Зор куараё инвугур

Удмурт Дунне
By Удмурт Дунне 24 августа, 2011 13:18

Зор куараё инвугур

 

Ю. Лобанов.

Дас нунал ӵоже дуннелэн пӧртэм сэрегъёсысьтыз художникъёс кынар кабизы. Сыӵе нимын ортчиз 7-тӥ августысен 16-тӥ августозь Сьӧлта ёросысь этнофутуризмъя ньылетӥез калыккуспо фестиваль.

Отчы пыриськизы Марий Элысь, Башкириысь, Татариысь, Пермь улосысь, Финляндиысь но шаерысьтымы суредаськисьёс но этноперформансэн тунсыкъяськись мукет адямиос. Ужрадэ пыриськисьёс возьматӥзы театрализованной представлениос. Эшъёсмы усто пӧрмытӥзы, кылсярысь, Пётр Коробов (Куак Петыр) «Утчан-шедьтон»  композиция малпаз, Нина Вахрушева (Бӧдья Нинӥ) «Дуала-туала» нимаськись перформанс кылдытӥз.

Татын трос куноос вал: Мордовиысь, Пермь улосысь усточиос, Воткинскысь «Купанча», Вавожысь «Гербер» ансамбльёс, Саранскысь «Морденс» фольк-арт группа, Алнашысь удмурт дӥськутъя «Даур-гумыр» театр, Сьӧлта ёросысь Выль Мӧньяысь «Инвугур» коллектив.

16-тӥ августэ куноосты шулдыр пумитазы выль мӧньяос. Туж чебер но капчи мылкыдо «Инвугур» ансамбль но солэн кивалтӥсез Галина Иванова сюлэмам ик усизы. Сюдӥзы, шулдыртӥзы, куноятӥзы. Татын чузъяськизы фин, пор, бигер, удмурт но мукет эктон гуръёс. Собере вырӟимы Кӧлесур гуртэ. Гурт кузя кырӟанэн вамыштӥм школаязы. Син шоры йӧтӥз вольыт сюрессы, чебересь юртъёссы. Калыкен усто ужало, огкыл шедьто Кӧлесур гуртысь кивалтӥсь Юрий Шудегов, национальной культурая центрез кылдытӥсь Нина Шудегова но шаерчи Пётр Коробов.

Н. Вахрушева.

Та симпозиум ортчиз куинь гуртын — Юмга-Омгалан, Кыргуртын но Кӧлесурын. Тросгес ужрадъёс радъяськизы берлояз. Кылсярысь, татысь спортзалын учкимы пӧртэм экспозициосты но суредъёсын выставкаез. Мыным туж кельшо малпаськытӥсь суредъёс. Сюлэмме бугыртӥзы Валентин Белыхлэн но Вячеслав Михайловлэн пейзажъёссы, Надежда Уткиналэн (Гозы Нади) аспӧртэм суредъёсыз. Юрий Лобанов верамъя, Надежда Уткина кадь творческой адямиослы кӧня ке гинэ валэктоно, соослэн пушказы ошмес пӧзьыны кутске. Кин малпаз, та тодмо кырӟась сокем мур но тунсыко суредъёс лэсьтоз шуыса. Куинез ик ужез этнофутуризм шӧмын дасямын, котькудӥз возьматэ удмурт нылкышнолэсь пуш дуннезэ.

Зал шорын сылӥз паймымон сузьет. Со пӧрмытэмын вал, крезьгуро инструментъёсты питран котыре тырыса. Паймытӥз инвугур инструмент, сое кылдытӥз Юрий Лобанов.  Крезьгуро арбери узьыгумылэсь лэсьтэмын, пушказ векчи кӧжы тыремын, сое, пе, тырмытыны луэ кеньырен но пӧсьтурын тысен но. Выллань ӝутоно ке, куараез куазь зоремлы кельше. Зал шорысь сузьет кельше шундылы но. Художникъёс ваньзы ӵош перформансъёс возьматӥзы та шунды суред котырын. Собере котькудӥз нимаз представлениос пуктӥзы на.

Бӧрысь школа стадионын коллективъёс концерт пуктӥзы. Артистъёс калыкез асьсэ шудонъёсазы кыскизы, ваньмы луимы артистъёс, кырӟасьёс, эктӥсьёс. Тэк сылӥсез ӧй вал. Тодматски финъёсын: Эса-Юсси Салминен — со УдГУ-ын дышетэ, татын тодматӥз Сьӧлта батыръёслы сӥзем перформансэныз. Кайя Кангас но Митта Сорвали Финляндиын туж тодмо адямиос, соос актёръёсты дышето, тунсыкъясько этнофутуризмен.

Вань та ужрадэз чаклаз но быдэстӥз художник но усточиослэн «Ижкар» огазеяськонзылэн кивалтӥсез Юрий Лобанов. Туж бадӟым тау карисько та адямилы, котькинэн одӥг кыл шедьтэ, тунсыко ужрадъёс ортчытъя, ас удыссэ быгатыса валтэ.

Анна Дедюхина.

 Ува ёросысь  Булай гурт.

Удмурт Дунне
By Удмурт Дунне 24 августа, 2011 13:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<