Бырйыны юрттоз КОИБ

Удмурт Дунне
By Удмурт Дунне 23 августа, 2011 11:52

Бырйыны юрттоз КОИБ

Партиослэн азьветлӥсьёссылы В. Пономарёв маде КОИБ сярысь.

 Быръёнъёсы лыктӥськод, бюллетеняд кулэ интызэ пусйиськод но бумагаостэ нимысьтыз ящике куштыны дыртӥськод. Шӧдтэк шорысь со ящик нылкышно куараен тау каре. Быгатоз луыны озьы но: бумагадэ, шексэ шедьтыса, аслыд ик берыктоз, яке «ньылыса» ватсалоз: бюллетень умойтэмен лыдъямын. Мар та таӵе? Вераськись ящик. Нош шонергес ке — КОИБ — бюллетеньёсты эскерон-чакланъя комплекс. Тӥни озьы паськыт вамышъёсын паӵаны кутско быръёнъёсъя выль технологиос.

Кылем шутэтскон нуналъёсы шаерысьтымы Кун Кенешын КОИБ-лэн уженыз тодматскон ортчиз. Ужрадэ вуылӥзы Общественной палатае пырисьёс, партиослэн кивалтӥсьёссы, журналистъёс. Ваньзэсты соосты Удмурт Республикаысь Быръёнъёсъя комиссия тодматӥз ГАС «Выборы» системаез кутонэн.

Шаерысьтымы Быръёнъёсъя комиссиен кивалтӥсь Владимир Пономарёв пусйиз, туэ ар пумын, 4-тӥ декабре, Кун Думае быръёнъёс дыръя та амалэз ас вылазы шӧдозы Ижын улӥсьёс. Нош азьланяз Удмуртиын оглом 4 сюрс 275 КОИБ-ёс кутӥськозы. Нялтас вераса, быръёнъя участокъёс шаерамы 1 сюрс 24 пала.

Быръёнъёсъя бюллетенъёсты эскерон-чакланъя комплекс Россиын малпамын. Нырысь учкыса, номыр сыӵе-таӵеез ӧвӧл кадь. Но ящиклэн вань кык сканерез, бюллетень люкан кык интыез, печатлась механизмез но цифровой амалэн ужась клавиатураез.

Кун Думаысь «Зэмлыко Россия» фракцие пырись депутат Виктор Шудегов тунсыкъяськиз:

— Нош электричество кысӥз ке, КОИБ ужамысь дугдоз ук. Кызьы соку калык куаразэ сётоз? Луоз-а мудрон ящикез огшоры урнаез сямен ужатыны?

Владимир Пономарёв буйгатӥз: КОИБ-ёс вылэ выжыса но, огшоры урнаослэсь уз куштӥське. Шуге-леке шедёнтэм вылысь уже кутыны луоз аккумуляторъёсты но. Тыл кысӥз ке но, КОИБ-лэн лыдъям-чотамез нокытчы уз ышы.

Быръёнъёс ортчем бере ик КОИБ вераны быгатэ ни: со пушкысь кӧняез бюллетень кыӵе кандидат понна сётэмын, кӧняез умойтэмен лыдъямын. Но быръёнъёсъя участокын ужасьёс со лыдпусъёсты соку ик уз юнматэ, эскерон вылысь ящикысь 3-5 процентсэ бюллетеньёсты учкыса потозы на.  Номыр ӧз шугъяськыты ке, КОИБ-лэсь лыдпусъёссэ келялозы улосысь быръёнъёсъя комиссие.

Люкаськемъёс тунсыкъяськизы на:

— Выль технологиосты кутӥськом бере, оло, соку ик Интернет пыр куара сётыны кутсконо?

— Сыӵе вамыш лэсьтӥз Прибалтикаысь одӥг кун. Собере асьсэос ик жалязы, — шуиз Быръёнъёсъя комиссилэн кивалтӥсез, — 2 процентэз гинэ калык быръёнэ пыриськиз, нош быръёнлы оскон туж зол усиз…

Юанъёс бере ваньзылэн КОИБ-ез матысьгес адӟемзы потӥз. Ящик улӟиз но ялӥз: «Туэ 4-тӥ декабре ортчоно быръёнъёс ӧз вуэ на, отчыозь кылиз 106 нунал». Озьы ке но люкаськемъёс КОИБ-лэсь ужзэ эскерыны быгатӥзы ик. Куд-огез машинаез пӧяны но выриз. Тани одӥгез бюллетень интые огшоры бумага донге: техника сое палэнтэ. Мукетыз ӝыныё кесем бюллетеньзэ мыче, ящикысь нылкышно пыкылэ: укыр вакчи бюллетенед но бумагаез берен сэрпалтэ. Куинетӥез одӥг кандидат интые кыксэ пусъе. Ящик ньылэ ке но, бюллетень умойтэм шуыса, ивортэ, сое, пе, лыдэ уг басьты.

Нялтас вераса, одӥг нуналэ быръёнъёс азьын но быръёнъёс нуналэ вазь ӵукна таӵе тестированиез КОИБ одно ик ортчыны кулэ. Ачиз ящик — пыртӥз адӟиськись. Но со вие ик бюллетень вылэ пуктэм пусэз тодманы уг луы.

Али КОИБ вераське нылкышно куараен гинэ. Но куд-ог улосъёсын ортчем эскеронъёс бере кышномуртъёс куриллям: пиосмурт сямен но лабыртыны мед быгатоз вал. Россиысь Быръёнъёсъя валтӥсь комиссилэн кивалтӥсез Владимир Чуров та пумысен малпаськыны оскытэм.

Елена Панфилова.

Туспуктӥз Владимир Беломорских.

 

 

 

Удмурт Дунне
By Удмурт Дунне 23 августа, 2011 11:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<