Анайлэн ӝожез

Удмурт Дунне
By Удмурт Дунне Август 30, 2011 12:32

Анайлэн  ӝожез

 Мукыли

Туннэ кадь син азьын 1951-тӥ ар. Гурт пумысь бусыын атае тракторен гыре но шуэ: «Нылы, эн кӧшкема, мон нюлэс дорозь гырыса мыно, трактор куараме кылзӥськы, мон котырскытозь, мукылиед (коньыбыж) трос люкаськоз, мешокмес соку кабинаям куштом, бичалод мукетаз». Озьы вал нуналлы быдэ сямен, я пот бичасько, я пушнер, я беризь куар корасько. Огпол мукыли бичаса бертыкум, председательмы адӟиз, паймиз:

Суредаз Пётр Ёлкин.

— Атаед тракторен ужа, няньды уг тырмы шат, нылы? Война вакыт али ӧвӧл ни ук.

— Мон уг тодӥськы суратэк пыжем нянь сиеммес, мемей чугун сюрес вылэ тулыс канава кырыны мынэ ке, колды ӟег нянь вае.

Сьӧд чилясь вал вылаз пуксьыса, председатель кошкиз, мон кема сылӥ,  мышказ учкыса. Йырме сӥсъязы пӧртэм малпанъёс: малы няньмы уг тырмы, ведь атай туж трос ужа кадь. Нош мемей гуртэз ик уг адӟылы, киысьтыз биньгозыез уг усьылы: толалтэ ӟырт кезьытэн 8 иськеме фермае, пудо сиён нуыса, мынэ, валъёс лябесь, воззы погра, куазь жобаку, гуртэ 7-8 часын ӝыт вуэ. Мемейлэсь бертэмзэ возьмаса, ми, укноысь йӧэз шунтыса, учкылӥм Огырчи сюрес пала. Анайёсмы буш ӧз бертылэ, пашпу кораса вайылӥзы, трос пол кутылӥзы соосты бигеръёс. Оло, мемиез туннэ бигеръёс кутӥзы, оло нош валэз жадиз, таӵе жоб куазен кионъёс шоры но ӝимод…

Мемей бертэмез бере конное валзэ юскыны мынэ, ми бадӟым сузэреным, пашпу вандылыса, гуре тылскиськом. Кӧтэз тырытозь но кынмем вылтыр шунатозь, 11 час но вуэ. Со понна кыӵе ческыт кӧлӥськод ни, корт гур вылын кынмем картошкалэсь пыжем табань сиыса.

Меми но 1-2 часлы вӧзамы интыяське, кытӥ ке ӧвӧл атасъёс чоръяло ни. 5 часысен ӵукна со нош ик берга гурт котырын: сиён пӧрано, пудоез утялтоно, нош ву тубытъянэд гурезь улысь, котькуд ӵукна люкмесэз усьтоно, куазь жобан дыръя нырысь ик сюрес мычоно.

Огпол ӵошен чай юыса пукыкумы, председательлэсь «Няньды уг тырмы шат?» шуыса юамзэ мемиелы тодаз уськытӥ. Со шуиз:

— Дядяед няньмес шори кариз агайёсыныз, соослэн но нылпизы 7 кузя ук, нош дядяедлэн агаез, Миколай агай, Германие пленэ шедем, кызьы ке но гожтэт ыстыны быгатэм но шуэм: «Иван выны, эн кушты мынэсьтым семьяме, жаля». Озьы тӥни, нылы, соин асьмелы война дугдэм бере но умой-умой кӧттырон ӧз сюры.

— Эх, вилькенаке, тон урод лусалыд ке, агай ноку милемыз нянен ӧй сюдысал, — ӵем дыръя вераллязы агаезлэн 2 бадӟым пиосыз, угось соос курадӟонэз ас вылазы шӧдӥзы — коркась корка кураськыса но ветлӥзы. Самой бадӟымез Илья пизы войналэн нырысетӥ нуналъёсаз ик быриз.

 

Калач нянь

1944-тӥ ар. ӟырт кезьыт тол, февраль толэзь. Тани корказе йыгазы, мон дэра дэрем коже, гольык йыр, гольык пыд, корказе потӥ:

— Кин со? Мемей татын ӧвӧл, дядяй войнаын…

Азбарын сылӥсьёс мар верало — уг валаськы. Тодмотэм кылъёсты кылыса, корка пырыны малпай. Нош ӧс кынмем, усьтыны кужмы ӧвӧл. Коркан 4 аресъем сузэре гинэ, со но, тазалыкез уродэн, ветлыны уг на быгаты. Озьы ӵукнаысен нуназеозь мон кылли корказьын, куасьтыны дасям етӥн вылын. Дядяелэн сузэрез мукет гуртысь куное лыктэм, нош мынам кынмыса вамышъяме уг ни лу. Со, корказь пулэз ӝутыса, выж ултӥ пыриз, ӟыгыртыса корка пыртӥз. Мон сайкай больницаын. Кыӵе ке эмъюм но сётӥзы, укол пуктӥзы но доре лэзизы. Мемие соку гуртэ валэн вайиз но гур вылэ интыяз. Кытысь ке кылэм, кынмем интыосты нарды (барсук) вӧйын зырано шуыса. Кӧня ке нунал ортчыса, вань вылтырме, пыдъёсме лек пӧськы басьтӥз, меми маялля барсук вӧйын, мон чир кесяськисько. Озьы быдэс тол ортчиз гур вылын.

Ньылетӥ арзэ ни шимес гудыръяз война, нош дядяйлэн гожтэтэз уг вуы. Уйёсы мемейлэсь секыт лулӟылэмзэ кылӥсько:

— Эх, та скал сиён ӧвӧлэн берзэ ӝутыны уг вормы, мугорыз бадӟым, кинэ бон  ӧтёд ни, пиос котырын  ӧвӧл, скалмы кулӥз ке, асьмеос но сютэм кулом.

Вуиз Вормон тулыс. Кылӥськизы ӵанаослэн, сьӧдкуакаослэн куараоссы, Кечёвка шур вылын йӧ шунаны кутскиз. Макем бадӟым шумпотон вал милемлы — дядяй бертӥз. Берло тодӥм: со, Сталинград дорын ожмаськыкуз, сӧсырмем, кема кыллем госпитальын. Семьяез куректоз шуыса, ивор лэзьымтэ.

— Э, дуноосы, тӥ сютэм быриды, дыр, ни шуыса, малпасько вал, я, эн куректэ, тани кӧня картошты гуын, сугонды но удалтэм, маке но малпалом.

Кӧня ке нунал ортчыса, дядяй, вал кыткыса, ӟуч гуртъёсы кошкиз картошкамес пызен воштыны. Со ӟег няньлэсь шӧмзэ ноку уд ни вунэты. Сое ми калач нянь шуылӥм. Школаын дышетскыкум, ӵем дыръя вожъяськыса учкылӥ калач сиисьёс шоры.

Со вал толалтэ, война бырем бере 3 ар ортчыса. Начальной школамы асьме гуртын ик. ӟырт кезьыт дыръя черниламы кынме, гожъяськыны киос уг чидало, но школае одно ик ветлӥм, сыӵе-сыӵе дышетскем потӥз.

Урокъёс бере бертыны потӥ: вылам гужем нуллон пиджак, пыдъёсам кутъёс, ярам, чулкиосы ыж гонлэсь. Шӧдтэк шорысь классысьтымы пиос сьӧрам бызьыны кутскизы. Одӥгез монэ лымые месӥз но котырысьтым лымыез лёгаз. Кема потыны выри, синкылиосы ымнырам уг тэро, макесъёсы кынмыса горд-гордэсь. Бӧрдыса бертӥ, сокем кӧты урод вал, штанитэк ветлэмме ваньзы тодо кадь йӧтӥз.

Мемие, аслыз номыр басьтытэк, милемыз сюдыны-дӥсяны тыршиз. Станцимы бадӟым бере, ӵем дыръя вагонъёсын кельтылӥзы пызь, сылал, эгыр, луо. Вагонъёсты тупике пукто, 2-3 час куспын соосты бушатоно. Пинал муртлы ужез капчи ӧй вал. Но уксё мед луоз шуыса, меми милемыз, 7-8 классын дышетскисьёсты, сьӧраз басьтылӥз. Мӧйыос медаз йыркуръяське шуыса, туж тыршыса ужам.

Нош кыӵе бадӟым шумпотон вал: Паска праздниклы шуыса, мемей станция лавкаысь горд вылын сяськаё басма басьтӥз. Вуз карисьмы Тая апай солэсь дэрем вуриз.

 

Пасяськем кутъёс

Мемей котьку дышетӥз ужез яратыны, калыклэсь возьдаськоно, пе. Заготзерное чабей нуллыкуз, ваньзэс паймытъяз. Мугорын пичи ке но, бадӟымесь мешокъёсты тыбыр вылаз чаляк нуллӥз, эстӥськонэн бекчеез но капчиен погылляз.

Тодам лыктэ заготзерноысь бер ӝыт гольык пыд вуэмез. Тани, шуэ, кутъёсы пасяськизы, ӵуказе олокызьы ужаны мыноно. Меми бригадирлы та сярысь верано кариськиз. Бригадир пересь Ондрей агайлы шуэм: «Коть уйдэ эн изьы, ӵукнаозь Ольгалэн кутъёсыз мед луозы, сое воштӥсь ӧвӧл».

Дасэтӥ классын дышетскыкум, товарной вагонъёс вискын ветлыса, 3 ар ӵоже дыши поездысь тэтчаны но кошкись состав сьӧры бызьыны, сотэк поезд улэ шедьысал, дыр.

Январь толэзь вал. Ми 3 кузя нылъёс Кечёво станциысен интыяським товарной составлэн тамбураз. Состав вырӟиз гинэ — ми доры мукет вагонысь вуиз ог 17-18 аресъем сьӧд шинелен пияш. Мон соку ик синйылтӥ: изьыез вылын но пельпумаз «ЖУ» гожтэмын. Озьыен, та пияш Огырчиын чугун сюрес училищеын дышетске. Дорамы лыктыса, милициен кышкатъяны кутскиз, коньдонмес куре. Ӧвӧл шуэммылы уг оскы. Мынэсьтым кышкамтэме шӧдыса, кисыысьтыз бритвазэ поттӥз, ымныр, чырты котыртӥм нуллэ. Эшъёсы чир кесясько. Мон ачим но ӧй шӧды сое мыжгемме. Пияш соку монэ, котомка калтӥм кутыса но чыртытӥм донгыса, тамбурысь сэрпалтӥз. Синъёсме усьтӥ но пайми: поезд кошкиз, нош ми ваньмы лымыын пукиськом.

Пурга бусыысен вераським: та учырез нокинлы ум шараялэ. Ӵап соку гуртысьтымы Петя агаен пумиським. Со шуэ: мар таӵе тӥ шимесэсь, нош котомкаосты малы вандылэмын? Ми шып улӥм.

Кыӵе шуген дышетски 8-тӥ-10-тӥ классъёсын. Арнялы быдэ бертоно 18 иськемез, арнянуналэ нош ик сюрес вылэ потоно. Котомкаын 1 колды нянь, йӧл но пӧраськем. Столовойын сиськы вал, коньдон ӧвӧл.

Одӥг арзэ тодмоосмы дорын улӥ, соиз коть умой вал. Сандра апай фермаын парсьёслы картошка пӧзьтэ, ӝытсэ сьӧраз юрттыны нуэ, озьы мон со картошкаен гусъяськылӥ. Берло арзэ дышетскыкум, райцентрысь столовое ветлыны дыши. Нянь дунтэк сётылӥзы. ӝӧк вылын тэркыын юдэм нянь, горчица. Басьтылӥ стакан чай но шыд, тып-тып нянь сииськод ни, горчица зыраса. Со вал 1954-тӥ-1955-тӥ аръёсы. 8-тӥ классын дыръям ай араз 300 манет тыроно вал дышетскемлы. Али ке но анаелы тау карисько со понна.

 

«Монэ ыб, мемеез эн иса»

УдГУ-ысь 4-тӥ курсэз быдтэме бере милемды практикае Пургала лэзизы. 10-тӥ классын урок мынэ. Шӧдтэк шорысь мемей мон доры котомкаен пыре, возьдаськеменым шораз лек вази:

— Мар тон, мемей, татӥ котомкаен ветлӥськод? Пот классысь.

Ярам, Клава эше сое лӥятыса учительской пала нуиз. Эх, шузи, со шумпотыса лыктӥз. Эшъёсызлы но вераз, дыр, нылы дышетӥсь луоз. Нош мон шораз кеськи. Кытӥыз мемиелэн возьдаськоно кадь вал? Уг тодӥськы. Ноку адямиослэн анайёссы сямен вина юэмзэ адӟеме ӧй вал, котьку ӝикыт пӧрмылӥз, котькинэн лякыт вераськылӥз, нош кыӵе ужаз…

Тодам лыктэ 1958-тӥ ар. Толалтэ ӟырт кезьыт уй. Общежитиысь комнатаямы комендант мемейме пыртӥз. Малпаса но йырам уг тэры, кызьы со тулуптэк коръёс вылын тракторен 45 иськемез лыктэм, мыным сиён-юон вайыса. Эшъёсы но паймизы, котыртӥзы, ӟыгыръяло сое. Нош мон ке, шузи, паймыса сылӥсько. Аръёс ортчемъя мемиелэсь туссэ уката но син азям пуктыны кутски, ӵем дыръя вӧтасько. Сопал дуннеын но со весь ужа: я ыж гон лӧдэ, я черсэ. Дядяй но мемейме, мугорыз пичи шуыса, ноку ӧз жаля. Кыкнамы кыльыку, мемей кӧтӝожзэ книгаысь лыдӟем кадь вералляз.

Огпол Паска дыръя куноос ваньмыз ми дорозь ӧз вуэ. Нош дядяй котьку сямен жугиськылӥз, семьяез пазяз. Ми мемей сьӧры пегӟылӥм, тол ӝытъёсы но, дядяйлэсь бертэмзэ возьмаса, пыдысьтымы кутъёсмес куятэк, гур вылын пукылӥм. Огполаз адӟи дядяйлэсь пыӵал кутэмзэ, сьӧраз кесяськыса бызи: монэ ыб, мемеез эн иса… Дуп! вазиз куала сэргамы ыбем куара… Берло меми вераз ни, мон, пе, соку кулӥ кожаса, отчыям ик уси.

— Э, нылы, кӧня пол мурт ыж гидын кӧлай, ыжъёс кышкало но мукет сэргы пегӟо, малпасько, тани-тани атаед пыроз но татчыям ик ӵогъялоз. Я, Инмар ӧз кушты. Татчыозь улӥсько ни. Ӧвӧл одӥг сузэре но, агае но, куректонме вераны нокинлы вал, 16 арескысен кышномурт луи. Дядяед, пумит луэмме шӧдыса, пыӵалэн кышкатыса, кышнолы нуиз. Туала нылъёс огез но ӧй чидасалзы мон сямен улыны, бӧрдылӥз мемие.

 

Губрес бадьпу

Сезьы аран дыръя вал со. Бадӟым апаеным кеносэ изьыны кариським. Мемей пичи сузэреным корка интыяськизы. Мон, 5-тӥ классын дышетскись мурт, ӟуч кылэз умойгес ик валасько вал. Ум йылтӥм атайлэсь жоб куараен кесяськемзэ кылӥ. Ойдо, шуисько, апаелы, пред доры, кыдёкын уг улы со (юыкуз дядяй солэсь гинэ кышка вал угось).

Максим агаен Насьта апай вуизы. Предлэсь кышкаса, атай коркаез усьтӥз. Ачиз трусик коже, нэнэйлэн быдэс ымнырыз вир. Мемейлэн йырыз но ымнырыз миндэр кадь пульдэмын. Кулэм муртэ сямен кеносын ӵогаса возим. Толэзь пала озьы кыллемез бере солы капчигес луиз кадь. Мунчое мисьтӥськыны поттӥм. Мырдэм пыд йылаз сылӥз, дӥсякумы, вӧсь луэмезлы чидатэк, кесяськиз.

Эх, дядяй, ужакуд  сьӧрад нокин ӧз уйиськы, сыӵе сэзь вал. Ваньзэ вина быдтӥз. Кыӵе чебер, таза вылэмед тон пинал дыръяд. Нэнэй-дядяед юн тазалык сётӥллям вылэм. Гуртын но тыныд синмаськымтэ нылъёс ӧй вал, паськыт пельпумо, сьӧд синкашо, йӧно. Берло тон губрес бадьпу кадь луид: лулдэ шедьтытэк, кызӥд, ачид усто плотник ке но вал, юон интыяд пиостэ номырлы но ӧд дышеты, гуртэз шер адӟылӥд. Ваньмыз сурым мунчоын кадь ортчиз. Аслыд шуоно вал, дыр: «Тазьы улыны уг яра, пум пононо, чарка бордысь пайда уз поты».

Аръёс ортчыса, мон валаны кутски: тон вина юэмен, ас шудме келяй. Армиысь бертыса, туганэ выль ар уй монэ ӵукнаозь корка пырыны ӧз лэзьы, ойдо, пе, дядяеныд вераськом, ӵош улом шуыса, мон солы чутрак шуи:

— Уг, дядяй вина юэ, нош тынадэз — бригадир, возьдаськисько. Мынам умой дэреме гинэ но ӧвӧл.

 

Эмъюм шӧмо сакыр

Одӥг уй вань улонме йырчукин берыктӥз. 1954-тӥ арын вал кадь со, дышетскемысь товарной поездэн кынмыса вуи. Мемеен дядяй выль ар пумитаны бӧлякамы кошкизы.

Ӵукна пал дядяй кынмыса вуиз но шуэ:

Малы коркан таӵе кезьыт, али ик корт гурез эстоно.

Мон ӧй дырты полатьысь васькыны (али но асме со понна тышкаськисько). Васькиз 6-тӥ классын дышетскись Катя сузэре. Дядяй ӝуаны кутскем гуре бидонысь керосинэн сурам мае ке кисьтӥз. Со куспын Катялэн выль арлы басьтэм горд сяськаё дэремез ӝуаны кутскиз. Вылысьтыз чалепен усьылэ. Сузэрме корказь доры лымые поттӥ. Эх, али малпасько ни: 9-тӥ классын дышетскись но эн вала маин ке шобыртыны. Катяез Пургала больницае нуим.

Бадӟым мугоро хирург, больница азе потыса, вераз: «Эн кошке, нылды оло чидалоз, оло уз». Кӧня кесяськиз куанер, ву пульыоссэ вандылыкузы. «Пенициллин ӧд ке шедьтэ, осконэз ӧжыт…» — вераз на врач, сюрес вылэ потыкумы. Чорыг кадь кынмыса вуим мемеен гуртэ. Гуртэ бертыса, гын сапегъёсме кыльыны кутски, ӧй быгаты, пасесь пыдкутчанъёсме мемей кылиз. Куинь-ньыль нунал улыса, пыдтышъёсысьтым куэ усьылыны кутскиз, вӧсь луэмезлы но висемезлы чидатэк, бӧрдӥсько.

Нош ӵуказеяз ӧчкарем кадь дышетӥсьмы Виктор Васильевич химиен задача лэсьтыны доска доры ӧтиз, собере гуртысь ужме юаз на. Мон шонерак верай:

— Туннэ уроклы дась ӧвӧл.

Со журналэ «1» пуктӥз.

Ог 10 нунал ортчыса, Катя доры пыраны лэзизы ни. Нырысьсэ мон адӟи валес вылын секыт ӝуштыса кыллись сузэрме: сьӧд синъёсыз мӧзмыт учко, ымдуръёсыз куалекъяло, нуназеяны ваем сиёнэз со одӥг ымтыр но сиымтэ. Берлогес ини, валаны кутскемез бере, со шуылӥз:

— Та песокме ӧй сиы. Тани банкае тыризы, трос люкаськиз, чай юыны ну сьӧрад.

Палатаын возем сакыр эмъюм зынын ке но пыӵамын, туж шумпотыса чай юылӥ, нош ачим сузэрелы ческыт сиён огпол но нуыны ӧй быгаты.

Агаймылэн Миша пиез тодмо бигеръёсыз пыр пенициллин шедьтӥз, соку сузэрелы капчигес луиз, озьы ке но Ижевске келязы. Мыным, 9-тӥ классын дышетскись муртлы, хирург шуиз: «Сузэредлэн 3-тӥ степенё ожог, ми операция лэсьтӥм, но со доры пыраны уг яра на». Синвуосы ымныр кузя пачыл васько. Тодмотэм городын огнам, мар кароно, маин вуоно Пургала? Лыктӥ вал пассажир поездэн, нош бертыны тупасез ӧвӧл. Чик малпаськытэк соку вырӟись товарной поездлэн тамбураз туби. Куазь чидантэм кезьыт, тӧл лыосме ик сӥсъя кадь. Киосы но пыдъёсы номыре уг ни шӧдо. Толалтэ нунал вакчи, 3-тӥ иськеме 5 час котырын вуи. Отысен Пурга пала нуись сюрес нергее васьки. Вуэмелы шумпотыса, 2 иськем сюресэз тырши бызьыса мыныны, тазьы шунтӥськыны умойгес луоз малпай.

Собере 2-3 нунал мугоры ӟырдаса улӥз. Тазьы ветлэмъёсы, куректэме сярысь огпол Виктор Васильевичлы (классной руководителелы) верай. Пурысьтаны кутскем тӧдьыалэс йырсизэ маялтӥз, протез пыдыныз ӟукыртыса, укно доры мынӥз. Огшап шыпыт сылэмез бере мон пала берытскиз но шуэ:

— Тон озьы дӥсьтӥськод товарной поездъёсын ветлыны, нош кытчы ке шедьысалыд ке… Сузэред сярысь но ӧд вералля, нош мон соку «1» пуктӥ. Я, вунэты со сярысь, четверть понна оценкаед урод уз луы, тынад «1» артэ «4» но «5» сыло.

Дышетӥселэн жаляса вераськемысьтыз, лэся, нырысьсэ со азьын куараен бӧрдӥ.

 

Сизьым пар пыдвыл

Адями шудзэ ачиз лэсьтэ, шуо калыкын. Нош мон сое ас киыным келяй. Тылобурдо кадь со лобӟыса кошкиз мон дорысь.

Аръёс ортчемъя кык пиналъёсме огнам будэтыкум, нош но нош жалялляй мемиме. 16 арескын кышномурт луыса, пиналъёс будытозь, гурт пӧрез огназ быдэсъяно луэм (аслаз но, дядяйлэн но анайёссы вазь кулэмын, атаез пинал кышно басьтэм, со вылысьтыз вылаз нылпи ваем). Кызьы меда чидаз со та секытэз?

Турнан дыръя тужгес но жалялляй сое: 4 часын ӵукна султэ, сыӵе изем потэ, 5 часын сайкатэ ни, учкиськод но, гур ӝуа ни, картошка пӧзе, сое туёно. Меми шаньги вылэ вӧлдоз, ми понна со лумбытлы сиён. Калыкъёс нуназе вакыт сур-сур кӧло, ческыт турын зынын шокаса. Нош мемие соку но пыдвыл керттэ, 7 нылпилы кызьы вуттод, огпалтӥз пасяло ни, керттыса вуттоно ӧвӧл. Сыӵе дыръя уката жалялляй мемиез, угось кӧкые поныса, пичи вынме турнан доры нонтыны нуллылӥ. Меми нонтӥськон вискын, юон кружказэ басьтыса, узы-боры бичаны тыршылӥ. Бадӟымгес будэме бере ӵем дыръя султылӥ турнан удысазы, быгатытэк ӵогылӥ ӝужыт турынэз. Шедьылӥзы лякыт сямоосыз, соос валэктылӥзы, кызьы кусоез нуллоно. Мугор, пе, мед куасалляськоз, дыртоно ӧвӧл, кусо ачиз кошкоз, ӵем дыръя кусоме шерылӥзы.

Гужем пудо сиён дасян семья понна самой бадӟым куректон вал: турнаны интыос ӧз сётылэ, ваньзэ тыризы кабанъёсы колхоз пудолы. Одӥг чумолё турынлы но меми пумтэм шумпотылӥз.

ӟег аран дыръя Оддок агай — комбайнёр — мемилы шуылӥз:

— Кума, Кечер нюлэс дорын арасько, нёжалаз ӟег туж удалтэм, выжытӥз басьтыны уг луы, мыныса турна.

Озьы ми ӵош мынӥм. Меми, турнамелы паймыса, шуиз:

— Э, нылы, пиосмурт кадь зол турнаськод, нош улыны шудэд ӧвӧл.

Соку асме жаляны ӧй вала, жадьытозям турнай…

 

Синпель

Гужем. Туж пӧсь вакыт. ӟег аран дыр. Меми аран удыссэ быдтэм. Бригадир гуртлы матэгес нош ик 1 гектар мертаса кельтэм. Я, туж умой, со ке но валам — нылпиосыз векчиесь, вылаз ик, пичизэ нонтыны нуллоно. Нуналаз 30-35 сотка арамезлы оскымтэос но вал, но ванез ӧвӧл уд кары, мемие кус жадёнэз но ӧз валалля кадь, арлы быдэ сельхозработниклэн нуналыз дыръя кузьымъёс сётъязы. Огпол туж шумпотыса бертӥз но шуэ:

— Парторгмы киям ӵушкон, со вылын нянь сукыри сётӥз но вераськыны косӥз. Районысь начальникъёс но возьмало ни верамме, одӥг кыл но куаретэме уг луы, нош Пургала мынон азьын ваньмыз йырам кадь вал. Бертыкумы Андрей Трофимович серекъяса шуиз: «Вот, Ольга Ивановна, колхозын тон кадь ужасез ӧвӧл, нош ужамдэ вераны возьдаськиськод…»

Мемейлэн синпель ӝӧккышетэз комодам. Со вожалэс тусо, етӥнлэсь… Умой ужамез понна сётэмын.

Тӥни сыӵе вал мынам мемие: югытэн колхозын трудоденен ужаз копейка понна, уйин мыным юрттон вылысь — заготзерноын. Ноку но пунэмзэ ӧй берыкты, ӟеч кылме но вераны ӧй дырты. Нэнэелэн улэмез-курадӟемез быдэс книгае но ӧй тэрысал. Соин асме али но со азьын сьӧлыкоен лыдъясько.

Удмурт Дунне
By Удмурт Дунне Август 30, 2011 12:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<