Котькуд кунолы — пыдвыл но пӧзьы

Удмурт Дунне
By Удмурт Дунне 10 августа, 2011 08:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Котькуд кунолы — пыдвыл но пӧзьы

 

— Олокызьы пинал дырмы ортчиз. Али гинэ ныл йыры вал кадь ай. Табере Володя кузпалэным 38 арзэ ӵошен улӥськом ини, — улэм-вылэмзэ тодаз вайыса, вера Пичи Пурга ёросысь Бӧдья Пуро гуртысь Ольга Чикова.

Ольга Егоровна та  ёросысь ик Аксак починка гуртын вордскемын. Егитысен мурт гуртэ вуыса, «Мир» колхозын ветыл сюдӥз, нош Володяез чугун сюрес вылын тыршиз. Кыкназы но, шутэтскыны потытозязы, одӥг интыязы ужазы.

Чиковъёс вить пинал вордӥзы: ньыль пи но одӥг ныл. Ваньзы соос синмаськымонэсь будӥзы. Бадӟымез Лёня пизы «Новый мир» колхозын тракторист луыса тырше. Ирина та колхозын ик пӧртэм ужъёсты быдэсъя. Валера чугун сюрес вылын тырше. Сергей холодильникъёсты тупатъя. Коля — МВД-ын.

Ольга Егоровна та нуналъёсы куатьтон арессэ пусйиз. Нылкышно вань ӧтем кунооссэ паймытӥз: соослы аслэсьтыз дасям кузьымъёссэ сётъяз.

— Ар талэсь азьло малпанэ вуи: 60 арес тырмонэлы пужыё 60 пӧзьы но пыдвыл кертто. Нуналлы быдэ одӥг куззэ керттӥсько вал. ӝытъёсы телевизор учкон сямен но киям киужме кутылӥ. Мукет ужез лэсьтыкум но, ӧжыт вис шедьтӥсько ке, керттӥськонэ борды кутскисько, одӥг веньлы ке но азьлань луоз шуыса, малпасько. Пичи дыръямы нэнэймы милемлы, нылъёсызлы, шуылоз вал: юнме эн пуке, кыӵе ке но киуж таръялэ. Ай пудо возьманы мыныса но, киужтэк учыраськод ке, нунал ик, ява, толэзь кузьда кыстӥське. Ярам коть, малпанэ быдэсмиз. Куноосы азе быдэс коробка керттэм ужъёсме поттӥ. Соос ваньзы паймизы. Ми дорысь шумпотыса кошкизы. Умой ук со — мыным гинэ кузьым ӧз вае, асьсэос но доразы саламен бертӥзы.

— Ма, со вань ӵыжы-выжыосмес дӥсяз ини, — шумпотэмзэ уг ваты кузпалыз. — Мукетъёслы но жалятэк люкылэ. Оля чильпаськыны но, пужыятскыны но олокин кадь. Инмар мыным  чупрес нылкышноез сётэм. Бакча котырын но солэн ваньмыз удалтэ. Толалтэлы кӧня банка меда огреч но помидор, компотъёс ворса! Ирина нылмы но нэнэезлэсь бере уг кыльы, котькыӵе ужез шаплы но синмаськымон лэсьтэ. Котыр ласянь анаезлы юрттэ.

— Нош кытысь сомында сӥньыс? — синъёсты мальдытӥсь пӧзьыос шоры учкыса, юатэк уг чидаськы.

— Кытысь шедьтӥсько, отысь ик басьтӥсько. Ми пинал дыръя сыӵе сӥньысъёсты уйвӧтысь но адӟылыны уг луы вал ай. Нош али! Син мальдэ! Пужыос но олокыӵе но турлы малпало. Кытысь ке, кинлэсь ке чебер пужызэ адӟисько ке, соку ик, доре бертыса, керттӥськонме мытӥсько.

Шумпоттэ соиз но: Чиков кузпалъёс егит дырысенызы ини «Удмурт дунне» газетэз басьто.

— Ой, ми солэсь вуэмзэ гинэ возьмаса улӥськом, — шуэ Ольга Егоровна. — Ёросын потӥсь «Маякез» но лыдӟиськом. Пырак пичи муртъёс сямен, Володяен вожмаськыса лыдӟиськиськом. Газет нырысь ик со кие уг ке вуы, куатаське, вераськемез ик уг поты ни. Сыӵе дыръя амалтэк киуж борды кутскисько, газетъёсме кузпалылы сётӥсько.

Чиковъёс удмурт концертъёсы но ветлыны ярато, со понна соосты пиоссы юромо Иже нулло.

Любовь Тихонова.

Туспуктӥз автор.

 

 

Удмурт Дунне
By Удмурт Дунне 10 августа, 2011 08:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<