Удмурт дунне » Шӧкыч

Шаркан ёрос больницаысь пинь эмъясь

sergo — Fri, 04 May 2012 12:49:46 +0000

Шаркан ёрос больницаысь пинь эмъясь Пётр Вахрушев юнме ӧз бырйы, дыр, аслыз таӵе удыс. Висисьёсызлэсь пиньёссэс кышъя-мара но, соосыз ымтыросазы серекъяны уг кепырало ни. Нош креслоын куалекъяса пукисьёсыз, маскарчи шоры учкыса, ымзылэсь усьтӥськемзэ валаса ик уг вутто – пальышанзы пель дорозязы кыстӥське.
Серекъян серекъянэн, но кышкатскем пиналъёс куд-ог дыръя пинь эмъясьлэсь чиньызэ куртчыны шедьто. Со гинэ-а, ма. Кӧтаз но пиньёссэс мертчытъямзы вань. Арлыдоос но куддыр чиньыоссэ сыскон кожало, лэся. Сыӵеосызлы Пётр Михайлович тодазы уськытэ: аслам ук, пе, чиньые.
- Больницаямы ваньмыз ик пинь эмъясьёс маскарчиос, – шуэ Вахрушев. – Висисьёс но куд-огез пӧртэм ик ӧвӧл. Пинь эмъян креслое пуксьыны косэмысьтым одӥгез кышномурт тальк гинэ пыд понон интыяз лэзиськиз. Ма, уг но паймиськы ни, креслоос весь выльдӥсько уго, нош кин ке сое нырысьсэ адӟе.
Эшъёсы но серемес учыръёссэс мадьыло. Милям ужано интыямы азьвыл вал нылкышноосты эскерон кабинет. Одӥг нуналэ арлыдо кышномурт пырем но кылиськыны кутскем. Нош азьвыл ужасьмы эмъяськыны лыктэм муртлы шуэм: кӧня ке пук ай, пе. Учке но, висисез кресло котыртӥ ветлэ, аслыз ачиз «пукай, пукай» шуыса. Ӟуч вылэм, удмурт сямен ваземез ас сяменыз валам.
Улонысь учыръёсты, газет-журналъёсысь серемес гожъямъёсты Пётр Вахрушев синйылтытэк уг кельты. Ужын со пинь эмъясь ке, ваньмон дыръяз кырӟась но маскарчи. Тодӥсьёсыз сое Шарканысь кыкетӥ Ушаков шуо. Шаерысьтымы тодмо маскарчи одӥг пол гинэ ӧз ӧтча сое филармониысь «Шулдыр ӝыт» ансамблен радъям серекъян ӝытъёсы.
Пичи дырысеныз ик кырӟанэн эшъяськись пияшез сцена котьку бордаз кыскылӥз. Ижысь медициная училищеысь пинь эмъян ёзын дышетскыкуз (али со ворсаськемын ни), Вахрушев кырӟаны ветлӥз «Ижмаш» культура юртысь «Тюрагай» ансамбле. Петунькаысь больницае ужаны интыяськемез бере Шаркан больницаысь хорын кырӟаны вуттӥськылӥз.
Маскаръяськон сям но бордаз пиналысен лякиськемын. Анай-атаез кыллы устоесь вылӥллям. Бубиз улонысь вазь кошкиз, но верамъёссыя со туж быгатэ вылэм маскаръяськыны. куно карем юртэ мукет нуналаз вазь ӵукна ик карнанэн ву нуоз: пельнянь пӧзьтон вулы ёрмиськоды, лэся, пе.
Вордӥськем Мувыр-Вишур гуртазы азьло дыръёсы туж ӵем вуылӥз «Шулдыр ӝыт» ансамбль. Петунькаын ужакуз ини, Пётр Вахрушев магнитофонэ гожтӥз Анатолий Ушаковлэсь «Одоть но Педоть» юморесказэ. Соя ик дышетскиз серемес веранэз быдэстыны. Концертъёсын потакузы, ачиз но серекъятылӥз калыкез. Со бордысен усьтӥськиз Ижысь сцена вылэ потон сюрес.
Шарканэ ужаны но улыны выжемез бере Пётр Михайловичлы быгатонлыкъёссэ волятыны луонлыкъёс тросгес кылдӥзы. «Тюрагайёс» но уг вунэто, концертъёсазы пыриськыны али но ӧтчало. Шарканысь маскарчи но пинь эмъясь вуттӥськиз «Лӧпшо Педунь серекъя» элькун фестивале но - пусъемын «Удмурт юморез улӟытӥсь» дипломен.
- Фестивальысь ӝутскем мылкыдын бертӥ, – шуэ со. – Таӵе ужрадъёс туж кулэ. Калык мӧзмемын серекъян-маскаръяськонлэсь, аслад но мар ке вылез борды басьтӥськон мылкыдыд ӝутӥське. Малпасько, тросгес ужано образъёсты вошъян бордын.
Анатолий Ушаковлэн туж потэ вал юмористъёсты дасянъя студия усьтэмез. Малпанэз уриськиз, но калыке пазьгиськем мылкыдыз туала вакытысь маскарчиослы бурдъёс кузьмаса кельтӥз.

Лия Малых

Кудӟем ӟазег

sergo — Fri, 04 May 2012 12:47:30 +0000

Бускель кышно дорын пузэ вандӥм. Ужмес быдтыса, пырим кунояськыны. Шумпотэменыз кузё кышно черыкен ик аракы поттӥз. Сиськемдылэсь азьло кӧня ке ӟузялтэ шуыса, быдэн стакан лэзиз. Ваньзэ дуак уд юы ук, кӧня ке гучык кареме бере стаканме валес улэ пуктӥ – шӧдтэк шорысь донгиськыны я мар шедёз.
Сиськон вискын стаканме поттӥ но – буш! Кузё кышно нош тырмытӥз сое. Шыд пӧсямез возьмаса, ӧжытак юи но стаканме выльысь азьло интыяз пуктӥ. Поттӥсько - нош ик буш!
Озьы ӝӧк сьӧрын пукон вискамы валес улысь ӟазег потӥз. Кудыын пузъёсыз вылын пуке вылэм. Ну бызьылэ ук корка кузя! Кузё кышно паймемын: ма, мар луиз, пе, таин, ноку сыӵе выремез ӧй вал?
Мон номыр ӧй куареты. Ӟазег стаканме бушатӥз, шуом-а? Ярам, кудӟеменыз тютюпиоссэ ӧз изъянты, жагыль-жагыль чебересь, тазаесь потӥзы.

Ӵушъял Петыр
Дэри ёрос, Пуро-Можга гурт

Макмырам трактор

sergo — Fri, 04 May 2012 12:43:48 +0000

Туннэ Петрован гырыны шуыса бусые кошкиз гуртлэсь куинь иськем палэнэ. Йырыз нушы кадь – толло юэмлэн бервылыз. Макмырзэ веськатыны куриз ик вал кышноезлэсь, соку ик табапуд мырӟиськиз ныр улаз.
Гырыны кутскиз гинэ – тракторез тып-тып дугдӥз. «Кызьы озьы? Толон гинэ умой ужаз – трос гыремысьтым быдэс бутылка тӧдьызэ мекалтӥ», – малпаське воргорон. Кема бергаз «валэз» котыртӥ, соиз ӵыш-пыш но уг кары. Бӧрысь гинэ нодъяськиз баксэ учкыны.
- Вот албасты, вот пуппы йыр! Монэ асме бусые сиёнтэк-юонтэк лэзёно вал, – канистразэ кутыса, луп-лап вамышъя Петрован. – Адӟись луиз ке – мон вулы. Тодӥзы ке марлы мынэмме, серекъялозы.
Вина юэмен йырин тракторед но макмыре усёз, ява.

Удалтымтэ барыш

Базарысь сӥль дунъёсты тодэмез бере Матрон кыксэ кечсэ вандыны малпаз. Сӥльлэн дуныз, пе, 200-250 манет. Син азяз пуктӥз ӵаштыртӥсь сюрслыкъёсты. Ӝытаз кык воргоронэн вераськиз кечъёссэ вандон сярысь. Кема малпамез, лыдъям-чотамез бере картэзлы шуиз:
- Ӵошен нуназеозь ик вандыса вуттозы, вӧзазы ачим но юртто. Килоен ӝыныен сӥль но одӥг но ӝыны литр аслэсьтым пӧзьтэмме сёто, соин тырмоз. Кытын, пе, ини нокытын ужамтэ, юыны яратӥсь муртъёслы талэсь бадӟым барыш! Аслад киосыд уг пыро пудоез вандыны.
Озьы шуыса, ӝыт ик пластик бутылкае аслэсьтыз пӧзьтэмзэ дасяз.
Чырмыт тыршизы воргоронъёс, ужзэс нуназелы йылпумъязы. Матрон вазиз:
- Корка пырыны уг ӧтиськы ни, ужамды понна сӥль но бутылка дасяй, – собере малы ке корказ пыриз. Со куспын картэз ужасьёслы корказе дасям сӥлез сётӥз, нош пыд улын костаськись бутылкаысь «пож вуэз» музъем вылэ кисьтӥз.
Матрон потӥз но адӟе: бутылка буш. Пуштӥз ук, кытысь кылъёс шедё:
- Шунянь, мар дауртӥд?! Зынзэ но нырыд уг шӧды-а, мар-а?! Кытысь меда дунне вылэ вордӥсько сыӵе пӧрмостэмъёс! Кош син азьысьтым! Сомында винаез кисьтӥз…
Амалтэк магазинысь басьтэмзэ поттоно луиз. Воргоронъёс кошкем бере нылкышно кема сизьдӥз на картсэ ыме тэронтэм кылъёсын.
Изьыны выдыса, Матрон кема погылляськиз: лыдъяз-чотаз, кӧня изъян лэсьтӥз удалтымтэ картэз.

Раиса Покоева
Пичи Пурга ёрос,
Шор Кечол

Мукетъёс чотын узырмон

sergo — Fri, 04 May 2012 12:40:45 +0000

Кизнер ёросысь Удмурт Бемыж шор ёзо школалэн директорез вылэ уголовной уж ӝутэмын.
Кизнер ёросысь прокуратура шараяз кивалтӥсьлэсь пӧяськыса коньдон капыръямзэ но сое ас учкемезъя кутэмзэ. Школаысь куд-ог ужасьёслэсь тыршемзэс табеле пӧяса пусъемен, республикамылэн бюджетэз ньыль ар ӵоже 268 сюрс манет пала изъян адӟиз.
Директорлэсь янгышаса ужамзэ эскероз Россиысь Следствиея комитетлэн Удмурт Республикая управлениезлэн Можгаысь межрайонной ёзэз.

Коньдонэз ваньысь – коньдонтэм

Ижысь Октябрь ёросысь прокуратура шараяз ёрос администрациысь семья ужпумъёсъя но нылпиослэсь правооссэс утёнъя отделлэсь опекая но попечительствоя законэз быдэсъянын янгышъёссэ.
Быдэ вуэменыз валче анай-атай юрттэтэк кылем пилы, кылем арын октябре учётысь куштыса, та дырозь кияз сётымтэ на сберкнижкаез. Отчы люкаськемын 200 сюрс манет пала коньдон. Нош егит мурт уксёлы ёрмеменыз лушкаськыны шќтам. Соин валче пияш вылэ ӝутэмын уголовной уж.
Опека улэ шедемъёслэсь ужъёссэс дыраз эскерымтэзы но быдэ вуымтэ пияшлэсь коньдон басьтонъя провозэ тӥямзы понна Октябрь ёрос администрацилэн йырызлы косэмын янгышсэс тупатыны.

Материал дасямын
Удмурт Республикаысь
Прокуратуралэн
пресс-службаез
ивортэмъя.

Калыклэсь ватэм книга

sergo — Fri, 16 Mar 2012 08:30:32 +0000

Та юртэ интыяськемын «Удмуртия» издательство.

Огнуналэ потӥ Ижкарысь центре, Николай Постниковлэсь книгазэ басьто ай, пӧй. Пыри «Свитоке», «Букваре», «Инвисэ», эшшо 2-3 вузкаронниосы. Шедьтӥ-а шуоды?

Ваньмаз валэктӥзы, удмурт изданиосмы ӧвӧл шуыса. «Инвисын» пичильтык коробка возьматӥзы ик. Отын (абдрай!) пичи тетрадь выллем радэн тырем «собрание сочинений» кылле. Вуз карись, сӧриськем мылкыдме шӧдыса, шуэ: удмурт книгапоттонние, пе, ветлэ. Мынӥ.

Вуылэмды вань-а «Удмуртия» книгапоттоние, эшъёсы? Ӧвӧл ке, одно ик ветлэ. Эсьмаса, пырыкуды ик валалоды, кылем даурлэн 50-тӥ-60-тӥ аръёсаз вуиды шуыса. Куинетӥ этажозь вуытозяды, азьвыл колхоз конюховка шуонэз но тодады ваёды, курилкаез но зынъялоды-веръялоды… Нош книгаен вуз карон кабинетэ пыриды ке, асьтэды янгыше усем адями кожалоды. Ярам коть, ӟечъяськозы. Мукет вузкаронниын сямен тӥлед «что вас интересует?» шуыса вазись уз луы.

Шыпытак гинэ вамыш-тӥ книга ӝажыос доры но копак абдрай: сыӵе чебересь, кие кутымонэсь книгаос кыллё! Соос пӧлын ик монэн утчаноез но. Сюлэм буйгаз кадь. Нош юанъёс кылизы. Сыӵе чебересь книгаосты «Удмуртия» книгапоттонни ӝажы вылын возьыны поттэ-а, мар-а? Уг луы-а рос-прос книга вузан магазин усьтыны, кудаз мед ужалоз калыклы капчи мылкыдын вазиськыны быгатӥсь удмурт вуз карись-менеджер? Удмурт калык тросэз улэ гуртъёсын, городэ шер вуэ. Луоз-а дырыз «калыклэсь ватэм» таӵе магазинэз утчаны?

Таӵе учыр мон понна нырысьсэ ӧй вал. Озьы ик утчай Алла Кузнецовалэн сузэрезлэсь книгазэ (ӧй на шедьты), озьы ик басьтыны кылдӥз Михаил Атамановлэсь берло поттэм книгаоссэ но мукетъёссэ. Малы меда та удысын воштӥськонъёс ӧвӧл? Кин кыл кутэ со понна? Культурая, печатья но иворъёсъя министерстволы (ма, «Удмуртия» издательстволы но) возьыт ӧвӧл-а таӵе югдур понна? Бен соосты асьсэды но жаляны кулэ, вылды, угось та юртын ик пуко.

Роза Колесникова,

Ижысь пенсионерка.

Редакцилэсь. Гожтэтын ӝутэм ужпумъёсъя валэктон курыса, вазиським «Удмуртия» издательстволэн директорезлы Юрий Кузнецовлы.

Роза Николаевна ӝутэ милесьтым одӥгзэ туж секыт кайгыронмес – кызьы вуттоно удмурт книгаосты лыдӟисьёс доры. Азьвыл аръёсы вуз каризы «Книготорг», «Бибколлектор». Таос быризы-ворсаськизы. Берло 15 ар ӵоже книгаосын умой гинэ вуз каризы «Удмуртпотребсоюз», соос но та ужлэсь куштӥськизы. Асьтэос валаськоды, нимаз ужбергатӥсьёсты удмурт книгаосын вуз карыны куреммы уг луы: Роза Николаевна кадь шаплы удмурт басьяскисьёс туж ик уно ӧвӧл.

Туала вакыт косэ выль амалъёс утчаны. Тросэз лыдӟисьёсмы пыдкуксэс пӧськытыса уг ветло ни, пыро милям сайтамы – udgiz.udmnet.ru Быръё кельшись книга. Кельто куронзэс. Коть Шарканэ, коть Париже кулэ луись вузэз одно ик келяськом. Яке пыриськоды матысь почта ёзэ но кулэ луись книгалы курон сётӥськоды. «Удмуртия» издательстволэн «Почта России» огазеяськонэзлэн Удмуртиысь ёзэныз та пумысен огкыл тупатэмын.

Юртмы выльдыны вуэмын – соиз зэм. Угось пуктэмын кылем даурлэн 40-тӥ аръёсаз. Со пыре кун ваньбуре, кузёез – Удмурт Элькун.

Курилка пумысен. Тамак уг кыскиськы бере, аслэсьтым но мылкыдме «порккетӥсьёс» уг буйгато. Нош алыны луонлыке ӧвӧл, угось юртамы интыяськемын пӧртэм огазеяськонъёс, мынам соосын кивалтэме уг луы.

Пичи баба

sergo — Fri, 13 Jan 2012 07:39:55 +0000

Шаркан ёросысь Бадяро гуртысь маскарчи песянай сярысь кылемаз «Шӧкыч» бамын кылпум поттылӥм ни вал. Пумиським та кышномуртэн магазинысен, ӵапак басьяське вылэм. Нимзэ-тулзэ юамысь шуэ: Зина мон, Пичи баба, нош умоен ке верано – Корепанова Зинаида Афанасьевна.

Калык ваньысь Зинаида Афанасьевналэсь юасько: татын вераськом яке ульчае потом? Нош куазь со нуналэ 25 градус пала кезьыт вал. Аръёс ортчыса, возьдаськонэ быриз ни, пе, потаса ум улэ, вазиз пумитам песянай. Басьяськисьёслы люкетонтэм вылысь вузчи Зина апаез гур палагес кариськыны косӥз. Соиз паймытскиз: уг, пе, кынмиськы, малы улляськод? Калык гурак серектэмысь вазиз ни: оло, пӧй, жаляса-а монэ отчы кариськыны косӥськод. Пумен ачиз сярысь маде ни:

- Мон котькытын ужамын, пенсие потон арам Бадяроысь фермаын ыж сюдӥ. Йыры визьмо ӧвӧл, но котькытӥ ветлэмын. Ростове но ӧвӧл-а вуылэмын? Мужике сьӧры озьы лобаса ветлӥ. Пенсие пото ӧй кожа, лапак, пӧй, егит уло. Табере гырпумез куртчыны бер ни. Отын но татын ужаме сярысь бумагаосы ӧвӧл, документъёстэк ветлӥськиз. Пенсие эшъёсылэн сярысь ӧжыт, но со пумысен уг куректӥськы: мужикелы но, пиелы но шайтан сиёнлы (тамаклы) тырме.

Пичи баба куинь нылпи будэтӥз, пенсие кык арлы вазьгес потэмын. Гуртын уж ӧвӧлысь сыӵе луонлык кылдэм. Нош юасьёслы та пумысен вера: Москвае Ельцин доры ветлӥ, пе, чупаськыны, соин пенсие вазьгес поттӥзы. Нош ужаны али сярысь туж секыт вал, шуэ. Уката ик пичи мугоро адямилэн ужез чоттэм адӟиське, секытэз ваньмыныз одӥг кадь ӝутъяськод ке но.

- Пичи мугорелэсь радазтэм керпотӥсько вал, – шалтыр гинэ маде Зина апай. – Али дыши ни. Азьвыл кутэн ветлӥськом вал. ӝужытгес мед адӟисько шуыса, кутъёсы пушкы ӟустыри понылӥ. Курадӟонэз адӟи ке но, висёнъёслы но ӧй сётскы, кыед вылэ вордӥськемысьтым тазалыке возиське. Нош секытгес луэ ке, цитрамон юисько, ас югдам эктӥсько – ваньмыз ортче.

- Оло, кыӵе ке серемес учыръёстэс мадёды? – курисько Афанасьевнаез. – Шуиськоды, газетысьтымы «Шӧкыч» бамез туж яратӥськоды. Асьтэос но, оло, лыдӟисьёсмес шулдыртоды.

Гуртоос, магазинэ малы лыктэмзэс вунэтыса, Зина апаез гинэ кылзо на. Шӧдӥське, маскарчилэн данэз бадяроос пӧлын зол вӧлмемын. Зина апай концертын выллем кадь ик мадиз асэныз луэм серемес учыръёсты.

- ӟуч сеен уггес вераськиськы, вылаз ик, ури-бери юрдӥсь. Огпол дорамы кунояны вуиз сестрае, мужикез – ӟуч. Пласькон доры сялӟыны мынэ ни та. Коля, пӧй, туда не сялӟася. Тётя Зина, я дурак что ли, на воронку садиться шуыса, клёп! сялӟиз пласькон вылэ.

Ури-бери яратӥсько халваез, мужике но одӥг-ог сие. Пельменэз но яратӥськом. Пӧраны шуыса, ыльнянь дасяй но холодильнике понӥ. Нош со, кемагес кылле ке, сьӧдэктыны кутске. Вася юа, Зина, халваед вань на-а, пе. Холодильникын, пӧй. Ма, туж кӧш ук халваед, пиням но лякиське, шуэ. Мон корка тыр шораз кесяськисько – вань сыӵе сямы. Тынад, пӧй, Вася, чыртыед чай накипен сьӧдэктэмын ни, кызьы халва кӧш луоз! Учкисько но, со ыльнянез сие. Быремын ни шуыса, воксё вунэтӥськем.

Маскаръяськись песянай туж яратэ «Мылысь-кыдысь» телепередачаез. Анна Федотоваез но Валера Сидоровез телевизор пыр ик чупасько, пе. Мукетъёс сямен ик ыстэмез потэ СМС ивортонъёс, но уг валаськы, шуэ, кызьы соосты гожтоно, телефонэз но киям кутылэме ӧвӧл. Кин тодэ, Пичи бабалэн та малпанэз но быдэсмоз, оло.

Лия МАЛЫХ.

Суредаз но туспуктӥз Владимир БЕЛОМОРСКИХ.

Мурт кулон – узырмон

sergo — Fri, 28 Oct 2011 08:35:02 +0000

Удмурт калык сямъёсъя адями улытозяз, куинь сюан шудэ: вордӥськыкуз, семья кылдытыкуз но сопал дуннее кошкыкуз. Вож дыръяз дӥсяло ке анай-атаез, сюан но ватон дӥськут со ачиз бырйыны быгатэ. Улон сэрег ласянь но адями аслыз ачиз кузё. Бырйыны луэ шайвылысь интыез но, ӵыжы-выжыосын артэ луон понна.

Улонысь кошкем муртэ ватон ужпумъёсын вырись куд-ог огазеяськонъёс берлозэ «сюан» шудонэ адямиосты кузьым лэсьтонэн шумпотто… Асьсэ коньдонэнызы ик. Сыӵеос пӧлы пыре Ува ёросысь «СК «Строй-мастер» огазеяськон но.

Удмурт Республикаысь Прокуратуралэсь сайтсэ та нуналъёсы узырмытӥз Ува ёросысь прокуратураен ӝутэм уж. Ува посёлокысь «Увинское» шайвылэ ватэм ӵыжы-выжызы доры буш инты кельтон понна вылӥ верам огазеяськонын ужасьёс 1 сюрс 200 манет куро. Нош федерал законысь «Ватон но ватӥськон ужпумъёс сярысь» 7-тӥ статьяя, Россиын улӥсь котькуд адямилы кулэмез бере луонлык сётӥське шайвылысь инты мылкыд каремезъя бырйыны, со понна нокыӵе коньдон тырытэк. Но та куронэз быдэстыны луоз, шайвылын буш музъем вань ке, яке ӵыжы-выжыез вӧзын инты кылемын ке.

Мукет учыръёсы адямилэсь кытчы ватон пумысен куронзэ кулэмез бере эскерозы ватӥськон ужпумъёсын вырись службаос. Лыдэ басьтӥськоз адямилэн кулэм интыез, озьы ик – вань-а соин пусъем шайвылын буш инты. Со сяна, чаклалозы, улонысь кошкем муртлэн макем бадӟым данэз калык азьын но кунын.

Кызьы адӟиськом, кулэм муртэ ӵыжы-выжыез вӧзысь буш интые ватыны коньдон тырон законэн чакламтэ. Озьыен, Ува ёросысь ватӥськон ужпумъёсын вырись огазеяськон адямиослэн кисыязы пыриз. Ёросысь прокуратуралэн пуктэмезъя, со коньдонэз адямиослы берыктыны кулэ. Ува ёросысь 1 номеро судебной участокысь миръясь судьялэн решениезъя, пӧяськеме шедем муртлэн вазиськонэзъя коньдон берыктэмын.

Но уж таин йылпумъяськымтэ. Ёросысь прокурорлэн юрттӥсез Мария Рейм верамъя, «СК «Строй-Мастер» огазеяськонъя эскеронъёс мыно на. Законэз тӥян учыръёсты шараяны юрттоз огазеяськонлэн ватӥськон ужпумъёсъя кылдытэм списокез но. Кин ке, оло, ачиз мылкыд кароз судэ вазиськон гожтыны. Буш инты возён понна басьтэм уксёез «Строй-Мастерлэн» кузёез берыктоно луоз. Пересьёс понна со коньдон ӧжыт ӧвӧл уго.

Калыкын шуо, адями вордӥсь-кемез бере ик кулыны дасяське ини – улытозяз ӟеч нимзэ утьыны турттэ. Нош кин ке кутэтын дыръяз ик коньдон лыдъяны кутске. Озьы ке но…

Лия Малых.

Ву интые, юан пус

sergo — Fri, 14 Oct 2011 07:44:26 +0000

Яр посёлокысь Флор Васильевлэсь нимзэ нуллӥсь ульчаын, озьы ик мукетъёсаз но улӥсьёс кема аръёс ӵоже вулы ветлӥзы колонкаосы. Татын ик сюзэс юзматъязы водительёс, огшоры мынӥсь-ветлӥсьёс. Колонкаос вузэс нокинлы ӧз жалялэ. Тол кезьытэн куд-ог дыре кынмылӥзы ик, но туж шер.

Азин ульчае пыронысь колонкалэн ужамез кинлы ке ярамтэ: дас сантиметрлэсь трослыгес ӝутӥллям музъемлэсь вылэ. Оло лыдъяны валаллямтэ, оло марзэ ке тӥяны шедьтӥллям – инженере дышетскымтэ бере, мугзэ вераны уг быгатӥськы. Ву азьло сямен ик зол бызе, но – колонкалэн урдэсъёстӥз. Мугзэ тодон вылысь вазиськи «ТВС» предприятиысь специалистлы: милямаз колонкаын ву ведралэн палэнтӥз ӧръяське, нош Бармашурын улӥсьёс вулы ёрмо.

Вазиськеме дырысен толэзьлэсь кемагес ортчиз. Номыр ӧз воштӥськы. Августлэн кутсконаз вулы мынӥ но – колонкалэн вылӥ люкетэз ӧвӧл ни. Нош кык нунал ортчыса, колонка воксё но пыдъяськем. Калинин нимо ульчалы пумит сылӥсезлэсь но рычагзэ басьтӥллям. Ярам, малпасько, лэсьтыны ӧдъяло ни.

Ортчиз кык толэзь, колонкамы озьы ик ӧвӧл. Бускельёсынымы кытчы гинэ ӧм вазиськылэ: ёросысьтымы вылӥ кивалтӥсьёслы но, ву понна но коммунальной юрттэтъя кыл кутӥсьёслы но. Паймытэ трос пӧртэм валэктон сётэмзы. Я колонкаез лэсьтыны нуизы, я ми кыл кутыны кулэ артысь кык этажъем юртын улӥсьёслэн дун тырытэк гужем ӵоже бакчазэс колонкаысь вуэн кисьтамзы понна – коркаязы вулы счётчик пуктэмен, отчы дышиллям ветлыны. Я воксё но шуо, колонкаосты, пе, ог-огзылы 100-120 метр кеме кельтоно. Ярам, егитъёслэн кужым тырмоз кыдёкысь ву ворттыны, нош мӧйыослэн? Со понна шат вань улонзэс курадӟыса ортчытӥзы?

Вал сыӵе но дэмлан: ву гумыез корка пыртоно. Иське, та сярысь азьлогес ик ивортоно вал, сӥзьыл зоръёс кисьтэмез возьматэк. Адямиос дасяськысалзы, кулэ арбериос басьтысалзы. Мукет ласянь: кызьы коркаосы ву гумыос кыскод, ульчалэн огпалтӥз канализация ортче ке, нош мукет палтӥз – чагыр эстӥськон?

Луозы ик меда ульчаосамы колонкаос? Кин сётоз юанмылы валэктон?

Любовь Куртеева.

Туспуктӥз Юрий Шаляпин.

Редакцилэсь. Югдурез тодон вылысь вазиським Яр ёрос администрацилэн йырызлэн архитектурая, лэсьтӥськонъя но коммунальной хозяйствоя воштӥсезлы Олег Даниловлы.

- Югдурез син шорамы возиськом, – шуиз Олег Владимирович. – Котькуд учырез нимаз-нимаз эскериськом. Колонкаос ужамтэысь калык ачиз но янгыш, ас кожазы ву гумыос кыскыны кутскемен но, шуг-секытъёс кылдо. Тросэз колонкаос тупатэмын ни, кылсярысь, Биграгуртын, Ярысь Карл Маркс ульчаын.

Нош Флор Васильев ульчае интыяськемез пумысен ужпумез эскериськом. Колонка интыяськемын пыдын мынон-ветлон сюрес вылын. Артэ ик трос квартираем корка. Вулы ёрмисьёсын кенешыса, гумыез доразы пыртыны чакласьком, коммуникациосты исатэк. Дуныз пумысен но кулэ материалъёсъя, малпасько, огъя кыл шедьтом. Кыдёкын ик ӧвӧл мукет колонка, адямиос али вулы отчы ветло.

Ведраен-карнанэн бызьылыса, жадим!

sergo — Fri, 09 Sep 2011 07:07:44 +0000

Балезино ёросысь Шолокгуртэ вуылыны кылдӥз. Газетын ужамез тодыса, лэся, гуртоос вылам ошиськизы. Кинлы вазиськыны ум тодӥське ни, пе, оло, тӥ юрттоды.
Гуртазы 197 мурт улэ. 4 ульчазы. Зор ортчем бере ӝужыт сапегтэк уд пыры – горд сюй. Но таизлы шолокъёс кемалась дышемын ни. Трос аръёс ӵоже напраез коламенызы, шӧдске, озьы ик луыны кулэ кожало. Сюлэмзы уг вырӟы-а, мар-а, ӟеч сюресо гуртъёсы потакузы.
- Мукет бадӟымгес куректонмы вань ай, – лулӟо гуртоос. – Тулыс вошъязы ву гумыосмес, колонкаосты выльдӥзы. Нош жильыртӥсез ваньмы дорозь уг вуы. Кылсярысь, Иванова нимо ульчае со сюрес ик уг шедьты. Колонка дорын коть дас ведраен сыл – толыкез ӧвӧл. Ярам, гумыосты вошъям понна гуртоослэсь уксёзэс ӧз бичалэ. Котьма ке но лэсьтэм уж пумозяз вуттэмын луыны кулэ ук. Гурт кузя ву утчаса ветлыны воксё жадиськиз ни! Тыбыръёс уг чидало карнанэн-ведраен нуналаз кӧня ке пол солань-талань бызьылыны. Ярам, асьмелы гинэ юыны нуллысалмы ай. Но пудомес но люктано ук.
Кызьы меда кылдэм югдурысь потыны туртто?
- Ачим но паймисько, мар вераны, – вазиз муниципал кылдытэтлэн йырыз Николай Урасинов. – Водобашня шуонамы ошмес вуос люкаськыса уггес вутто. Гурезь улэ пуктэмын уго. Таин валче ӝыны гуртмы мар юыны пайме. Одӥг колонкамы ужа шуыса, шумпотӥськомы ни. Валасько: сомында ульчалы со туж ӧжыт. 2012-тӥ арын артысь Быдыпи гуртэ выль водобашня лэсьтон сярысь кенешиськом ёрос администрациен. Со ог 60-70 сюрс манет тыр усёз. Быдыпиысь выль школа вӧзы сое ӝутон азьло ик чакламын вал. Интыез усто – гурезьын. Озьыен, ву Шолокгуртозь но жильыртоз.
- Гуртты быдэс толзэ вутэк курадӟоз шат?
- Ма, воксё вутэк кылемын ӧвӧл ук. Калыкмылы ӵектӥсько: котькудды асьтэлэн хозяйствояды ву пыртэ. Соку со ӝоггес, гумыостӥ бадӟымгес давлениен лыктоз, котькудды дорозь вуоз. Но адямиос уг вырӟо. Коньдон висъямез возьмало, лэся. Нош милям кылдытэтамы тетрадь басьтыны гинэ но копейкамы ӧвӧл.

Елена Фёдорова.

Ойдо, гажан, КИАГ-е?

udmdunneadmin — Sat, 28 May 2011 00:03:53 +0000

Ижысь Орджоникидзе урамын интыяськем Эшъяськон юртэз шаерамы ӟеч тодо ни. Сое данъяськыса возьмато палэнысь вуэм куноослы но. Зэм ик, чебертэ со асьме городмес. Огез валантэм. Та юртэ мышласянь пырон ӧс азьын таӵе ялон ошемын. (Учке туспуктэмез). Ми уно муртлэсь юалляським, мае возьматэ киаг кыл. Нокин тодӥсь ӧвӧл. Нош Нациосын ужан политикая министерствоын тазьы валэктӥзы: озьы, пе, удмурт сямен загс берыктэмын. киаг – кунмурт инъет сётӥсь гожъян. Вот зол! Таӵезэ кылбурчиос но уз вӧталэ.

Ми, конечно, удмурт кылмес узырмытонлы пумит ӧвӧл, но та рад со сӧронлы матынгес кадь. Соин, визь-кенеш юаса, ми жингыръям на кылчиослы. Удмурт кун университетысь удмурт филология факультетэн кивалтӥсь Любовь Фёдорова та учырлы укыр ӧз паймы. Но валэктӥз: кыл малпан – шудон уж ӧвӧл. Нош али со тупа кыӵе ке самодеятельностьлы. Котькыӵе терминъёсты чакланы-эскерыны, собере юнматыны кулэ улослэн кивалтэтэз борды юнматэм терминъёсъя но шонер гожъяськонъя нимысьтыз комиссия. Собере выль (яке выльдэм) кылъёс пырыны кулэ нормативной кыллюкаме. Асьме понна таиз воксё адӟылымтэ арбери.
Нялтас вераса, термино-орфографической комиссия но та вие элькунамы ӧвӧл – азьвылэз куашказ, вылез ӧз на кылды. Озьыен, быдэс кыл дуннеенымы али кивалтэ Нациосын ужан политикая министерствоысь одӥг специалист!!! Шонер-а со? Кинлы кызьы, нош монэ гажанэ КИАГ-е ӧтиз ке, ваменско – кин тодэ, кытчы ӧте…

Потэмын ? № 75-76 (24616-24617) от 28.05.10.