Берлань кыскисьёс

Удмурт Дунне
By Удмурт Дунне 21 мая, 2011 03:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Уг удалты берло дыре Вотка ёрослы. Азьлань азинсконлы оскыса юромо кылдытэм туж бадӟым хозяйство — «Агрокомплекс» акционер огазеяськон — берлань кыске быдэс ёросэз. Кивалтӥсьёс умой малпанэн огазеязы вал, дыр, азьвыл «Воткинский» совхоз борды эшшо кык ляб хозяйствоосты. Огазе карыса но бадӟым коньдон висъяса, дас гуртын улӥсьёслэсь улон-вылонзэс умоятыны чакламын вал. Та малпанэз 2006-тӥ арын умоен лыдъязы асьме Правительство, Гурт удысъя но сиён-юонъя министерство. Хозяйствоез ӝутонлы жалятэк коньдон жильдӥзы.

Ӟеч малпан ӧз пӧрмы. Котькуд скаллэсь али кыско 3 но ӝыны килограмм гинэ йӧл. Хозяйстволэн пунэмъёсыз 170 миллион манет. Вань пудоез, гидъёсты вузаса но, собыдӟа коньдон уд потты. Нош ваньбурез вузаны кутскизы ни. Вогул гуртысь гидъёс мукет кузё кие кошкизы. Азьвыл та гуртын 42 ужась вал, али 16-ез гинэ тыршемъяське. Кысконо скалъёссы чик ӧвӧл ни. Таӵегес ик югдур Первомайский посёлокын но.
2007-тӥ арын та гуртысь фермае палэнысь басьтӥзы 170 йыр ӟеч выжыысь скал. Араз соос сётыны кулэ 6-7 сюрс килограмм йӧл, нош пудо утисьёс кыско 3 сюрслэсь ятыр гинэ.
«Агрокомплексын» 80-лэсь ятыр ужтэк кылемъёс, уждунзы 2-3 сюрс манет. Соиз но тырымтэ ай кылем арын август толэзь понна, туэ март, апрель толэзьёс понна. Куд-ог гуртъёсын нокыӵе уж ӧвӧл ни. Кивалтӥсьёс хозяйствозэс палэсэн-палэсэн вузаны туртто, но Удмуртилэн Президентэз сыӵе вамышлы пумит, утчано, пе, мукет сюрес. Кыӵе со луоз, али тодмо ӧвӧл ай.
Асьме шаерын трос ни куашкам хозяйствоос, отын пудозы но ӧвӧл, бусызы но уг кизиськы. Пилиськем тусь азе кылемын Дэри ёросысь «Родина», Сарапул ёросысь «Удмуртская», Глаз ёросысь «Качкашур» хозяйствоос. Пудо утисьёс синву пыр учко буш сылӥсь, лымы но зор улын куашкась гидъёс шоры. Озьы медаз луы вылэм Вотка ёросын но.

Потэмын № 71-72 (24612-24613) от 21.05.10.

Удмурт Дунне
By Удмурт Дунне 21 мая, 2011 03:12