Юрий Трефиловез Яр но Глазов районъёсын улӥсьёс тросэз тодо. Угось Юрий Афанасьевичлэн пичи дырыз Глаз палъёсын, Чупчи шур дурын, ортчиз, нош быдэ вуиз Ярын. Отын со ёрос «Сельская правда» газетын ужаз. Кӧня ке аръёс ӵоже «Советской Удмуртия» газетын собкор луыса тыршиз. Юрий Трефилов Россиысь Журналистъёслэн огазеяськонзылэн ёзчиез.

- Юрий Афанасьевич, калтонам шедиды бере, кӧня ке улэм-вылэмдэс но ужам сюрестэс тодамы ваёмы.

- Вордскем гуртэ – Валовыл – карта вылын но ӧвӧл ни. 90-тӥ аръёсы, неперспективноесь шуыса, тросэз гуртъёс быризы. Вордскем гуртэ туж чебер интые пуксемын вал. Ужась калык отын улӥз: пудо-живот вордӥз, нылзэ-пизэ будэтӥз, колхоз ужын тыршиз. Собере выжыеныз ишкалтэм кадь мукет интые улыны кошкиз.

Покчи классъёсты асьме гуртысь школаын ик йылпумъяй, собере 28 иськеме, Гербаши гуртэ, ветлӥ ини. Отын ӟучъёс уло вал. Бӧрысь та гурт но быриз.

Тямыс классэз йылпумъяй но документъёсме Пермьысь речной училищее нуыны малпай. Апае, та сярысь тодыса, сыӵе кыдёке, пе, тонэ ум лэзе ай шуыса, вань документъёсме ватэм.

- Иське, со ик Удмурт шаере кылемды луиз?

- Кылдэмез озьы вылэм, шуисько ини. Мон семьяямы покчиосыз пӧлысь вал бере, жалязы но, дыр. Палэнэ кошкысал ке, ӧйтӧд, кыӵе улонэ луысал.

- Тӥ вордскон аръёс секытэсь но сютэмесь вал. Война бере будӥсь нылпиос эркиянэз ӧз адӟе.

- Мӧпӧйлэн (анайлэн) ми сизьым кузя пиналъёсыз вал. Атаймылэн нырысетӥ кузпалыз улонысь висьыса кошкем, кык пиналъёсыз кылиллям. Ми ини, вить пиналъёс, кыкетӥ кышноезлэн луиськомы. Сизьым ым, сюдоно ведь, дӥсяно милемды. Атай улонысь вазь кошкиз. Вань секытэз мӧпӧй вылэ усиз ини.

Озьы ке но мон Яр педучилищее дышетскыны пыри. Отчы мынэмысьтым монэ нокин алӥсь ӧз луы ни, шум гинэ потӥзы. Удмурт отделение пыри. Со вакытэ анай кыллы училищеын туж зол дышетӥзы. Нырысетӥ курсъёсысен ик мыло-кыдо ветлыны кутски литературно-творческой кружоке. Соин кивалтӥз кылбурчи Георгий Архипов. Со ик милемыз удмурт кылэз но литератураез яратыны но гажаны дышетӥз. Георгий Архипович урокъёссэ но, кружоксэ но тунсыко нуылӥз. Отын ик кутски кылбуръёс но веросъёс гожъяны. Кружокын ог-огмылэсь ужъёсмес сэрттылӥмы-пертчылӥмы. Ӟечъёссэ ёрос газетын печатлаллязы. Бӧрысь «Дась лу!» но «Советской Удмуртия» газетъёслэн бамъёсазы нимъёсмы адӟиськылыны кутскизы.

Училищеез йылпумъяса, монэ келязы Глаз ёросысь Зотов шор ёзо школае покчи классъёсты дышетыны. Но дышетӥсьёс тырмымтэен, мыным эшшо бадӟым классъёсты визьноданы куинь предметэз сётӥзы на: географиез, химиез, биологиез. Нуналлэсь ортчемзэ ик валаса уг вуттӥськы вал. Зотов школаын кема ик ужаса ӧй вутты, армие басьтӥзы. Службае бере со гуртэ ик мыноно кариськи. Но роноын ужасьёс ивортӥзы: отын, пе, та вакытэ интыоссы ӧвӧл. Вай али, малпасько, кӧнялы ке но ЧМЗ-е (заводэ) ужаны пыро. Уждун но отын умойгес басьто.  Егит муртлы пыд йылаз куке но йыг-йыг султоно ук. Но заводэ монэ ӧз кутэ.

Со вискын доре бертылыны малпай. Пумитам анаелэн вынызлэн пиез шедиз. Гуртамы со почтальон луыса ужа вал. Сьӧрлось Шайтангуртэ гожтэт вуиз, шуэ. Конверт вылэ Трефилов Юралы шуыса, пе, гожтэмын. Нош со гуртын Наймушинъёс но Ушаковъёс гинэ уло. Со, Юра, тыныд, дыр, келямын, шуэ. Озьы ик вань: гожтэт Георгий Архиповичлэсь вылэм. Со монэ ёрос редакцие ужаны ӧтем. Ӝегатскытэк сюрес вылэ потӥ.

Выль ар азьын вал со. Редактор доры йыгаськи. Сьӧрам ик Георгий Архипович но пыриз. Соку со удмурт газетлэн редакторез вал. Мон Трефиловез кутыны пумит ӧвӧл, сое ӟеч тодӥсько, шуэ дышетӥсе. Редактормы Вениамин Иванов соглаш луиз: Выль ар бере выль мылкыдын ужаны потод.

Нырысь-валысь кылысь кылэ берыктӥсь луыса ужай. Собере Ярысь комсомоллэн райкомаз басьтӥзы. Но мыным отын ӧз кельшы. Берен редакцие шонтӥ. Корректоре кутӥзы. Арня но ужаса ӧй вутты, гожтэтъёсъя отделэ кивалтӥсе пуктӥзы. Отын ини калыкен трос ужано луиз. Сьӧрлось гуртъёсы командировкаосы поталлямы. Уно материалъёс дасяллямы. Редакциын ужакум ик, яратонме, Галинаез, пумитай, семья кылдытӥ.

Собере Георгий Архиповичез УдНИИ-е ужаны басьтӥзы. Дышетӥсеным улонысь кошкытозяз кусып возьылӥ, монэ со адямие поттӥз шуыса, али ке но тау карисько. Бӧрысь монэ солэн интыяз – удмурт газетэн кивалтӥсе пуктӥзы. Ми но литературалы сӥзем бамъёс поттаны кутскимы. Нимысьтыз тематической номеръёс дасяллямы. Котькуд ужме яратыса быдэстылӥ. Отӥяз редактор монэ аслыз воштӥсе пуктӥз. Со вакытэ ми пала но ӵем гинэ вуыло вал шаерамы потӥсь журнал-газетъёсын ужасьёс. Ми соосын тросэныз тодмоесь ни вал, куд-ог гожъямъёсме сьӧразы кутылӥзы. «Дась лу!»-лэн бамъёсаз ӵем гинэ веросъёсы но кылбуръёсы поталляны кутскизы. Собере «Советской Удмуртиысь» Николай Машков но гожъямъёсме синйылтэм, лэся. Газетэ материалъёс лэзьяны косыса, заданиос сётъяны кутскиз.

Одӥг нуналэ Иже ӧтизы, «Советской Удмуртия» газетын собкорын, пе, ужаны мылкыдыд вань-а? Гожъяськись муртлы та ик кулэ вал. Со нуналэ ик уже кутӥзы. Уйпал ёросъёсысь улон-вылон сярысь материалъёс гожъяны косӥзы. Та удысын дас арлэсь ятыр ужай. Капчи ӧй вал. Ялан Иже ветлоно, дырыз дыръя материалдэ вуттоно.

Яр посёлоке корка лэсьтыны малпай. 7 процентъем ссуда басьтон вылысь ёрос кивалтӥсьёслы куриськонэн вазиськи. Ӧз сётэ. Самой бадӟым процентъемез понна но заявление гожтӥ. Пумит луизы. Серем карем выллем 289 процентъемзэ дэмлазы. Жаль ӧвӧл, пе, коть дас миллионзэ басьты. Малы кивалтӥсьёс мыным вамен сылӥзы? Мон соосты «Шӧкыч» баме поттылӥ вал уга.

- Тӥ удмурт луэменыды данъяськиськоды. Сюлэмды вӧсь уг луы-а, удмуртлык тӥ палан быре шуыса? Дорады кыӵе кылын вераськиськоды?

- Кузпалы удмурт. Шутэтскыны потытозяз, лэсьтӥськон удысын тыршиз. Куинь нылпи будэтӥмы. Бадӟымез Андрей пимы, Глазовысь совхоз-техникумез йылпумъяса, лэсьтӥськон удысын мастер луыса тырше. Маринамы Тюменьысь нылпи творчествоя юртын тырше. Сергеймы Пермьысь чугун сюрес вылын ужасьёсты дасясь техникумын дышетскиз. Та дыре ас удысаз ик вылӥ тодон-валан басьтэ.

Куиньназы ик удмурт кылэз умой валало. Литературной кылын уг верасько ке но, дорын ог-огмес валаськом. Ярысь школаосын но нылпи садъёсын одӥгаз но удмурт кыллы уг дышето. Берло аръёссэ посёлокамы удмурт кылын вераськисьёсты кылыны ик уг луы ни. Педучилищеын дышетэмысь дугдӥзы. Куддыръя астэ йыромем мурт кадь шӧдӥськод. Анай кылмы пыдлось гуртъёсын гинэ возиське на. Анай-атайёс но сое утён пумысен саклык мед висъялозы вылэм. Дорын вераськем но туж юрттэ ук. Кызьы сюлэм вӧсь уз луы, школаос син азьын ворсасько, удмурт классъёс быро ке. Тумысь школаын анай кыллы дышето вал ай, нылпиос ӧжыт кылемен, со но ворсаськон калэ вуэмын. Та аръёсы Байдалино школа быриз. Ас вакытаз отын удмурт кыллы но литературалы дышетӥсьёс синмаськымон ужазы.

Тау карем потэ ёрос библиотекаын ужасьёслы. Соос удмурт кылын ужрадъёсты ортчытъяны быгато на. Анатолий Владыкин ёросамы «Удмурт кенеш» огазеяськонлэн ёзэныз быгатыса кивалтӥз. Сое воштӥз ёрос библиотекаын ужась Валентина Дементьева. Туж шаплы нылкышно. Удмуртлыкез со мед улӟытоз вылэм.

Эшшо одӥг учырез мадеме потэ на. Бадӟымез пие вера: алигес, пе, Кезысь лэсьтӥськисьёс доразы вуылӥллям. Асьсэ понна, пе, кенешо: тып-тап лэсьтом но яралоз. Нош пие, пе, пумитазы шуисько: озьы уд лэсьтэ, умой-умой ужалоды. Таосыд му пыр вияно кадь луиллям. Пие удмурт кылэз уг вала, кожаллям.

- Гожъямъёстэс нимаз книгаен поттэмды уг поты-а?

- Со сярысь малпан йырам ӧз лыктылы. Угось пичиез пие гожъямъёсме, Пермьын дышетскыкуз, сьӧраз нуиз вал. Олокытчы ыштэм…

- Мар бен, Юрий Афанасьевич, удмурт кылэз яратонды ноку медаз ышы, асьме выжы калыкез гажанды медаз лазегомы!

 Любовь Тихонова.

Трос сюлэме пырись фильмъёсын валт

- Куинь аккордэз сяна уг тодӥськы, – вераз со журналистъёслы. – Кылбураны но, крезьгур гожтыны но ачим уг быгатӥськы. Попугай музэн, муртъёслэсь пӧрамъёссэс быдэстӥсько. Озьы 7 ар ӵоже ни дуннеетӥ поръясько. ӵапак сомында дыр талэсь азьло театрысь кошки. Жади кин ке вылэ ужаны, косэмъёссэс быдэсъяны, пыкылэмъёссэс кылзыны. Эркын луэме потӥз. Дас куинь ар ӵоже ни Ирина Чиркова актрисаен ӵош «Старые девы» спектакльын шудӥсько. Кин тодэ, оло, таизлэсь но куштӥськоно вал ни. Куд-ог мыдланес режиссёръёслэсь ужамзэс адӟыса, пушкын бугырске ӧскем потон мылкыд. Амалтэк малпаны кутскиськод: нош шонер-а мон лэсьтӥ, артистлэсь улонзэ бырйыса? Бератаз буйгасько но выльысь ужаны кутскисько. Кужым сёто студентъёсы (Александр Михайлов дышетэ ВГИК-ын -         Е. Ф.). Соослы коньдонэн кӧня ке юрттоно, шуисько аслым. Стипендия вылын гинэ векаса, репетициос дыръя йырсазьзэс ыштылон учыръёс но луыло уго. Соин ик уждунме соосын люкисько.

- Тужгес секыт рольды?

- Иван Грозный. Сое сцена вылын шудӥсь актёръёс пӧлысь 6-ез кулӥз. Мон но черлалляй. Но улэп кыли. Али валасько ни малы: ӧй серекъя, ӧй пыкылы ноку сое. Туж уг яратӥськы Павел Лунгин режиссёрлэсь Иван Грозный сярысь «Царь» фильмзэ – отын пичи но зэмлыкез ӧвӧл, соин соглаш кариськеме уг луы.

Мыным али ӵемысь созэ я тазэ ролез дэмлало. Но сюлэмам уг лякисько. Туала киноос жугиськонлы, вир кисьтонлы сӥземын. Кызьы отын шудэмед потоз? Улонын сотэк но пожез трос. Оло, соин но асме ӵемысь шӧдӥсько уськытэм бурдоен. Ма, туж вӧсь луисько, таӵе лыдпусъёсты малпаса: Россиын 32 сюрс гурт быремын, асьме флотмы, Турцилэн сярысь, 16 поллы лябӟемын. Та сярысь малпанъёсме шара верамелэсь кышкаса ик, монэ телевидение но уггес лэзьяло.

- Кызьы веськатӥськоды жадемдэс?

- Сад-бакчаям дыртӥсько. Куке-соку басьтыны быгатӥ вал 12 сотык музъем. Эшшо 10-сэ «лушкай». Кенерай ваньзэ. Отын гольык пыд но бызьылӥсько, нокин азьын чеберъяськонэз но ӧвӧл. Сюлэм ик шутэтске. Та но уг юртты ке, Уйпал полюсэ шонтӥсько. Али Лымшор полюсэ дасяськисько. Быдэс арлы ӟигар пыре, ява.

Елена Фёдорова.

Валентина Фадеева Ижысь медакадемилэн библиотекаяз научной отделлэн лыдӟиськон залаз ужа. Сабырлы, визьмо, й

Валентина Ивановна пусъемын Удмурт Республикаысь культура удысысь дано ужась нимын но уно данъян грамотаосын.

- Валентина Ивановна, вордскем интыды Удмурт шаерысь ӧвӧл шуыса, тодӥсько.

- Пичи дыры туж шулдыр ортчиз. Татариысь Кукмор ёросысь сю коркаем Ошторма-Юмья гуртмы быдэсак садъёс пушкы выемын вал. Нылпиос маке мында будӥзы, ульча тыр шальтыр-шальтыр бызьылӥмы.

Гуртысьтымы шор ёзо школаез пырпотыса, городэ кошки. Эшеным Зоя Рамазановаен Казаньысь культурая институтэ йыгаським. Бигеръёс пӧлы шедим шуыса, чик ӧм кепыралэ. Зоялэн фамилиез бигер шуыса, лэся, сое асьсэ выжыысь кожаллязы.

Бигер музъем вылын вордскемъёсты, дас куать аресазы паспорт басьтыкузы, сельсоветын ужасьёслэн одно ик бигер шуыса гожтэмзы потылӥз. Монэн но сыӵе учыр луиз. Но мон чутрак пумит луи – Кукморысь паспортной столэ гожтэт келяй, монэ бигер эн гожтэ, шуи. Казане дышетскыны пыремме тодыса, отысь ужасьёс мыным гожтэт ыстӥллям: выжыдэс бигер шуиды ке, тӥледыз дышетскыны капчиен кутозы. Экзаменъёсмес умой сётъямы. Доре шумпотыса бертӥмы. Мынам пичи дырысеным потэ вал филолог луэме. Папамы Иван Елисеевич Караваев дышетӥсь вал бере, мыным меӵак шуиз: мамаедлэн сюрестӥз мынод. Мамамы Мария Архиповна школаысь библиотекаын ужаз. Ас вакытаз со Ижысь культпросветучилищеын библиотекаре дышетскем. Соин, библиотекарьлэсь ужзэ валаса, быдэ вуи. Туж трос книга-газетъёсты, чеберлыко литератураез лыдӟиськомы вал. Дорамы но библиотекамы бадӟым вал.

Папамы Алнаш ёросысь Ново-Троицк гуртын вордскемын. Елабугаысь пединститутэз йылпумъяса, егит пияшез ужаны келяллям Татариысь Кукмор ёросэ. Ужаны шедем Ошторма-Юмья гуртэ. Отын со физикалы дышетӥз. Мурт музъемысь яратонзэ шедьтыса, со палъёсы ик весяклы улыны кылем. Мамаеным соослэн 13 арес виссы вал. Бадӟым классъёсын дышетскыкуз, папамы сое но дышетыса вуттэм на али. Папамы ож лудэ но ветлэмын. Гурт калык гажа вал сое. Жаляса верано, 1998-тӥ арын улонысь кошкиз.

Папамылэн вордскем гуртаз маке мында ӵыжы-выжыосыз кылемын. Ми соосын ог-огмы доры кунояны ветлӥськом. Егит дыръяз со туж чебер, йӧно, шаплы вылэм. Тупалась лыктэм казакпилы (Удмуртиысь вуэмъёсты озьы шуо) гуртысьтымы вань егит нылъёс синмаськыса улӥллям. Вылаз ик, со туж визьмо но вал. Адямиос дораз котьма ласянь визь-нод юаны ветлылӥзы.

Дышетскон ласянь со монэ туж зол кутӥз. Нуналлы быдэ  урокъёсме юалляз. Тон, пе,  мукет пиналъёслэсь бере кыльыны кулэ ӧвӧл. Милемын мамаен папа дорын ӟуч кылын вераськылӥзы. Палэнэ дышетскыны кошкимы ке,  ӟуч кылэз, пе, умой мед тодомы. Ульчаын эшъёсынымы удмурт сямен лабыртылӥмы. Бигер кылэз но ӟеч тодыса, будӥмы. Пересь анаймы милемын бигер кылын гинэ вераськылӥз. Куинь сузэр-апайёс, пичиысен куинь кылэз тодыса, будӥмы.

Мон – бадӟымез. Шоретӥез – Таня сузэре – Свердловск улосысь Карпинск городын улэ, аптекаын ужа. Пичиез – Ритамы – мынэсьтым адӟем кариз, лэся, Казаньысь культурая институтэз йылпумъяз. Библиотекарь луиз. Ужаны Ижысь радиотехнической лицейлэн библиотекаяз шедиз. Нош монэ келязы вал Гайдар нимо нылпи библиотекае. Дас куать ар отын ужай. Тау карисько отысь  кивалтӥсьёслы но ӵош ужам эшъёсылы, соос монэ та удысэз эшшо но мургес гажаны но яратыны дышетӥзы.

- Удыстэс азьланьтӥды Ижысь медакадемилэн библиотекаяз. Таиз ужды, огшоры библиотекаын сярысь, пӧртэмгес вал, дыр, ук?

- Татын мон 1997-тӥ арысен ужасько ини. Секыт вал тодымтэ, музон уже кутскыны. Нырысь ик монэ книгаосты возён интые (хранилищее) пуктӥзы. Та уже туж мӧзмыт потылӥз. Озьы ке но, нылпи библиотекаын сямен ик, ялан общественной ужен вырылӥ. Куасэн бызьылонъя ӵошатсконъёсы али ке но пыриськылӥсько. Спортэз гажанэ пичи дырысеным лулам-вирам пыӵамын ни, луоз. Школаын дышетскыкум но, пӧртэм кроссъёсы но ӵошатсконъёсы пыриськылӥ. Нырысетӥ радэ потамъёсы понна уно гинэ данъян грамотаосы но синпель кузьымъёсы вань.

Бӧрысь монэ научной литературалэн абонементаз поттӥзы. Та отделын ини ми ужаськом преподавательёсын но аспирантъёсын.

- Та ӧр нимысьтыз тодэм-валамез кулэ каре, дыр, ук?

- Со понна трос лыдӟиськоно. Адями кыӵе-мар книга куре, ми сое тодыны кулэ. Методикаез, научно-популярной литератураез ӟеч валано. Кылсярысь, сое тодытэк, уд вала, кыӵе книга кулэ, сахарной диабетэн висисьёсты эмъяку яке вирзӥбетэн курадӟыку. Ми озьы ик ужаськомы книгаослэн номеръёссы бордын.

Отделамы монэн ӵош тырше Надежда Колесникова. Оглом библиотекаез ке басьтоно, 25 кузя ужаськомы. Удмуртъёсмы кык гинэ: мон но Ирина Михайлова. Студентъёс но, преподавательёс но удмурт кылын кыӵе ке ужрад дасяло ке, ми доры вазисько. Ирина Михайловна мыло-кыдо адями, тыпыр-тапыр гинэ уж борды басьтӥське. Быгатэммыя соослы котьку юрттыны тыршиськом. Пичи дырысен удмуртлыкез гажаса но яратыса будэменым, дыр, одӥг концертэз но, ужрадэз но ӧй кельтысал. Но ваньмон дыр туж ик уг шедьылы. Уж дорамы милемын чылк-чылк анай кылын верасько академиысь тодосчиос-преподавательёс: Апполинария Перевощикова, Вера Осотова, Иван Кузнецов… Вазенгес дорамы Григорий Шинский ветлэ вал. Со котьку но шуылӥз: кыӵе тӥляд тунсыко ужды, литератураез сяна, трос тодоно научной гожъямъёсты но.

- Соос вӧзын тӥледлы эмъяськон ласянь но капчигес, дыр?

- Озьы. Тодӥськод ни кинлы вазиськыны. Тани ректормы но Николай Стрелков – удмурт адями, мыло-кыдо пыриське «Удмурт кенеш» огазеяськонлэн ужъёсаз. Туж ӟеч кивалтӥсь, котькыӵе юанэн солы вазиськы: быдэстоз, лэсьтоз, малпалоз.

Библиотекаенымы быгатыса кивалтэ Ляля Волкова. Адямиез чик тоно-моно карыса уг люкы. Ляля Фаритовнаен ми Казаньын ӵош тодон-валан басьтӥмы вал.

- Нырысь учкыса, библиотекарьлэн ужез секыт ӧвӧл: ӝӧк сьӧрын лыдӟиськыса пуке,  книга сётъя.

- Тросэз озьы малпало. Но отын сомында тодоно. Пӧртэм кенешъёс, ужрадъёс, лыдӟиськон ӝытъёс радъялляськомы. Доре бер ӝыт сяна вуыны уг луы. Ужмы лачак. Лулысь-сюлмысь тыршемме адӟыса ик, дыр, культура удысысь дано ужась ним сётӥзы.

- Культура удыс тӥледлы мукет палыныз но матын. 

- Озьы, ми ваньмы пичи дыръямы ик сцена вылын кырӟаськомы вал ини. Дорын но ялан, концерт пуктыса, шудылӥмы. Мамаен папа милемыз артистъёс гинэ шуылӥзы. Школаын дышетскон вакытамы гуртын пукон дырез ик ӧм адӟылэ, ялан школа ужъёс, олокыӵе но ужрадъёслы концертъёс дасяллямы, слётъёсы, пионерлагерьёсы ветлылӥмы.

Казаньын дышетскыкум, концерт учкыны консерваторие юромо ветлылӥ. Сыӵе со мыным кельше вал.

- Парлы пар, шуо. Та ласянь удалтӥз-а улонады?

- Кузпалы мынам туж умой адями вал. Сямыз ӟег нянь но тӥни. Сыӵе пиез мыным вордӥллям Юкаменск ёросысь Бадӟым Вениж гуртын. Валера огшоры семьяын будӥз, анаез но, атаез но колхозын ужазы. Пумиськимы Иже вуэммы бере. Мыным, егит ужасьлы, «Нефтемашлэн» общежитияз инты висъязы. Валера дышетскем Ижысь гурт удысъя институтын. Соку со «Нефтемаш» заводын  инженер луыса ужа ни вал. Солэн общежитияз ик улӥз но.

Ог суббота ӝытэ Алла эшеным эктон залэ васькимы. Отын калыкез лачак, дискотека мынэ вылэм. Со вие егитъёс пӧлы кык пиос пыризы: ӝужытэсь, йӧноесь, ӝикытэсь. Музон пиос сямен шӧмаськемын ӧвӧл. Милям соку ик синъёсмы ӝуатскизы. Эшме донгыса кадь лэзи: мын, шуисько, ӧть созэ эктыны. Нош ачим мукетыз шоры учкисько. Ярам, со ачиз ик монэ эктыны ӧтиз. Йырсиез сьӧд-сьӧд, бабля. Мон сое нырысь бигер пи кожай вал. Удмурт вылэм. Соку со монэн  вальсэз туж умой бергаз. Пайми, Валера эктонъя кружоке ветлэ вылэм. Бӧрысь монэ но сьӧраз кыскиз. Ар пала ми соин эшъяським, собере, сюанмес шудыса, улыны кунокуае потӥмы. Востэм сямо удмурт пиез папаен мама воксё асьсэлэсь пизэс кадь яратӥзы. Укыр сабырлы вал угось: ӧз но юы, ӧз но кыскы. Киосыз зарни вал, котькыӵе ужез валаса но быгатыса лэсьтылӥз. Тупаса улӥмы. Оло, соин но милемлы ваньмыз вожъяськылӥзы: сыӵе кузпалъёсты утчаса но уд шедьты, шуылӥзы. Валера арлыдызъя мынэсьтым бадӟымгес вал бере, соин, лэся, ки йылаз нуллыны дась вал. Котьма ласянь монэ жалялляз. Андрей но Ваня посмес будэтӥмы.

Кыкнамылэн но гуртъёсмы кыдёкын шуыса, сад-бакча басьтӥмы. Туж мыло-кыдо, шумпотыса отчы ветлӥськомы вал. Валера мон сямен ик мунчое пырыны яратылӥз. Нылпиосмылэсь лушкем удмурт кылын лабыртылӥмы. Табере соос кыкназы но удмуртэз туж умой валало ини. Ӵошенназылэн ик угось пичи  дырзы мама дорын ортчиз. Городэ вуыса, нылпи садэ мыно но нош ӟучомо. Мон егит дыръям малпалляй, Иж – со быдэсак удмурт город, ваньмыз отын анай кылын верасько шуыса. Янгышаськем.

Жаляса верано, Валерае ӧвӧл ни. Сюлэмыз ляб вылэм. 2003-тӥ арын улонысь шӧдтэк шорысь кошкиз.

- Пиосты мар ужало?

- Соос кыкназы но ИжГТУ-ын вылӥ тодон-валан басьтӥзы. Атайзы кадь ик визьмоесь. Кыкназы но компьютер бордын ужало. Семья ӧз на кылдытэ.

- Улон азьлань мынэ. Яратоно адямидэс ыштыса, тӥ асьтэлы эш шедьтӥды, выльысь семья кылдытӥды на.  Сыӵе вамыш лэсьтыны кышкыт ӧй вал-а?

- Улон милемды, кема аръёс ортчыса, одӥг классын дышетскем пияшен пумиськытӥз. Со мыным запискаос гожъялля вал. Мон со кылъёслы нокыӵе ик ӧй кариськылы. Школаез йылпумъяса, Володя дышетскиз Казаньысь авиационной институтын. Одӥг пол но ми соин отын ӧм адӟиськылэ ни.  Доре бертылыку но, пумиськылыны ӧз кылдылы.

Кузпалы улонысь кошкем бере дас классэз йылпумъяммылэсь 30 ар тырмонзэ пусйизы. Ялан мӧзмыса пукод-а шуыса, мон но доре бертоно кариськи. Ваньмы сямен люкаськиськеммы. Володя но бертэм. Со милемыз туспуктэме пуктылӥз. Патретъёстэс, пе, почта пыр келяло. Ваньмылэсь адресъёсмес басьтӥз. Со ик луиз ваче гожъяськыны кутскеммы. Зэм, соку ӧй но малпа, милемды бӧрысь Инмар ӵош огазеялоз шуыса. Собере со мыным жингыртылыны ӧдъяз, отӥяз воксё но Иже вуиз. Городмы солы туж кельшиз. Соку ик удмурт концертъёсы но спектакльёсы ветлыны кутским. Пичи дыр эше огазеяськыны ӵектӥз. Пумит ӧй луы. Пиосы монэ соку ик валазы: шонер, пе, лэсьтӥськод, огнад эн кыльы. Озьы мон Фадеева луи.

Любовь Тихонова.

Саша нуныкаеным.

Валентина Марданова ноку ӧз малпалля улонзэ пудо-животъёсын герӟаны. Ма, пичи дыръяз соосын одӥг кыл воксё но ӧз шедьтылы. Кунянзэ гозыяны мынэ, соиз нылашлэсь пегӟе. Скалэз но отӥгес карылӥз. Таиз бускель сюроен огтусъем. Кудӥз милям? Уг тодмаськы. Кыксэс но пастухысь ӵош вайыны выри. Кудӥз дорамы пыриз, соиз ик милям. Ӟазег гинэ но чепылляз монэ, шуэ Валентина Васильевна.

Нош туннэ та кышномуртэ гурт удысын тодмасьтэмез ик ӧвӧл, дыр. Алнаш ёросысь «Молодая гвардия» колхозэз со племрепродуктор кариз,  шуыны луоз. Скалъёссэс умоято, голштин выжыысь ошъёсын бызьылытыса. Валтӥсь зоотехниклэсь та удысын ӟеч бергамзэ синйылтӥзы Москваын но. Россиысь Гурт удысъя министерство сое Данъян грамотаен пусйиз. Луиз Удмуртиысь гурт удысысь дано ужась. 2006-тӥ арын нимыз пыртэмын вал Удмуртилэн Данъян пул вылаз.

Валентина Васильевна туннэ тырше скал вордонэз умоятон бордын. Москваос азяз ужпум пуктӥзы: хозяйствояды госплемзавод кылдытоно, пе.

- Паймисько: кытысь сомында кужым шедьтӥськоды меда?

- Оскоды, оло, уд, но еж дыръям мон туж возьдаськись вал, – тодаз вае Валентина Марданова. – Сизьым пинал пӧлысь мон самой востэмез вал. Куноос лыкто ке, ымнырме киосыным ватылӥ. Малпай, лэся: синъёсам учкыны уг пӧрмыто бере, озьыен, асме но уг адӟо. Будэмея воксё но коркась кошкылӥ.

Кепыран сямы уката зол люкетылӥз дышетсконын. Таш-таш удмурт Актэмыр гуртын будэменым, лэся, ӟуч сямен ваземе азьын куддыр туж сюлмаськылӥ: кылъёсме интыяз пуктӥсько-а, верамме валалозы-а?

Вордэм анай-атае возьдаськонме вормыны юрттысалзы ке, оло, соку ик воштӥськысал. Но кыксы но вазь кулӥзы. Нырысь сопал дуннее кошкиз муми. Синъёссэ весяклы кынемезлэсь азьвыл бубимес индылӥз ик: огнад нылпиосты пыд йылазы ӝутыны секыт луоз, утча аслыд пар. Можгае корка но басьтыны косылӥз, пиналъёсыз, пе, дышетоно, адямие поттоно. Атай ӝутӥськиз ик вал Алнаш палъёсысьтымы кошкыны. Но ӵыжы-выжыосыз пӧлын ӟургетӥсез шедем: атай юртъерез быдтыны ум лэзе, пе. Озьы пиртэш семьямы ёросэ ик кылиз.

Огпол атай шуиз: анайдылэн кулэмез дырысен 40 уез вуэ ни. Котыртӥсько ай, пе, оло, кышно сюроз.

Кинэ ваёз меда? Милемды ӝоже уз уськытъя-а? Та выллем юанъёс милемлы, пичиослы, маза ӧз сётылэ. Но выль анаен удалтӥз. Сьӧраз ваем одӥг гинэ нылыныз но ваньмылэн кылмы тупаз. Но тыро семьяын кема улыны ӧз кылды. Ар ортчыса, улонысь кошкиз атай. Со азьвыл ик шуэ вал ни: выль кышное тузӥ ке но, анайдылэсь ик юн мӧзмисько, кема уг ӝега, дыр, югыт дунне вылын. Озьы Ольга Андреевна тямыс пиналэн огназ кылиз. Вить аресъем сузэрмес ӵыжы-выжыосмы будэтыны куро вал. Узыресь, но асьсэлэн нылпизы ӧй вал. Татын но выль анаймы чурыт кариськиз: огзэс но нокинлы уг сёты, соос ваньзы – мынам. Мукет сямьяын, оло, зэмен ик, номырлы уз ёрмы, но арлыд люкамезъя юалоз ук: малы монэ гинэ мултэс карид? Соин ик ваньместы ачиз пыд йыламы ӝутӥз. Тау солы. Огмы но урод сюрес вылэ ӧм султэ, быгатэммыя дышетскыны но пӧрмытӥм.

- Та ласянь тӥледлы ӧзгес удалты, лэся.

- Зэмен ик, Асанысь совхоз-техникумез гинэ йылпумъяй шуыса, сюлэмы туж шуг, – мур лулӟе кышномурт. – Школаын визь люкакум, туж потэ вал Людмила Гавриловна дышетӥсьмы кадь луэме. Мон солы синмаськемын вал. Шорам Вали шуыса гинэ вазиськоз. Котьку чебер дӥсяськоз. Малпалляй: будӥ ке, одно ик со кадь луо. Та мылкыдме улонэ пыӵатон понна ик Елабугаысь институтэ но пыри вал. Отын кыко арня дышетскыса но вуттӥ. Одӥг мурт но удмурт кылзэ уг поттылы. ӟуч кылын вераськыны шугъяськисько. Вылаз ик – юн мӧзмисько гуртэлэсь. Документъёсме кутӥ но бертӥ. Ачим возьдаськыса му пыр виясько вал. Ярано коть, кивалтӥсьёс ӧз гордэктытэ. Монэ Муважи школае 2-тӥ классэз валтыны ыстӥзы. Ужало но, Ижысь пединститутын заочно дышетско но шуыса, малпай вал. Но заочно монэ ӧз кутэ: стажед, пе, пичи на. Та шоры соку сак учкылӥзы уго. Нош отӥяз дышетӥсь луон сярысь малпанме пушкам ик весяклы ватоно луиз.

- Сюан шудэмды улон шоры учкондэс чутрак воштӥз шат?

- Аслым ачим син уськытӥ, дыр, – серектэ Марданова. – 1970-тӥ аръёсы ик «Молодая гвардия» азьпалан вал. Сюрес вылысен Асангурт пала учкиськомы но, синъёсмы палёмо – тӧдь-тӧдь изваскаен буям конторазы кыдёкысен мальдытъяз. Куспамы серекъяськомы но вал: бай колхозлэн контораез но кыдёкысен адӟиське.

Вожъяськыны уг яра, шуо, вылад, пе, вуоз. Озьы ик луиз, лэся. Асангуртэ бызи. 1976-тӥ арысен колхозмес ӝутӥсько ни. Со пӧлысь 24 арзэ тыршисько валтӥсь зоотехник луыса.

Нырысь-валысь туж кепырай: эх, тон, дышетӥсь луыны но ӧд пӧрмыты. Табере гурт удысын берганы но возьыт уг поты ни. Тонэ валало, тыныд оско, ужед мынэ ке, котькытын но ымнырдэ возьыны луэ вылэм. Зэм, секытэн луэме бере сюлэм улысьтым пиналылы вазиськи вал: ачим дышетскыны рос-прос ӧй пӧрмыты бере, мон понна но визь люкалод. Лариса нылы али шуэ: малы меда озьы сӥзид? Куинь диплом басьтӥз ни уго. Нырысь дышетӥсь луиз. Собере йылпумъяз Москваысь Вылӥ литературной курсъёсты. Али юристлы дышетскиз. Саша пиелы тани та сӥзёнэ пеляз пырыса вуттымтэгес.

Асанысь совхоз-техникуме но дышетскон мылкыдме зӥбломытон понна мынӥ мон. Уж, дор, нылпиос. Эшшо ке урок лэсьтоно. Ярам, чертёжъёс суреданы Лариса юрттылӥз. Сашике изьыны уг вормы вал бере, солы индылӥ: мон лыдӟисько, тон мыным умме усьыны эн сёты. Со шудэ, нош мынам йыры уллань лэзиське но лэзиське. Синъёсме кынемме но уг валаськы. Со дорам лыктэ но сайкатэ. Уйшорозь но монэ чакла вал.

Ӵапак нылпиосылы луыса ик техникумез горд дипломен йылпумъяй. Ижысь гурт удысъя институтэ но пыри ни вал. Но нырысетӥ сессие ик мыныны ӧй пӧрмыты – операцие шеди. Больницае выдэме берегес ик Асангуртэ огез дышетӥсе вуиз. Со юаз: кыӵе ужъёсыд, Марданова? Югдурез валэктӥ. Со чабкиськиз: ма карыны ёрмид шат? Нылпиосыд ӝоген коркаысьтыд кошкозы ни. Нош тон визь люкаськод на. Хозяйстводы племенной ӧвӧл, визьмыд тырме, эн дышетскы, пе.

- 2005-тӥ арын колхоздэс но племенное поттӥды…

- Ижъёс азям курон пуктӥзы уго: со ужен вырод, тон ке ӧд, нокин уз быгаты. Шуисько: мон ужасал, но калык азьын ӧй вераськылысал. Синучкон азе, пе, султы но верано кылъёстэ мадь, озьы возьдаськондэ вормод, астэ калык азьын шонер возьыны, соослэсь кышкатэк улыны дышод, пе. Дэмламзы юрттӥз, ява. Но мон огнам собыдӟа ужпумез ӝутыны ӧй вормысал. Калык монэ валаз, юрттӥз. Ачим уго колхозысь пӧртэм удысын ужай. Парсь но сюдӥ, скал но кыски. Оло, соин но гуртоос кылзӥсько мынэсьтым. Кылем арын кӧс куазь дыръя ог-огмылы уката матынгес луимы кадь.

Ма, кивалтӥсьмы юн ӧй луысал ке, кин тодэ, оло, куд-ог ляб хозяйствоос музэн, куашкан калэ вуысалмы ни. Но Михаил Крылов гань-гань кариськыны уг сёты. Соин но, дыр, хозяйствомы республикаын азьмынӥсьёс радын ветлэ выль технологиосты улонэ пыӵатэменыз. Кылсярысь, ми кемалась ни муэз берыкъятэк гыриськомы. Нырысьёсыз радын ужаны ӧдъямы молокопроводъёсын.

Туннэ милям 800 йыр кысконо скалмы. 60 кузя ужаськомы. Али москваос куремъя хозяйствоямы кылдытӥськомы госплемзавод. Ми азе пуктэмын ужпум: таза кунян но ошпи вордоно. Пичиысен ик соосты вузаны мед луоз, пе.

Басьяськисьёс дорамы ветло. Кылсярысь, паймыса котыръясько башкиръёс: малы, пе, милям уг пӧрмы тӥ сямен ужаны?

- Кӧня бен сылэ одӥг йырез?

- Ог 80 сюрс манет. Ма, ветылмы милям вуэмын ни, бызьылытэмын. Куинь-ньыль толэзь ортчыса, куняналоз ни. Али тани 30-лэсь ятыр йырзэ куре огез фермер. Со азьвыл но дорамы вазиськылӥз ни. Уг ӝожтӥськы.

- Котькуд скаллы нимыныз вазиськиськоды, шуо.

- Пудо вордонын валтӥсез курон – яратон. Асьтэос чаклалэ ай: гидэ пырыкуды, скал нырысь ик ма каре? Соку ик син шорады учке: кыӵе ай туннэ мылкыдыз кузёелэн, шуэмез потэ. Скал кыскисьёсылы меӵак верасько: пудолэн тазалыкез адямилэн шуныт кылыз но учкемез бордын. Сюродэс капчи мылкыдын пумитады ке, сиёнзэ но, пыд улаз лёгатэк, кушалоз, йӧлзэ но уз жаля. Гидэ кесяськыса пыриды ке, солэн сиемез потоз на шат? Шуккемдэс возьмалоз но шымырскоз.

- Асьтэ дорысьтыды скалдэс маялляськоды гинэ, иське?

- Шара вераны возьыт: вандоно луи скалме. Колхозлы вань сюлэмез поныса тыршыку, аслад пудоеныд йырин уг луы ни. Зэм, сюлмо мурт котькытчы вутскысалыз, дыр: фермаын берганы но, семьязэ утялтыны но, гань-гань шутэтскыны но. Мынам но чипы-куреге но, оше но вань. Скал но вордысал, вылды. Но шори пилиськеме ӧз луы. Картэным кыкмы но колхоз пудо котырын бергаськомы. Со – ветылъёсты будэтэ-утялтэ. Нош пудо дорысь уд пегӟы ук. Пастуке потыны дыр матэктэ. Коля шуэ: таяз учыре тон быжоосты чаклалод. Ярам, вазисько. Черод вуэ но, Колялы кияз сюло кутоно луэ. Монэ я администрацие, я министерствое ӧтё. Хозяйствоез валтӥсьлы уд шуы ук: пастухе потӥсько ай.

Ярам, со гинэ ке луысал. Скалэз пастухе поттоно. Гурт кузя соосты 7 часын ӵукна бичаса ветло. Нош ми соку ужын ни. Пудомес ураме кельтӥськомы. Ярам, уг пегӟы. Но сое ӝыт пумитан но вань на. Ми – весь ужын. Гидкуазе ӟеч адямиос пыртыса кельто ик. Но сӥзьыл картошка но, пызь но лапас улын. Сюро лушкаськыны дыше.

Сюлэм вӧсьме профессор, врач Иван Гришкин буйгатӥз. Тапалъёсы вуылыкуз, юалляськыны кутскиз улэм-вылэммы сярысь. Колхозамы соку 770 йыр скал вал. Со мыным шуиз: Валя, малпаськы ай, тыныд одно ик-а 771-тӥ скал кулэ? Йӧл трос сииськод шат? Картэныд гинэ ӵошеннадылы магазинысь басьтыны уд пӧрмыты-а, мар-а? Дордэ вунэтыса, тыныд али вань сюлмысь хозяйствояды ужано. Пенсие потон дырыд вуэ – тон пинал ӧвӧл ни котькытчы бызьылыса вутскыны. Малпаськи. Зэмен но, шонер ук Гришкин. Но пенсие потӥ ке, скал одно вордо ай.

Елена Сараматова.

Адвокат.

Юрий Михайлович Никитинэз Пичи Пурга ёросын улӥсьёс пӧлын тодӥсьтэмез ӧвӧл, дыр. Малы ке шуоно та йӧно воргорон доры шуге-леке шедем адямиос уно пӧртэм юанъёсын вазиськыло. Солэн юрттэмезлы оско. Юрий Михайлович – адвокат, озьы ик Пичи Пурга муниципал кылдытэтлэн депутатэз.

 - Юрий Михайлович, гуртын будэм пиосъёс трактор-машина борды бурмо. Нош тӥ тодон-валан дуннее кыстӥськиллямды. Кинлэсь адӟем кариды?

- Мемее но, тятяе но огшоры ужасьёс вал. Кыкназы но соос Пичи Пурга ёросысь: мемеелэн ныл йырыз Чёкалысь вал, нош тятяе Арланын вордскемын. Со милям Быдӟым оже ветлэмын. Егитъёс кузпалъяськиллям но улыны выжиллям Татариысь Огырчи городэ. Ужаны интыяськиллям чугун сюрес вылэ. Бӧрысь мемее выж миськем, нош тятяе вагонъёсты тупатъясь луэм.  Ньыльдон арлэсь кема тыршизы. Куинь пинал вордӥзы. Мынэсьтым бадӟым Слава агае но Рита сузэре вань на. Жаляса верано, мемеен тятя та улонысь вазь кошкизы. Ужзы секыт вал, соин но, дыр. Пичи дырысеным Слава агаелэсь адӟем карыса будӥ. Со школаын умой дышетскиз..

Спортэн эшъяськи. Огырчиысь школаез йылпумъяса, дышетскыны пыри Удмурт кун университетысь  спортфаке. Ар гинэ тодон-валан люкаса вуи но, армие басьтӥзы. Службае ортчиз Уралын но Казахстанын, сержант вал. Доре бертыса, дышетсконме азинтэме потӥз. Университетысь  физкультураен дышетӥсь луыса потӥ. Ой, кыӵе шулдыр ортчизы дышетскон аръёсмы. Ми Герман Скурыгинэн одӥг комнатаын улӥмы. Бӧрысь со дуннелэн ӝог ветлонъя чемпионэз луиз. Жаляса верано, Германлы асьмемын артэ улыны кема кылдымтэ. Валерий Медведцевен ыбылӥськыны ӵош ветлылӥмы. Валера биатлонъя Олимпийской чемпион луиз.

- Эшъёсты сямен, тӥ улондэс спортлы сӥзиллямтэды.

- Университет бере монэ  ужаны келязы Сарапул ёросысь Уральской шор ёзо школае. Коллектив борды туж чаляк дыши. Нылпиосын но соку ик кылмы тупаз. Урокъёс бере соосын пӧртэм ӵошатсконъёс, шудонъёс, бызьылонъёс ортчытъямы. Соос монэн эшенызы кадь асьсэды возьылӥзы.

- Тӥледлы егитысен оскизы кивалтон удысэз нуыны.

- Озьы. Со школаын мон ар гинэ ужаса вуттӥ. Одӥг нуналэ Сарапул роноысь специалистъёс лыктӥзы но вань дышетӥсьёсты педсоветэ люказы. Мыным, егит муртлы, со ёросысь Шадриноысь тямыс классъем школаын ужаны ӵектӥзы. Мон соку ас поннам малпай: иське, таослы мынам дышетэме уг кельшы яке нылпиослы уг яраськы, дыр. Янгышаськем. Монэ школалы кивалтӥсе пуктыны малпаллям. Ӧй пумитъяськы. Кышкасьёс пӧлысь ӧвӧл ук мон, косӥзы, мынӥ, ужай. Отын ик вуоно кузпалыным, Сарапул ёросысь Мостовой гуртын вордскем нылашен, тодматски.

- Котькытчы адями улыны мед интыяськоз, но вордскем палъёс одно ик асьсэ пала кыско.

- Анай-атайлы матэгес кариськеме потӥз. Мемее но ялан дор пала берты вал, шуылӥз. Мар, пе, мурт дуннеын улӥськод. Пичи Пургаысь роное мынӥ но, мыным  нош директор луыны ӵектӥзы. Таяз радэ Уромысь шор ёзо школае келязы. Август толэзе мон отын кивалтӥсь интыын пукисько вал ини.

- Татын но ӟеч тыршемдэс синйылтӥллям. Тӥледлы общеобразовательной школаысь вылӥ категориен кивалтӥсь ним сётӥллям.

- Уром школаен мон куать ар пала кивалтӥ. Ужын котькыӵе шуг-секытъёс но вормонъёс, улӥе лэзьконъёс но вылӥе ӝутсконъёс вал. Капчи ӧвӧл ук нылпиосын ужаны. Вылаз ик, бадӟым коллектив ке тыбыр сьӧрад вань на.

- Но малы ке но школаын кема возиськиллямтэды. Нылпиосын ужаны акыльтӥз шат?

- Улонам мар ке уг тырмы кадь. Ялан тодон-валанме будэтэме потылӥз. Экономикаез валатэк, кызьы кивалтӥсьын ужалод? Мон ужан вискам Удмурт кун университетысь экономикая факультетэ пыри, «Менеджмент и управление производством» специальностья дышетски. Собере Москваын управлениея академиын дышетски. Туж кельшиз мыным отын. Горд дипломен сое йылпумъяй. Отысь юрист луыса потӥ.

- Малы одно ик юристлэсь сюрессэ бырйиды?

- Юристлэсь ужзэ бырйи малы? Мемее но, тятяе но огшоры ужасьёс вал. Соос шоры учкыса но музонъёссэ адӟыса, мон шӧдӥ: огшоры адями пала та улонын нокин дур уг басьты. Мыным соос жаль потылӥзы. Ас кужымелы оскыса, юрист луи.

Пичи Пурга черкогуртын «Баланс» юридической центр усьтӥ. Угось калыкен ужаны мыным кельшиз. Адямиос пӧртэм юанъёсын дорам вазиськыны кутскизы. Озьы ик, юрттэт курыса, вуылӥзы предприятиосын, учреждениосын но колхозъёсын ужасьёс. Соослы валэктон сётыны быгатӥськод ке, ачид бурдъяськиськод. Мон ӝутскем мылкыдын тыршисько. Калык тау карыса кошке.

- Тӥ али но тодон-валандэс будэтӥськоды.

- Россиысь кун службая академилэн аспирантураяз пыри. Дышетсконэ капчи мынэ. Та дыре мон диссертация гожтӥсько. Ӝоген наукая кандидат луо, малпасько.

- Законъёс туж трос. Юристъёс но ваньзэ тодыны уг быгато, дыр?

- Озьы. Та вакытэ милемлы туж  юрттэ Интернет. Тани Пугачёво пуштылонъёсты ик басьтом. Шуге-леке шедем адямиос, юрттэт курыса, пӧртэм юанъёсын дорамы вазиськыло. Но асьмелэн ӧвӧл чакламын соослы тупась, юрттэт сётӥсь законъёсмы.

- Туала арын вань-а дунтэк ужась адвокатъёс?

- Кызьы сотэк. Тани алигес луэм учыр сярысь верало. Вавожысь егит нылаш вазиськиз. Со сирота, ужез ӧвӧл. Судын мон солы юрттӥ. Одӥг копейка но уксёзэ ӧй басьты. Ӵем озьы луэ.

Мон граждан ужъёсын вырисько. Кылсярысь, уждун тыронэн, музъем сётонэн, пунэмъёсты берыктонэн… Уж трос.

- Со понна ик тӥледыз калык гажа. Тӥ сярысь мон тазьы шуысал: одӥг адямилэн быдэс короб визьмыз но нуыны вормонтэм дышетскемез. Тӥ озьы ик политикае но выемын. Ваньмаз вутскыны дырды тырме-а?

- Пичи Пурга ёросысь кенешлэн кык созываз мон депутат вал ини. Отын кыл кутылӥ но чакласа вози законэз тӥясьёсты. Озьы ик кивалтӥсько «Справедливая Россия» партилэн Пичи Пургаысь ёзэныз.

- Тӥледыз егит дыръяды ик депутатэ бырйиллям, шуо. Шонер-а со?

- Таиз но шонер. Уром школаын ужакум, комсомол огазеяськон монэ УАССР-ысь Вылӥ Кенеше депутатэ ӵектӥз. Нырысь-валысь туж кышкай вал. Кызьы  ёросысь райкомлэн нырысетӥ секретареныз Сергей Шартдиновен ваче нюръяськом? Но мон солэсь сюрессэ ӧй ӵогы. Улонын озьы пӧрмиз, кыкнамы ик депутат ныпъетэз нуимы. Берло нош мон Кун Кенешысь М. Васильев депутатлэн юрттӥсез вал.

- Мар ужало кузпалды но нылпиосты? Улмо, пе, улмопуэзлэсь кыдёке уг усьы.

- Кузпалы Ирина Юрьевна ӟуч кыллы но литературалы дышетэ Огырчи школаын. Ӟуч гуртын ке но будэмын, мон сое воксё удмурт кари ини. Верамез гинэ уг луы, ваньзэ вала. Ми соин ныл но пи будэтӥмы. Пиналъёсмы школазэс зарни медален йылпумъязы. Марина Удмурт кун университетысь юридической факультетын дышетскиз, юрист. Станислав но юридической факультетын ик дышетске. Кыкетӥ курсэз йылпумъяз ини. Мон соослэн та сюресэз быръемзылы пумит выри вал. Но мар карод? Мынам ужелы соос синмаськыса будӥллям, лэся, юрист луэмзы потӥз. Алигес семьяямы шумпотон вуиз: дунне вылэ нуныкаймы вордскиз.

- Улонады мар тужгес но сюлэмшугъяськытӥсез вань?

- Егит дырысеным ини удмуртлык монэ сюлэмшугъяськытэ. Асьмеос со сярысь трос вераськиськом. Но ужмы сокем ик ушъяськымон уг мыны. Тани вӧзамы ик бигеръёс уло. Учке ай, кыӵе соос асьсэлэн культуразы понна висё. Ульчаосысь асьсэ кылын гожъямъёсты адӟод. Нош асьмелэн со арысь аре пашме кадь. Туэ пичи пургаос Гырон быдтон праздниксэс ӧз ортчытэ. Пугачёвоысь пуштылонъёсын сэрен, пе. Нош Огырчиын мар вал? Соос но кӧшкемыт улонэз адӟизы ук. Корка липетъёссы но укнооссы куашказы. Но ведь ужась калыксэс данъяны быгатӥзы. Озьы ик Татариысь бигеръёслэн огазеяськонзы Яган посёлокын Сабантуй ортчытӥз, асьмелэсь ужась калыкмес данъяны быгатӥз.

Сюлмаськытэ юнме шорысь адямиез янгыш карон. Адямиез выжылы люкон. Со бордысь пото ваче жугиськонъёс но керетонъёс. Котькудӥзлэн калыклэн музъем вылын улыны правоез вань.

- Адвокатлэн ужез сокем ик капчи ӧвӧл, дыр. Йыруж лэсьтэм адямилы, со янгыш шуыса тодӥськоды ке но, юрттыны тыршиськоды. Ужады кышкатъян учыръёс но луыло, дыр?

- Сыӵе милям ужмы: огезлы юрттӥськом, нош мукетсэ выйтӥськом. Мыным котькуд адями жаль потэ. Со пумысен тани мар шуыны турттӥсько: ог-огдылэсь кужымдэс мертаса, эн улэ, уждэс судозь эн вуттэ, тупаны тыршелэ.

Кышкатъянъёс сярысь ке, соос вазен ӵемгес луо вал. Но ми солы дышемын. Кышкатэ  ляб, вормыны быгатӥсьтэм адями.

Любовь Тихонова.

 

Лякыт сямо, вазиськись, адямиосын одӥг кыл шедьтыны быгатӥсь, котькинлы юрттыны тыршись, мукет сямен вераса, котьма ласянь адӟем карымон  воргорон – озьы шуыны луоз Пичи Пурга черкогуртысь Георгий Алексеев ужбергатӥсь сярысь.

 Чигиськем малпан

- Георгий Леонидович, Пурга музъемлэн кыӵе сэрегаз меда тӥ гольык пыд бызьылӥды?

- Выль Мӧнья гуртмы туж ик бадӟым ӧвӧл. Но со туж чебер интые пуксемын, гужемзэ быдэсак вож писпу пӧлы вые. Ми дорын вордскемын «Удмурт дунне» газетлэн азьвыл редакторез Василий Михайлов. Василий Михайлович мынам ӵужмуртэ луэ. Гуртамы ик будэмын журналист Вячеслав Михайлов. Колхозэнымы быгатыса кивалтэ Семён Фёдоров.

Тятямылэн, Леонид Николаевичлэн, тодон-валанэз вылӥ, со зоотехник. Секыт но сютэм аръёсы дышетскыны быгатэм. Солэн сямыз туж лякыт но зӥбыт. Ми шоры ноку кесяськемез ӧвӧл. Ми, атайлэсь котьма ласянь адӟем карыса, будӥмы.  Мемеймы, шутэтскыны потытозяз, колхоз фермаын ыж сюдӥз. Со ыжъёс огшорыесь ӧй вал: мугоръёссы бадӟымесь, гонзы тӧдьы но кузь.

Парлы пар сюре, шуо: мемеймы но, тятямы кадь ик, лякыт но востэм. Кыкназы но адямилы юрттыны дасесь. Милемыз но, монэ но кык апайёсме, асьсэ кадь ик сабырлы но вазиськись луыны дышетӥзы.

Покчиослы школамы асьме гуртын ик вал. Со пыр потыса, бадӟым классъёсы  дышетскыны ветлӥмы ини Улын Юри гуртэ. Таиз школамы гуртмылэсь сизьым иськеме интыяськемын вал. Толалтэ, кынмыны медам шеде шуыса, колхоз тракторен но валэн нуллӥзы. Шунытгес кариське ке, куас вылэ султӥськом ини, тулыс велосипедэн ширтӥськом. Дас классэз умой йылпумъяй. УдГУ-ысь спортфаке йыгаськи. Физкультура урокез туж яратылӥ угось. Школаын но ёросын ортчылӥсь ӵошатсконъёсы но ӵемысь пыриськылӥ. Баллэ тырмымтэен, университетэ пырыны ӧй быгаты. Сыӵе кӧты ӝож луиз.

Доре бертӥ но, гуртысьтымы ньыль-вить кузя пиосын Сарапулысь совхоз-техникуме агрономе дышетскыны кошким. Экзаменъёсмес умой сётӥм, ваньмы пырыны быгатӥм. Соку милям, егитъёслэн, самой шулдыр вакытмы вал: серекъян, шудон, кырӟан, эктон… Дышетскон аръёслэсь ортчемзэс валаса ик ӧй вутты. Монэ армие басьтӥзы. Служить кари Ярославль улосысь Переславль-Залесский городын. Бӧрысь ини, связистэ дышетскыса, монэ Белоруссие келязы. Секретной частьын служить кари.

- Армия бере малпандэс быдэстыны мылкыдды ӧз сузь ни-а?

- Дышетскыны ӧй мыны ни шуыса, али ке но кӧты уг веська. Табере малпасько: тыршысал ке, УдГУ-э пырысал, дыр, дышетсконме йылпумъясал. Адямиос дышетскон понна кык пол но, куинь пол но кужымзэс эскеро ук.

Армия бере Ижын шофёре гинэ дышетски. Доре ӧз поты ни бертэме, ужаны интыяськи Пичи Пурга черкогуртысь РТП-е. Кивоштӥсь вуэ шуыса, кивалтӥсьёс туж шумпотӥзы. Со вакытэ тросэз ужасьёссы угось арлыдоесь вал ини. Мыным соку ик общежитиын нимаз комната висъязы, машина сётӥзы. Уже туж кельше вал. Эшъёсыным заправкаосты тупатъяса ветлӥмы, отчы бензин но эстӥськон нуллылӥмы. Тупаса огкылысь но шулдыр ужамы.

«Эмезь вӧльы» пӧлын

- Пичи Пургаын ик яратондэс но пумитады, луоз?

- Баграш-Бигра гуртын вордскем Люда, Глазкарысь вуз каронъя училищеез йылпумъяса, соку гинэ Пургала ужаны вуэм вылэм. Егитэсь ук, ог-огмылы синмаським-кырмыштӥм но матысь эшъёс луим. Собере семья кылдытӥм. Отӥяз бӧрсьысь бӧрсе пиналъёсмы  вордскизы.

- Ай соос тӥляд куинь кузя нылъёс ук. Пиды ӧвӧл шуыса, мукетъёслы уд вожъяськиське-а?

- Пи басьтыны уксёмы, лэся, ӧз тырмы шуыса, кузпалыным серекъяськом ини. Инмар милемлы куинь чебересь но визьмоесь нылъёс кузьмаз. Табере соос милемлы пиёкъёссэс мед кузьмалозы ини.

- Быдэсмымтэ малпанъёстэс табере нылъёсты азьланьто ни, дыр.

- Бадӟымез Оля нылмы Ижысь гурт удысъя академиын дышетскиз. Со  бухгалтер луыса тырше. Али пичи нылыныз пуке. Катя Казаньысь чугун сюрес вылын ужасьёсты дасянъя техникумез йылпумъяз. Али Огырчи станциын бухгалтер. Ужан висказ та удысъя ик тодон-валанзэ будэтэ чугун сюрес вылын ужасьёсты дасянъя Москваысь университетлэн Ижысь филиалаз. Светамы пичи ай, со 6-тӥ классэ гинэ потэмын. Кин луоз, тодмо ӧвӧл, оло, со ик спортфаке пыроз ай. Света спортэн выре. Милемды шумпоттэ ини Даша нуныкаймы.

- Малы ке но корка пуктӥллямды Пичи Пургалэсь куинь иськеме интыяськем Миндэр гуртэ.

- Кышнояськеме бере ик тятяен мемей шуизы: Пургалы матэ, Миндэр гуртэ-а, мукетаз-а, пичи ке но юртъер басьтом. Пересьмим ке, ми тӥ доры улыны выжом, ӵош кариськом. Но соос али ке но Мӧньяязы ик уло, вордскем гуртысьтызы нокызьы потыны уг ӵыдо. Огсямен асьсэос ик юртъерзэс утьыны-вордыны быгато ай. Нош ми, анай-атайлэсь басьтэм юртъерзэс вузаса, Миндэр пуме корка ӝутӥмы. Татын улэммылы туэ 30 ар тырмиз ини.

Ветлымтэ  сюресэз лёган

- Нош кытысь тӥляд ужбергатон удысын берганы  быгатонлыкты?

- Совето Союз куашкан вакытэ «Агропромэнерго» но бырон калэ вуиз. Мон отын экспедитор вал. Уже кельше, сюлэмыя: отчы-татчы мынӥськод, калыкен вераськиськод, кулэ луись вуз вайиськод. Сыӵе азьын шаплы ӧд ке луы, номыр уд шедьты. Отын ик электриклэн ужезлы дыши. Ёросысь гуртъёстӥ ветлыкузы, ужасьёс тырмымтэен, электрикъёсмы монэ ӵемысь сьӧразы басьязы. Котькыӵе ужлы дышоно вылэм.

ӵапак со «Агропромэнерго» медаз быры шуыса, мон туж но туж сюлмаськыны кутски. Эшъёс но жаль потӥзы, воксё ужтэк кыльысалзы ук. Адямилы ведь кызьы ке но семьязэ сюдоно, уксё поттоно.

- Собыдӟа организациез киултыны быгатӥды шат?

- Киултӥ шуыны сое уг луы. Кутсконэз тазьы вал. Юртъер котырын ке но ужаны яралоз шуыса, мон аслым грузовой машина басьтӥ. Соин магазинъёсы, «Агропромэнергоысь» кошкытэк,  вуз нуллыны кутски. Ачим но валаса ӧй вутты, Огырчи каре, райполэсь магазинъёссэ арендовать карыса, магазин усьтыны быгатӥ. Уже ӟеч мынӥз, эшшо одӥг магазин усьтыны луонлыке кылдӥз на. Соку мон кутӥ но кыксэ ик магазинъёсме «Агропромэнерголэн» азбараз интыяй. Валамон ини, кивалтӥсьёсын кенешыса. Лэсьтӥськон материалъёсмес киясаос, огырчиос, дэриос курылыны кутскизы. Озьы ужмы интыысьтыз вырӟиз, паськытаз.

- Ужбергатӥсьёсты пачкато налогъёсын, тыриськонъёсын. Лёгымтэ-ветлымтэ сюрес вылын шуг-секытъёс пумиськылӥзы, дыр?

- Кинлы бен та уж капчиен сётӥськиз ини! Шуг-секытъёс трос. Но соосты вормыны быгатоно. Налогъёс ялан пачкато угось. Кредитмес али ке но тыриськомы на. Куддыръя сыӵе ки-пыд юскиське, коть али ик ужедлэсь куштӥськы. Собере нош малпаськод: мон гинэ тазьы уг ужаськы, адямиос чидало ук.

- Уж дурады вазь ӵукна кошкиськоды, бер ӝыт гинэ бертӥськоды. Юрт котырдэс нош кин эскере?

- Оля нылмы семьяеныз ӵош ми дорын улэ. Солы оскиськыса ик, ми кузпалэным ужамы бер ӝытозь пукиськомы. Эмеспимы но бордамы ик тырше. Со милям воксё асьмелэн вордэм пимы кадь. Котькыӵе мытэм-малпам ужмес соин ӵош лэсьтӥськом. Кылмы тупа. Сизяшуръёс милемлы ӟеч эмеспи будэтӥллям.

Та нуналъёсы кыкетӥез нылмы но асьме ёросысь ик Ыбдэс гуртэ бызиз.

ӝытсэ уж дурысь озьы гинэ мозмытскыны уг луы ни, нунал быре ке, ваньзэ лыдъяно-чотано, ужасьёслэсь бервылзэс эскерыса ортчоно луэ. Мон ачим ялан сюрес вылынгес: созэ я тазэ ваёно, отын но татын кулэ луись вуз сярысь вераськоно. Нунал пӧрат Иже я Можгае ветлоно. Со городъёсысьгес ик вуз но ворттӥськомы.

Татчыозь ай весяк пудоен улӥмы: скал но, чыпы-курег но вордӥськом вал. Та аръёссэ куштӥським. Пурга котырын трос калык улэ, пудо сиён дасян татын секытгес йӧтэ.

- Кузпалды но бордады ик тырше. Секыт ӧвӧл-а дорын но, ужын но одӥг малпанъёсын, одӥг сюлмаськонъёсын улыны?

- Вӧзад оскымон адямиед вань ке, туж умой ини. Уж дурысь вань секытэз кузпалы Людмила Александровна вылэ усе. Нимаз ужаны кутскеме бере со мон доры выжоно кариськиз. Ачиз ик вузчи но, товаровед но, бухгалтер но луэ. Талэсь азьвыл райпоын ужаз, магазинын вуз кариз.  Огинын ужаны нырысь-валысь секытгес йӧтэ вал кадь. Табере ог-огмытэк кызьы ужаны ик ум тодӥське ни.

- Вань ужез со огназ уг быдэсты, луоз. Музон ужасьёсты но вань, дыр, ук?

- Ужасьёсмы ваньмыз-ӧвӧлэз дас сизьым пала лыдъясько. Со сяна, «Агропромэнергоын» тямыс кузя тыршисез вань на. Дорамы ужаны мылкыд карисьёсты ми ум палэнтӥське, кошкисьёсты но ум алӥське, нокинэ кутыса ум возиське. Но буш интыосмы ноку уг луо.  «Агропромен» мон ачим ик кивалтӥсько, солэн генеральной директорез луисько. Отын ужасьёс тыл кысконэн, лэсьтӥськон ужъёсын выро, ёросысь гуртъёстӥ ветло.

Юрттӥсь мурт уз куанермы

- Контораяды вань борддоръёс данъян грамотаосын но таукаронъёсын тырмытэмын. Ёрослэн йырыз Михаил Лекомцев но тӥледлы таукарон гожтэм. Мар понна со дунъетъёс?

- Ёросысь муниципал кылдытэтъёс кыӵе ке ужрад ортчытыны малпало ке, юрттэт курыса, ми доры вазиськыло. Кӧня быгатӥськом, юрттыны тыршиськом. Кылсярысь Кутер-Кутон гуртын, Быдӟым Вормонлы сӥзьыса, туж чебер синпелет пуктӥзы. Шумпотӥсько, соослы но пичияк юрттыны быгатӥм. Озьы ик нимаз адямиос но вазиськыло. Улонын оломар но луэ ук: кинлэн ке юртъерез ӝуа, кин ке мукет кӧшкемыт учырен пумиське. Кызьы адямилы уд юртты. ӟигарзы бырем песянайёс но куд-ог дыръя вазисько: липетсэс я укнооссэс вошъяно вал, шуо. Кытчы пырод, юрттӥськом. Пичиысен милемыз анай-атаймы сыӵе сямлы дышетӥзы бере, шуге-леке шедем муртъёс жаль пото.

Ми доры озьы ик вазисько школаос, нылпи садъёс. Соослы кузьымъёсын юрттыны тыршиськом. Тросэн ик бон ум ке но быгатӥське, адямиез берен ум келяське, юрттыны тыршиськом.

- Ай тани али но, Пугачёво каргуртын пуштылонъёс ортчем бере, тросэз Пичи Пурга черкогурт котырын улӥсьёс тӥледлы тау каро.

- Ма, созэ веранэз ӧвӧл ни. Юртъеръёс липетъёстэк, укно кыльылӥзы. Ми пуштылонъёс бере ик, калыклы юрттэт сётыса, ветлӥмы, юромо со понна бригада кылдытӥмы. Миндэр гуртын улӥсьёслы пияла вандылыны юрттылӥмы. Шуге-леке сюрем адямиос шумпотэменызы синкылиоссэс кутыны уг быгато ни, тау каро. Со вакытэ вузъёсмылэсь дунзэс но пичигес каримы.

- Тӥляд асьтэлэн кебитты но вань. Со малы кулэ на?

- Милям сварщикъёсмы оломар но лэсьтыны быгато. Асьсэос ик мунчо гур но, мотоблоклы уробоос но, чебермам кенер-капкаос но дуро. Адямиос соосты мыло-кыдо басьто.

Кортлэсь оломар но дурыны но лэсьтыны быгатэ Александр Тимофеев. Со – художник. Саша та ужезлы нимысьтыз дышетскемын. Киосыз солэн зарни.

- Тӥлесьтыд ӟеч депутат пӧрмысал, дыр, калыкен ужаны быгатӥськоды, кулэ дыръяз юрттэт сётӥськоды.

- Мон асме ачим олокытчы но донгыны уг яратӥськы. Эшъёсы кемалась, депутатэ мыныны косыса, ёрто ини. Но мынам дӥсьтонэ уггес тырмы на кадь потэ. Сотэк но уже тырме.

- ӝӧк вылысьтыды удмурт журнал-газетъёсты синйылтӥ. Озьыен,  лыдӟиськиськоды?

- Ми удмуртъёс ук, чай юон вискамы  журнал-газетъёсты киямы кутӥськом. Мар ортче ёросын но республикаын, кызьы сое тодытэк улод. Ужасьёсмы но мед лыдӟиськозы шуыса, газетъёсты почта пыр басьтӥськом. Медаз ыше шуыса, огинэ вурылӥськомы. Тодмо адямиос сярысь гожъяло ке, шара но лыдӟиськыса пукыны дыр шедьтӥськом. Уката ик тунсыко потэ «Удмурт кизилиос» рубрикады.

Яратӥськом удмурт концертъёсы ветлыны. Но, жаляса верано, отчы мыныны дырмы уг тырмы. Котькуд ужасьмылэсь вордскем нуналзэ пусйиськом, ужрадъёсты семьяосынымы ӵош ортчытъяськом. Ужасьёслы кызьы ке но ӟеч карем потэ, Выль арлы ваньмызлы саламъёс сётъяськом. Валля арын ай нырысьсэ кузпалэным ӵош кыре-буре потамы, Варзи-Ятчи курортын шутэтскимы.

- Ужады мар тужгес но сюлэмшугъяськытӥсез вань?

- Котькуд ужасьлэн семья пушказ улонэз умой мед радъяськоз. Семья кусып сӧриське ке, адями уж дураз секыт мылкыдын вамыштэ ини. Дыраз уждун сётъяны мед быгатом. Таӵе улонын асьмеос но, ужасьёсмы но буш ӝӧк сьӧры медам кыле.