Мед луоз тырмыт саклык

Удмурт Дунне
By Удмурт Дунне Март 29, 2011 08:58

Кун Кенешлэн юртаз 24-тӥ мартэ ортчиз Удмуртиысь Ветеранъёслэн огазеяськонзылэн кенешезлэн пленумез. Ужрадэ пыриськизы интыосысь ветеран организациослэн азьветлӥсьёссы но Удмуртилэн Президентэз А. Волков, Кун Кенешлэн Тӧроез А. Соловьёв.

Кылем арын декабрь толэзе Москваын ортчиз Россиысь Ветеранъёслэн  огазеяськонзылэн 6-тӥ ӧтчамез. Отын кутэм решениос но соин валче Удмуртиысь ветеран огазеяськонъёс азьын сылӥсь туала ужпумъёс сярысь доклад пленумын лэсьтӥз Удмуртиысь ветеранъёслэн кивалтӥсьсы Геннадий Крюков.

Асьме ветеран огазеяськонъёс азьын кык валтӥсь уж сылэ: ветеранъёслэсь правооссэс утён но егитъёслы ӟеч сямъёс пыӵатон.

Удмуртиысь ветеранъёс пӧлын туннэ 2 сюрс 231 адями — Быдӟым оже пыриськемъёс но инвалидъёс, 39 сюрс 253 мурт — фронт мышкын тыршемъёс, ваньмыз-ӧвӧлэз 410 сюрс пенсионеръёс. Тросэз соос пӧлысь мыло-кыдо пырисько республикамылэн улоназ. Калыклэсь сюлмаськонъёссэ вылӥ кивалтӥсьёс дорозь вуттыны тыршо. Ветеранъёслэн кенешъёссы кивалтӥсьёс азьын ялан ужпумъёс ӝутыло жилищно-коммунальной хозяйствоын тарифъёс будэм, эмъюмъёслэн дунъёссы но тырмымтэзы пумысен, берло дыре юн чакласа возё ветеранъёслы медициная юрттэт сётонэз. Быдӟым Вормонлы 65 ар тырмон азьын лэчыт ужпум султӥз ветеранъёслэн улон-вылонзы пумысен. Кинлы улон инты висъяно, кинлэсь квартиразэ тупатоно — та югдурез но ветеранъёслэн кенешъёссы ялан син азязы возизы.

Президент А. Волков нимысьтыз вераз государстволэн но ветеран организациослэн ог-огзэс валаса ужамзы пумысен. Та ужрадэ но республикалэн кивалтӥсьёсыз ветеранъёсты гажамзэс возьматон понна гинэ ӧз лыктэ, шуиз со. Арлыдоос сярысь сюлмаськон — со вань кивалтон ёзъёслэн огез валтӥсез ужзы луэ. Удмуртиын одӥг миллион но ӝыны пала улӥсьёс пӧлын туннэ тужгес но трос, 410 сюрс пала, пенсионеръёс луо. Соин ик асьме государство котькыӵе вакытъёсы соослы бадӟым саклык висъя.

Президентлэн верамезъя, республикаямы улӥсьёслы юрттэт сётон арлы быдэ йылэ. Удмуртиын кутэм законъёсъя но программаосъя та дыре 30 пумо юрттэт висъяське. Кылем арын республика 521 сюрс адямилы пӧртэм пумо юрттэт висъяз, ветеранъёс но пенсионеръёс сяна, отчы ик пыро нылпиос но инвалидъёс.

Татьяна Банникова.

 

Удмурт Дунне
By Удмурт Дунне Март 29, 2011 08:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<