Яратон бордысь мылкыд!

Удмурт Дунне
By Удмурт Дунне 4 мая, 2011 06:51

Ортчем арня вискын Пичи кенешын А. Оки нимо премиосын пусъемын вал синмаськымон удмурт нылкышноос: «Удмурт дунне» газетын ужась, кылбурчи Любовь Тихонова, Можга педколледжысь дышетӥсь Татьяна Иванова но Марий Эл республикаысь Карлыган гуртысь удмурт ансамблен кивалтӥсь Мария Главатских.

Удмуртлыкез азинтонэ мыло-кыдо пыриськись, пӧртэм удысъёсын азинлыко ужась нылкышноос А. Оки нимо премиен пусйисько 1994-тӥ арысен. Но туэ нырысьсэ та премия огдыре ик сётӥськиз куинь адямилы. Нылкышноосмес ӟечкылазы «Удмурт кенеш» огазеяськонлэн кивалтӥсез Николай Мусалимов, нациосын ужан политикая министр Владимир Завалин но Удмурт нылкышно кенешлэн кивалтӥсез Надежда Степанова.

Пусъемъёс сярысь трос ӟеч кылъёс вераны луоно. Любовь Тихонова — Россиысь Писательёслэн огазеяськонзылэн ёзчиез, солэн чуръёсызъя 50-лэсь трос кырӟан гожтэмын. Нош «Удмурт нылкышно» кылбурезъя кырӟан пӧрмиз асьме кышномуртъёслы сӥзем зэмос гимнлы.

Любовь Ивановна мыло-кыдо пыриське удмурт огазеяськонъёслэн ужазы.

Татьяна Иванова кема аръёс ӵоже ужа ни Можгаысь педколледжын, удмурт кылъя но методикая урокъёсты нуэ, будэтэ вуоно дышетӥсьёсты, гожъя учебникъёс. Педколледжын со радъя литературая но творчествоя кружок. Со сяна, Можгаысь нылкышноосты огазея «Такъян» клубе.

Куинетӥ лауреатэз — Мария Главатскихез — Удмуртиын тросэз уг тодо. Но удмурт движение пыриськисьёс та кышномурт азьын йыбырттыны дась. Мария Аркадьевна вань сюлэмзэ но мылкыдзэ сётэ Марий Элысь удмуртъёсты огазеянлы, кивалтэ «ӟардон» ансамблен. Главатских доры удмурт сямен кырӟаны-эктыны поръёс но ветло.

А. Оки премиен пусъемъёс сярысь трос шуныт кылъёс чузъяськизы. Нош асьсэос соос, пушсы тырыса ик, тау каризы удмурт калыксылы. Вань лэсьтэм ужзы, мылкыдзы — калыксэс яратон бордысь ук!

Елена Панфилова.

Туспуктӥз Валерий Кудинов.

 

 

 

 

 

Удмурт Дунне
By Удмурт Дунне 4 мая, 2011 06:51