Тӧдьы вожъяськон

Удмурт Дунне
By Удмурт Дунне 4 мая, 2011 07:01

«Ӟардонъёсты» таукаронъёсын пусйизы В. Завалин но Н. Мусалимов.

ӵыжы-выжыосмес ӟечкыланы Удмуртиысь бадӟым делегация потӥз: нациосын ужан политикая министр Владимир Завалин, «Удмурт кенеш» огазеяськонлэн кивалтӥсез Николай Мусалимов, солэн воштӥсез Татьяна Ишматова, «Удмуртия» издательстволэн директорез Юрий Кузнецов, кырӟась Надежда Уткина, «Чебеляй» ансамбль но трос мукетъёс. Нимаз автобусэн вуизы на Грак ёросысь куноос.

Эшъяськон юртын Удмуртиысь делегациез гинэ витё на вылэм. Вӧйын-нянен, пӧсятэмен но удмурт кырӟанъёсын пумитаса, ваньзэс бадӟым залэ ӧтизы. Нош отын — тыраз калык: бигер шаерын улӥсь удмуртъёс, пӧртэм ёросъёсысь лыктэм куноос. Оп шуытозь кутскиз сӥё-дано ужрад. Люкаськемъёсты нырысь ик шулдыртӥзы асьсэос «ӟардонэ» ветлӥсьёс.

— Та коллективмес кылдытӥмы, вордӥськем интыосмес (Алнаш, Кизнер, Можга но мукет ёросъёсмес) тодэ вайыса, — пусъе «ӟардонлэн» кивалтӥсез Валентина Билык, — дорамы кырӟаны-эктыны ветлэ 28 адями. Азьвыл мӧйыосгес вал, али бордамы егитъёс но итӥськизы.

«Ӟардонъёслэсь» кырӟамзэс кылыса, мылкыд пачылмыны ӧдъя. Паймоно: зэмос артистэ дышетскымтэ адямиослэн кытысь сыӵе чебер куараоссы, крезьгурез шӧдонзы? Оло, дор палъёссылэсь мӧзмыса-а, мылкыдзэс сокем сюлмысь кисьто? Пусйымон: та ансамбле удмуртъёс семьяосын-семьяосын пыро. Анай-атайёс сьӧразы куто пиналзэс, песянайёс — нунокъёссэс. Нош сцена вылын ваньмыз со одӥг тугокое чебер биниське.

«Ӟардонэз» ӟечкыласа, «Удмурт кенеш» огазеяськонлэн кивалтӥсез Николай Мусалимов пусъе:

— 180 сюрс пала удмуртъёс уло Удмуртилэн палэназ. Огез тужгес кужмоез диаспора — Татарстанын. Татысь кивалтӥсьёс трос лэсьто, удмурт коллективъёсмы мед азинскозы но пӧртэм калыкъёс куспын тупаса улон мед луоз шуыса.

— Бигер кун шоры куддыръя тӧдьы вожъяськонэн учкисько, — уг ваты мылкыдзэ нациосын ужан политикая министр Владимир Завалин. — Анай кылэз утён, азинтон ужпумъёсты татын котьку лыдэ басьто. Меӵак вераны луоз, Татарстан ке ӧй луысал, Россиын, оло, национальной ужпумъёслы сокем саклык ӧй висъяськысал. Шумпотӥсько, бигер шаерысь потэм тросэз удмуртъёс Удмуртиын асьсэ интызэс шедьтӥзы, гажано адямиос луизы. Кемалась ӧвӧл шаерамы вуылӥз Татарстанысь Кун Кенешлэн Тӧроез, учкиз Эшъяськон юртмес, тодматскиз уженымы. Озьыен, эшъяськон кусыпъёсмы юнмало.

Сцена вылысен, «ӟардонэз» данъяса, трос чебер кылъёс чузъяськизы. «ӟардонъёсты» кырӟаса-вераса ӟечкылаз эшшо одӥг «ӟардон» — Татарстанысь Бавлы ёросысь ансамбль, Менделеевскысь «Купанча», Удмуртиысь Грак ёросысь Вуж Эгра гуртысь но мукет интыосысь коллективъёс, Набережные Челны город администрациысь кивалтӥсьёс, пӧртэм выжы огазеяськонъёслэн азьветлӥсьёссы. Нациосын ужан политикая министерстволэн, «Удмурт кенеш» огазеяськонлэн но Татарстанысь министерствоослэн, огазеяськонъёслэн нимынызы артистъёс таукаронъёсын но грамотаосын пусъемын вал.

Нимысьтыз тау карон кылъёс — «ӟардон» коллективлэн кивалтӥсезлы Валентина Билыклы.

— Со ке ӧй луысал, «ӟардон» ансамбль но ӧй луысал, — пусъе Николай Мусалимов.

Нош Татарстанысь калык артист, крашинъёслэн огазеяськонэнызы кивалтӥсь Виталий Агапов шарая:

— Укыр шаплы, быгатӥсь бигеръёс сярысь ми шуиськом: тон бигер ӧвол, дыр, тон — мешар. Нош мешарыос асьсэды бигер калыклэн йӧлвылыныз лыдъяло. Озьы чаклано ке, Валентина Билык — удмурт мешар. Угось мае ке тунсыкозэ адӟиз ке — одно ик уже кутоз, маке малпаз ке — лэсьтытозяз уз буйга. Сыӵе удмуртъёслы туж паймоно, соослэсь адӟем кароно!

— Бигер шаерын удмуртъёс лыдзыя ньылетӥ интыын, — пусъе Татарстанысь удмуртъёслэн огазеяськонэнызы кема аръёс ӵоже кивалтэм Кузьма Андреев. — Соос пӧртэм ужрадъёсы мыло-кыдо пырисько. Ортчем толэзь ӵоже гинэ «Татарстан. Новый век» телекомпаниын удмуртъёсты куинь пол возьматӥзы, культуразэс утьыны трос луонлыкъёс кылдытэмын. Нош «ӟардон» самодеятельной коллективлы ньыль ар талэсь азьло калык ним сётэмын.

*  *  *

Набережные Челны городысь удмурт огазеяськонлы но «ӟардон» коллективлы 15 ар  тырмонэн валче Эшъяськон юртазы усьтӥськиз тодмо удмурт суредасьлэн, кибашлылэн Зоя Лебедевалэн ужъёсыныз адӟытон, радъяськиз «Удмуртия» издательстволэн книгаосыныз но «Мугур» мастерскойлэн ужъёсыныз вуз карон. Сцена вылысен адӟыны луиз Полина Кубисталэсь дӥсьёсын коллекцизэ. Но калыкез тужгес шумпоттӥзы удмурт кырӟасьёсмы Елена но Валерий Келаревъёс, Надежда Уткина, калык эктонъя «Чебеляй» студия.

— Ми тӥледыз туж яратӥськом но тӥлесьтыд мӧзмиськом, — келяськыкуз пусйиз на Валентина Билык. Нош ик чузъяськизы жильыртӥсь удмурт гуръёс…

Елена Миннигараева.

Туспуктӥз автор.

 

 

Удмурт Дунне
By Удмурт Дунне 4 мая, 2011 07:01