Кый сюрес сётӥськиз

Удмурт Дунне
By Удмурт Дунне 24 августа, 2011 13:11

Кый сюрес сётӥськиз

 

ПАЗ автобусэн ӵошатсконын вормисьёс: Воткинскысь С. Дектерев, Можгаысь Д. Рассказов, Глазовысь В. Щепин.

Транспортэз азинтонъя 2010-тӥ но 2011-тӥ аръёслы чаклам программазэ улонэ пыӵатон улсын Транспортъя но сюрес хозяйствоя министерство калыкез нуись-вайись водительёс куспын ӵошатскон ортчытӥз.

Шофёръёслэсь тодон-валанзэс но быгатонлыксэс эскеронъёс кызё арлэсь ятыр ортчыло ни. Асьме дорын вормисьёс пырисько Россиын радъям ӵошатсконъёсы. Отын но вормисе потыло. Правительстволэн Тӧроезлэн воштӥсез Ильдар Бикбулатов верамъя, туэ нырысьсэ ваче ожмаськизы республикаысь тужгес но бадӟымъёсыз предприятиос — ИПОПАТ но «Удмуртавтотранс». Таиз конкурс сӥземын ужась адямилэн арезлы.

Транспортъя но сюрес хозяйствоя министр Олег Гарин верамъя, ИПОПАТ предприятиын ужа 370 водитель. Кылем  арын гинэ та предприятие басьтӥз 42 выль автобус. Нош «Удмуртавтотранс» выльдӥз автобус парксэ 93 машиналы. Та акционер огазеяськон ар ӵоже городъёстӥ но ёросъёстӥ нуэ-вае 43 миллион адямиез. Тужгес но чупрес ужало Воткаысь, Глазовысь, Уваысь но Эгралась ёзъёсыз. Отысь но ИПОПАТ-лэн кыкысьтыз ик предприятиысьтыз водительёс пыриськизы та конкурсэ. Со ортчиз ИПОПАТ-лэн базаяз. Ӵошатскон кутскемлэсь азьвыл шофёръёс, пиналъёс сямен, кесяськыса но серекъяса ог-огзылы ӟечкылан кыл веразы. Нош собере серекъянэн йырин ӧй вал ни. Кутскиз зэмос экзамен. 12 команда, ваньмыз 24 водитель, пыриськиз куинь номинациен радъям ӵошатсконэ.

Судьяос нырысь ик эскеризы сюрес вылын мынон-ветлон правилоосъя тодон-валанзэс. Та люкетэз капчиен ортчиз. Ижысь водитель Пётр Зубков валэктэмъя, соос азьвыл ик рос-прос дышетӥллям правилоосы пыртэм выльдонъёсты. Вань секытэз азьпалан ай — ортчоно бадӟым «Нефаз» но шоро-куспо ПАЗ автобусъёсын кый кадь позыръяськись сюресэз.

Ӵошатскон пуроме. Сюресэз туж ӝог ортчыса, водительёс ог-огзылы машинаез сёто. Судьяос йылпумъянъёс лэсьтӥзы. «Нефаз» автобусэн нырысетӥ интые потӥз Уваысь М. Телицин. Кыкетӥ, куинетӥ интыосын — ИПОПАТ-ысь А. Савельев но С. Березин. ПАЗ машинаен вормизы «Удмуртавтотранс» предприятиысь водительёс Д. Рассказов, Ю. Пивоваров но П. Зубков.

— Милям воргоронъёсмы азьло аръёсы но кужмоосыз пӧлы сюрылӥзы, талэсь азьло куспамы ӵошатсконъёсын вормимы вал можгаосты, али тани Миша Телицин нырысетӥ инты басьтӥз. Табере со Удмуртилэсь данзэ Россиын утёз, — шумпотэмзэ уг ваты Уваысь Леонид Шульмин.

Зарнивуам Данъян грамотаос сяна, вормисьёслы сётӥзы коньдон но. Нырысетӥ инты понна — 10 сюрс манет. Кыкетӥе потэмъёслы — 7 сюрс манет, куинетӥослы — быдэн 5 сюрс манет.

Мед удалтоз соослы, кый сюресъёс капчиен мед сётӥськозы.

Иван Аркашев.

Туспуктӥз Владимир Беломорских.

 

Удмурт Дунне
By Удмурт Дунне 24 августа, 2011 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<