2. Кыӵе удмурт книгаез лыдӟиды берлозэ?

3. Мар лыдӟемды потэ?

Александр Егоров, филология наукаосъя кандидат:

1. Ӟуч литератураысь лыдӟисько А. Ивановлэсь «Общага на крови» романзэ, озьы ик япон авторлэсь Масару Ибукалэсь «После трёх уже поздно» книгазэ. Лыдӟыны кутски мадьяр авторлэсь Варга Домокошлэсь «Семь Я» нимо ужзэ.

2. Удмурт литератураысь аслым тунсыко луисьсэ номыр но али уг адӟиськы.

3. Туж троссэ лыдӟеме потэ но, жаляса верано, дыр уг шедьтӥськы ваньмызлы…

Лариса Дмитриева, аспирант, «Калык творчествоя элькун корка» юртын ужась:

1. Тэтчаса лыдӟиськись­ко: я Шарль Бодлерлэсь «Цветы зла», я Людмила Петрушевскаялэсь «Квартира Коломбины» (пьесаос), я Иво Андричез «Мост на Дрине», я бигер кылбурчиез Лилия Газизоваез.

2. Удмуртысьтыз берлозэ лыдӟи Елена Панфиловалэсь «Мон – улӥсько!» кылбур бичетсэ, Эрик Батуевлэсь кылбуръёсын но статьяосыныз люкаса поттэм «Ночная радуга» сборниксэ но Августа Конюховалэсь «Живой голос века» книгазэ.

3. Тодматскысал Андрей Белыен, туж тунсыкъяськытэ «Азвесь даур». Ваньмыз, мар соин герӟаськемын: литература, искусство, со вакытысь улон. Кузебай Герд сярысь роман лыдӟеме потэ!

Сёма Павлов, Мускоысь студент, выжъёсъя ин­­женер:

1. Ф. Достоевскиез, «Повести и рассказы», Вадим Зеландлэсь «Пространство вариантов» книгазэ.

2. Жаляса верано, удмуртсэ уг лыдӟиськы (шедьтыны секыт потэ кадь).

3. Азьланьтысал Ф. Достоевскиен тодматсконме, Л. Толстойлэсь «Война и мир» романзэ пумозяз вуттысал; психоанализ бордаз кыске.

Юрий Ерошкин, Удмурт театрысь артист:

1. Лыдӟи А. Вампиловез, В. Красногоровез, А. Коровкинэз – ӟуч драматургиез.

2. Удмуртсэ уг лыдӟиськы.

3. Лыдӟем потэ Библиез но Коранэз.

Анна Семёнова, Национальной библиотекаын ужась:

1. И. Бунинлэсь веросъёссэ нош ик лыдӟи.

2. А. Конюховалэн «Живой голос века» книгазэ (жаляса верано, ӟуч кылын).

3. С. Дерендяевлэсь «Кука с Макой» бичетсэ.

Дмитрий Иванов, студент, «Инвожо» журналын ужась:

1. Е. Гришковецлэсь «Год жизни» гожтоссэ.

2. П. Захаровлэсь, «Гондыр сюан яке шимес уйвӧт» ужзэ.

Кожа татчы

Интернетэ поттэм лыдӟетъёс:

Выль «Инвожо», 2011, 11-12 http://issuu.com/invozho/docs/invozho-n-11-12-2011-web

Дарали Лелилэн «Гур сьӧрысь суредъёс» (2009) бичетэз http://issuu.com/national_library_of_udmurtya/docs/darali_leli

Йӧскалык библиотекаен люкам книгаос: http://issuu.com/national_library_of_udmurtya

Буккроссинг

Ресторатор Максим Коновалов блогаз (http://konovalov-maxim.livejournal.com) гожтэ:

Италиысь вуэм одӥг ӟеч ужез пыӵатыны кутским. Оло вань куронъёсты чакланы ум быгатӥське, но кутскон сётэмын ук. Уж со бордын: «Кофе Семь» кафеын вань книгаосын тырмытэм кык ӝажы. Кыказ ик залын. Та милям библиотекамы. Кин кафее оген ветлэ – соос понна. Но та ӝажыос чакламын буккроссинг шуыса. Валамон кылэ берыктоно ке, кельшем книгаез сьӧре басьтыны луэ. Валамон, шумпотысалмы, со берен та ӝажые ик вуысал ке. Нош кинлэн дораз кыллё лыдӟем книгаосыз, соосты кинлы ке сётыны жаль ӧвӧл ке (валамон, весяклы), соосты татчы вайыны но ӝажые поныны яра. Потэ ке – книга бамъёс вискы асьтэлэсь визиткадэс чуртналэ.

Тани толон мон кык книга вайи. Арнальд Индридасонлэсь «Каменный мешок» но Энтони Бурденлэсь «Вокруг света. В поисках совершенной еды» гожтэмъёсэс.

Буккро́ссинг (англ. bookcrossing, «книгаберган») – кельшись уж, общественной уж, со быдэсме социальной сетьёслэн амалзыя, матын флешмоблы.

Буккроссинг – со книгалэсь мозмытскон. Адями лыдӟем книгазэ кельтэ калыко интые (парке, кафее, поездэ, метроысь станцие). Со бере та книгаез шедьтыны быгатоз, лыдӟоз мукет адями. Бӧрысь ачиз но та бичетэз кельтыны кулэ.

Таӵе ужпум борды бась­тӥськиз А. Журавлёва. Анай, мама, mother – тазьы вераськыны туннэ луонлыксы вань нылпи садэ ветлӥсьёслэн но, школаын дышетскисьёслэн но. Соос кие вуиз «Суредъёсын кылсузьет. Удмурт, ӟуч, англи кылъёсын» пособие. Та бордын ужаз на «Удмуртия» книгапоттонниысь редактор Т. Пояркова.

Кылсузьетэ пыртэмын 34 темая ог 600 предмет нимъёс. Соослэсь пуштроссэс валаны юрттозы Удмуртиысь калык кылбурчилэн А. Леонтьевлэн буёло пичиесь суредъёсыз. Кылсярысь, сётэмын семьяен, гуртэн, пӧйшуръёсын, арлэн вакытъёсыныз, лыдъяськон пусъёсын герӟаськем кылъёс. Нош сюжето суредъёсъя пиналъёс пӧртэм веросъёс малпаны быгатозы, мадиськонъёс, кылбуръёс но кырӟанъёс дышетозы.

* * *

Паймымон выжыкыл дуннее вуиськод, «Лӧпшо Педунь серекъя» книгаез лыдӟыса. Со нырысьсэ люкамын но поттэмын вал тодмо тодосчиен Д. Яшинэн 1968-тӥ арын. Мукет геройёс сямен ик, Лӧпшо Педунь но котькыӵе шуг-секытъёсты ворме, урод сямо муртъёсты бышке. Вераны кулэ: та выжыкыл огдыре ӟуч кылын но потӥз. Лӧпшо Педунез суредаз М. Вахрин.

* * *

Инкуазен, улонэн тунсыкъяськисьёс понна нимысьтыз 7 пичи книгаос дасямын: «Птицы. Тылобурдоос», «Насекомые. Нымы-кибыос», «Рыбы. Чорыгъёс», «Животные. Пӧйшуръёс», «Грибы. Губиос», «Лекарственные растения. Эмъюм будосъёс» но «Удмуртские народные узоры. Удмурт калык пужыос». Таос бордын ужаз редактор Т. Воронова. Котькуд сузьетын валэктонъёс сётэмын, чебересь суредъёс лэсьтэмын.

* * *

С. Лебедевалэн «Удмурт калык пужыятон» ужез наука ласянь ӝот-ӝот эскеронъёсыныз висъяське. Со куинь кылын поттэмын – удмурт, ӟуч но англи. К. Герд нимо Национальной музейысь узыр люкамъёс пӧлысь татчы пыртэмын уката яркытъёсыз – калык сямез но дунне шоры учконэз возьматӥсь пужыос. Пӧртэм интыосын улӥсь удмуртъёслэн пужыятсконзылэсь аспӧртэмлыксэс усьтэмын, пужыятскон амалъёс суредаса сётэмын.

Вань та книгаосты басьтыны быгатӥськоды «Удмуртия» издательствоысь.

Георгий Туйматов

Одӥг пи нуналлы быдэ вӧзаз пукылэм, мадьылэм, макем чебер та дунне. Эшъёс луиллям. Огпол ныл эшезлы тазьы верам:

- Та дуннеез адӟысал ке, тыныд бызьысал.

Огнуналэ почта нуллӥсь сукыр ныллы гожтэт ваем: кин ке тодмотэм мурт солы синъёс кузьма, операция понна дун но тыре, пе. Ныл шумпотыса соглаш кариськем. Син вылысьтыз бинетэз басьтэмзы бере анай-атайзэ, сузэр-вынъёссэ, быдэс дуннеез адӟем: операция удалтэм.

Дораз бертэм бере эшеныз адӟиськыны мынэм.

Пи солэсь юам:

- Табере быдэс дуннеез адӟиськод ни ке, бызёд-а мыным?

Ныл, пи шоры учкыса, солэсь сукыр луэмзэ адӟем. Кынем синкабакъёсызлы абдрам. Быдэс улонзэ таин тазьы улоно луоз шуыса, чик кельшымтэ, пилы «уг» шуэм. Эшъяськонзылы но пум вуиз шуыса ивортэм. Ныллэн улонэз табере чылкак воштӥськем. Пи чусак гинэ синвуаськем, кӧня ке нунал ортчыса, ныллы гожтэм: «Умой утьы синдэ, тынад луэмзылэсь азьло мынам синъёсы вал со».

Робби Лоу гожтэмъя, 

мадьяр кылысь берыктӥз

Анастасия Demeter-Петрова

Пушнер пӧлын эмезь кисьма.

Тэльлы матысь удмурт гуртын будӥзы куинь эшъёс-юлтошъёс: Ондӥ, Лади но Поки. Ӟечъяськыса выллем юртъёссы артэ сылӥзы. Лабрес беризьёс гинэ кусыпсэс висъязы кадь. Нош «тэтэослэн» сюлмаськонзы но шумпотонзы огазьын вал. Ӵем дыръя, бадьпу ньӧрез вал карыса, шудылӥзы, одӥг аре ик школае но вамыштӥзы. Будӥзы, кыдазы гуртын, крестьян ужлэсь шӧмзэ ас вылазы мертазы. Пичиысен валазы няньлэсь ческытсэ, кытысь потэмзэ.

Кырӟанын шуэм сямен пиос но будо но, пиос но кошко но. Атыкай музъеммес утьыны мыно. Армие соос одӥг аре кошкизы. Ондӥ вал тракторист, табере – танкист. Лади малпа вал лётчик луыны, медкомиссиез ӧз ортчы. Лобан мылкыдыз армиын бурдъяськиз: десант-парашютист луиз. Нош Покилы дунне тэгыз вал: армейской формаез дӥсятэк гинэ, пе, медам кыльы. Таиз луиз бусылэн эксэез – пехота. Кык ар ӵоже соос зэмос пиосмурт радэ султӥзы.

Армиысь бертыса, вордӥськем музъемзылы йыбырттӥзы. Анай-атай вӧзын котьку шулдыр. Нош улон минутэн, часэн азьпала мынэ. Котькудӥз аслыз уж утча, кельышлы сэрег. Воргорон луиськод бере, тӥрез пыдад уд кутча, ныдтӥз сое кускад кертты. Медаз луы буш лудысь ю-нянез арам кадь. Армия бере но Ондӥ вордӥськем гуртэзлэсь ӧз ӵыды, кылиз колхозэ ужаны. Табере, шуэ, анай-атай бордам мед пыкъяськозы. Лади но гуртэзлэсь кыдёке ӧз кошкы, кызь иськемысь заводэ интыяськиз. Пичи ке но, пе, мемиен дядилы юрттыны мед быгато. Поки гинэ палэнэ шонтоно кожаз. Оло семьязы бадӟымысь, оло кузь коньдон сьӧры уйиськиз – тодӥсь ӧй вал. Котькытын ужась киос кулэ.

Ар бӧрсьы ар ортче. Пиос но будо но пумен мӧйымо. Дыр тудву кадь бызе, нош сюлмаськон уг кулэсмы. Коммунизме валтӥсь дядяйёс мукет гурен кырӟаны ӧдъязы. Йыртышез кормаса но, уд вала: малы заводъёс ворсаськизы, малы бусыос йӧныен алязы, малы калык ашкынӥз?

* * *

Вашкала беризьёс улын пуко эшъёс, куинь пересьёс. Ондрей агай сюрмем киыныз маялтэ пурысьтам йырсиоссэ, мыньпотэ. Нош Ладьмер нюню чабкылэ пилеш йыраз. Узыр изьыен но, пе, уд шобырты ни начар «кудыез». Прокопдяй гинэ тур-пар кылем йырсиоссэ, кильтро кариськыса, люгы вӧен зыра. Оло, пе, узьым кадь удалозы на.

Пересьмыса таосыд бодыен эшъясько. Валмы, пе. Мылкыдзы ке но етӥз, нош тазалыксы: тӧл пельтӥз ке – пегӟозы. Пенсие потыса уго, сюлэм но бышкалтэ, кӧтурдэс но ӵогъялтэ, кус но ӟукыртэ. Нош тодэ ваён – тугаськем бугорез сэрттон. Родняоссэс, кудо-туклячиоссэс, иськавынъёссэс буре вайыса, кӧня ке чалмыт сылӥзы но выжизы асьсэ вылэ.

- Сюлэм мынам романтичной, – веранзэ мытӥз Прокопдяй. – Строительной техникумез йылпумъяса, шонтӥ ас шудме утчаны. О-о, кытын гинэ ӧй вал мон! Йыромод. Пиртэше вань, одӥг интыын кема улыны уг чидаськы. Ялан кытчы ке выль интые выжем потэ. Уралысен – Сибире, шунды ӝужан палась – нош ик Уралэ: БАМ, ТУМ, КамАЗ. Романтика. Тодмотэм улос – выль эшъёс, выль туганъёс. Тазалык вань дыръя кустэ эн шонеръя, янчиктэ тырмыты. Вӧш-вӧш ужаса, лычсузьымон шутэтскы. Сямы ыльнянь кадь небыт бере, ялан шуныт интыез утчай. Мугорлы ке няськыт, вирсэрлы но веськыт. БАМ-ысен вал со. Одӥг нылмурт бордам тэбиниз. Укыр кильтро. Ымдурыз огдыре кык ымын чупано кадь. Тусбуез мак сяська но тӥни. Валаз, лэся, деликатной мылкыдме. Бордам нюлӥськись писэй кадь мынчыръяське. Оло нош зӧк янчикме бушатоно кожаз? Ӧйтӧд. Шӧдӥсько, лушкемен визьме сына но сына. Нош мынам янчик буша но буша. Кылыныз кӧя-вӧя, ачиз монэ алда. Беда. «Оп-па, – малпасько поннам. – Таин шыд уд пӧзьты. Йыр-пыд быдэс дыръя – чальтчоно. А то пыдзэ пуктоз – канжасько». Таӵе дыре синмаськон мылкыды атас гурен чоръяны кутскиз. Кошки шунды ӝужан пала – Благовещенске. Выль юрт ӝутӥсьёс котькытын кулэ. Вашкала дырысен строительёс дано интыын ветлӥзы. Почёт. Йыр вылын, кӧт урдэмын.

Зея шурлэн выллапалаз одӥг этажо панель коркаос пуктылӥм. Чорыгасьёслы, пе. Татын мон мастёр вал. Китаецъёс но пӧламы ужазы. Номыр уд шу, тыршись калык. Кырсь ужлэсь уг кӧберало. Чи Юн Ши нимоеныз эшъяськи. Ӟуч кылын лабыртэ бере, сое бригадире пуктӥм. Уж пӧзе, толэзь куспын юртъер вуэ. Выль корка пырисьёс шумпотэмзэс уг вато. Дӥнязы пыртыса ик, кунояло. Шуд кузьмасьёс, пе, милемыз. Вот соку усыкмем йырын ӧжыт гинэ кунгож сьӧры ӧй вуы.

Ужпум тазьы вал. Чи Юн Шилэн ӵектэмезъя тодматски китайкаен. Борддоре шуккем картинка кадь ӧвӧл ке но, учкымон нылаш. Азьпалтӥз но, мышкытӥз но, урдэстӥз но – кельышлы. Мон, шузи, кудӟем «кудыеным», синъёссы чалыш бере, марымзы но чалыш ӧвӧл меда шуыса, эскероно кожай. О-о, эшъёс, ӵуказеяз коть йырдэ пыд кар. Яке Китае, шуо, яке судэ. Куинь ар ужаме кошкись вуэ сялӟем кадь луиз. Пегӟытэк ӧйлась. Утчась ӧй вал бере, Чи Юн Ши алӥз, дыр.

Урод мылкыдын берытски вордӥськем шаерам. Пурысьтам Уралэ, пумита йӧнтэм пидэ. Коть урод, коть ӟеч, мон татысь ук. «Ижевск» станцие васькыса, синкылиосы быльыр потӥзы. Ас калыкелэсь мӧзмиськем, лэся. Куд-огез дэймыса выллем шорам учке: во, пе, перронэз миське.

Бертӥ гуртэ. Агай, вын кышнояськемын. Сузэръёслэн но вакытсы вуэм – быземын. Ольга туганэ сьӧрлось гуртэ инты шедьтэм. Кин-о возьмалоз «палдэм шелепез»? Кошки ТУМ-э. Чугун сюрес ӝутӥсьёслы но коркаос кулэ. Нош ик мастере пуктӥзы. Ужмы пӧзиз, нуналъёс вакчиесь потӥзы. Сьӧлыке вань бере, кышноосын ӧжыт вераськи. Сьӧлталозы кожай, лэся. Кин тодэм: пал синмынызы кырмыштозы но, мон нош ик уяло. Адӟон пыд улысь потэ.

Со вакыт туж жингыртӥз Набережные Челны. Автозавод лэсьтӥсьёс но цехын ужасьёс даурзэс палаткаосын уз улэ. Отчы ширтӥ. Юрт ӝутӥсьёс, пе, туж кулэ. Мултэс кыл вератэк, кутӥзы: ӵапак дыраз, шуо. Монтажникысен кутскыса, нош ик мастерозь будӥ. Квартира пумысен анай-атаез но бордам гожтӥ бере, кык комнатаен улонни висъязы. Нош гуртысь пересьёсыз кыре-буре кыскод-а? Ачид, пе, ул со кузьыли карад. Милемлы, шуо, гуртын туж ӟеч.

Ваньмыз умой кадь, нош гадь пушкын пычей поръя. Квартира вань, уж ӟеч, но шудо луон понна мар ке уг тырмы. Сюлэм шунтӥсь?! Ольга туганме картэзлэсь люкыны ӧдъясько вал. Кин ке суйтӥм кырмиз кадь. Оло, кылчинэ малпаськыны косӥз. Ӝоген ньыльдон тырмоз, ялан палтури.

Пиосмуртлэн оген улон – беда! Венез ӝутыны секыт. «Кому за 30» клубе мынӥ. Кыл лытэм бере, бӧтьыртыны йӧндыриськом. Синйылтӥ огзэ. Мугорыз сезьыен тырмытэм мешок кадь ке но, ассэ дотово йӧно возе. Кылыз, эсьма, визылась шур кадь зыл-зыл. Ачим но кельыт вал кадь ӧвӧл ни, тупаломы, пӧй. Шампанской юытэк ӧйлась. Ӝыны ар пала дыдыкъёс выллем гурламы: кытчы вень, отчы сӥньыс. Со мон понна тырше, мон со понна кусме уг жаляськы. А как-жо, нырысетӥ кышное! Солы ке умой, мынам йыр урдэмын.

Нош одӥг пол кузь ньылпу выллем егит пи дӥнямы вуиз. Мон йырме чатыртӥсько, со някыртэ. Каланча но тӥни. Кышное шорамы учкыса, мыньпотэ гинэ. Та, шуэ, мынам пие. Осто-козма, шундыё куазен монэ ӵашйиз кадь. Малы ӧй тодылы? Пӧрасе но пиосмуртъёслы ӟудэмын вал, дыр. Соин, вылды, пиез пумысен ымаз ву ӟузиз.

Кушам нянез уг кушто, сое ньыло. Ӧм палэнтэ, мискинез, бордамы каримы. Егит дыръя кин уг янгыша? Вот, шайтан басьтон, пиосмурт йырам кышет ӧй-а кертты? Пимы уг дышетскы, уг ужа, омырез ӵыжаса ветлэ. Нош тыкемез ке потэ: вай созэ, вай тазэ. Кукъёссэ лэзьяса, чырты выламы пуке. Пыкылыны кутскисько, пӧрасе пиез палан: «Кылдэ шӧд, ымдэ ворса. Ачим сюдӥсько».

* * *

- Тон кышноосын ӟудэмед, юлтош, – вераськонэ итӥськиз Ладьмер нюню. – Мултэссэ куасамед, шӧдске. Кыедэз бугыръяса, будӥд бере, деликатнойзэ утчад, дыр. Аслам но со выллем мылкыды потаз. Лётчик мынэсьтым ӧз пӧрмы, но парашютист вал. Самолётысь тэтчон дыръя гадям кирос тырисько вал. Армиысь бертыкум ик, черке пыри, сюсьтыл пуктӥ. Тау, Инмаре, шуисько, сьӧлыко пидэ адӟонлэсь утид.

Автошколаын дышетскыса, шофёр луи. Интыяськи заводэ. Котькыӵе ужлэн аслаз чеберез вань. Пӧрме ке вольыт, сюлмын ыркыт. Одӥг ӵукна оброс азьын вӧсяськыны вунэтӥ, луоз. Дыртыку усьтыр-табыр дӥсяськиськод но «айда». Ширтӥ сьӧрлось городэ. Тодмотэм интыын трос пол юано, верано луэ. Отӥ-татӥ ветлон уно дырез быдтэ. Соин, вылды, ӝегай. Асьме городэ пырыку, урамысь тылъёс ӝуало вал ини. Кытӥ ке ӧвӧл, корка сэргысь адями потӥз но сюрес вамен выже. Азьзэ-берзэ уг учкы, пыд улзэ гинэ адӟе. Винаен кисьмам, лэся. Зӥби тормоз вылэ, машина юж-ж-ж! кыскыса, адями шоры мынэ. Рулез гинэ берыктӥ, юбоен чупаськытэк ӧйлась. Солэн пигонэз но ӧз вырӟы. Мон ке кышкай. Нош мон сое лёгасал ке… Син азям пуктӥ Натӥелэсь куректӥсь тусбуйзэ. О-о, иськавынъёс. Сюлмы ик шымырскиз. Эшшо «тэт-тэ» карись пиналъёсы бӧрдо кадь. Киыным шонтӥ но шуи аслым: та, пӧй, мынам профессие ӧвӧл. Ужтэк улон – асгынмон. Кема ӧвӧл огпалмыны. Кышноелэн ӵектэмезъя интыяськи цехазы – сантехник луи. Лултэм арбериослы но ву кулэ. Станок жургетэ, нош ву сое юзматэ. Пыдысь резина сапегъёс уг усьыло. Корт но вулэн кужымезлы уг чида, пумен сыноме. Воштытэк ӧвӧл. Нош вутэм цех – лултэм арбери. Трубаосыз воштоно, выльдоно, кышъяно луэ. Ӟар кезьыт-а, пӧсь гужем-а – пыдад резина сапегъёс. Тазалык кыляны кутскиз, пыдъёс юмекъяло. Кайгыронме кышноелы верано кожай.

Ужме воштон пумысен ымме усьтыса ӧй вуы, со монэ азьпалтӥз:

- Вуэз чылкытатон цехе аппаратчик, пе, кулэ. Ветлыса утча.

Во! мынам кышно. Сотэк мон пал тылобурдо сямен йыромысал. Улон, иськавынъёс, кышномурт бордысен кутске. Аппаратчиклэн ужез секыт ӧвӧл, но химиен герӟаськемын: кислота, глинозём, полиакриломит… Кабинетэ бадӟым аквариум пуктӥм. Кырсьлэсь висъям вуэн тырмытӥськом но отын чорыгъёс вордӥськом. Шабаш! Уло, уяло, мызь лэзё. Озьы бере, вулэн чылкытэз вылӥын. Бӧрысь шуре лэзиськом.

Ул но ужа вылэм. Но отчы-татчы кыстаськонъёс кутскизы. Кинлы тросгес пай сюроз, кин чебер алдаськыны быгатоз? Кивалтӥсь пӧлыпум возьматӥз ке, тон сое уд йырйы ни. Шутэтскон нуналъёс азьын рабочийёс станокъёссэс ӵыж-выль дыръяз кадь сузяса кельто. Нош вордӥськонэ соосты заводэ пырыны уг лэзё. Цехъёс, пе, пытсамын. Кык нунал ӵоже уноез станокъёс музон городэ кӧчизы. Кылемез зоро-кото инбам улын сисьме. Жургетӥсь цехъёс шал-шал бушесь. Вот тыныд выльдӥськон. Рабочийёс пӧсьвуаськем кадь лекесь. Уж ӧвӧл. Коть йырдэ пыд кар. Собыдӟа заводэз вузаськон интылы пӧрмытӥзы.

Шаугетон вакытэ ачим но ӧй шӧды «кочонэлэсь» пилеш кылемзэ. Быгылес картошка но тӥни. Мар карод? Котькин быгатэмезъя улэ. Ярам коть, машина басьтыны моӵмы сузиз. Ужтэк кылеме бере автостоянкае возьмаськисе интыяськи. Пенсиозь чидай. Озьы тӥни, вик-вак карыса но, калык радъя улыны дауртӥськом. Кышное уго перышта кадь, сотэк кемалась ини киосме гадь вылам тырысал. Вӧсяськемысь но ӧй дугды, черке ӵем ветлӥ. Оло, соин йыр поромонлэсь монэ Инмаре утиз.

 * * *

Пичи дыр эшъёс, куинь юлтошъёс, беризьёс улын пуко но ортчем аръёссэс син азязы пукто. Мар вал, со вал. Сюрло выллем толэзь но, соосты учыртыны тыршыса кадь, пурысь пилемъёс вискытӥ сайяськиз. Котыр улос чал-чал. Пуныос но, лэся, куинетӥ уйвӧтсэс адӟо.

- Лул сётэмын яратыны, кыл – вераськыны, нош визь – дышетскыны. Озьы бере, шӧген кузьытэз валаны кулэ, – Ондрей агай суйпосъёсыз лосыртымон назьыльскиз но выльысь бодыез вылэ пыкъяськиз. Тазьы пукыны кускызлы каньыл, лэся.

- Армия бере мон но тӥ сямен отӥ-татӥ лобаны ӧдъясько вал. Дуннеез адӟо, малпасько. Палэнын толэзь улыны чидасько ик, нош отӥяз – гырезь картошкаен кадь гуньдӥсько. Шоканы окыт. Гуртэ гинэ пырисько, гадь пушкын эркынак луэ. Гогые, дыр, музъем борды бурмемын.

Колхозэ ужаны интыяськи. Нырысь сётӥзы улдӥ-малдӥ «Беларусь». Мынэ, мынэ но дымбыр-йыг гуньдэ. Тол ӵоже гаражысь ӧй пота. Куштӥськем машинаосысь, тупась ёзъёс бичаса, «Беларусьме» сазнай. Номыр ӧвӧл кадь, тулыс ужъёслы вуттӥ. Арня пала бусыез котыръяй, берло нош ик ӵакмиз: коть ӵыжа сое, коть молотэн нажгаты, вужзэ выль уд кар ни. Пӧсекъямме шӧдыса, дыр, механик монэ буйгатӥз: «Чида, матысь дыре выль техника вуоз». Сётэм кылзэ тӧлъя-буръя ӧз лэзьы, висъязы ӵыж-выль «Беларусь».

Гуртын улӥськод бере, ог-огедлы юрттытэк ӧвӧл. Туннэ бускеледлы кидэ ӧд ке сёты, ӵуказе со тыныд мышсэ пуктоз. Озьы бере, баш на баш. Ваньмыз интыяз кадь, анай гинэ пу гырлызэ кокамысь уг дугды: ку, пе, кышно басьтод ини. Атай но заслонкаяз тэшкылля: тэ-тэостэк, шуэ, мӧзмыт. Нош мон, нылашен пумиськыса, асме нюлымтэ кунян кадь потӥсько. Кин выжые мынӥськем, ӧйтӧд. Анай ялан нянь шумессэ котэ, гуртысь нылъёсыз ушъямысь уг дугды. Акыльтэме бере огпол шуи: «Сонгро Оксиньяез ваёмы шат?» Ӧз-а лӧпты анае: солэн, пе, кияз уж пӧзе. Тӥни вот, кулэтэм дыръя ымы ваяк усьтӥське, нош кулэ ке – тунгонамын. Мар адями мон таӵе? Пересьёсы ярашон сярысь кылпум поттыло ини. Нош мынам чыртыям сӥес чуртнаме уг поты. Инмар утиз-а, мар-а. Гуртэ ивор вӧлмиз: Оксиньяез, пе, апаез нылпизэ утьыны сьӧраз нуэм. Татын но мон янгыш. «Кема гызмыльтӥськод, – пыдзэ лёгыса ик сизьдэ анай. – Ку меда йӧно пиосмурт луод?»

Огнунал гуртэ секыт ивор кылӥськиз. Артэ колхозысь эше, пе, машина улэ шедем. Ми армиын но соин ӵош вал. Эх, Васи, земляке! Одӥг танкын вал: мон – водитель, тон – наводчик. Котёлокысь одӥг пуньыен сиським. Одӥг кружкаысь юим.

Палатае пырыкум, Вася синъёссэ усьтӥз. Монэ тодмаса, мыньпотыны тырше. Уг пӧрмы. Синкылиосыз васько. Пыдъёсыз номыре уг шӧдо. Кускыз чигыса, сюрлы вимез, пе, нелькиськем. Алвылам кизэ понӥз но шуиз:

- Ондӥ, мон оло улӥсь, оло… Туж курисько, семьяме чакла. Лида, оло, мукетсэ шедьтоз, пиме эн кушты вал, эскеры.

Васяен люкиськеммы бере быдэс толэзь уйжомыса кадь улӥ. Сиён но уг мыны, уж но уг пӧрмы. Нап бус пӧлы кадь йыроми. Огпалмыны кутскемме шӧдыса, атай пельпумам мырӟиз но шуиз: «Тырмоз усыкмыса улыны, ойдо кенлы».

Нош Лида пуртэн вандэм кадь пумит: уг мыны но тӥни. Кенешеммес кылыса, вылды, Васялэн мумиз-бубиз но вераськонамы итӥськизы.

- Бусы шорысь пипу выллем даурдэ оген уд ортчыты. Адямилы сюлэм шунтӥсь кулэ, – мумизы лушкемак бубизы шоры учкиз. Соиз йырыныз мыкыръя: бен, пе, кен, юась вань дыръя соглаш кариськы. Ондрей умой адями. Васяенымы но эшъяськиз.

- Нош ултӥязы ке, вера, номыр шоры уг учкы – дорам ваё, – бубизы но мылкыдзэ усьтоно кожаз. – Табере кык семьялы кен луод.

Кутэтысь нуныез адӟыса, анае оброс азьын кирос кариз но ӝогак вӧен колды нянь поттӥз. Та корка пыремъёслы, шуэ, Инмар тазалык, шудзэ мед сётоз. Чарка виназэ но нырысь кен луоноезлы удӥз. Огкылысь улыны, пе, мед кылдоз – анай шумпотэмзэ уг ваты.

Со вал кышнояськеме но, нуны сюанэ но. Олёшлэсь атай нимтулзэ ӧй вошты, Васильевичен ветлӥз.

Улӥськом-вылӥськом, ужаськом-тыршиськом, одӥг интыямы ӧм лёгаське. Веме ортчытыса, корка но ӝутӥмы. Гуртын пичи дырысен ог-огдэ тодӥськод. Шулты гинэ, соку ик юрттыны вуозы. Берло дыре ӟеч сям вуныны ӧдъяз. Котькудӥз уго ас понназгес улыны тырше.

Шур сьӧр Миколлэн тазалыкез лябӟем, со интые монэ комбайнёре пуктӥзы. Ӵапак аран вакыт. Нош мон, шуйно, машиналэн жургетэмезлы дышисько на. Со аре ӵошатсконын, пумысеныз учкыса, нырысетӥез вал. Кыкетӥяз но вылӥе ӧй тубы, шоро-куспо радэ кыли. Корт но адями шунытэз шӧдэ, лэся. Сузясько, миськисько, горючиен люктасько – «кизьнылытэк» ужа, «Беларусе» кадь ик. Вот куинетӥ араз ю тысь кутсанын нырысетӥ радэ потӥ. Ӵошатсконын вормеме понна коляскаен мотоцикл кузьмазы. О-о, шумпотонлэн пумыз ӧй вал. Ведь кисыысь уд поттӥськы, тынад песьтэрад ваньбур лыктэ. Олёш пимы техникаен кушлаське бере, солэн шумпотонэз аслэсьтыз вылӥын вал. Йырчукин но ветлысал, дыр. Валтыны дышыса, нырысь ик анайзэ, Лидаез, губияны нуллӥз. Песяен песятайзэ но ӧз вунэты, райцентре ворттылытӥз. Ӵапак пенсия басьтыны кулэ кагазъёс утчало вал.

Олёш пудо першалэ дышетскыны кошкем бере коркан шыпыт луиз. Ёк-макарёк, анай нош ик ыльняньзэ ныркыны ӧдъяз: ку, пе, мунёмы луоз. Лида анайлэн пеляз мар ке сипыртӥз но соизлэн синъёсыз ик шудыны кутскизы. «Ӟеч иворед Инмарлэн пеляз мед вуысал», – мыньпотэ анай.

Огыр-бугыр вакытъёсы колхозмы пумен бытмиз. Умой сельхозтехника куашказ, питран вылын сылӥсьёсыз сисьмизы. Бусыос пӧрмизы такыр интылы. Вал, парсь, скал, ыж гидъёс бушазы. Табере отын йӧнтэм тӧл кузёяське.

Огӵукна, сиськон азьын, атай кенеш ортчытоно кариськиз. Тыро ӝӧк сьӧрын вераськеммы иназ мыноз кожаз, дыр. Пуньызэ ӝутӥз: чалмытске, пе. Пичи Натӥмы но, нылмы, валаса сямен, сак кариськиз. Песятаез шоры дол учке. Чечым сиён возьма, лэся, пересьёсын эркиямын уго.

- Улон азьпалэз тодӥсь ӧвӧл, нош юртъерез утёно, бакчаын но йӧны медаз буды. Одӥг ӵектонэ: асьмелы вал басьтоно. Ньыль пыдо эшлы бензин кулэ ӧвӧл. Пызь, турын одӥг валлы шедьтомы, гуртын со нырысетӥ ужась.

Ветылэз, парсез вузаса, со аре ик вал басьтӥмы. Атай дӧдьы, уробо лэсьтыса вуиз на… Ачим ар пала куштӥськем «Беларусьме» сазнай. Кин тодэ, оло, соляркалы но уксё шедьтом ай. Мылкыд гинэ медаз куашка. Вал ке вань – ужазинлык вань. Куинь ар пала пыд выламы султыны дауртӥмы. Олёш пимы уно юрттӥз. Со ик пудо эмъясь, со ик гырись, со ик кивалтӥсь. Мынам визь гурт пумозь сяна ӧз тырмы ни. Пересьми. Табере пие скалъёсын выре – фермер. Сузэрезлы зоотехник луыны дэмла.

Улон мынэ: кин уг вуы со сьӧры, огназ кыле, юыны чӧлске. Бен, куд-огез кырыж учкыло ик: кулакъёс, шуо. Ми ведь суй-пыдмес ӧм юске, пичилэсь бадӟым каримы.

Озьы тӥни, эшъёс. Ортчиз пинал даур – «ӟеч лу» ӧз шуы, вуиз пересьмон вакыт – ӧз ӟечъяськы. Нош дауръем кыз сиресь улвайёсыныз кужмо.

Ӟардонэз ивортыса, атасъёс кырӟам бере Лида ӧз ни чида, беризьёс доры потӥз: «Осто, бырод та казакпиосын, – киоссэ ик вӧлъяз. – Пичи но чырым ӧд каре-а?»

Эшъёс-юлтошъёс мынь-потӥзы.

* * *

Та вал соослэн берпуметӥ пумиськемзы. Пиос но будо но, пиос но кошко но…

Виталий Агбаев

Пыриз – пушкам, позыръяськыса -  но, кескич кенӟали сямен, турттэ ни вал, быжзэ кугӟатыса, пегӟыны – ӧз пӧрмы: гутё укыр сюбег но пӧсь, ӵогаськемын. Пушказ интыез ӧжыт. Кенӟали быжлы но усьыны инты ӧвӧл.

Педлон гудыръя, котькуд палтӥз куараос ыбылӥсько: гур-гур, дунне зуркам кадь. Клуб гутёын немец электро-гуру шудэ: dr. Motte – «Love Parade» шулдыръяськонъёслэн атайзы. Яратон крезьгур. Лулэз сэзъя, мугорез зуркатэ – нош пушкам яратон ачиз мога, ачиз вордӥське; о, Молох! – кытчы пегӟод солэсь: усе, быгыртэ пыдпыдэстэ, мертче пыдлояд, кытчы ке сюлэм-кӧт шуонад… Ас дыбыртӥсь гурзэ мытыса,  куара-лангазэ поттыса, кечат-вамат гожма, пушкам суреда но пужыос пуктылэ.

Одӥг кузь пумтэм-йылтэм гож ӟикыр-ӟукыр, кырыжак, тулкымъяськыса суредаське но гыре пуш анаосме. Кенӟали сюресъёсын дыртэ мур ватосъёсты люканы, нюлышъяса, ческытсэ бичаса кошке но, нош но нош – одӥг лёгем пытьыостӥ выдэ. Выльысь но выльысь! Дыртӥсь трактор кадь, отӥ но татӥ, сюбег межаостӥ. Дыртоно, дыртоно, нокыӵе быжъёслэсь кышкано ӧвӧл! Яратонлэн ӧвӧл быжъёсыз. Нош кенӟалилы пӧрмем яратонлэн быжъёсыз луо ке, номыр кышканэз: одӥгез быжез усёз – мукетыз будоз.

Кенӟалиез но маин ке сюдоно ук.

* * *

- Ыши! Ыши! – кесяське кенӟали но, куараезлэн арамаосаз йыромыса, йырси чузыретъёсын позыръяське.

- Ыши! – кужмыз ӧвӧл ини, озьы ке но каллен выре на…  Сюрс буртчин сиос, сое шобыртыса, котыраз бинясько, бичатыса кекато. Йырси-вотэс кузь но кульчоё, кытӥтӥз ке вольыт, гылыт, сатин чузырето, кытӥтӥз ке воляе лэземын, нап, шукырес, мугор вылын зарезь тулкымъёс кадь валиське.

Нош собере шуак небӟиз.

- Умой мыным татын… – вазиз, каллен шокаса, ватскыса салкым кульчоосы.

* * *

Letörték, leszakítják a farkát (мадьяр кылысь).

- Туж ӝож, куке быждэ кесё, – шуиз кенӟали кӧня ке мӧзмыт.

* * *

- Сиеме потэ! Сиеме потэ! Сиеме потэ! – утыр выльысь кеськиз кенӟали но чульк! пыриз гутё пасе.

Кырын нош ик дыбыртэ, йыган-гур кужымъёс омырез сэзъяло, нош пушкын – пушкын номыр но уг воштӥськы. Озьы ик гылӟыса суредасько кенӟали пытьыос, озьы ик, куас выллем нискылтыса, сюбег дырдытӥ ваське кенӟали быж. Кенӟали ныр гутё гыркъёсы мериське: бӧрсьысь бӧрсьы изъёс вискытӥ виясь чырс вуосты сюпсьыса ваське.

- Ческыт… – шыпыртэ кенӟали но кит-кит серекъя. – Тау… Кӧты тыриз.

Удмуртлэн идеальной ӵукнаез

Лякиё-лякиё пэчворк шобретсэ палэнтыса, Ӟанка валес вылысьтыз тэтчиз. Радиоез зӥбиз: Лади Светӥен ӵук аэробика кутскиз ни. Векчи суйёссэ вылӥе нуйтыса, Ӟанка вань мугорыныз усьтэм балкон пала кыстӥськиз. Отысь шырыт пиштӥз шунды. Вож куаръёслэн чильтэрзы пыр сӥсъяськыса, со чебер пужыен пуксиз патерлэн паркет вылаз. Йырсизэ позыртыса, Ӟанка йыртышказ культо керттӥз. Йырсиез нылашлэн мертчан кадь, син вылаз усе.

- Одӥг, кык, куинь, ньыль!

Векчи куско веськрес ныл! – кесяське радио пыр Лади Светӥ. Ӟанка куссэ выртэ, азьлань-берлань мыкырске. Борддор вылын Джим Моррисон тус Петя Пушкин кырмыштыса учке: гольык гадь вылаз удмурт ныл нимъёс гожъямын: Италмас, Дыдык, Эбга, Инӟы… Вӧзаз мукет бордсуред ошемын: Мэрилин Монро мудор тус Марина Карпова. Удмурт календарьын нош пусъемын: среда. Иське, туннэ кафеын мильым-пукон.

Ӟанка дэрем кана азьын бергаз. «Чупалэ монэ ӝоггес!» гожтэмен футболка дӥсяз, джинсы пушкы зымиз. Сумкаен шонаськыса, васькиз ураме. Почта ящикысь выль буёл зыно «Удмурт дунне» газетэз поттӥз, «Тюрагай» бистролэн огаз ӝӧк сьӧраз пуксиз, зырет кадь нап шукыё капуччино ӟузиз. Газет мадиз «Чеберай» конкурсын вормем Клаудия Захваткиналэн удмурт ёросъёстӥ турнеез сярысь. Алнаш детдомын удмурт пиналъёсын «Покчи кылчи» шудонэн шудэм, Вавожын Василий Смирнов комбайнёрлы юрттӥськем, Ярын бесерман гуртын клип лэсьтонэ пыриськем. Озьыен, миссизэ быдэсъя.

Ноутбуксэ поттыса, Ӟанка дунне иворъёсты учкиз на. Финъёслэн Юха Йокела драматургзы берыктӥсьёсты утча, кыӵе ке театр фестиваль радъя. Ммм, «Удмуртлык» интернет-группае куштоно. Кӧня ке венгер модая блогын копаськыса, пурысь эшсэ пытсаз.

Ӵапак телефон жингыртӥз. Ондӥ.

- Алло, мусое! Мон сайкай ни. Пумиськом-а? Тон кытын?

- Вырӟи ни. Ойдо центрын пумиськом. Мыным туннэ Советская,1-ын интервью басьтоно. Ваньми ке, жингырто.

- Я соку, чуп.

Корт гумы борды керттэм великсэ мозмытыса, Ӟанка Пушкинской урам кузя ширтӥз…

Алёна Петрова – творческой адями: маин гинэ уг выры! Нош мон понна со нырысь ик – тунсыко гожъяськись, лыдӟисьсэ кылсуред дуннеяз пыртыны быгатӥсь мурт. 2009-тӥ арын, Дарали Лели кушем ним басьтыса, пичиесь веросъёсын «Гур сьӧрысь суредъёс» аспӧртэмлыко бичетсэ поттӥз. Кӧня пол меда кутскыса, та книгаез лыдӟылӥ ини мон!

Бичетлэн геройёсыз – нылъёс но кышномуртъёс. Соослэн сюлэмшугъяськонъёссы герӟаськемын синмаськонэн, яратоно муртсэс утчанэн-возьманэн. Вужмисьтэм тема выль сямен усьтэмын. Выль удмурт кылъёс пыр.

- Малпанъёсме кужмогес, мылкыдъёсме шонергес возьматыны кылъёс шедьымтэен, лэся, «Гур сьӧрысь суредъёс» бичетам выль, литературае та дырозь пыӵамтэ кылъёс пыртылӥ. Шуом, инар – духовной, пелепон – наушник, пырик – все равно. Мон туж яратӥсько выль ческыт кылъёсты. Соосты утчаны, шедьтыны но уже кутыны, – малпанзэ ӧръя Дарали Лели.

Блогъёсаз со, эрико амалъя ӟучо-удмурто гожъяськыса, выль кыл образъёсын шудэ. Кылмылэн чылкытлыкез понна сюлмаськись муртъёс Интернетын кыл вератэк ӧз кельтэ со пумысен. Но сыӵе экспериментъёстэк выль кылъёс, выль мылкыдъёс-сюжетъёс вордскозы шат? Тодмо литературовед Юрий Лотман «Беседы о русской культуре» книгаяз маде: Александр Пушкин дурбасьтӥз вераськон кылазы укыр трос галлицизмъёс (француз кылысь заимствованиос) пыртӥсь светской дамаослы. Со вие ик сатирикъёс та понна соосты серем карылӥзы.

«Гур сьӧрысь суредъёс» бичетын выль кылъёс текстэ мур пыӵамын. Кызьы ке кырӟанысь одӥг кылзэ но уд кушты, озьы ик соос но ас интыязы сыло. Зэмзэ ке верано, та гожтосъёсты веросъёс гинэ шуыны уг тупа кадь. Со – пичи зарисовкаос но новеллаос. Новелла – со прозаысь одӥгез тужгес но секытэз жанр. Солэн сюжетэз лэчыт, нош йылпумъянэз лыдӟись понна котьку шӧдтэк шорысь, гуньдытӥсь. Йылпумъян гинэ валэктэ новеллалэсь ватэм логиказэ, малпанзэ. Кылсярысь, та ласянь пусйыны луоз Дарали Лелилэсь «Зын» новеллазэ: отысь герой ялан утча ныраз пырись пыкмем зынлэсь кылдэм мугзэ. Нош зын ачиз бордысь потэ вылэм. Новелла радэ пыртыны луэ «Бабасыр», «Юысалды-а тӥ бражка?», «Удмурт колӟо» гожъямъёссэ но. Меӵак вераны луоз: Даралилэн прозаез дунневыл литератураен оградын сылэ. Солэн гожъяськон стилез, мон малпамъя, модерн ӧрлы тупа.

Бичет усьтӥське тужгес усто но кужмо «Лыздари» веросэн. Бичет пумысь пичи кыллюкамын валэктэмын: лыздари – со медный купорос. Гожтэмезъя со, малпасько, матын туала литератураын кылдэм «поток сознания» стильлы. Та веросын сюжет валтӥсь интыын ӧвӧл, отын суредаське яратӥсь муртлэн мылкыдыз. Герой-мадёсчи аслэсьтыз гажано нылзэ, Лыздариез, туж вылӥе пуктэ. Нылаш – суредаськись, вуылэмын Европае, кылзэ Дебюсси француз композиторез. Ачиз но героиня модерн пуштросо суредъёс кылдытэ. Куд-ог эскерисьёс пусъё: модернизм ӧрын гожъяськисьёс текстъёсазы ярато пыртылыны крезьгуръёсты но суредъёсты.

Огъя верано ке, та бичетысь троссэ произведениосты огазея кунгож сьӧрен герӟаськем тема: уноез геройёс – Европаын улӥсьёс, действие ортче Хельсинкиын, Ибицаын, яке, шуом, одӥгезлэн героинялэн льӧль малпанэз кыстӥське Италие. Запад шоры учкон, соя кариськон мылкыд котькуд веросын шӧдскымон луэ.

Веросъёсаз автор бадӟым саклык висъя мугорлы. Учкомы нимъёссэс ик: «Ӝуш», «Сюлэмлэн шӧмыз», «Алача виштыос» (вирен герӟаськем тема). Таосын артэ султэ пиосмуртъёслэсь дуннезэс возьматӥсь тема («Удмурт колӟо», «Ческыт шунянь пиосы»). Веросъёсын ныл но пи куспын котьку но кылдэ ортчонтэм гож, вис. Нылмуртлэн образэз отын кужмогес, улэпгес пӧрмемын – со котьку сямен ворме пиосмуртэз. Серекъян, ирония пыр но. Но со вие ик автор ӝутэ вӧсь карись темаосты но: кылсярысь, удмуртъёслэсь палдурес менталитетсэс.

Удмурт сям нырысь ик возьматӥське нылкышно характер, солэн пиосмурт шоры учконэз пыр. Басьтом «Чайник» веросэз. Татысь героиня ассэ ултӥяменыз, возьдаськись сямо, оскись, палэнысь дасьсэ гинэ витись луэменыз сэрен огназ кыле. Мукетаз веросын – «Удмурт колӟоын» – мадись мурт серекъя кышномуртэз, кудӥзлы карт гинэ мед луысал: сое ас тодэмедъя утялтыны, сюдыны-вордыны гинэ мед кылдоз. Трос вераськисьтэм ке – соку ини воксё йыр поромон идеал. Меӵак вераса, удмурт нылкышнолэн малпанъёсыз шоры автор серекъяса учке. Нош «Ӟазег лобон сюрес» веросын-антиутопиын шунянь сямо пиос серекъямын. Кылсярысь, валтӥсь герой – Адями-Уром – туж харизматичной мурт, пушкыз солэн буш, яратыны но со уг быгаты. Мукетыз егит пияш – Кечпи – «удмурт батыр» луон но Эбгаез синмаськытон понна усыкмытӥсь суретъёсын выре. Соин сэрен быронэ вуэ.

«Ӟазег лобон сюрес» – туж аспӧртэм, тунсыко верос. Удмурт колоритэн, массовой культураез кылдытон малпанэн-мылкыдэн герӟаськемын. Кыӵе меда удмурт уй клуб, отын улон-вылон? Кызьы меда гламур культура удмурт шӧмо но менталитето луыны быгатэ? Автор вероссэ антиутопия шуэм. Малы меда? Удмуртъёслэн ноку но сыӵе массовой культуразы уз луы шат? Но ведь зэмало ни кадь асьмелы осконтэм потӥсь малпанъёс! Асьмелэн вань ни удмурт шӧмо, Европаын кадь уровенен кырӟасьёсмы, вань удмурт клуб тусовка, егит удмурт элитамы – таид вылӥ культураез но массовой карыны быгатоз…

«Ӟазег лобон сюрес» веросын та ваньмыз кемалась кылдэмын ни кадь, нош табере ини куашкан калэ вуэм. Озьы ик луыны кулэ – котьмалэн но пумыз вань. Вылезлы сюрес сётон понна…

Дарали Лелилэн нырысетӥ книгаезлы рецензия бордын гинэ выриськомы ай, нош автор со вискын роман гожтыса вуэм ини. Тае шараяз со вераськонмылэн пумаз. Поттыны гинэ кулэ на, пе, сое книгаен. Ма бен, чидатэк витёмы!

Лариса ДМИТРИЕВА,

Историяя, кылъя но литературая

Удмурт институтысь аспирант.

* * *

Шуныт йӧл, атас мотор,

Лыз инбам, ненег гуждор,

Кӧльыостэк ветлонни -

Гуртысь ӵук улонни.

Шимес будильник, шуш куара,

Кофе пӧсь, ӝикыт дэра,

Котыр сигнализация -

Эх… цивилизация!

* * *

Коркалэн липет йылаз,

Мур колодчаын,

Марьялэн корт ведраяз,

Кезьыт ву пыдсын,

Шуныт йӧлын кружкаяд,

Юн кенер сьӧрын,

Помидорен убояд,

Пересь книгаын,

Чонарилэн вотэсаз,

Вож турын пушкын,

Адямилэн вӧтъёсаз,

Пилемъёс вискын.

Кытын улыны кылдоз?

Кыӵе интыын?

Кытчы улонэ вуттоз?

Ӧвӧл верамын.

* * *

Секыт нунал. Вуэ уй.

Адямиос изё… 

Пеймыт уй. Тӧдьы лымы.

Уйвӧтъёс гылӟо. 

Чиль толэзь. Витьтэк дас кык.

Ӝоген уйшор. 

Лушкем дыр. Ӵаж кезьытлэсь

куалекъя борддор. 

Кезьыт уй. Шуныт койка.

Тӧлпери ньылэ дорез. 

Уйшор-уй. Борддорысь час

азьланьтэ дырез. 

Дыр кошке. Вордске ӟардон.

Сайкиське мугор. 

Каллен, дыртытэк

сэрттӥське бугор…

* * *

Одӥгзэ яратӥ,

Мукетсэ гажай,

Толлозэ вунэтӥ,

Туннэзэ алдай.

Одӥгез ӧз яраты,

Мукетыз кошкиз,

Толлоез ӧз кельшыты,

Туннэез ышиз.

* * *

Пушъе тулыс азвесь сяська,

Яратыса чиля гужем,

Сӥзьыл каллен бездэ ялан,

Нош толалтэ кынтэ музъем.

Озьы луэ арысь аре:

Тулыс, гужем, сӥзьыл но тол…

Азвесь сяська чида, ӝутске.

Арысь аре жалясь ӧвӧл.

Вуоз солэн кулон дырыз,

Пушказ ватоз азвесь чильзэ;

Кужмыз быроз одӥг тулыс,

Сьӧраз нуоз яратонзэ.

* * *

Кыдёкысен тӧдьы адске

Бусы шорысь кызьпуэ,

Кыдёкысен мусо адске

Вордскем Пуро дуннее.

Лёгай, лёгай кузь сюресэз,

Лёгаса ӧй воляты.

Корай, корай сьӧд нюлэсэз,

Кораса ӧй шераты.

Пичи гинэ мугоры но,

Ӵыжыт, чебер бамъёсы.

Э, мемие, э, дядие,

Кудды шудтэм вордӥды?

Кам вадьсытӥ сюбег сюрес,

Отӥ потэ ветлэме.

Туж мӧзмыкум, куректыкум

Потэ гуртэ бертэме.

* * *

Котькуд зарни сӥзьылэз

Пумитасько вал мон гуртам,

Гуртам – аслам вуж школаям,

Гуртам – аслам Выль ульчаям.

Валады ни, дыр, али

Гуртам ӧвӧл мон, кыдёкын -

Зарни сӥзьыл мукет татын -

Сюлмы гуртэ шат кылемын?

* * *

- Мар меда излэсь чурыт?

- Анайлэн сюлмыз.

- Мар меда гонлэсь небыт?

- Анайлэн сюлмыз.

Бен анай кулэ дыръяз

Ноку уг усьы, чида.

Нылпизэ кошкем бераз

Весяк со дораз возьма.

Нылпизэ ӵош вордыкуз,

Сюлэмыз солэн небыт.

Нылпизэ нош возьмакуз,

Сюлэм ӧсэз туж паськыт.

* * *

Поезд кошке, зол дыбыртэ…

Кытчы со вамышъя?

Азьлань дыртэ гуртъёс вӧзтӥ

Урод, кырсь улонъя.

Поезд кошке, нош укнотӥз

Бызё сьӧд нюлэсъёс,

Кылё мышлань саптам вуос,

Азьлань – выль сюресъёс.

Нош кин солы ӟеч ужъёсаз

Юрттэ сэзь вырыны?

Зол адями пуке пушказ,

Тырше весь ужаны.

Поезд кошке, зол дыбыртэ,

Ноку уз дугдытскы.

Ойдо отчы пуксём, эше,

Юрттом машинистлы!

* * *

Тодам лыкто гужем ӝытъёс.

Тусыд но кадь адскиз.

Нош йырысьтым со малпанъёс

Малы уг тэляло? Пуксиз,

Пуксиз суред но син азям:

Сылӥськомы бусы шорын,

Тон ӟыгыртӥд монэ, пелям

Верад шуныт кылъёс. Кытын,

Кытын али со кусыпъёс?

Малы тонэ ӧй лэзь сюлмам?

Йырам кылдо валэктонъёс:

Янгыш кузё вал улонам.

Тодӥськомы: 1760-тӥ аръёсы печате потӥз кык удмурт кылбур. Та дырозь номыр сыӵеез ӧй вал. на Вениамин Пуцек-Григорович тодосчилэн Кузонын дышетон амалысьтыз вордӥськизы соос. Поляк но украин выжыысь потэм тодосчи Волга котырысь ӟуч луисьтэм пиналъёсты дышетӥз ас кылынызы чебер вераськыны, лыдӟиськыны но гожъяськыны. Озьы ӟуч просветительстволэн тулкымъёсыз вылын 18-тӥ даурын кылдӥзы Екатерина эксэез данъян, солы тау карон, Инмарлэн нимыныз ӟеч улон сӥзён мылкыдо кылбур чуръёс.

Удмурт улонэз суредась кылбуранлэн кылдэмез но со выллемгес ик. Шаркан ёросысь Сосновка черкогуртысь но со котырысь удмурт пиналъёсты дышетӥсь Григорий Егорович Верещагинлы малпаськытэк ӧз луы: мар кароно, школае лыктэм пияшъёслы но нылашъёслы солэн верамез валамонгес мед луоз, улон радзэс умоятыны мылкыдзы мед кылдоз шуыса? «Ас кылынызы малпаськыны, ас котырысьтызы дуннеез-куазез эскерыны, тодыны-валаны дышетоно!» – сактӥз дышетӥсь. Анай-атайёссылэсь юалляськыса, пиналъёс дышетӥсьсылы вуттыны кутскизы мадёсъёсты, легендаосты, кырӟанъёсты но пӧртэм визьмо веранъёсты. Отысен визылаз нырысетӥ удмурт тодосчилэн но писательлэн чеберлыко гожъяськонэз. Озьы кутскиз зэмос удмурт литературалэн историез.

Россиын 1917-тӥ арын ортчем революция чутрак воштӥз калыкъёслэсь улонзэс. Вал дауръёс ӵоже кылдэм ӟеч сямъёсты куашкатон но. Номырин ӵошатонтэм ӟеч палыз но: удмуртъёслэн улоназы эркынак пырыны кутскиз литература. Нош со ини ортчем дауръёсын но, быдэс дуннеен но герӟаськыса улон сюрес. Удмуртъёслэн азьветлӥсьёссы гижысь-пиньысь басьтӥськизы калыкез дышетон борды. Та удысын бадӟым инты басьтэ чеберлыко литература. Юнме гинэ-а Трофим Борисов – Удмурт автономиез кылдытонэ, Граждан оже, Совето властез юнматонэ выем адями – огдыре ик басьтӥське Алабгоысь удмурт дышетӥсьёсты дасясь семинариен кивалтыны, соку гинэ кылдэм «Гудыри» газетлэсь ужзэ радъя, уг вунэты удмурт литературалэн азьлапал сюресэз сярысь но. Газетлэн редакцияз соос, Кузебай Гердэн кариськыса, усьто литературая студия. Уно муртэ гожъяськыны дышетӥзы отын. Соос пӧлысь тужгес но тодмо луизы Даниил Майоров но Иван Дядюков.

Борисовлэн кылдытэм семинарияз но литературая кружок усьтӥськиз. Соин кивалтӥз мӧйы писатель Михаил Ильин. Гожъяськон удысын нырысетӥ вамышъёссэс мукетъёсыныз ӵош татын лэсьтӥзы вуоно классикъёс – Григорий Медведев, Михаил Коновалов, Филипп Кедров, Игнатий Гаврилов… Соос пӧлын ик вал Михаил Коноваловлэн апаез – Екатерина Коновалова. Бератаз со, Ленинградысь Герцен нимо институтэз быдтыса, берытскиз азьло дышетскем интыяз – семинарие. Табере со Можга каре выжтэмын вал ини. Нимаськиз но со нырысь педтехникум, собере педучилище, нош туннэ ке со – педколледж. Уно аръёс Екатерина Алексеевна кивалтӥз татын литературая кружокен. Ачим но мон гожъяськонлэсь кудӟытӥсь шӧмзэ 1950-тӥ аръёсы валай, отчы ветлыса. Гожъяськисьёс гинэ ӧз потэ Коноваловалэн ки улысьтыз – суредасьёс но, артистъёс но, инженеръёс-изобретательёс но, огкылын вераса, улон шоры аспӧртэм синмын учкыны дышемъёс. Монэн ӵош со доры ветлӥзы, кылсярысь, вуоно калык писатель Герман Ходырев, вуоно калык суредась Семён Виноградов, литературая вуоно туж лэчыт синмо критик Алексей Ермолаев. Пӧсесь на вал вуоно писательлэн Михаил Покчи-Петровлэн пытьыосыз. Кружоке ветлӥсьёс потто вал киын гожтэм «Будон» альманах.

Милесьтым азьло люкам номерзэ басьтыса, одӥг ӝыт мон педкабинетэ пукси. Ки улам сюриз Миша Петровлэн веросэз. Кабинетын тросаз калык – дышетскисьёс урокъёслы дасясько. Шып улоно. Нош мон нокызьы уг быгатӥськы асме вормыны – серекъяме пушкысьтым пуштыса потэ. Сокем маскара гожтэмын верос.

Педучилищеез йылпумъяса, Петров пыриз Ижкарысь пединститутэ. Татын со кема ик дышетскыса ӧз вутты – Москвае кошкиз, театральной институтэ. Нош со куспын но пединституын со хорен но, литкружокен но кивалтыса вуиз.

Удмурт пединститутын уно аръёс ӵоже ужаз литературая кружок Даниил Александрович Яшин кивалтэм улсын. Со дорын бурдъёссэс юнматӥзы, кылсярысь, Людмила Кутянова, Татьяна Чернова, Олег Четкарев, Анатолий Григорьев но музон тодмо кылбурчиосмы, прозаикъёсмы но драматургъёсмы.

Ӟеч емышъёс сётӥзы куд-ог ёросъёсысь, школаосысь литогазеяськонъёс. Тодмо луиз, кылсярысь, Никвлад Самсоновлэн кылдытэм но кивалтэм «Пурга кизилиос» студиез.

* * *

Удмурт кун университетысь удмурт кылосбур (филология) факультетын «Вуюись» студиез берло аръёсы кӧня ке ар валтӥз Татьяна Зайцева. Отын будэм куд-ог авторъёслэн сӥс пыртӥ поттэм кылбуръёссы нимаз книгаосын но «Ӟечбур!» газетлэн нимысьтыз кылдытэм бичет серияз печатласькизы. Аслэсьтыз нимзэ студия юнматӥз, отчы ветлӥсьёслэсь гожъямъёссэс «Вуюись» книга бичетэ огазеяса но.

Берло аръёссэ «Вуюись» бус пӧлы ышылӥзгес. Соин, лэся, «Вуюись» выльысь усьтэ ӧсъёссэ шуыса ялонлы студентъёс туж ик ӟырдыт ӧз вазиське. Озьы ке но таяз дышетскон аре студия кык пол люкалляз ни кунооссэ. Нырысетӥяз пумиськон ортчытӥм тодмо удмурт журналистэн Елена Миннигараеваен – туж тунсыко «Мумы» повестьлэн но «Мон – улӥсько!» кылбур бичетлэн авторенызы. Авторлэн гожъяськон сюресэ вуттэм улонэз сярысь сяна, вераськон мынӥз кык книгаяз ик аспӧртэмлыко дунне валанэз но кылсуред кылдытон амалъёсыз пумысен.

Кыкетӥяз пумиським син азе яркытак потэм кылбурчиен, прозаикен, «Узы-боры» удмурт кинолэн сценаристэныз но режиссёреныз Дарали Лелиен (Елена Петроваен). Вераськонэ пыриськизы Виктор Шибанов, Алексей Арзамазов тодосчиос но кылбурчиос, Лариса Дмитриева аспирант. Куномы мылысь-кыдысь мадиз нырысетӥ кинофильм бордын ужамзы, удмурт кылын, егитъёслэн кужыменызы выль кинофильмъёс кылдытон сярысь. Уно юанъёс вал. Кылсярысь, кызьы кылдӥз веросъёсын нырысетӥ книгаысьтыз («Гур сьӧрысь суредъёс») соиз я таиз гожтосэз. Тросаз отын нокыӵе учырез ӧвӧл кадь, сюжет чуртнаське геройлэн яке мадись муртлэн мылкыдъёсаз, малпаськон радаз. Автор эркын пылаське удмурт кыл пушкын, кылъёсын шудэ, соосыз озьы яке тазьы «позыръя», выль кылъёс кылдытэ. Со чотын но азинске сюжет, мылкыд-малпан нюжа.

* * *

Пумиськонъёсамы малпаськом азьланяз но бадӟым саклык висъяны кылзӥсьёслэн асьсэлэн ваем гожтосъёссылы.

Гожъямъёсазы – асьсэлэн дуннеез валамзы-шӧдэмзы, шумпотонъёссы но сюлэмшугъёссы, кылсуред кылдытыны тыршемзы-быгатэмзы. Умой соиз: улонэз соос ӟечлык мертэтэн мертало. Суредан дуннезы кылдэ асьсэлэн адӟемзы, кылэмзы, шӧдэмзы бордысь.

Кӧня ке кылбуръёсысь гинэ но шӧдӥсько ини котькуд гожъясьмылэн аспӧртэмгес стилез, кылсуред кылдытон амалъёсыз. Уже кутэмын эркын кылбур формаос но, огдышем силлаботоника но, рифмаосын но, рифмаостэк но гожъяськон амалъёс, строфаослы люкылыса но, люкылытэк но гожтэмъёс.

Нимысьтыз пусъем потэ М. Векшиналэсь «Пушъе тулыс азвесь сяська…» кылбурзэ. Отын суредамын чебер, мусо, азвесь сяськалэн, яратонзэ пушказ гинэ возьыса, пумен бездэмез. Быдэс кылбур, укшатонлы (метафоралы) пӧрмеменыз, мур малпаськон-мылкыд кылдытэ. Со чотын кылбурлэн кужымез уно пол будэ.

Эшъёсмылэсь кылбур темаоссэс но, гожъяськон амалъёссэс но паймымон вылӥ уд на шуы. Озьы ке но адӟисько ини кылбуран удысын шӧдскымон оскытӥсь вамышъёссы.

Василий Ванюшев,

Удмуртиысь калык писатель, «Вуюись» студилэн кивалтӥсез

Алексей Арзамазовен, литератураысь тодмо критикен но тодосчиен, туала литератураез эскерон-пертчон понна Ижысь одӥгаз кафеын пумиським. Таӵе адямилы «культурной» инты гинэ тупалоз кадь потӥз, таин сэрен нырысетӥ юанэ вордӥськиз:

- Алексей Андреевич, тӥ ӵем гинэ тодмо муртъёслэсь интервью басьтӥськоды. Удмуртъёслэсь таӵе интыын пумиськемзэс шер адӟылод кадь, озьы-а со?

- Зэмзэ, удмуртъёс ӧвӧл дышемын кафе-ресторанъёсы ветлыны. Интеллигенциысь муртъёсмы йӧно, узыр адскыны «уг дӥсьто». Мон малпасько, соос али ке но кар улон радъя быдэсак уг на уло. Котырам матысь удмурт тодмоосы трос ӧвӧл. Куддыр потэ, адямиослы уг тырмы дунне шоры паськыт учкон, малпанъёсты вошъяны быгатон. Соос шугенгес туала улонэз валало.

- Нош туала литература возьматэ-а таӵе проблемаосты?

- Туала литературалэн аслаз шуг-секытъёсыз. Огъя вераса, валамон кадь валтӥсез: уг тырмо инъет кылдытӥсь муртъёс, сыӵе гожъяськисьёс, кудъёсыз быгатысалзы «нацилэн совестез» луыны. Таӵе эсэплан удмурт литератураын гинэ уг кылды – оглом ӟуч литератураез но суреда. Шоркарысь гожъяськон улонэз учконо ке, литература туннэ лэсьтӥське, «GQ» журналлэн верамезъя, Мускоысь «путинской гламурын» бергасьёслэн синмынызы.

Али лыдӟись но ӧвӧл – зэмос, визьмо лыдӟись, кудӥз понна книга гожъям потэ. Лыдӟиськон – бадӟым уж, капчи уд шуы сое. Выль лыдӟись котькытчы вутске ке но, дуннее золгес интегрировать каремын ке но, пумен «мур копаны» уг ни быгаты, быдэсак выйыны, лыдӟиськонэ зымыны луонлыксэ ыштэ. Со понна ик ышемын «бадӟым роман» категория. Западын романъёсын азьлань пото Орхан Памук, Мишель Уэльбек…

- Удмурт роман гожтоно ке – мар сярысь луысал со?

- Та юанлы, ортчем сюресме учкыса, валэктон утчасал. Мон вордӥськи Нижний Новгородын, выжыосам удмуртъёс вань. Пинал йырын максималист мылкыдъёслы луыса Ижкаре дышетскыны вуи – со дырысен 11 ар ортчиз ни. Та куспын тросэз воштӥськиз, троссэ выль синмын адӟи. Туала удмурт роман борды, мон малпамъя, кыкналасянь басьтӥськоно:

1. Автор сямен тон шара луыны кулэ.

2. Ӟечсэ адӟыса возьматыны быгатоно.

Туннэ улонамы сотэк но трос уродэз, кырсез, мылкыдэз саптасез – литература пыр одно ик вӧлмытоно чеберзэ, бурдъясьсэ.

- Мылкыдэз саптасьсэ улонысь синйылтӥськоды-а?

- Проблема котьку одӥг, удмурт югдурез ик басьтоно ке: ум быгатӥське ӵош пуксьыны-вераськыны, огъя ужаны. Мае луэ дэмен лэсьтыны – уг лэсьтӥськы, ог-огмылы юрттэт ӧвӧл, со понна утчаськом ляб палъёсты, соос шоры юромо чиньыен возьматӥськом. Та интеллигенция пӧлын тужгес но зол шӧдӥське. Кин ке зэмзэ ик ужа, кин ке шузияське гинэ, тэк дырзэ быдтэ.

- Критик синмын – мае али лыдӟиськоды удмурт литератураысь?

- Берпуметӥез, мар борды басьтӥськи – Филипп Кедровлэн кылбуръёсыз. Историяя, кылъя но литературая Удмурт институтын ужасько бере, трос бугыръяськисько азьвыл удмурт гожъяськисьёслэн ужъёссы пӧлын. Ӵошатыны луэ вужзэ но туалазэ: оло, азинскон ӧвӧл шуыса, асьмеос ик янгыш – ачиз общество азьлань вамыштыны уг сёты. Огъясь-герӟась кужыммы ӧвӧл, ваньмыз нимаз-нимаз улэ-шока: «Удмурт кенеш», журнал-газетъёс, телевидение, театр, мукетыз… Тани институтысь егит тодосчиосты ик учконо ке – макем тунсыко эскеронъёсын соос выро! Таиз сярысь ӧжытэз тодэ.

- Тӥ асьтэос ӵем уд потаське калыке, удмурт ужрадъёсы…

- Уг ӧтчало. Кыӵе ке юромо дистанция ум возиське. Мукет ласянь учконо ке, наука – со сыӵе бусы, кудӥз шыпыт гыриське. Тодосчиос улонлэсь кӧня ке палэнын, ворсаськемын. Общественникъёс тунсыкъяськыны кулэ – нырысь ик соос мед кыстӥськозы. Берло дыре сыӵе но югдур кылдэмын: кин ке сярысь трос верасько тыбыр сьӧраз, улэм-вылэмзэ сэртто-пертчо – нош со адямиен асэныз меӵак юалляськыны уг валало.

- Тӥ берло дыре трос ас проектъёсыныды выриды, палэнскиды. Нош удмурт литературая научной ужды маин герӟаськемын вал?

- Кандидат ужме быдэстӥ 2010-тӥ арын март толэзе. Эскери Пётр Захаровлэсь кылбуретсэ, уже нимаськиз «Феномен визуального в удмуртской поэзии». Та темаме али но азьланьтӥсько. Дасясько поэзилэн кылызлэн кылдэмез сярысь книгаме – 1910-тӥ-1920-тӥ аръёсысен кутскыса, туннэ нуналозь. Удмурт кылбурет 20-тӥ даурлэн кутсконаз вордӥськиз, куке пуксиз литературной кыллэн тусыз. Соку писательёс тыршизы калык, фольклор кыллэсь пегӟыны – выль инвисъёсы сузьтӥськизы. Тимашев, Эрик, Еремеев, Майоров, Герд – котькудӥзлэн кылзы туж аспӧртэм.

- Куддыр малпан кылдэ, удмурт культура али ке но ӧз на вормы со шуг-секытъёсты, кудъёссэ сэрттыны турттӥзы К. Герд но Т. Борисов.

- Вань уно гинэ валантэм, мылкыдэз куашкатӥсь тодэ ваёнъёсы. «Инвожо» журналын ужакум, П. Захаровен ӵем потамы гуртъёсы, гожтӥськон радъям, визьнодан уж нуим. Асьсэос ик дышетӥсьёс таӵеезлы дась ӧвӧл.

- Газетмы ӵапак та ужпумъёс борды басьтӥськыны турттэ – пичиен-пичиен, вамыш бӧрсьы вамыш, бадӟым литератураен тодматыны, лулчеберет дуннеез калыке вӧлмытыны. Кызьы малпаськоды, газет та ужез вормоз-а?

- Литература понна ми усьтӥм удмурт Пен-клуб, литератураен герӟам журналмес. Газет сярысь ке, историын трос гинэ литературной газет потамын. Ачиз газет капчи формаосты, яркыт чуръёсты яратэ. Но со калыкез огазеяны, кенешыны луонлык сётыны кулэ: удмуртъёс али ортчись ужрадъёс сярысь лыдӟо, малпанзэс шараяло. Сӥзьысал тӥледлы: газетты котькинлы усьтэмын медло, котькин ас мылкыдыныз тодматыны мед быгатоз – но мед сое валалозы.

- Удмурт кылэз луэ-а дышетыны литература пыр? Тӥ асьтэос туж вольыт вераськиськоды ни! Трос лыдӟиськиды, вылды.

- Литература кыл дуннеез узырмытэ. Но реалист луыны кулэ: быдэс дуннеын али лыдӟиськон кулэсме. Мон удмуртсэ филолог кадь лыдӟисько: кабъёсты, кыл шыкысэз эскерисько.

- Капчизэ уд лыдӟиське шат? Шуом, Алнашозь мыныкуд, электричкае пуксьыса, лыдӟид.

- Та пумысен монэ паймытӥз вал тодосчи Татьяна Зайцева: калыкын, пе, тужгес но ярато капчи кыло беллетристъёсты, соос пӧлын – Николай Никифоров, тужгес лыдӟымон автор, Мадьяров, Ар-Серги. Берпуметӥезлэн прозаез сярысь верано ке, тросэз сое шумпотыса лыдӟо. Ар-Серги совето вакытысь гожъясьёс пӧлысь ӧвӧл ни. Со дӥсьтӥсь адями. Гожъяськыса гинэ няньлы уксё поттэ.

- Тӥ туала дунне литератураез яратӥськоды. Мае синйылтӥды берло? Мае дэмлалоды удмурт лыдӟисьлы?

- Одӥг шокчемен лыдӟи М. Уэльбеклэсь вань романъёссэ. Одӥгез яратоноез – Милан Кундера, Варгас Льоса. Латиноамерикан литература али туж зол азинске. Малпасько, удмуртъёслы матын луысал турок Орхан Памук, кылъёсмы кельшо – кыксы ик агглютинативноесь. Удмуртъёслы дэмласал сое лыдӟыны, мар йырсазез берыктоз – чылкак мукетсэ. Мукет улон ӧр, мукет гожъяськон сямъёс. Уэльбек ик тросэзлэсь «йырзэ пуштытоз». Малпасько, умой мынысал азиат литература. Ӧжытгес интеллектуал шудонъёс, но огкадь дунне шоры учкон. Япон автор Юкио Мисима. Ӟуч классика пӧлысь «маст рид» – Иличевский, Улицкая, Петрушевская. Секыт вераны. Книга шуак вуыны кулэ: адӟид – басьтӥд – лыдӟид. Литературалы дышетыны уг луы ук. Со одӥг частной улонэз суреда. Соглаш луо таӵе кылъёсын но: «Возьматы мыным библиотекадэ но мон верало тыныд, кин тон».

Вераськиз Дарали Лели