Кужым кузьма арган куара

Удмурт Дунне
By Удмурт Дунне 10 августа, 2011 10:06

Кужым кузьма арган куара

 

Александр Ульянов, шутэтскыны потытозяз, Ижысь механикая заводын тыршиз. Цехъёсы детальёс нуллӥз. Ужысь бертыса, бакча но пудо котырын берганы яратӥз. Нылкышнолэсь но воргоронлэсь ужзэ ноку ӧз висъялля: ваньзэ ачиз быдэсъяз. Завод кыдёкын ик ӧвӧл бере, бакчазэ но пудозэ нуназеян вакытаз гинэ но эскерыны берталляз.

Лымы быремын ӧвӧл на, нош Александр Степановичлэн укно дураз маке кузьда помидор удъёсыз будо ини. Укно ултӥз мынӥсь-ветлӥсьёс вожъяськыса ик кошко.

— Кема ик дыр уз ортчы, мон соосты теплицае потто, — шуэ воргорон. — Собере вазь тулысысен бер сӥзьылозь вож турын-куар, помидор-огреч сиё.

Александр Степанович пичи азбараз куинь теплица лэсьтӥз. Отын мар но уг будэты! Бакча сиёнэз туж удалтэ. Емышъёсыз но трос гинэ. Улмооссэ вайёсыз мырдэм вормо. Сутэрез но, эмезез но, крыжовникез но, виноградэз но туж удалтэ. Тыкваосыз, арбузъёсыз, кабачкиосыз адями йырлэсь бадӟымесь быгыльско. Соосты Александр Степанович уг жаля — бускельёсызлы но нылпиосызлы сётъя.

— Аслам сиеме уг поты ни. Улонын котьмалэн аслаз вакытэз-эсэпез вылэм. Ма, сомындаез сиыса но уд быдты ук, — серекъя воргорон. — Толалтэлы банкаосы сылалтӥсько, мариновать карисько, ческыт компотъёс но варенняос пӧзьтӥсько. Соосын быдэс гулбече тырмемын ни. Озьы ке но выль емыш вуэ ке, нош сое пӧзьтэм потэ. Вуз карыны мылкыды ӧвӧл. Нош адямилы сётӥськод ке, кыӵе соос шумпото. Уката ик нылпиос. Со понна мыным Инмар эшшо тросгес берыктэ.

Ульяновлэн гидкуазез но узыр. Кинэз гинэ ӧвӧл отын: ӟазегез, ӵӧжез, куркаез, курег-атасэз. Мон соосты инкубаторын поттасько, шуэ кузё. Курегъёсыз пӧлын ик куренялэс бӧдёноосыз но бызьыло. Соослэн, пе, кукейзы туж ческыт, котьма пӧраны мынэ.

Александр Степанович яратэ на кечъёсты. Гужемзэ маке мында кечпиосыз вордӥсько. Соосты кытын возьыны уг паймы, гужемзэ возь вылэ поттэ но анайзэс отчы думе. Тэшкылиос мумызы дорысь уг кошкыло, лумбыт вӧзаз, турын-куарез ишкыса, ветло. Ульчаысьтыз бускель кышноос дышемын ини: пиналзы висьыны усе ке, кеч йӧллы Александр Степанович доры мыно.

— Кеч йӧлтэк мон улыны уг быгатӥськы, — шуэ воргорон. — Сое юыса, нокыӵе висён бордад уз лякиськы.

Зэмзэ но, Ульянов врачъёс дортӥ ӝожтӥськыса ноку уг ветлы. Тыпы кадь юн. Одӥг кадь яратэ адямиез но, пудо-животэз но, будосъёсты но. Соосын нылпиосын кадь мусо вераське. Кыӵе гинэ ужез уг быдэсъя — ваньзэ синмаськымон лэсьтэ: сиён пӧзьтэ, выж но дӥсь миське.

Тол но, гужем но ӝӧк вылысьтыз сюкасез уг бырылы. Вазь ӵукна султыса, бер ӝытозь юртъер котыраз берга. Городын улыса но, ульчаязы газ ӧвӧл. Соин ик гур эстоно луэ.

— Аслым, огпол эстыса но, ярасал, — шуэ со. — Пудо жаль. Соосты сюдыны кулэ ук. Гужемзэ соиз ласянь капчи — бакчаын тыл вылын сиён дасясько.

Лэсьтӥськон, бакча сиён но пудо вордон пумысен со почта пыр книгаос басья, телепередачаосты учкылэ. Чеберлыко произведениосты тысез сямен куадаса куштэ: уй куспын маке зӧкта книгаез лыдӟыса потэ. Библиотекае ӵем ветлэ.

Ульяновлэн эшшо одӥг яратоно ужез вань на. Бадьпу ньӧръёслэсь кудыос но пӧртэм арбериос керттэ. Пулэсь олома но лэсьтэ: тусьты-пуньыос, дӥськут ошетъёс, тылобурдоос. Собере соосты чибориё кисьтаськись буёлъёсын маялля.

— Пичи дырысеным котькыӵе ужлы дыши, — вера Александр Степанович. — Вакытэз сыӵе вал, туж курадӟыса будӥськиз. Тятяе войнаын бырыны шедиз, тани та коркаме но, мунчоме но, лапас котырме но ачим ӝутӥ. Жаляса верано, кузпалме утьыны ӧй быгаты — секыт висьыса, улонысь далайгес кошкиз ини. Кӧня курадӟиз, ачим ик уколъёс но пуктылыса вози. Нылпиосмы нимаз уло.

Мӧзмон дыръёсыз луо ке, Александр Степанович арганзэ кутэ. Нёжмыт кырӟанъёссэ кырӟа. Сыӵе дыръя юрт котырын ваньмыз чалме: кузёзы улыны кужым сётэ.

Любовь Тихонова.

Туспуктӥз автор.

 

 

Удмурт Дунне
By Удмурт Дунне 10 августа, 2011 10:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<