Адӟем карымон анай В. Семёнова.

1993-тӥ арысен кутскыса, шаерысьтымы вить но солэсь тросгес нылпи будэтӥсь нылкышноослы Президент бырттэ «Анайлэн данэз» гадьпус. Тазьы сӥлы каремъёс 380-лэсь ятыр люкаськизы ни. Радъёссы йылӥзы на та нуналъёсы.

Соос тодо: котьмае дыраз лэсьтоно, ӧжытак ӝегатскид-азьтэмскид ке, нылпиосыд олокытчы но мерскозы. Трос пинал будэтӥсь анайёслэн котьмае тыро-пыдо лэсьтыны дышем сямзы резиденциын но адӟиськиз. Президентэн пумиськон дырозь ог кызё минут на, соос ваньзы интыязы пуко ни: синъёссы чиляло, мылкыдъёссы тулкымъясько. Кин но со юромо та нуналлы выль дэрем басьтэм, ӝужыт беро пыдкук кутчам.

Алнаш ёросысь Чумолё гуртысь Валентина Семёнова йыраз керттэм тӧдьы вылын гордо-вожо кышетсэ. Тусызъя!

- Чик ӧй но малпа, таӵе залэ куке шедё, тазьы данъялозы шуыса, – гадь вылаз бырттэм медальзэ лушкемак гинэ маялтэ нылкышно.

Валентина Васильевна быдэс улонзэ тыршиз колхозын. Витез ик пиналъёссы нылъёс шуыса, нылкышнолэн кӧтыз чик ӝож уг луы. Ермил картэзлэн гинэ одӥг-ог нукыртэмез потэ, юрттӥсь кулэ вал шуыса. Но Семёновъёслэн нылъёссы табере быдэ вуизы ни – эмеспиоссы но кылдӥзы.

- 12 нунокъёсмы ни, тау Инмарлы, ваньзы визьмоесь, – шумпотэ нылкышно. – Нылъёсмы но котьку шумпоттылӥзы гинэ. Куинез улонзэс эмъян удысэн герӟазы. Аслам дышетӥсь луэме туж потэ вал, но вазь бызи, дышетскон ӧз йӧты ни. Ярам, кыкетӥез нылы школаын ужа. Куинетӥез нылмы нимаз ужбергатӥсь кариськиз. Нылпиосме будэтыны юрттӥз картэлэн анаез – туж визьмо кышномурт вал со, одӥг пол но ваче вуонъёсмы ӧй вал…

Президент доры нылкышноос йӧн-йӧн пото, куалектэмзы чик уг адӟиськы. Эшшо Александр Волковлы куронъёссэс вераны вутто на.

- Ваньдэс кылзо, – пумитазы вазе Президент. – Тӥледлы музъемозь йыбырттыны ку­лэ…

Александр Волковлэсь кыл вераны эрик сётэмзэ шӧдыса, анайёс я гуртысьтызы школаез тупатъяны, я нылпи сад, клуб курыны кутскизы. Зал кичабонъёсын тырмиз Якшур-Бӧдья ёросысь Альбина Веретенниковалэн куронэз бӧрсьы:

- Тупатоно на песянайёслэсь нуналзэс! Мынэсьтым пиналъёсме будэтыны юрттӥзы аслам но картэлэн анайёсмы. Учкелэ, мар даурто Брангуртысь песянайёсмы! Соослы луыса быдэс дуннеын чузъяське ни удмурт кыл. Нош сыӵе песянайёс котькуд гуртын тачак!

Александр Волков оскы­тӥз: котькуд ӵектон сярысь малпаськоз.

Элина Кумачёва.

Война азьын. М. Гаврилова - мумизлэн алвылаз.

Басма юдэслы вожъяськон

Война кутскыку, мон куатям мынӥсько вал. Ма со сыӵе – валаса но ӧй быдты, дыр. Корка тыр калык люкаськиз. Кин кырӟа, кин синву кисьтэ. Ми сузэреным полатьысен учкиськом.

Бадӟымез сузэре кияз лента но басма юдэсъёсын тятямы дӥне лыктӥз. Кин ке пукон вайиз. Бубымы отчы тубиз, кисыысьтыз азвесь коньдон поттӥз но калык кырӟам улсын сое мумы коре молотэн шуккиз. Макем вожъяськыса учкимы коньдонэн ӵош шуккем басма юдэсъёс шоры: мунёен шудыны соос милемлы туж ярасалзы. Сузэреным валаса ик ӧм вуттэ: калык азбере, ульчае потӥз. Тятямы выльысь берытскиз, милемды ӟыгыртӥз-чупаз но ӝогак потӥз. Коркан чал-чал луиз. Ми шумпотыса гур котыртӥ бызьылӥськом. Со куспын акаосы – бадӟым сузэръёсы – пыризы.

- Ма бызьылӥськоды? Чалмытске! – вазиз одӥгез.

- А кытын мамаен тятя? – юаськомы.

- Тятямес войнае келязы ук, ӧд-а валалэ? Таре со кематэк уз берты, а мамамы сое валэн келяса мынӥз: ӝытазе-а, ӵукна-а вуоз.

Мумымы ӵуказеяз вуиз. Ми нош ик гур котыртӥ ворттылӥськом. Гурысь шыдэз поттӥз но милемды ӝӧк сьӧры ӧтиз. Мудоръёс шоры кӧня ке пол кирос карыса, милемын артэ пуксиз. Вылаз чебер бирдыё кофта, гурулаз сяськаё сьӧд кышет керттэмын. Таӵе дӥсен ми мамамес ӵем ӧм адӟылэ.

- Нош малы синвуосыд васько? – соосты киосынымы ӵушылыса, юаськом.

- Тятядэс войнае нуизы ук. Кызьы таре уломы? Искалмес но воштыса ӧм вуэ.

Йӧӟектэм укно

Гуртэ огнамы кылим. Бадӟымъёсыз ваньзы кошко ужаны. Мамамы пичи чугунын векчи картошка пӧзьтэ но, азбар палась укно янак вылэ сылал посудаен артэ пуктыса, кельтэ. Бадӟымез акамы Чуре сик коранэ келямын, мукетыз Дэбесэ дышетскыны кошкемын, Тамара бабусямы уй но нунал вал гидын ужа.

Нунал ӵоже укномы йӧӟектэ, ми сое ӵабъяны турттӥськом. Укно янак вылын пукыса, асьмеос но ӟонгыраськом, озьы ке но ум васькиське. Та укноысен гинэ адӟиське мамамылэн ужысь бертэмез. Туж кынмыны кутскиськом ке, бубымылэсь кунояны ветлон сьӧд дублёнказэ выламы золтӥськомы. Куддыръя бадӟымъёслэсь кылылэм кырӟанэз нёжъяны ӧдъяськом:

- Эх, отцы, отцы,

вы жестокие,

Вы сгубили немало

детей.

Только слышится, только

видится,

Как сиротки страдают одне…

Ми та куплетысь кык кылзэ гинэ валаськом: «отцы» но «сиротки». Ӟуч кылэз ум тодӥське вал.

Я, картошкамес кӧ-мыныз ик сиыса, кынмыса но кырӟаса, юн кема кыстӥськись нунал кызьы но озьы ортче. Кутсаськонзэс быдтыса, пичи ульчаысь оген-оген кышноос пото. Куско шубаен дӥсяськем мумымес адӟыса, корка пырытозяз ик черекъяса но серекъяса, зӧк (бадœым) гур котыртӥ бергаськом.

Вормонэз данъясь горд кышет

Арлыд пичиен ми войналэсь секытсэ, оло, сокем ӧм но валаллялэ, ваньмыз сямен ик потэн, клеверен, пул пызен пыжем нянь ке но сиим, скал вордыса вылысь йӧлэз ке но ӧм адӟылэ, ужаны туж вазь ке но кутским. Мыным туж жалесь акаосы. Ӟеч сиёнтэк секыт ужез быдэсъязы, быдэ вуон аресъёсазы яратонэз адӟытэк ортчизы. Котьма ке но вормонэз пичиез но, бадӟымез но чидатэк витиз.

Война быремлы ми мукетъёсыныз ӵош шум­потӥмы. Со нуналэ ӧм дышетске. Дышетӥсьёсмы Еле­на Семёновна но Алевтина Степановна шумпотыса веразы:

- Война быриз, ойдолэ гурт пыртӥмы строен кырӟаса ортчомы! Кинлэн гуртаз горд кышетэз вань, бызьса бертылэ но вае – сое флаг интые боды борды думом.

Мумилэн вал гужем нуллон горд кышетэз. Мон со дуре ветлӥ, дышетӥсьёс та куспын кузь боды шедьтӥллям. Отчы со горд кышетэз думизы.

Школамы гурт пумын вал. Колоннае султыса, ульчалэн мукет пумозяз кырӟаса мынӥмы. Тодам лыктэ на «Лымы тӧдьы», «Вало дурын, возь вылын», «Гулял по Уралу Чапаев-герой» кырӟанъёсты кырӟаммы, мукетъёссэ уг тодӥськы ни. Туж чебер кылӥськиз дышетӥсьёсмылэн куаразы. Али малпасько, кызьы меда мынӥз но кырӟаз Елена Семёновна? Будэме бере гинэ тодӥ: солэн картэз ожмаськонын быремын.

Бензин зыно одеколон

Война бырем бере фронтэ кошкемъёс бертыны кутскизы. Туж тросэз ӧз вуэ гуртазы. Соос пӧлын артэ коркась киросное Анатоль, вадьсысьтымы Митя Вася, Петыр Виктор, Горей Вася, Ондыръян, Горей Коля – ваньзы егитъёс. Бертӥзы арлыдоосызгес. Соослэн но тазалыксы юн ӧй ни вал.

Тятяе Ленинград фронтын ожмаськиз, медальёсыз но вал. Контузие шедьылэмын. Верамзэ тодӥсько на: эшъёсыз сое окопысь, сюез копаса, поттыны ӧй ке быгатысалзы, отчы ик бырысал. Сӧсырмыса госпитальын кыллемъёссэ но верамез вал. Кык чалепез озьы ик нуиз сьӧраз шайгуэ. Но тятямылэн ожмаськемез сярысь туж ик мадемез ӧз потылы. Ма со сярысь вераса улод, шуылӥз.

Гуртэ вуэмез бере ик монэным серемес учыр луиз. Дунне вылын одеколон вань шуыса, кылэме вал ке но, ма со, кыӵе зыно – ӧй тодылы. Тятяе, вещмешокысьтыз котырзэ поттыса, ӟус вылэ тыриз. Нош куинь сэрего пичигес ӟенеликез укно янак вылэ пуктӥз. Ӟенелик вылын юн чебер суредэз вал: горд векчи сяськаос но нылмурт ымныр. Ма та юамысьтым, одеколон, шуиз.

Мон тятяелэсь палэнскемзэ гинэ возьмаса улӥ. Кинэн ке вераськыкуз палэнскиз но, солэсь кузьмам ныркышетсэ сэрытак гинэ со одеколон шуонэн коттӥ. Аслым сокем ик ческыт зын ӧз поты, но малпай: одеколонлэн сыӵе зыныз. Шумпотыса бергасько акаосы вӧзын, ушъяськисько: мон ныркышетме одеколонэн коттӥ. Соос монэ серекъязы. Ныркышетме зажигалкалы дасям бензинэн коттӥськем.

Со нуналэ нош ик корка тыр калык люкаськиз. Тодам на, картъёссы доразы вуымтэ кышноос тятяелэсь юало: ӧз-а адӟылы кытысь ке соослэсьсэ? Бертэмез пумысен кӧня ке кумышка юизы но уйбыт кырӟаса пукизы. Куинь нунал ортчыса, бригадир тятяме уже потыны косӥз.

Коньдон люкай… тятяме ватыны

Ми, пиналъёс, малпаллям: война быриз ке, ӵуказеяз ик майбыр улон вуоз. Сурамтэ тӧдьы нянь мылмы потэмъя сиёмы, пряник, печення, канфет ымамы шедёз. Но малпанмы ӵуказеяз ик ӧз быдэсмы. Озьы ик сиимы турын куарен суралтэм нянь, уриськимы гольык пыд, ветлӥмы ӟугырес дэралэсь вурем дэремен. Школае пыдын сизьым иськеме, берло дас вить иськеме кутэн ветлӥмы. Ог ньыль-вить ар ортчыса гинэ, улон умой палагес воштӥськыны кутскиз. Но тятяе сое ӧз ни адӟы.

Дышетскыкум ик ужаны кутскыса люкам коньдонэным трактор улэ лёгаськыны шедем тятяелы костюмлы но гимнастёркалы материал басьтӥ. Вадьсысьтымы вуриськись кык нунал куспын вуриз соосты. Мукет номырин юрттыны мон тятяелы ӧй ву.

Тӥни сыӵе сюрессы вал фронтысь бертэм тросэзлэн воргоронъёслэн. Эшшо но секытгес вал картъёссы бырем кышноослэн. Али соос но туж ичи кылемын. Дэбес ёросысь Омелят (Роготнево) гуртамы одӥгез но ӧвӧл ни.

Милитина Гаврилова.

Ужысь ветеран А. Камашева.

Можга ёросысь Камыжлы (Камышлы) гуртысь ужысь ветеранлы Антонида Камашевалы вить нылпи будэтэмез понна сётэмын «Мать-героиня» ним.

- 7 нылпи пӧлын будыса, улон секытэн, дыр, монэ Ӵужъем гуртэ вордосэ сётӥллям, – улэм-вылэмез сярысь маде 78 аресаз мынӥсь Антонида Ивановна. – Шаянгес вылӥськем, дыр, ини, ачим ик мыно шуиськем бере. Пересьмытозямы сузэр-апайёсынымы тупаса улӥмы, ог-огмы доры али ке но куное ветлӥськомы. Соос мынэсьтым кылзӥсько, дугдэ ай, Тоня мар вералоз, шуо. Ныл йыр фамилие Петрова вал. Собере Камыжлые бызи, корка тыр вить нылпи вордӥ. Фермаын ужай, шутэтскон дырез адӟыны ӧз кылдылы. Колхозын – уж, дорын – пудо, нылпи. Собере пиналъёсы пыд йылазы султӥзы но, дэмен пу вандӥськом, пу пильылӥськом, бакча ужез быдэсъяськом. Пенсие потытозям, колхозын парсь но сюдӥ, скал но кыски.

Вазен весь юон дыръёс ортчытъяно вал: сюан-ярашон, солдатэ келян, виртырем сиён но мукет. Арнялы быдэ сэзъяськоно луылӥз. Соин ик, дыр, картъёсмы юылӥзы. Сыӵе дыръя юртъер но, нылпиос но нылкышно пельпум вылэ усьылӥзы. Куинь часын султыса, нянь пыжисько, гурт котырысь ужез быдэсъясько, собере фермае кошкисько. Арнянуналэ нылпиос, ваньзы ӵош сайкаса, кин велосипедэн, кин пыдын сьӧрам фермае юрттыны мыно. Ай пичиез Генямы ӝожтӥське вал: монэ мешок но нуллыны уд лэзиськы, бадӟым пиосыдлы гинэ котьма карыны лэзиськод. Нош мыным жаль ук, кызьы со пичи мурт секытэз вормоз. Фермаысь бертыса, перепеч, табань, пирожки пыжиськом вал.

* * *

Бадӟымез Вася пимы Казане электрике дышетскыны кошкиз. Ачим ик солы газетысь ялон шедьтӥ. Соку ай гуртысьтымы одӥг адями но вылӥ тодон-валан ӧз басьты на вал. Собере, ветлонэз кыдёкын шуыса, Вася Иже выжиз – гурт удысъя институтэз йылпумъяз.

Кыкетӥез Вова пимы медицина наукаосъя кандидат. Со лек пыктосъёсты эмъя. Республикаысьтымы онкологияя диспансерын ужа.

Пиосы доре берто ке, ваньзы огазе люкасько. Одӥг пол Вова Васялэсь юалляське: та проводлэн кыӵе буёлэз? Со кылъёсты кылыса, пайми: мон уг тодӥськы вал, Вовае буёлъёсты уг тодма шуыса. Пичи дыръяз вал вылысь усьылӥз, оло, соин ик буёлъёсты тодмамысь дугдӥз. Пичи классъёсын дышетскыкуз, Пермьысь речной училищее дышетскыны пырыны малпалляз. Но синмызлы луыса кутӥллямтэ. Бертӥз но, мон, пе, враче дышетскыны мынысал. Ма, мын, шуисько, умой со уж. Ачим ик гуртысьтымы Иван Борисовлэн нылыз доры келяй. Геля враче дышетске, солэсь юалляськы ай, валэктоз, шуисько. Ветлӥз, тодӥз, Иже мынӥз, экзаменъёссэ капчиен сётӥз, студент луиз. Практикае Можга городэ бертылӥз.

Куинетӥез пие – Геня – Удмурт кун университетэ пырыны мылкыд кариз. Но конкурсэз ӧз ортчы. Одӥг ар колхозын ужаса, армие басьтӥзы. Отысь бертӥз но университетэ пырон сярысь вераське – юрист, пе, луэме потэ. Ма, тон гуртэ гинэ кыль ини, шуисько. Кошкемез потӥз. Малпай: ӧй ке лэзьы, улытозяз ӧпкелёз. Ачим агрономе мын ай, гуртын ужась луод, лӧпкытъясько. Кылзӥськиз ини ай та, подготовительной курсъёсы кошкиз. Отысен нош университетаз ветлэм. Частьысьтыз характеристика курыса, гожтэт келям. Дышетскон висказ запросэз вуэм. Вася пиелы шуисько: оло, та гожтэтсэ Генялы возьматоно ӧвӧл, собере со воксё но агрономысьтыз кошкоз. Со бадӟым ини, ачиз тодоз, шуиз пие. Генямылы гожтэтсэ сётӥмы гинэ но – азьзэ но, берзэ но ӧм адӟе ни, городэ шонтӥз. Нокинлэсь ӧз кылзы, малпанзэ быдэстӥз. Со табере юридической наукаосъя кандидат.

Табере Камашевъёслэн семьяязы кык кандидатъёссы. Тятязы пиосызлы шуоз вылэм: мон сямен кыед пӧлы эн кыле, дышетыны быгатыкумы, дышетске. Пиос тятязылэсь куронзэ быдэстӥзы.

- Вазен уксё ӧй вал ук, уката колхозын ужасьёс сое чик ӧз адӟылэ, – маде Антонида Ивановна. – Котомкаме ныпъясько но Казане, сиён-юон нуыса, мынӥсько. Отӥяз Иже ветлыны кутски. Одӥг пол ивортӥзы: колхоз автобус, пе, ӵуказе нылпиосты цирке нуоз. Вова доры мынон понна уйбыт пӧраськи, сӥль пыжи. Ӵукна кылӥсько ини: автобуссы, пе, тӥяськем. Мылкыды куашказ. Нош пӧрамме маин ке но вуттэме потэ. Геня соку гуртын улэ вал ай, ойдо, пие, шуисько, пӧрамме Вова доры нуом. Учаозь мотоциклэн келятӥ, отысен рейсовой автобусэн кошкимы. Всё равно пӧрамме пие доры вуттӥ.

Пиосы дышетскизы, 30 манет стипендия басьтыса. Ми уксёен юрттыны ӧм быгатэ. Весь Инмарлы тау шуисько. Олокытын но ужаса, вагон ӝоктыса, уйёссэ возьмаськисьын пукыса, дышетскизы. Ноку но, уксёмы ӧвӧл шуыса, ӧз ӝожтӥськылэ. Вася пие шуэ вал: уксёед ке но ӧй вал, мама, милемлы кошкыны шуыса, гурт кузя кураськыса ӧд ветлы, оломае тырмытӥд. Арлы быдэ парсь вордӥмы, скал, кунян, ветыл, ыж…

* * *

Надямы Ижын улэ. Солэн фармацевт луэмез потэ вал. Но фармацевтэ пырыны быгатымтэ но, вуз карисе дышетсконо кариськем. Со профессия мыным чик уг кельшы вал: уй но нунал ужано, ялан пыд йылын сылоно. Отчы ик кылиз. Али менеджер луыса ужа.

Валямы Можга ёросысь ик Бадӟым Кибъя черкогуртын улэ. Со фельдшер. Талэсь азьвыл нылпи садын 23 ар тыршиз. Егит дыръяз Можга городэ интыяськиз вал – гинекологлы юрттӥськылӥз. Нылъёслэн бызён вань ук, карт шедьтӥз, тодон-валан басьтэмез потыса ик кылиз, семья кылдытӥз.

- Быгатэ-а, уг-а, ваньмон дырыз вань-а, ӧвӧл-а, мемеймы али ке но ялан ми понна ӟеч лэсьтыны тырше, сюлмаське, – шуэ Владимир Михайлович. – Ми асьмеос мӧйыесь ни кадь, но со милемды ялан улыны дышетэ.

- Ма, ачиз но Вова пырак ачим кадь ик, – пизэ ушъя нылкышно. – Ваньмы понна сюлмаське. Егор пизэ но тани армиысь пумитаны юри Огырчи станцие ветлӥз.

Нылпиосы монэ уг вунэто: пу вандыны но, бакча мерттыны-октыны но берто. Пырыкузы ик гид котырез, кыед вань-а, ӧвӧл-а шуыса, эскеро. Нош мон соослэсь бертэмзэс гинэ возьмаса улӥсько. Инмар нылпиосме мед утёз, шуисько. Анай понна мар кыле на: нылпиос умоесь мед луозы. Мон улӥ ини, мӧйыми, табере нылпиослэн нылпиоссы будо, соос понна сюлмаськытэк ӧвӧл. Котькудзы понна сюлэм висе ук. Дас кузя ини нуныкайёсы, кык правнукъёсы. Данъяськисько соосын. Огинэ люкаськиськом ке, трос луиськом ини.

Куддыръя висисько ке но, Воваелы со сярысь вераны уг дӥсьтӥськы. Дото ужась кариськисько. Со угось монэ соку ик сьӧраз нуоз. Доре бертэ ке, гуртоос но сьӧраз ик вуо. Капка азьысь машинамы уг бырылы, ваньзэс со учке, эскере. Кошке гинэ но, ку бертоз ни шуыса, нош сое юаса доре вуо. Телефон номерзэ куро, мон сётӥсько, адями юнме уз куры ук, кулэ, дыр, малпасько. Тон сётӥд-а шуыса, ноку юамез но, куаретэмез но ӧвӧл. Вова туж лякыт но сабырлы сямо. Адямиен вераськыны быгатэ. Песятаез со кадь вылэм.

4-тӥ классын дышетскыкуз ай, кролик вордыны кутскиз. Эшъёсызлэсь, лэся, шедьтэм. Со дырысен солэсь ӧм куштӥське ни. Школаын дышетскыкузы, нылпиос интернатын улӥзы. Одӥг пол мар ке сиыса, Вовалы алама луэм. Пидэс, пе, ӝог юрттэт сётӥсь машинаен Уча больницае нуизы. Ӵуказеяз ӵукна Вова врачлы, пе, шуэ: мыным доре берто ини, мынам кроликъёсы вань, соосты сюдыны кулэ. Со али но животъёсыз сярысь сюлмаське. Азбаре пырыкуз ик, соос доры коже.

* * *

Геняе доры но гуртоос лыкто. Юристлы пӧртэм юанъёсын вазиськыло. Ӵыжы-выжымы бадӟым. Нылпиос уг тодо ни пересь выжыосты, соин ик пиосылы шуисько – учке, валэктэ, юрттэ.

Азьвылзэ коркамес вемеен но маин сэзъямы вал. Пиос будӥзы но, шуо: мама, ойдо корка пуктом. Мон мар шуыны уг тодӥськы. Кытысь уксё? Колхоз председательмы Аркадий Вершинин но туж сюлмаськиз ини: газ, пе, пыртӥськоды-а? Дэмен кариське но уксё люкалэ, шуэ. Корка лэсьтон борды ваньзы тыпыр-тапыр кутскизы. Лэсьтӥськон материал нуллӥзы. Кык-куинь нунал куспын коркалэсь коробказэ ӝутӥзы. Тӧдьы кирпич но вуттӥзы, отопление но пыртӥзы.

Кузпалы кемалась улонысь кошкиз ини. Мон табере огнам улӥсько. Нокытчы уг поты кошкеме. Кудзы ке доры ӝамдэлы мынӥсько ке, сюлэмы доре куриське. Кылем гужем Вовалэсь корказэ возьматыны Геня монэ Дэри черкогуртэ нуллӥз. Одӥг уй кӧлӥ но, доре бертэме потыса, амалы быриз. Чаляк бертыны куриськисько. Мар карыса мон татын улом, шуисько. Пиосы куспазы туж тупаса уло. Нылъёсылы но шуисько: котькыӵе но дырды луоз, уродэзтэк ӟечез ӧвӧл, шуо, агайёсыныды тупаса улэ, мон ке ӧй луы ни, ог-огдэс адӟемпотостэм карыса но керетыса эн улэ.

Нуныкайёсы табере бадӟымесь ини: Надялэн нылыз юристын ужа. Васялэн бадӟымез нылыз Глазовын прокурор. Генялэн кыкетӥ нылыз но юристэ дышетске.

Нылпиос ялан монэ чакласа возё, уйин но жингыръяло. Асьсэос ик телефон басьтыса сётӥзы. Куасэн бызьылӥськом шуо бере, ӝытъёсы черсӥсько, ваньмызлы пыдвыл керттӥсько. Телевизорез учкыны туж ик уг яратӥськы, ма, ужась адями ку сое учкыны ваньмоз?

* * *

Туала улонмылы чик ӝожтӥськеме уг поты: газ но, ву но корка пыртэмын, пенсия тыро, бусьтыр улонэн улӥськом. Табере котьмае лавкаысь басьтыны луэ. Вазен не сиён, не дӥськут ӧй вал. Нылпиосылы пичи дыръязы ваньзылы вурыса, керттыса, черсыса ачим пукылӥ. Ку меда ваньзэ лэсьтыса вуисько вылэм. Нылпиос бертыкузы мар тыныд кулэ, мар ваём шуыса юало, мыным номыр кулэ ӧвӧл ни, тазалык гинэ мед луоз, шуисько. Та дунне вылын солэсь дуноез мар вань на.

Вордосын будэмысьтым кӧты урод ӧй вал. Аслад мемееныд кыӵе меда улон шуыса гинэ, малпаськылӥсько. Мемейме но валасько: сомында ым бере, вордосэ сётытэк, амалыз но ӧй вал, дыр, ини…

Любовь Тихонова.

Горловъёслэн семьязы.

Дэри ёросысь Лудорвай гуртысь Горловъёслэн семьязы 2010-тӥ арын «Анайлэн данэз» гадьпусэн пусъемын.

Галина Николаевна но Анатолий Васильевич 5 пинал будэтӥзы. Та вакытэ вань нылпиоссы пыд вылазы султэмын, 6 нуноксы будэ.

Алнаш ёросысь Блатгуртын вордскем Галя Орлова пичиысен нылпиосты яратылӥз. Но дышетскыны вамыштӥз эмъясьлы. 4 ар ӵоже Ижысь медучилищеын тодон-валан люказ. Берпуметӥ курсын дышетскыкуз, патер кузёез сабырлы пияшен тодматоно кариськем.

- Дышетсконме йылпумъяса, ужаны гинэ интыяськи но – декретэ потоно луиз, – вера Галина Николаевна. – Озьы быръем удысам ар сяна ужаны ӧз кылды – бӧрсьысь бӧрсе куинь пи вайи.

Галина Николаевна куинь пиен гинэ ӧз буйгатскы, ялан ныл витиз. Но… ньылетӥез пиналзы но пи вордскиз. Вань пиосыз нечётной аре вордскемын бере, витетӥзэ чётной аре вайыны дасяськиз.

- Нылме вордэме бере шумпотэменым бӧрдӥ но, – шуэ Галина Горлова. – Куинетӥ пиналмы бере кузпалылэн куаретэмез потӥз ик, тырмоз ни шуыса, табере шумпотэ гинэ. Куинетӥез пиналмы ныл луысал ке, роддоме ӧм ветлысалмы ни, дыр. Ваньзы гуртысьтымы 11 классэз йылпумъязы. Сузэръёсы шуылозы вал: ма, пе, пиосыд штанизэс школаын пӧськыто, училищее мед мынозы. Нош мынам бордам мед луозы кадь потӥз, ужаны коть шедё.

Нылпиоссы школаез йылпумъямзы бере гинэ Горловъёслэн семьяязы шуг-секытъёс вуыны ӧдъяллям. Пиналъёссэс городэ келяны коньдон кулэ, нош кузпалъёслэн уждунзы пичи. Анатолий Васильевич тазалыкез лябен ужаны ќз быгаты.

Нылпиосын пукытозяз, Галина Николаевна совхозын пӧртэм ужъёсты быдэсъяз: воспитательын но ужаз, скал но кыскиз, нош та вакытэ автозаводлэн поликлиникаяз эмсузэр луыса тырше. Нуналлы быдэ город базаре сиён-юонэн вуз карыны ветлэ. Гид тыр пудо вордо, музъем ужен выро. Поттэм коньдонэнызы юрт но пуктӥзы, трактор-машина басьтыны быгатӥзы.

Туннэ Горлов кузпалъёслэн вань пиоссы кузпалъяськемын. Кенъёссы Можга, Эгра ёросъёсысь, Марий Эл Республикаысь ке но, ваньзы удмурт кылэз тодо. Тупаны но кулэ, кыкез кензы одӥг нуналэ, одӥг аре вордскемын. Та вакытэ 6 нуноксы, матысь дыре эшшо куиньлы йылыны медэ. Али быдэс семьяен нылзылы сюан шудыны дасясько.

Валентина Емельянова.

Кез каргуртысь «Надежда» клубе ветлӥсьёс Удмуртилэсь данзэ утизы Россиысь егит семьяослэн клубъёссылэн фестивалязы.

Ижын та нуналъёсы радъяськиз Россиысь егит семьяослэн клубъёссылэн фестивальзы. Ужрадэ люкаськылӥзы Ханты-Манси, Ямало-Ненец, Вологда, Волгоград, Пермь, Курган, Свердловск, Краснодар но уно мукет улосъёсысь семьяос.

«Заря» лагерьын соку ик шулдырлэсь шулдыр луиз: кыдёке чузъяськизы пиналъёслэн жингрес куараоссы, анай-атайёслэн кырӟан-веранъёссы. Паймоно кадь: семьяос кышкаллямтэ сюрес вылэ вож нуныосынызы потыны. Та гинэ мар! Сьӧразы песянай-песятайёссэс но вайиллям – соослэсь ӟечгес утиськисез шедьтод на шат? Озьы быдэс фестиваль огъя семьялы пӧрмиз, шуыны луоз. Кӧня ке нунал ӵоже егит семьяос асьсэлэсь быгатонлыкъёссэс, мукетъёсызлэсь маин ке аспӧртэмлыко луэмзэс возьматӥзы. Йылпумъянъёс лэсьтон понна калык люкаськиз Удмурт театре. Котькудӥз клуб пусъемын вал зарнивуам кадь кисьтаськись дипломен но дуно кузьымен – ноутбукен.

Пӧртэм улосъёсысь вуэм семьяосын пумиськыны мылкыд кариз Удмурт Республикалэн Президентэз Александр Волков. Тэшкылиосын, егитъёсын тырмем зал шоры учкыса, со пальышак потӥз:

- Семья – обществолэн валтӥсь ёзэз. Сотэк ӝутыны уд быгаты кунэз. Басьтом тани кылем даурысь 90-тӥ аръёсты – азьвыл идеология куашказ, семьялэн данэз бырыны ӧдъяз. Шӧдӥмы: таин валче кунмы но уллань питыраны кутскиз. Талы пум поныны дыраз быгатӥмы – улонэ пыӵаны кутскизы кун программаос, арысь аре ӟечгес но ӟечгес радъяськиз егитъёсын ужанъя политика. Таин валче тупатскыны ӧдъяз демографияя югдур но. Удмурт шаер сярысь нимысьтыз верано ке, утемын вал егитъёсын ужанъя министерство – со пыр улонэ пыӵало уно проектъёс-программаос. Шаерамы ужа перинатальной центр, егит семьяослы улон инты басьтыны висъяське капчиятэм кредит. Берло вить ар куспын нылпи садъёсын ватсаса усьтэмын 4 сюрс инты, туэ висъяськоз эшшо 2 сюрс инты. Угось пиналъёслэн лыдзы Удмурт шаерын йылэ. Тазьы ик мед луоз азьланяз но! Мед кылдозы юнэсь семьяос, мед вордскозы тазаесь пиналъёс!

Фестивале пыриськисьёс Удмурт шаерлы синмаськизы. Куспазы та пумысен юалляськон но ортчытӥзы. Ӝыныез али ик соглаш Удмуртие каръяськыны. Валэктӥзы: татын егит семьяос – кунлэн шуныт бурд улаз…

* * *

Фестивальын Удмурт шаерлэсь данзэ утиз кык клуб: Кезысь «Надежда» но Воткинск ёросысь Новый каргуртысь «Престиж».

- Егит семьяослэсь клубзэс кылдытон сярысь малпан шуак-дуак кылдӥз, шуыны луоз, – вера Кез каргуртысь «Надежда» клублэн кивалтӥсез Виктория Максимова. – Огпол семьяосын люкаськимы кафее. Пукон сяменымы сюлэмъёсмес усьтӥмы, кырӟамы-верамы, тунсыко конкурсъёс но ортчытӥмы. Кӧня ке дыр ортчыса, нош ик люкаськимы. Бӧрысь ини егитъёсын ужанъя «Надежда» центр бордын кылдытӥмы егит семьяослэсь клубзэс. Озьы пӧртэм проектъёс борды басьтӥськимы. Кылсярысь, арлы быдэ пусйиськомы семьяослэсь сюан шудэм нуналзэс, пыриськиськомы турслётъёсы, ёросамы ортчись ужрадъёсы. Удмурт кылын чузъяськись ужрадъёс но малпаськомы. Кылем арын ми вормисе потӥмы шаерамы ортчись «Под крышей дома своего» ӵошатсконын. Озьы туэ кужыммес мертамы быдэс Россиысь егит семьяос пӧлын. Аслам семьяе вылын валай: таӵе бадӟым ужрадъёсы дэмен пыриськон семья кусыпъёсты эшшо но юнматэ. Угось сцена вылэ потыса, эшшо но мургес шӧдӥськод, макем воштонтэм тынад кузпалыд, – шуиз Виктория.

Пусйымон: «Надеждаос» вормизы «Тужгес ӟечез адӟытон» номинациын. Нош Новый каргуртысь «Престиж» клуб висъяськиз усто эктэменыз.

Елена Никитина.

Ольга но Роман Куликовъёс сюан шудӥзы 11-тӥ ноябре 2011-тӥ арын.

Мар возьма асьмеды 2012-тӥ арын? Америкаысь бырем майя калыклэн календарез курдатэ: дунне быроз. Осконо-а талы? Оло, матэктӥсь ар зэмен ик секытлэсь но секыт луоз? Юнме шат тросэз качыян (високосной) арлэсь кышкало? Сюан уг шудо, корка пырон уг ортчыто, бадӟым ужъёссэс берлолы кельто…

«Эктозы» планетаос

Пӧртэм дауръёсы пӧртэм калыкъёс сӥзьылӥзы дунне быронэз. Кылсярысь, калык туж кышкаса витиз 2000-тӥ арез. Но туннэ ке но дунне ӧз быры на. Али но уз. Тазьы оскытэ Удмуртиысь спорт удысысь дано ужась, терапевт, астрологиен тунсыкъяськись Виктор Двоеглазов:

- Зэм, 2012-тӥ арын инмысь кизилиос чакласькыны косо ик. Сак кариськоно ни 13-тӥ ноябрьысен. Та нуналэ Шунды быдэсак ӵоксаськыны кулэ Толэзен. Тае чаклалозы Шунды вадьсын сылӥсь кизилиос – Унук-Эльхайя но Алголь. Берлоез «дьявол» шуэмез возьматэ. Зэм, Шундылэсь «кысылэмзэ» адӟыны кылдоз Америкаын, Австралиын, Выль Зеландиын улӥсьёслы но Тихой океанэтӥ уясьёслы гинэ. Озьыен, ӵапак тапалъёслы ик бадӟымгес кышкытлык сӥзе со.

Чакланы луэ созэ но. Шунды ӵоксаськыку, котыраз сюрозы Плутон но Уран планетаос. Озьыен, инкуазьын уранэн герӟаськем катастрофа луыны быгатоз. Шуом, тӥяськоз электрокужым сётӥсь станция, инме лэзем спутник, сайкалоз вулкан…

ӵапак 30 нунал ортчыса – 12-тӥ декабре – Юпитер, Кыктоослэн кизилиязы сюрыса, ваче вуоз Толэзен. Таослэн гожазы ик тупалоз Альдебаран кизили. Тодосчиослы осконо ке, дуннеысь политикаын со пытьызэ кельтытэк уз кыльы. Со сяна, зуркыт улонэз луоз ньылетӥ властьлэн – ивор вӧлмытӥсь ёзъёслэн.

21-тӥ декабре майяос дунне быронэз сӥзё. Ӵапак соку чакланы луоз планетаослэсь «эктэмзэс». Огзы бӧрсьы огзы султозы Марс, Плутон, Шунды, Меркурий, Венера но Сатурн. Адӟиськозы соос Скорпионлэн кизилияз. Озьыен, адямилэн малпанэз, дунне шоры учконэз вуоно арын воштӥськыны кулэ. Но та нунал бырон уг вайы, – йылпумъя веранзэ Виктор Двоеглазов.

Гочатэ лыдпус

Озьыен, 12.12.2012-лэсь кышкано ӧвӧл. Сыӵе гинэ арлы быдэ «чебересь» лыдпусъёс кылдыло. Кылсярысь, 11.11.2011. лыдпусэ егитъёс тужгес трос сюан шудӥзы. Соос пӧлын вал мынам эшъёсы но – Ольга но Роман Куликовъёс.

- Мудрон лыдпуслы уноез егитъёс гочало, – шуэ Оля. – Тросэз пинал муртъёс уго асьсэлы уг оско. Куалекъяло: пӧрмоз-а семья улонзы? Кузпалъяськыны но уноез дась уг луо. Нош татын – 11.11.2011. Егитъёс асьсэлы шуо: куинь полэс числое сюан ортчытӥмы ке, одно ик шудо луомы.

Асьмеос сярысь ке верано, ми Ромаен юромо 11-тӥ ноябрь сьӧры ӧм уйиське. Ар но ӝыны пумиськылэммы бере гажанэ кизэ сётӥз: Оля, бызь мыным. Малпамы: гожтӥськомы ноябре. Йырмес тӥямы на: 5-тӥе яке 7-тӥе? 11 число сярысь тодамы но ӧй вал. Берло гинэ со нуналэз бырйим. Загсэ куриськон гожтыны мынӥмы 8 но ӝыныын ӵукна. Калык, юртэ тэрытэк, урамын черодзэ вите. Сомында адямиез адӟылэме ик ӧй вал. Ваньзы 11-тӥ ноябрь шоры мертаськиллям. Тросэз – 18-сысен 25 аресозь. Котьма ке но милемлы удалтӥз ик. Ижысь эшъяськон юртын гожтӥськон дыр тупатӥзы ӝыт 6 часлы. Черодъя ми – 26-тӥосыз. Мышкамы эшшо 15-ё вуоно кузпалъёс вал на. Али малпасько: яратыса но визьмын улӥд ке картэныд, котькыӵе числое бызь – уд люкиськы.

Загс ужпумъёсъя комитетлэн тӧроез Людмила Попова но шуэ:

- ӵапак чебер лыдпусъёс сьӧры уйиськисьёс пӧлысь ик тросэз люкисько, огшоры нуналэ кузпалъяськемъёсын ӵошатыса. Сюан шудыса уз вуэ кожало, лэся, дырто. Одӥг-кык ар но ӵош улыса уг вутто, керетыны кутско, ог-огзэс валамысь дугдо но ог-огзылэсь пегӟо. Таин сэрен мудрон лыдпусъёслы синмаськыны кулэ меда?

Осконо аслыд

Куинь полэс лыдпусъёс шоры мукет сямен учке Ижысь «Психолог плюс» огазеяськонысь специалист Алеся Марчук:

-  Адями – кышкась маке. Мае ке уг вала, малэсь ке кышка, аслыз уг оскы, янгыша ке, одно ик маке я кин ке вылэ куштыны выре: вот соин йырин тазьы пӧрмиз. Сюлэм вылаз уго озьы капчигес луэ.

Шуом, куд-огез юзыр-кезьыр луэ, пятница 13-тӥ числое тупа ке. Ассэ азьло ик дася кадь: та нуналэ юн чакласьконо. Шудтэм учыре шедьыны кема ӧвӧл. Аслыз ачиз со озьы программа кылдытэ. Сыӵе дыръя одно ик куректон адӟе ни. Нош мукетыз шумпотыса возьма 13-тӥ числоез: та нуналэ мыным котьку удалтэ, али но шумпотон луоз, дыр. Валамон ни: шуд вуэ.

Куинь полэс лыдпусэ сюан шудон пумысен но озьы ик шуыны луоз. Номыр уродэз ӧвӧл сыӵе нуналэ праздник лэсьтыны. Но юн осконо: шудо луоды. Соку уд люкиське. Нош осконды юнмамын ӧвӧл ке, юанъёсты кылдыло но куалекъяськоды ке, бызён-басьтон сярысь малпаськыны вазь на. Азьвыл куалекъясьёс ик берло люкисько уго.

2012-тӥ арысь 12-тӥ декабрьлэсь но кышканы уг яра. Осконо: со шудо нунал. Соку улонды зэмзэ но вӧй вылтӥ кадь кошкоз!

Елена Сараматова.

Егитъёс ас понназы кариськыны ярато.

Арлыд люкамъя ӵемысь вераськом: быдэ вуон вакытъёсмы шудоесь вал. Тодамы но уг лыкты ни: шудо сяна, соос туж секыт ортчизы. Будӥсь нылпиосмы шоры учкыса, лулӟылӥськом: мар уг тырмы егитъёслы, кызьы соосын огкыл шедьтоно?

Удмурт Правительство бордысь Семья ужпумъёсъя но демографиын политикая комитетлэн кивалтӥсез Ольга Лубнина ӝожмыт лыдпусъёсты вера. Ортчись ар куспын республикаямы нылпиосын, быдэ вуымтэосын герӟаськем 140-лэсь ятыр кышкыт учыръёс шараяськизы. Нылпиос дорысьтызы кошко, школае уг ветло… 44 нылпи быриз, со пӧлысь 13-ез улонысь кошкиз ас мылкыд каремезъя.

- Кыӵе малпанъёсын улэ пинал, мар солы уг тырмы? Та юанъёс сюлмаськытыны кулэ анай-атайёсты но, дышетӥсьёсты но. Палэнэ кыльыны кулэ ӧвӧл быдэс общество, кун, – шуэ Ольга Владимировна.

Одӥгзэ учырез тодамы ваёмы. Улонысь ас мылкыд каремезъя кошкиз 17 аресъем пияш. Дышетске вал Ижысь одӥгаз училищеын. Улӥз инвалид атаеныз ӵош. Анаез дырзэ ортчытӥз пытсэт сьӧрын. Пияш эшъёсызлэн но, дышетӥсьёсызлэн но тодэ ваёнъёсазы умоен гинэ кылиз. Дышетскиз со «4»-ёслы но «5»-ёслы. Мыло-кыдо пыриськиз училищелэн улоназ, пӧртэм ужрадъёсын котьку адӟем карымон вал. Но одӥг нуналэ пӧсьвуась ивор быдэс училищеез гуньдытӥз.

Пияш ӝожтӥськонэз ноку тодылымтэ. Соин но, вылды, дышетӥсьёсызлэн но, быдэ вуымтэосын ужасьёслэн но йыразы юан ӧз ик чилектылы: ворме-а со вылаз усем ныпъетэз? Кытысь со коньдон каре, ма сие, маин дӥсяське…

* * *

Арлы быдэ республикаямы радъяськылэ «Котькуд пиналэз – парта сьӧры» ужрад. Лыдпусъёс возьмато: дышетскыны мылкыдтэк ветлӥсь пиналъёс уката трос шоркарын. 300-лэсь трос пинал нокыӵе мугъёстэк урокъёсы уг вуылы.

Кызьы вера Иж город администрациысь дышетонъя управлениысь валтӥсь специалист Светлана Емшанова, 1-тӥ сентябре партаос сьӧры 31 школьник ӧз пуксьы. Быдэ вуымтэосын ужанъя инспекторъёс, дышетӥсьёс, психологъёс огъя кужымен троссэ берыктӥзы ик школае.

- Куинез нылъёс федеральной розыске ялэмын, – пусъе Светлана Геннадьевна. – Анай-атайёсынызы огкыл шедьтытэк, соос дорысьтызы кошкиллям но берытскиллямтэ ни. Одӥгез пияш – син азямы. Но сое нокызьы визьманы уг луы: дорысьтыз школае шуыса кошке но… урокъёсы уг вуы. Та понна анай-атайзэ ке янгыше уськытоно, номыр понна кадь. Соос уг юо, уг кыско, уже ветло.

* * *

Дышетӥсьёслэсь тодон-валанзэс будэтонъя институтысь психологияя кафедраысь валтӥсь преподаватель Вероника Никонова вера:

- Анай-атайёс, нуналлы быдэ уже ветлэм, пиналъёссэс дӥсям-сюдэм сяна, соосын вераськыны, сюлмаськонъёсынызы тунсыкъяськыны кулэ. Нылпилы секыт йӧтэ, сое уг валало ке анай-атайёс, дышетӥсьёс. Таин сэрен ик со укылтэмъяськыны кутске.

Специалистъёс вазен шуо вал: быдэ вуон вакыт кутске 13-14 арескысен. Али та лыдпусэз 11-озь васькытӥзы ни. Лыдъяське: нылпи ас ӧраз выльысь пыре 16-17 арессэ тырмытэмез бере. Но куд-огез 40 аресказ но ассэ пичи мурт кадь возе на.

Кыӵе бен воштӥськонъёс ортчо та вакытэ пичи адямилэн мугораз, улонэз шӧдоназ? Нырысь ик, солэн гормонъёсыз шудыны кутско, воштӥське мугорыз. Нылпи трос сиське ке но, ӟызы возиське. Бен, ӝуждалаез будэ – шачы кадь луэ. Куддыр юнме шорысь ӟырданы кутске, нокыӵе мугъёстэк керӟегъяське.

Кыкетӥез – нылпилэн улон шоры учконэз воштӥське, бадӟымъёслэн улоназы аслэсьтыз интызэ утчаны кутске. Мар анай-атаез солы вера – одно пумит каремез потэ. Озьы со возьматэ: мынам аслам малпанэ вань, мар кароно, ачим тодӥсько. Басьтом таӵе учырез. Пиналлэн бадӟым экранысь кино учкемез потэ. Но со кинотеатре уз мыны, анай-атаез отчы ыстӥзы ке.

- Жаляса верано, пиналлэн тулкымъяськон дыръёсыз луо ке, тросэз мӧйыос сое кылымтэ-адӟымтэ кариськыны туртто, – азьланьтэ веранзэ Вероника Владимировна. – Керӟегъяськоз-шузияськоз но визьмаськоз ай, шуо. Ӵапак таӵе калэ вуэм пиналъёс асьсэлы урамысь эшъёс шедьто, шӧмъяны кутско наркотикъёсты, пӧртэм сектаосы сюро, дорысьтызы кошко… Нылпи медаз шӧды: со огназ, со анай-атаезлы кулэ ӧвӧл шуыса. Матысьёсыз сое уг нуныяло, уг ярато ке, коть шораз мед кесяськозы, мед уродъяськозы кадь потэ солы.

Бен, психолог пинал шоры черекъяны уг косы: кусыпъёс озьы юнгес уз луэ. Нылпиез кылзыны-чиданы дышетсконо. Куддыръя солы тырмымтэоссэ меӵак вераса ик умойгес луоз. Но пусъёно, ачиз со туж ӟеч, трос умой сямъёсыз, но ассэ воземез котьку ик чебер уг адӟиськы.

- Валамон: нылпи таӵе учыръёсы соку ик соглаш уз кариськы визьнодасеныз, оло, мытылыны но кутскоз, – пусъе Вероника Никонова. – Но маке-маке солэн йыраз кылёз, дыр ортчемъя, оло, юалоз но: нош мар карыны луоз урод сямызлэсь мозмытскон понна?

* * *

Психологъёс пусъё: быдэ вуись пиналлэн кытын ке но одно висъяськемез потэ. Кылсярысь, дышетсконын уггес пӧрмы ке, со одно мед эшъяськоз спортэн, кыӵе ке секциосы, кружокъёсы мед ветлоз. Куддыр со эшъёсыз пӧлын тузӥ дӥсяськеменыз висъяськыны турттэ, куддыр шаплы сямызлы оскиське.

- Нылпи возьма, соин матысьёсыз бадӟым адямиен кадь мед вераськозы ни, – шуэ Вероника Никонова. – Озьы ик луыны кулэ. Дӥсь быръе тӥледлы кельшисьтэмзэ? Мед соя луоз. Тусыз, мугорыз аслыз уг кельшы? Юрттэ та сюлмаськонзэ но вормыны. Аслыз мултэс зӧк потэ ке, вералэ: со понна тусыз муспотон. Нош валаса дӥсь бырйиз ке, зӧк мугорыз но чебер гинэ адӟиськоз…

Эшшо: 13-14 аресъем пиналъёс ас понназыгес кариськыны туртто ни. Туж умой, нылпилэн нимаз сэрегез луиз ке. Отын со – кузё, кызьы сое шулдыртэмез потэ, озьы ик мед лэсьтоз. Лыктозы эшъёсыз – лушкем бӧтьыртыны интызы луоз. Огназ дорын ке, кылзоз-а со крезьгур, книга лыдӟоз-а – люкетӥсь уз луы. Нош дораз йыгаськытэк пыраны уг яра! Уката но анайлы – пиез доры, атайлы – нылыз дӥне. Ноку мерсконо ӧвӧл пиналлэн комнатаяз утялтӥськыны. Ачиз со тузонэз но мед ӵушалтоз, выжез но сузялоз, шкафысь дӥсьёссэ ас мылкыд каремезъя мед тыроз. Нылпи оскиз ке, со ӧвӧлтэм дыръя арбериоссэ нокин уг иса, уг учкылы – ассэ дораз гань-гань возёз, анай-атаезлы осконэз юнмалоз.

Ӧвӧл пиналлэн нимаз комнатаез? Таӵе дыръя солы кузьманы луоз усьтонэн пытсаськись пичигес гинэ сандык. Отын со быгатоз возьыны дневникъёссэ, туспуктэмъёссэ но мукет лушкем арбериоссэ.

* * *

Туннэ асьмеос эскерим та бадӟым но сюлмаськытӥсь ужпумлэсь туж пичи гинэ люкетсэ. Трос юанъёс кылдозы на, вылды – соосты тӥ ыстыны быгатӥськоды редакцие – визь-кенешен юрттозы психологъёсмы.

Йылпумъяса тазьы вералом: быдэ вуон вакыт туж тунсыко но. Анай-атайёслы луонлык кылдэ асьсэлэсь егит дырзэс тодэ вайыны. Оло, таӵе дыръя тӥ шуак валалоды: сокем трос огкадез пиналэныды. Выльысь берытскоды пинал дыр малпанъёсады, осконъёсады но ӝожомонъёсады, тодэ ваёды, мае возьмаськоды вал анай-атайдылэсь, эшъёстылэсь, улонлэсь… Асьтэлы нош ик тӧлпери сямо, ӝог ӝуатскись, ӧжытак мытылӥсь но ачимъяськись потыны кутскоды. Ӵапак таӵе дыръя пиналды шоры зэмос эш сямен учкыны ӧдъялоды. Со тӥледлы одно оскоз лушкем малпанъёссэ, тӥ но солы усьтыны дӥсьтоды сюлмаськонъёстэс но шумпотонъёстэс.

Элина Кумачёва.

Форумлэн ужаз пыриськиз Удмурт Республикаысь Нылкышноослэн огазеяськонэнызы кивалтӥсь, Кун Кенешысь депутат Зоя Степнова. Со кузьымъёсын но таукарон гожтэтъёсын пусйиз Уддядиысь но Вуж Сальялась нылкышно огазеяськонъёсын кивалтӥсьёслэсь Валентина Кожевниковалэсь но Марина Моряковалэсь ӟеч ужамзэс. Соослэсь адӟем кароно воргорон огазеяськонъёслы но, шуиз со.

Иван Аркашев.

Ӵошатсконэ пыриськемъёс 3 эскеронэз ортчизы. Нырысь ик быгатыса возьматоно вал астэ но семьядэ. Но калык тужгес шумпотыса учкиз конкурслэсь кыкетӥ люкетсэ. Атайёс дасязы яратоно сиёнзэс. Залын ческыт зын лӧсъяськиз. Жюри азе мар но поттэмын ӧй вал: ӵынатэм кыр парсь сӥль, урдлыос, чорыг, плов, табань но такалэсь шашлык. Пӧраськыкузы воргоронъёс кинлы но ӧз пӧрмылэ: пӧйшурасьлы, чорыгасьлы, официантлы…

Берпуметӥ ӵошатсконын атайёс кырӟазы, эктӥзы, сценка шудӥзы.

Устоез атай луиз Юрий Анатольевич Акбаев.

Иван Аркашев.

- Соос валаса уг вутто, шӧдске, куинетӥ пинал ваем понна 200 сюрс манет ваньмызлы уг висъяськы шуыса, – пусъе Ольга Владимировна. – Со чакламын «Егит семья» программа чотын улон инты басьтӥсьёслы гинэ.

Трос нылпи будэтӥсь семьяослы юрттэт сётон пумысен Ольга Лубнина шуиз: кун соосты уг вунэты. Льготаос арысь аре йыло, коньдон тросгес висъяське. Озьы нылпиосты город транспортын дунтэк нуон-ваёнлы, школаын дунтэк сюдонлы, театръёсы но мукет культурая учреждениосы коньдонтэк лэзёнлы но мукетызлы республикамылэн бюджетысьтыз туэ 127 миллион манет чакламын вал. Вуоно арлы та лыдпус 145 миллион манетозь йылтэмын ни.

Кун Кенешысь депутатъёс берлояз сессиязы гинэ кутӥзы: ЖКХ понна тыриськонъёсты 30 процентлы кулэстоно трос нылпи будэтӥсь вань семьяослэсь, доходзэс лыдэ басьтытэк. Вазен та льгота чакламын вал ёрмыса улӥсь трос нылпиё семьяослы гинэ.

- Кун ласянь эшшо одӥг пусйымон вамыш: улон интылы ёрмись трос нылпиё семьяослы дунтэк музъем висъян, – пусйиз комитетлэн кивалтӥсез. – Городын улӥсьёс 15 соткаозь, гуртоос 25 соткаозь музъем басьтыны быгатозы. Отчы кыскемын луоз ни тыл, ву но мукет коммуникациос.

Улон интылы субсидия басьтонлы кылдытэмын нимысьтыз черод. Отчы али 1 сюрс 200-лэсь трос семья султэмын. Но, жаляса верано, араз ог 50 семьялы гинэ удалтэ – республикамылэн бюджетысьтыз талы арлы быдэ 20 миллион манет висъяськылӥз. Бен, 2012-тӥлы чакламын 30 миллион манет, иське, корка пыронъёс тросгес луыны кулэ.

Элина Кумачёва.