь тросэз анай-атайёс мыдлань лэсьто, «тон «5»-ёслы гинэ дышетскод» вераса. Озьы пинал школае тодон-валанзэ будэтон вылысь уг, отметкаос  басьян понна ветлэ.

Но дышетӥсьёс но, анай-атайёс но шонер мед валалозы: отметкаос пуктылоно ӧвӧл, но пиналлэн котькуд вамышезлы дунъет сётоно. Верам ни шкалаосын ужан сярысь. Луоз на нылпиослы кизилиос, мушъёс но мукет та выллем кузьымъёс люкылыны.

— Котькуд пинал урокъёс бере одно ветлыны кулэ кыӵе ке секциосы, кружокъёсы — талы, пе, табере нимысьтыз саклык висъяськоз. Азьло но озьы ӧй вал шат?

— Татчыозь лыдъяськылӥз: воспитание усе анай-атайёс вылэ, школа пиналъёсты визьноданы гинэ кулэ. Озьы секциосы, кружокъёсы нылпиос ветлӥзы ас мылкыд каремзыя. Табере ваньмыз та пыртэмын дышетон планэ, иське, школа но кыл кутыны кулэ со понна. Эктыны, кырӟаны, киужен вырыны дышетскозы-а классысь нылпиос яке спортэн тросгес вырозы-а — тае анай-атайёс, дышетӥсьёс ӵошен эскерозы. Юалозы мылкыдзэс нылпиослэсь.

Нялтас вераса, дышетон удысын анай-атайёслы табере бадӟым инты сётӥськоз. Вазен соос школае лыкто вал куное кадь, пиналзылэн кызьы дышетскемез сярысь тодон вылысь гинэ. Табере соос асьсэос пӧртэм ужрадъёс дасяны, школа улонэ пыриськыны быгатозы. Огкылын вераса, нылпиез визьнодан дышетӥсь вылэ гинэ уз, анай-атайёс вылэ но выжоз.

— Ӝытъёсы выль темаосты валэктоно уз луэ-а?

— Гуртэ ужъёсты анай-атайёс пиналэнызы ӵош лэсьтыны кулэ ӧвӧл — выль стандартъёсъя та чакламтэ. Выль темаосты валэктон сярысь веранэз ӧвӧл. Но юрттӥськоно одно. Дырзэс талы медаз жалялэ вылэм. Покчи классъёсы ветлӥсь нылпиос мыло-кыдо мадё на школаын ужъёссы, эшъёсынызы кусыпъёссы сярысь. Мар выльзэ тодӥзы, мае тодэмзы потэ на — та пумысен но юалляськоно. Пичи дыръяз пиналэн огкыл шедьтыны ӧз луы ке, отӥяз трослы секытгес луоз.

Выль воштӥськонъёслэсь анай-атайёс медаз кышкалэ. Угось соослэн но, школалэн но мылкыдъёссы тупало: пинал мед будоз таза, улонын ассэ шедьтыны мед быгатоз. Школаын нылпиослы одно мадёзы кунмылэн историез, улосъёслэн аспӧртэмлыксы, отысь тодмо адямиос, паймымон интыос сярысь но трос мукетсэ. Нимысьтыз саклык висъяськоз пуш дуннелы, ӟеч сямъёс пыӵатонлы.

— Нырысетӥ классэ лыктӥсь пиналъёс азе табере кыӵе куронъёс пуктӥськозы?

— Нылпи одно лыдӟиськыны, сюозь лыдъяськыны кулэ ӧвӧл. Но мед быгатоз шудыны! Жаляса верано, тросэз нылпиос асьсэды коллективын возьыны, мӧйыосын вераськыны уг быгато. Соин ик пинал школае лыктэ но, марысь мар ке, соку ик куатаське, пушказ ватӥське.  Таӵеослы дышетскыны секыт луоз, букваосты тодэмез но каньылгес уг кары тодон-валан люканзэ. Нош шудыса нылпи ассэ возьыны дышетске. Со чакла нимысьтыз правилоосты, кулэ дыръя ачиз но соосты малпа. Быгатэ аслэсьтыз мылкыдзэ вераны. Эшез ас сяменыз каре ке, соку ик бӧрдыны уг кутскы. Тэшкыли шӧдэ шудонын аслэсьтыз интызэ. Нылпи садысь воспитательёс сяна, талы нырысь ик дышетыны кулэ анай-атайёс.

1-тӥ классэ вамыштӥсь пиналлэн анай-атаез луонлы дасяськоно эке вордскем дырысен ик. Нылпиез яратоно — соку ваньмыз радъяськоз.

Элина Кумачёва.

Удмурт Дунне
By Удмурт Дунне 31 августа, 2011 10:25