Артист укша спортсменлы

Удмурт Дунне
By Удмурт Дунне 27 апреля, 2011 03:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиысь тодмо балетмейстер, хореограф Евгений Панфилов пуктӥз 80-лэсь трос балет. Со кылдытӥз «Балет Евгения Панфилова» нимо театр. Жаляса верано, ачиз улэп ӧвӧл ни. Озьы ке но театрысьтыз усточиос калыкез паймытъямысь уг дугдо. П. Чайковскийлэн фестиваляз соос вайизы У. Шекспирлэн «Ромео и Джульетта» трагедиезъя пуктэм балетэз. Артистъёс Алексей Расторгуев (Тибальд), Алексей Колбин (Меркуцио) но Мария Тихонова (Королева Маб) ужамын на асэныз Евгений Панфиловен. Соос сцена вылэ потонзы азьын журналистъёслэн юанъёссылы валэктон сётыны соглаш кариськизы.

— Кыӵе меда ужаськоды Панфиловтэк? Азьвыл сям-йылолъёстэс утиськоды на-а?
— Туннэ милям ӧвӧл чеберлыкъя кивалтӥсьмы, — валэктэ  Алексей Колбин. — Театрлэн пуштросэз (структураез), солэн экономикаез — ваньмыз возиське директормы Наталья Ленских вылын. Кулэ дыръяз дорамы ӧтчаськомы ик балетмейстеръёсты. Али милемын ужа Наталья Масленникова. Но туннэ асьмеос выриськомы  быгатэммес, адӟонмес улонэ пыӵатыны. Ми палэнын ум возиськиське туала вакытлэсь но. Ужамы кутӥськомы авангард амалэз. Кылсярысь, Пермьын ортчиз Дягилев нимо фестиваль. Спектакль мыныку, артистъёс шыр гольык кылиськыны кутскизы. Куд-огезлы та ӧз кельшы. Соос чалмыт ӝутӥськизы но кошкизы — ӧз кесяське шорамы. Валаны кулэ: шундыӝужан палан улӥсьёс таӵе ӧрлы уг паймо ни. Асьмелы но выльдӥськоно. Аспӧртэм выросъёс туж кулэ аслыз артистлы но. Ужаз выль амалъёсты кутыса гинэ, со быгатэ ассэ выль сямен усьтыны, оло нош бурдъяськыны но. Пушкамы ватӥськыса улыны уг яра.
— Ачиз Панфилов бордады луысал ке, туала школады инты шедьтысал-а улонын?
—  Туж умой веран вань: история не имеет сослагательного наклонения. Но Панфиловез ми ум вунэтӥське. Со туж визьмо адями вал, адӟыны быгатӥз азьпал улонэз. Кылсярысь, «Капитуляция» ужзэ сцена вылын пуктӥз но, Америкаысь кык огкадь башняос капитулировать каризы, усизы, шуыны луоз, террор азьын.
Панфиловез тодамы вайиськомы, егитъёсмес визьмакумы но. Соос милям 5-6 кузя, — шуэ Алексей Колбин, — мон ачим, ужаны соку гинэ кутскем маке, етӥзъяськыса, асме бадӟым кожаса, сцена улонын оломар но дауртыны ӧдъяй вал. Евгений Алексеевич монэ кабинетаз ӧтиз но ваче син куриз: лэсьты сое, мае мон курисько, ачидъяськод бӧрысь. Та учырез ӵемысь верано луэ сьӧр палаз ортчисьёслы. Соку ик чалмытско.
— Балериналэн ужез йырвизез-а золгес висьытэ, мугорез-а курадӟытэ?
— Огкадь выросъёсты, суредъёсты дышетыса, мугор, машина кадь, нокытчы уг кугӟа ни, — шуиз Мария Тихонова. — Артист спортсменлы укшаны кутске: вылэгес тэтчоно, пыдэз чебергес ӝутоно. Со дыре ик йыркобы малпаське: адямилэсь сюлэмзэ кызьы ке вырӟытоно, образ бордын ужано. Озьыен, балериналэн ужез йырез золгес висьытэ.
— Котьма ке но Екатерина Максимова но Галина Уланова дано балеринаослэсь даурзэс тодэ ваёно ке, мукет малпанэ вуоно. Тамак ӧз кыске, вина ӧз юэ ке но, соос огзы но кема ӧз улэ.
— Со герӟаськемын асьмемыз асьмеос жалямтэен, туж трос ужаськомы — мугор уг чида.  Дышетскыны кутскеммы бере куректӥськомы: ой, тазэ сиыны уг яра, соизлэсь возиськоно. Нош ужаны кутскиськод но со сярысь воксё уд сюлмаськиськы ни: нокыӵе диета но кулэ ӧвӧл ни — мугор ӟызы возиське. Со ик луэ, шӧдске, вазь ӝуаммылэн мугез.
— Та нуналъёсы Сарапулэ но вуылӥды…
— Та город сярысь ми трос пол кылылӥмы ни вал. Отысь Удмуртиысь культура удысысь дано ужасез Ольга Зиминаез адӟеммы потӥз. Табере соин ваче син вуим, солэсь туала эктонъя театрзэ адӟимы но синмаськыса быримы. Тапала ӵемгес вуыломы ни.

Елена Фёдорова

Потэмын  № 59 (24600) от 27.04.10.

Удмурт Дунне
By Удмурт Дунне 27 апреля, 2011 03:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<