Ижысь 4 номеро ЦСО-ын.

Туэ шуд усиз Ижысь Индустриальной ёросысь Калыклы юрттэт сётонъя 4 номеро центрын кузпалыным ӵош шутэтскыны.

Кивалтэ та центрен егит но шаплы нылкышно Ирина Яркова. Шутэтскимы нуназе ужась отделениын. Тазэ валтэ Татьяна Кононова. Ӵукна пумита, ӝытазе келя, котькудӥзлы шуныт кыл шедьтэ. Та югыт но чебер юртэ вуыса, эмъюмъёсмес ик вунэтӥм.

Татын кулэяськисьёслы пӧртэм юрттэт сёто. Вань тренажёрной зал, эмъясь гимнастика. Кыӵе ке сюлэмшугъяськонъёс вань ке, котьку вазиськыны луэ психологлы Наталья Шемякиналы.

Киужъёсъя кабинетын но мылкыдэз буйгатыны луэ. Татын ужа туж сюлмо нылкышно Татьяна Невоструева. Марлы гинэ ӧм дыше солэн кивалтэмез улсын! Сад-бакчаосмес но табере олокызьы но чебертыны быгатомы, пӧртэм синпель кузьымъёс но лэсьтыны дышетскимы. Мыным туж кельшиз пӧртэм буёло ыж гонлэсь гындэм чыры-пыры киужъёс дасяны.

Нош кин уг яраты кырӟаны но эктыны! Астэ кызьы возьыны, пыдъёстэ пуктыны дышетэ лякыт сямо но небыт сюлэмо Наталья Мерзлякова.

Ваньмызлы татын ужасьёслы тау карисько.

Клавдия Вахрушева.

Калыкез-улон вылонын утёнъя министр Ольга Корепанова пусйиз, социальной юрттэтлы кылем арын 4 миллиард манет висъямын вал, 2010-тӥ арен ӵошатыса, 12 процентлы ятыргес. Со пӧлысь 27 процентэз коньдон вуиз федерал бюджетысь, кылемзэ висъяз республика.

Удыс азе пуктэм валтӥсь ужпумъёс быдэстэмын. Россилэн но республикалэн бюджетэз пыр 270 сюрс пала льгота басьтӥсьёслы коммунальной юрттэт понна компенсация висъяське толэзьлы быдэ. 100 сюрс ветеранъёс но инвалидъёс социальной проездноен ветло. Быдӟым ожысь 2 сюрслэсь ятыр ветеранъёслэн улон югдурзы умоятэмын. Та уж туэ но азьланьтӥськоз, али черодын 356 мурт лыдъяське.

Бадӟым уж лэсьтэмын Социальной юрттэт сётонъя центръёсты выльдонъя. Ӝог юрттэт сётонъя отделениосын усьтӥсько сиделкаосъя службаос. Юрттэтлы кулэяськисьёслэн доразы но поталозы тазалыкез утён удысын ужасьёс, ЦСО-осын та понна нимаз ставкаос чакламын. Та ужез капчиятон понна шаерысьтымы вань ёрос центръёсы висъямын «ӝог юрттэт сётонъя» автомобильёс.

Республикаямы инвалидъёсты калыке поттонъя 2011-тӥ – 2015-тӥ аръёслы «Доступная среда» программа кутэмен, ветлыны быгатӥсьтэмъёслы юрттэт сётон но трослы вырӟиз. Социальной юрттэт сётонъя учреждениосы но центръёсы басьтэмын реабилитацияя оборудование, коляскаен ветлӥсьёс понна нимаз улон юртъёсты но учреждениосты пырыны-потаны ярамон каронъя но ужъёс мыно. Ветлыны курадӟисьёс понна котькуд городын радъямын «социальной такси».

Азьло сямен ик юрттэт сётӥське ёрмисьёслы. Кылем арын 2 сюрс 599 муртлы та ужпумъёслы висъямын вал 5 миллион 700 сюрс манет. Со сяна, «Арлыдоос» программая 3 миллионлэсь ятыр коньдон кошкиз 863 муртлы пинь протезъёс пуктонлы, улон юртъёсты тупатонлы, дуно эмъюмъёс басьтонлы.

Палэнэ ӧз кыле секыт югдуре шедем нылпиос но. Шаерысьтымы социальной юрттэт сётонъя но реабилитацияя 15 центръёсын но приютъёсын 1 сюрс 395 пиналлы юрттэт сётэмын.

Семья улонын зарни юбилейзэс пусъемъёс но йылӥзы, кылем арын 2 сюрс 149 кузпалъёслы висъямын одӥг пол сётӥськись коньдон – быдэн 2 сюрс манет. Туэ юрттэтлэн быдӟалаез 3 сюрс манет луиз.

Огъя верано ке, калыклы юрттэт сётон удыслэсь ужзэ Президент умоен пусйиз. Азьланелы валтӥсь ужпумен лыдъяз инвалидъёслы котыр ласянь юрттэт сётонэз. Сарапулысь инвалидъёслэн колледжзылы «Доступная среда» программая трос юрттэт висъямын ни. Но Александр Волков колледжлэн директорезлэсь дышетскисьёсты пӧртэм ужрадъёсы нуллыны микроавтобус куремзэ умоен лыдъяз. Нылпиослы реабилитацияя элькун центрлэсь Ижысь юртсэ паськытатон пумысен вазиськонэз но эскероно, шуиз Президент.

Лия Малых.

И. Григорьева, М. Воробьёв, А. Бобров - Инвалидъёслэн огазеяськонысьтызы азьветлӥсьёс.

2008-тӥ арын сентябре Россия гожтӥськиз инвалидъёслэн правооссы сярысь ООН-лэн Конвенциез улэ. Отын пусъем куронъёсты быдэстон понна Россиысь Правительствоен 2011-тӥ-2015-тӥ аръёслы кутэмын «Доступная среда» кун программа. Таин валче республикаямы кылдытэмын вить арлы программа. Сое улонэ пыӵатон понна 370 миллион манет висъяны чакламын. Россилэн бюджетысьтыз коньдон висъяськыны кутскоз 2013-тӥ арысен.

Мар лэсьтэмын но лэсьтӥськоз шаерамы инвалидъёслэсь улон югдурзэс умоятон пумысен. Та ужпумъёсъя журналистъёсын кенешиз калыкез улон-вылонын утёнъя министр Ольга Корепанова.

Юрттэт матэктӥз

Таяз арысен республикаысьтымы инвалидъёс но ветеранъёс капчиен шокчозы. Протезъёс (пиньлы вератэк) но ортопедияя арбериос, коляскаос, улон югдурез умоятӥсь мукет техника пумысен, озьы ик санаторийёсы но курортъёсы путёвкаослы но шаермылэн палэназ эмъяськемлы сюрес дунэз берыктонъя бызьылонъёс ӧжытгес луозы. Табере та ужъёсын выроз республикаысьтымы Калыкез улон-вылонын утёнъя министерство.

Та дырозь вазиськоно луылӥз Россиысь Социальной страхованиея фондлэн Удмурт ёзаз. Ижысь Ухтомский ульчаысь юртэ таза муртлы но капчи ӧвӧл мыныны, нош висись, ветлыны шугъяськись адямилы со сюрес дунне пыдэсэ вуэм кадь потылӥз. Табере та юрттэтлы кулэяськисьёс меӵак вазиськыны быгатозы ёросысьтызы калыкез улон-вылонын утёнъя ёзъёсы.

Та пумысен огкыл кутэмын Россиысь Тазалыкез утёнъя но улон-вылонэз азинтонъя министерствоен но Удмуртиысь Правительствоен.

Реабилитацияя пӧртэм арбериослы но техникалы кулэяськисьёс 1 сюрс 800 мурт кылемын на. Россилэн бюджетысьтыз таяз арлы 155 миллион манет висъямын.

Федеральной перечене пырись арбериос инвалидъёслы сётӥсько дунтэк, медико-социальной экспертизая комиссия реабилитацияя картае сыӵе юрттэт сётон сярысь гожтӥз ке. Нош кулэ луись техника ӧвӧл яке шуг-секытэ усем мурт ачиз сое басьтӥз, соку висъяське компенсация.

Эмъяськон путёвкаосъя югдур мукетгес. Черодын 4 сюрс 800 мурт сылэ. Ар ӵоже санаторийёсы 2 сюрс 500 пала путёвка висъяськылӥз, сыӵегес ик югдур луоз азьланяз но. Черодтэк эмъяськыны быгато Чернобыле ветлэмъёс но Быдӟым ожысь ветеранъёс. Та ужпумъёслы висъямын 36 миллион манет.

Гуртъёстӥ котыръяськозы «Ниваос»

Инвалид нылпиослы юрттэт сётонъя (реабилитацияя) кык элькун центр усьтэмын – Глазовын но Ижын. Арлы быдэ отын тазалыксэс юнмато 1 сюрс 600 пала покчиос но быдэ вуымтэос. 18 арес тырмыса, соос табере палэнэ уз кыле. Республикаямы кутэмын инвалидъёслы социальной юрттэт сётонъя 2010-тӥ-2012-тӥ аръёслы программа. Соя шаерысьтымы арлыдоослы но инвалидъёслы усьтэмын социально-реабилитационной центр. Ар ӵоже отчы вазиськиз 446 мурт. Но юрттэт сётонъя та центр пумысен ужпумъёс кылемын на, туэ со ваньмыз радъяськыны кулэ. Нырысьсэ инвалид группа басьтэмъёс сяна, тазалыксэс юнматыны но мукет юрттэт басьтыны быгатозы мукетъёсыз но кулэяськисьёс.

Арлыдоослэсь, озьы ик инвалидъёслэсь улон-вылонзэс ӟечгес карон вылысь ужзы выль сямен радъяськиз муниципал кылдытэтъёсысь калыклы юрттэт сётӥсь центръёслэн (ЦСО). Уйин но нуназе ужась отделениос реабилитация центръёслы пӧрмытэмын. Инвалидъёс но арлыдоос ёросъёсазы ик юрттэт басьтыны, улонзэс радъяны но тазалыксэс юнматыны быгато. Таӵе воштӥськонъёслы шумпотэмын Россиысь Инвалидъёслэн огазеяськонзылэн Удмурт ёзэныз кивалтӥсь Максим Воробьёв но.

- Ваньмаз ик центръёсын инвалидъёс понна нимаз нуналъёс висъясько. Сарапул, Шаркан, Балезино ёрос ёзъёс, озьы ик мукетъёсыз но, огазеяськонысьтымы пичи ёзъёсын кивалтӥсьёслы путёвкаос висъяло, тазалыксэс юнматон сямен пӧртэм ужпумъёсъя дышетсконъёс радъяло. Калыклы юрттэт сётонъя центръёсысь мобильной бригадаос но шуг-секытэ шедемъёс доры дыраз вуыны быгатозы.

Мобильной бригадаос сярысь ке верано, республикаямы кутэм Социальной программая 2011-тӥ арын чакламын вал Россиысь Пенсиосъя фондэн ӵош арлыдоослы но инвалидъёслы юрттэт сётӥсь учреждениослы техника но мукет кулэ луись арбериос висъяны. Со чотын 30 муниципал учрежденилы кылем арын басьтэмын машина. Гуртъёстӥ котыръяськозы «Ниваос», нош Ижевск городлы висъямын кык «Газель» – коляскаен ветлӥсь инвалидъёсты нуон-ваён понна. 5 миллион 800 сюрс манет коньдон сётӥз Россиысь Пенсиосъя фонд, сомында ик коньдон кошкиз республикалэн бюджетысьтыз.

Социальной ужасьёс азьло но гуртъёсы вутскылӥзы, табере луонлык кылдӥз палэнын улӥсьёс доры но ӵемгес вутскыны. Адямиослэн вазиськемзыя юрттэт сётӥсьёс пӧлын луозы психолог, юрист, эмъясь но мукет специалистъёс.

2011-тӥ-2013-тӥ аръёслы республикаямы кутэмын арлыдоослэсь улон югдурзэс умоятонъя программа. Соя чакламын ЦСО-ослы пӧртэм юрттэт сётыны. Озьы кыкетӥ паларе котькуд центрын усьтӥськозы компьютер классъёс. Арлыдоос но инвалидъёс дышетскозы туала техникаен ужаны, Интернет пыр юрттэт басьтыны. Куд-ог центръёсын сыӵе классъёс усьтэмын ни.

Калыке потон

Инвалидъёсты калыке поттон программалы кылем арын висъямын 14 миллион манет пала. Туала оборудование басьтэмын Сарапулысь колледжлы но Глазовысь нылпиослы юрттэт сётонъя центрлы. Шаерысьтымы городъёсын радъямын инвалидъёсты таксиен нуллон – ар ӵоже нуэмын-ваемын 1 сюрс 551 мурт. Кылӥсьтэмъёс понна Культурая, печатья но иворъёсъя министерство Национальной библиотекаын усьтӥз компьютер класс но телепередачаосты субтитрен возьматон.

Коляскаен ветлӥсь инвалидъёслы нялмыт васькон-тубонъёс лэсьтон уж но вырӟиз. Куиняз ЦСО-осын, Воткинск но Каракулино ёросъёсысь инвалидъёслэн юртъёссы азьын пандусъёс кылдӥзы, «Лудорвай» музее но коляскаосын ветлон сюрес радъяськиз.

Нош туэ та элькун программалы 12 миллион манет висъяны чакламын, ӝыныез пала коньдон пандусъёс лэсьтонэ кошкоз. Калыкез улон-вылонын утёнъя министр пусйиз, нырысь ик выльдэмын луозы инвалидъёсын ужась социальной учреждениос. Озьы ик лэсьтӥськонъёс ортчозы инвалидъёслэн квартираосазы – юрттэт нырысь ик висъяськоз 1-тӥ группаысь коляскаен инвалидъёслы. Кытын ке ӧсъёсты паськытатоно, возиськон пулъёс юнматоно, нимаз подъездэ тубон-васьконэз нялмыт кароно.

Кӧня коньдон мыноз тупатъян ужъёслы, та пумысен инвалидъёс яке соослэн ӵыжы-выжыоссы вазиськыны кулэ улон интыысьтызы архитектурая ёзъёсы. Яке огазеяськон лэсьтӥськон борды басьтӥськоз, али та пумысен вераськонъёс мыно. Лыдъян-чотанъёс ортчытэм бере министерство тыроз коньдон. Юрттэтлы кулэяськисьёсъя списокъёс дасян бордын инвалидъёслэн огазеяськонъёссы но ужало.

Ачиз ветлӥсь тодон-валан

Удмуртилэн Президентэз вӧзын кылдытэмын Инвалидъёслэн ужпумъёссыя кенеш. Солэн ӵектэмезъя миым министерствоен басьтэмын киын ужатонъя автомобиль. Инвалидъёсты машинаен ветлыны дышетон курсъёс радъямын Ижевскысь 22 номеро промышленно-финансовой лицейын. Ар ӵоже 14 муртэ дышетэмын. Нош мылкыд карисьёс трос.

Кылем арлэн пумаз автомобиль басьтыны коньдон висъямын Сарапулысь инвалидъёслэн колледжзылы. Мылкыд карисьёс дышетскон висказы ик машинаен ветлыны дышозы. Та колледжын пӧртэм профессилы али дышетске 250 нылпи, со сяна, ветлыны быгатӥсьтэм 14 мурт кылем арысен тодон-валан басьтэ дистанционной амалэн.

Дорысьтызы потаны быгатӥсь-тэмъёслэн луонлыкъёссы вань вылӥ образование басьтыны. 2010-тӥ арысен Удмурт кун университетын дистанционной амалъя дышето юриспруденцилы, экономикалы, кунгож кылъёслы. Араз 30 муртлы инты усьтэмын. Со сяна, луонлыкъёс вань ужбергатон удыслы дышетскыны. Экономикая, информатикая но статистикая институтлэн филиалэз котькуд аре толэзьем курсъёс ортчытэ.

Вуз вань, басьтӥсь ӧвӧл!

Шаерамы сюлэсь ятыр общественной организациос кылдытэмын, соослэсь ужзэс радъян понна республикалэн бюджетысьтыз котькуд ар 2,5 миллион манет висъяське. Туэ 28 процентлы тросгес коньдон сётӥськоз. Нош кылем арын Удмуртилэн Президентэз чакламез вӧзы эшшо 900 манет ватсаз на. Коньдон юрттэт висъяське Инвалидъёслэн элькун огазеяськонзылы но. Трос люкетэз отысь кошке пӧртэм тыриськонъёслы.

Туннэ нуналлы огазеяськонын 7 сюрс 170 мурт лыдъяське, пӧлазы вань ветлыны быгатӥсьтэмъёс но. Огазеяськонэз кӧня ке аръёс ӵоже шугъяськытэ ини ужан дӥськут вуронъя «МАПИН» производствоез пыд йылаз султытон. Алигес гинэ татын 14 мурт ужа вал, кылиз на 10-эз, пӧлысьтызы ӝыныез – инвалидъёс. Ужан интызы но, оборудованизы но, ӟечлыко вуриськисьёссы но вань – ӧвӧл заказъёс.

Вуриськон цехлэн луонлыкез бадӟым: толэзяз 1 сюрс тол дӥськут, 2,5 сюрс гужем ужан дӥськут, чорыгасьёслы но пӧйшурасьёслы 700-800 пала дӥськут, 5 сюрс пала валес котыр вурыны быгатысал. Мукетъёсыныз ӵошатыса, вуззы трослы дунтэм. Басьтӥсь ӧвӧл.

- Кун ласянь дурбасьтӥсь, заказ сётӥсь луысал ке, огазеяськонмы капчиен шокчысал, тросгес адямиосты котырамы кыскыны быгатысалмы, – шуэ Максим Воробьёв. – Огазеяськонамы пыриськем спортсменъёс-инвалидъёс асьсэды Россиын гинэ ӧвӧл, дуннеын но возьмато. Берло ньыль ар ӵоже физкультурая но спортъя элькун фестивальёс ортчытъяськом, ӵошатскиськом теннисъя, дартсъя, капчи атлетикая, пуляен ыбылӥськонъя. Вормисьёс Россиысь ӵошатсконъёсы пырисько. Озьы ик художественной самодеятельностья фестивальёс ортчыло. Мукет но ужрадъёс милемды огазеяло. Со сыӵе ик реабилитация. Оскем потэ: милемды кылозы!

Лия Малых.

Туспуктӥз Владимир Беломорских.

Валамон ини, та празднике лыктэмын вал  ёрос администрациослэн йыръёссылэн социальной ужпумъёсъя воштӥсьёссы, ЦСО-ослэн кивалтӥсьёссы. Калыклы юрттэт сётонэн  герӟаськем ужпумъёсты табере соослы трослы капчигес быдэстыны луоз: шуг-секыт югдуре шедемъёс доры «Ниваос» чаляк вуттозы, палэнысь гуртъёс но трослы матэктозы.

Удыссылы таӵе бадӟым кузьым лэсьтэм пумысен тау карыса, Ольга Андреевна шуиз: калыклы юрттэт сётон учреждениослы машинаос висъян пумысен ар кутсконысен ик вераськон мынӥз. Удмуртилэн Президентэз, Правительство но Россиысь Пенсиосъя фонд сюлмаськемен, малпан быдэсмиз. Озьыен, котькуд центрын табере кылдозы огазеям бригадаос.

Вераны кулэ, бригадаос азьын сылӥсь валтӥсь ужпум – вань кулэяськисьёслы огкадь юрттэт сётон. Нош кулэяськонъёс но юрттэт сётон арысь аре йыло. Кинлы ке эмъюмъёс кулэ яке тазалыксэ чаклано, мукетызлы юрт котырысь ужъёссэ быдэстыны юрттоно, сиён-юон ваёно яке документъёс пӧрано. Пӧртэм удысъёсысь специалистъёс, врачъёс, психологъёс но вуттӥськыны быгатозы ни палэнын улӥсьёс доры, кулэ дэмланъёс, юрттэт сётозы.

Шаерысьтымы калыклы юрттэт сётон удысэз автотранспортэн узырмытыны луонлык кылдӥз, республикаямы таяз арын сентябре социальной программа кутэмен. Соя калыклы юрттэт сётон учреждениосты пӧртэм техникаен но тӥрлыкен узырмытыны  чакламын, озьы ик инвалидъёслы но арлыдоослы нимаз юрттэт сётыны. Социальной программа чотын автомобильёс басьтыны но пӧртэм юрттэтлы висъямын 11 миллион 600 сюрс манет, со пӧлысь ӝыныез коньдон сётэмын республикалэн бюджетысьтыз, ӝыныез – Россиысь Пенсиосъя фондысь.

Кияса ёрос администрацилэн йырызлэн воштӥсез Тамара Васильева вань муниципал кылдытэтъёслэн нимынызы тау кариз таӵе кузьымлы. Ёросамы, пе, ЦСО пыр араз юрттэт сётӥське 5 сюрс пала арлыдоослы но шуг-секытэ сюремъёслы. Кулэяськисьёслы юрттэт сётӥсь бригада ёросазы  куинь ар пала ужа ни, но машина отысь-татысь утчано луэ вал.

Шумпотэмзэ уг ваты Шаркан ёросысь Калыклы юрттэт сётонъя центрен кивалтӥсь Елена Перевозчикова но. Кыкетӥ машина милемлы туж кулэ ни вал, шуэ. ЦСО-ын одӥг машина вань ик, но со тырмыт ӧвӧл. Тазэ сётомы калыклы ӝог юрттэт сётонъя ёзэ. Табере тужгес пыдлось гуртэ но котькыӵе куазен потыны быгатомы.

Юрттэт курыса, Оскем мурт доры Пичи Пурга ёросысь 13 гуртъёсысь 771 мурт вазиськиз. Оскем муртлэн аппаратаз ужасьёс юртъёссэс эскерыса потӥзы. Адямиослэсь улон интызэс шуныт карон понна нырысь ик тупатъяно вал липетъёсты, вӧлдэтъёсты, укноосты но борддоръёсты. Президент Александр Волков косэмъя зуркам-куашкам коркаосты тупатъяны шаерысьтымы вить городъёсысь лэсьтӥськись организациос юнматэмын. Куазь зоремен, уж ӝегаз. Озьы ке но лэсьтӥськон-тупатъян уж бордын мыло-кыдо тыршо Сарапул но Воткинск городъёсысь лэсьтӥськисьёс. Тросэз адямиос куашкам юртъерзэс асьсэ кужымен тупатъяны кутско.

Тужгес но секыт югдур Яган посёлокын. Отын улӥсьёслэсь юртъеръёссэс тупатъян-лэсьтон вылысь юнматэмын глазовъёс.

Пуштылонъёс дырысен 4 толэзь ортчиз ни, нош адямиос выльысь вазиськонъёсын лыкто. Яке воксё но нырысьсэ вазисько. Тупатъям-лэсьтэм ужъёс куд-огезлы уг кельшо.

Куд-огез шуо: малы мынэсьтым липетме вуж шиферен липиды, нош бускельмылэсь – кортэн. Сыӵе дыръя нош адямилэсь вазиськонзэ эскерытэк ӧвӧл. Талэсь мугзэ валаны луэ: пуштылонъёс бере ик МЧС-ын ужасьёс Глазовысь лэсьтӥськисьёсын ӵош Яган посёлокетӥ ортчизы. Мае адӟизы – сое ик актазы гожъязы. Куинь шиферзы ке усемын, куинь ик пуктоно шуыса, пусйизы. Музон шекъёсты адямиос соку ӧз на чаклалэ. Собере но ай выльысь езаны но пилиськылыны кутскизы фундаментъёссы, гуръёссы но кирпичлэсь но пеноблоклэсь ӝутэм борддоръёссы. Бӧрысь ми доры эшшо 1 сюрс 200 вазиськон вуиз на, шуэ М. Кокорин. Соос пӧлысь 1 сюрс 50-эз эскеремын ни.

Нимысьтыз пусъем потэ: Зинаида Андреевна Токарева мунчо азяз уг улы ни (со сярысь «Удмурт дунне» газет гожъяз 18-тӥ коньывуонэ). Та нуналъёсы солэн семьяез эстӥськись, шуныт квартирае пыриз. Ӝоген соослы тыл но кыскозы. Но жаляса верано, тросэз адямиос уг быгато на улон сэрегъёсазы пырыны. 15-тӥ ноябрёзь тупатъян-лэсьтӥськон ужъёсты йылаз-пумаз вуттыны кулэ. Та нуналъёсы нош ик пумиськылэмын зуркам 5 муниципал кылдытэтъёслэн йыръёсынызы.

Военной городок понна кыл кутэ Обороная министерство. Сое тупатъян-лэсьтон туж ӝег мынэ. Сузмемын газ кыскон гумыос, уг ӝуа тыл. Со пумысен Ижысь военной гарнизонэ но Пичи Пургаысь военкоматэ вазиськонэн потэмын. Капчиёмиз соиз: адямиослы, судэ вазиськыса, кызьы нырысь-валысь ивортэмын вал, Екатеринбургетӥ костаськонэз уз луы. Шуге-леке шедемъёс вазиськыны быгатозы Пичи Пурга ёрос судэ.

Али ке но ож тӥрлыкез возён базаын мыно на пуштытъянъёс. Кытчыозь соос луозы, тодмо ӧвӧл. Адямиос кышкало (уката ик нылпиос), улон интызэс воштыны курыса, вазисько Оскем мурт доры. Тазалыксы лябӟем пумысен но уно вазиськонъёс вуизы ини. Соосты Удмуртиысь Тазалыкез утёнъя министерство чакла.

Оскем мурт доры озьы ик вазиськонэн потӥзы военной городокысь кивалтӥсьёс. Соос дэмлало ужасьёссэс Зинаида Корепановаез, Александр Немятовскихез, Александр Пономарёвез, Майя Кормишинаез медален пусйыны. Пуштылон уе соос ож тӥрлыкен тырмытэм 11 вагонэн эшелонэз ожгар базаысь поттӥзы. Ми та вазиськонэз одно ик вуттомы Удмуртилэн Президентэзлы Александр Волковлы, оскытӥз М. Кокорин.

Любовь Тихонова.

«Удмуртлык» группае пырись егитъёс Зоя Лебедевалы юрттоно кариськизы. Суредасьлы огдырлы висъям интыез соос быгатэмзыя тупатъязы-выльдӥзы, шуныт каризы. Та ужрадэ удмурт егитъёс гинэ ӧвӧл, Удмурт кун университетысь поляк кылэз дышетонъя кафедраысь дышетӥсьёс Петр Палган но Мирелла Мазур пыриськизы. Кызьы ивортӥз «Удмуртлык» группалэн ёзчиез Алексей Шкляев, тылӝуын суредасьлэн юртэз гинэ ӧз быры, пеньӟиз солэн коллекциез но – 200-лэсь ятыр арбериос! Суредась гуртаз чакла вал ӵапак со арбериослэсь арт-центр кылдытыны…

- Зоя Лебедевалэсь секыт югдуре шедемзэ тодэммы бере ивор пуктӥмы «Вконтакте» социальной сетьысь «Удмуртлык» группае, – шуэ Алексей Шкляев. – Тодамы вайимы вашкала удмурт сямез – веме каронэз. Юрттыны мылкыд кариз 13 адями, но азьланяз соослэн лыдзы будоз. Угось адямиос тунсыкъясько, юанъёс сётъяло.

«Удмуртлык» группае пырисьёс оско: зӧк кисыё адямиос но уз палэнске юрттонлэсь. Со понна Facebook сетьын усьтэмын ӟеч уж лэсьтонъя аукцион. Отын вузаны пуктэмын Зоя Лебедевалэн киужъёсыз. Та нуналлы тодмо ини: солэсь киын лэсьтэм шудонзэ 500 манетэн басьтӥз филология наукаосъя доктор Василий Ванюшев. Оскиськом, аукционэ пыриськыны мылкыд карисьёслэн лыдзы уноялоз, оско «Удмуртлык» группаысь егитъёс. Соос сюлмасько Брангуртэ волонтёръёсты кыскон пумысен но – соос Зоя Лебедевалэсь улон сэрегзэ толлы ӟечгес дасясалзы.

Наталья Седова.

Нуназе котыр Ижевск вадьсын шунды ворект

Трамвайысь потэм калык зоопарке чурен-чурен кыстӥське. Кин огназ вамышъя, кудӥз внукеныз, внучкаеныз мынэ, кинъёс ке люкенак кариськиллям. Син шоры йӧто кунулскыса вамышъясь кузпалъёс но. Тросэзлэн арлыдоослэн киязы бодыос. Пырон азьын возьмаськыса сылӥсьёс но вань: эшъёссэс адӟыса, ӟыгырско. Азьвыл, пе, демонстрациосын, митингъёсын пумиськылӥськом вал, табере луонлык кылдӥз таӵе шулдыр, чебер интыын адӟиськыны.

Моржъёсын висъет дорысь удмурт сямен вераськем кылӥськиз. Яркыт кышетъёсын но дэремъёсын пӧрмытскем кенакъёс Дэри ёросысь Пыӵанка гуртысь социальной юрттэт сётонъя центрын шутэтскисьёс вылӥллям. Доразы матэктэмме адӟыса, вӧзазы соку ик кылдӥз йыг-йыг мугоро воргорон. ЦСО-ын ужась водитель Пётр Назаров песянайёсты зоопаркез адӟытыны ваем. Толоназ, пе, вить мурт ветлӥз, туннэ нош куатьсэ вайи.

Центрын кык арня ӵоже шутэтскытозязы, Пётр Иванович арлыдоосты ӵемысь нуллэ Ижысь музейёстӥ, городэн тодматэ. Таизлы сменалы удалтӥз, пе, пересьёслы зоопаркын туж кельше. Воргорон ачиз но шумпотэ соос понна. Вераськон сяменымы кенакъёс азьлань шонтӥзы. Водитель но дыртӥз: утчатэк, пе, уз луы ваньзэс, бертоно луоз ни.

Мылкыдъёссы пӧртэм ик ӧвӧл городын улӥсьёслэн но. Тросэз зоопарке нырысьсэ вуэмын. Металлург городокын улӥсь Валентина Соколова тямыстон арессэ ортчемын ни. Ветлыны курадӟеменыз, боды вылэ пыкъяське.

- Куазь шулдыр ке, зоопарк вӧзтӥ весь поръясько, – шуэ, – коркан пукыса, тазалык уз юнма. Подъезд азьысь ялонэз адӟыса, бускеленым пӧйшуръёсын тодматсконо кариським. Малы меда та дырозь зоопарке ӧвӧл пыраськем? Туж бадӟым тау шуэме потэ Президентлы Александр Волковлы шаерамы улӥсьёслы таӵе бадӟым кузьым лэсьтэмез понна, озьы ик Арлыдоослэн калыккуспо нуналэнызы валче арня ӵоже зоопарке дунтэк вуылыны луонлык сётэмез понна. Со нылпиослы гинэ шумпотон ӧвӧл, ми кадьёс но тани кыӵе лӧптэмын!

Вераськеммес кылыса, вӧзтӥмы ортчисьёслэн но мылкыдзэс шараямзы потӥз: зоопарк пуктэм пумысен куаретэм кариськом вал, пе, но татчы вуыса, мылкыд чутрак воштӥськиз. Огшоры шутэтскыны но лыктэм потоз, внукъёсмес но вань кытчы вайыны.

6 нунал ӵоже зоопарке 21 сюрс 422 пенсионеръёс вуылӥзы. Сӥзьыл куазен такем трос люкаськем калыклы пӧйшуръёс но паймемын вал, дыр. Тужгес но лӧптэмын обезьянъёс, уката ик йӧспӧртэмъяськыны выриз сьӧд изьыё гиббон. Висъет сьӧрын огназ пукемысьтыз, солы туж мӧзмыт, лэся. Вӧзаз люкаськемъёсты олокызьы но шулдыртыны выре. Я йырсизэ сынам каре, я ӟечыраны кутске. Пияла борды кариськыса, лыктэмъёсты ӟыгыртыны-чупаны ик дась.

Лия Малых.

Туспуктӥз Владимир Беломорских.

О. Корепанова.

Шаерамы 413 сюрс пала пенсионеръёс. Со пӧлысь 2 но ӝыны сюрсэз – ожысь ветеранъёс, 38 но ӝыны сюрсэз – ож мышкын ужамъёс, 111 сюрсэз – ужысь ветеранъёс, ог 116 сюрсэз – инвалидъёс. Соослы улон-вылонын юрттэт сётонлы республикамылэн бюджетысьтыз арлы быдэ тросгес коньдон висъяське. Ӵошатон понна: 2009-тӥын – 3,4 миллиард манет, 2010-тӥын – 3,6 миллиард манет кошкиз, 2011-тӥлы 4 миллиард манет чакламын.

Кыӵе юрттэт кун ласянь сётӥське песянайёслы но песятайёслы – та сярысь мадиз калыклы улон-вылонын юрттэт сётонъя министр Ольга Корепанова.

Калыклы улон-вылонын юрттэт сётонъя министерство пыр туэ 521 сюрс мурт юрттэт басьтӥз ни. Кунэн чаклам гарантиос республикаямы быдэсъясько. Озьы ожысь ветеранъёс толэзьлы быдэ пенсизы борды 310 манет ватсаса басьто, ож мышкын ужамъёс но репрессиосын сэрен курадӟемъёс – 473 манет. Коммунальной услугаослы дунъёслэсь оглюкетсэ берыктонлы кылем арын Россилэн но республикамылэн бюджетъёсысьтызы 1 миллиард 695 миллион манет пала кошкиз. Туэ но та лыдпус ичи уз люкаськы. Та коньдонэз басьтэ ог 276 сюрс адями.

- Толэзьлы быдэ ог 90 сюрс мурт басьтэ льготаосъя сётӥськись проездной билет, – вера Ольга Андреевна. – Та понна республикамылэн бюджетаз туэ арлы 249 миллион манет пала чакламын. Со сяна, вань пенсионеръёс ӝыны дунын ворттылыны быгато городлы матэ ветлӥсь транспортын – талы бюджетысь ог 25 миллион манет кошке.

Шаерамы юнматэмын «Арлыдоос» программа. Со чотын 292 сюрс манет висъямын дуно сылӥсь операциослы, арлыдоослэсь коркаоссэс тупатъянлы, пинь пуктылонлы но мукет. Юрттэт нырысь ик сётӥське ожысь но ужысь ветеранъёслы, инвалидъёслы. Туэ 500 муртлы коньдон висъяськиз.

* * *

Республикаысьтымы вань городъёсын но ёросъёсын ужало социальной обслуживаниея центръёс. Соос арлы быдэ ог 260 сюрс муртлы пӧртэм юрттэт сёто. Кылсярысь, оген улӥсь пересьёслы сиён-юон, эмъюмъёс басьяло, корка пушказы утялтӥсько но мукет. Асьсэды утялтыны быгатӥсьтэм песянай-песятайёс вӧзын нунал лумбыт учкисьёс луыны кулэ – талы берло дыре нимысьтыз саклык висъяськыны кутскиз. Угось пересьёслы нимысьтыз чаклам юртъёслы гинэ оскиськыны уг луы.

- Пересьёслы юртъёсын али 3 сюрс 204 мурт улэ, – пусйиз Ольга Корепанова. – Та пӧлысь ог 49 процентэз ассэ утялтыны уг быгаты, поръяны шугъяське. Валамон: пересьёслы юртъёсын ваньзэс тыро-пыдо утялто, соос понна пӧртэм ужрадъёс ортчытъяло. Но дор – со дор. Луонлык вань ке, огназы кылемъёсты ас юртазы ик кельтыны турттӥськом. Но озьы ке но пересьёслэн юртазы черод вань – али 190 муртлэн куриськонэз кылле.

 * * *

Пусйымонэз: кун сӥлы каре кема аръёс ӵоже ӵошен но тупаса улӥсь кузпалъёсты. Озьы 2003-тӥ арысен кутскыса ни, республикаямы таослы сӥзем нимысьтыз праздникъёс-ӟечкыланъёс радъяськыло. Туэ ар куспын 1 сюрс 435 таӵе пар данъямын. Президент Александр Волков ӵектэмъя соослы пичияк коньдон но висъяське – 2 сюрс манет. Вуоно арысен солэн быдӟалаез 3 сюрс манетозь будэтэмын луоз.

Элина Кумачёва.

Туспуктӥз Константин Семёнов.

Пукиськом Михаил Сергеевичен ӟоскыт кабинетаз. Солы 53 арес тырмиз. Можга  ёросысь Ягулын вордӥськем адями, 1984-тӥ арын УдГУ-ысь географияя ёзэтсэ йылпумъяса, Алнашын нылпи юртын ужаны кутскиз. Та удысын сизьым ар тыршемез бере чырткем егит воргорон «Алнаши» нимо огазеяськонлэн тӧроез луиз. Солэн кивалтэмез улсын предприятие лэсьтӥськон-тупатъян ужъёсын выриз.

Котькыӵе уж борды мылысь-кыдысь басьтӥськемзэ, сое радъяны, калыкен ужаны быгатэмзэ, тодонлыксэ ялан будэтыны тыршемзэ ёрос кивалтӥсьёс синйылтӥзы. 1999-тӥ арын, дас кык адями пӧлысь бырйыса, Михаил Николаевез интернатлы директоре ӵектӥзы. Удмуртиысь Калыклы улон-вылонын юрттэт сётонъя министерство сое та уже юнматӥз.

Шуг-секытъёс сярысь юамелы Михаил Сергеевич шуак мар вераны ӟудӥз кадь. Сыӵе дыре ӵемысь шуо, вылӥысь ӧжыт юрттэт вуэ шуыса. Таяз учыре сыӵе ӝожтӥськон ӧй вал. Озьыен, ваньмыз умой радъяськемын. Дырын-дырын бомжъёс выллем муртъёс, пе, сюро, курытсэ мултэс юыны яратӥсьёс, соин валче кынмыса сӧсырмемъёс но луо – сыӵеосын, пе, ужаны капчи ӧвӧл. Та юртын улӥсьёсты пытсэтын кадь уг возё, соиз шонер потэ мыным.

Татысь калыкен матэгес тодматскыны шуыса, кыре потӥ. Таӵе чебер нуналэ ваньзы кадь соос татын, валесысь султылыны быгатӥсьтэмъёссэ вератэк шат… Кин ке пуке, кин ке лёгаське, коляскаосын пукисьёс-ветлӥсьёс но пумиськыло.

Федосия Егоровна Киршина. Та кышномуртлы 80 арес. Алнаш ёросысь Куашкам гуртысь, сое мон пинал дырысеныз тодӥсько. Эшъёсыныз ӵош кырӟаны-вераны яратэ вал. Улонэз малпамезъя ӧзгес радъяськы. Ож йылпумъяськем бере но ай егитъёсыз нюлэс кораны кужмысь лэзьязы. Тодэмея со вакытэ Педча апай нырысьсэ нылпи ваёно луиз. Берлогес гуртын эшшо одӥг пи вордӥз на.

- Картэ кулӥз но, татчы куриськоно луи. Нырысетӥез пие бырыны шедиз, кыкетӥез семьяеныз Алнашын улэ вал но Шудьяе кыстӥськиз – пудо вордэмзы потӥз. Дорам ветлыло. Таӵе арлыдын пиналъёс вӧзын улыны кепыр но ваёно ини. Татын милемыз умой сюдо, чаклало, утялто. Пенсимылэсь оглюкетсэ киямы сёто. Со ваньмызлы самой кулэезлы тырме, – шуэ кышномурт.

Александра Ивановна Захарова. 1924-тӥ арын вордскемын, арлыдызъя сокем пересь уг адӟиськы на, йырыз но умой ужа. Выжыезъя Ӟунняшурысь вылэм, Сьӧд Ошмесын но улэм,  Алнашын но ужам. Пиез, пе, вань, Алнашын улэ. Тазалыкез уродмемен, татчы куриськем, пырак больницаысь вайизы, пе.

- Утялто туж умой, кӧкы гинэ ошылоно на, сыӵе кузямы мыно, – мылкыдзэ усьтэ Шура апай.

Александра Михайловна Злобина.Песянайлы 80 арес, Вавож ёросысь Ӟамбай гуртын вордӥськемын.

- Нырысетӥ картэлэсь куинь нылпие вал, пӧртэм муген но пӧртэм сямен ваньзы улонысь кошкизы, – шуэ Саняпай. – Собере эшшо кык картэ вал на. 2006-тӥ арын коркамы ӝуамен, Вавожын олокыӵе алама адямиос пӧлын но улоно луим. Со дырысен сюлэмы туж висьыны кутскиз, картэлэн валесысь султылэмез ӧз лу ни. Ачим ик та юртэ куриськи. Татчы вуэмелы шумпотӥсько, туж умой возё, комнатаосмес нуналлы кык пол мисько. Пересьмыса кӧё-вӧё сием уг поты ни, тӥни сое но чакласа пӧрало. Директормы сюлмаське калык понна, ай гуртамы машинаен нуллыны но ӵектэ вал. Али бензин ведь дуно… Татын инкуазь туж шулдыр. Улон юрт котырамы чебересь сяськаос мерттэмын.

Александр Сергеевич Векшин. Таизлы 46 арес. Вордӥськемын Алнаш ёросысь Чиягуртын (быремын ни), Юмьяшур палан. Дышетскиз, армие ветлӥз, трактористын ужаз. Секыт висьыны кутскыса, Алнашын но, Ижевскын но больницаосын кылльылӥз, Москваысь Бурденко нимо институтэ лэзьязы. Отын операция лэсьтыны кулэ вылэм.

- Кытысь сомында уксё шедьтысалыд, – шуэ Саша. 1996-тӥ арысен со интернатын улэ ини. – Анай-атае вазь кулӥзы. Семьямы бадӟым вал, агайёсы, апайёсы, сузэре вань – ваньзы пӧртэм гуртъёсын уло. Кудзы-огзы доры ветлыны но кылдэ, но ужаме уг лу бере, озьы вуылыкум, соку ик сюлэмы шуг луыны кутске…

Сашалэн мӧзмылэс мылкыдыз шӧдӥськиз. Воксё пересь арлыдазы вуэмъёслы берпум аръёссэс тазьы шыпытак, мултэс сюлмаськонъёстэк ортчытыны каньылгес, дыр. Нош тужгес улоно вакытазы татчы сюремъёслы шугъяськытӥсь малпанъёс ӵем лыктыло, луоз.

- Тани таиз, вуэ пырыкуз, сюрлызэ сӧсыртэм, – вера Саша, артэ коляскаын пукись егит воргоронэз возьматыса. – Нош улыны кулэ.

Ас поннам малпасько, таӵе егит муртъёслы асьсэлы мылкыдзыя тупась уж радъясалзы ке, оло, азьланяз улонзы капчиенгес ортчысал.

- Интернатын улыны кутскеме дырысен татын тросэз умой пала воштӥськиз, – шуэ Саша. – Тани татӥ огшоры гинэ лёго-гопо му вал… Али улон юрт котырез чылкыт, чебер возё, сяськаос мертто. Кык гараж лэсьтэмын, соос пӧлысь одӥгез шуныт каремын. Мукет выльдӥськонъёс но вань. Мон лыктыку, татын ог 35 адями вал, табере 60 мурт улэ ини.

Ӝамдэлы пырисько улон интызэс учкыны. Пичигес залын бадӟым  телевизор ужа. Эшшо одӥг коляскаын пукись пиосмурт огназ кыӵе ке передачаез учке. Шундыё, шуныт куазен ваньмыз, кинлэн ветлэмез луэ, кыре потэмын. Вӧлак усьтэм ӧсъёс пыр котькуд висъетысь кык кровать, огшорыгес гинэ тумбочка син шоры йӧтэ. Чылкак асьсэды эскерыны быгатымтэос гинэ кык комнатаосын уноенгес огазеямын.

Валамон ини. Татчы вуэмъёс – пересь арлыдо, висись но сӧсыр муртъёс. Соос понна котькудӥз татын тыршись мурт аслэсьтыз, оло, сокем ик син шоры йӧтӥсьтэм, но нуналмысь быдэсъяно туж кулэ ужзэ лэсьтэ.

Яков Майков.

Алнаш-Одесса.

 Сентябрь пумын Кун Кенешысь депутатъёс эскерозы Удмуртиын улӥсьёслы дунтэк музъем висъян сярысь законлы проектэз. Сое ӟечен лыдъяз ни республикаысьтымы министръёслэн кабинетсы.

Табере музъем сётозы трос нылпиё семьяослы но. Со понна адямиослы гожтоно луоз заявление – таосты черодэ пуктозы. Музъем кесэг понна таӵе гражданъёс торгъёсын нюръяськоно уз луэ.

Бакча возён понна дунтэк висъяськоз 6 сотка музъем. Корка пуктыны но хозяйство радъясьёслы чакламын мукет быдӟалаен кесэг. Городъёсын но город выллем лыдъяськись посёлокъёсын – 15 сотка, гуртъёсын – 25 сотка, ивортӥз ваньбур кусыпъёсъя министрлэн воштӥсез Владимир Наумов.

Али Удмуртиын трос нылпиё семьяос 12 сюрс лыдъясько. Таӵе категорие пыро куинь но солэсь ятыр пинал будэтӥсьёс. Дунтэк музъем чакламын со семьялы, кытын бадӟымез пиналзылы 18 арес тырмемын ӧвӧл на.

Корка пуктон дыръя музъем кесэгез висъялозы арендае. Лэсьтӥськон йылпумъяськем но ваньбурез регистрация пыр ортчытэм бере та музъем адямиослы дунтэк сётӥськоз ни.

Законэ воштонъёс пыртыку, чиновникъёс чаклазы мукетсэ но. Шал-шал бусые музъем сётъяно ӧвӧл. Адямиос медаз курадӟе вутэк, тылтэк, сюрестэк. Соин инфраструктураез радъянлы кулэ луоз утчаны 2 миллиард 300 миллион манет. Быгатозы-а кивалтӥсьёс вырӟытыны тазэ ужпумез?

Елена Скворцова.