Тӧдьы ладья ладъя

Удмурт Дунне
By Удмурт Дунне 19 июля, 2011 10:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Тӧдьы ладья  ладъя

20-тӥ июль — шахматлэн калыккуспо нуналыз
Берло кык ар ӵоже Удмуртиысь шахматэн шудӥсьёс Россиын кужмоосыз луо. «Тӧдьы ладья» ӵошатсконын кыкетӥ арзэ бадӟым кубокез ас киязы возё, нош Зоя Северюхина дуннеысь ӵошатсконъёсын но вормонъёс басьтылӥз ини.

Та нуналъёсы Иже люкаськизы Россиысь но СНГ кунъёсысь кужмо шахматистъёс. Асьме дорын ортчытӥське шахматэн шудонъя Россиысь кубок понна нюръяськонлэн оглюкетэз. Ӵошатскон 9 люкетлэсь радъямын. Вожвылъяськонын трос очко люкамъёс — 14 мурт — ноябре пыриськозы супер-ӵошатсконэ. Ӵапак соос ик куспазы люкозы 100 сюрс долларез.
Асьме шаере лыктэмын 8 странаысь но 18 улосысь сю пала спортсмен. Пӧлысьтызы 22-ез — калыккуспо гроссмейстеръёс, 20-лэсь ятырез — ФИДЕ-я мастеръёс. Таосын артэ ӵошатскозы Ижысь шахматистъёс.
— Бадӟым ужрад асьме шаерын куинетӥзэ ортчытӥське, — шуиз Удмурт Республикаысь Шахматъя федерацилэн кивалтӥсез Сергей Ощепков. — Та ӵошатсконэ пыриськисьёслэн лыдзы арысь аре йылэ, вормисе потэмъёсты 100, 80 но 70 сюрс манет вите. Нимысьтыз кузьымъёсын пусъемын луозы Ижысь спортсменъёс. Ужрадэ пырисько 8-ысен 90 аресозь шахматистъёс. Бадӟым саклык висъяськоз нылпиослы, 8-10 аресъемъёс пӧлын нимысьтыз ӵошатскон ортчытӥськоз.
Та вакытэ Удмуртиысь нылпи спорт школаосын 1 сюрс 180 пинал шахматэн шудэ. Ижын сяна, та удыс умой азинске Яр, Красногорск, Вотка, Шаркан ёросъёсын. Куд-ог дыръя Ижысь ДЮСШ-осын дышетскыны мылкыд каро Дэри но Якшур-Бӧдья ёросъёсысь пиналъёс.
Кулыккуспо ӵошатскон дыръя нырысьсэ ортчытэмын луоз Россиысь судьяослэн семинарзы. Солэн ужаз пыриськозы Удмуртиысь нылпи спорт школаосысь тренеръёс. Угось спортысь та амал ялан азинске, шудон правилоос выльдӥсько, туала куронъёслы тупась электрон часъёс сярысь но ваньмыз уг тодо на.
— Россиысь мукет улосъёсын ӵошатыса, Удмуртия трослы азьпала вамыштэ, — шуиз та семинарез радъясь, Россиысь Шахматъя федерацилэн ёзчиез  Михаил Крюков. — Ижысь шахматистъёслэн школазы туала куронъёслы тупа: эркын ӝӧкъёс, электрон часъёс, омырез салкыматӥсь арбериос — ваньмыз выльдэмын. Но бадӟым шахматэ вамыштэмлэсь азьло котькуд спортсмен правилоосын тодматскыны кулэ.
— Россиысь кубок понна нюръяськонлэн Ижысь люкетэз тужгес егитэз луэ, — вераськонамы пыриське Пензаысь Дмитрий Кокарев. — Кылем арын но Иже вуылӥ, соку ӧзгес удалты — 7-тӥ-8-тӥ интые гинэ кыли. Бадӟым ӵошатсконлы туэ ӟечгес дасяськыны тырши.
Туннэ нуналлы котькинлэсь трос очко люказ та вакытэ Дмитрий Кокарев. Берлоосыз ӵошатсконъёс Томск но Воронеж городъёсын ортчизы, отын со вормиз. Дмитрий шахматъя клубмылы туж синмаськем. Шӧдӥське, пе, кивалтӥсьёс спортлы бадӟым саклык висъяло шуыса.
Та ӵошатсконэ вань мылкыд карисьёс пырисько. Мастеръёс ас кожазы вожвылъяськозы «А» турнирын, нош Удмуртиын улӥсьёс — «В» турнирын. Таяз учыре спортсменлэсь арлыдзэ уг учко, 8-10 аресъемъёс гинэ ас кожазы нюръяськозы. Нош ӵуказе нимо-дано гроссмейстеръёс блиц-турнир ортчытозы.
Ӵошатсконын вормисьёслэсь нимзэс шараялозы 24-тӥ июле. Пусйыны кулэ: арысь аре та ӵошатсконэ пырисько арлыдо шахматистъёс. Туэ но кечато ӝӧк сьӧрын йырзэс тӥяло 90 аресъемъёс — Зинаида Иютова но Иоганнес Вельтмандер.
Валентина Емельянова.
Туспуктӥз Владимир
Беломорских.

Удмурт Дунне
By Удмурт Дунне 19 июля, 2011 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<