Лыдӟисьмес утчаськом фермаысь

Удмурт Дунне
By Удмурт Дунне 23 августа, 2011 12:18

Лыдӟисьмес утчаськом фермаысь

 

Н. Захваткина.

Шаркан ёрос библиотекаысь методкабинетэн кивалтэ Надежда ЗАХВАТКИНА. Кыӵе юанъёс  шугъяськыто туала библиотекарьёсты, вань ик-а али лыдӟиськисьёс — кенешимы Надежда Ивановнаен.

— Азьло аръёсын ӵошатыса, берло дыре лыдӟисьёсмы трослы кулэсмизы. Соосын ужаны но секытгес луиз. Таӵе югдур бен шаерысьтымы котькуд библиотекаын, дыр. Мон малпамъя, солэн мугез со бордын — кылдӥз туала техника, усьтӥськиз Интернет. Адямиос лыдӟиськемысь дугдӥзы. Уката туала егитъёс — компьютер борды гинэ кыстӥсько на. Озьы ке но, со шуг-секытъёс шоры учкытэк, ми лыдӟисьёсмес олокыӵе но амалъёсын дорамы кыскыны тыршиськомы. Толэзьлы но кварталлы быдэ йылпумъянъёс лэсьтӥськом: йыло-а соос, ичиёмо-а. ӧжытак ичиёмо ик, но туала улон понна сокем чидантэм ӧвӧл.

Методкабинетын ми кык кузя тыршиськом, нош ваньмыз-ӧвӧлэз ужасьёсмы даслэсь уно. Кивалтӥсьмы — Наталья Рябцова.

— Гуртъёсысь библиотекаосын кыӵе югдур меда?

— Библиотекамы бордын эшшо 20 лыдӟиськонниос вань на. Соосын ми валче ужаськомы. Семинаръёс, кенешъёс, пӧртэм ужрадъёс огинын ортчыло. Кыӵе ке шугъяськытӥсь юанъёс кылдо ке, огазьын сэрттӥськом-пертчиськом. Озьы котькыӵе секыт югдурез капчи вормыны.

— Библиотекаяды мон тодэмъя трос гинэ кружокъёс но клубъёс ужало?

— Соос ми дорын гинэ ӧвӧл, котькуд гуртысь библиотекаын ужало. Но милямаз ятыргес ик — вить кружок усьтэмын. Нылпиос отчы мыло-кыдо ветло. Дышетскон вакытазы урокъёс бере бызьыса сямен лыкто. Сюлэм ик нясь-нясь луэ — книгаос пушкын бугыръяськыны ярато. Собере куд-огез мумы-бубыоссэ но сьӧраз кыске. Ми соосын пӧртэм ӵошатсконъёс но шудонъёс ортчытъяськом.

Егит семьяослы сӥзем «Семейная карусель» клубмы ужа. Егитъёс сяна, дорамы мыло-кыдо кыстӥське мӧйы калык но. Соослы нимысьтыз чаклам ужрадъёс, пукон ӝытъёс ортчытъяськом.

Гужемзэ гинэ библиотекаямы ӧжытак чалмыт луиз.

— Выль книгаос вуо-а? 

— Туэ библиотекамылы коньдон висъязы: книгаос басьтыны — 76 сюрс манет, журнал-газетъёслы гожтӥськыны — 32 сюрс. Но ёросмы понна та ичи лыдпусъёс. ӟеч-ӟеч книгаослы со уг окмы. Таин сэрен лыдӟисьёсмес но ыштыны кема ик ӧвӧл. Угось ваньзы шуо: 21-тӥ даур — ивор технологиослэн вакытсы. Со милемлы, библиотекарьёслы, умой но, алама ласянь но берытске.

 — Библиотекаяды нимысьтыз компьютер кабинетты вань-а?

— Котькуд ужасьмылэн компьютерез вань. Но кулэ вылэм нимаз Интернет кабинет усьтыны — тросэз адямиос та сярысь юало.

— Гуртъёсы потаськоды-а?

— Кызьы сотэк? Милям со ужмы ук! Лыдӟисез дорамы кыскем сяна, ми калыкез выль книгаосын тодматыны кулэ. Гуртъёстӥ гинэ ум, быдэс ёросысь пӧртэм организациосы, предприятиосы, фермаосы гинэ но потаськом. Озьы лыдӟисьёсмес утчаськом. Адями ачиз библиотекае лыктыны уг ваньмы, соин ик ми солы книга бырйыны юрттӥськом. Библиотекамылэн 22 передвижкаосыз ужало. Ветлыны быгатӥсьтэмъёс доры гуртазы книга вайиськом. Саклык висъяны быгатэммы понна соос туж шумпото. Озьы ик вуылӥськомы школаосы, профтехучилищее, нылпи садъёсы.

— Ёросады удмуртлык возиське-а?

— Милям ёросамы тунсыко но данъяськымон кылбурчимы, крезьгурчимы Владимир Котковмы улэ. Кыӵе ке ужрад ортчытӥськом ке, сое одно ик дорамы ӧтиськом. Владимир Васильевич ноку уг пумитъяськы, сьӧраз школаысь нылпиосты но вае. Со яратэ калыкен пумиськылыны. Нош адямиос кельшыто солэсь кырӟамзэ но кылбур лыдӟемзэ. Владимир Васильевич «Удмурт кенеш» огазеяськонлэн ёросысь ёзэныз кивалтэ. Соин ик милемлы ужаны капчигес. Анай кылын гожъясьёслэсь книгаоссэс, удмурт кырӟанъёсын кассетаоссэс со калыклы вӧлмытыны юрттэ, шаертодонъя ужез нуон сярысь но сюлмаське.

Быги гуртын калыкъёсын ужанъя центрзы вань. Мыло-кыдо адямиос отын ужало. Быги муниципал кылдытэтлэн тӧроез Нина Беляева но милемлы юрттэ. Тау шуэммы потэ соослы.

Эшшо тани мае пусъеме потэ на: вазен библиотекаямы шаерысьтымы тодмо адямиосты пумитаны быгатӥськом вал. Калык соосты учкыны шумпотыса ветлылӥз. Берло аръёсы та ужмы пашмизгес. Ваньмыз пыкъяське коньдон борды. Таин сэрен  лыдӟись книгаез куинь нуналлэсь трослы басьтэ ке, солы одно ик дун пуктоно луиськомы. Книгаез ыштӥсь муртлэсь но дунзэ берыктыны косӥськом.

Любовь Тихонова.

Туспуктӥз автор.

 

Удмурт Дунне
By Удмурт Дунне 23 августа, 2011 12:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<