Алнашысь книга корка уг мӧзмы!

Удмурт Дунне
By Удмурт Дунне 23 августа, 2011 12:21

Алнашысь книга корка  уг мӧзмы!

 

Н. Николаева, Д. Идрисова но Т. Посадова.

Алнаш ёросысь нылпи библиотекаын ньыль ужасез. Нина Николаева, Татьяна Посадова, Дина Идрисова но Лариса Баженова котьку капчи мылкыдын пумитало покчи лыдӟисьёссэс. 2002-тӥ арысен соос выль юртын тыршо ини. Вань лыдӟиськон залзы, кык абонементсы: одӥгез нылпи садысь но 1-тӥ-4-тӥ классъёсысь нылпиослы, мукетыз — 5-тӥ-9-тӥ классъёсын дышетскисьёслы.

Улон возьматэ: арысь аре дышетскисьёс ӧжытгес но ӧжытгес книгаос киязы кутыло. Но та югдур Алнашысь нылпиослэн вӧзтӥзы ортче кадь. Интернетын пукыны ярато ке но, уг вунэто визьнодасьёссылы — книгаослы — но вазиськыны. Соин ик ӵем гинэ библиотекае пырало.

— Лыдӟисьёсмы кулэсмо шуыны ум быгатӥське. Пӧртэм программаосъя ужаса, проектъёсты улонэ пыӵатыса, бордамы пичиосты но, анай-атайёссэс но кыскыны тыршиськомы. Соин ик дорамы ветлӥсьёслэн лыдзы, азьвыл аръёсын ӵошатыса, йылэ, — вера библиотекалэн кивалтӥсез Нина Николаева.

Пиналъёслы книгаез гажан мылкыд пыӵато «Читалёнок» клубын. Отчы анай-атайёс нылпи садэ ветлӥсь тэшкылиосынызы ӵош вуыло. Вань на эшшо «Лыдӟиськом дэмен», «Шаертодонэз яратӥсьёслэн клубзы». Та клубъёсын сэрен библиотекае покчиос дэмен ветлыны ӧдъязы. Соослы татын туж кельше. Уго книгаосыз бугыръян но лыдӟон сяна, соос татын шудыны, суредаськыны, эшъёсынызы вераськыны быгато. Дина Юрьевна но Татьяна Леонидовна котькудӥныз капчиен огкыл шедьтозы.

Школаын дышетскон дырме тодам вайисько ке, соку ик син азям пуксё библиотекаын радъям пӧртэм конкурсъёс, ветеранъёсын но тодмо гожъяськисьёсын пумиськонъёс. Сыӵе ужрадъёс, пе, али но ӵем ортчыло. Котькуд аре библиотекаын «Нылпи книгалэн арняез», «Быдэс школаен лыдӟиськом» акциос радъяськыло, дуно кузьымен пусъё «Гужем тужгес усто лыдӟисез».

Библиотека нимысьтыз уж нуэ инвалидъёслэн огазеяськонэнызы но Алнашысь нылпи юртэн. Ёросысь егит семьяослэн клубазы но ӵем гинэ вуылэ, нылпиосыз будэтон сярысь занятиос нуылэ. «Гужем лыдӟиськон» программая школаосын ортчылӥсь лагерьёстӥ ветлэ. Пиналъёс понна тунсыко экскурсиос радъя: «Книгалэн коркаез», «Лыдӟиськон залэтӥ путешествие».

Нина Николаева туж оске, нылпиос азьланяз но лыдӟиськемысь уз дугдэ шуыса:

— Интернет — со Интернет. Нош отчы кытысь сомында ивор пыртэмын? Ваньмыз книга бордысен кутскемын. Соин ик нылпиос лыдӟиськизы, лыдӟисько но лыдӟиськозы. Одӥгез гинэ воштӥськыны быгатэ: тема. Азьвыл дышетскисьёс мылкыдзыя тупась книгаос борды кыстӥськылӥзы. Али куронъёссы воштӥсько. Шумпотӥськом, книга фондмес узырмытыны быгатӥськом. Со понна нимысьтыз субсидия висъяське.

Кылем арын сӥзьыл библиотекаын тыршисьёс ёросысь быгатӥсь нылпиосыз Г. Ходырев нимо премиен пусъён сярысь ӵектонэн вазиськизы. Малпанзэс туэысен улонэ пыӵатэмзы луоз ини.

Кылем арын ик Ижын ортчиз «Информационная поддержка семьи» конкурс. Алнашысь лыдӟиськонни 30 сюрс манетлы грант утӥз. Со сяна, 2010-тӥ арын шаерысьтымы библиотекаос пӧлын со тужгес устоез лыдъямын вал. Али Алнашын йӧн-йӧн сылэ кубок — сое арысь аре тужгес умой библиотекалы  сёто.

Елена Рябина,

Удмурт кун университетын дышетскись.

 

 

Удмурт Дунне
By Удмурт Дунне 23 августа, 2011 12:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<