Back to homepage

Гурт адями — 2016

1

«Гурт адями-2016» конкурслы йылпумъянъёс

 Кытын тупаса уло?

Кылем ар пумын ялэм «Гурт адями-2016» конкурсамы гуртоос туж мыло-кыдо пыриськизы. Быдэс толэзь соос, телефонмы пӧсятозь, жингыръязы, электрон почтамес гожтэтъёсын тырмытылӥзы. Табере ми дась вераны, кин луиз устоез кивалтӥсь, выжыоссэ утись но ӟеч сюлэм.

«Устоез кивалтӥсь» номинациын вожвылъяськиз 2 мурт гинэ: Ува ёросысь Узей-Тукля гуртысь ужбергатӥсь Александр Штумф но Сьӧлта ёросысь Кильмезь муниципал кылдытэтлэн йырыз Олег Пчельников. Узей-тукляос гуртозы понна трос сюлмаськизы ке но, Олег Викторовичлэн куара сётӥсьёсыз проворгес вылӥллям. Солэн гурт поселениысьтыз Зямайын, Югдонын, Лудӟи-Жикъяын улӥсьёс, кивалтӥсьсы понна дурбасьтыса, гожтэтъёс ысъязы. Озьы «Устоез кивалтӥсь» номинациын, 370 куара люкаса, вормиз Олег Пчельников.

«Выжыоссэ утись» ним утон понна зол вожвылъяськизы Пичи Пурга ёросысь Улын Юри гуртлэн старостаез Яков Петров но Алнаш ёросысь гожъяськись Любовь Ганькова. Та адямиос понна дурбасьтӥсьёслэсь маза ӧй вал — соослэн минутлы быдэ жингыръямысьтызы, телефонмы ӟырдалляз, электрон почтамы гожтэтъёсынызы тымиськылӥз. Куара сётон толэзь ӵоже Яков Петровлэн но Любовь Ганьковалэн огмындагес куараоссы вал. Зэм, пургаос ӵемгес жингыръязы, со понна алнашъёс кинюртэмъёсын гожтэтъёс ысъязы! Берпуметӥ нуналозь шугъяськимы вераны, кин вормоз. Но Любовь Леонидовналэн дурбасьтӥсьёсыз шаплыгес вылӥллям — телефон пыр, гожтэтъёсын вуэм, Интернетын сётэм куараосты ватсаса, тодмо луиз: Любовь Ганькова люказ 1 сюрс 959 куара! Гуртоосты конкурсэ пыриськыны љутказы «Алнаш колхозник» ёрос газетын ужасьёс. Я. Петров алнашъёслэсь ог 300 куаралы кылиз.

Но тужгес пӧсь вожвылъяськон пуромиз «Ӟеч сюлэм» номинациын ӵектэм муртъёс пӧлын. Гуртоос, ас пал адямизы понна дурбасьтыса, 100-лэсь ятыр муртлэн кинюртэмъёсыныз гожтэтъёс ысъязы, дугдылытэк жингыръязы. «Улэп» кинюртэмъёсты гинэ лыдъясалмы ке, вормысал Пичи Пурга ёросысь Светлана Викулова — со понна 684 мурт гожтӥськем! Ӧжытгес — 508 кинюртэм — вуиз Шарканысь Николай Вахрушев понна, но шарканъёс шаплы вылӥллям Интернетын — со пыр 335 адями куара сётӥз. озьы, оглом 1 сюрс 24 куара люкаса, вормиз Шаркан ёросысь Карсашур школаысь физкультураен дышетӥсь Николай Вахрушев. Ӟеч сюлэмо воргорон понна дурбасьтӥзы дышетӥсьёс, соин визьнодам нылпиос, бускель гуртъёсын улӥсьёс.

Но вылӥ пусъем муртъёс вормисе ӧй потысалзы, соос понна сюлмаськись, гуртооссэс куара сётонэ пыриськыны ӝуткась адямиос ӧй луысалзы ке. Соин нимысьтыз пусъеммы потэ Кияса ёросысь Вуж Салья гуртысь азьветлӥсез Марина Моряковаез. Та мыло-кыдо кышномурт котькуд вожвылъяськонамы пыриське, таяз радэ но со вал нырысетӥез, кин та конкурсамы гуртысьтызы адӟем карымон кышномуртэз ӵектӥз.

Гуртоосты куара сётыны зол ӝутказ Пичи Пурга ёросысь Пичи Бӧдья гуртысь Александра Бочкарёва но. Берпуметӥ нуналаз, со сюлмаськемен, дорамы тужгес кузь — 6 бамъем — кинюртэмъёсын гожтэт вуиз. Пичи Пурга ёросысь Улын Юри гуртысь староста Яков Петров Нина Шутовалэн сюлмаськемезъя ог 1 сюрс 600 куара люканы быгатӥз. Вожвылъяськонэ туж мыло-кыдо пыриськизы Кияса ёросысь Калашур гуртысь кибашлы Евгения Анисимова понна дурбасьтӥсьёс но: куаразы сюрс котыр люкаськиз. Огкылын вераса, ми эшшо одӥг пол валам: удмурт гуртъёсын быгато тупаса улыны, ог-огзэс дунъяны.

 

Конкурсэ пыриськизы таӵе муртъёс понна:

«Устоез кивалтӥсь» номинация — Ува ёросысь Узей-Тукля гуртысь ужбергатӥсь А. Штумф; Сьӧлта ёросысь Кильмезь муниципал кылдытэтлэн йырыз О. Пчельников.

«Выжыоссэ утись» номинация — Ува ёросысь Пекшур гуртысь шаерчи В. Тратканов, Пичи Пурга ёросысь Улын Юри гуртысь староста Я. Петров; Алнаш ёросысь Ӟуння гуртысь гожъяськись Л. Ганькова; Эгра ёросысь Зура черкогуртысь клубын ужась Н. Лекомцева; Шаркан черкогуртысь пинь эмъясь, маскарчи П. Вахрушев.

«Ӟеч сюлэм» номинация — Кияса ёросысь Вуж Салья школаысь дышетӥсь В. Осипова; Пичи Пурга ёросысь Пичи Бӧдья гуртысь фельдшер С. Викулова; Дэри ёросысь Совхозной черкогуртысь библиотекарь С. Жернакова; Шаркан ёросысь Карсашур школаысь дышетӥсь Н. Вахрушев; Можга ёросысь Удмурт Пычас гуртлэн старостаез С. Гаврилов; Кияса ёросысь Калашур гуртысь кибашлы Е. Анисимова.

Кельшымон адями понна куарадэс сётыны быгатӥськоды, (3412) 73-33-43, 8 951 195  37 66 номеро телефонъёсы жингыртыса (одӥг телефон номерысь 5 муртлэсь тросгес куаразэ ум басьтӥське), дурбасьтӥсь муртъёсын списокез озьы ик келяны луоз udmdunne@yandex.ru электрон почтаямы яке «Удмурт дунне» газетлэн редакцияз Ижкар, К. Маркс урам, 274-тӥ юрт адресъя.

Куара сётон кыстӥськоз январь толэзь ӵоже, конкурслы йылпумъянъёс лэсьтомы феврале. Вормисьёс пусъемын луозы синпель кузьымъёсын.

"Гурт-адями -2016". "Устоез кивалтӥсь" номинация

Учконо кӧня куара сётэмын

"Гурт-адями -2016". "Ӟеч сюлэм" номинация

Учконо кӧня куара сётэмын

"Гурт-адями -2016". "Выжыоссэ утись" номинация

Учконо кӧня куара сётэмын

Ангелина Снигирёва

 

  • «бусыос»

    Гажано «Удмурт дунне» газетын ужасъес! Бадзим тау кариськом тиледлы милэсьтим гурт адямимэс Мосова Татьяна Ксенофонтовнаес зечен лыдъямды понна, Тау кариськом весь вань калыклы куара сетэмзы понна.
    Таин валче, ваньдэсты зечкыласьком 100 ар тырмон Юбилеен. Тазалык, выль азинсконъес, трос лыдчисъес, шумпотонъес но вож гинэ сюрэсъес.
    Вождэс эн вае, мон дышетскымтэ удмурт грамоталы. Соин валче верамэ потэ:
    Нош малы меда со луэ озьы: 1963 арын мон мыны нырысети классе. 20 ятыр пиналъес полын кыкэз гинэ вал зуч. Удмурт пиналъес зуч кылэз воксе ик уг валало вал, нош дышетисьмы воксе ик удмурт кылэз уг вала вал. Зол курадзон вал дишетисьлы, но пиналъеслы. Пиналъес дышетизы дышетисез( Банникова Тамара Ивановна) удмурт кыллы, нош со дышетиз пиналъесты зуч кыллы. Школамэ быдти умой оценкаосын, техникумын басьти диплом с отличием. Нош весь улонам малпан кылдылэ- мон уг тодиськи вордскэм кылмэ. Нырисьсэ адзи удмурт кылын гожъям книгаосты(12-13 аресъем дыръя), но воксе ик пайми. Кызы со ози? Лучкэм лыдчины вырисько вал. Сеп гуртын улыкум кылисько чебер удмурт кылэн вераськэмэз. Борись вожъяськын кутски- мон нокуно озьы уг быгаты. А кыче чебер удмурт кылмы — зарни пуштросо. Сюлэмам али но возиськэ шугъськон( чувство предательства) дыр со. Вазиськэмэ потэ эн вунэтэ удмурт кылдэс. Сое дышетыса ти одно ик луоды шаплыэсь, визьмэсь, узырэсь, асьтэдыс гажасэс.Тини озьы.

    Сеп гурт, Игра ерос Г. Лекомцева