А. Логинов.

30-тӥ апреле асьсэлэсь нуналзэс пусъё тылпу кысон удысын ужась­ёс. Та вакытэ шаерамы соос 2 сюрс 500 кузя.

Та югдурез син азяз возе Россиысь МЧС-лэн Удмурт Республикая валтӥсь управлениезлэн кивалтӥсез Пётр Фомин. Городысь тылпу кысӥсьёс «горд атас» доры 5 минут куспын вуыны кулэ, нош гуртъёсын – 20 минутозь. Валамон, пыдлось гуртъ­ёсы мыныку, пӧртэм шуг-секытъёс пумиськыло. Югдурез тупатон вылысь ваньмаз сямен гуртъёсын кылдытыны чакламын мылкыд карисьёслэсь дружинаос. Та вакытэ адӟем карымон тыршо «Увадревхолдинг», Можга ёросысь «Россия» огазеяськонъёс, Сарапул ёросысь Дулесово муниципал кылдытэт.

Туннэ Удмуртиын кылдытэмын ни тылпулэсь утиськонъя 175 комнада но 125 дружина – 2 сюрслэсь ятыр адями. Ар кутсконысен соос 43 пол тылпу кысонэ пыриськизы, 6 муртэ утьыны быгатӥзы.

Кышкыт учыр вал январь толэзе Дэри ёросысь Вожой починка гуртын. Тылпу кысыны нырысь ик вуизы «Восточный» огазеяськонысь доброволецъёс. Соос «горд атасэз» дыраз кортназы. Кышкытлыклэсь утиськон вылысь клубъёс но кылдытӥсько. Кылем арын, кылсярысь, Ижын 5 клуб ужаз ни. Отчы пыриськись­ёс калык пӧлын валэктон уж нуо, нылпиосын ӵош спектакльёс дасяло.

Кылем ар секытэн сётскиз пичи пургаослы. Пугачёвоын пуштылон учыре юрттэт сётыны вуизы тылпу кысонъя 37 номеро частьын ужасьёс. Дӥсьтӥсь, кышкасьтэм луэмзы понна 3-тӥ апреле Россиысь Президент Дмитрий Медведев Указ гожтӥз соосты кун наградаосын пусъён сярысь. Мужество орден сётэмын карауллэн кивалтӥсезлы Артемий Костенковлы, «За отвагу» медаль – Александр Логиновлы, Николай Мокрушинлы но Сергей Русиновлы, «За спасение погибавших» медаль – Дмитрий Александровлы, Сергей Жижинлы, Николай Кельтымовлы но Герман Фоминлы.

- Со нуналэ мон доре укшай, – шуэ Александр Логинов. – Изьыны дасяськисько вал. Но ваньзэ вунэтоно луиз – дыртыса уже вамыштӥ. Пугачёвоозь 8 иськем. Отчы 9 минут куспын вуимы. Сыӵе учыръёс дыръя котьку но сайкыт йырвизь, юн сюлэм луыны кулэ. Тылпу кысӥсьёсмы ӧз ыштӥське – ваньзэ тыпыр-тапыр быдэстӥзы.

Валентина Емельянова.

Кызьы ивортылӥм ни, четырёххлористой углерод декабрь пумысен кылле куштӥськем асфальтобетон заводын. Та дырлы битумохранилищеысь йӧ пырыосын но вуэн тырмытэмын ни 110 бекче.

- Котькуд нунал объектын тырше 33 адями но 9 пумо техника, – вераз Президентлы Александр Волковлы Правительстволэн Тӧроезлэн воштӥсез Ильдар Бикбулатов.

Азьвыл ивортылӥзы, 5-тӥ апреле 26 контейнерез Ленинград улосысь полигонэ утилизацие келялозы шуыса. Но эскеронъёс ортчытэм бере шараяськиз, та бекчеосын ядэз трос ӧвӧл – сыӵе суретэз утилизацие уз кутэ.

Республикаысь комиссия та пумысен нимысьтыз кенешиз. Чакламын: вуэз но ядэз фильтрация амалэн ог-огзылэсь люкозы. Тае быдэстон понна нимысьтыз установка вуттозы Балезиное. Посёлокын улӥсьёс таӵе ужъёслэсь кышканы кулэ ӧвӧл. Уго бӧрысь отходъёсты одно ик нимысьтыз полигонэ нуозы.

Инкуазь узырлыкъёсъя но инкуазез утёнъя министерствоысь специалистъёс чакламъя яд пыӵамын гуэ кылем ог 400 кубометр битуме. Матысь дыре тодмо луоз, кыӵе амалэн сое утялтозы.

Балезиноысь омырез но дугдылытэк чаклало. Берло лыдпусъёсъя битумохранилище котырын шараямын четырёххлористой углеродлэн одӥг кубической метрын 0,96 миллиграмм концентрациез. Таӵе ужан интыын яд луыны быгатэ 20 миллиграмм котыр. Улон коркаос котырын химия сурет туж ичи – кубической метрын 0,018 миллиграмм – татын тужгес бадӟым лыдпус 0,7 миллиграмм луыны быгатэ.

Со сяна, Удмуртие «саламзэ» келям «Химпром» огазеяськон но юрттыны мылкыд кариз. Предприятие Балезиное ыстӥз яд суретъёсты возьыны чаклам бекчеосты, «Химпромлэн» лабораторияз пыр-поч эскеро посёлокысь вуэз, омырез но муэз. Предприятилэн директоръёсызлэн кенешсылэн тӧроез В. Вексельберг Удмуртиысь кивалтӥсьёслы кылзэ сётӥз, котыр ласянь юрттэт луоз шуыса.

Елена Скворцова.

Отын со пумиськылӥз Россиысь коньдон ужпумъёсъя министрен Антон Силуановен. Кивалтӥсьёс ӵошен эскеризы Пичи Пурга ёросысь юртъёсты тупатон пумысен югдурез.

А. Волков озьы ик пумиськылӥз «Химпром» заводлэн кузёеныз Виктор Вексельберген но химия ож тӥрлыкез возёнъя но быдтонъя федерал управленилэн кивалтӥсеныз генерал-полковникен Валерий Капашинэн. Соос вераськизы Балезино ёросысь химия суретлэсь кылем-мылемъёссэ палэнтон сярысь.

Россиысь Правительстволэн Тӧроезлэн воштӥсеныз Владислав Сурковен пумиськон сӥземын вал республикаысьтымы тазалыкез утён радлыкез азинтонлы.

- Пумиськонъёсын эскерем вань ужпумъёсъя асьмелы юрттозы, – шуиз А. Волков.

Иван Аркашев.

Шаерамы кылдытэмын наркотикъёсын нюръяськонъя нимысьтыз комиссия, кивалтэ соин Президент Александр Волков. Та комиссилэн берлояз кенешоназ кылем арлы йылпумъянъёс лэсьтӥз Россиысь Наркотикъёсын но шузимытӥсь суретъёсын нюръяськонъя кун службалэн Удмурт ёзэныз кивалтӥсь Сергей Зуев:

- 2011-тӥ арын Удмуртиын наркотикъёсын герӟаськем 2 сюрс 272 йыруж шараямын, валля арынлэсь со 2,7 процентлы тросгес. Кыл кутон улэ кыскемын 1 сюрс 19 мурт. Йыртэмасьёс киысь 271,8 килограмм шузимытӥсь суретъёс таламын…

Вань лыдпусъёсыз тазалыкез утёнъя министрлэн Владимир Музловлэн:

- Наркологияя диспансерын али 2 сюрс 621 мурт учётын. Дыраз юрттэт сётыса, кулэстыны быгатӥм наркотикъёсын сэрен кулэмъёслэсь лыдзэс: кылем арын таӵеос 20 вал, валля арын – 56.

Люкаськылӥз МВД-лэн общественной кенешез. Татын но валтӥсь ужпум – наркотикъёсын нюръяськон. Котырес ӝӧк сьӧрын вераськонэ пыриськизы югдурез утёнъя министр Александр Первухин, полицейскойёс, наркополицейскойёс, Егитъёсын ужан политикая, Дышетонъя но наукая, Тазалыкез утёнъя министерствоосысь специалистъёс.

Александр Первухин мылкыдзэ вераз:

- Республикаысьтымы ог 11 сюрс мурт шедемын наркотикъёслэн вотэсазы – со шузимытӥсь суретъёсты вӧлмытӥсьёс но, соосын кушласькисьёс но. Бен, берло дыре кунмы гижысь-пиньысь басьтӥськиз наркотикъёсын нюръяськон борды. Югдурез утёнъя ёзъёс, пӧртэм министерствоос одӥг кыткетын ужало. Шумпоттэ: огшоры адямиос но вазиськисесьгес луизы. Шузимытӥсь суретъёсын вуз карон интыосты тодыкузы, соку ик иворто наркополицейскойёслы…

Зэм, наркобаронъёс мурт синкылиос вылын узырмонлэсь уг кепырало.

- Республикаямы али героин ӧжытгес, – азьланьтӥз веранзэ Александр Первухин. – Сое басьтыны наркоманъёс шугъясько. Таин валлин та суретлэн дуныз но кык поллы йылэмын ни. Нош наркоманъёс меӵак верало: толэзь ӵоже вень вылын пукон понна, одӥг квартирае лушкаськыны пыраса, коньдон тырме вал, табере кыксэ-куиньзэ но сузяно луэ. Озьы йыртэман учыръёс тросгес луо.

Но наркополицейскойёсты, югдурез утисьёсты уката шугъяськытэ мукетыз. Луэ озьы: одӥгъёссэ суретъёсты наркотикъёс пӧлы пыртон сярысь закон кутӥське, та вискын кылдо ни мукетъёсыз. Соин ик шузимытӥсь суретъёсты вӧлмытӥсьёслэсь кылзэс но куддыр юаны уг луы.

***

Валля арын республикаямы вуиз «крокодил». Озьы нимало наркоманъёс дезоморфинэз. Кылем арын та сурет уката паськыт вӧлмиз Сарапул, Камбарка палъёсын – отын со героинэз воксё воштӥз, шуыны луоз. Туннэ нуналлы 6 мурт кулӥз ни, 127-ез басьтэмын республикаысьтымы наркологияя диспансере.

Специалистъёс шуо: героинэн кушласькись мурт 7 ар улыны чида ик ке, дезоморфин адямиез ар куспын быдтэ. Суретысь секыт металлъёс нырысь вирсэръёсты, собере сӥльбыгытъёсты, пуш ёзвиосты сисьто. Соосты нырысетӥ кык-куинь толэзьёсаз гинэ йӧнатыны луэ на, отӥяз мугорлэн висёнъёсын нюръяськон кужымез уг тырмы ни.

Дезоморфинэз пӧзьтонэ ватсало кодеинэн эмъюмъёсты. Таосыз эркын вузасько – соос наркотикъёс пӧлы пыртымтэ. Озьы ке но Президент Александр Волков чурыт вераськемен, Сарапулысь аптекаосын берло дыре та эмъюмъёсты одӥг адямилы кыклэсь ятырен ӧз сётъялэ ни. Югдурез утисьёс шуо: таӵе вамышлэн пайдаез соку ик шӧдӥськиз, Сарапулын дезоморфин пӧзьтӥсьёс ӧжытгес луизы. Но табере соос вань ни мукет ёросъёсын, «крокодил» вуиз Иже но.

МВД-ысь общественной кенеше пыриськемъёс огкылэ вуизы: кодеинэн эмъюмъёсты мукет ёросъёсын но эркын вузамысь дугдоно. Адӟем кароно, пе, Башкортостанлэсь но мукет республикаослэсь. Отын та пумысен нимысьтыз декларациос кутэмын ни. Одӥг кие кык эмъюмез вузаны уг лэзё, аптекаосысь ӝажыос вылэ та подоваосты уг тыро, нылпиослы соосты уг вузало. Со сяна, котькуд аптекалэн кивалтӥсез дырын-дырын ивортылэ наркотикъёсын нюръяськонъя службаосы, кӧня мурт дорысьтызы кодеинэн эмъюм басья. Та кулэ югдурез чакласа возён понна.

***

Югдурез чакласа возён вылысь ик Кун Кенешысь депутатъёс кылем арын юнматӥзы алкоголизмез, наркоманиез, токсикоманиез алонлы сӥзем законэз. Со шӧлкын табере егитъёс пӧлын наркотикъёслы тестирование ортчытыны лэземын.

Вера Наркотикъёсын но шузимытӥсь суретъёсын нюръяськонъя кун службалэн Удмуртиысь ёзысьтыз валтӥсь специалист Татьяна Романова:

- Кылем арын таӵе тестирование ортчытэмын Ижысь одӥгаз училищеын. 143 мурт со пыр потӥз. Витезлэн шараяськиз наркотикъёсты шӧмъямез. Туэ таӵе эскеронъёсты ортчытыны чакламын ни Ижысь, Сарапулысь но Балезиноысь училищеосын. Угось со городъёсын-ёросъёсын тужгес паськыт вӧлмемын шузимытӥсь суретъёс.

Тестирование азьланяз ортчытозы, вылды, школаын дышетскись пиналъёс пӧлын. Угось наркотикъёсты шӧмъяны кутскемъёс вань таос пӧлын но. Соин ик югдурез утисьёс сак кариськыны куро анай-атайёсты. Тае лыдэ басьтыны кулэ Дышетонъя но наукая министерство но.

- Ӧжытак буйгатэ соиз, – азьланьтӥз веранзэ Татьяна Романова. – Кылем арын республикаысьтымы наркологияя диспансер бордын усьтӥськиз быдэ вуымтэослы реабилитацияя центр. Шуге-леке вуэм пиналъёс отын уй но, нунал но уло, тазалыксэс юнмато. Центр узырмытэмын туала куронъёслы тупась эмъян но диагностикая тӥрлыкен. Нылпиосын ужало наркологъёс, педиатръёс, психологъёс но мукет специалистъёс.

Но реабилитацияя таӵе центръёс туж кулэ на мӧйыослы но. Республикаямы туннэ кӧня ке гинэ огазеяськонъёс выро азьвыл наркоманъёсты шонер сюрес вылэ султонэн. Но соослы кун ласянь юрттэт уг вуы бере, асьсэды возён вылысь ужано луо коньдонэн. Соин ик отчы сюрыны котькуд мылкыд карисьлэн луонлыкез ӧвӧл.

Тросэз специалистъёс верало: азьвыл наркоманъёс уг луо. Соин ик пӧлысьтымы котькудмы сак луыны кулэ: ӧвӧл-а вӧзамы шузимытӥсь суретъёслэн кыӵесазы пырыны дасяськемъёс. Соослы шуныт кимес дыраз мычыса, мед вуттом вылэм.

Элина Кумачёва.

Кышкыт суретэн йӧэз корало ломен.

Балезино посёлоке кисьтэм кышкыт сурет сярысь ивор вӧлмиз быдэс Россие. Куинь толэзь ӵоже яд кылле куштӥськем асфальтобетон заводлэн битумохранилищеяз. Четырёххлористой углерод (тетрахлорметан), вуэн сураськыса, 160 тонналэсь ятыр луиз. Балезиноын улӥсьёс та кышкыт иворез тодӥзы 14-тӥ мартэ гинэ.

Кылдэм югдурез тупатон вылысь али, шутэтсконэз тодытэк, ужало МЧС-ысь специалистъёс. Югдурез ялан син азяз возе Удмуртилэн Президентэз.

Выль ар кузьым

23-тӥ декабре Балезино станцие вуиз кышкыт суретэн 3 цистерна. Яд поттӥсь – Чувашиысь Новочебоксарск городысь «Химпром» завод. Балезиноын та кылем-мылем суретъёс сётэмын вал «Ленхиммаш» огазеяськонлы – та предприятилэн «йырыз» интыяськемын Санкт-Петербургын, нош филиалэз вань Ижын.

- «Ленхиммашлэн» ядэз утялтон понна нокыӵе лицензиез ӧй вал. «Химпромлы» соос «суредам» документ возьматӥзы, нош Новочебоксарскысь предприятие эскерыса-мар ӧз улы – суретэз сётӥз, – вераз Следствиея управленилэн кивалтӥсез Владимир Никешкин.

Ядэз утялтонъя нимысьтыз полигон вань Ленинград улосын. Но кузь сюрес вылэ цистернаос ӧз потэ. Следовательёс шараязы: 3 вагонысь суретэз нуллӥзы битум возён интые. 12 рейс лэсьтӥзы йыртэмасьёс – кӧшкемыт сурет выжыяськиз Балезино ёросэ. Кытчы киськазы сое – полиция шараяз 2 нунал ортчыса гинэ.

26-тӥ-29-тӥ декабре чугун сюрес станцие эшшо куинь вагон яд вуиз на – но тазэ суретэз шыпытак кисьтыны ӧз луы. Цистернаосты берен келязы Иже. Отысен 2 вагон вуиз Татарстанэ, огез берытскиз «Химпром» заводэ.

Та учыръя Следствиея управление ӝутӥз уголовной уж. Кылзэс юано муртъёс али 6 кузя: кыкез – Татарстанын, ньылез – Удмуртиын улӥсьёс. Янгыше уськытоно адямиос пӧлысь огез – Балезино ёрос администрацилэн йырыз Сергей Наговицын. Кивалтӥсь, ужысь мозмытыны курыса, заявление гожтӥз кылем арняе. Янгыш кароно мукет муртъёслэсь нимтулъёссэс следовательёс уг на шараяло. Пусъё огзэ: та огазеяськыса йыртэмась группа вал. Сотэк кытысь тодысалзы палэнысь вуэм муртъёс куштӥськем завод сярысь.

- Та югдурын тужгес бадӟым янгышез «Химпромлэн». Со поттэ вуз, солэн ик кылдо отходъёсыз. Иське, завод сюлмаськыны кулэ та ядэз тыро-пыдо утялтон пумысен. Уг-а луы «Химпромлы» пумит уголовной уж ӝутыны? – юаз Президент Александр Волков.

- Та пумысен нимысьтыз эскерон ортчытом, – оскытӥз Следствиея управленилэн кивалтӥсез.

Тусыз чылкыт, ачиз кышкыт

Малы декабре луэм учырез сэрттыны-пертчыны кутскизы мартэ гинэ? Удмуртиысь прокурор Сергей Панов тазьы малпа:

- Та учырен герӟаськем документъёс 17-тӥ январёзь полициын ӝегазы. Уго Росприроднадзор кематэк экспертиза ортчытыны ӧз быгаты.

Росприроднадзорлэн Удмуртиысь управлениеныз кивалтӥсь Владимир Григорьев вера:

- Эскеронэз ортчытыны туж секыт вал. Специалистъёс рос-прос ужазы. 1-тӥ мартозь ӧм тодэ, мар сурет со. Соин дырызлэсь вазь гырлы жугыны кулэлыкез ӧй вал.

Четырёххлористой углерод вуэн сураськиз, кыӵе ке люкетэз васькиз битумохранилищелэн пыдэсаз. Сурет 5,5 поллы секытгес, омыр сярысь. Кезьыт куазен со кышкыт ӧвӧл – бус уг вӧлскы. Кенешыны ӧтемын вал Камбаркаысь но Кизнерысь кышкыт суретъёсты тодӥсь устоосыз специалистъёс. Соосын валче кутэмын решение: куазь шунытгес луэмъя ядэз утялтоно. Йӧлэн зӧкталаез интыен-интыен пӧртэм: кытын ке 20 сантиметр, мукет азяз – 30 сантиметр.

Четырёххлористой углерод кышкытлыкезъя 2-тӥ классъемъёс пӧлы пыре. Вань ядъёс люкисько 5 класслы. Куд-огез ӝожтӥське тазалыкез вылэ.

Озьы ке но больницае вазиськиз одӥг мурт гинэ. Врач солы «невроз» диагноз пуктӥз. Адямиос асьсэды юнме кышкато, шуэ Следствиея управленилэн кивалтӥсез Владимир Никешкин. Калыкез буйгатэ МЧС-лэн Удмуртиысь управлениеныз кивалтӥсь Пётр Фомин но:

- Балезиноын кышкыт югдур (чрезвычайной ситуация) ялон понна нокыӵе мугъёс ӧвӧл. ЧС ялэмын битумохранилище котырын 20 метрын гинэ. Оглом кышкыт югдур кылдоз, омырын люкаськем сурет 5 поллы йылӥз ке. Норма – кубический метрлы 0,7 миллиграмм. Балезиноысь омырын яд люкаськемын 0,001 миллиграмм. Битумохранилище вӧзын – 0,002 миллиграмм. Со понна омырын шӧдӥське ӵын зын – посёлокысь котельнойёс но мукет гуръёс омырез тросгес кырсёмыто, шӧдске.

«Химпром» завод кылдэм югдурлы тыбырын ӧз кариськы. Предприятие Казаньысь вуттӥз химия суретэз возьыны чаклам бакъёс. Кык кубометръем 52 бекчеос кык нунал куспын тырмизы.

- Уж секыт, – уг танӥськы Пётр Фомин, – сое ӵошатыны луоз ву вылысь мувӧез октонэн гинэ. Йӧэз кораськом, векчи пырыоссэ но бакъёсы тыриськом.

Спасательёс ужало огшоры противогазъёсын но Л-1 (резина) костюмъёсын. Ужъёс чалякгес радъяськысалзы, но уг тырмо йӧ тырон бекчеос. Четверге – 29-тӥ мартэ – эшшо одӥг партия бакъёсты вайизы. Пётр Фоминлэн сюлмаськонэз одӥг – тудву кошкытозь, ужъёсты йылпумъяно.

Юалэ – валэктозы

Балезиноын улӥсьёслэн сюлэмъёссы пирсэкъяло. Калыклэн мылкыдыз кык пӧртэм. Огъёсыз чакласько, мукетъёсыз кивалтӥсьёсты тышкасько но митингъёсы пото.

Пусъёно огзэ: ёрос йыр Ришат Мухгалимов юанъёслэсь уг пегӟы. Со калыкен но вераське, ёросысь газет, радио но телевидение пыр лад-лад ивор сётэ. Радъямын «пӧсь» телефон – таиз уй-нунал ужа, специалистъёс юанъёслы валэкто.

- Бен, шумпоттӥсез ӧвӧл. Но калык воксё уг куалекты, – вераз Балезино ёросысь «Вестник» газетлэн корреспондентэз Аэлита Князева. – Посёлокын нокыӵе зын ӧвӧл. Ачим со кисьтэм отходъёс доры куинь пол вуылӥ ни. Номырзэ ӧй шӧды. Спасательёс ужало противогазъёсын – кышкытлыклэсь утиськонъя куронъёс сыӵе. Зэм, огез паймытэ. Малы та дырозь ӧз на вуттэ ӟеч техника? Соин сэрен спасательёс кын йӧэз ломен пильыло – пыр вашкала сямен ужало ук.

Со вакытэ сак кариськыны куремын МВД-ын но МЧС-ын ужасьёсты. Полицейскойёс сыло битумохранилище котырын, ватсамын патрульёс Балезино посёлокын. Зэм, югдурез утисьёс дасясько уродэзлы. Министр Александр Первухин верамъя, Самараысь вуизы ватсам фильтрен противогазъёс. Соос кулэ медаз луэ вал.

Бекче келян

Ёрос йырлэн Ришат Мухгалимовлэн вань эшшо одžг сюлмаськонэз. Кышкыт авариез утялтонын ужасьёсты сюдыны кулэ. Кык арнялы кошкоз 760 сюрс манет. Ёрослэн запас коньдонэз ӧвӧл. Таиныз юрттоз республика. Югдурез тупатыны нимысьтыз фондысь 200 сюрс манет висъяз ни МЧС-лэн Удмуртиысь управлениез но.

Средае Балезиное вуылӥз Президент Александр Волков. Со тодматскиз, кызьы мынэ уж. Асфальтобетон завод котырын дасямын нимысьтыз склад – татчы спасательёс люкало йӧ пырыен тырмытэм бакъёсты. Шуныт сётӥсь пушкаосын али со ворсам бекчеосты шунто – уго кышкыт суретъёсты нуыны луоз, куронъёсты рос-прос чакласа гинэ. Бӧрысь та бакъёсты машинаосын ворттозы Ленинград улосысь полигонэ. 5-тӥ апреле нырысетӥ машинаос сюрес вылэ потозы шуыса. Транспортлэсь мынэмзэ чаклалозы МЧС-ын ужасьёс – котькуд улосын та грузэз киысь кие сётъялозы.

Президент пыриськиз ёрос администрациын радъям кенешонэ. Татын вань люкаськемъёслы выль ивор сётӥз МЧС-лэн Удмуртиысь управлениеныз кивалтӥсь Пётр Фомин. Со верамъя, кылем-мылем ядъёсты утялтон но районысь келян йылпумъяськыны кулэ 25-тӥ апрелёзь.

Балезиноос уло осконэн, вань ужъёс дыраз быдэстэмын луозы шуыса.

Алёна Ионина.

Ольга Иванова.

Можга городын будэм нылаш Ольга Иванова (Балобанова) пичи дыръяз вуриськись луон сярысь малпалляз. Школаын дышетскыкуз, «Быгатӥсь киос» кружоке ветлӥз, чебер дӥсь вуриз аслыз но тодмоосызлы, покчиослы ас киосыныз небыт шудонъёс лэсьтылӥз. Нош аръёс ортчыса, улон сюрес сое чылкак мукет ӧре вуттӥз.

Тодон-валан люказ Можгаысь 3 номеро школаын. Котькыӵе уже мыло-кыдо пыриськылӥз: кырӟаз-вераз, спортэн эшъяськиз, вуриськонъя кружоке ветлӥз. Нош улонын сюрес быръёно луиз но эшъёсынызы ӵош Иваново городысь Текстильной институтэ вамыштӥз. Инженер-технологлы дышетскыса, вуриськисьын ужаны кутскиз.

1990-тӥ аръёсы ваньмыз йырин-чукин берыктӥськиз. Вуриськисьёслы кулэяськисьёс ӧз луэ. Нимаз ужбергатӥсьёс дорын кӧня ке ар ужаса вуттӥз ик вал, отын но толэзьёсын уждун ӧз тыре. Нылашлэсь ужтэк пукемзэ адӟыса, ӵыжы-выжыосыз милицие ӧтиллям. Кема малпаськыса улымтэ, выль удысэ вамыштэм. Озьы со 1997-тӥ арысен формаен ветлыны кутске. Ужан куспаз МВД-лэн Нижний Новгородысь академиезлэн Ижысь филиалаз тодон-валанъёссэ будэтэм.

- Нырысь нуналъёсысеныз ик выль уже кельшиз, – шуэ Ольга Игоревна. – Дознаватель луыса тырши. Документъёс бордын бугыръяськон, йыружъёсты сэрттон-пертчон нырысьпал секытгес потӥз ке но, уже туж кельшиз. Куд-ог эшъёсы нырысь толэзьёсаз уйёссэс ӧз кӧлалэ, трос синкылиос кисьтӥзы. Валамон, сыӵеосыз дознавательын кема ӧз чидалэ, ужысьтызы кошкизы. Мынам но секыт дыръёсы вал, озьы ке но ужме одӥгзэ но ӝыныё ӧй кушты. Туж юрттӥз спортэн эшъяськеме. Угось школаын дышетскыкум ик, куасэн бызьылонъя нырысетӥ разрядлэсь куронзэ быдэстӥ.

Аръёс ортчыса, Ольга Игоревна семья кылдытӥз. Кузпалыз Александр Анатольевич Балобанов МЧС-ын ужа. Настя но Евгений нылпиоссы будо. Дознавательын 11 ар ужамез бере, быръем удысэз «лазеггес» потыны кутскемен, «мургес» интые вамыштӥз – городысь следствиея управление, тужгес секыт йыружъёсты эскере. Ужзэ умой быдэсъямез понна кылем арын пусъемын вал «Устоез следователь» нимын.

- Бӧрсьысь бӧрсе секыт йыружъёсты эскероно луиз, – веранзэ азьланьтӥз юстициысь майор Ольга Балобанова. – 2010-тӥ арын машинаосты лушкась группаез кырмыны удалтӥз. Йыртэмасьёсты трос аръёс ӵоже эскеримы. Ульчаысь машинаосты лушкаса, кузёезлы ӝыны дунын берыктылӥллям. Нош басьтыны пумитъяськисьёслэсь я вакчи дыр куспын коньдон шедьтыны быгатӥсьтэмъёслэсь «корт валзэс» чыры-пырыен вузаллям. Йыртэмасьёс Ижын но Сарапулын ужаллям, тая 24 уж ӝутэмын. Лушкаськисьёс 4 миллион манет тыр узырмыса вуттӥллям вылэм, та вакытэ быдэс группа пытсэт сьӧрын пуке.

«Сьӧд» риэлторъёсын герӟаськем уж но быдэс шаермес зуркатӥз. Ньыль мурт, одӥгез Ташкентысь вуэм адями, начар улӥсьёслэсь, юыны яратӥсь муртъёслэсь бадӟым квартираоссэс пичиеныз вош­тылӥллям, гуртысь коркаен я чылкак улон интытэк кельтылӥллям. Таяз 14 учыр пусъемын, 11 мурт липеттэк кылем.

Туннэ но Ольга Игоревналэн ӝӧк вылаз вить уголовной уж кылле. Ӵем дыръя эскероно, пе, луэ жугиськонэн, лушкаськонэн, наркотикъёсты вӧлмытонэн герӟаськем ужъёсты. Кыл кутон удысын ужасьёс асьсэ тодон-валанъёссэс будэтон сярысь но сюлмасько. Вань законъёсты тодэм сяна, пӧртэм сямо адямиосын огкыл шедьтыны кулэ. Адямилэсь сямъёссэ тодон понна психологиез но дышето. Угось йыртэмасьёс пӧлын котькыӵеосыз пумисько. Куд-ог дыръя кышкатъясьёсыз но, пе, шедё.

Балобановъёслэн семьяязы котьку но шуныт омыр кузёяське. Дорысь ужъёссэс ноку уг люко: кин ваньме, со ик быдэстэ. Одӥгзэ жаля: туж шер дыръя быдэс семьяенызы шутэтскыны кылдэ. Куд-ог секыт нуналъёсыз бере Ольга Игоревна вуриськон машина сьӧры пуксьылэ. Басма юдэсъёсыз итылыкуз, пе, йырысьтыз вань секыт малпанъёс тӧлӟо. Вуриськисьлэн кибервылыз ужан кабинетысьтыз чеберъям штораосызъя но шӧдӥське.

Валентина Емельянова.

Кузьым басьтон но пӧяськон

Тани 2011-тӥ арын шараямын 2 сюрс 339 йыртэман. Соосъя ӝутэм уголовной ужъёс возьматӥзы: йыртэмасьёс оглом 141 миллион манетэз асэстыны выриллям. Та коньдонлэн бадӟым люкетэз – 120 миллион манетэз – берыктэмын.

Тросэз йыртэманъёс шараямын вуз карон удысын. Управлениын ужасьёс ӵем радъяло «Контрафакт» операциос. Уката ӵемгес син азязы шедё лицензитэк аудио-, видеодискъёсты вӧлмытӥсьёс – 600 сюрс манет тыр таӵе вуз ӧз вуы басьяськисьёс кие.

Улон инты вузан-басьтон удыс но озьы ик йыртэмасьёс понна – шуныт но пайдаё сэрег. 50 миллион манет тыр 69 йыруж лэсьтэмын. Пӧлысьтыз 6-ез герӟаськемын анай капиталэз бергатэмен. Та учыръёсъя ӝутэмын Уголовной кодексысь 159 статьяя (мошенничество) ужъёс.

Экономикаысь йыружъёсты шараясьёслы кылем арын ватсаськиз выль удыс – коррупциез кортнан. 244 учыр шараямын. Соос пӧлысь 211-зэ быдэстӥзы пичи но бадӟым кивалтӥсьёс. Та учыръёс пӧлысь 58-аз шараямын кузьым басьтон.

Роботлы кельшиз суредам коньдон

Кылем арын кык поллы тросгес луизы огазеяськыса йыртэмасьёс. Законэз кык кузя тӥяд ке – со уллё ини. Тани Ижысь кык егит эшъёслы тунсыко потӥз – быгатозы-а, уз-а соос банкоматэз алданы.

Со понна пинал «усточиос» огаз терминалэ тыризы суредам коньдон. Та купюраоссы огшоры гинэ дасямын ӧй вал. Интернетын бугыръяськыса, пиос тодӥзы: банкомат чакла, вань-а коньдонлэн пӧянлэсь утись элементъёсыз – векчи пасьёсыз, чилясь гожъёсыз но мукет. Паймоно кадь, но машина-роботэз пиос алданы быгатӥзы. Суредам уксёзэс банкомат ньылӥз – огез пияшлэн банкысь счётэз 100 сюрс манетлы узырмиз. Но та коньдонэз пиос басьтыны ӧз вуэ. Банкысь служба но полиция шаплыгес вылӥллям.

Табере кык эшъёс кыл кутон улэ шедизы. Бадӟымезлы йыртэмасьлы – 22 арес. Вань тодмооссы но ӵыжы-выжыоссы паймемын: визьмо, дышетскись пиос таӵе кырыж сюрес вылэ султӥллям. Зэм, суд соосты 5 арлы пытсэт сьӧры но келяны быгатоз. Кин тодэ, оло, нырысьсэ сокем зол уз йӧттэ. Нош визь пыроз-а юлтошъёслы?

Пытсэт сьӧрын юбилей

Вордскем нуналзэ следствиея изоляторын пумитаз Можга ёрослэн йырыз Владимир Максютин. Тодады вайытом: полициын но Следствиея управлениын ужасьёс сое ӝегатӥзы 6-тӥ мартэ. Чиновник китӥз кырмемын вал, 1 миллион 250 сюрс манет кузьым басьтыкуз.

Та коньдонэз Максютинлы сётӥз Можгалась огез ужбергатӥсь. Кивалтӥсь сое оскытӥз, Депутатъёслэн ёрос кенешсылэн огаз сессияз сюлмаськытӥсь ужпум – муниципал ваньбурез вузан – быдэстэмын луоз шуыса. Соку ужбергатӥсьлэн йыр висёнэз бырысал.

Максютинэз полициын ужасьёс оп! шуыса гинэ ӧз кырме. Экономикаысь йыружъёсын но коррупциен нюръяськонъя управленилэн кивалтӥсез Алексей Останин верамъя, эскерон-чаклан мынӥз ог ӝыны ар.

Следствие вакытлы чиновникез интыязы кечат-вамат корт сьӧры. 9-тӥ мартэ Максютинлы тырмиз 60 арес. Бадӟым кузьым басьтэмез понна азьвыл йырлы сётыны быгатозы 8-15 ар.

Елена Скворцова.

Тужгес но тунсыко ужрад ортчиз 7-тӥ мартэ шаерысьтымы ГИБДД-лэн азбараз. Туэ нырысьсэ люказы нылкышно водительёсты, кинъёслэн машина номеразы 8 лыдпус пумиське. Ужрадэ кызьлэсь ятыр апайёс пыриськизы. Машиназэ котькинлэсьшоголь чеберъям Екатерина Жевлакова.

Валентина Кутузова.

Пичи Пургалан нимысьтыз кылдытэм штаб уй но нунал сямен ужа. Та вакытлы отчы 4 сюрс 200 мурт вазиськиз ни. Пӧлысьтызы тросэз юртсылэсь ӟечлыксэ эскерыны куро.

Та нуналлы 331 муртлы быдэн 100 сюрс манет сётэмын зурканы шедем юртъерзэс тупатъян ужъёсты йылпумъян вылысь. 8 сюрс 602 семья коньдон юрттэт басьтӥз ваньбурзы тус-тас луэм понна. Эшшо 102 семья корказэ ас кужыменыз выльдӥз-тупатӥз – таослы но коньдон сётэмын.

- Оскытӥм вал: толэзь ӵоже вань 3 сюрс 515 коркаосты тупатом, – пусйиз Александр Волков. – Сётэм кылмес быдэстӥм. Матысь дыре котькуд юртъя документъёс дась луозы. Тырмымтэос шараяськизы на ке, соосты палэнтом.

Со сяна, Пугачёвоысь вань юртъёсысь укно рамаосты пластиклы вошъяны чакламын – отын улӥсьёслэсь мылкыдзэс та кӧня ке но ӝутӥз.

Югдурен тодматэмез бере Александр Волков Сергей Шойгулы тодаз вайытӥз: лэсьтӥськисьёс али пунэмен ужало, республикалэн бюджетысьтыз соослы 300 сюрс манет висъямын ни.

Россиысь граждан обороная но кышкыт учыръёсъя министр ӟеч дунъет сётӥз республикамылэн пуштылон бервылъёсын нюръяськонъя берло толэзь ӵоже ужамезлы.

Элина Кумачёва.

Пичи Пургаысь Гараевъёс дорын.

Россиысь граждан обороная но кышкыт учыръёсъя министрлэн Сергей Шойгулэн Пичи Пурга ёросысь Пугачёвое вуылэмез дырысен толэзь ортчиз. Ма лэсьтэмын та дыр ӵоже?

Юртъёсты тупатъян-лэсьтон ужъёслэсь мынэмзэс эскерыны Пичи Пурга ёросэ вуылӥз Президент Александр Волков, Россиысь МЧС-лэн Приволжск центрезлэн кивалтžсез генерал-лейтенант Игорь Паньшин, республикаысь но ёросысь кивалтӥсьёс, МЧС-ын ужасьёс.

Игорь Паньшин Сергей Шойгулэн вуылэм интыостӥз ортчиз. Пугачёвоысь Зинаида Ахматовалэн квартираяз пыраз. Кузё кышно тупатъян ужын тырмымтэос сярысь вераз. Собере сюрес вуттӥз Яган посёлоке. Заречной ульчаысь Крестина Моховалэн кык этажъем коркаез толэзь куспын ӝутэмын. Ӝоген шуныт юртамы улыны пыромы, мунчоын улыса, жадимы вал ини, капчи мылкыдын вера нылкышно. Мытэм ужзэс дырыз дыръя быдэстэмзы понна подрядчиклы Денис Курбатовлы министр ӟеч кылъёс вераз.

Пичи Пурга черкогуртысь Ленин нимо но Кирзаводской ульчаосын куашкан калэ вуэм коркаос интые ӵыж-выльёсыз ӝутэмын. Со юртъёслэн кузёоссы – Гараевъёс но Федотовъёс – лэсьтӥськисьёслэн бригадазылы шумпотэмзэс шара вератэк ӧз чидалэ: таӵе-таӵе тыршозы шуыса, ӧм, пе, малпалэ вал. Туалетмы но, ваннамы но табере корка пушкын. Озьы ик корказы пыртэмын ни газ но, тыл но, ву но. Комнатаоссы вӧл-вӧлэсь, югытэсь, чебересь. Борддоръёсазы яркытэсь шпалеръёс лякылэмын, выж вылазы шуныт линолеум вӧлдэмын. Ӧсъёссы но укнооссы туала куронъёсъя пуктылэмын.

Тупатъям коркаосты эскерыны вуэм комиссия котыре котькудаз гуртын уно калык люкаськылӥз. Юанъёс, ӝожтӥськонъёс трос. Шуге-леке шедем адямиосты кивалтӥсьёс оскытӥзы: вань ӝожтӥськонъёс но вазиськонъёс лыдэ басьтэмын луозы, выльысь шараям шекъёсты тупатъялозы.

Уж шӧдскымон азинскиз Шойгу вуылэм бере, ивортӥзы гуртоос, зуркам коркаосты тупатъязы, улыны ярантэмъёссэ сэрттыса, выльёссэ ӝутӥзы. Тупатъян ужъёс šоген йылаз-пумаз вуозы.

- Асьмелэн лэсьтӥськись-ёсмы ужаны быгато, соослы дыр гинэ пуктоно, – подрядчикъёслэсь тыро-пыдо ужамзэс ушъяз Игорь Паньшин. – Мынам малпамея, та югдурез федерал эскеронъёсысь куштыны луоно ни. Адямиослэн ымныразы пальпотон кылдэмын. Соос, шумпотэмзэс ватытэк, тау карыны быгато Сергей Шойгулы но Александр Волковлы.

Тупатъян ужъёслы йылпумъянъёс лэсьтыса, та нуналэ ик, ӝытазе, Александр Волков комиссиез люказ. Со пусйиз:

- Туннэ нуналлы тупатъян ужъёслы но шуге-леке шедем адямиослы компенсация тырыны республикалэн бюджетысьтыз 300 миллион манет быдтэмын. Тупатъян ужъёсты йылаз-пумаз вуттон вылысь коньдон витиськом на Москваысь.

Любовь Тихонова.