Ижысь ЭКО лэсьтонъя клиникаен тодматскон.

Песянай-песятайёсмы малпаны но ӧз быгатылэ, нуныосты куке-соку пробиркаын но кылдытъяны кутскозы шуыса. Инмар пинал ӧз сёты бере, озьы ик улӥськом ни, лулӟылӥзы.

Ирина но Вадим ньыль ар пала кузпалъяськыса улэмзы бере больницаостӥ бызьылыны кутскизы: малы соослэн пиналзы ӧвӧл? Собере нырысь йӧнатӥськиз Ирина, кык пумо операция но лэсьтыны выризы солы. Отӥяз эмъясьёс кырмиськизы вал Вадим борды – пиосмурт тысед, пе, азьтэм… Эшшо ар ортчыса, Ириналы диагноз пуктӥзы: муры…

Кун Кенешысь Тазалыкез утёнъя, демографияя но семья ужпумъёсъя комиссилэн кивалтӥсез Светлана Кривилёва верамъя, туннэ ог 20 процентэз семьяос пинал вайыны шугъясько. Уг кулэсмо ЭКО лэсьтыны (пробиркаын нуны герд кылдытыны) куриськисьёс. Арлы быдэ 1 сюрс 500 пала кузпалъёс вазисько Тазалыкез утёнъя министерствое, ЭКО лэсьтыны черодэ куриськыса. Но Россиысь бадӟым клиникаосы квота араз ог 200-эзлы гинэ висъяське.

Озьы та черод ноку уз бырылы кадь. Талэсь ик шуэрскизы Ирина но Вадим: эшшо кӧня ке аръёссы ышозы. Интернетын бугыръяськизы, со пыр йыгаськылӥзы ЭКО лэсьтонъя пӧртэм клиникаосы. Матысез – Казаньын. Но малы ке ширтоно кариськизы Москвае.

- Кӧня та дыр ӵоже чидам, нокинлы ӧй сӥзьысал, – вера Ирина. – Анализъёс бичан, пӧртэм уколъёс-эмъюмъёс пуктылон. Ваньмыз – нуналъя, часъя тупаны кулэ. Кӧнялы ке бергес кылид – пайдаез уз луы. Озьы арня куспын Ижысь Москвае кык-куинь пол но солань-талань кыстаськоно луиськиз.

***

Табере ЭКО лэсьтон борды асьме эмчиос но басьтӥсько ни. Ижысь клиникаын ваньзэ лэсьто: кузпалъёслэсь тазалыксэс эскеро, нуны сюрымтэлэсь мугзэ утчало, пинал вордскыто.

- Таӵе клиника асьмелы туж кулэ ни вал, – шуэ Светлана Кривилёва. – Угось сюрес адямиез туэ жуммытэ, ватсаса коньдон но кулэ на солы. Таиз клиника нимаз адямилэн луэ. Нош 2013-тӥ арысен ЭКО лэсьтыны кутскомы на Анайлэсь но нунылэсь тазалыксэс утёнъя (перинатальной) центрын. Быдэсак со кун чотын луоз-а – али вераны туж шуг. Малпасько, оглюкетсэ коньдонэз асьсэос ик кузпалъёс тыроно луозы, но озьы ке но вазиськисьёс луозы, дыр.

Кыӵе тӥрлык кулэ ЭКО центръёс усьтон понна? Кызьы нылпиосты пробиркаын будэто? Та юанъёслы валэктон утчан вылысь Ижысь ЭКО клиникае алигес вуылӥз Кун Кенешлэн Тӧроез Александр Соловьёв, соин ӵош – Кун Кенешысь ялан ужась комиссиослэн кивалтӥсьёссы.

- Кӧня ке мурт дорам но вазиськиз ни вал, таӵе клиника усьтыны курыса. Бен, али со усьтӥськиз ас кужыменыз. Но кун ласянь юрттэт кулэ луиз ке, ум палэнтӥське, – шуиз Александр Соловьёв.

Кун Кенешысь делегация ортчиз клиника кузя: татын нылкышноослы кабинет, таиз – воргоронъёслы… Лабораториын эскеро воргорон тысьлэсь ӟечлыксэ, инкубаторъёсын будэто ни лулпырыосты… Котькуд кабинетын – дуно эмъян тӥрлык, клиникаын син кӧльы кадь чылкыт.

***

Марлы та клиникаез усьтон понна миллионъёсын коньдон кисьтоно вал – ӟеч тодэ солэн кивалтӥсез Марина Лукина.

- Кылем арын милям 100 пала нуныосмы вордскизы, – шуэ со. – Бен, соосты ми кылдытӥм-будэтӥм на Казаньысь клиникаен ӵош. Нош туэ февральысен 19 нылкышнолы ЭКО лэсьтӥм ни. Со пӧлысь 6-ез нырысетӥ толэзяз ик валазы: нунызы луоз! Одӥгез кыкто пинал возьма!

Специалистъёс шуо: кузпалъёс ар ӵоже уртче уло но нуны уг сюры ке, йӧнатӥськыны кутсконо ни.

- Жаляса верано, берло дыре асьмелэн сыӵе кузпалъёс трос луизы: нырысь карьера лэсьто, собере гинэ пинал сярысь малпаськыны кутско, – азьланьтэ веранзэ Марина Геннадьевна. – Но котьку малпамъя гинэ уг пӧрмы. Таӵеос ӵемысь вазисько клиникаямы. Нуны сюрымтэзылэн мугъёсыз котькудӥзлэн пӧртэм. Озьы одӥгъёссэ туж кема йӧнатоно-стимуляция лэсьтоно луэ, мукетъёсызлы вакчи дыр но тырме. Талэсь ик потэ нуны сюронлэн дуныз. Ачиз ЭКО 45 сюрс манет сылэ. Но дуноесь эмъюмъёс. Озьы бордаз 90-150 сюрс манет люкаське на.

Дорамы трос вазисько палкышноос. Пинал ваемзы потэ, воргоронзы ӧвӧл. Статистика сыӵе: Россиын нылкышноос воргоронъёслэсь 10 процентлы тросгес. Пиосъёс пӧлын эшшо тачак на юисьёс, кыскисьёс… Соин ик дорамы вазиськись палкышноосты туж валасько. Таослы ми донорлэсь спермазэ ӵектӥськом. Бен, воргорон тысьёсты асьмеос ум дасяське, палэнысь дасьсэ вайиськом. Доноръёслэсь пичи дыр туспуктэмзэс возьматӥськом, куаразэс кылзыны сётӥськом, нырзэс, пельёссэс, синъёссэс кыӵезэ вераськом – кудӥз кельшегес, созэ ик нылкышно бырйыны быгатэ.

Куд-ог нылкышноослэн яичникъёссы сокем куасьмемын, сое нокызьы уд сайкаты ни. Таӵе дыръя но донор кулэ. Нош нылкышно доноръёсты клиника Ижысь но кутэ.

- Со понна 45 сюрс манет ӵектӥськом, – пусъе Марина Геннадьевна. – Но одӥг нылкышноез ми 4 пол гинэ донор кариськыны лэзиськом. Городмы сокем ик бадӟым ӧвӧл ук – нуныос одӥг тусъемесь вордскыны кутскозы. Со сяна, донорлэн котьку вань правоез пиналэз аслыз басьтыны – генъёсыз солэн ук. Бен, кытысь, кыӵе нылкышнолы солэсь яйцеклетказэ пуктӥськом, ум вераське.

Вань на учыръёс: нылкышно нуныез пушказ нуллыны уг быгаты. Таӵе дыръя суррогат анай утчаськом. Мурт пиналэз пушказы будэтыны дась луисьёслы 600 сюрс манет ӵектӥськом. Но нунылы кулэяськисьёс, валамон, трос поллы уногес коньдонзэс кисьтоно луо.

***

Ириналэсь но Вадимлэсь шудоосыз туннэ быдэс дунне вылын ӧвӧл кадь! Доразы, оло, ваньмыз сямен ӵыжы-выжыоссы люкаськизы. Мар но кузьым вайиллямтэ соос! Шудонъёс, шудонъёс, шудонъёс… Угось пичи Алиналы туннэ – 2 арес! Тӥни ук бубыли кадь со тэтча-лоба, сомында муртлэсь котыраз бергамзэ шӧдэ. Иринаен Вадим шудзылы уг на оско кадь: табере соослы но «анай», «атай» шуыса вазиськись вань.

ЭКО-е таос кык пол ветлоно луизы. Нош кыкетӥзэ нуны вордэмзы потӥз ке, Москвае эшшо шонтыны быгато на. Кынтэм лулпырыоссэс отын вить ар ӵоже возём шуизы.

- Милям но вань сыӵе «холодильникмы», – шуэ Марина Лукина. – Тани алигес дорамы вазиськиз 1972-тӥ арын вордскем нылкышно. 8 яйцеклетказэ солэсь басьтӥмы, лулъямы… 7-ез – пӧрмиз. Одӥгзэ пушказ понӥм ни, 6-сэ – кынтӥм. Озьыен, со эшшо дорамы лыктыны быгатоз. Кыкетӥ нуныез дунтэмгес но усёз…

Элина Кумачёва.

«Уй но нунал изьысал. Ӟеч кӧлӥсько ке но, уйжомыса ветлӥсько: уг юртто чай-кофе но, витаминъёс но. Выдэме бере, минут улыса, умме усисько ни, сайкаллятэк 12 час кӧлӥсько. Е. Малышева передачаяз сое щитовидкаен герӟаз. Мынам сыӵе сюлмаськонъёсы ӧвӧл. Мар муген сокем кӧлэме потэ?»

Редакциямы та выллем юанэн вазиськисьёс ӧжыт ӧвӧл. Валэктон утчаса, вуим медицина наукаосъя доктор, Ижысь медициная кун академиысь доцент Алексей Шкляев доры.

- Алексей Евгеньевич, адями ӝыны даурзэ кӧлыса ортчытэ. Малы инкуазен озьы малпамын? Дыр быдтон гинэ ӧвӧл-а со?

- Суткаысь ог 12 чассэ адями мае ке но кылэ-адӟе, мылкыдъёсыз вошъясько: я куректэ, я шумпотэ. Ваньзэ тае валаны-радъяны йырвиым соку ик уг вутты, уг вормы. Та понна дыр кулэ – уй. Мугор кӧлэ, нош йырвиымлэн тужгес кысык вакытэз кутске – нунал ӵоже вуэм информациез со «ӝажыосы» тыре. Одӥгъёссэ тодэм-адӟемъёссэ пыдлогес ватэ – оло, куке-соку кулэ луозы на, мукетъёссэ воксё вунэтэ, куинетӥоссэ ӵукна султыкумы ик тодамы вайытэ.

Мугорысь мукет ёзвиос уйин калленгес ужаны кутско: сюлэм шергес йыггетэ, вирзӥбет лэзиське, шокан мургес но шергес луэ. Соос озьы шутэтско! Соглаш луэлэ: ёзвиос вистэм-вожтэм уй-нунал ужазы ке, ӝоггес жадёзы-пӧсьтозы. Озьыен, тырмыт кӧлыса, асьмеос улон вапуммес кузёмытӥськом, таин ӵош тазалыкмы но юнма.

- Кӧня кӧлоно адямилы, пуш ёзвиос мед шутэтскозы, йырвиым выль тодонъёссэ «ӝажыосы» мед тырыса вуттоз шуыса?

- Котькуд мугор аспӧртэм-лыко. Соин ик одӥгъёсызлы 6 час но тырме, мукетъёсыз 9-10 час валесын погыллясько. Но гигиенистъёс шоро-куспо дыр – 8 час – тупато. Валамон, та тупа кын корт куртчон вакытысь адямиослы. Нош али гинэ вордскем нуныос суткаысь 20-22 чассэ но ныскетыны быгато. Кӧтсэс тырон понна гинэ соос сайкалляло. Малы озьы? Нуныослэн йырвиымзы «кисьмамын» ӧвӧл на, солы юнмано. Анай-атайзылэсь куаразэс гинэ но тодманы дышетсконо.

Школаын нылпиос трос выльзэ тодо. Ваньзэ сое вунэтонтэм вылысь йырвиымлы тырмыт дыр кулэ – тӥни малы шуиськом: пиналъёслы кӧлыны вазь выдоно. Жаляса верано, куд-ог туала школьникъёс бер ӝытозь Интернетын пуко. Таин сэрен соослэн тазалыксы лябӟе, школаын но уродгес дышетскыны кутско.

- Валаны кутскисько кадь, малы песянайёс-песятайёсмы курегъёсын ӵош султо, кӧлонзы тырме…

- Зэмен но, арлыд люкаськемъя йырвиым юнма, ӝоггес, валасагес ужаны дыше. Котькыӵе ужын опытэн адямилэсь пайда тросгес луэ ук – татын но озьы ик.

- Шонер-а малпасько: музъем бордын, заводын ужасьёсын ӵошатыса, дышетӥсьёс, юристъёс тросгес кӧлыны кулэ?

- Вань сыӵе валан: визьмын ужасьёслы тросгес кӧлоно, угось нунал ӵоже соос тросгес ивор басьто, сое радъян понна йырвиымлы но тросгес дыр кулэ. Но киын ужасьёслы уй кулэ, мугор ёзвиос мед шутэтскозы шуыса. Угось секыт ӝуткаку, шуом, сюлэм золгес йыггетэ, сӥль быгытъёс нуйтӥсько…

- Алексей Евгеньевич, кылэме вань, ӟеч кӧлон понна валесэ уйшорлэсь вазьгес выдоно. Нуназезэ изем – изем ӧвӧл.

- Вань сыӵе валан: инкуазь часъёс. Адями соя дауръёсын кыдаз. Соин ик мугорын вань воштӥськонъёс герӟаськемын инкуазен. Ӝыт 10 часын кӧлыны выдӥсьёс ныс-нысгес изё, сайкало ӟеч мылкыдын, кисыриоссы ӧжытгес… Уйшор бере кӧлыны выдӥсьёслэн пуш ёзвиоссы туж курадӟо, ужан радлыксы сӧриське.

Эшшо ватсасал на суткаен ужасьёс сярысь. Уйин ужаса, соос нуназезэ умме усьыны выро – тазалыкез та туж лябӟытэ. Специалистъёс лыдъяло: талэсь кышкыт луо на курытсэ ӟизтон но наркотикъёсын кушласькон гинэ.

- Но малы куд-огезлэн ялан иземез потэ, кӧлыны дыраз со выдэ, 12 чассэ валесын ортчытэ ке но?

- Талы мугъёс ӧжыт ӧвӧл. Зэмен но, со герӟаськемын луыны быгатоз ньылондор безэн (щитовидка), йырвиымен, кема кыстӥськись висёнъёсын. Депрессия дыръя адями тыро-пыдо ужаны уг быгаты, уйжомыса ветлэ. Соин ик ялан кӧлэм потыку, одно эскериськоно специалистъёс дорын.

Бен, луэ озьы но: адями быдэс толэзь катьтэммытозяз ужаз, соин ик жадемез мед ортчоз шуыса, солы одӥг уй гинэ уг тырмы ни.

Тулыссэ инкуазь сайка, соин ӵош «назьыльтӥське» мугор но. Табере солы тросгес кулэ луо витаминъёс, шунды уг тырмы. Таӵе дыръя толэзь ӵоже юыны луоз аптекаысь басьтэм витаминъёсты. Но одно дуноосыз сьӧры уйиськоно ӧвӧл. Россиын поттэмъёсыз кунгож сьӧрысь ваемъёслэсь чик уг висъясько. Со сяна, мугоре мултэсэз витаминъёс уг пыӵало, соос нюлам вуэн, кызен пото. Уксёез юнме кисьтэм луэ.

Туж умой, адями сад-бакча емышъёсты трос сие ке. Соосты толлы кынтыса кельтыку, отысь 100 процентэз витаминъёс кылё. Сылалтыку оглюкетэз сылмо. Со сяна, трослы пайдаёгес ас бакчаысь емышъёс. Японецъёс лыдъяллям ни: туала технологиосты кутыса будэтэм сиён-юонъёсын витаминъёсыз 20 процентлы ӧжытгес.

Валаса сиськон, тырмыт кӧлон, таза улонэн эшъяськон – тани ма бордысь потэ тазалыкмы.

- Озьы ке но кызьы умойгес: ӵукна кӧттырмон кӧлыны яке, куать часын султыса, стадионэ потыны?

- Жалялэ асьтэды: кӧлэ! Изьыса кӧтты тыриз ке но, шуак султыны эн дыртэ. Ганяк назьыльтӥське, мынектэ… Валесысь соку ик стадионэ потон мугор понна туж секыт йӧтэ. Ёзвиосты кыдатыны умой нуназе бере. Кӧлытозь 2-3 час кылемын на ке – озьы ик пайдаё луоз чылкыт омырен шоканы, бызьылыны. Но стадионысь соку ик валесэ выдонлэн номыр умоез ӧвӧл – мугор ганяк кариськыны уз быгаты, умме усьыны курадӟоды.

Элина Кумачёва.

Туэысен гуртэ лыктӥсь егит специалистъёслы кун быдэн 1 миллион манетэн сётыны кутскоз. Нырысь та проект чакламын вал медициная вузъёсты йылпумъясьёс понна. Но кызьы вераз Кун Кенешысь Тазалыкез утёнъя, демографияя но семья ужпумъёсъя ялан ужась комиссилэн кивалтӥсез Светлана Кривилёва, коньдонэз басьтыны быгатозы ёросъёсын берло дыре ужаны кутскем специалистъёс но. Ижысь медициная кун академиысь бадӟым курсъёсын дышетскись студентъёс пӧлысь 103-ез проектэ пыриськыны мылкыдзэ вераз.

- 29 миллион манет республикаямы вуиз но ни, – пусйиз Светлана Петровна. – Та коньдонэз люкылон понна али документъёс дасясько. 1 миллион манет басьтэмъёс гуртын ӧжытсэ 5 ар ужано луозы.

Элина Васильева.

Шумпотымон: тросэз туала егитъёс кудœытžсь юонъёс интые быръё таза улонэз.

Дуннеысь тазалыкез утёнъя огазеяськонлэн ивортэмезъя, Россиын котькуд улӥсьлы быдэ – али вордскем нуныосты лыдъяса но – араз 18 литр курыт юон усе. Со вие ик Германия, Финляндия кунъёсысь котькуд адямилы быдэ – 10 литр. Та ласянь Россия азьмынӥсьёс радын. Тазьы ик кудӟем сурымын улӥмы ке, кыӵе меда луоз странамылэн азьланез? Та ужпум котыр ик радъяськизы Кун Кенешын ортчем кылзонъёс.

Юись мурт вӧзын улон нокинлы но иназ мынымтэ на – сӧриське семья, тэшка общество, таин ӵош лябӟе быдэс кун. Приволжск федерал округе пырись улосъёсын кудӟытӥсь юонъёсын кушласькисьёслэн лыдзы 1 но ӝыны процентлы вылӥынгес, мукет округъёсын ӵошатыса. Та ласянь тужгес но сюлмаськыто Мордовия, Пермь улос, Ульяновск. Таослэсь бере уг кыльы Удмурт шаер но. Малпаськонэ уськытэ соиз но: берло толэзьёсы огъя ПФО-ын юисьёслэн лыдзы кулэсме ке, республикаямы – йылэ!

Юон черлэсь вӧлмемзэ тросэз герӟало выльдӥськон вакытэн. Мугез валамон: советской идеология куашказ, со интые, кызьы оскытӥзы кунмес валтӥсьёс, вуиз демократия. Кин кызьы валаз сое. Тросэз, азьланьзэ адӟытэк, чарка шоры учкылыны кутскизы. Кулэсмыны ӧдъяз калыклэн улон сюресэз.

- 2000-тӥ арын Россиысь калыклэн улонэз шорлыдын 65 ар кыстӥськиз, 2011-тӥ арлы та лыдпус 4 арлы тросгес луиз, – веранзэ мытӥз Кун Кенешлэн тќроез Александр Соловьёв. – Шӧдӥськиз Владимир Путинлэн мытэм политикаез. Со рос-прос басьтӥськиз суррогатъёсын, лушкем пӧзьтэм аракыен нюръяськон борды.

Кудӟытӥсь юонъёсын нюръяськон ласянь тужгес но пайдаё луиз кылем ар. Соку улонэ пыӵаны кутскиз кык закон. Нырысетӥезъя пытсамын вал 15 градуслэсь кужмогес юонъёсты 22 часысен 10 часозь вузан. Кыкетӥезъя та дыр ӵоже ик вузаны лэземын ӧвӧл одӥг кудӟытӥсь юон но. Тазэ законэз кутон ласянь Россиысь улосъёс пӧлысь тужгес но висъяськиз Удмуртия. Угось парламентысьтымы депутатъёслэн 19 (!) ӵектонъёссы пыртэмын федерал законэ. Тужгес валтӥсьёсыз пӧлын – сурез алкоголь юонъёс пӧлы пыртон ласянь.

Та законэз улонэ пыӵатон пумысен улосъёслы эрик сётэмын. Кудӟытӥсь юонъёсты вӧлмытон дырез Россиысь субъектъёс ас мылкыдзыя пуктыны быгато. Бускельёсмы дорын – Башкортостан, Татарстан республикаосын, Оренбург, Самара улосъёсын – алкоголез вузало 10 часысен 22 часозь. Тужгес но чурытэсь куронъёс Ульяновск улосын: кудӟытӥсь юонъёсты вузаны лэземын ӧвӧл 20 часысен 10 часозь. Со сяна, отын улӥсьёс курытсэ ӟамыртыны уз быгатэ (быдэс нунал ӵоже!) 25-тӥ мае – школаосын берпуметӥ гырлы шуккон нуналъёсы, 12-тӥ июне – Россилэсь нуналзэ пусйыку, 12-тӥ сентябре – Ульяновск улослы сӥзем праздник дыръя. «Сазь нуналъёслэн» пайдазы али ик шӧдžське ни.

Со сяна, улосъёслы луонлыкъёс кылдытэмын закон тӥясьёсын нюръяськон ласянь но. Кылсярысь, Башкортостанысь огазеяськонъёслы (юридической лицоослы) кудӟытӥсь юонъёсты уйин вузамзы понна юнматӥське 300 сюрс манет тыриськон. Самара улосын – 150 сюрсысен 200 сюрсозь. Со вие ик федерал законын тыриськонъёс чакламын 30 сюрсысен 40 сюрсозь яке продукциез конфисковать карон.

- Кудӟытӥсь юонъёсты нуналлы быдэ ӟамыръяло 33 процент воргоронъёс но 20 процент нылкышноос, – веранзэ мытӥз Кун Кенешысь Тазалыкез утёнъя, демографияя но семьяын политикая ялан ужась комиссилэн кивалтӥсез Светлана Кривилёва. – Кылем арын кутэм законъёслэн пайдазы шаерамы шӧдӥськиз ни: 1,9 поллы кулэсмизы йыружъёс, 24 процентлы – сюрес вылын шудтэм учыръёс.

Светлана Кривилёва будэ-тӥз на: таин гинэ буйгатскыны уг яра. Нюръяськоно аракыез лушкем поттӥсьёсын но. Соосын сэрен улонысь кошке уно адями. Кун Кенешысь депутатъёс кемалась ик ӧвӧл ӵектонъёсынызы нош ик вазиськизы Кун Думае. Светлана Кривилёва валэктӥз:

- Милям куронмы – улосъёслы луонлык мед сётӥськоз курыт юонъёсты поттӥсь огазеяськонъёс пӧлын аккредитация радъяны, продукцизэс эскерыны.

Та пумысен со нимысьтыз вазиськиз Кун Думаысь депутатлы Николай Аброськинлы.

Лушкем поттэм курыт юонъёсъя югдур, меӵак вераса, кӧшкематэ. Республикаысь вуз каронъя но калыклы юрттэт сётонъя министр Пётр Пономарёв ивортэ: Россиысь магазинъёсы вуись алкоголь продукция пӧлысь 40 процентэз гаражъёсын, пеймыт сэрегъёсын поттэмын.

Абдратэ Роспотребнадзорлэн Удмурт ёзэныз кивал-тӥсьлэн Николай Забродинлэн ивортнэз но: кудӟытӥсь юонъёсты ӟамыртэмъёс пӧ-лын шуг луон учыръёсъя Удмуртия, ПФО-ысь мукет улосъёсын ӵошатыса, азьпал радын – сю сюрс адямилы быдэ 182,9 учыр. Ма веранэз на арлыдоос сярысь, кылем ар куспын 62 быдэ вуымтэ пинал алкоголь отравлениен эмъяськонниосы вуттэмын ке! Жаляса верано, ваньзэсты соосты утьыны ӧз кылды. Николай Забродин пусйиз на: берло куинь ар ӵоже курыт юонъёсты ӟамыртыса шугектэмъёслэн лыдзы шаерамы 1,5 поллы кулэсмиз, озьы ке но та ласянь Удмуртия азьмынӥсь радын.

Кудӟытӥсь юонъёсты вӧл-мытонэз сак чакласа возё югдурез утён удысын тыршисьёс. Ӵем гинэ радъяло «Алкоголь» но «Табак» ужрадъёсты. Югдурез утёнъя министерствоысь общественной порядокез утёнъя ёзлэн кивалтӥсезлэн воштӥсез Сергей Козлов ивортэмъя, кылем арын кык уголовной уж ӝутэмын магазин возисьёс вылэ – басьяськисьёслы соос ӵектылӥллям куронъёслы тупасьтэм курыт юонъёсты. Со сяна, китӥзы кырмемын Кабардино-Балкариысь лушкем поттэм алкоголез шаерамы вайисьёс. Соослэсь 450 сюрс манет тыр продукция таламын но быдтэмын.

- Пичи вамышен ке но, калыкмес дышетӥськомы юон культуралы, – вераз Сергей Козлов. – Алкоголез юыны лэзьымтэ интыосын ӟенеликъ-ёсын калтыртӥсьёс кыл кутонэ кыскемын: ваньзэ-ӧвӧлзэ люкаськиз 96 сюрс 364 учыр. Урамъёстӥ кудӟем йырын шонаськись 2 сюрс мурт вуттэмын полицилэн ёзъёсаз. Та ласянь ужмес азинтомы. Калыклэн йыраз мур мед пыӵалоз малпан: кудӟытӥсь юонъёсын эшъяськон ӟече уз вутты.

Шаерысьтымы кӧня адя-

ми та нуналлы юонэн черламын? Кызьы соосты эмъяно? Наркологияя диспансерысь валтӥсь врач, Кун Кенешысь депутат Татьяна Карлова буйгатӥз: алкоголь юонъёслы мода ортче ни. Нырысь ик тае чакланы луэ будӥсь пиналъёс пӧлын. Школаосын ортчытэм юалляськонъёс возьматӥзы: курытсэ одӥг пол но веръямтэ пиослэн но нылъёслэн лыдзы йылэ. Трослы ӧвӧл ке но, со шӧдӥське ини. Озьыен, оскон вань егитъёслы – юонэн нюръяськон ласянь соос йыг-йыг вамыш лэсьтозы.

Туннэ наркологияя диспансерлэн ёзъёсаз учётын сыло 32 сюрс 892 алкоголикъёс но наркоманъёс.

- Нимысьтыз пусъеме потэ юисьёс но шузимытӥсь суретъёсын кушласькисьёс пӧ-

лын пумиськись психозъёс пумысен, – вера Татьяна Карлова. – Приволжск федерал округысь улосъёсын таӵе учыръёслэн лыдзы кулэсме ке, Удмурт шаерын соос кылем арын 7,8 процентлы йылӥзы – юыны кутскем кышномуртъёс чотын. Малы курытсэ веръяд шуыса юамлы, 70 процентэз таӵе валэктон сёто: уж бере, пе, ганяк кариськеммы потӥз. Со сяна, юалляськонъёс возьмато: 86,7 процентэз курытсэ ӟамыръяло доразы. Озьыен, быдэс семьялы кышкытлык кылдэ.

Мукет улосъёсын артэ Удмурт шаермы умой уг адскы тамак кысконлэн вӧлмемез ласянь но. Татьяна Карлова ивортэмъя, республикаысьтымы котькуд кыкетӥез (!) мурт тамак ӵындэ ини. Арлы быдэ йылэ кыскись нылкышноослэн лыдзы. Кы-

зьы нюръяськоно та югдурен? Кенешонэ вуэмъёс огкылэ вуизы: кысконлы рекламаез кулэстоно, тамаклэсь дунзэ будэтоно. Матысь дыре та куронъёс улонэ пыӵаны кутскозы ни. Со сяна, котькуд школаын ужзэс радъялозы наркологияя кабинетъёс, егит-

ъёс пӧлын валэктон уж нуиськоз.

Елена Никитина.

Макем ӧжытгес ветлом калык пӧлын, сокем умойгес.

Кылем арня пумын гинэ эмъясьёс шуылӥзы: кызӥсьёс-кизьнылӥсьёс сокем трос ӧвӧл. Арнялы быдэ вотэсаз ог 1 сюрс мурт шеде вал. Кызьы вераз Роспотребнадзорысь эпидемиологияя ёзэн кивалтӥсьлэн воштӥсез Вера Данилова, со трос ӧвӧл. Эпидемия сярысь вераськыны луэ, арняяз 8 сюрс мурт висьыны усе ке. Школьникъёс пӧлын та лыдпус 3 сюрс тупатэмын – соку карантин ялӥське.

Но шутэтскон нуналъёс бере югдур уродгес луыны кутскиз. Кызӥсьёс-кизьнылӥсьёс шуак трос луизы. Валля нуналысен карантинэ пытсамын республикаысьтымы 4 нылпи сад – Киясаысь, Якшур-Бӧдьялась, Шарканысь но Эгралась.

- Но туж оскиськом, эпидемия уз луы шуыса, – вераз Вера Данилова. – Кылем арын та вакытэ 180 муртэз пыэд огдырлы погыртӥз ни вал, туэ – 14 адямиез.

Буйгатэ соиз: пыэд вирусъёс туссэс воштыны уг дырто. Парсьёс бордысь потӥсь чер, кылсярысь, нырысьсэ тодмо луиз 2009-тӥ арын. Бадӟымесь кышканъёс вал – со уката лекомыны быгатоз. Но та висёнлы пумит вакцина кылдытыны быгатӥм, озьы кышкыт через кӧня ке кортнам.

Вера Данилова верамъя, шаерысьтымы пиналъёс, мӧйыос, трос калык пӧлын ужасьёс пӧлысь 70 процентэзлы пыэдлы пумит туэ прививка пуктэмын. Россиын – 26 процентэзлы. Озьы ке но та лыдпусъёсын буйгатскыны уг луы. Пыэдэз юн кортнан понна 95 процентэзлы сое лэсьтоно.

- Нылпи юртъёсын, интернатъёсын улӥсь пиналъёс туж шер висё гриппен, – пусйиз Роспотребнадзорысь валтӥсь специалист. – Малы? Соослы ваньзылы прививка пуктыло.

Нош шаерамы вань улӥсьёслы прививка пуктылэмын ӧвӧл бере, чер юмшаны быгатоз ик. Куд-ог уйпал ёросъёсын, кылсярысь, Балезино, Эгра, Красногорск, черламъёс туннэ ик трос луэмын. Ижысь но поликлиникаос тырмемын кызӥсьёсын-кизьнылӥсьёсын.

Россиын югдур огкадь ӧвӧл. Карантинэ пытсасько Кемерово улосысь куд-ог школаос. Черламъёс трос Челябинск но Свердловск улосъёсын.

Озьыен, та вакытэ тросэз асьме бордысь потэ. Макем ӧжытгес ветлом трос калык люкаськылон интыостӥ, сокем умойгес.

Эмъясьёс доры ӝегатс-кытэк вазиськоно:

- шоканы секыт дыръя, омыр тырмемысь дугдыку;

- мылазьын секыт луыку, кӧт висьыку;

- йыр шуак поромыны ӧдъяку;

- йырсазь сураськем кадь луыку;

- ӧскыку.

Та тодметъёс огдырлы, оло, бырылозы но. Но соос выльысь берытскозы мугорлэн ӟырдаменыз но кызон пӧсьтонэн ӵош.

Нылпиослэсь пыэдэн висьыны кутскемзэс озьы ик шӧдыны луоз:

- ӵем-ӵем шокамзыя;

- лызэктэм яке кӧдэктэм кузыя;

- ву юыны, сиськыны пумит кариськемзыя;

- сайканы шугъяськемзыя;

- ки вылэ кутыку, керӟег луэмзыя;

- бӧрдыкузы, синкылизы потымтэ дыръя.

Висьыны усемдэс шӧдӥды ке:

- уже, школае мынэмлэсь возиське;

- шутэтске, трос ву юэ;

- кызыкуды-кизьнылыкуды ымдэс-нырдэс пытсалэ. Киостэс майталэн миськоно;

- трос калык люкаськылон интые потыкуды, ымдэс-нырдэс маскаен пытсалэ.

Элина Кумачёва.

Пичи Пурга ёросысь Покчи Бӧдья гуртысь фельдшер Светлана Викулова ужа выль но шуныт юртын.

Быдэс толэзь ини Пичи Пурга ёросысь Покчи Бӧдья гуртын улӥсьёс эмъясько шуныт но чебер юртын. Лэсьтӥськисьёс 2,5 толэзь куспын ӝутӥзы ФАП. Ӵапак татчы нырысь ик кожиз Удмуртилэн Президентэз Александр Волков, Пичи Пурга районэ вуылыкуз.

Шумпотон вуиз

Азьвылэз медпункт Бӧдьяын пуктэмын вал 1969-тӥ арын. Пугачёвоын пуштылонъёс дыръя вуж юрт зол зурказ. Пыр-поч эскерем бере сое тупатъян борды ӧз ни басьтӥське – кивалтӥсьёс выльзэ ӝутыны косӥзы.

Выль ФАП лэсьтэмын вакчи дыр куспын. Пуктӥськон ужъёслы 2 миллион 52 сюрс манет кошкиз. Табере калыкез эмъяны инты но тырмыт – 72 квадрат метр. Татын кӧня ке кабинет висъямын. Юртэз шунтэ электрокотёл, вань кезьыт но пӧсь ву. Нош азьлояз медпунктын гурзэ но эстоно луылӥз, ву но колонкаысь нуллӥзы, собере плита вылын шунтылӥзы.

Гуртысь фельдшер Светлана Викулова выль ужан интыезлы пумтэм шумпотэ. Калык но медпунктэ лыктэ. Тани Президент вуылыку, ог дасо мурт фельдшер доры кожаз. Кин ке, висёнзэ вераса, вазиське, мукетъёсыз паймо выль юртлы – куддыръя адӟыны шуыса но ФАП-е кожо.

«Мавзолей» интые – нылпи сад

Возьмазы Президентэз Гожнялан но. Таиз гурт пыре Уром поселение. Гожнялэн шораз кызё аръёс ни сылэ «мавзолей». «Уромское» ОПХ куке-соку кутскиз гуртэ выль клуб ӝутыны. Уксё тырмиз борддоръёслы гинэ.

Ӵапак та быдэстымтэ юртын гуртоос куро нылпи сад усьтыны. Малы ке шуоно таиз но сюлмаськон гожняослы тодмо. Али пиналъёс ветло квартираослы шуыса пуктэм 3 юртэ. Татын интыяськемын группаос, сиён пӧран но мисьтаськон интыос. Кулэ рос-прос инты. Нылпи садлэн кивалтӥсез Людмила Михайлова верамъя, шудыны-дышетскыны ветлэ 44 пинал. 26 семья черодын сылэ.

- 2005-тӥ арысен пиналъёсмы тросгес луо, – шуэ Людмила Леонидовна. – Арлы быдэ вордске 10 нуны, нош 2008-тӥын рекорд пуктэмын вал – 16 нылпи югыт дуннеез адӟиз.

Выль нылпи садлы проект туэ ик лэсьтэмын луоз, оскытӥз Президент.

Вӧлдэт уз куашка

Покчиосын герӟаськем югдур тодмо райцентрын но. Пичи Пурга черкогуртын декабре ворсазы «Росинка» садзэс. Солэн кивалтӥсез Зоя Алексеева верамъя, Пугачёвоын пуштылонъёс дыръя юрт зурказ. Гужем сое тупатъязы-кышъязы, выльысь усьтӥзы. Но кемалы ик ӧз – кезьыт куазь дыръя югдур уродмиз. Вӧлдэт лэзиськыны ӧдъяз, борддоръёс тэшказы. Нылпи садын ужасьёс мынӥзы районысь кивалтӥсьёс доры. Татын сюлмаськон шоры киынызы ӧз шонтэ. Ортчытэмын эскерон, специалистъёс пусйизы: юртэз рос-прос выльдоно. Президент та югдурын юртто шуыса оскытӥз.

Александр Волков, калыкен пумиськыса, эшшо огпол вераз: нылпи садъёслы но отын выль интыос усьтонлы туэ саклык бадӟымгес луоз. Кылем арен ӵошатыса, та понна бюджетын 3 поллы тросгес уксё чакламын. Тазьы ужаса, матысь 3 ар ӵоже 3-7 аресозь нылпиос интылы уз ёрме, нош 5 ар куспын бырозы яслие черодъёс.

Туэ быдэстоно ужпумъёс уз кулэсме. Ар ӵоже усьтоно 30 нылпи сад. Арлы быдэ садъёсын 1 сюрс инты ватсаськоз.

Одӥг липет улэ

Райцентрысь культура юртын Александр Волков пыриськиз бадӟым кенешонэ. Татын ортчем арлы йылпумъянъёс лэсьтӥз муниципал кылдытэтлэн йырыз Александр Ерохин. Нош районын улӥсьёс Президентлы юанъёс сётъязы. Кинэ ке сюлмаськытэ гурт удыслы субсидия висъян, бусы ужъёс вакытэ пичигес дунын эстӥськон басьтон, пудо выжыез умоятон.

Нош «Рассвет» СПК-лэн тӧроез Ю. Алексеев ӝутӥз Шоринь Юри гуртын школа-сад пуктон сярысь ужпумез. Уго 1990-тӥ аръёсын ӵошатыса, хозяйствоын йӧл 2 поллы тросгес кыско. Гурт будэ, нылпиос тросгес вордско. Президент оскытӥз: Шоринь Юриын одӥг липет улэ пуктӥськоз школа-сад но ФАП. Тазэ ужез быдэстыны чакламын вуоно арын.

Елена Скворцова.

Куд-огез серекъялоз монэ: «Вот, шузи, удалтымтэ улонзэ шарае поттэ…» Ӵок, валасез шонер валалоз.

Евгений Лопохинэн малпамтэ шорысь пумиськи. Мон сое Аксакшур школаын дышетӥ. 8 классэз йылпумъяз, службазэ ортчытӥз Байконурын. 1973-тӥ арысен улэ Анна Евгеньевна кузпалэныз Кечол посёлокын. Куать полэс песятай ни. Ужамын «Мир» колхозын тракторист луыса, плотник но вылэм, ог куинь арзэ тыршем чугун сюрес вылын возьмаськисьын.

- Анае но, вармуми но, кышное но – Аннаос, – серекъя Евгений Николаевич.

Лопоховъёслэн бадӟым кирпич юртсы. Корка пушсэс, улэм-вылэмзэс учкыса, юасько:

- Кытысь сомында коньдонды? Пенсиед трос-а?

- 7 сюрс манет, кышное но сомындагес ик басьтэ, вармуми – 10, но со нунокъёслы юрттэ, пенсизэ ум кутӥське. Пудо трос вордӥськом. Скалмы, парсьмы вань, бакча сиёнмы тырмыт.

Куинь нылъёсмы, соослэн быдэн кык пиналъёссы.

- Куинь эмеспи.

- Но самой оскымонэз Вералэн картэз Николай Занчаров. Пиезлы туэ 17 арес тырмиз, 11-тӥ классын дышетске. Атаез выжые мынэ. Усто суредаське. Со нырысетӥ внуке. Городысез эмеспие укыр удалтэмын ӧвӧл: уж борды уг кутскы, нырысь ик чарка борды кырмиське.

- Мон тодэмъя пиналгес дыръяд ачид но юиськод вал?

- Юи, юи, трос пол погратозь но юылэме вань. Табере 17 ар ини курытсэ ымам уг тыриськы. Тросгес юэме бере Ижевске больницае шеди. Соку аслым шуи: юонлы пум понӥсько, куштӥськисько… Пиналъёсме возьытэ уськытэме ӧз поты.

Семьяын азьло воргорон коньдонэн кузёяськиз. Али тросаз семьяосын пиосмуртлы оскон быремын. Таиз ласянь коньдон мон киын, бадӟым арбери басьтонозэ огазьын возиськом. Ай, тани корка липетэз выльдоно, оло, машинаме но воштыны быгато. Жалясько огзэ: вазьгес куштоно вылэм та вина юонэз, кӧня уже кылиз, кӧня коньдон тӧлъя-буръя кошкиз!

- Тӥ быдэс ульчаеныды тупаса улӥськоды. Куноян дыръёсты но луо, дыр?

- Кызьы калыклэсь люкиськод? Пӧлазы ик пукисько, чай, компот юисько. Кудӟем муртэ адӟыса, аслым ачим шуисько: учкы, учкы, кыӵе со адями синазькыль. Син азям асме пуктӥсько. Вина юонэн котькӧня мед нюръяськозы, кӧс законъёс кутылозы, но ваньмыз потэ адями бордысь: нырысь ик астэ ачид вормыны кулэ, нош шуге-леке шедемъёслы – юрттыны.

* * *

Амалтэк син азям пуктӥ коррекционной школаын 15 ар соцпедагог луыса ужамме. Нырысетӥ аръёсаз 96 дышетскись вал, со пӧлысь 25-ез – сирота. Котькуд укмысэтӥез пинал та школае шедемын, анай-атаез юэмен. Вань семьяосы сямен вуылӥ. Син азьын – супырӟытозь юэм, ассэ ачиз утялтымтэ нылкышно, кырсь но туж начар корка.

Али мӧйы калык паймемын пиналъёслэн аракыен, сурен, наркотикъёсын эшъяськемзылы. Кын корт куртчон вакытазы улонысь кошко воргоронъёс, курадӟыны кельто кышнооссэс, нылпизэс.

Аръёс ортчыса но, уг вуны одӥг учыр. Тямысэтӥ классын дышетскись нылаше, «5» но «4» интые, «3» бичаны кутскиз. Классэн кивалтӥсько бере, доразы мыныса, анаеныз кенешоно кариськи. Нош со азям ик пумен кудӟе. Вераз: мон, пе, кемалась кӧласько ни кулэм картэным. Сыӵе муртэ пересьёс шуо вал: кузь йырсиесь луэм, чёртъёсын, корка кузёен улэ… Шонер-а та веран – ӧйтӧд. Куинь быдэ вуымтэ нылпиоссэ кельтӥз – гозы кыӵесэ пыриз та кышномурт. Врачъёс кулэмез бере паймиллям: туж таза сӥльвиро вылэм, пе, со.

Мукетыз кышномурт визьнодамме валаз, юонлэсь куштӥськиз: Инмарлы оске, нунокъёссэ будэтыны юрттэ.

Егитъёс таӵе югдуре медаз вуэ шуыса, юонлы пумит золос законъёс кемалась кулэ ини. Туж потэ вылэм: та гылыт сюрес вылэ медаз султэ пинал вайыны дасяськись нылъёс, мед валасалзы аслам ӵыжы-выжыосы, нунокъёсы. Инмар калыкез мед утёз вылэм юон бекчее выёнлэсь, кайгулэсь.

* * *

Лопоховен кема лабыртӥм на. Кошкемез бере но малпаськыса пуки: 8 классэз быдтэм адямилэн улон шоры учконэз дышетскем муртлэсь но тросгес. Уногес мед луозы вылэм Евгений Николаевич кадь визьмо, кужмо, юн, мукет сямен вераса, зэмос пиосмуртъёс.

Раиса Покоева.

Пичи Пурга ёросысь Шор Кечол гурт.

Та эмъян юрт пуктэмын кылем даурысь 80-тӥ аръёсы. Со дырысен отын тыро-пыдо тупатъян ужъёс ӧз радъяськылэ: паркетлэсь выж интыен-интыен палдылэмын, борддоръёс изваскаен тӧдьыямын, толалтэзэ выл дӥсез кылем уг поты – сокем кезьыт. Кызьы вераз ёрос больницалэн валтӥсь врачез Андрей Селифанов, тупатъямлэсь азьлоез но алиез амбулатория «музъемен инбам кадь висъясько». Табере татын шуныт, югыт. Борддоръёс кафель плитаосын шобыртэмын, быдэсак воштэмын ву гумыос, тыл езъёс, ӧсъёс. Коньдонэз шыръяны но быгатӥзы на. Со чотын матысь дыре выльдозы укноосты.

Амбулаториын кык врач ужалоз: огъя практикаен но пинь йӧнатӥсь. Луоз на физиокабинет, ЭКГ, процедураос лэсьтонъя сэрегъёс, лаборатория. Нюрдор-Котьялан ог 1 сюрс 200 улӥсез. Озьы сомында мурт табере эмъюрттэт понна зор-кот, лымы ултӥ Вавоже уз ветлы. Черкогуртысь ёрос центрозь ог 5 иськем луэ.

Андрей Селифанов верамъя, «Улонлэн ӟечлыкез. Тазалык» проект чотын Вавож ёросысь эмъян удыслы 20 миллион манет пала висъямын. 2012-тӥ арын тупатъян ужъёс ортчозы Водӟи черкогуртысь огъя практикаен врачлэн офисаз, ёрос больницаысь поликлиникаын но нылпи стационарын, Выль Бия но Березек гуртъёсысь фельдшер-акушер пунктъёсын. Со сяна, Вавож ёрос больницае эмъян тӥрлык вуоз.

Элина Васильева.

Дуннеысь тазалыкез утёнъя огазеяськонлэн лыдпусъёсыз ӝожомыто. Эмъясьёс верамъя, адямиез тужгес но ӵем погыртэ инфаркт, кыкетӥ интыын мынэ инсульт. Арлы быдэ Россиын гинэ 450 сюрс адями, йырвиымаз вир пальккиськыса, шуге-леке сюре.

Инсульт сярысь трос тодэ Ижысь валтӥсь невролог, нырысетӥ категориен врач Ольга Такаева. Ольга Юрьевна «Ижмаш» медсанчастьысь инсульт бере висисьёсты йӧнатонъя (ОНМК) отделенилэн кивалтӥсез луэ. Инсультэз шараянын но эмъянын выль технологиосты уже кутон но та удысын тодон-валанзэ будэтон понна вуылӥз Москвае, Россиысь медициная кун университетэ.

- Ольга Юрьевна, мар со сыӵе инсульт?

- Адямилэн мугораз но йыраз трос вирсэръёсыз. Йырвиымын вирветлон сураське-тӥяське ке, инсульт луэ. Латин кылысь берыктыса, со шугмон, тэтчан шуэмез возьматэ. Инсульт пӧртэм луэ: сэр чигиське, кесиське ке, виыме вир кисьтӥське, таиз геморрагической инсульт нимаське. Нош йырвиымлэн кыӵе ке люкетаз вир урод мынэ, уг тырмы яке тромб кылдэ ке, соку ишемия (закупорка) луэ, таиз ишемической инсульт шуиське. Тани кимы вандӥське ке, вир орсме, бервылыз зӧкоме, сэръёсын но озьы ик. Сюлэм огкадь уг жугиськы ке, тромб кылдэ. Собере сюлэм тэтчамезъя сое донге, напчем комок вирен ӵош кошке, ӵемысь йырвиыме. Инсульт дыръя адямилы шӧдтэк шорысь шуг луэ, мугорыз зубектэ яке пуме, вераськыны шугъяське.

Милям отделенимы 2009-тӥ арысен ужа ини, 2010-тӥ арын инсультъёсты шараянъя но эмъянъя федерал программа чотын татчы томограф, озьы ик сосудъёсты УЗИ лэсьтон аппарат вуиз. Та тӥрлык ужаны туж юрттэ. Отделениямы вуись висисьёсты ми соку ик учкиськом компьютер томографен, 40 минут куспын эскериськом. Со луонлык сётэ тодыны, кыӵе инсульт адямиез шуккиз, кызьы сое эмъяно, уго геморрагической но ишемической инсультъёсты пӧртэм сяменгес йӧнатоно. Нырысетӥез дыръя висисьлы секытгес, таиз бере инвалид кылисьёс но тросгес. Нырысетӥ минутъёсаз ик ми адӟиськом ини, мар луэ йырвиымен, отын вир кисьтӥськемын-а яке уг тырмы-а. Вир уг тырмы ке, озьыен, отын вань тромбез, сое сылмытыны кулэ. Ишемической инсульт дыръя нимысьтыз терапия ортчытӥськом, со юрттэ тромбез кизертыны, озьы вирлэн ветлонэз ӧраз пыре.

Атаелэн ал вылаз.

- Черлэн кылдон мугъёсыз кыӵеесь?

- Шуге-леке нырысь ик шедё вирзӥбетэн курадӟисьёс, атеросклерозэн висисьёс. Кинлэн ке сэръёсыз лябесь. Анай-атайёсмы асьмеды кыӵе ке висёнъёсын вордо ни ук, куд-огъёсыз выжыысь выжые кылё, вирсэр висёнъёс озьы ик. Пиосты басьтоно ке, соос жугиськыны ярато. Шуом, егит дыръязы йыразы огпол зол шуккизы, нош солэн «емышез» шараяськоз-шӧдӥськоз, ог дас ар ортчыса. Керӟегъяськон озьы ик тазалыклы пайда уг вайы.

- Кинъёсты ӵемгес погыртэ инсульт?

- Таиз ласянь нимысьтыз эскеронъёс ӧй ортчытъя, но аслам чакламея тросгес висё гуртын улӥсьёс. Татысь калык, вазьгес пересьмем сяна, тросгес но золгес висе. Секыт но кысык уж вӧзы ватсаське на соиз но: гуртоослэн луонлыксы ӧвӧл тазалыксэс тыро-пыдо эскерыны. Зол-зол черлазы ке, машина шедьтӥзы ке, соку гинэ специалист доры вазиськозы. Нош чидамон висизы ке, мынозы гуртысьтызы фельдшер доры яке ас тодэмзыя йӧнатӥськозы. Адямиос, йырзы висе ке, одӥг эмъюмез юо – цитрамонэз. Но соос уг тодо (куд-ог дыръя фельдшеръёс но уг валэкто), бадӟым давление дыръя сое юыны уг яра шуыса.

Висисьёслэн арлыдзы сярысь ке, инсульт уг жаля пересьёсты. Милям отделениямы но соос трос. Но жаляса верано, арысь аре инсульт егитоме. Дорамы вуэм висисьёсты учкыса, пусйысал тани мае: дышетскем муртъёс, вылӥ образованизы вань ке, ӝоггес бурмо кадь. Инсульт бере куд-огез выльысь ветлыны, вераськыны дышетске. Йырвизьмыз чалякгес валаны-ужаны кутске, ваньзэ тодаз вае дышетскем мурт. Валамон ини, котькуд висись пӧртэм, но ар ортчыса, 80 процентэз соос нош ик дорамы вуо.

Анае, атае Максим пиеным.

- Малы: тӥ сыӵе урод эмъяськоды-а яке висён вормонтэм-а?

- Ми йӧнатӥськом 21 нунал, валамон ини, инсультлэсь бервылъёссэ 3 арня куспын быдэсак уд эмъя. Со дыр ӵоже адямиез тужгес секыт вакытысьтыз поттӥськом. Врачъёслэн верамзыя, инсульт бере адямилэн бурмонэз 2 ар кыстӥськыны быгатэ на. Тазалыкез утён удысысь специалистъёс пусъё: инсульт бере нырысетӥ араз 80 процентсэ сыӵе ик «кузьым» вите на, 2 ар ортчыса, ог 60 процентсэ. Ми доры вутто инсульт шуккем адямиосты гинэ. Отделениямы 30 койка, со пӧлысь 6-ез – реанимациын. Но кинэ татчы ваё, ум улляське, 45 муртэ но кутӥськом, коридоре кушеткаосы выдтӥськом.

- Котькуд врачлэн аслаз шайвылэз, шуо.

- Бен, котькуд висисез пыд вылаз султытэм потэ. Тон солы кужымдэ, чидандэ, дырдэ сётӥськод, умойгес мед луоз шуыса, уйёстэ но уд кӧласькы, нош висисьлы уродгес луэ. Адямиез утемед уг луы ке, аслыд но туж секыт, котькуд висись сюлэм пыртӥ потэ. Ӵем дыръя малы ке уродэз тодэ лыктэ. Тани кылем арняе дорамы вуиз 32 аресъем кышномурт… витетӥ! инсультэн. Котькудӥз таӵе шугмон мугорысь кыӵе ке клеткаосты быдтэ, лулсэр системаын дефицит кылдэ, вирсэръёс курадӟо, чигисько. Нырысетӥ инсультэз бере ми солы дэмламы вал нейрохирургъёс доры вазиськыны. Но соос  соку ик операция уг лэсьто, инсульт бере огшап дыр ортчыны кулэ, мугор но тазалык ӧраз мед пырозы. Кышномурт юнмаса уг вутты, нейрохирургъёс доры уг вуы, нош ик дорамы шеде. Озьы 5-тӥ инсультэз берпуметӥез луиз. Солэн картэз но пиналыз кылизы. Сыӵе учыръёсы висисьлэн семьяезлы гинэ ӧвӧл, врачлы но туж секыт.

Азьло мон уката ваньзэ сюлэм пыртӥм поттӥсько вал, али валасько ини, висисьёсты  одно ик жаляно, но эсэпсэ валаса. Сотэк, ар-кык ортчыса, врачез ассэ жаляно луоз.

Осконэ-шумпотонэ.

- Вань висёнъёс нерваослэсь, шуо, тӥ таин соглаш-а?

- Бен. Висёнъёс выжыысь выжые паласькисьёсыз вань. Но тросэз керӟегъяськемлэсь, адямилэн ассэ чакламтэысьтыз кылдо. Улонмес учконо ке, асьмеды котыртэ стресс. Ӵукна адями автобусэ пыре, калык трос, донгасько, керето. Кинлэн ке сюлэмыз сэректыны кутске ини. Вылаз ик, кондуктор ӵашетэ ке, огезлэн кӧберыз но ӧвӧл, мукетыз алекме, керӟегъяське. Кин ке сюлэмшугзэ пушказ ватэ, мукетыз пуштэ, кыре поттэ. Соин ик лул-сюлэмыд гань-ганьгес луиз ке, мугорыд но тазагес луоз. Нош чик висисьтэм мурт но ялан керӟегъяськиз ке, одно ик черлалоз.

- Озьыен, черлалод-а, бурмод-а, тросэз потэ ачид  бордысь?

- Мон сое котькуд висисьлы верасько. Адями  ачиз дась ӧвӧл ке висёнэн нюръяськыны яке вӧзаз ӧвӧл сое яратӥсь, валась муртъёс, сое эмъяны но туж секыт. Кылсярысь, одӥг висисез ваё пичи гинэ инсультэн, нош со бурмыны уг вормы. Яке вутто арлыдо пересез, кудӥзлэн ӝыны йырвиымез «кулэмын» ни, но со доры ветло ӵыжы-выжыосыз, сюлмаськемзэс, мӧзмемзэс верало, песяйзылэсь доразы бертэмзэ возьмало. Сыӵе мурт пыд вылаз султэ.

Тодам лыктэ одӥг учыр. 80 аресъем песянаез татчы вайизы, со лек пыктосэз вормемын ни вылэм, табере инсульт погыртэм. Котыраз кӧня бергамы, эмъямы, нош солы уродгес луэ, пумен давлениез усьыны кутскиз. Ӵыжы-выжыосыз тазалыкез утён удысын ужало вылэм. Соин ик пырак шуи: адями куке но, марлэсь ке но улонысь кошке, тӥ но дась луэ. Ӵыжы-выжыосыз пересез доразы басьтӥзы, берпуметӥ нуналъёссэ больницаын медаз ортчыты шуыса. Толэзь ортчыса, монэ куное ӧтизы. Со песяе, вераськыны кутскем гинэ ӧвӧл, пуке ни, эшшо толэзь ортчыса, ветлыны но кутскиз. Та учыр возьматэ кышномуртлэсь сямзэ, улыны мылкыдзэ но матысь адямиосызлэсь яратэмзэс. Сыӵе дыръя валаськод, яратон котькыӵе висёнэз бурмытэ, ворме шуыса.

- Адями висемзэ уг ке шӧды, со таза-а?

- Озьы шуыны уг луы. Куддыръя адями висемзэ уг шӧды. Вирзӥбетсэ мертаны кутскиськод но, шуэ: мынам давление уг тэтча. Нош учкиськод но, вирзӥбетэз 200 котыр. Адями дыше сыӵе давлениезлы но уг вала, тазалыкез чутэ шуыса. Соин ик диспансеризация шуон юрттӥз  трос адямиослы висёнъёссэс дыраз шараяны.

- Мар кароно, инсульт бордад медаз еры шуыса?

- Зӧк куо луыны дышетсконо, дыр, чыры-пырыослы луыса керӟегъяськоно ӧвӧл, астэ кияд кутоно. Одно ик чакласа возёно вирзӥбетэз, вирысь сахарез но холестеринэз. Мугорез кыдатоно, выроно, бызьылоно. Юнме шуиллямтэ, дыр, вырон – улон. Азьло шуиськом вал, инсультэн шуккем адямиез толэзь ӵоже эн выртэ, эн ёртэ. Нош табере, адями реанимациысь потэ ке, 1-2 нунал ортчыса, ишемия дыръя пуксьыны косӥськом ини, эшшо кӧня ке дыр ортчыса, султыны лэзиськом. Нош геморрагической инсульт дыръя висисез, 5 нунал ортчыса, султыны лэзиськом, котькуд кык час бере берыкъяськыны косӥськом.

- Ӵыжы-выжыосты шумпото, дыр, тӥ врач шуыса. Оло, дорады гинэ эмъяськыны ветло?

- Выжыямы мон нырысетӥез врач, али атаелэн бӧлякысьтыз эшшо одӥг мурт медакадемиын дышетске. Дорын, уката ик анай-атай понна мон нырысь ик ныл, дыр. Азьло, анае черла ке, мон верасько-валэктӥсько вал, озьы йӧнатӥськоно, таӵе эмъюмъёс басьтоно. Но со мыным оскытэк-а, эскерыса-а, одно ик мынэ вал мукет врачъёс доры, кылзоз-учкоз, мар соосыз дэмлалозы. Табере оске, лэся, озьы уг ветлы ни.

- Кызьы асьтэос малпаськоды, кыӵе тӥ врач?

- Укыр небыт, дыр, собере востэм сямы потылэ, таиз удмурт сям ини. Куинетӥ арзэ отделениен кивалтӥсь луыса ужаны кутскеме бере чурытгес кариськыны тыршисько. Ӵош ужась эшъёсылы но аслым сямен ик юн куронъёс пуктӥсько.

Висисьёс кабинетам кышкатэк пырало, ӵем вуыло койкаын азьвыл кыллем муртъёс. Тросэз соос пересьёс. Дорам лыкто улон-вылонзэс вераны, куд-огез бӧрдыса но пуко, шумпотонзэс но кисьто. Тросэзлы саклык кулэ, кылзэмез витё. Соосын мукет сямен уг но луы. Арлыдоосын ӧд вераськы ке, озьыен, тон алама врач. Ма, мон ачим но со пересьёсытэк улыны уг быгаты.

- Тӥ Ижысь валтӥсь невролог но луиськоды на.

- Та дырозь Ижысь валтӥсь невролог вал больницаысьтымы ик неврологияя отделениен кивалтӥсь Надежда Соловьёва. Со интые юнматӥзы монэ. Уже йылӥз. Копейка ласянь ке… Таиз понна уждун уг тыриськы, но отчётъёс туж трос луизы. Мон арнялы быдэ Ижысь тазалыкез утёнъя управление азьын отчёт лэсьтӥсько городысь неврологияя отделениосъя. Лыдпусъёсты эскерисько, кыӵе диагнозэн кӧня висисьёс эмъясько. Али толэзь но ортчем ар понна отчёт дасяны кулэ. Озьы ик Ижысь поликлиникаосысь неврологъёслэсь ар ӵоже ужамзэс чакласько. Собере вань со лыдпусъёсын январь толэзе мыноно луоз ини республикаысьтымы Тазалыкез утёнъя министерствое.

- Пичи дыръяды ик врач луэмды потэ вал-а?

- Кин луэме гинэ уг поты вал. Пичи классъёсын дышетскыкум, школае вуизы Ижысь адямиос. Соку гинэ усьтӥськем искусствоосъя нылпи школае усточиосты утчало вылэм. Мон кырӟаны-вераны усто вал, фольклор ансамбле но ветлӥ. Конкурс пыр потӥ ке но, анае Иже дышетскыны ӧз лэзьы, оло пичи ай кожаз, оло кыдёкын потӥз. Ми соку Пичи Пурга ёросысь Баграш-Бигра гуртын улӥськом вал (вордӥськи мон Можга ёросысь Пыӵасын). Озьы артист луон сярысь вунэтӥ. Но мынэсьтым та мылкыдме азьланьтӥз, шуыны луоз, Алексей выны. (Алексей Фомин – Удмурт кун филармониен кивалтӥсь - авт.)

9-тӥ классэз йылпумъяй «5»-ын гинэ. Соку ик юан кылдӥз: кытчы мыноно? Анае Валентина Зотовна – математикалы дышетӥсь, атае Юрий Александрович удмурт но ӟуч кылъёсты нуиз. Соос шуизы: дышетӥсьёс семьяямы вань ини, мын эмъян удысэ. Озьы мон пыри Ижысь медколледже, собере – медакадемие. Автозаводлэн больницаяз валтӥсь врачлэн воштӥсез доры лыктӥ но шуисько, кутэ монэ интернатурае, туж потэ нефролог луэме. Нош со пумитам: нефрологмы вань, ёрмиськом неврологлы. Озьы мон та удысэ сюри но со пумысен чик уг жаляськы.

- Висисьёсты эмъяськоды, отделениен кивал-тӥськоды, отчётъёс лэсь-тӥськоды. Шутэтскыса вут-тӥськоды-а? Кызьы ял кариськоды?

- Шонерзэ вераса, шутэтскыны чик дыры ӧвӧл. Мон туж яратӥсько толалтэзэ куасэн нискыланы, гужемзэ волейболэн шудыны, велосипедэн ворттылыны. Ижысь чугун сюрес больницаын ужакум ай, ӝыны городэз великен ортчисько вал. Уж дуре нырысь вуылӥ 40 минут ӵоже, собере 20 минут куспын. Шутэтскисько семьяеным, но туж шер. Милям сяме пыӵамын ини: люкаськиськом быдэс семьяен, шумпотон иворъя-а, шугъяськытӥсь ужпумъя-а – одно ик ваньмы ӵош пукиськом-кенешиськом. Дежурствоос ӧвӧл ке, эркын дырме  Максим пиеным ортчытыны тыршисько.

- Пиды вала-а, мамаез врач, адямиосты уте шуыса?

- Вала. Азьвылгес ай пиньзэ эмъяны ветлӥз но, сокем кельшем-а, мар-а, стоматолог, пе, луо. Трос пол озьы вералляз. Алигес мылкыдзэ юасько но, чутрак шуиз: врач луэме уг поты. Мугзэ но валэктӥз, уг, пе, кельшо тынад дежурствоосыд. Уже мыныкум ик юа, тон туннэ дорын изёд-а яке больницаын-а?

Отделениямы неврологъёс уг тырмо, эшшо кык врач кулэ. Али ужаськом ньыль кузя. Валамон ини, нуназе сяна, уйлы но кылёно луэ. Врачъёс уг тырмо бере, ныпъет секытгес луэ. Толэзь ӵоже мынам 12 дежурствое люкаське, 12 уй больницаын кӧлӥсько. Отделениын улӥсько, шуыны луоз. Тау анаелы-атаелы, соос пиме будэтыны зол юртто.

- Мар тӥледлы уг тырмы кадь шудо луон понна?

- 34 арескам асме шудтэм шуэме чик уг поты. Но огез зэмзэ но уг тырмы, со – дыр. Суткаын 24 час интые 48 луысал ке, ваньзэ вуттысал кадь потэ. Соку дыры тырмысал, дыр, аслым но, семьяелы но, ужаны но, шутэтскыны но, яратыны но…

 Галина Семёнова.

Выль ар ӝӧк выл пӧртэм сиён-юонэн, емышен узыр. Соин ик та вакытэ анай-атайёслы сак луоно: нылпиос оломае но кушаны медаз шедьтэ.

1-тӥез дэмлан. Кишечной инфекциез нылпи шедьтэ ым пыртӥз. Но урод бактериос пушказ сюро ке, куддыр со уг черла. Озьыен, иммунитетэз юн. Мукет ужпум, пичильток вылысьтыз вылаз пӧртэм висёнъёсын курадӟылэ ке. Соку ини, инфекция мугоре пырем бере 6-8 час ортчыса, сюлъёсын воштӥськонъёс кутско. Температура 40-41-озь тэтче, нылпи коска.

Озьы медаз луы шуыса, пичикайлэсь киоссэ майталэн ӵем миськылоно. Ульчае вить-а минутлы, ӝыны-а нуналлы потэ – чиньыоссэ одно гылтоно. Вунэтоно ӧвӧл шудонъёссэ но чылкытатыны. Емышъёсты но – басьтэмын-а соос, ас бакчаын-а будэтэмын – одно кран улын куаш-куаш миськоно. Колодчаысь я шурысь ву талы уз тупа.

Вунэтоно ӧвӧл: нунал куспын киос вылэ 100-лэсь ятыр бактериос пуксьыло. Туннэ сюлъёсын алясь ог 40 инфекциос вань. Пӧлысьтызы кудӥз нылпилы шедиз – нырысь-валысь тодыны уг луы. Угось котькудӥз кутске одӥг сямен: ӧскем потэ, мугор ӟырда…

2-тӥез дэмлан. Али гинэ висьыны усем нылпи котыре соку ик эмъюмъёсын тэбиньыны уг яра. Тэшкыли ӧске, кӧтыз кизермемын – озьыен, мугорыз ас понназ тырше урод через быдтыны. Соин ик кӧтэз буйгатӥсь таблеткаосты сётъяно ӧвӧл. Соосты нылпи ньылӥз ке, кӧтыз эшшо но чурытомыны, пушкысьтыз инфекциез аляны быгатоз. Яра смекта, энтеросгель сётыны. Куд-ог анайёс пиналъёссылы активированной уголь мычо. Но солэн пайдаез сыӵе дыръя ӧвӧл.

Пинал ӧске, но сьӧросэ кык-куинь нунал уг ветлы ке, соку ини пушсэ чылкытатоно – клизма пуктоно. Каксэ одно учконо: вирыз, дылькез (слизь) отын ӧвӧл-а, буёлэз, оло, ӵуж интые – вож? Кӧтыз вандэм кадь висе? Соку дорын йӧнатӥськемлэн пайдаез уз луы. Дыртоно больницае.

3-тӥез дэмлан. Покчи ӧскыку, солы тросгес ву сектано. Вуэз выльысь поттэ ке, чечы пуньыен пичиен-пичиен сётъяно. Угось та висён нылпи мугорысь натрий, хлор, калий сылалъёсты, витаминъёсты юн сюпсе. Та суретъёс туж кулэ, пиналлэн сюлэмыз, пекляосыз, йырвиымез усто мед ужалозы шуыса. Соос уг окмо ке, веществоослэн вошъяськемзы (обмен веществ) сураське.

Тодын возёно: сыӵе вакытэ йӧл, сок, компот, газ ву чик сётъяны уг яра. Яралоз быректэм шуныт, чылкыт ву гинэ. Ӧскем потонэз уг ортчы ке, регидрон сылалэз вуэн суралтыса, пичи пуньыен секталляно котькуд 5-10 минутлы быдэ.

Та бӧрсьы но тазалыкез уг тупатскы? Вазиськоно врачлы. Мугораз ву тырмымтэез возьматэ со но – нылпи 6 часлэсь ятыр уг кызя, температураез ӝутӥське, ымныр куэз пурысялэс луэ, куалмаськыны кутске, синъёсыз бездо.

4-тӥез дэмлан. Нылпи тазьы висьыку, ма карыны уг яра?

Врачен кенешытэк, анализъёс лэсьтытэк, антибиотикъёсты ас тодэмъя сётъяно ӧвӧл. Соос висёнэз эшшо но кужмоятозы.

Сиён-юонэз сылмытӥсь – ферментной – таблеткаослэсь (шуом, мезим, фестал)  палэнсконо.

Куд-ог анайёс нылпизылы сётъяло марганцовка ву. Озьы туж бадӟым янгыш лэсьто! Малы ке шуоно со, зэм, ӧскем потонэз быдтэ ик. Но кӧня ке часлы гинэ. Азьланяз нылпилэн какез пыже, бушатскыны курадӟе. Озьы сюлысь урод бактериосты быдтыны туж секыт луэ. Та сяна, марганцовка сюлысь дылькез сутыны быгатэ.

Калык эмъяськон амалъёсты санэ басьтоно ӧвӧл.

5-тӥез дэмлан. Пиналлэн ӧскем потонэз, кӧт кизермонэз ортчиз ке, соку ик пӧртэм сиён-юон борды медаз кырмиськы. 2-3 арня возёно диета: емышъёсты, ӵынатэм, пырсатэм сӥль-чорыгез, йӧлэз, кампетъёсты-тортъёсты палэнтоно. Угось таос кӧтэз тордыто.

Светлана Загуляева,

Ижысь нылпи врач.