Галина Кулакова кылем даурысь 60-тӥ-80-тӥ аръёсы дуннеысь тужгес кужмоез куасэн бызьылӥсь вал.

Арнянуналэ аслэсьтыз 70 арес тырмонзэ пусъёз шаерысьтымы одӥгез тодмо адями, спортысь легенда Галина Кулакова. Улосчимес ӟечкыланы вуозы Россилэн пӧртэм сэрегъёсысьтыз дано спортсменъёс, кивалтӥсьёс. Вазь ӵукнаысен Галина Алексеевнаез резиденциын пумиталоз Удмуртилэн Президентэз Александр Волков.

Галина Кулакова сярысь трос гожъямын. Шаерысьтымы куасэн бызьылӥсь ньыль пол Олимпиадае пыриськемын, 4 зарни, 2 азвесь, 2 туй медальёс басьтэмын. Дуннеын, Европаын но СССР-ын ортчем ӵошатсконъёсын вормонъёсыз вераса быдтонтэм. Спортын басьтэм азинсконъёсыз понна пусъемын Ленин но «Знак Почёта» орденъёсын, «Удмурт Республикаысь культура удысысь дано ужась» нимын. Улон сюресэз сярысь гожтӥз «Кому покоряется лыжня» книга.

Галина Кулакова кылем даурысь 60-тӥ-80-тћ аръёсы дуннеысь тужгес кужмоез куасэн бызьылӥсь вал. Вордскемын но будэмын со Вотка ёросысь Степаново гуртын. Пичи мугоро нылашез нырысь ик синйылтэм Воткаысь тренер Пётр Наймушин. Егит муртлэсь кужымзэ, юн сямзэ шӧдэм, техниказэ волятыны ӧдъям. Со дырысен гуртысь нылашлэн чылкак мукет улонэз кутскиз. Куасэн бызьылон сяменыз быдэс дуннеен тодматскиз.

Бадӟым спортлэсь Галина Кулакова ньыльдон аресказ мозмытскиз. 15 ар ӵоже бадӟым ӵошатсконъёсын бызьылытозяз, Удмуртиысь спортсмен троссэ чидаз: 1968-тӥ арын нырысьсэ Олимпиадае пыриськыса ик, зарни медаль дорозь сузьтӥське ни вал, финиш азьын усиз но вормисьлы 3 секунд келяз. Удмуртиысь нылаш соку нырысьсэ шара бӧрдӥз. 1972-тӥ арын секыт висён пыд вылысьтыз погыртӥз. Эмъясьёс куасъёссэ вунэтыны косӥзы вал, ваменэс сямо спортсмен аслэсьтыз кариз. Собере мукет йыр висён шедиз, допинген герӟаськем ӵашетонъёс котыраз ӝутскизы. Силё-сюрно журналистъёс но ялан пыд улын костаськизы.

Соин но, дыр, трос калык пӧлын улыны, вераськыны Галина Алексеевна чик но дышемын ӧвӧл. Бадӟым спортысь кошкемез бере дано спортсменмы улӥз городын. Нош одӥг нуналэ, 3 висъетэн квартиразэ шаерысьтымы егитгес спортсменкалы Тамара Тихоновалы кельтыса, городлэсь палэнэ пегӟоно кариськиз. Дэри ёросысь Италмас каргуртэ улыны интыяськиз шаерысьтымы мукет спортсменэн Нина Парамоноваен ӵош. Выль интылы чемпионъёс ӝог дышизы. Асьсэ люкам коньдонэнызы музъем басьтӥзы, юртъер пуктӥзы, пудо живот будэтыны кутскизы.

- Пичи дыръям ик, гурт ужлы дышыса, будӥ, – шуэ Галина Алексеевна. – Семьяямы укмыс нылпи вал. Атаймы оже быриз, паймисько анаймылэн чиданлыкезлы, ваньмес пыд выламы султытыны быгатӥз. Витетӥ классын дышетскыкумы, семьямылы юрт пуктӥмы, вань гуртоос шорамы паймыса учкизы. Жаль, та вакытэ милям юртмы быдэс гуртэн ӵош Вотка водохранилище пыдсын сисьме. Школаез йылпумъяса, дышетскон сярысь ӧй но малпаськылы, анае сьӧры фермае вамыштӥ. Нырысь ик кунян сюдӥ, отӥяз скал кыскисьын ужай.

Пудоез яратэмез Галина Кулаковалэн, Италмасэ вуыса но, юн шӧдӥськиз на. Нырысь аръёсаз дано спортсменъёс, чипы-курег сяна, кунян быдэтӥзы. Турын но турназы, асьсэос ик гидазы но ворттӥзы, толлы будэтэм пудозэс сӥльлы вандылӥзы. Сӥльзы укыр трос люкаськемысь, спортсменъёс сю­ро таза пудо вордонлэсь куштӥськыны малпазы. Та вакытэ соослэн дасо мында курегъёссы но бадӟым бакчазы.

- Тужгес но бадӟым шумпотонмы – парник, – вераськонамы итӥське Нина Парамонова. – Арлы быдэ 29-тӥ апреле Галина Алексеевналы вордскем нуналэзлы шуыса кузьмалляй бакчаямы будэтэм кияр. Таӵе сямылэсь туэ но ӧй куштӥськы. Юбилейзэ шӧдыса, лэся, мерттэм емыше вазьгес вуыны ӧдъяз вал, но… Оло син усиз, оло мудӥськись шыръёс озьы йыртэмазы, кылем арня пумын вань будосъёсме кин ке выжытӥз ик вандылэм. Коть йыркуръяськы, коть бӧрд табере.

Кунооссэс пумитаны спортсменъёс вазь тулыс ик дасяськыны кутскизы. Юртъер котырысьтызы лымызэс пазязы, утялтӥськизы-сузяськизы.

- Музей кылдытон сярысь малпанъёсме быдэстыны быгатэмысьтым шумпотӥсько, – шуэ Галина Алексеевна. – Уно сю медальёсты, кубокъёсты, вымпелъёсты шыкысын токма возьытозь, калык азе поттыса, умой каримы. Куасъёсы но татын ик. Бен, нырысетӥ куз куасме гурын сутӥ, вышкылэсь лэсьтэмын вал соос, мукетъёссэ пӧртэм городъёсысь музейёсы люкылӥ, берлоосыз гинэ татын. Ваньмыз умой радъямын кадь, одӥгзэ жалясько: музеймес улон юртамы интыямы. Куное ветлӥсьёслэн лыдзы укыр трос луоз ӧй кожа вал, куд-ог дыръя ас ужъёсмес но быдэстыса ум вуттӥське соосын сэрен.

Тросэз малпало, дано спортсменъёсты Совето Союзлэн вылӥ кивалтӥсьёсыз укыр нуныязы, узырмыны юрттӥзы, дыр, шуыса. Сыӵеосты Галина Алексеевна буйгатыны дыртэ, Л. Брежневен но, М. Горбачёвен но, Б. Ельцинэн но нимысьтыз пумиськылэмын ӧвӧл. Данзэ ачиз дуриз. 1984-тӥ арын Олимпийской комитетлэн президентэз Хуан Антонио Самаранч ке шат Галина Кулаковаез сӥлы кариз дуннеысь спортэз азинтыны юрттэмез понна Олимпиадалэн азвесь орденэныз. Соиз валамон: Галина Кулаковалэсь куасэн бызьылыса ортчем сюрессэ чотад ке, паймод: Музъем котыртӥ куинь пол котырскымон 120 сюрс иськем люкаське.

Асьме шаерын спортэн герӟаськем ужрадъёслэн лыдзы арлы быдэ сюрслэсь ятыр ортче. Галина Кулаковалы тужгес матын луо Гурт шудонъёс. Синмаськыса учке туала егитъёс шоры, соослэн быгатонлыкъёссэс будэтыны луонлыкъёссы вань. Тужгес но данъяське шаерысьтымы куасэн бызьылӥсьёсын, Россилэн сборнояз шедем воргоронъёсын. Уггес вала кузь коньдон сьӧры уйиськисьёсты. Ас вакытаз Галина Кулаковаез улыны ӧтьылӥзы Москвае. Но вордскем палъёссэ номырин ӧз вошты, ваньмызлы серекъяса шуылӥз: мыным лымы кулэ. Озьы пичи Удмуртимес кунгож сьӧрын улӥсьёс но ӟеч тодо Чайковскийлэн, Калашниковлэн но Кулаковалэн нимъёссыя.

Валентина Емельянова.

Кужымзэс эскеро следж-хоккеен шудӥсьёс.

20 ар талэсь азьло Удмуртиын кылдытэмын ампутантъёслэн футболъя клубзы. Шаерысьтымы инвалидъёсты люкан борды соку басьтӥськиз футболъя калыккуспо классъем спортъя мастер Виктор Кузнецов.

Аръёс ортчыса, инвалид спортсменъёс азьлань вамыштӥзы. Туннэ нуналлы шаерысьтымы 2 сюрс 613 инвалид эшъяське спортэн. Кылем ар ӵоже 16 пол Россиысь, 6 пол дуннеысь ӵошатсконъёсы пыриськизы. Россилэн сборнояз 19 мурт кутэмын.

Футбол клубез кылдытыкуз, Виктор Кузнецов ӧз но малпаськылы Паралимпиадае пыриськон сярысь. Озьы ке но шаерысьтымы туп ӵыжасьёс дуннелэн чемпионатозяз вуизы. Со дырысен трос аръёс ортчизы, табере шаерысьтымы инвалид спортсменъёс туп ӵыжам сяна, куасэн бызьыло, биатлонъя ӵошатско, великен ворттыло. Спортсменъёслы кыкетӥ оскон пыӵатӥз, шуыны луоз, Виктор Кузнецов. Та удысэз ӝутыны юрттэмез понна кемалась ик ӧвӧл сое бырйизы шаерысьтымы Параспортъя федерациен кивалтӥсе.

Та федерацие вазиськисьёсты Виктор Николаевич аслэсьтыз пиналъёссэ кадь пумита. Туннэ кадь ик тодаз возе Алнаш ёросысь Блатгуртысь Владислав Лекомцевлэсь анаеныз дораз лыктэмзэ. Гуртысь егит пияш синъёссэ ик ӝутыны дӥсьтымтэ соку. Табере со куасэн бызьылонъя но биатлонъя ӵошатсконъёсы пыриське, быдэс дуннеез котыръя. Мукет инвалидъёс но солэсь адӟем мед карысалзы.

Виктор Николаевич шумпотэ, ог-огзылэсь адӟем карыса, гуртъёсысь мукет инвалидъёс но мугорзэс кыдатыны кутско шуыса. Тужгес кужмоосызлы удалтэ Россилэн чемпионатаз пыриськыны. Кемалась ик ӧвӧл хоккеен шудӥсь инвалидъёс Россиысь азвесь медален бертӥзы. Бадӟым ӵошатсконысь вуэмзы бере трос шутэтскыны ӧз кылды, нош ик сюрес вылэ дасясько. Висёнъёссы вылэ ӝожтӥськыны дырзы уг кыльы ни. Араз 9 толэзь ӵоже мугорзэс кыдато. Та спортсменъёс азе туэ бадӟым ужпум пуктэмын. Та дырозь Россиысь инвалид спортсменъёс 5 амалъя гинэ ӵошатсконъёсы пыриськылӥзы, нош 2014-тӥ арын Сочиын ортчоно Паралимпиадалы бадӟымгес команда люканы дасясько. Следж-хоккеен шудӥсьёс но кужымзэс эскерыны, медаль понна нюръяськыны кулэ.

Россиысь следж-хоккеен шудӥсьёслэн сборноязы Удмуртиысь 7 мурт кутэмын: Можга ёросысь Евгений Петров, Иван Кузнецов но Руслан Тучин, Дэри ёросысь Андрей Двинянинов но Алексей Лысов, Сюмсиысь Максим Кузьминых, Кизнерысь Сергей Пудов. Соос шоры учкыса, гуртъёсысь мукет инвалидъёс но интыысьтызы вырӟыны кутскизы.

- Паралимпиадаозь дасяськыны дыр но, луонлык но тырмыт, – веранзэ азьланьтэ Виктор Кузнецов. – Умоезлы осконзэс, чиданлыксэс гинэ медаз ыштэ. Ярано коть, милесьтым сюлмаськонъёсмес шаерысьтымы кивалтӥсьёс кыло. Та вакытэ вань мылкыд карисьёс хоккеен шудыны быгато, инвентарьмы тырмыт. Азьвыл аръёсы шуг-секытъёс кылдылӥзы йӧ шедьтон ласянь. Кылем арысен югдурмы тупатскиз, нуналлы быдэ 3 час «Чекерил» спорткомплексын шудӥськом. Выль пуктӥськись липетэн катокез лэсьтӥсьёс но инвалидъёслэсь куронзэс лыдэ басьтӥзы.

- Та командаын кыкетӥ арзэ гинэ шудӥсько, – шуэ Андрей Двинянинов, – эшъёсы туж кельшо. Татчы вуыса, выльысь вордскем кадь потӥ. Нырысь нуналъёсаз трос усьылӥ ке но, татчы вуэмме ӧй жаля. Россиысь чемпионатын сяна, Европаысь инвалид спортсменъёс пӧлын но кужыммес эскеримы ни. Кунгож сьӧрысь ӵошатсконъёсын вормон понна эшшо золгес дасяськоно. Азьланяз но кун ласянь юрттӥсьёс луизы ке, ваньмыз вӧй вылтӥ кадь ортчыны кулэ.

Хоккеен зэмос воргоронъёс шудо шуо ке но, Виктор Николаевичлэн сюлмыз биниськемын футбол борды. Та дырозь футболэн шудӥсь инвалидъёс понна Паралимпиадае сюрес пытсамын вал. Калыккуспо паралимпийской комитет кенешемъя кылем ар пумын таӵе пыкъетэз басьтӥзы. 2016-тӥ арын Рио-де-Жанейроын ортчоно Паралимпиадае пыриськозы дуннеысь футболэн шудӥсьёс. В. Кузнецов оске, Удмуртиысь инвалидъёс отчы одно ик шедёзы шуыса.

Валентина Емельянова.

А. Волков дорын: Елизавета Туктамышева анаеныз но тренереныз.

Кылем арня пумын Александр Волков пумиськылžз Елизавета Туктамышеваен – Австриысь Инсбрукын ортчем егитъёслэн нырысетӥ тол Олимпиадаязы зарни медаль басьтэм фигуристкаен.

Та пумиськонэ Лиза лыктэм анаеныз Елена Сергеевнаен, тренереныз Светлана Веретенниковаен. Конькиен нискылась спортсменка Глазовын вордскемын, но берло дыре отчы туж шер вуылэ. Та вакытэ быдэс семьяенызы Санкт-Петербургын уло. Нылаш мугорзэ кыдатэ Россиысь одӥгез кужмоез тренер Алексей Мишин дорын. Коньки вылын нырысетӥ вамышъёссэ лэсьтыны дышетскемын Глазовысь йӧ дворецын.

- Нылмы пичи дыръяз ик туж шаплы будӥз, 4 аресказ 7 пол турникын ӝуткаськыны быгатэ вал, – шуэ Елена Сергеевна. – Лизаез кытчы карыны ик паймылӥмы. Мынам потэ вал эктонъя кружоке гожтэме, но 7 арес тырмытэк, отчы ӧз кутэ. Соку атаез сое спортъя секцие гожтӥз. Талы мон туж пумит вал, тодӥсько: спортын даур вакчи. Ярам, пумиськыны кылдӥз усто тренерен – Светлана Михайловнаен. Озьы 4 но ӝыны аресказ нырысьсэ коньки вылэ султӥз.

Та вакытэ Глазовын 3 тренер ужа, 150 пала нылпиос коньки вылын нискыланы дышетско. Соос пӧлын ик пичи Лиза но кыдаз.

- Эшъёсызлэсь ӧз висъяськылы ке но, нискыланы кутскемез бере синйылтӥ: коньки вылын сылыны быгатонлыкъёсыз Инмарен сётэмын, сыӵе нылпиос туж шер пумиськыло, – вера тренер Светлана Веретенникова. Ог-огмес туж ӝог валамы, котькуд тренировкае капчи мылкыдын ветлӥмы. 9 аресаз Россиын но сое синйылтӥзы, вылӥегес ӝутскон понна Россиысь дано тренер Алексей Мишин доры, юрттэт курыса, вазиськимы. Кӧня ке ар ӵоже толэзьлы быдэ командировкаосы Санкт-Петербурге ветлылӥмы. Трос дырмы сюрес вылэ бырылӥз, йӧнала дышетскыса но, мугормес кыдатыса но ӧм вуттылэ. Соку ини ваньмы Санкт-Петербурге выжоно кариськимы.

2014-тӥ арын Сочиын ортчоно Олимпиадае Удмуртиысь фигуристкалэн шедёнэзлы быдэс Россия оске. Та нуналъёсы нылаш сюлмаськыса учке дуннелэсь чемпионатсэ. Жаляса верано, сыӵе ӵошатсконъёсы 16 аресысен гинэ куто. Нылашлэн быгатонлыкъёсызлы оске Удмуртилэн Президентэз Александр Волков но.

- Берло дыре Россиысь спортсменъёс туж бездыт адско Олимпиадаосын, – шуиз Александр Волков. – Ялан маке валэктыны выро: куассы уг нуы, сюрес гылыт, йӧ укыр чурыт я кунгож сьӧрысь тренер уг кельшы. Азьвыл аръёсы трос ӧз ӝожтӥськылэ, котькуд стартын медаль басьтылӥзы. Тодӥсько, Лиза, эшъёсыдлэсь вазьгес кыданы кылдӥз, оскисько, бадӟым спортсменъёс пӧлын но вормонъёс басьтод шуыса.

10-тӥ классын дышетскись нылаш парта сьӧрын пукыса ик уг вутты. Лумбытъёсын йӧ вылын нискыла ке но, дышетсконаз «быжъёсыз» ӧвӧл. Анаез но юрттэ, со дышетӥсь, алгебра но геометрия предметъёсыз нуэ. Бадӟым будыса, Лиза луыны малпа спортъя психолог.

- Эшъёсы но мылкыдме ӝуто, – шуэ Елизавета Туктамышева. – Бертонме тодыса, быдэс классэн вокзалэ лыктӥллям. Ваньмыныз ӟыгыръяськи, жаляса верано, вордскем палъёсам арнялы сяна бертылыны уг быгатӥськы. Нош ик йӧ вылэ потоно, выль сезонлы дасяськоно.

Валентина Емельянова.

Берлозэ ортчем дуннелэн чемпионатаз Россиысь биатлонистъёс туж бездыт адскизы. Кызьы шуиз Александр Тихонов, та вакытэ Россиысь сборнойын уг тырмо нимысьтыз дышетскем тренеръёс. Техникая кун университетын усьтэмын мугорез кыдатон культурая но спортъя институт, кылем арняе солы сётӥзы Александр Тихоновлэсь нимзэ. Дано спортсмен оскытӥз: кулэ дыръяз студентъёс понна мастер-классъёс ортчытоз, тренеръёслы визь-кенеш сётоз.

Александр Иванович синмаське Ижын поттэм винтовкаослы. Нырысь ик, асьме дорын лэсьтэмъёсыз, кунгож сьӧрысьёсыныз ӵошатыса, кык поллы дунтэмгес луо. Россиысь Биатлонистъёслэн союзэнызы огкыл гожтэмын бере, Ижысь винтовкаосыз спортсменъёс дорозь вуттыны косэмын, тренировкаоссы дыръя шекъёсты шараязы ке, пыӵал тӥрлык лэсьтӥсьёс выльдыны мед быгатозы.

Ижын поттэм туала винтовкаос капчиятэмын, прицелэз выльдэмын. Та пыӵалъёслэсь ӟеч­лыксэс Александр Тихонов эскериз. Асьме спортсменъёс Ижысь винтовкаосын ик ыбылӥськыны кулэ, пе, соку Россиысь спортсменъёсмы эшшо тросгес медальёс басьтыны быгатозы. Туэ чакламын 1 сюрс винтовкаосты спортсменъёс доры вуттыны. Верамын – лэсьтэмын, та нуналъёсы «Ижмаш» заводын поттэм БИ-7-4 винтовкаез эскериз шаерысьтымы тужгес кужмоез егит спортсменка Ульяна Кайшева.

Валентина Емельянова.

Куас сюрес вылын.

Шаркан ёросысь кивалтӥсьёс бадӟым саклык висъяло егитъёслы. Школаын дышетскисьёс понна тол но гужем шудонъёс ортчыто. Кемалась ик ӧвӧл спортэз гажась пиналъёс понна Мувыр школаын ёрос ӵошатcконъёс ортчизы.

Витетӥ тол шудонэ 17 команда, 700 пала спортсменъёс люкаськизы. Гурт калык но та ужрадлэсь палэнэ ӧз кыльы, пиналъёс понна «висьыны» ветлӥзы. Шудонъёслэн утисьсы – «Сэзёк» – ваньмызлы капчи мылкыд кузьмаз.

Ӵошатсконъёслэн ны­рысетӥ нуналаз пиналъёс куасэн бызьылӥзы, полиатлонъя вожвылъяськонэ пыриськизы, теннисэн но шахматэн шудӥзы, ыбылӥськизы. Џошатсконэ люкаськемъёс шуныт интыын улӥзы, ческыт сиськизы.

Šоген вормисьёслэн ни­мъёссы шараяськизы. Ны­рысетӥ подгруппаын котькинлэсь трос очко люказы Шаркан-1 но Шаркан-2 командаос, куинетӥ интые потӥзы Быгиысь пиналъёс. Кыкетӥ подгруппаын висъяськизы Кыква, Мувыр но Карсашур школаысь командаос.

Тол шудонъёс йылпумъяськизы, табере пиналъёс гужем ӵошатсконъёслы дасясько. Куноосты пумитаны шуд усиз Зюзя школалы, нош вуоноосыз тол шудонъёс Ляльшурын ортчозы.

- Нырысетӥ нылпи тол фестиваль Шаркан школаын 5 ар талэсь азьло радъямын вал, – шуиз Шаркан ёросысь дышетонъя управлениен кивалтӥсь Татьяна Князева. – Таӵе шудонъёс котыр ласянь азинскыны юртто, соослы луыса школаосын пичильтык ке но лэсьтӥськон-тупатъян ужъёс ортчытыны тыршиськомы, спорт площадкаосты выльдӥськомы. Ушъяськыны быгатӥсько: таӵе нылпи фестивальёс шаерамы Шаркан ёросын гинэ ортчытӥсько.

Шарканъёс ӟеч тодо: таӵе ужрадъёс тросгес калыкез спортэ кыскыны юртто. Шудонъёс ортчем бере школа площадкаосын гуртоос но мугорзэс кыдатыны кутско.

Паша Вахрушев.

Залэ люкаськемъёс шоры учкыса, уд но малпа, соос кужмо спортсменъёс шуыса. Огзылэсь шоголь мукетсы дӥсяськемын, нылъёс ӝужыт беро пыдкукъёсын. Чеберайёс но тӥни. 15-тӥзэ ортчись балэ люкаськемын устоосыз пӧлысь устоосыз спортсменъёс, тренеръёс, дышетӥсьёс. Тужгес шудооссэ данъян грамотаосын но Ника статуэткаосын пусйизы.

Туннэ нуналлы шаерамы кылдытэмын но ужа спортъя 67 федерация. Тросэз спортсменъёсмы Россилэсь данзэ кунгож сьӧрын утё, Олимпиадаосын вормонъёс басьто. Берло аръёсы кун ласянь но бадӟым саклык висъяське, асьме улосын гинэ арлы быдэ тол но гужем шудонъёс ортчо, бадӟым стадионъёс но куас базаос пуктӥсько. Со шӧдӥське спортсменъёслэн вормонъёссы вылын но. Егитъёслэн нырысетӥ тол Олимпиадазы дыръя Россиысь команда 5 зарни медаль басьтӥз, со пӧлысь кыкез – Удмуртиысь пиналъёслэн.

- Асьме шаерын тол ӝыны ар пала кыстӥське, нош куасэн нискыласьёслэн лыдзы 25 процент мында гинэ люкаське, – пусйиз Президент Александр Волков. – Тросгес калыкез куас вылэ поттоно. Спортсменъёслэсь вормонъёссэс но дунъяны тыршиськом. Кылем ар ӵоже 13 муртлы улон инты висъямы.

Кивалтӥсьёс данъязы тужгес шудо спортсменъёсты. Нырысь ик сцена вылэ тубизы «Преодоление» номинациын вормисе потэмъёс: следж хоккеен шудонъя «Удмуртия» команда, Фанис Муллахметов (пауэрлифтинг), Арслан Гильмутдинов но Ольга Мурашова (велоспорт).

- Таӵе сӥлы каремзы понна туж шумпотӥмы, – шуиз следж хоккеен шудӥсь Юрий Широбоков. – Пӧлысьтымы тросэз – гуртъёсысь. Кылем арын ми Россиысь ӵошатсконысь азвесь медален бертӥмы. Та нуналъёсы Мензелинске потыны дасяськиськомы. Шудтэм учыре шедьыса но, азьланезлы осконмес ум ыштӥське.

Валентина Емельянова.

Эгра ёросысь Чураковъёслэн Андрей пизы - тужгес покчиез спортсмен.

Кылем арня пумын Дэбес черкогуртын инмысь кизилиос но яркытгес пиштӥзы кадь. Отчы люкаськылӥзы ёросъёсысь спортэн эшъяськисьёс, шаерысьтымы нимо-дано спортсменъёс, кивалтӥсьёс. Дэбес музъем вылын ньыль нунал ӵоже удмурт Олимпиадалэн тылыз ӝуаз.

Азьлане ӧте югыт сюрес

Пиналъёс пото югдытӥськись сюрес вылэ.

Кык ар но ӧз ортчы, гуртысь спортсменъёс нош ик Дэбес черкогуртэ люкаськизы. Шумпотоно, та шудонъёс туэ быдэ вуонзэс пусйизы. 18 ар ӵоже ини шаерысьтымы пӧртэм ёросъёсын Гурт тол шудонъёс ортчытыло. Созэ но пусъёно: ӵапак 18 арессэс тырмытэм егитъёс та ужрадэ пыриськыны быгато. Куасэн бызьылэм сяна, спортсменъёс мертазы суй кужымзэс, эскеризы синзылэсь лэчытсэ, шудӥзы баскетболэн, хоккеен, шашкиен но шахматэн. Џошатсконэ туэ нырысьсэ пыриськизы нылкышно баскетболистъёс.

23-тӥ февраль – Атыкай музъеммес утисьёслэн нуналзы, озьы ке но воргоронъёслы та нуналэ буйгатскыны дыр ӧз шедьы. Спортсменъёслы сяна, кужымзэс мертано луиз кивалтон удысын ужасьёслы но. Кужмо нюръяськон пуромиз Правительстволэн но ёрос йыръёслэн командаоссы куспын волейболъя ӵошатсконын. Азьвыл аръёсы Правительстволэн командаез ёрос йыръёсты капчиен вормылӥз ке, таяз учыре нокинлэн сётскемез ӧз поты. Куинь период бере ёрос йыръёс азьпалан вамышъязы, отӥяз соослы ӧз удалты ни. Кивалтон удысын ужасьёс дартсэн шудӥзы, ыбылӥськизы на.

Дэбесъёс понна та нунал кемалы вунонтэм кылёз: ӝытпал куас комплекс усьтӥзы. Черкогуртысь Карасмеш гурезь котырын куас база вазенгес кылдытэмын вал. Татчы люкаськыло Россиысь гурезё интыостӥ бызьылыны яратӥсьёс но. Шаермылэн палэнысьтыз вуэм куноосты пумитаны табере дэбесъёслы возьыт уз луы ни. Югдытӥськись сюресъёс комплекслы кыкетӥ шокчон кузьмазы, шуыны луоз. Кызьы пусйиз та комплексысь тренер Николай Хохряков, туннэ нуналлы куасэн бызьылонъя секцие 60 пала нылпиос ветло. Тужгес кужмоосыз шаерысьтымы пиналъёслэн сборноязы кутэмын.

Отӥяз ваньмыз вамыштӥзы школа азбаре. Дэбес черкогуртын улӥсьёс табере конькиен нискыланы быгато.

- «Юбилейной» йӧ коробкады быдэс ар ӵоже ужаны кулэ, – шуиз Удмуртилэн Президентэз Александр Волков. – Тол шудонъёсты ортчытӥсь ёросъёслы берло дас арзэ ни хоккеен шудон инты лэсьтӥськомы. Малпасько, мукет ёросъёсын сямен ик, дэбесъёс но та интылы синмаськозы. Толалтэзэ коньки вылын вожвылъяськонъёс ортчытъялоды, гужемзэ волейболэн, бадминтонэн но бадӟым теннисэн шудонъёс радъялоды, огкутскемен куинь-ньыль кечез кутыны быгатоды.

Кырӟась спортсменка

Дэбесысь Нина Данилова бызьылэ но, кырӟа-вера но.

18 часын «Юбилейной» стадион котырын улмолы усён интыез ӧй вал. Кезьыт куазь нырез чепылляны выриз ке но, люкаськем калыкез со ӧз кышкаты. 18-тӥ тол шудонъёсты усьтыса, вераськиз Дэбес ёрослэн йырыз Александр Глухов:

- Шумпотӥсько, 2 ар куспын дӥнямы 2 бадӟым ужрад ортчытыны оскемзылы, нош сыӵе луонлык сётӥське гурт удысын азинсконъёс басьтэм ёросъёслы гинэ. Та вакытэ пудо утисьёсмы котькуд скаллэсь 5 сюрс 73 килограмм йӧл люкало. 2000-тӥ арен ӵошатоно ке, лыдпусъёс кык поллы уноямын. Дэбес пыре шаерысьтымы 8 азьветлӥсь ёросъёс пӧлы. Котькинлы адӟем карымон тыршо «Мир», «Дружба», Калинин нимо но «Лесагурт» хозяйствоосын.

- Тросаз улосъёсын гурт шудонъёссы ньӧмыз понна ортчо, нош асьмелэн сяме пыӵазы ни, – пусйиз Президент Александр Волков. Арлы быдэ выльдӥсько стадионъёс, куас базаос, нош Вавож ёросысь гурт удысын тыршисьёс понна бассейн пуктыны чакламын.

Вылӥ кивалтӥсьёс вераськем бере стадионын кизилиослэн парадзы кутскиз. Спортсменъёсты ӟечкылазы кырӟась-верась коллективъёс. Стадион тыр 340 мурт пазьгиськиз. Пӧлазы: Дэбесысь пиналъёс, «Байгурезь» но «Ӟардон» калык коллективъёс, «Радужка» ансамбль, Уйвай гуртысь егитъёслэн КПП+ группаысьтызы арганчиос Иван Котельников но Дмитрий Перевозчиков, Тыловай, Сюрногурт, Зар.-Медло, Пыктыдур гуртъёсысь шулдыртӥсьёс. Люкаськемъёслы капчи мылкыд кузьмаз Гурт тол шудонъёслэн утисьсы – Тиша балян. Сое быгатыса шудӥз Александра Берсенёва.

Спортсменъёс но шаерысьтымы вылӥ кивалтӥсьёс понна кемалы вунонтэм кылёз Дэбес ёросысь тужгес нимо-дано спортсменлэн Нина Даниловалэн сцена вылын кырӟамез, эшъёссэ ӟечкыламез. Нина Вениаминовналэн чебер куараезлы синмаськизы Александр Волков, Галина Кулакова но вань люкаськемъёс.

- Пичи дырысеным сцена вылын кырӟаны-вераны яратӥсько вал бере, туннэ но сцена вылэ потыны ӧй пумитъяськы, – шуиз Нина Данилова. – Вылаз ик буйгатӥзы, Валентина Пудоваен кырӟало шуыса. Калыке потон азьын кык часлэсь ятыр микрофон азьын куараме волятоно луиз. Дуннеысь ӵошатсконъёсын но сомында ӧй пӧсекъя.

Гурт шудонъёс азьын Нина Вениаминовна эшшо куалекъяз на, Валентина Пудова записе лыктыны быгатымтэ шуыса иворез кылэмез бере. Но куараез вылын со ӧз шӧдӥськы. Юн сямо спортсмен стадионэ люкаськемъёс азьын огназ но туж йӧно адскиз.

Ныр лыдэ, изьы палдэ…

Дэбесъёс дэриослы келязы 19:0 лыдын.

Дэбес администрациын ужасьёс аспӧртэмлыко кузьым дасяллям вордскем нуналзэс пусйись спортсменъёслы. Ваньзэсты данъян грамотаосын сӥлы каризы, нош тужгес но удалтӥз Вавож ёросысь Нюрдор-Котья гуртысь Бобровъёслы. 24-тӥ феврале Максим пизылы 14 арес тырмиз. Соин валче Дэбес ёрослэн йырыз Александр Глухов пияшлы чечыен тырмытэм бекче кузьмаз. Тросэз егитъёс, пе, компьютер сьӧрын пуко, шузимытӥсь суретъёсын эшъясько, нош спортэз яратӥсь семьяос мугорзэс кыдато, тазалыко улон понна нюръясько. Тӥни соослэсь ик адӟем мед карысалзы мукетъёсыз но.

Та ӵошатсконын нимысьтыз кузьымен пусйизы на тужгес егит спортсменъёсты – Алнаш ёросысь Сырьезь гуртысь 8 аресъем Виктория Чекинаез но Эгра ёросысь Герей гуртысь 7 аресъем Андрей Чураковез.

- Бадӟым ӵошатсконъёсы куинетӥ пиенымы пыриськиськомы ни, – шуиз Олег Чураков. – Туэ пичи но ӧм дасяське вал Гурт шудонъёслы. Ёросысь кужмоез семья мукет ӵошатсконэ кошкемен, милемлы Эгралэсь данзэ утёно луиз. Пимы куас вылын толэзь но уг ворттылы на, аслаз мылкыдыз вань бере, азьланяз, оло, бадӟым спортозь но будоз.

- Ой, тӥ тодэ вал, кыӵе ми бызьылӥськомы, – вераськонамы итžськиз Валентина Чуракова. – Тренировкаосы кырӟаса ветлӥськомы, нош Дэбесын бызьылыкумы, пимылэн ӝожтӥськыса катез быриз: кезьыт, тӧл пельтэ, куасэ оглань нуэ, ныры лыдэ, шапкае усе… Кузьым басьтэмез бере капчигес мылкыдын бызьылоз ни, дыр.

Одӥг бодыен – азьлань!

Гурт шудонъёс дыръя спортсменъёс рекордъёс пукто. Арысь аре бадӟымесь лыдпусъёс возьмато полиатлонистъёс. Тани Ува ёросысь 25 аресъем Антонида Ившина ки вылаз ӝуткаськиз 126 пол, нош Вавож ёросысь 47 аресъем Нина Суворова – 127 пол. Полиатлонист пиос но паймытъязы. Арысь аре бадӟымесь вормонъёс возьматэ Глаз ёросысь 68 аресъем Пётр Арафаилов. Турникын со 46 пол ӝуткаськиз, троссэ егит пиосты азьпалтӥз. Рекорд пуктӥз Эгра ёросысь Сергей Кожевников, со 68 пол ӝуткаськиз.

Куас сюресъёс вылын но аспӧртэмлыко нюръяськонъёс ортчизы. 5 иськеме бызьылонын одӥг кадь лыдпус возьматӥзы Можга ёросысь Анастасия Осипова но Шаркан ёросысь Алёна Перевозчикова. Нош 10 иськеме бызьылонын куинетӥ интыез басьтӥзы Эграысь Дмитрий Ходырев но Можгаысь Семён Иванов.

- Куас сюрес вылэ лымы букосъёс пуктэмен, сьӧлтаськыса уси но, бодые чигиз, – шуиз Алёна Перевозчикова. 100 метр пала одӥг бодыен бызи, ярано коть, сюрес кузя сылӥсьёс юрттӥзы. Алнашысь кышномурт вылэм, ӟеч лэсьтэмез понна конфет коробкаен ке но тау кароно.

Куасэн бызьылӥсьёс школа котырысь бусыын вожвылъяськизы. Учкисьёслы тунсыкогес мед луоз шуыса, спортсменъёс стадионэтӥ кык пол бызизы. Со понна нимысьтыз выж лэсьтэмын вал, пырак дуннеысь чемпионатъёсын выллем.

Ӵошатсконлэн берпуметӥ нуналаз эстафетаос вал. Ваньмыз вӧй вылтӥ кадь радъяське ни вал, но керетонъёс гомӟизы. Нырысетӥ этапын бызисьёс классика амалъя мыныны кулэ вал, нош куд-ог кескичъёсыз эркын амалэ выжылžллям. Кыл кутоно луиз сюрес вылын сылӥсь судьяослы. Озьы Ува ёросысь воргоронъёс та вожвылъяськонын ваньзэс азьпалтӥзы вал, но… Умойтэм быземзы понна соосты ӵошатсконысь палэнтӥзы.

Та нуналъёсы пӧсь йӧтӥз эмъясьёслы но. Куасэн бызьылӥсьёс чиньыоссэс кын­тылӥзы, залын шудӥсьёс сӥныръёссэс золъязы, нош одӥгез судья, хоккеистъёс шук­­киськемен, чиньы­зэ чиг­тӥз.

Кузьым – лымы сяська

Котькуд ёрос ас сяменыз пумитаны тырше гурт спортсменъёсыз. 2010-тӥ арын гинэ Дэбес черкогуртын гужем шудонъёс ортчизы. Лыктэм куноос соку туж синмаськизы ульчаосысь пу пӧйшуръёслы, мунёослы. Таяз учыре но дэбесъёс кунооссэс паймытӥзы. Ульчаын кезьыт тол кузёяське, нош Дэбесэ тулыс вуэм кожалод: чебер вазаосын турлы сяськаос пушъё, черкогурт шорын дворец ворекъя, столовой дорын тыро ӝӧк но бадӟым торт пуктэмын, пӧртэм мунёос синмез палёмыто – ваньмыз со лэсьтэмын лымылэсь.

Дэбесысь лымы мунёослы но вазаослы синмаськизы шаерысьтымы дано спортсменъёс Галина Кулакова но Нина Парамонова. Кызьы вераз Нина Аркадьевна, ульчаысь чеберез адӟыса, мылкыд эшшо но капчи луэ, сыӵе дыръя вормонъёс но бадœымесьгес луо.

Валентина Емельянова.

Туспуктӥз Владимир Беломорских.

Инты но дыр

Куасэн бызьылон

Нылкышноос 18-29 арес (5 иськем)

1. Анастасия Осипова (Можга) – 19:29:00

Алёна Перевозчикова (Шаркан) – 19:29:00

3. Юлия Шагалова (Каракулино) – 20:12

30-39 арес (5 иськем)

1. Ольга Веретенникова (Ува) – 18:35

2. Ольга Кутявина (Яр) – 19:55

3. Ольга Пестова (Кез) – 22:21

40-49 арес (3 иськем)

1. Валентина Чуракова (Эгра) – 11:17

2. Екатерина Завалина (Сюмси) – 11:29

3. Альфия Нуруллина (Можга) – 11:33

50 арес но солэсь ятыр (3 иськем)

1. Юлия Рудина (Яр) – 11:17

2. Лидия Близнецова (Пичи Пурга) – 13:29

3. Нина Данилова (Дэбес) – 13:43

Воргоронъёс

18-29 арес (10 иськем)

1. Владимир Никитин (Пичи Пурга) – 31:57

2. Геннадий Владыкин (Шаркан) – 32:15

3. Григорий Хохряков (Шаркан) – 32:23

30-39 арес (10 иськем)

1. Игорь Королёв (Пичи Пурга) – 31:51

2. Семён Иванов (Можга) – 32:38

3. Дмитрий Ходырев (Эгра) – 32:50

Рафик Гизятов (Можга) – 32:50

40-49 арес (5 иськем)

1. Василий Григорьев (Дэри) – 16:19

2. Олег Корепанов (Каракулино) – 16:25

3. Леонид Филатов (Сьӧлта) – 17:09

50 арес но солэсь ятыр (5 иськем)

1. Николай Батаногов (Шаркан) – 17:04

2. Михаил Трофимов (Ува) – 17:19

3. Сергей Стрелков (Эгра) – 18:41

Командаен спринт (2х1 иськем)

Нылкышноос:

1. Яр (Ольга Кутявина, Евгения Куртеева) – 15:20

2. Ува (Валентина Смаркалова, Ольга Веретенникова) – 15:26

3. Можга (Юлия Выгодчикова, Анастасия Осипова) – 15:32

Воргоронъёс:

1. Эгра (Данил Агафонов, Дмитрий Ходырев) – 12:40

2. Пичи Пурга (Роман Трошкин, Игорь Королёв) – 12:46

3. Ува (Дмитрий Веретенников, Алексей Кузьминых) – 12:49

Эстафета

Нылкышноос (4х3 иськем)

1. Можга (Анастасия Смагина, Альфия Нуруллина, Юлия Выгодчикова, Анастасия Осипова) – 40:00

2. Шаркан (Ольга Сабрекова, Светлана Турова, Александра Ардашева, Алёна Перевозчикова) – 40:04

3. Дэри (Марина Будина, Надежда Ветчанина, Елизавета Глазырина, Екатерина Байкова) – 41:08

Воргоронъёс (4х5 иськем)

1. Пичи Пурга (Игорь Королёв, Николай Семёнов, Роман Трошкин, Владимир Никитин) – 57:49

2. Шаркан (Антон Перевозчиков, Николай Батаногов, Геннадий Владыкин, Григорий Хохряков) – 59:01

3. Можга (Семён Иванов, Юрий Бибиков, Миха­ил Би­­биков, Рафик Гизятов) – 59:10

Полиатлон

(гимнастика, ыбылӥськон, куасэн бызьылон)

Нылкышноос (18-39 арес)

1. Антонида Ившина (Ува)

2. Любовь Михайлова (Яр)

3. Наталья Злобина (Юкаменск)

Нылкышноос (40 арес но солэсь ятыр)

1. Нина Суворова (Вавож)

2. Наталья Лялина (Ува)

3. Альфия Нуруллина (Можга)

Воргоронъёс (18-39 арес)

1. Сергей Кожевников (Эгра)

2. Николай Злобин (Юкаменск)

3. Николай Владыкин (Юкаменск)

Воргоронъёс (40 арес но солэсь ятыр)

1. Пётр Арафаилов (Глаз)

2. Вениамин Ефремов (Эгра)

3. Александр Дмитриев (Дэри)

Семьяос

(дартс, куасэн бызьылон, эстафета)

Нылпизы – ныл

1. Елена, Валентина но Анатолий Байковъёс (Дэри)

2. Полина, Ольга но Владимир Корепановъёс (Балезино)

3. Юлия, Надежда но Сергей Занкеевъёс (Вотка)

Нылпизы – пи

1. Виктор, Ирина но Юрий Семёновъёс (Можга)

2. Владислав, Лариса но Александр Афанасьевъёс (Сюмси)

3. Егор, Екатерина но Сергей Сабуровъёс (Кез)

Кивалтӥсьёс

Ыбылӥськон

Нылкышноос

1. Елена Игнатова (Яр) – 87 очко

2. Светлана Крмакова (Эгра) – 86 очко

3. Татьяна Чуракова (Эгра) – 83 очко

Воргоронъёс

1. Михаил Четкарёв (Дэри) – 90 очко

2. Сергей Федотов (Сьӧлта) – 89 очко

3. Сергей Подкин (Каракулино) – 84 очко

Анатолий Афонов (Кизнер) – 84 очко

Дартс

Нылкышноос

1. Елена Пономарёва (Глаз) – 456 очко

2. Светлана Крмакова (Эгра) – 449 очко

3. Татьяна Иноземцева (Вавож) – 428 очко

Воргоронъёс

1. Владимир Лекомцев (Кез) – 627 очко

2. Владимир Лебедев (Сюмси) – 624 очко

3. Владимир Красильников (Вавож) – 597 очко

Баскетбол

Нылкышноос

1. Можга 2. Эгра 3. Ува

Воргоронъёс

1. Можга 2. Сарапул 3. Ува

Хоккей

1. Глаз 2. Дэри 3. Вотка

Шашки

1. Глаз 2. Ува 3. Балезино

Шахмат

1. Дэбес 2. Эгра 3. Ува

Огъя зачётын вормисе потӥзы

I группа

1. Эгра 2. Можга 3. Дэри

Пичи Пурга, Ува, Вотка, Балезино, Кез, Сарапул

II группа

1. Глаз 2. Шаркан 3. Яр

Вавож, Якшур-Бӧдья, Кизнер, Алнаш, Камбарка

III группа

1. Дэбес 2. Юкаменск 3. Сюмси

Каракулино, Сьӧлта, Грак, Кияса, Красногорск

Воргоронъёс пӧлын вормисьёс: Р. Тарасов, С. Тарасов, Р. Валиахметов.

Кылем шутэтскон нуналъёсы Россиысь вань мылкыд карисьёс куасэн бызьылонъя ӵошатсконэ пыриськизы. Удмуртиын улӥсьёс но палэнэ ӧз кыле. Субботае вожвылъяськизы ёросъёсын улӥсьёс, нош арнянуналэ тужгес кужмоосыз спортсменъёс люкаськизы Г. Кулаковалэн спорткомплексаз.

Ижысь ваньмаз вить ёросын ӵошатскон ортчытыны рос-прос дасяськемын вал. Куас сюресъёс паськыт лёгемын. Валамон, та ужрадэ тросгес пыриськизы нылпиос. Стартэ потонын донгаськон учыръёс медаз луэ шуыса, котькуд школа нимаз висъям дырлы стадионэ люкаськиз. Куас сюрес вылын вормисьёсты ӧз шараялэ, нош ӵошатсконэ пыриськемъёслы кузьым – изьы – сётӥзы. Сое покчи спортсменъёс финише вуэмзы бере гинэ басьтӥзы.

Удмуртиысь тросаз ёросъёсын ортчытӥзы асьсэлэсь пичи олимпиадазэс – гурт шудонъёссэс. Дэри ёросысь спортэз гажасьёс Ожмос гуртэ люкаськылӥзы, шарканъёс – Балтаче.

- Шаркан ёросысь куасчиос Россиысь кужмоосыз луо, – шуэ Шаркан ёрос администрациысь физкультурая но спортъя ёзэн кивалтӥсь Сергей Чернов. – Шаермылэн палэназ ортчоно ӵошатсконъёсы потон азямы ӵем дыръя пӧртэм организациостӥ кураськоно луылӥмы, туэысен ёрос центрысь олимпиецъёсты дасянъя спортшколае ветлӥсьёсмы капчиен шокчыны быгатозы, субботае милемлы микроавтобус кузьмазы. Ёросын ортчись шудонъёсы 16 муниципал кылдытэт пыриськиз, вань кивалтӥсьёс куас вылэ султӥзы. Котькинлэсь сэзь бызьылӥзы карсашуръёс. Арнянуналэ ӵошатскон ортчиз Шарканын. Кивалтӥсьёс понна нимысьтыз забег ортчытӥмы, собере сюрес вылэ потӥзы мылкыд карисьёс.

Чакламъя «Россиысь куас сюресъёс» ужрадэ Удмуртиысь 15 сюрс адями пыриськыны кулэ вал, нош куасэн бызьылыны мылкыд карисьёс солэсь но тросгес люкаськизы. Шаерысьтымы Мугорез кыдатон культурая, спортъя но туризмъя министерствоын куинетӥ нуналаз ик пусъён ужрадэз дугдытӥзы, туж трос калык люкаське шуыса. Кӧня ке гадьпусъёс но изьыос кельтэмын вал Г. Кулаковалэн спорткомплексаз бызьылыны лыктэмъёслы. Татчы люкаськемъёсты, спортсменъёсты ӟечкылаз Удмуртилэн Президентэз Александр Волков:

- Туэ ар котырес лыдпусъёсын тырмемын: «Россиысь куас сюресъёс» 30-тӥзэ ортчо, шаерысьтымы тужгес дано спортсменлы Галина Кулаковалы 70 арес тырмоз, солэн Япониысь Саппоро городын ортчем Олимпиадаын нырысетӥ зарни медаль басьтэмезлы 40 ар тырмиз. Данъяськымон, шаерысьтымы куасэн бызьылӥсьёс дуннеысь ӵошатсконъёсын али но кужмоосыз луо.

Кезьыт куазен - пӧсь.

Спортсменъёс вормонъёсынызы азьланяз но мед шумпоттозы шуыса, Г. Кулаковалэн спорткомплексэзлы та нуналэ автобус но «Буран» снегоход кузьмамын вал. Люкаськемъёслы вольыт сюрес сӥзиз шаерысьтымы дано спортсменка Галина Кулакова, нош ӵошатсконлэсь тылзэ ӝуатыны оскизы тол Олимпиадаосысь мукет кизилиослы Тамара Тихоновалы но Владимир Никитинлы.

Куас сюрес вылэ нырысь ик потӥзы кивалтӥсьёс, дано спортсменъёс. Отӥяз ини зэмос вожвылъяськон пуромиз куасэн бызьылыны лыктэмъёс пӧлын. Та нуналэ соос 800 пала люкаськизы. Нырысь ик стартэ потӥзы 18 аресозь егитъёс. 5 иськем сюресэз котькинлэсь шаплы ортчизы Воткаысь Кирилл Булдаков но Ижысь Алёна Иванова. Кыкназы но шаермылэн сборнояз пыро.

Кужмо нюръяськон пуромиз воргоронъёс но нылкышноос куспын. 10 иськемез огшокчемен ортчизы кадь, спортсменъёс бере лымы гинэ пурӟыса кылиз. Воргоронъёс пӧлын шаплыгес вал Ижысь куасэн бызьылӥсьёс. Нырысетӥ интые потӥз Роман Тарасов. Кыкетӥ инты понна пӧсь нюръяськон пуромиз. Финиш гожез куинь мурт огвакытэ выжиз. Озьы ке но кыкетӥ интые потыны удалтӥз Уваысь Сергей Тарасовлы, куинетӥ луиз Ижысь Равиль Валиахметов. Нылкышноос пӧлын нырысь куинь интыосты люкизы Киясаысь Оксана Шамшурина, Уваысь Ольга Веретенникова но Можгаысь Лилия Васильева.

Та ужрадэ туэ 15 сюрс 580 мурт пыриськиз. Ижевск, Сарапул но Можга городъёсын сяна, 20 ёросын улӥсьёс куас сюрес вылэ потазы. Ёросъёсы быдэн 250-300 изьыос но номеръёс люкылэмын вал. Но кызьы шуэ Шарканысь Сергей Чернов, шарканъёс изьы понна уг бызьыло.

Валентина Емельянова.

М. Вылегжанин.

Дуннеысь куасэн бызьылӥсьёс вожвылъясько Москва котырын. Арнянуналэ спортсменъёс кужымзэс эскеризы 30 иськемъем сюрес вылын. Скиатлонын (15 иськемзэ классика, 15-сэ эркын амалэн) котькинлэсь ӝог ортчизы Россиысь воргоронъёс. Ӵошатсконлэн нырысетӥ люкетаз ик азьпала потӥзы Удмуртиысь спортсменъёс: Можгаысь Дмитрий Япаров, Шарканысь Максим Вылегжанин но Кезысь Константин Главатских. Вормонозь сузьтӥськыны кылдӥз Максимлы гинэ. Та ӵошатсконын со зарни медаль басьтӥз.

- Ӵошатскон Россиын ортчиз бере, учкисьёсыз вормонъёсын шумпоттэммы потӥз, – шуиз Максим Вылегжанин журналистъёслы. – Одӥгзэ жалясько: та стартэ дуннеысь тужгес кужмо ньыль спортсмен ӧз пыриськы. Соос бызьысалзы ке, вормонэлэн данэз эшшо бадӟымгес луысал. Со сяна, вормыны юрттӥз на Россиысь спортсменъёслэн огкылысь луэмзы, ог-огенымы вошъяськимы, бызён ӝоглыкмес возимы.

Та ӵошатсконын Константин Главатских 7-тӥ интые потӥз, нош Дмитрий Япаров 18-тӥ луиз. Дуннеысь спортсменъёслэн огъя зачётазы тужгес вылӥе интыяськемын Максим Вылегжанин – 7-тӥ мынэ.

Валентина Емельянова.

Скиатлонын вормисе потэмъёс.

Кылем шутэтскон нуналэ куазь нырез чепылляны выриз ке но, куасэн бызьылыны яратӥсьёсты со ӧз кышкаты. Г. Кулакова нимо спорткомплексын кык бадӟым ужрад ортчиз: Удмуртиысь куасэн бызьылӥсьёслэн скиатлонъя но «Удмурт дунне» газетлэн призэз понна ӵошатсконъёс.

Нырысь ик стартэ потӥзы шаерысьтымы зэмос спортсменъёс. Ӝыны сюресэз соос классика, кылемзэ эркын амалэн бызизы – со бордын скиатлонлэн аспӧртэмлыкез. Егит нылъёс пӧлын котькинлэсь шаплы луиз Балезино ёросысь Дина Некрасова. Ас ёзо эшъёссэ со кыдёке кельтӥз.

- Таӵе ӵошатсконъёс капчи мылкыд кузьмало, куазь но бызьылоно кадь – шунды пиштэ, – шуэ Дина Некрасова. – Удмуртиын ортчись вожвылъяськонъёс Россилэн чемпионатэзлы дасяськыны юртто. Матысь дыре Сыктывкаре мыномы.

Скиатлонъя ӵошатскон туж учкымон. Отын шӧдӥське спортсменлэн сояз я таяз амалын кужмогес луэмез. Соослы сэзьгес бызьыны юртто ӟеч дасям куасъёссы но. Кужмо нюръяськон пуромиз воргоронъёс куспын. Берпуметӥ метрозяз шуг вал вормисьлэсь нимзэ шараяны. Озьы ке но вормисе потӥз Ижысь Равиль Валиахметов. Солэсь ӧжытаклы кылизы Якшур-Бӧдьяысь Леонид Виноградов но Уваысь Сергей Тарасов.

Эгра ёрос администрациысь спортъя отделэн кивалтӥсь Н. Мерзляков.

Ӵошатсконлэн кыкетӥ люкетэз «Удмурт дунне» газетлэн призэз понна ортчиз. Гуртысь спортсменъёс тодо на, кызьы вашкала дыръя «Советской Удмуртия» газетлэн кубокез понна нюръяськизы. Соос Якшур-Бӧдья черкогуртын ӵемгес радъяськылӥзы. Укмыстонэтӥ аръёсы шуг-секытъёс кылдэмен, газетлэн кубокез понна нюръяськон огдырлы дугдылӥз. Озьы-а, тазьы-а, 2004-тӥ арын со улӟытэмын вал. Куноосты нош ик пумитазы бӧдьяос. Спортысь ветеранъёс, куасэн бызьылыны яратӥсьёс, ёросъёсысь командаос куас сюрес вылэ потӥзы. Соку котькинлэсь трос очко люказы Эгра ёросысь спортсменъёс.

Таӵе ужрадэз ортчытыны быгатӥмы 2005-тӥ арын но. Газетмылэн кубокез понна вожвылъяськонэ соку 7 ёросысь спортсменъёс пыриськизы. Огъя зачётын вормисе потӥзы эграос. Соослэсь ӧжытаклы гинэ бере кылизы уваос.

Туэ редакциямы выль тулкым вуиз кадь. Газетмылэн призэз понна ӵошатсконмес азьланьтыны быгатӥмы. Куазь нокинэ ӧз кышкаты, ужрадэ пыриськизы 19 ёросысь куасэн бызьылӥсьёс. Гуртоос сяна, кужымзэс эскеризы шаерысьтымы городъёсысь но Чайковскийысь спортсменъёс.

Та ужрадэ туж курадӟыса вуиллям Пичи Пурга ёросысь Орлой гуртысь спортэз яратӥсьёс. Иже пыремзы бере автобуссы тӥяськем. Озьы укмыс мурт я таксиен, я тодмо водительёсын Г. Кулаковалэн базаяз вуиллям. Лыктэмзы токма луымтэ, ваньзы сямен вормонъёс басьтӥзы.

Спортсменъёслэсь быземзэс учкыса, синмаськоно: сюрес вылтӥ соос туж капчиен нискылто, уяса кадь. Ӧм чидалэ ми но, редакциын ужасьёс, куасъёсмес кутчамы. Калъяськимы егит нылъёс бере. Кузь гурезь вылысен соос пӧлысь кин ке бодызэ чигтӥз. Ярано коть, гурезьын сыло вылэм тренеръёссы, бодызэс сётӥзы. Кӧня ке вамыш лэсьтӥмы гинэ, шуккиськон учыр тупаз: одӥгез усиз, со бӧрсьы мукетъёсыз погразы. Султӥзы, бодызэс кутӥзы но, лымы гинэ пурӟиз на бӧрсязы. Милям куасъёсмы сокем ӧз ширтэ, бодыосын катьтэммытозямы донгаськеммы бере ми но финиш гожез выжимы ик.

Кубок понна нюръяськонэ люкаськемъёс арлыдзэс уг учко. Соос нуналлы быдэ мугорзэс кыдато, куасэн бызьыло. Нокинэ но ӝоже уськытонтэм вылысь вормисьёсты шараямы арлыдзыя. Тани Можга ёросысь Алевтина Борисова ужаз но куасэн, пе, ветлэ. Ас ёзо эшъёсыз пӧлын кыкетӥ инты басьтӥз. Нош 55-59 аресъем нылкышноос пӧлын вормисе потӥз Пичи Пурга ёросысь Лидия Близнецова. Ас ёзо эшъёссы пӧлын озьы ик вормисе потӥзы Ярысь Юлия Рудина, Ижысь Лидия Андреева, Дэриысь Василий Григорьев, Шарканысь Николай Батаногов но мукетъёсыз.

- Вормон понна ум бызьылӥське, – шуэ Ижысь Лидия Андреева. – Тужгес дуно – эшъёсын адскон. Куатьтонме ортчемын ке но, куасэн бызьылонлэсь люкиськеме уг поты. Туннэ кадь ик тодӥсько на нырысетӥ грамота басьтэмме, со вал 1959-тӥ арын. Со дырысен ялан куас вылын.

Ӵошатскон йылпумъяськиз. «Удмурт дунне» газетлэсь кубоксэ, азьвыл аръёсы сямен ик, утӥзы эграос.

Валентина Емельянова.

Туспуктӥз Владимир Беломорских.

Кылем шутэтскон нуналэ куазь нырез чепылляны выриз ке но, куасэн бызьылыны яратӥсьёсты со ӧз кышкаты. Г. Кулакова нимо спорткомплексын кык бадӟым ужрад ортчиз: Удмуртиысь куасэн бызьылӥсьёслэн скиатлонъя но «Удмурт дунне» газетлэн призэз понна ӵошатсконъёс.
Нырысь ик стартэ потӥзы шаерысьтымы зэмос спортсменъёс. Ӝыны сюресэз соос классика, кылемзэ эркын амалэн бызизы – со бордын скиатлонлэн аспӧртэмлыкез. Егит нылъёс пӧлын котькинлэсь шаплы луиз Балезино ёросысь Дина Некрасова. Ас ёзо эшъёссэ со кыдёке кельтӥз.
- Таӵе ӵошатсконъёс капчи мылкыд кузьмало, куазь но бызьылоно кадь – шунды пиштэ, – шуэ Дина Некрасова. – Удмуртиын ортчись вожвылъяськонъёс Россилэн чемпионатэзлы дасяськыны юртто. Матысь дыре Сыктывкаре мыномы.
Скиатлонъя ӵошатскон туж учкымон. Отын шӧдӥське спортсменлэн сояз я таяз амалын кужмогес луэмез. Соослы сэзьгес бызьыны юртто ӟеч дасям куасъёссы но. Кужмо нюръяськон пуромиз воргоронъёс куспын. Берпуметӥ метрозяз шуг вал вормисьлэсь нимзэ шараяны. Озьы ке но вормисе потӥз Ижысь Равиль Валиахметов. Солэсь ӧжытаклы кылизы Якшур-Бӧдьяысь Леонид Виноградов но Уваысь Сергей Тарасов.
Ӵошатсконлэн кыкетӥ люкетэз «Удмурт дунне» газетлэн призэз понна ортчиз. Гуртысь спортсменъёс тодо на, кызьы вашкала дыръя «Советской Удмуртия» газетлэн кубокез понна нюръяськизы. Соос Якшур-Бӧдья черкогуртын ӵемгес радъяськылӥзы. Укмыстонэтӥ аръёсы шуг-секытъёс кылдэмен, газетлэн кубокез понна нюръяськон огдырлы дугдылӥз. Озьы-а, тазьы-а, 2004-тӥ арын со улӟытэмын вал. Куноосты нош ик пумитазы бӧдьяос. Спортысь ветеранъёс, куасэн бызьылыны яратӥсьёс, ёросъёсысь командаос куас сюрес вылэ потӥзы. Соку котькинлэсь трос очко люказы Эгра ёросысь спортсменъёс.
Таӵе ужрадэз ортчытыны быгатӥмы 2005-тӥ арын но. Газетмылэн кубокез понна вожвылъяськонэ соку 7 ёросысь спортсменъёс пыриськизы. Огъя зачётын вормисе потӥзы эграос. Соослэсь ӧжытаклы гинэ бере кылизы уваос.
Туэ редакциямы выль тулкым вуиз кадь. Газетмылэн призэз понна ӵошатсконмес азьланьтыны быгатӥмы. Куазь нокинэ ӧз кышкаты, ужрадэ пыриськизы 19 ёросысь куасэн бызьылӥсьёс. Гуртоос сяна, кужымзэс эскеризы шаерысьтымы городъёсысь но Чайковскийысь спортсменъёс.
Та ужрадэ туж курадӟыса вуиллям Пичи Пурга ёросысь Орлой гуртысь спортэз яратӥсьёс.  Иже пыремзы бере автобуссы тӥяськем. Озьы укмыс мурт я таксиен, я тодмо водительёсын Г. Кулаковалэн базаяз вуиллям. Лыктэмзы токма луымтэ, ваньзы сямен вормонъёс басьтӥзы.
Спортсменъёслэсь быземзэс учкыса, синмаськоно: сюрес вылтӥ соос туж капчиен нискылто, уяса кадь. Ӧм чидалэ ми но, редакциын ужасьёс, куасъёсмес кутчамы. Калъяськимы егит нылъёс бере. Кузь гурезь вылысен соос пӧлысь кин ке бодызэ чигтӥз. Ярано коть, гурезьын сыло вылэм тренеръёссы, бодызэс сётӥзы. Кӧня ке вамыш лэсьтӥмы гинэ, шуккиськон учыр тупаз: одӥгез усиз, со бӧрсьы мукетъёсыз погразы. Султӥзы, бодызэс кутӥзы но, лымы гинэ пурӟиз на бӧрсязы. Милям куасъёсмы сокем ӧз ширтэ, бодыосын катьтэммытозямы донгаськеммы бере ми но финиш гожез выжимы ик.
Кубок понна нюръяськонэ люкаськемъёс арлыдзэс уг учко. Соос нуналлы быдэ мугорзэс кыдато, куасэн бызьыло. Нокинэ но ӝоже уськытонтэм вылысь вормисьёсты шараямы арлыдзыя. Тани Можга ёросысь Алевтина Борисова ужаз но куасэн, пе, ветлэ. Ас ёзо эшъёсыз пӧлын кыкетӥ инты басьтӥз. Нош 55-59 аресъем нылкышноос пӧлын вормисе потӥз Пичи Пурга ёросысь Лидия Близнецова. Ас ёзо эшъёссы пӧлын озьы ик вормисе потӥзы Ярысь Юлия Рудина, Ижысь Лидия Андреева, Дэриысь Василий Григорьев, Шарканысь Николай Батаногов но мукетъёсыз.
- Вормон понна ум бызьылӥське, – шуэ Ижысь Лидия Андреева. – Тужгес дуно – эшъёсын адскон.  Куатьтонме ортчемын ке но, куасэн бызьылонлэсь люкиськеме уг поты. Туннэ кадь ик тодӥсько на нырысетӥ грамота басьтэмме, со вал 1959-тӥ арын. Со дырысен ялан куас вылын.
Ӵошатскон йылпумъяськиз. «Удмурт дунне» газетлэсь кубоксэ, азьвыл аръёсы сямен ик,  утӥзы эграос.
Валентина Емельянова.
Туспуктӥз Владимир
Беломорских.