Быдӟым визьдыр туэ кутскиз 27-тӥ феврале. Нимызъя ик валано ини, черк календарьын со тужгес валтӥсез луэ шуыса. Кӧсутён кыстӥськоз Паскаозь, та бадӟым но шумпотон вайись праздникез пусъёмы 15-тӥ апреле.

Мар со визьдыр? Нырысь ик, малпаськон вакыт. Асьмелэн лулмы сюрес утча, чылкытатске, пушдуннеез кылзӥське, дунъя, шонер-а асьмеос улӥськомы. Кӧсутён вакытэ котькуд адями валаны кулэ сьӧлыко луэмзэ но ӧпкельыны быгатэмзэ. Кырыж, кырсь сюрес вылысь палэнскон но чылкытатскон сярысь тани ма гожтӥз Митрополит Антоний Сурожский:

- Асьмеос лек вераськиськом, урод вамышъёс лэсьтӥськом, йырамы кырсь малпанъёс бергало, сюлэммы чурыт луэ. Озьы ке но мыдлань улэммы, кинэ ке вӧсь кареммы, лекъяськеммы понна одӥг-ог возьыт луылэ. Со ӧпкелён ӧвӧл на. Адями быдэс улонзэ урод вамышъёсызлы но алама малпанъёсызлы луыса возьдаськыны, жаляны, курадӟыны быгатэ, но Ин Эксэйлыклэн ӧсъёсыз уз усьтӥське со азьын. Малы ке шуоно возьытлык вӧзы ватсаськыны кулэ на зэмос ӧпкелёнлэн валтӥсь люкетэз – Иисус Христослы осконэн но ӟеч малпанэн вазиськон. Ин Эксэйлыклэн тырмоз яратонэз асьмеды простить карыны, кужмыз – асьмеды воштыны. Ӧпкелён – со улонлэн кожонэз, сюлэммылэн но малпанъёсмылэн воштӥськемзы, со асьмеды ымнырын берыктэ Утисьмы пала. Куд-ог дыръя адямиез простить карыны но уг луы кадь. Но Иисус Христос музъем вылэ асьмеды курланы ӧз вуы, адямиосты, сьӧлыко муртъёсты утьыны лыктӥз.

Тросэз потэ асьме бордысь. Кыӵе ӵем адями шуэ: Ин Эксэймы, юртты мыным. Сёт чидандэ, чылкытлыктэ, ӟечезлы оскондэ. Но жаляса верано, учыр кылдыку, уж вылын ум быдэстӥське сое, мае куриськом, Утисьмылы вазиськыкумы. Шонер сюрес вылэ султžськом, Христослэн куронъёсызъя улыны кужым шедьтӥськом ке. Сотэк Иисус Христос асьмеды уз утьы. Уго Со вераз: ваньзы шуозы «Господи, господи» но пӧлысьтызы куд-огез гинэ шедёз Ин Эксэйлыке. Сюроз сыӵеез, кин лыктоз емышен.

Та емышъёсты ваньмы тодӥськом: тупаса улон, яратон, чиданлык, востэмлык, возьытлык. Вань та емышъёс туннэ ик музъем вылын улонэз райлы пӧрмытыны быгатысалзы, адямиос уродэзлэсь куштӥськыса, ӟечгес, лякытгес луыны тыршысалзы ке.

Адями шуг-секытэ, кайгуэ шеде ке, Ин Эксэйлы вазиське, юрттэт курыса. Асьмелы Христос шуэ: мон тонэ простить кари, табере тон, тау карыса, шонер улыны кутскы.

Нырысь ик, асьмеос дышетскыны кулэ улонмес дунъяны но валаны, тэрытӥськыны вань адямиосын, учыръёсын, шуг-секытъёсын. Куд-ог дыръя со туж секыт. Ин Эксэй косэ: яраты матысьтэ астэ кадь. Нош асьмеос мар шуиськом? Мон ярато семьяысьтым, бӧлякысьтым адямиме, но тазэ, синазькыль луисьсэ, уг. Ӵем дыръя Дун-чылкыт Кылчин интые, ачиз интые, Христос дорамы ыстэ сыӵе адямиез, кудзэ асьмеос ум гажаське, ум яратӥське яке воксё адӟемпотостэм кариськом. Соку вунэтӥськом Ин Эксэйлы вазиськеммес, сётэм кылмес, адямиез тодымтэ-адӟымтэ улсы кариськом. Но эн вунэтэ: котькуд шуг-секытэз, кельышлы яке кельшымтэ муртэз тӥ доры ыстэ Ин Эксэй.

Куд-ог дыръя котырысьтымы адямиосын кусыпъёс туж секытэсь луо. Малпаськод, малы та адями интыын мукетыз ӧвӧл, малы ӟечез ӧз лыкты? Асьмелы потэ, кӧтӝожмы вунысал ке, простить карысалмы вожмес поттӥсь, обидись, ултӥясь адямиез. Но зэмос простить карыку, сьӧлыко мурт шоры учко но шуо: ӟеч-а тон, урод-а, мон тонэ аслэсьтым киросме сямен нуо Ин Эксэй доры но шуо: Утисьмы, мон быдэс улонме нуи та адямиез, малы ке шуоно жаляй, со быроз шуыса. Табере курисько сое простить карыны, Тон мынэсьтым но сьӧлыкъёсме мед куштод шуыса.

Макем умой луысал, адямиос ог-огзылы юрттыны тыршысалзы ке, урод сюрес вылэ донгем, туйылэм, ултӥям, исам интые, сьќлыко муртэ простить карысалзы ке. Визьдыр адямиослы таӵе луонлык сётэ.

Тужгес но чурыт куронъёс кӧсутёнлэн нырысетӥ, куинетӥ но берпуметӥ, Страстной, арняосаз. Черк тодэ вайытэ: визьдыр – со диета ӧвӧл. Нырысь ик асьмеос лулынымы чидась луыны кулэ. Вормыны адямиез сӧрись шекъёсыз: вылтӥяськонэз, юонэз, калгонэз, пӧяськонэз, вожпотонэз, мытылонэз. Кӧсутьыку сиён-юонъя чурыт куронъёс юртто ляб палъёсмес вормыны.

Визьдыре ӵемгес тыршоно черке ветлыны, службаосты кылзыны, вӧсяськыны, причастие басьтыны. Шулдыръяськон сярысь вунэтыса, умойгес луоз.

* * *

Черк календарез учконо ке, 15-тӥ мартэ асьмеос сӥлы карим Иисус Христос Анайлэсь «Державной» оброссэ. Нош 20-тӥ мартэ сьӧлыкоос понна дурбасьтӥсь оброс азьын вӧсяськоно. Споручница оброслы вазиськыны луэ котькуд нунал но Ин Эксэй Анайлэсь курыны юрттэтсэ сьӧлыкъёсмес куштон вылысь. Кемалась ик ӧвќл Июльское черкогуртысь Покров храмын шедьтэмын сьӧдэктэм оброс. Олег баӵко та обросэз туж шумпотыса пумитаз, сое сӥлы кариз, службаос ортчытъяз. Озьы та оброс син азьын югектыны ӧдъяз. Ар талэсь азьло икона нырысьсэ юрттӥз шуге-леке шедем адямилы. Коньдонэн йырин урод югдуре сюрем мурт трос вӧсяськиз Споручница оброслы. Ин Эксэй Анай юрттӥз солы, вань судъёсты адями вормиз но ассэ шонере поттӥз.

Владимир Шкляев.

Черк календарьын февраль толэзе кык валтӥсь праздник: 15-тӥ тулыспалэ пусйиськом Ин Эксэез пумитанэз (Сретениез), 27-тӥ феврале кутске Быдӟым Визьдыр.

Сретение – вашкала славян кыл, ӟуч сямен со «пумиськон» шуэмез возьматэ, серб сямен «шумпотон» шуиське. Озьы ик асьмеос но куаныса пумитаськом та праздникез, кызьы ас дыраз черкысен Симеон Богоприимец (Симеон Праведной) шумпотыса кияз кутӥз Ин Эксэй нуныез.

Вань сыӵе праздникъёс, куке лулыд сокем шумпотэ, кырӟа, нокыӵе уж борды кутскемед уг поты, нош вань сыӵеосыз, кудъёсыз сюлэмдэ куректыто, киосыд лэзисько, номыр каремед уг луы. Сретение та кык мылкыдъёсты огазея. Одӥг ласянь, бадӟым шумпотон: Иисус Христосэз пумита Симеон Богоприимец, арлыдо пиосмурт, улонзэ шонер но чылкыт ортчытэм мурт. Ин Атай солы шуиз: тон, Утисез пумитатэк-адӟытэк, уд кулы. Со вуоз дуннеез утён понна. Ин Эксэй одно лыктоз, соин ӵош вуоз утиськон, оскон. Музъем вылын нокыӵе кайгу но кышкытлык асьмеды уз пачкаты ни, малы ке шуоно Утисьмы вӧзамы, асьмеос солэн бурд улаз. Мукет ласянь, Сретение праздник ӝож мылкыдэз бугыртэ. Со Симеон ик, кудӥз вераз калыклы Иисус Христослэсь лыктэмзэ, урод иворен ӝожомытӥз Христос Анаез. Со шуиз: сюлэмыдлы сыӵе чидантэм вӧсь луоз, собыдӟа кайгуэз адӟод, музъем вылын нокинлы сокем шуг ӧй вал на. Но шумпот, Со утёз дуннеез. Та кылъёсты Ин Эксэй Анай валаз Голгофа гурезьысен, аслэсьтыз пизэ киросысь кортӵогамен адӟыса. Иисусэз янгыше уськытӥзы адямиос, кинъёс понна со улӥз, вӧсяськиз, адями луыса, дуннеез утьыны вуиз. Христос Анай учкиз, кызьы минутэн-часэн пиез пушкысь улон кошке. Собере курадӟытыса вием но кулэм пизэ ӟыгыртӥз. Ӵапак та адӟонэз сярысь вераз вал солы Симеон.

Соин ик Ин Эксэез пумитан праздник дыръя асьмеос шумпотӥськом, утиськыны быгатӥськом шуыса, но кайгыриськом Христос Анаен ӵош. Малы ке шуоно Россиын но дуннеын уно анайёс та выллем адӟонъёс пыр ортчо, кинлэсь ке нылзэ-пизэ тала кышкыт висён, мукетызлэсь пиналзэ лушка война.

Котькуд нуныез черке ваё пылатыны яке со ачиз лыктэ ини будэмез бере. Адями чукынӥське ке, Христослы матэ луэ, со осконэн но югыт сюлмын султэ чылкытатӥськон сюрес вылэ. Кин шуиз, та сюрес капчи? Иисус Христос Ин Эксэйлэсь кужым курись Павел апостоллы шуиз: «Тырмоз тыныд мынам бакель каременым, мынам кужыме шӧдӥське чиданын, ёрмонын, курадӟонын». Павел – огшоры адями, солы но асьмелы сямен шуг, кышкыт, вӧсь вал. Но вань шуг-секытъёсты вормыса, адямиослы апостол шуиз: «Мынэ мон сьӧры, кызьы мон мынӥ Христос сьӧры».

Огдышем сямен мылкыд карисьёс Ижысь тыметэ зымылыны быгатозы. Шаерысьтымы черкъёсын 18-тӥ-19-тӥ январе литургия ортчоз. Ӵукна служба бере ини дун-чылкыт вуэз черкысь басьтыны луоз. 18-тӥ январе 12 часын Ижысь Октябрь ёросысь вань ошмесъёс освятить каремын луозы. Адямиос быгатозы шурын но пыласькыны. Вашкалаос шуо вылэм: нырысь ик, пе, чылкыт вуэн мисьтӥськыны, люкмесэ зымыны кулэ пӧртмаськыса ветлэм адямиос но сьӧлыко муртъёс. Уго та нуналэ вожоос, бордысьтымы вань кырсез-пожез ву улэ кошко.

Но кин та нуналэ ӧз быгаты шуре пыраны, медаз кайгыре. Пыласькыны луоз 27-тӥ январёзь. Отчыозь ву сыӵе ик дун улэ. Пусйыны кулэ: 19-тӥ январе инкуазьысь вань ошмесъёсысь, люкмесъёсысь ву святой луэ.

Шуре зымылонлэн пайдаез шӧдӥське, отчы осконэн но ӟеч мылкыдын мынӥськод ке, шуэ Ижысь Дун-чылкыт Михаиллэн черказ ужась отец Роман.

- Ин Эксэйлы оскисьёс одно ик шуре зымылыны кулэ ӧвӧл. Черке лыктыса вӧсяськиды ке, дун-чылкыт вуэз басьтӥды ке, тӥ асьтэос но чылкыт луоды. Дорады бертыса, та вуэн коркадэс пазялэ. Со вуэз юоно арня ӵоже, ӵукна вӧсяськемды бере, сиськемлэсь азьло. Озьы ик висьыкуды но та вуэз юыны быгатоды, – шуэ баӵко Роман Воскресенских.

Галина СЕМЁНОВА.

Кез посёлокысь райпоын ужасьёс 1959-тӥ арын шумпотыса пӧраськыны кутскизы ёрос столовойын. Соку нокин но ӧз малпа вал, дыр, та юрт азьланяз черклы пӧрмоз шуыса. Юнме уг шуо, Ин Эксэйлэн аслаз сюресъёсыз. Табере Кезысь черкын адямиос кӧтсэс уг тыро, лулзылы кулонтэм-быронтэм улон шедьто.

1959-тӥ арын азьвыл столовойлэн юртаз Ин Эксэйлэн Вордӥськонэзлы сӥзем вӧсяськон корка усьтӥськиз. Татын настоятель луиз егит дышетӥсь, баӵко Сергей Миронов. Мар веранэз ини, гуртын храм усьтыны туж секыт. Капчи ӧй вал Мироновлы но. Патерез но татын нырысь-валысь ӧй вал, семьяеныз ӵош улӥз черклэн одӥг висъетаз. Та юртэз черклы басьтон гинэ дас ар пала кыстӥськиз. Коньдон кулэ луэмен, баӵко школаын география урокъёс нуиз. Озьы ик трос вӧсяськиз. Эшъёсыныз но ӵыжы-выжыосыныз ӵош бускель Тортым черкогуртысь Покровской храмез тупатъяз. Соку ик киыз воляз лэсьтӥськон ужъёслы но. Трос шуг-секытъёс пыр потоно луиз Сергей Миронов протоиерейлы. Но сюлмаськемез, жадемез юнме ӧз луы. Тыршемезлэн емышез син азьын. Туннэ нуналлы рос-прос шуыны луэ: Кезысь пӧраськон инты черклы пӧрмиз.

Табере Кезэ вуисьёс соку ик адӟо ини Иисус Христослэн Вордсконэзлы сӥзем храмез. Кыдёкысен ик синйылтыны луэ ини черклэсь  киросъёсын куползэ но гырлы жугонзэ (колокольнязэ). Та вакытэ храмлэсь пушсэ лэсьто-паськытато. Татын кӧня ке вашкала обросъёс но вань, соосты вайиз-кузьмаз оскись калык. Шумпотыса вераны луэ: татчы вӧсяськыны ветлӥсьёслэн лыдзы йылэ. Сергий баӵколэн семьяяз но шумпотон – солэн куатетӥ пиналыз вордскиз. Тӥни озьы, сюлмысь вӧсяськыса, Ин Эксэйлэн куронъёсызъя улыса-ужаса, табере Кезысь калыклэн но черкез вань ини.

Жаляса верано, тросэз таӵе кылъёсты тодазы но уг вайыло. Соос быдӟым праздникъёсты «сӥлы каро», сӥль сиыса но пельнянь кушаса. Яке Ымусьтон азьын одӥг арняез, 1-тӥ-6-тӥ январе, визьдырлэн тужгес чурыт вакытаз, уен-нуналэн шулдыръясько, юмшало. Адямилэн мыдланьяськемез аслыз ик уродэн берытске. Одӥг ласянь, али калык ӟеч улэ, сиён-юон тырмыт, дӥськут трос, мылкыд карисьёслы черкъёс усьтэмын. Но сыӵе улон но куд-огезлы уг кельшы, адямиос йӧнтэмъясько, копасько, ӝожтӥсько, каргасько. Озьы ке, ваньзэ тае Ин Эксэймы таланы но быгатоз. Соин ик Иисус Христослэн Вордсконэз но Крещениез азьын котькудӥз ачиз, матысьёсызлы но шаермылы ӟеч улон, тазалык но чылкытлык курыса, мед вӧсяськоз вылэм.

Историез учконо ке, Ымусьтон нуналъёсы 1813-тӥ арын ӟуч армия улляз Россиысь Наполеонлэсь солдатъёссэ. Та выллем ик учыр луиз, 70 ар ортчыса, соку Горд Армия Москва котырысь немецъёсты пазьгиз.

Французъёслэсь дорамы омырскемзылэсь мугзэ валэктӥз Феофан Затворник святитель. Со шуиз: «Тодады вае ай, малы французъёс асьме доры лыктӥзы? Ин Эксэй лэзиз соосты быдтыны со лекез, мае асьмеос французъёслэсь асэстӥм. Россия сьӧлыксэ валаз, ӧпкелиз но, Ин Атаймы калыкез но странаез жаляз».

Зэм но, со вакытэ Россиысь  вылӥ обществоын укыргес тунсыкъяськизы гольтырес французъёслэн улэм-вылэменызы. Кузёяськиз француз мода, атеизм, ӟуч кылэз но французэныз воштыны ӧдъязы ни вал. Войналэн тылпуэз калыкез сазёмытӥз.

19-тӥ но 20-тӥ дауръёсысь бадӟым ожъёс куспын трос огкадез. Кыкез ик война кутскиз шӧдтэк шорысь, тушмонлэн кужымез трослы уногес вал, асьмелэнэн ӵошатыса. Но кыказ ик тушмонъёс чигназы. Та пумысен Феофан святитель шуылӥз: «Калык сьӧлыкъёссэ куштыны тыршиз, Иисус Христослы, ӧпкельыса но вормон курыса, вазиськиз. Россиысь черкъёсын трос службаос мынӥзы. Солдатъёс атакае мынонзы азьын визязы, исповеде пыразы, причастие басьтӥзы. Тышкаськем интые, ожмаськыны соос мынӥзы молитваен». 1941-тӥ арлы лыдпусъёсты учконо ке, Россиын 57 сюрс, ваньмыз сямен, черкъёс таркамын-ворсамын вал. Нош Москва понна ожмаськон кутскем бере странаысь пытсам храмъёсты но усьяны ӧдъязы. Кивалтӥсьёс валазы уго: Ин Эксэйлы оскытэк, вӧсяськытэк, та кайгуэз уд вормы, калыклэн сюлмаз вормонлы кужым уд пыӵаты.

* * *

7-тӥ январьысен 19-тӥ январёзь оскись калык сӥлы каре Ин Эксэй понна курадӟытэм нуныосты – Вифлиемысь 14 сюрс вием пиналэз. Ирод эксэй озьы быдтыны малпаз вал Ин Атайлэсь пизэ – Иисусэз.

Туала вакытэ таӵе йыруж нуналлы быдэ сямен луэ. Быдэс дуннеын анайёс вордскымтэ пиналэз виё, абортэ мыныса. Адями, сьӧлыкъёслэсь куштӥськытэк, улонысь кошке ке, туж трос курадӟе. Куд-огез тае валало. Нылпи куштэмзы понна Ин Эксэйлэсь прощение куро, исповеде мыныса, яке басьто нылпи юртысь нуны, яке юртто анай-атайтэк кылем, ёрмыса улӥсь но висись пиналъёслы.

Йӧвылэсултон азьын сочельник луэ. Та нуналъёсы уката но зол визяно. Крещение, грек кылысь берыктыса, «вуэ пырисько» шуэмез возьматэ. Ин Эксэез пылатӥз Дун-чылкыт Иоанн Креститель. Евангелиын гожтэмын, соку, пе, инбам усьтӥськиз но, Святой Дух (дыдык тусбуйын) Иисус Христос вылэ лэзиськиз. Соку ик Ин Атайлэн куараез кылӥськиз: «Та мынам яратоно пие, мон солы бакельме сётӥсько». Адямилы одно ик чукынӥськоно. Кызьы мугормы вуын чылкыт луэ, озьы ик пылатэм мурт уродэзлэсь мозмытске, Иисус Христос солэсь сьӧлыкъёссэ куштэ.

18-тӥ-19-тӥ январе черкъёсын вуэз вӧсяло. Та нуналъёсы храмъёсы но ошмес, шур дуръёсы трос калык люкаське, донгаськон кылдэ. Котькудӥзлэн нырысь ик вуэ зымемез, сое омыртэмез, юэмез потэ. Ваньмыз со юнме, малы ке шуоно 27-тӥ январёзь басьтэм ву сыӵе ик дун-чылкыт лыдъяське но номырин уг висъяськы Йӧвылэсултон дыръя омыртэмезлэсь. 19-тӥ январе ӧд вуттэ ке святой вулы лыктыны, эн куректэ, январь пумозь дырды вань на. Та вакытэ басьтэм ву, одӥг-кык ар ортчыса но, али омыртэм кадь ик улэ, уг сӧриськы, шӧмзэ уг вошты.

Кияса ёросысь Даниловоысь черк.

19-тӥ декабре – Николай Чудотворецлэн нуналыз. Солэн улэмез, калыклы юрттэмез сярысь огпол гинэ ӧм гожъялэ ни. Николай Святительлы сӥзьыса, шаерамы трос храмъёс усьямын. Пӧлысьтызы тужгес арлыдоез луэ Кияса ёросысь Данилово черкогуртысез, солы ог 250 ар ини.

Татысь калыклэн Иисус Христослы оскемез адӟиське ини отысь но: 18-тӥ даурын гинэ куинь пол пу черк ӝутӥзы, Николай Чудотворецез данъяса. Котькудӥз азьвылэзлэсь чебергес но бадӟымгес вал. Нырысетӥ храмлэн ку усьтӥськемез пыр-поч тодмо ӧвӧл, кыкетӥзэ ӝутӥзы 1770-тӥ арын, вужзэ сэрттыса. Куинетӥез пуктэмын 1796-тӥ арын, нош освятить каремын вуоно араз 16-тӥ феврале. Бордаз ик вал Дун-чылкыт Параскевалы сӥзем приделэз. Но выль черкез пеньлы пӧрмытӥз «горд атас». Соин сэрен, выльзэ лэсьтытозь, службаос ортчылӥзы вуж храмын. 1810-тӥ-1814-тӥ аръёсы Даниловоын ӝутӥськиз ини из черк, со сӥземын вал 1812-тӥ арын ортчем ожмаськонысь воинъёслы. Соку та черкез но, Дун-чылкыт Николайлэсь приделзэ освятить каризы, Нерукотворный Спасэз данъяса.

Та черкын службаос мынӥзы 1941-тӥ арын август толэзёзь. Даниловоысь но бускель гуртъёсысь 286 муртлэн кинюртэмзыя храмлэсь юртсэ школалы сётӥзы. Но 1944-тӥ арысен ини адямиос кивалтӥсьёслы вазиськизы, черкез берыктыны курыса. Кык ар ортчыса, черк ӧсъёссэ усьтӥз Иисус Христослы оскисьёслы. Озьы ке но вӧсяськисьёслэн лыдзы арысь аре усьыны ӧдъяз. Приходэ 11 адями сяна ӧз кыльы. Соку черклэн юртэз совхозлы сётэмын, отын мастерскойёс усьтэмын вал.

Кин ке малпаз, вылды, та храм быриз, службаос чалмизы. Но озьы ӧз луы, малы ке шуоно ваньмыз Христос киын. 1991-тӥ арын черкез берыктӥзы Ижевск но Удмурт епархилы. Югдур ушъямон ӧй вал, службаос шер ортчылӥзы, вӧсяськыны ветлӥзы кӧня ке песяйёс гинэ. 1990-тӥ аръёсы Свято-Никольской приход быдэс Кияса ёросын огназ гинэ вал.

Черкез утён но улӟытон борды басьтӥськиз Анатолий Яковлевич Липин, татын вордӥськем но со вакытэ Ижын улӥсь воргорон. Со ачиз ик миссионер но, прораб но, вӧсяськись но вал. Пичиен-пичиен Дун-чылкыт Николайлы сӥзем приход ужаны кутскиз. Татын ӟеч сямез но берыктӥзы – Данилово черкогуртын крестной ходъёс ортчыло. Ошмес дуре Киросэн мыно Флор но Лавр агай-вынъёслэн нуналазы, 31-тӥ августэ. Нялтас вераса, та святой ошмесэз чылкытатыса возиз вал ай Анатолий Яковлевичлэн атаез. Ошмес тодмо вашкала дырысен ини, ӵапак татысь вуэн мисьтӥськыса, юыса, пересьёс мозмытскылӥзы трахома висёнлэсь. Дауръёс ортчыса но, ошмес эмъян кужымзэ ӧз ышты, соин ик татчы трос калык ветлэ.

Черкысь тужгес сӥлы кароно обросъёс пӧлын – «Голгофа». Сое уно аръёс ӵоже утьыса возем одӥг нылкышно.

Ваньмызлы тодмо: Николай Чудотворец юрттэ туж секыт учыръёсы но, куке адямилы юрттэт но оскон утчаны нокытысь кадь ини. Та святитель улэп дыръя ай Средиземной зарезь дурысь Мира городлэн кивалтӥсез юнме шорысь янгыше уськытӥз куинь муртэ но соосты виыны косӥз. Адямиосты быдтон интые вуиз Дун-чылкыт Николай но палачлэсь кизэ дугдытӥз. Кивалтӥсьлэсь пӧяськемзэ шараяз но ӧпкельыны косӥз.

Сыӵегес ик учыр луиз Римысь ожгар кивалтӥсьёсын. Кинъёс ке Константин император азьын соосты сьӧдмаллям. Пӧяса янгыше уськытэмъёс бӧрдыса вӧсяськизы но Николай Чудотворецлэсь куризы, соосты быронлэсь мед утёз шуыса. Со уе ик император адӟиз Дун-чылкыт Николаез. Святитель косӥз пытсэт сьӧры келям адямиосты мозмытыны. Константин соосты лэзиз но шуиз: мозмытскемды понна тау каре но данъялэ Николай Чудотворецез.

Ӟеч лэсьтыны тыршоно ёрмись, курадӟись ӵыжы-выжыосмылы но, тодмотэм адямиослы но – ваньмызлы, кинлы кулэ юрттэт. Нош сыӵе адямиос туж трос. Кинлэн ке сиськыны коньдонэз ӧвӧл, мукетызлэн – шуныт дӥськутэз, куинетӥезлэн – улон интыез, ньылетӥез воксё огназ улэ, куректонзэ но шумпотонзэ вераны нокинлы. Котькуд адями возьма ӟеч, мусо ваземез, шуныт кыл ӟечезлы оскон пыӵатэ, улыны-ужаны кужым сётэ.

Адями куинь валтӥсь люкетлэсь кылдэмын: мугор, лул но визь. Соослэсь куспазы герӟаськемзэс преподобной Антоний Великий тазьы гожтэм: «Лул ватэмын мугор пушкы, соин ик астэ жаляно ӧвӧл, уго трос сьӧлыкъёс гочато асьмеды. Нош чидась мугорын лул но капчиенгес утиське. Кызьы анай пушкысь югыт дуннее потэ вож нуны, озьы ик мугор пушкысь потэ гольык но чылкыт лул. Огезлэн со туж югыт но чылкыт луэ, нош мукетызлэн, сьӧлыкъёс пӧлын пӧзьыса, Ин Эксэйлы оскытэк улыса, сьӧд но кырсь».

Святитель Николай Затворник кӧсдырлы дасяськыны косэ но Христослы оскисьёслы шуэ: «Шонер вераськоды, одно ик визяно, но эсэпсэ валаса, черкын службаосын сылыны но дорады вӧсяськыны ӟигарды мед тырмоз. Но мугорды мед шӧдоз, со но сьӧлыко шуыса. Изёнлэсь но кӧня ке дырзэ талано луоды. Озьыен, та нуналъёсы чидасьгес луоно. Гольтыръяськыса, шулдыръяськыса ветлэм интые, эсьма, лыдӟиське, эшшо умойгес луоз, быдэс семьяен книга кутӥды ке. Вераськыны яра, но мултэс но пӧртэм чыры-пырыосъя ӧй дэмласал».

Антоний Великийлы сатана шуэм: «Антоний, тон ӧжыт сиськиськод, нош мон чик уг. Тон ичи изиськод, нош мон воксё уг. Таиз ласянь тон мынэсьтым кужмо ӧвӧл, тон монэ вормид чидась луэменыд (смирение)».

Дуннеысь нырысетӥ адямилэн сьӧлыкаменыз йырин калыклэн мугорыз-лулыз сӧриськиз. Дун-чылкыт Максим Исповедник та пумысен шуиз вал: «Соин ик адями кулӥсь, лэсянтэм, алекъяськись, калгись, лушкаськись, супыльтӥсь, сук луиз. Соин сэрен висе, но мугез сярысь уг малпаськы. Та бордын ик янгышмы. Адями ассэ черламен уг лыдъя ке, озьыен, эмъяны но сое уг луы. Котькуд адями пушкын улэ кыӵе ке мылкыд (страсть): кин ке узырмон сярысь малпаське, мукетызлэн юмшамез, кильтро улэмез, вина юэмез потэ, куинетӥезлы эшшо маке кулэ. Нош ваньмыз со, одӥг кылын вераса, туж бадӟым куашкатӥсь кужым. Кудӥз уг кылзы визьлэсь, нош адямиез аслыз ляльчи каре, соин сэрен калыклы трос кайгу, кышкыт адӟонъёс вае».

Визьдыр йылпумъяське 7-тӥ январе, Иисус Христослэн Вордӥськоназ. Выль ар праздникъёс дыръя, дас нунал ӵоже, тросэз юмшало, шулдыръясько, вина юо. Нош умойгес луысал, тросгес вӧсяськыса, черке яке монастыре ветлыса.

* * *

 Визьдырлэн кутсконаз ик, 4-тӥ декабре, асьмеос пусйиськом 12 бадӟым праздникъёс пӧлысь огзэ – Иисус Христослэсь Анайзэ, Мария Нылмуртэз, храме пыртонзэ. Ин Эксэйлы оскись калык та нуналэ тодаз ваёз, кызьы Дун-чылкыт Нылмурт 3 арес дыръяз кутскиз аслэсьтыз служенизэ. Со вордӥськиз арлыдо но нылпитэм анай-атаезлэн вӧсяськеменызы. Иоаким но Анна кузпалъёс сӥзиськизы, нылпизы вордскиз ке, сое черке сётозы шуыса. Обросын адӟиське, кызьы баӵкоос первосвященникен ӵош пумитало пичи дыдыез. Куинь аресъем ныл, ваньзэс паймытыса, огназ тубиз черклэн пагӟаетӥз. Грек баӵко, сӥлы карымон Паисий Святогорец шуиз вал: Иисус Христос адямиосты утьыны вазьгес но вуысал ини, но отчыозь дуннеын ӧй вал на сыӵе дун-сьӧлыктэм, чылкыт нылмурт.

6-тӥ декабре данъяськом Дун-чылкыт Александр Невский князез. Та нуналэ ик 70 ар тырме Москва понна ожмаськонын немецъёсты пазьгонлы. Москваысь протоиерей Николай Булгаков Быдӟым ожез тазьы дунъяз: «Та война кивалтӥсьёслэн янгышаменызы яке юнме шорысь ӧз вуы. Со лыктӥз коммунизмлэн вужереныз. Революция бере баӵкоос шуылӥзы: асьмеос кыл кутом та революция но Ин Эксэйлэсь палэнтӥськеммы понна».

Кылмес юазы ожмаськонын. Христослэн эрикез вал: тушмонъёс Москва дорозь вуизы но революцилэсь кӧкызэ – Ленинградэз – котыртӥзы. Кызьы тушмонъёс Иерусалимез басьтӥзы но отын Иисусэз кортӵогазы вал. Номыре но воштыны уг луы вал. Таиз но Ин Эксэйлэн эрикез: музъем вылын адямиослэн вӧсяськеменызы, нош инмын святойёслэн куременызы калык кышкыт адӟонлэсь утемын вал. Москваез мозмытон йылпумъяськиз Быдӟыннуналлы, 1942-тӥ арын 5-тӥ апреле кивалтӥсьёс лэзизы Паскаез шара пусйыны. Комендант час но та нуналэ лыдэ ӧз басьтӥськы, адямиослы сиён-юон люкылэмын вал, куличъёс пыжыны мед быгатозы шуыса.

7-тӥ декабре буре ваё оскон понна курадӟытыса вием Екатеринаез. Бырон азяз со Ин Эксэй пала берыктӥз 50 усто философъёсты но, огшоры калыкез но.

17-тӥ декабре сӥлы каро мукетсэ курадӟытыса быдтэм нылмуртэ – Дун-чылкыт Варвараез, сое Ин Эксэйлы оскемез понна вииз атаез. Варваралы адямиос вӧсясько, асьсэос но матысьёссы, причастие басьтытэк, медаз кулэ шуыса. Тани кыӵе учырез тодаз вае одӥг фронтовик:

«Мон госпитальын кылльыку, уйин палатаямы пыриз кышномурт, йырыз басмаен шобыртэмын вал, кияз ӵаша. Тодмотэм нылкышно изись солдатъёс доры матэктылӥз гинэ, соосыз сайкало. Котькудӥзлы со ӵашаысьтыз мае ке пуньыен веръяны сётъяз. Мон доры гинэ ӧз ветлы. Кӧты урод луиз, малы-о монэ мукетъёсызлэсь висъяз? Огшап улыса, мон, ачим но малызэ валатэк, ульчае потӥ но нюлэс пала бызи. Со куспын кылӥськиз самолёт лобем куара но, госпитальмы пуштӥз. Юртлэн номыриз ӧз кыльы, валамон ини, вань ожгарчиос быризы, мон гинэ улэп кыли. Солдатъёс огзы но номыр уг тодо вал Дун-чылкыт Варвара сярысь, но кинлэн ке вӧсяськемезъя, дыр, со вуиз та адямиос доры. Тодӥз, луоз, соослэсь быронзэс но сюлмаськиз, адямиос, причастие басьтытэк, улонысь медаз кошке шуыса».

Котырес ӝӧклэн темаез – сукыръёсты но ляб адӟисьёсты православилы сӥзем литератураен тодматон. Таӵе нимын проектсэс «Православная инициатива – 2011» конкурсэ ыстӥзы республикаысьтымы ляб адœисьёслы библиотекаын ужасьёс. Проект вормисе потӥз.

- Удмуртиын  син висёнъёсъя 6 сюрслэсь ятыр инвалидъёс уло. Та адямиос шугъясько лыдœиськыны, тунсыко иворъёс шедьтыны. Сукыръёслэн ӧвӧл луонлыкъёссы кун символика, национальной культура но православие темаослы сӥзем литератураен тодматскыны. Нош берло дас ар ӧоже инвалидъёсты та темаос золгес тунсыкъяськытыны ӧдъязы. Тросэз соос ляб адœыны кутскемын, шудтэм учыре шедьыса, секыт висьыса. Улыны кужым но оскон шедьтон понна Инмарлы матэгес луыны тыршо. Нош сыӧе литературалы ми ёрмиськом. Православие пумысен тодон-валанзы чутэмен, куд-огез йыроме – пӧртэм сектаосы шеде. Соослы юрттон вылысь ик ми малпамы та проектэз. Котькуд адямилэн огкадь правоосыз луыны кулэ. Ляб адœисьёслы но шаерысьтымы черкъёсын тодматскыны, православной литератураез лыдœыны луонлыкъёс кылдытоно, – вера библиотекалэн кивалтӥсез Татьяна Тенсина.

Та ужлы кутскон сётэмын вал 2008-тӥ арын. Ижысь протоиереен Виктор Костенковен ӵош ляб адœисьёслы поттэмын православилы сӥзем бичетъёс, Михаил Атамановлэн удмурт кылын «Вӧсяськонъёс, канонъёс но кырœанъёс» бичетэз. Республикаямы, удмурт кылын рельефно-точечной шрифтэн печатлам молитваосын книга одӥг гинэ.

Библиотекаысь репродуцированиея центр та проект чотын Москваын потӥсь туж тодмо «Фома» православной журналлэсь куать номерзэ печатлаз. Отын христианство, Инмарлы оскон сярысь туж валамон но пыр-поч гожтэмын. Озьы ик Новосибирскысь сукыръёслы библиотекаысь специалистъёсын валче дасямын шаерысьтымы куинь черкъёсъя нимысьтыз издание. Отын вераськон мынэ Удмуртиысь Александр Невский, Дун-чылкыт Михаиллэн но Святой Тройчалэн храмъёссы сярысь. Та книга туж умой тупа инвалидъёслы, малы ке шуоно быдэстэмын аудио, рельефно-точечной, графической но бадœым шрифтэн форматъёсъя.

- Проектлэн пайдаез али ик адœиське ини, – веранзэ азьланьтэ Татьяна Владимировна. – Ми ляб адœись лыдœисьёсынымы пумиськылӥм но семинаръёс ортчытъям Можгаын, Глазовын но Сарапулын. Инвалидъёслы шаерысьтымы черкъёстӥ экскурсиос ортчытъям. Али ужаськом библиотекамылэсь фондзэ узырмытон бордын. Россиысь издательствоосын но книга магазинъёсын огкыл гожтэмын православной темалы сӥзем бичетъёсты Удмуртиысь лыдœисьёс доры вуттонъя.

Галина Семёнова.