Гуртэз кыклы люкиз шур

Удмурт Дунне
By Удмурт Дунне Март 25, 2011 09:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гуртэз кыклы люкиз шур

Россилэн Президентэзлэн Удмуртиысь приёмнояз калыкен пумиськон ортчытӥз Кун Кенешлэн Тӧроез Александр Соловьёв. Ужрадэз нуиз приёмноен кивалтӥсь Светлана Смирнова. Солэн верамезъя, Россилэн Президентэзлэн таӵе интыосыз кылем арысен вань улосъёсын  кылдытэмын. Татчы адямиос пӧртэм куронъёсын-ӝожтӥськонъёсын вуыло. 2010-тӥ арын 319 вазиськись вал, туэ сюлэсь трос куронъёс вуизы ни. Кыӵе ужпумъёсын адямиос лыктэмын вал таяз учыре?

Сарапул ёросысь Лагуново черкогуртысь вуэм нылкышноос Валентина Шихова но Галина Заварзина шараязы гурт калыклэсь сюлмаськонзэ. Нечкинка шур вамен выж кемалась куашкамын ни. Гурт пыр бызись шур калыкез кыклы люкиз. Нокыӵе техникаен но, пыдын но кӧня ке аръёс ӵоже ини выж вамен потаны уг луы. Соин йырин шурлэн огпалаз интыяськем музъемъёс гырытэк-кизьытэк кыллё. Ферма но быриз отын ужасьёс ужтэк кылизы. Выж сьӧрын куинь корка ӝуаз, тылпу кысон машинаос отчы вуыны быгатымтэен. Кулэм муртъёсыз но шайвылозь вуттыны ёрмоно, шуизы кышномуртъёс. Республикалэн кивалтӥсьёсыз, выж пуктонлы 14 миллион манет кулэ, шуо.

А. Соловьёв оскытӥз: лымы шунам бере со татчы лэсьтӥськисьёсын но ёрос кивалтӥсьёсын одно ик вуылоз. Выж лэсьтон сметалэн дунызъя огкыл шедьтоно. Но дунтэм, суп-сап пуктэм выж нокинлы но кулэ ӧвӧл. Ёрослэн коньдонэныз гинэ сое уд лэсьты, республикалэн бюджетаз пыроно луоз.

Клавдия Исуповаез, Дэри ёросысь Тукмач гуртысь старостаез, татчы вуттэм сюрес ужпум. Гурт дорозь 2,2 иськем сюресэз нокин но уг сузя, та гуртын улӥсьёс автомобиль трасса дорозь куасэн ветло. Казмаска муниципал кылдытэтлэн йырыз гурт калыклэсь вазиськемъёссэ санэ уг басьты, вераз Клавдия Ивановна.

Та ужпумъя вань ни Дэри ёросысь судлэн решениез. Соя Дэри ёрос муниципал кылдытэтлэн администрациезлы косэмын 2011-тӥ арын 1-тӥ ноябрёзь та сюресэз учётэ басьтыны но азьланяз сюреслы кузё луыны.

Та кышномурт азьын ик А. Соловьёв жингыртӥз транспортъя но сюрес хозяйствоя министрлэн О. Гаринлэн приёмнояз, куриз туннэ ик сюресэз сузяны. Та ӝыт ик Тукмач гуртэ вуыло, шуиз А. Соловьёв. Угось кышномуртэн вераськыку, мукет тырмымтэос но шараяськизы. Кылсярысь, толалтэ та гуртын ву но бырылэ.

Куинетӥез ӝожтӥськон озьы ик Дэри ёросэн герӟаськемын. Изгуртысь егит семьяослэсь мылкыдзэс  вераны лыктэм Наталия Четкарёва, куинь нылпиё анай куать ар бызьылэ ни корка пуктон мылкыдын. Лэсьтӥськеммы потэ, но музъем уг сёто, шуиз со.

Жаляса верано, гуртысь егит семьяослы лэсьтӥськонлы музъем висъяны могӟетъёс кылдытэ Музъемъя кодекс но Удмуртиын 2002-тӥ арын 68-РЗ номеро кутэм закон, валэктӥз А. Соловьёв. Россилэн законъёсызъя музъем басьтыны луэ, коньдон тырыса, рынокен пуктэм дунъя. Но егит семьяослы со шуг-секытъёс кылдытэ. Удмуртиын кутэм законъя корка пуктыны малпась семьяос улон интылы ёрмисен лыдъямын но улоннилы черодэ султэмын луыны кулэ. Соку гинэ соослэн луонлыксы вань лэсьтӥськонлы, дун тырытэк, музъем басьтыны. Н. Четкарёва ёрмись семьяос пӧлы пыртэмын ӧвӧл. Кун Кенешлэн Тӧроез солы шуиз: чиданды тырме на ке, возьмалэ законэ ватсанъёсты пыртонэз. Асьме депутатъёс та ужпумез ӝутыны малпало Кун Кенешлэн 29-тӥ мартэ ортчоно сессияз.

Татьяна Банникова.

 

 

Удмурт Дунне
By Удмурт Дунне Март 25, 2011 09:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<