Удмурт дунне » Иворъёс

Картош мерттӥське…

sergo — Tue, 15 May 2012 04:59:05 +0000

Вавож ёросысь гурт хозяйствоосын тыршисьёс, ю кизёнзэс йылпумъяса, картошка борды басьтӥськизы. Туэ сое 1 сюрс 145 гектар вылэ мерттыны чаклало.

Ваньмызлэсь азьло та уж борды басьтӥськизы «Ӝуё-Можга» хозяйствоын тыршисьёс. Арысь аре соос «кыкетӥ нянь» будэтонлы бадӟым саклык висъяло, удалтонлыкезъя но котькинлы адӟем карымон луо – гектарысьтыз 300 центнер картошка басьто. Соос «Grimme» техникаен ужало: муэз небӟыто, сылал ватсало. Хозяйствоын котьку сюлмасько ӟеч выжы кидыс уськытон сярысь, туэ но выль сорт муэ согизы.

Картошка мерттонзэс 100 гектар вылын азинто Мичурин нимо эштосын, «Удмуртия» но «Восход» хозяйствоос – 60 но 50 гектар вылын. Азинске трос но одӥг аръем турын кизён, нош «Колос» хозяйствоын 49 гектар вылэ кукуруза кизизы ини.

Валентина Богатырёва.

Кысык нунал толбыт сюдоз

sergo — Tue, 15 May 2012 04:56:40 +0000

Пичи Пурга ёросысь «Восход» эштосын бусы ужъёс дыраз мыно.

Гурт удысъя но сиён-юонъя министерстволэн ивортэмезъя, та дырлы 61 процентэз юос киземын.

Кизёнзэс йылпумъязы ни Вавож, Алнаш но Можга ёросъёс. Бере кылё Яр ёрос – чакламезлэсь 5 процентэз киземын, Красногорск ёрос – 7 процентэз, Глаз ёрос – 12 процентэз. Турын шаплы кизё алнашъёс, можгаос но пичи пургаос. Та ёросъёсын турын 4 сюрс гектарлэсь ятыр киземын ини. 864 гектар картош мерттэмын. Со пӧлысь 646 гектарез – Вавож ёросын. Мытэмын ни «кыкетӥ нянез» мерттон Дэри, Пичи Пурга но Можга ёросъёсын. Огъя бусы ужъёс радъясько кылем арын сяменгес ик.

Бусы ужъёс йылпумъясько ни Пичи Пурга ёросын но. Татын киземын 47 сюрс гектар муос, та пӧлысь 23 сюрс гектарез – юос, 24 сюрс гектарез – пудо сиёнлы мынӥсь культураос, 125 гектарез – бакча сиёнъёс, 140 гектарез – картош. Бусы ужъёсты ӝог ортчытыны юрттӥз на кын улэ кизён но. Сӥзьыл та уж быдэстэмын вал 6 сюрс 624 гектар вылын.

Меӵак кизён амалэн туэ умой ужазы «Норьинское», УАССР-лы 10 ар нимо, «Малопургинский» хозяйствоосын. Муэз дасяны планъя чакламын вал 6 нунал ӵоже, нош кизёнэз йылпумъяны – 8-10 нунал ӵоже. План быдэстэмын. Бусыосын ужазы 75 агрегатъёс. Нырысь ик ужъёс мытэмын вал «Первый Май» но «Восход» СПК-осын.

«Восходысь» механизатор Виктор Кузьмин шуэ:

- Валаса ик ӧй вутты, кызьы ортчизы та кысык нуналъёс. Кидыс дыраз вутто, бусыын ик нуназе но ӝыт сюдылӥзы, тӥяськонъёс ӧз луылэ. Кулэ дыръя зорылӥз, кулэ дыръя пӧсь улӥз. Тани таиз берпуметӥез бусымы. Отчы кизёмы йыды. Эшъёсы-юрттӥсьёсы – Павел Алексеев, Михаил Ильин, Геннадий Романов. Тысь ворттэ Владимир Захаров, солы юрттэ Павел Семёнов.

Иван Аркашев.

Ура! Ижын усьтӥськиз Перепечкин кафе!!!

sergo — Mon, 14 May 2012 09:14:02 +0000

Интыяськемын Удмурт урамысь 304 номеро юртын (Аврора-Парк).

Ми ветлӥм ни – туж ческыт! Перепеч сяна, сёто зэмос пӧсь пельнянь – нокыӵе сояостэк, ӝот-ӝот сӥльлэсь. Огпол веръяды ке, лавкаысез шоры учкемды но уз ни поты.

Утялтэ куноостэс «Перепечкинын», ӧтё отчы эшъёстэс!

«Удмурт дунне» сюлмысь ӟечкыла удмурт сиськонни усьтэм пиосты. Ӝӧкты котьку тыро мед луоз, милемлы но мед палдоз.

Перепечкинъёслы эшлыко чуръёс

Зинаида Рябинина

Ӵукна перепеч пыжыса,

Иже куное потӥ.

Город шоразы вуи но

Ӝуась гур шоры ӝими.

Мар ишан та, мар шайтан та-

Кырын перепеч пыже.

Котыртӥз табапудэн

Семонов Семон эктэ.

Калык сылэ паймыса,

Чиньыосэ нюлыса.

Витьтон манетсэс сётыса,

Кошко, кӧтсэс пояса.

Перепеч так-то ческыт,

Но одӥг таба ӧжыт.

Нош кыксэ ке сиисько,

Моментально куайисько.

Кыӵе потэ веръяме

Городской перепечез.

Кыӵе потэ чупаме

Перепечкин Романэз.

Сие-юэ, куноос,

Усьсэ дуногес луоз.

Дано удмурт перепеч

Гылэтэн кошке туж ӟеч…

Мылкыд сёто алнашъёс

sergo — Fri, 11 May 2012 05:12:03 +0000

«Алнаш мылкыд» калык ансамбль та нуналъёсы аслэсьтыз 20 ар тырмонзэ пусйиз. Кылдытӥз вал сое Удмуртиысь культура удысысь дано ужась, кылбурчи но композитор Николай Постников.

20 ар ӵоже коллектив юнмаз, будӥз. Одӥг артистъёс кошкизы, мукетъёсыз лыктӥзы. Нош кутскисьёсыз пӧлын вал Удмуртиысь егитъёсын ужанъя министр Владимир Соловьёв, композитор Николай Уткин но мукетъёсыз. Соосын быдэсъям-улӟытъям нырысетӥ кырӟанъёссы «Палкышно», «Жингрес удмурт кырӟан», «Лулы мынам» али но ӵемысь чузъясько удмурт радио пыр.

Нырысь-валысь ансамбль кырӟанъёсынгес тодмо вал. Бӧрысь концертсэс тунсыкогес карон вылысь спектакльёсысь пичи люкетъёсты, сценкаосты возьматъязы. Та уже мыло-кыдо пыриськизы Удмуртиысь культура удысысь дано ужасьёс Фридрих Загуляев но Вячеслав Булдаков. Соос ӵемысь улӟытъязы ёросысьтызы ик шедьтэм маскара учыръёсты. Учкисьёслэн али ке но син азязы «Шайтан уллян уе», «Бӧрдон но парсь вандон сярысь», «Алнаш рокеръёс» сценкаос.

Концертъёсты аслаз эктонъёсыныз шулдыртӥз Удмуртиысь культура удысысь дано ужась Валентина Постникова.

Берло куинь аръёсы ансамбль трос вормонъёс басьтылӥз. Нырысь ик кивалтӥсьсы Николай Постников 2009-тӥ арын авторской кырӟанъя элькун фестивальын лауреат луиз. Со аре ик ансамбль «Салют Победы» Россиысь фестивальын лауреат ним басьтӥз. 2009-тӥ но 2011-тӥ аръёсы Йошкар-Олаын улосъёсысь эстрадая кырӟанъёсты быдэстӥсьёслэн фестиваль-конкурсазы пыриськыса, кыкысьтыз но кыкетӥ степенё лауреатлэн дипломеныз бертӥзы.

2009-тӥ арын «Алнаш мылкыдлы» калык ним сётӥзы.

Та аръёс ӵоже ансамбльысь артистъёс одӥг семья выллем луизы. Кылдӥзы асьсэлэн йылолъёссы но.

Ансамбль понна тужгес но секыт шуккет луиз бӧрсьысь бӧрсе кык дано адямизэс – Николай Уткинэз но Николай Постниковез – ватон. Николай Елисеевич шӧдтэк шорысь улонысь кошкем бере артистъёс кӧня ке толэзь ӵоже сцена вылэ потаны ик ӧз быгатэ. Но дыр эмъя, шуо. Али ансамбль нуллэ Н. Постниковлэсь нимзэ. Нырысь-валысь соин кивалтӥз Ольга Полякова, али – Людмила Корнева.

Та нуналъёсы черкогуртын «Алнаш мылкыд» 20 ар тырмонэзлы сӥзем концерт сётӥз. Быдэс клуб тыр люкаськем калык возьматӥз: алнашъёс ярато та ансамблез, мыло-кыдо лыкто концертъёсаз.

15-тӥ мае «Алнаш мылкыд» Ижын концертсэ возьматоз.

Людмила Сурчакова.

Come on, вормон!

sergo — Fri, 11 May 2012 05:10:33 +0000

«Евровидение-2012» калыккуспо конкурс Азербайджанын ортчоз 22-тӥ-26-тӥ мае. Тодады вайытом, Брангуртысь песянайёс отчы быръемын вал Россиын 7-тӥ мартэ ортчем конкурс дыръя – соос понна тужгес трос куаразэс сётӥзы учкисьёс, кырӟамзэс вылӥ дунъяз жюри но. Соос, 38,51 балл люкаса, азьпалтӥзы Биланъёсты-Тиматиосты.

Дано коллектив быдэстӥз Party for Everybody (Ваньмы ӵош шулдыръяськом) кырӟанзэс, со чузъяськиз удмурт но англи кылъёсын. Брангуртъёс али Москваын репетициос ортчытъяло, нош 13-тӥ мае Бакуэ лобозы ни. Удмуртиын улӥсь азербайджанъёс туж висё асьме бабушъёс понна. Соослэн «Достлуг» огазеяськонзы нимысьтыз келяськон ӝыт но радъяз. Чигиськоно кадь узыр ӝӧкъёс сьӧрын куно карыса, концерт возьматыса, соос удмурт песянайёслы Бакуын вормон сӥзизы, сяська керттэтъёс кузьмазы. Ми вань ӵыжы-выжыосмылы верамы ни, милямъёс понна куарадэс сётэ шуыса, верало эшлыко мылкыдо азербайджанъёс. Нош SalamNews бюроысь корреспондентъёс песянайёсмылэн кырӟанъёсынызы нимысьтыз видеоролик дасязы – сое конкурс мынон вакыт бергатозы Азербайджан телевидение пыр.

Келяськон ужрадэ пыриськизы удмурт кивалтӥсьёс но. «Удмурт кенеш» огазеяськонлэн тӧроез Николай Мусалимов шуиз:

- Финалын нырысетӥ ӧд ке но луэ, ми тӥледыз вормисьёсын лыдъяськом! Тӥледлы луыса удмурт кыл быдэс дунне тыр чузъяськиз! Удмурт калыкен, асьме шаеренымы тунсыкъяськыны кутскиз быдэс дунне!

Нациосын ужан политикая министр Владимир Завалин дасяське ни «Евровидениез» Ижын пумитаны! Угось песянайёсмы вормизы ке, кайтаяз конкурс Россиын ортчоз.

- Удмуртия быгатэ куно пумитаны, дасяськыны ар тырмоз, – туж оскыса вераз со.

Нош егитъёс, Брангуртысь песяйёсмылы дурбасьтыса, Ижын флэш-моб ортчытӥзы. Come on and dans крезьгур улсын Иж тымет дурын 120 нылъёс-пиос эктӥзы.

Туала шоуэ пыриськизы вуж ГАЗ автомобиль но байкеръёс. Ужрадэз гожтӥзы 8 видеокамера вылэ, ваньмыз со Интернет пыр вӧлмоз быдэс дуннее. Флэш-мобез радъясь Павел Поздеев оске: таӵе реклама асьме песяйёслы тросгес дурбасьтӥсь шедьтыны юрттоз. Соос одно ик вормыны кулэ!

Зинаида Рябинина.

Путин выльдӥськиз

sergo — Fri, 11 May 2012 04:57:39 +0000

7-тӥ мае Кремльын кузё воштӥськиз. Бадӟым дворецын ортчиз Владимир Путинлэн инаугурациез. Россиен со кивалтоз ини куинетӥзэ. Мон вань луонозэ но луонтэмзэ лэсьто, Россиысь трос миллион калыклэсь осконзэ быдэстон понна, шуиз со.

Уж борды Путин уралтэм мурт кадь басьтӥськиз. Инаугурация бӧрсьы кӧня ке час ортчыса вуиз-а, ӧз-а, со ини вылысьтыз вылаз кӧня ке указ поттӥз. Данаксэ соосты Путин пусйиз вал быръён вакытэ гожъям статьяосаз: экономикаез азинтон, национальной ужпумъёс, демократиез паськытатон, улон-вылонэз умоятон, армиын реформа ортчытон, мукет кунъёсын кусыпъёс.

Ваньзэ сое быдэсъяно но кыл кутоно луоз азьвылэз Президент, угось Владимир Путин гожтӥз Дмитрий Медведевез премьер-министре юнматон сярысь указ. Дмитрий Анатольевичлы дурбасьтӥз Кун Думаысь 299 депутат (тырмыт лыдъяськиз 226 куара). 144 мурт пумит мылкыдзэ вераз. Табере Дмитрий Медведев арня ӵоже Президентлы ӵектыны кулэ федерал ёзъёсты радъянъя но министре кандидатъёсъя чакланъёссэ.

Зинаида Рябинина.

Брангурт песяйёс вормыны дасесь!

sergo — Fri, 04 May 2012 11:08:18 +0000

8-тӥ куартолэзе Пичи Пургалась брангурт песянайёсмы Муское лобӟозы ни. Отысен кошкозы Бакуын ортчоно «Евровидение» ӵошатсконэ.
Азербайджанлэн шоркараз кырӟасьёсмы утёзы Россилэсь данзэ. Ӟеч сюрес но вормон сӥзиз соослы Президент А. Волков.
Коллективлэн нимыныз А. Волковлы тау кариз ансамбльлэн кивалтӥсез О. Туктарева. Милемыз, пе, кивалтӥсьёс уг вунэто. Висъям уксёен выль айшетъёс вуримы. Али утчаськомы, пе, гитара Н. Зарбатов арганчимес шумпоттыны.
Та вакытэ песянайёс асьсэ клубазы ик люкаськыло на, берпуметӥ репетициоссэс ортчытъяло. Сюрес вылэ потон азьын ваньзы ик картошказэс но бакча емышсэс мерттӥзы-кизизы. Бертыкузы бакчазы вожектэмын луоз ни. Оско: Россиын улӥсьёс брангурт песянайёс понна уз возьдаське.

Красногорскын ӝужаз синпелет

sergo — Fri, 04 May 2012 11:04:38 +0000

2-тӥ мае Красногорск ёросын усьтӥськиз Быдӟым оже пыриськем муртлы, Слава орденъёслэн кавалерзылы С. Пряженниковлы сӥзем синпелет. Митинге пыриськиз Президент А. Волков но.
Ӵапак тапалан вордӥське-мын Степан Григорьевич. Милиционер луыса ужаз. Ас вакытаз пыриськиз Россия но Финляндия куспын пуромем войнае. Быдӟым ож дыръя нюръяськиз Шундыпуксён, Белоруссиысь 1-тӥ но 2-тӥ фронтъёсын. Берлояз 538-тӥ миномётной полкын разведкаын ассэ ӟеч возьматӥз. Номырлэсь но нокинлэсь ӧз кышкалля. Кулонэз сое шедьтӥз Везенау город вӧзысь Одер шур дорын. Тушмон пуля ӧз сёты солы Быдӟым Вормонэз пумитаны. Нош кылемын вал 9-тӥ маёзь кӧня ке нунал гинэ.
Озьы ке но калык тодытэк ӧз кыльы солэсь курдатэк ожмаськемзэ. Сотэк-а Слава орденъёслэн кавалерзы но луиз? Сыӵе дано землякенызы данъяськыса ик, Красногорскын усьтӥзы памятник.
- Быдӟым Вормон нунал кыдёкегес но кыдёкегес мышке кыле. Но асьмелы уг яра вунэтыны со кышкыт ож аръёсты, отчы пыриськемъёсты. Чебер улон кузьмамзы туннэ соослы йыбырттоно. Котькыӵе уж мытыку, тодын возёно вормонзэс, ӟечгес тыршыны турттоно. Туннэ асьмелэн со вормонмы, – шуиз А. Волков.

Сергей Захаров

Ми потӥм 25 сюрсэтӥзэ!

sergo — Fri, 04 May 2012 10:39:05 +0000

Туннэ тӥляд кияды «Удмурт дунне» газетлэн 25 сюрсэтӥ номерез!
Та лыдпус газетчиос понна гинэ ӧвӧл, вань удмуртъёс понна данъяськымон луэ. Угось 1915-тӥ арысен потыны кутскыса, со туннэ но улэп! Та вакыт ӵоже газет сизьым пол нимзэ вошъяз, пӧртэм городъёсын печатласькиз, пӧртэм кивалтӥсьёсын ужаз, но котьку потӥз аслаз удмурт калыкез понна. Анай кылынымы вуттылӥз турлы иворъёс. Нырысетӥ дунне ож дыръя со калыкез югдытыны, вормон мылкыд пыӵатыны выриз. «Войнаысь ивор» ӧтьылӥз: «Одӥг коркан лыдӟем бере бускельёслы но коркась корка сётъяны косӥськом». Таӵе нимын куинь ар ӵоже оглом 27 номер потӥз.
1917-тӥ арын газетмы «Удморт» луиз. Ар но ӝыны ӵоже потӥз 6 номер. «Удморт» гожъяз: «Я лыке, удмуртъёсы, одӥг огмылэсь ум кышкалэ, одӥг азьын уломе».
1918-тӥ арын январе Огдыр правительство «Удмортлэсь» быдэсъяно ужпумъёссэ оскиз Елабугаын кылдытэм «Виль синь» газетлы. «Азьло туж пеймыт улӥм, табере ӧжыт люгдон мед йӧнтоз вал, тыршим ке, люгдом, иськавынъёс», – вазиськиз газет. Таиз 22 номер потӥз.
Сӥзьылзэ ини вӧлмыны ӧдъяз «Гудыри» – вазен ӵап сое лыдъяллям туала «Удмурт дуннелэн» кутсконэныз, но история ваньзэ интыяз пуктӥз.
1930-тӥ арын газет «Удмурт коммуна» луэ. «Азьло газет бамъёсысь нимаз улӥсь хозяйствоос сярысь лыдӟылӥмы, табере коммунаез, огъя улонэз лыдӟоме» – шуылӥзы адямиос. «Удмурт коммуна» юрттӥз гурт калыкез грамоталы дышетыны, колхоз сюрес вылэ султыны, странаямы социализм лэсьтыны. Та вакытэ туж трос гожъяськизы огшоры адямиос.
1943-тӥ арысен – «Советской Удмуртия». Газетэз потто воргоронъёс. Редакциысь тросэз ужасьёс фронтэ мынӥзы, перозэс пыӵалэн воштӥзы. Тросэз арлыдо лыдӟисьёсмы милемды туннэ но «Советской Удмуртия» нимало. Ӵап со вакытаз газет бордаз тросгес лыдӟись люказ, сое данын возизы вылӥ кивалтӥсьёс. «Советской Удмуртия» гожъяз республикамылэн ӝутскем сюресэз, солэн азинскон вакытъёсыз сярысь, валэктыны выриз партилэсь политиказэ, ӝутылӥз сюлэмшугъяськытӥсь ужпумъёсты. Газет арняяз куать пол потылӥз, собере вите выжиз.
1992-тӥ арын нимыз луиз «Удмурт дунне». Валамон ини, со асьмелэн вордӥськем но улон интыенымы гинэ герӟаськемын ӧвӧл, та ним усьтэ асьмелэсь, удмуртъёслэсь, пуш дуннемес но, улон-вылон сямъёсмес но.
97 ар ӵоже потӥсь газетлы туннэ тросэз вожъяськозы – сокема возиськы ай. Возиськем гинэ ӧвӧл, лыдӟиседлы тунсыко луыны пӧрмыты! Али газет арняяз куинь пол потэ. Туннэ «Удмурт дуннелэн» вылбамаз ми куалекъяса но уженымы туж данъяськыса пуктӥськом – 25 сюрсэтӥ номер! Кӧня гурезь газет! Кин ке лыдъям – шорлыдын куамын Эверест ӝужда! Нош кӧня иськем гожтэм чуръёс! Кӧня шумпотон синкылиос! Угось тросэз верало: газет луиз улонам зэмос эш. Зэм, туала вакытэ лыдӟисьёслэн лыдзы синэ, озьы ке но ми туннэ та лыдпусмес пусйиськом шаерысьтымы но бускель улосъёсысь 5 сюрс эшъёсынымы. Тау тӥледлы милемды быръемды понна.
…Огласянь, сю аресэзлы матэктыса, газет куштӥськиз кадь кыӵе ке огъя ӧтёнъёслэсь, но туала югдурмес малпано ке, асьмелы, удмуртъёслы, мултэс ӧй луысал выльысь со вашкала индылонъёсты тодэ вайыны. «Войнаысь ивор» шуэм сямен, возьматэ туннэ номермес бускельёстылы, шумпотэ, асьмеос быгатӥськом лычсузьымон анай кылынымы вераськыны, лыдӟиськыны, газет пыр шумпотонмес но сюлэмшугмес усьтыны. «Люгдон мед йӧнтоз асьмеды», вань удмуртъёслэн газетсылэсь сю арес тырмонзэ тросгес эшъёсын пумитаны мед кылдоз.
Праздникен! Яратэ анай кылдэс.

Зинаида Вахрушева (Рябинина),
валтӥсь редактор

Пеймытэз сӧрись югыт тыл

udmdunneadmin — Fri, 04 May 2012 05:16:31 +0000

Туннэ ӝыт учкисьёслы кузьым лэсьтозы Удмурт кун университетын тодон-валан люкась удмурт студентъёс – университетлэн нырысетӥ юртаз пуктозы «Яратон, яратон» спектакльзэс. Со бордын ужазы но пӧртэм рольёсты быдэстӥзы «Ватка» этностудиысь студентъёс. Соосты асьсэды сцена вылын возьыны дышетӥз Удмурт Республикаысь искусство удысысь дано ужась Василий Ушаков.
…Куанер Лиза синмаське узыр Эрастлы. Но таид коньдонэн герӟаськем шуг-секытъёсызлы луыса ненег но чылкыт сюлэмо нылашез куштэ, яратонзэ пыд улаз лёга. Лиза тае уг чида, адямиослы осконзэ ыштэ но югыт дуннеысь кошконо кариське. Та учыр возьматэмын, тодмо ӟуч гожъясьлэн Николай Карамзинлэн «Бедная Лиза» повестез вылэ пыкъяськыса. «Ватка» студиысь егитъёс солэсь пуштроссэ туннэ нунал вылэ выжтӥзы.
Спектакльысь мукетъёсыз геройёс – Лади но Италмас. Ладилэн адӟонэз сыӵе вылэм – улонысь егитысен кошке, яратоно Италмассэ огназ кельтэ. Италмаслэн уг поты та сьӧлыко дунне вылын яратонтэк улэмез – со но Ладиез сьӧры сопал дуннее кошконо кариське. Таиз учыр пуктэмын удмурт писательлэн Михаил Петровлэн «Италмас» поэмаезъя.
Та кык учыръёсты огазея одӥг мылкыд – яратон. Мар со сыӵе: шумпотон яке куректон? Яратон – со пеймытэз сӧрись югыт тыл.

Елена Никитина