Кисыез куръяно ӧвӧл!

Удмурт Дунне
By Удмурт Дунне 24 августа, 2011 13:10

 Кызьы азинсконо Удмуртиысь министерствоослы? Республикалэн кисыысьтыз сяна, кытысь коньдон возьмано? 2010-тӥ арын шаерамы 21 миллиард манет инвестициос вуизы — 25 процентэз промышленностез азинтонэ.

Удмуртилэн Президентэз Александр Волков шаплыгес кариськыны косэ министръёсты. Табере улосъёсы уксё вуоз федерал программаосъя гинэ. Россиын соос 41. Соосъя шаермылы висъяськоз 26 миллиард манет. Нош 2013-тӥ арысен бюджетъёс кылдозы, федерал программаосты быдэсъяса гинэ. Россиын соослы бадӟым коньдон чакламын — 922 миллиард манет. Котькуд программалэн бюджетэзлэсь 1 процентсэ кыскыны быгатоно Удмуртие, министръёс азе курон пуктэ А. Волков.

Кылсярысь, ваньмызлы адӟем карымон Дышетонъя но наукая министерстволэн тыршемез. Кылем арен ӵошатоно ке, коньдон 2 поллы тросгес вуиз ни. Туэлы план 1,8 миллиард манет чакламын. Мыло-кыдо ужало вылӥ дышетскон заведениос — 60-лэсь трос проектъёссэс Россиысь ӵошатсконъёсы ыстӥзы.

Дышетонъя но наукая министр Андрей Кузнецов шараяз мукет вормонзэс но. Али ӟеч коньдон лыктоз школаосысь покчи классъёсъя люкетъёсты выльдонлы. Талы асьме министерствоын ужасьёс куризы 120-200 миллион манет. Малпанъёссы быдэсмыны кулэ — Россиысь 42 улос пӧлын Удмуртия басьтӥз 13-тӥ инты.

Нялтас вераса, кенешонын шӧдӥськиз министръёслэн лыдпусъёсын ужамзы. Кылсярысь, кинлэн экономикая дышетскемез вань, ӵап та ужпумъя йырыз но зол пӧзе. Тани Андрей Кузнецов — специальностезъя инженер-экономист, экономика наукаосъя доктор луэ.

Лыдпусъёсты ӟеч валамзэ возьматӥз алигес юнматэм выль кивалтӥсь но — гурт удысъя но сиён-юонъя министр Алексей Стрелков. Алексей Владимирович но экономистэ дышетскемын. Солэн удысаз уксё лыктэ 3 федерал программаосъя. Ог 100 миллион манет кыскемын гуртэз азинтонэ. Коньдон мыноз газ кысконлы, гуртэ кылись егит специалистъёслы юрт пуктонлы но мукет. 72 миллион манет чакламын аналтэм муосты берыктонлы. Шаерамы саклык висъяське ӟеч кидыс будэтонлы но. Таизлы 20 миллион манет мыноз.

Уката шумпоттэ мукетыз бадӟым проект — чорыг будэтон. Огаз бадӟым адӟытонын тазэ синйылтӥз вал Россилэн премьерез Владимир Путин. Проектлэн огъя быдӟалаез — 3 миллиард манет. Отысь 400 миллионэз али кутӥське ни — Глазов котырын тыметлы инты гудо.

Уксё кыскыны быгатэмзэс юазы мукет министръёслэсь но. Котькинлэсь зол пӧсяно луиз Игорь Краснов — мугорез кыдатон культурая, спортъя но туризмъя ведомстволэн кивалтӥсез. Кылем арын федерал программаосъя та удысэ ӧз вуы одӥг копейка но.

— Малы мукет республикаос спортъя объектъёс лэсьто Россиысь коньдонэн, нош асьмеос котьку республикалэн кисыысьтыз уксё куръяськом? — пыкылӥз Александр Волков.

Туэ министерстволэн бюджетаз Россиысь вуоз 78,5 миллион манет. 2012-тӥ арын 610 миллион манетлы куронъёс келямын. Быдэсмозы-а малпанъёссы спортъя министерствоын ужасьёслэн? Президентлэн талы осконъёсыз ичигес — коньдон лыдъян ужпум та ведомствоын чутэ. Кылсярысь, «Зенит» стадион вӧзысь катокез вуттыны чаклазы 120 миллион манет. Объект липет улэ вуиз — сюлмаськон йылӥз. Табере катоклэн огъя дуныз 620 миллион манет вылэ вуиз.

Таӵе ик йырсынанъёс пыр ортчозы мукет министръёс но. Куд-огез выль кивалтӥсьёс, отпусксы тупамен, интыязы ыстӥзы нырысетӥ воштӥсьёссэс. Но Александр Волков ӵектӥз возьманы асьсэды министръёсты — удысъёссы понна сюлмаськемзэс уж вылын мед возьматозы, пе.

Елена Скворцова.

 

Удмурт Дунне
By Удмурт Дунне 24 августа, 2011 13:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<