Борддор но ӝутӥ ой но жадьытозь…

Удмурт Дунне
By Удмурт Дунне 12 августа, 2011 10:26

Борддор но ӝутӥ ой но жадьытозь…

Чаклам ужъёс пумысен кенешо (паллянысен буре) каменщик И. Корепанов, прорабъёс А. Ившин но Л. Довудов, каменщик А. Чирков.

 

Лэсьтӥськон удысысь потэмын трос тодмо адямиос. Кылсярысь, дано лэсьтӥськисьёс луо  Президент Александр Волков но Правительстволэн Тӧроез Юрий Питкевич. Та удысын ик тыршемын  Кун Кенешлэн Тӧроез Александр Соловьёв.

Кылбурчи Галина Романова но ӵемысь вералля егит дыръяз лэсьтӥськисьын ужамзэ. Удмурт филармонилэсь одӥг борддорзэ аслам киосыным ӝутӥ, шуэ. Мон маин пӧртэм, малпай. Борддорез шпаклёвкаен шонертыны быгатӥсько, буёлэн но кисточкаен ужаме вань, арлы быдэ сямен обой  лякылӥсько. Сыӵе малпанэн одӥг нуналлы ужме воштоно кариськи — лэсьтӥськон удысэ куриськи.

Лэсьтӥськонъя участоклэн кивалтӥсез Вадим Дмитерко лыктыны косӥз сизьым но ӝынылы. Соин 6 часын ӵукна мон пыд йылам вал ни. Огшоры ужан нуналэн ӵошатоно ке, часлэсь кема изён дырме ыштӥ. Ярам, огполаз чидамон.

Ижысь «Янтарный» комплексын ӝутӥське ни куинетӥ юрт. Кыказ кемалась корка пыронъёс куашетӥзы. Сӥзьыл нош ик выль семьяослы шумпотон вуоз. Ӵапак куинетӥ юртын мыным ужаны кылдоз. Вадим Валентинович тодматӥз монэ прорабен — Алексей Ившинэн. Солэн бригадаяз, каменщикъёс пӧлын, пе, ужано луоз. Мда… таӵезэ мон ӧй малпа. Но кытчы пырод.

— Лэсьтӥськон инты — кышкыт объект, — мыным инструктаж ортчытэ Алексей Витальевич.  — Чакласьконо вамышлы  быдэ. Юрт доры матэктыны яра подъезд азетӥ гинэ — соку ик липет улэ пыроно. Корка пушкын пӧртэм пумо лэсьтӥськон юдэсъёс тачак. Пыдулдэ учкы — кортӵог-арматура вылэ лёгиськыны медад шедьты.

— Борддор тыремед куке вань-а? — юа Ившин.

— Киям мастерокез гинэ но воземе ӧвӧл, — уг танӥськиськы мон.

Болгарка кылзӥське Иван Алексеевлэсь.

Дышетом, шуиз кивалтӥсь. Эгра районын вордскем Ившин ачиз но каменщикын ужамын. Ижысь Строительёслэн городокысьтызы Керамблок нимаськись районэз ӝутэм. Бӧрысь йылпумъяз монтажной техникумез. Со дырысен ачиз кивалтэ ужасьёсын. Лэсьтӥськон удысын 26 ар тырше.

Алексей Витальевич сётӥз на мыным каска но перчатки. Тодматыны нуиз бригадаысь пиосын. Каменщикъёс ваньмыз ог 60 адями. ӝыныез — асьме дорысь, кылемез — мигрантъёс: узбекъёс но таджикъёс.

— Нош пиослэн монэ дышетэмзы потоз-а? — сюлмаськемме верасько. — Оло, ужзэс ӝегатӥсько шуыса, уллялозы?

— Удмурт пиосын ужалод. Соос рос-просэсь, дышетозы. Чидалозы но кӧня ке. Пиос сделкаен ужало. Кирпич тыремзэс но мукет ужзэс лыдъяськомы квадрат метрен, соя ик коньдон лыктэ, — шуэ Ившин.

 

Озьы куинь пиосын ӵош тубим 14-тӥ этаже. Пыдын. Лифтъёс татын кык луозы. Но али лифт шахтаос бушесь. Ужасьёс ваньмыз пыдын бызьыло. Соослы кулэ луись материалъёсты тубыто нимысьтыз подъёмникен.

14-тӥ этажысь кык комнатаен квартираын кӧня ке ужез вань на. Пиослы татысь борддоръёсты утеплителен шобыртоно, комната но кухня вискысь борддорез ӝутоно.

Но нунал кутсконын ик ӧз удалты. Раствор уг вутто. Ма луиз?

— Подъёмниклэн еэз чигем, — югдурез валэктэ Ившин. — Возьмалэ.

— Фотоаппаратэд ӧвӧл-а, мар-а? — юало мынэсьтым пиос.

— Вань, но соиныз берлогес ветло ай. Али монэ ужаны дышетэ, — пиослы лыктэм мугме верасько.

ӟеч ужан мылкыдылы таосыз уг оско. Нылъёс, пе, каменщике али уг мыно. Лэсьтӥськисе дышетскыкузы, вераллязы ик: азьло, пе, нылъёс но кирпич тыро вал. Али та удысэ арлыдо кышномуртъёс гинэ кылемын, соосты но туж шер пумиталод.

Но ужмы интыысьтыз уг вырӟы — раствор ӧвӧл. Пиос шаплы кариськизы — крановщиклы шултӥзы: милемлы, пе, растворен пуртыез ӝут али. Таиз оп! шуытозь вуттӥз. Но секыт  мае ке укноетӥ уд пырты — пиос растворез ведраосы тыризы, лопатаен ик бадӟым пуртые куязы. Иське, ужлы кутскон но сётыны луоз.

Иван Корепанов соку ик толло ужзэ азьланьтӥз. Корка монолит конструкциен лэсьтэмын. Ульча ласянь коробка вылтӥ кирпичен радъёс тыро на. Пушласянь монолит вылтӥ — куинь полэс стекловата, собере эшшо тыро 9 сантиметр зӧкталаем керамзит блок. Ӵап тае быдэстэ Иван Корепанов.

— Мар бен карод? — йырзэ тӥя мукетыз кивалтӥсе Андрей Чирков.

— Тон мар, мон но сое ик, — ужлэсь уг кышкаськы мон.

Кирпич вӧзы кирпич - луоз борддор.

Андрейлэсь керамзит блокез болгаркаен вандэмзэ чакласько. Быдэс блокъёс тэрымтэ интые юдэсъёс кулэ. Ӵапак тае ик дася  Андрей. Чурыт материалэз тар! карыса вандэ. Мон но тазьы быгатысал. Чирков сётӥз мыным болгарка, блок пуктӥз. Но пусъем интыетӥ вандыны мон матын но ӧй пӧрмыты — киы быдэс 2 сантиметрлы палэнэ кошкиз. Эх, толыке ӧвӧл.

Но шудэ вылэм — пиос оскизы мыным комната но кухня вискы кылем борддорез йылсаны.

— Котькуд рад понэмед бере уровенен учконо, кырыж медаз кошкы, — валэктэ Андрей.

Бригадаысьтымы куинетӥез пияш — Иван Алексеев — мыным ведраен раствор вуттӥз, мастерок сётӥз.

Керамзит блок вылэ раствор вӧлдӥськод, рад вылэ понӥськод, блок вылтӥ мастероклэн ныдыныз тыш-таш шуккиськод, потэм растворез мастерокен утялтӥськод, уровенен мертаськод. Палэнысен та уж шоры учкыны капчи вылэм. Нош мынам растворе но выж вылэ сач усе, уровене но кырыж  возьматэ.

— Мар тон раствордэ мужиктэ сямен маялляськод, — тяпайтэме шоры учкыса, вератэк уг чида Иван Корепанов. —  Сач-сач понӥд, радзэ ӝутӥд.

— Эн кылзы, пӧрмоз ай, — мыным дурбасьтыны выре Андрей Чирков.

Со вискын Корепанов ужзэ быдэстӥз ни.

— Колбаса вай ай, — вазиськиз со мукетызлы Иванлы.

Кыӵе колбаса стройкаын, малпай мон. Со вискын Иван Алексеев вуттӥз кый кадь кузь тӧдьы гумыос. Соос кыӵе ке небыт материаллэсь дасямын. Вӧлдэт но борддор вискытӥ таин, пе, пасьёсты ворсано, со квартираысь шунытлы кыре потыны уз сёты. 5 сантиметр зӧкта луэмысьтыз, та материалэз лэсьтӥськисьёс «колбаса» нимало.

 

Пумен мынам но уже пӧрмыны ӧдъяз, кытчы ке быдэс блок понӥсько. Тырмымтэ интызэ Иван Алексеев рулеткаен мерта, кулэ размер вандыса вае. Мукетыз визьмасе Андрей уровенен чакла. Зэм, вӧзам ӝутэм борддор чылкыт, растворез виямтэ. Мынам йылсам борддоре парсьпилэн кадь паньсамын. Кырсь ужамелэсь туж кепырасько. Чирков нош ик мылкыдме буйгатэ:

— Узбекъёс но та порма ужало, тынад сямен дышетскемзы ӧвӧл.

— Нош тӥ кытын дышетскиды? — тунсыкъяськисько.

Балезино районысь Исак гуртын вордскем  Андрей нырысь, пе, колхозын ужай. Но гуртын уждунэз но ичи вал, ӧз но тыре дыраз. Соин Иже кошкиз. Нырысь стройкаын лэсьтӥськисьёслы юрттӥз, собере каменщике дышетскиз.

Мукетыз балезино пи — Миктапи гуртысь (Нововолковоысь). Иван Корепанов армия бере Глазовысь училищеын дышетскиз.

— Группаямы 25 кузя вал. Алигес пумиськылӥм эшъёсын. Огзы но стройкаын уг ужало, кин ке — вуз карисьын, мукетыз — менеджерын. Секыт шуо-а, мар-а, — вера Корепанов.

Кыкетӥез Иван — пурга пи. Алексеев йылпумъяз Ижысь монтажной техникумез. Ванялэн вордскем Пичи Пурга черкогуртаз ик ужамез потэ вал. Но отысь лэсьтӥськонъя комбинатэ инты ӧз шедьы. Соин городын тырше.

Каменщикъёс ужзы вылэ уг ӝожтӥсько. Гужемзэ туж ӟеч, пе, уждунзы но умой — 25-30 сюрс манет вылэ люкаське. Облицовкаын кирпич тырыкузы, эшшо ӟечгес уждун басьтыны быгато, шуо пиос.

Но тужгес секыт толалтэ. Объектын не укноез, не ӧсъёсыз уг луо, тӧл шула. Нош каменщикъёслы куронъёсъя 28 градус кезьытозь ужаны яра. Куддыръя раствор но кынмыны ӧдъя. Нош лэсьтӥськисьлы чидано…

Паньсам борддорме эскерыны вуылӥз Ившин прорабмы но. Чидамон, пыр гинэ медам адскы, пе.

 

Каменщикъёс бордын ужамме тодыса, лэся, куд-ог рабочийёс юри та квартирае пыраны ӧдъязы. Юрттоно-а шуыса, тунсыкъясько ӟучъёс но, узбекъёс-таджикъёс но. Но милям ужмы но пумаз вуыны ӧдъяз. Люкамы кылем-мылем кирпич но блок юдэсъёсты, лопатаен сузямы выж вылысь жуг-жагез, ведраосы тырим. Таосты подъёмникен улӥе васькытоно луоз. Но таиз, пе, татчыозь уг на ужа — соин векчи жуг-жагез пиос укноетӥ кисьтазы. Ульчалы номыр уз луы. Нош квартираосын чылкыт луыны кулэ. Татын тани  пластиклэсь укно пуктыло ни, бӧрысь выж вӧлдозы, борддоръёсты волятозы, собере шуныт, тыл  но ву пыртозы.

Жуг-жаг сузяку пурӟем тузон ньылонам кугӟаз. Кызонэ пӧсьтӥз. Али пӧсь чай юысал. Нош 14-тӥ этажын нокин чай уг ӵекты. Редакциын мон 11 часын ик нуназеясал, нош татын… Каскалы луыса чыртые жадиз — йырме сьӧрлань кыске кадь. Йырсие но сылыны дась — тузон пуксьыса, йыр лыдэ ни.

Ярам, 12 час вуиз. Табере, пе, нуназеяны но луоз ни. Мон магазинэ бызьылытозь, сьӧразы ваем сиёнзэс пиос 10 минутскын ньылӥллям. Табере картаен шудо. Нош ӟус вылэ гань-гань интыяськыса, мынам вань ӟигары быриз. Не сием уг поты, не уж сярысь малпам.

— Мар эшшо юалод на? — маза уг сёты Андрей.

Танӥськытэк верай, жади шуыса. Ярам, час ӵоже, пе, шутэтскод ай. Жадеме ӧз ортчы, уката шальтрай.

Нуназе бере мастерок интые фотоаппаратме кутӥ. Соин мылкыды уката шаляй-валяй луиз. Юрт пушкысь борддоръёслэн пась интыосазы кирпич тыри, раствор куяй. Собере эшшо азьтэмски — пукси, пырись-потӥсьёсын зули. Нош пиос ӧс кусыпъёслы каркас тыризы, ужлы ӧз ёрме.

5 часын объектысь гылӟыны малпай. Мынам ужан нуналэ та вакытэ йылпумъяське ни. Выль тодмоосы уг дырто. Уж вань дыръя ӝытазе сизьымозь но, тямысозь но объектын тыршиськом, шуо пиос.

— Рабочийлэн уждунэз потэ ужамез бордысь. Со кыл кутэ аслаз удысэз понна гинэ, — вера лэсьтӥськон участоклэн кивалтӥсез Вадим Дмитерко. — Рабочий палан — вань законъёс, уждунэн сое ноку уз алдалэ. Заводын сямен татын пропускен кутыса уг возё. Адямилы кулэ ке аслэсьтыз ужпумъёссэ лэсьтыны, кошкылыны но быгатэ.

Курми, жади, коскай… Таӵе кылъёсын дунъяй ужан нуналме. Со понна йыры капчи, компьютерез ӧй адӟы бере, синъёсы чик ӧз жаде. Бертыса гожъяськоно на, малпай. Но дас часын ӝыт ик умме уси…

Алёна Ионина. 

 

Удмурт Дунне
By Удмурт Дунне 12 августа, 2011 10:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<