Азьветлӥсьёс мед луозы трос

Удмурт Дунне
By Удмурт Дунне 4 мая, 2011 07:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Н. Лопатина но Р. Гафуров - «Шунды» огазеяськонлэн мыло-кыдо ёзчиосыз.

Ӵуказе нунал — егитъёс киын. Та верамез ӵемысь кылоно. Нош асьсэлэн туала егитъёслэн со ласянь кыӵе малпанъёссы? Егитъёсын ужанъя министерстволэн удмурт огазеяськонъёсын кусыпъёсызлы сӥзем вераськон ортчиз кылем арня выскын Пичи кенешын.

 

Ивор ӧжыт!

Пичи кенеше пыриськизы «Удмурт кенеш» огазеяськонлэн кивалтӥсез Николай Мусалимов, солэн воштӥсьёсыз, ёросъёсысь но городъёсысь «кенешчиос», нациосын ужан политикая министр Владимир Завалин, егитъёсын ужанъя министр Владимир Соловьёв но мукет удмурт кивалтӥсьёс.

Владимир Соловьёв пусйиз: солэн удысэзъя али республикаын быдэс система кылдытэмын. Котькуд ёрос администрациосын вань егитъёсъя отдел, ужало пӧртэм кружокъёс. Министерствоысь специалистъёс берло куинь ар ӵоже ёросъёсы ӵем потаны кутскизы. Сьӧразы куто егитъёслы кулэ луись специалистъёсты, шуом, психологез, наркологез. Но Владимир Соловьёвлэн малпамезъя, министерство котькытчы ачиз уз вутскы, озьы бере, со ёросъёсысь специалистъёсты дышетыны кулэ. Соос нылпиосын пумиськонъёсы мед поталозы.
[nggallery id=2]
— Кылем арын Егитъёсын ужанъя министерстволэн реестраз 23 общественной огазеяськон вал. Туэ 30 ини. Озьыен, сомында огазеяськонъёсын кусып возиськом, юрттӥськом, огъя ужрадъёс ортчытъяськом, — шуиз министр, — 30 огазеяськон — со бадӟым кужым. Но трос-а тодӥськом ужзы сярысь? Шуом, Москваысь Манеж площаде 700 адями потӥз, жугиськиз. Со сярысь ивор котькытын шуккиськиз. Шаерысьтымы егитъёслэн огазеяськонъёсазы пыриське 78 сюрс мурт. Нош соослэн ӟеч, тунсыко ужъёссы сярысь уноез уг тодо. Татын ми но, министерствоын ужасьёс, пичияк янгыш, дыр. Ужъёсмы сярысь тросгес но ӵемгес ивортылоно. Жаль, совето вакытъёсын ӵошатыса, общественной огазеяськонлэн данэз туннэ пичигес. Школаын нырысетӥ интыын — тодон-валан сётон, воспитаниен вырись туж ик ӧвӧл. Ветеранъёс туала егитъёсты пыкыло: уродэсь луизы, валантэмесь. Пумит вераме потэ: егитъёс сыӵеесь ик! Политикая, экономикая югдур гинэ воштӥськиз.

Озьы ке но югдур вылэ чӧлскыса улонэз ӧвӧл. Арлы быдэ лэчыт вераськон ӝутске нылпиослэсь шутэтсконзэс радъян пумысен. Министр ӧпкелиз: лагерьёсын шутэтсконлы коньдон висъяське 18 аресозь нылпиослы гинэ. Нош солэсь бадӟымесь ни ке? Уноез егитъёс палэнэ кылё. Соослы кыӵе ке дэмланъёс дасяны умой луысал.

 

Ӟечбур, «Шундыкар»! Ӟеч лу, «Шудо семья»?

Удмурт егитъёс пӧлын тужгес дано — «Шундыкар» лагерь. Отчы конкурс котьку бадӟым. 20 ар ӵоже та лагерь пыр потӥзы ни 1 сюрслэсь трос нылъёс но пиос. Пичи кенешын та ласянь мылкыдзэ вераз «Шунды» огазеяськонлэн кивалтӥсез Юлия Никитина:

— «Шундыкар» — егит кадръёсты будэтонъя аспӧртэм школа. Та лагерь пыр потэм 85 процентэз нылъёс но пиос пӧртэм удысъёсын вормонъёс басьтӥзы ни. Кин ке кырӟась луиз, кин ке — тодмо журналист, политик, учёной… «Шундыкаре» ветлэмъёс та лагере берытскыны тыршо вожатойёс луыса. Со понна озьы ик бадӟым конкурс пыр пото. Нош бӧрысь, будэмзыя, тужгес кужмоосыз, азинлыкоосыз та лагерьын специалистъёс луыса тыршо. Озьы удмурт кадръёсты будэтон ӝот-ӝот радъямын. Но арлы быдэ сюлмаськон кылдэ «Шундыкарлы» коньдон висъян ласянь.

— Милям министерствомы пыр «Шундыкарлы» кылем арын 394 сюрс манет сётэмын вал, — пусйиз Владимир Соловьёв, — туэ — 363 сюрс. Но со вӧзы Дышетонъя но наукая министерство эшшо 96 сюрс ватсалоз на. ӵошатон понна: Егитъёсын ужанъя министерство пыр ӟуч егитъёслы туэ шутэтскыны 124 сюрс манет висъяське, бигеръёслы — 50 сюрс, поръёслы — 10 сюрс.

Юлия Никитина пусъе: туэ висъям коньдонэн «Шундыкарын» тужгес троссэ шутэтскыны быгатоз 120 пинал. Нош ма кароно конкурс пыр потымтэослы? Туж-туж мылкыдзы вань ке, соосты басьтыны быгатозы, но анай-атайлы коньдон асьсэ кисыысь тыроно луоз.

Нош «Шудо семья» лагерь сменалы туэ уксё воксё уг висъяськы. Та пумысен пыкылӥзы егитъёсын ужанъя министрез. Владимир Соловьёвлы киыныз гинэ вӧлъяны кылиз: вуоно арын уксё шедиз ке, смена одно ик улӟытэмын луоз. Со вие ик министр тодэ вайытӥз: кӧня ке аръёс ӵоже ни, удмурт азьветлӥсь егитъёслы сӥзьыса, «Вамыш» тол лагерь ортче. Татын нылъёс но пиос политика, наука, творчество ласянь тодон-валанзэс будэто.

Залысен кин ке пыкылӥз:

— Заводъёсысь, хозяйствоосысь ужась егитъёс палэнэ кылё!

— Отысь егитъёс вунэтэмын ӧвӧл, — вазиз Владимир Михайлович. — Тужгес но Ужась адямилэн араз. Но ми со ужрадъёс сярысь ӧжыт вераськомы, дыр. Пусъё созэ гинэ: туэ сӥзьыл ортчытӥськом ужась егитъёслэсь форумзэс.

 

Пичи уж — ичи пайда?

Глазов ёрос администрациысь егитъёсын ужанъя отделысь специалист Евгений Баженов мылкыдзэ кисьтӥз:

— Удмурт егитъёслы сӥзем тросэз ужрадъёс Ижын ортчо, ёросъёс палэнэ кылё!

Зэм, Глазов ласянь пырак озьы шуыны уг луы. Отысь пединститутысь егитъёс туж мыло-кыдоесь, пӧртэм тунсыко ужъёсы пырисько, удмурт ужрадъёс ортчытъяло. Но Евгений Баженов шараяз на эшшо одӥг шекез. Удмурт движениын, пе, али бадӟым саклык висъяське егит азьветлӥсьёсты будэтонлы. Со туж умой. Но лидеръёс ноку но трос уг луо, мукет нылъёс-пиос палэнэ кылё.

— Ижын ортчись бадӟым ужрадэ ёросысь одӥг-кык егит лидер лыктӥз, кылзӥз. Дораз бертыса, со тодэмъёссэ мукетъёсызлы пыӵатыны кулэ. Но пыӵатоз-а? Ай эшшо со лидер шуон зэмос азьветлӥсь ӧвӧл ке… — малпаськыны куриз Евгений Баженов. — Озьыен, ужрадъёсы тросгес егитъёсты люкано, бадӟым мероприятиосты ёросъёсын но ортчытъяно. Макем паськытгес вӧлскоз удмурт егитъёслэн обществозы, сокем тросэзлэн отчы пырон мылкыдзы кылдоз.

Евгений Баженовлэсь малпанъёссэ азьланьтӥз Башкортостанысь удмуртъёслэн калык культурая центрзылэн кивалтӥсезлэн воштӥсез Татьяна Шайбакова:

— Удмурт егитъёс пӧлысь зэмос азьветлӥсьёсты будэтон — со бадӟым сюлмаськон. Ижын туэ радъяськиз «Школа молодого финно-угорского лидера» усто проект. Отчы нырысьсэ пыриськизы Башкортостанысь удмурт егитъёс. Туж яраз. Умой вылэм та выллем школаос ортчытъяны Башкортостанысь удмурт егитъёслэн «Усточикар» лагерязы. Макем трос нылъёс но пиос пыриськозы сыӵе дышетсконъёсы, сокем уногес эшъёссы сьӧразы кыстӥськозы.

Татьяна Николаевналэн верамезъя, Башкортостанын егитъёслэн 60 огазеяськонзы.  Ужа нимысьтыз программазы. Валтӥсь ужпум: егитъёсты туала улонлы дасян.

— Егитъёслэн улоназы бадӟым инты басьтэ «Усточикар» лагерь. Со пыр потэмъёс уноез дышетскыны мыно УдГУ-э, пӧртэм удысъёсын синмаськымон луо, — шуиз  Татьяна Николаевна но бадӟым тау кариз Удмурт Элькунлы, «Удмурт кенеш» огазеяськонлы, Ижысь медициная академилы но мукет огазеяськонъёслы башкир музъем вылысь удмуртъёсын юн кусып воземзы понна.

 

Пыкылыса гинэ толыкез уз лу!

Удмурт егитъёслэн движенизылы пыр-поч анализ лэсьтӥз «Удмурт кенеш» огазеяськонлэн вице-президентэз Татьяна Ишматова:

— Асьмелэн вань трос аръёс ӵоже улонэ пыӵась тунсыко проектъёсмы. «Шундыкар» — соос пӧлысь тужгес синмаськымонэз. Кин ке серекъяны выре ни: весь со «Шундыкар» сярысь вераськиськоды. Но республикаямы удмурт кадръёсты будэтонъя программа ӧвӧл ук. Со ужез коть «Шундыкар» лэсьтэ. Валамон, кулэ выль ӧръёс, выль проектъёс. Но соосты улонэ пыӵатыны нош ик кулэ уксё.

Нялтас вераса, сомында егитъёсты дышетӥмы ни проектъёс гожъяны. Но со ужъёссэс улонэ пыӵатон понна озьы ик уксё шедьтоно. Кыӵе фондъёсысь? Уноез уг тодо. Ма, тодэм но кытӥяз уг юртты ай.

Берло аръёсы пыӵась тунсыко ужъёс пӧлысь Татьяна Ишматова пусйиз «Вуюись», «Усточикар» проектъёсты, «ӝужась кизилиос» конкурсэз, Наталья Образцовалэсь дышетонъя «Туннэ» проектсэ, Настя но Миклош Дэметэръёслэсь «Шудон корка» проектсэс, визь люкъёслэсь Дэри ёросысь «Шундыберган» ӵошатсконзэс, Эгра ёросысь «Ой, шудо егит дыр» лагерь сменазэс, «Неофолк» студиез, «Удмурт дунне» газетлэсь «Дарт» приложенизэ но мукет.

Татьяна Витальевна шумпотэмзэ вераз: «Шунды» огазеяськонлэн «Школа молодого финно-угорского лидера» проект Россиын грант басьтӥз, озьы та бадӟым ужрадэз туэ ортчытыны луиз. «Шундылэн» ёзчиосыз пыро ёросъёсысь егитъёслэн парламентазы, шаерысьтымы пӧртэм выжыысь егитъёслэн «Вместе» ассоциациязы. Удмурт егитъёс асьсэос но кылдыто пӧртэм группаос, радъяло анай кылъя акциос, пырисько пӧртэм фестивальёсы, кунсьӧр проектъёсы, конференциосы. Но ваньмыз со — тырмыт ӧвӧл на.

— Ми валаськом, Егитъёсын ужанъя министерстволэн трос сюлмаськонъёсыз, — пусйиз Татьяна Ишматова. — Но Удмурт Элькунын удмурт егитъёс юрттэмез уг ке шӧдо, кошко мукет кунъёсы. Собере соосты пыкылӥськом: тӥ патриотъёс ӧвӧл…

 

Егитъёс — выль историез лэсьтӥсьёс!

Нош кыӵе малпанъёсын уло асьсэос егитъёс? Та юанлы валэктон утчаз К. Герд нимо гимназиын дышетскись Ренат Гафуров. Нялтас вераса, со Ижын вордӥськемын, анаез — ӟучомем удмурт, атаез — бигер, но пияш ассэ быдэс удмуртэн шӧдэ, удмурт сямен сокем чебер вераське — вань люкаськемъёс паймо.

— Егитъёсты мон куинь группалы люкысал, — ӝот-ӝот шуэ Ренат. — Школаын дышетскисьёс, студентъёс но ужасьёс. Нырысетӥ группае пырисьёслы туж кулэ вылэм йӧскадь дышетскон интыос. Шуом, мон К. Герд гимназиын тодон-валан люкасько. Но таӵе инты шаерамы одӥг гинэ. Вань удмурт нылъёс-пиос, бадӟым мылкыдзы луиз ке но, отчы лыктыны уз быгатэ. Кыкетӥ группа — студентъёс — котькуд огазеяськонлэн шорсюлмыз луыны быгато, йыразы пӧртэм малпанъёс бергало. Но ӵектонъёссэс уж вылын быдэстыны шугъясько. Соин удмурт студентъёс понна мед ортчылысалзы пӧртэм тренингъёс, проект гожъяны дышетонъёс.

Нош ужась егитъёслы пыд йылазы султыны юрттоно, — азинтӥз Ренат, — коньдонэн юрттэт сяна, татын туж пайдаё луысал «Шудо семья» выллем смена. Угось ӵапак со сменаын егит адямилэн йыраз зэмос удмурт семьялэн образэз кылдэ.

Вераськонзэ йылпумъяса, Ренат Гафуров кенешлэсь, оло, тужгес но валтӥсь малпанзэ вераз:

— Егитъёс — выль историез лэсьтӥсьёс, кунэз но калыкез азинтон потоз соос бордысь.

*  *  *

Вань вераськонъёс бере Пичи кенешын огкылэ вуизы: Егитъёсын ужанъя министерстволы дэмлано удмурт огазеяськонъёслы бадӟымгес саклык висъяны.  «Шундыкар» но «Шудо семья» лагерьёслы коньдон висъянэз чаклан понна ведомствоос вискын ужась комиссия кылдытоно. Егитъёсын ужанъя министерстволэн бурд улаз ортчись пӧртэм калыккуспо ужрадъёсы удмурт огазеяськонъёсты но кысконо. Нош ассэ министерствоез мыло-кыдогес  ӧтчано удмурт ужъёсы.

Елена Миннигараева
Туспуктӥз Валерий Кудинов

Удмурт Дунне
By Удмурт Дунне 4 мая, 2011 07:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<