Азьлань валтӥсь кизили

Удмурт Дунне
By Удмурт Дунне 31 августа, 2011 10:11

Азьлань валтӥсь кизили

 

Эгра ёросысь Меньйыл шор ёзо школаын нырысьсэ чузъяськиз гырлы.

Толон Президент Александр Волков, Кун Кенешлэн Тӧроез Александр Соловьёв но мукет вылӥ кивалтӥсьёс вуылӥзы Эгра ёросысь Меньйыл черкогуртэ. Соос пыриськизы выль школа усьтонэ. Сое ӝутон дас толэзь кыстӥськиз.

— Ноябрь толэзе школалы фундамент кисьтон борды басьтӥськимы. Ужъёслэсь мынэмзэс эскерыны вуылӥз ачиз Александр Волков. Президентмес адӟыса, Меньйылысь огез пересь кышномурт, пегӟемезлэсь курдаса кадь, бызьыса лыктӥз дораз. Син пӧртман, пе, та, школа луоз шуыса, пӧяськоды гинэ. 1996-тӥ арысен нылпиосмы кытын но отын визь люкало, асьсэ школазы кесямын. Лымы усемын ни вал. Оло, соин но арлыдо мурт ӧз оскы. Но Александр Александрович сое оскытӥз: 1-тӥ сентябре школаез усьтонэ лыктэ, ваньзэ асьтэ синъёсын адӟоды, — тодаз вайиз Эгра ёрослэн йырыз Валерий Прохоров. — Туннэ со кышномурт пӧламы меда?

Но школаез усьтонэ лыктэмъёс пӧлысь нокин ӧз вазьы, ӟечкыланы лыктэм Президент азьын возьдаськиз, луоз. Нош азбарын калыкен пыдэз лёгон инты ик ӧй вал. Пичиезлэн но, бадӟымезлэн но адӟемез потэм, шӧдске, 72 дышетскисьлы чаклам школаез.

Зэм, школае мынӥсьёс татын тросгес — 95 пинал. Матысь аръёсы 110 кузя люкаськыны медо. Таин сэрен нылпиосты кык сменаен визьнодалозы.

— Ми таизлы но дась, — огымысь кадь верало нылпиос. — Ӝытозь спортзаламы бызьылӥмы ке, сӥялскыны быгатомы. Милям табере гылтӥськон сэрегъёсмы но вань. Адямиослэн доразы ву уг лыкты на, нош татын мисьтӥськыны луэ. Паймымон ук та!

Таӵе выжыкыллы тужгес зол шумпотэ черкогуртлэсь кык-куинь иськемлы палэнэ пуксем гуртысь Костя Никитин. Гуртысьтыз со эшеныз ӵошен гинэ черкогуртэ дышетскыны ветлэ.

— Милям гуртамы ог 25 адями сяна уг улы ни, — шуэ 8-тӥ классэ мынӥсь пияш. — Ваньмыз отын куашкамын. Сюрес ӧвӧл. Ма, черкогуртэз но рос-прос адӟыны уг луы — милемды сик висъя. Куше куштэм муртъёс кадь улӥськомы. Сюресъёсмы ӧвӧл. Куддыр кузь сапегъёс но дэрие кылё. Вумы гинэ но толалтэ бырылэ. Колодчаысь ву ӝутъяськом. Эшъёсы ӧвӧл. Мӧзмонлэсь компьютер но телевизор гинэ уте на. Валамон ни, мон чидатэк вити сентябрь толэзез. Школа мон понна азьлане валтӥсь кизили кадь луиз. Пеймыт сэрегысь югытэ поттэ. Оскон но кылдӥз: чебер юртын «витьёслы» гинэ дышетско, зэмос воргорон луо. Мыным табере школае сик пыртӥ оген но вамыштыны кышкыт ӧвӧл. Пеймыт куазен но югдытӥсе вань уго.

Елена Фёдорова.

Туспуктӥз Олег Ларин.

Удмурт Дунне
By Удмурт Дунне 31 августа, 2011 10:11