Ма пумысен ӧпкелё нылкышноос?

Удмурт калык движение шоры учконо ке, син шоры соку ик йӧтэ: отчы пыриськисьёс пӧлысь бадӟым люкетэз – нылкышноос. Удмуртъёслэн – матриархат, кылоно луэ куд-ог эскерисьёслэсь верамзэс. Озьы-а со, ӧвӧл-а? Малы нылкышноос тросгес дырзэс но сюлэмзэс поно общественной уже?

Матриархат – грек кылысь «анайлэн (нылкышнолэн) властез» берыктӥське. Матриархат – со сыӵе общество, кытын валтӥсь инты басьтэ кышномурт.

«Удмурт кенеш» огазеяськонэн тужгес но кема – 12 ар ӵоже – кивалтӥз Валентин Тубылов. Со тодаз вае:

- 90-тӥ аръёсы удмурт движенилэн кутсконаз сылӥсьёс, Удмурт клубез кылдытӥсьёс ваньзы сямен ик воргоронъёс вал. Аръёс ортчемъя интызэс басьтӥзы нылкышноос. Угось кышномуртлэн общественной ужын, кивалтонын ответственностез бадӟымгес. Солэсь туж ӟеч пӧрмо кивалтӥсез воштӥсьёс.

Нялтас вераса, Тубыловлэн «Удмурт кенешын» вань воштӥсьёсыз нылкышноос вал – Нина Малых, Галина Шушакова, Ирина Шеда-Зорина.

- Нылкышноос дуннеез мукет сяменгес адӟо, – малпа Валентин Кузьмич. – Соос пӧртэм ужпумез лул-сюлэмзы пыр потто. Таин ик герӟаськемын удмурт движение кыстӥськемзы. Соос валало: общественной уж туж кулэ. Удмуртлык ласянь гинэ озьы ӧвӧл, оглом улонамы кышномуртъёс сыӵеесь. Ульчаез утялтон-сузян-а, собрание ортчытон-а…

Пусйытэк уг луы: удмурт нылкышноослэн мылкыдзы «Удмурт кенеш» пушкы гинэ уг тэры, уно аръёс ӵоже ни соослэн асьсэ огазеяськонзы – Удмурт нылкышно кенеш – ужа. Таиз движение туж зол юрттэ ёросъёсысь нылкышноосты ӝутыны, бурдъяны.

- Удмурт кышномурт туж шаплы ке но, кивалтӥсь ужын ӵемгес пиосмурт луэ. Малы? Одӥг ласянь, нылкышно тросгес оске, дыр, пиосмуртлы. Мукет ласянь, озьы кулэ шуыса малпа, – шуэ Валентин Тубылов. – «Удмурт кенеш» котырын трос визьмо удмурт нылкышноос, кудъёсыз али ик быгатысалзы ассоциациен кивалтыны. Кин тодэ, оло, озьы ик луоз ай…

«Удмурт кенешлэсь» 20 аръем историзэ учконо ке, ассоциациен одӥг пол гинэ кышномурт кивалтӥз – Роза Яшина. Нош «Дэмен» огазеяськонэн – кык пол: Лидия Орехова но Елизавета Петрова. Куд-огез пусъе: нылкышно кие биньгозы шеде тужгес секыт вакытэ. Ӧйтӧд, луэ меда озьы шуыны. Тани «Шундыез» ялан егит нылъёс валто. Али кивалтӥсьсы Ольга Тронина пусъе:

- «Шундылэн» биньгозыез огпол гинэ шедьылӥз пиосмурт – егит тодосчи Юрий Перевозчиков – кие. Со вал ай 15 ар талэсь азьло. Али огазеяськонлэн ужаз трос йӧно пиос пырисько. Ёрос ёзъёсын кивалтӥсьёс пӧлын но соос трос. Озьы ке но шуысал: пиос общественной ужлэсь палэнско коньдон ужпумъёсы выеменызы сэрен. Собере, оло, общественной уж быдэсак уг быгаты усьтыны соослэсь быгатонлыкъёссэс. Нош удмурт кышномурт чидась, трос ужез ас вылаз басьтыны но йылаз-пумаз вуттыны быгатэ.

Удмурт нылкышно кенешлэн кивалтӥсезлэн воштӥсез Елена Александрова егитъёсын соглаш луэ:

- Азьвыл «Удмурт кенешын» пиосмуртъёс тросгес вал. Со бугырес ӝутскон вакытъёсы котькудӥз аслыз маке утчаз, дыр. Кинлэн ке ӝутскемез потӥз, маке выльзэ кылдытэмез, кин ке барыш поттон амалъёс утчаз. Отысь ик куд-ог удмурт ужбергатӥсьёс потӥзы, кин ке ассэ шедьтӥз, кин ке – вуоно кузпалзэ. Нош туала вакытэ воргорон тросгес сюлмаське коньдон поттон, семьязэ утён сярысь. Соин ик коньдон вайисьтэм общественной ужлэсь палэнске.

Ма, огвакытэ удмурт воргоронъёс асьсэ огазеяськонзэс кылдытон сярысь поттылӥзы вал. Но малпанзы омыре ошиськыса ик кылиз.

Ватсалом на: «Удмурт кенешлэсь» ёзъёссэ чаклано ке, али 72 процентаз кивалтӥсьёс – нылкышноос. 28 процентаз гинэ валто воргоронъёс, но… юрттӥсьёссы, ассоциацилэн ужаз пыриськисьёс – ваньзы сямен ик нылкышноос. Матриархат? Уг шуиськы, со урод. Паймисько, кызьы удмурт кышномурт ваньмаз вутске: семьязэ утялтэ, нылпи будэтэ, ужын, гур котырын бызьылэ, ассэ чебер возьыны тырше, книга-газет лыдӟе, ӵуказе нунал сярысь сюлмаське, улонлэсь кудпала бергамзэ шӧдэ…

Дасяз Елена Миннигараева.

90-тӥ аръёсты тодэ ваён.

Мар луоз умойгес, аслад вордскем музъем вылад гань-гань улыны но ужаны быгатэм сяна? Усто – тынад семьяед вань, нылпиосыд будо, котькуд ортчем нунал шумпотон вае ке. Но таӵе ӟеч осконлы асьмеос берло аръёсы гинэ дышим вал. Куддыръя кӧшкемыт уйвӧтэз сямен тодамы вайиськом 1990-тӥ аръёслэсь кутсконзэс. Ёрмон, черодъёс, экономикалэн куашкамез, йыртэмасьёслэн син куспын алямзы, ӵуказеез адӟемпотостэм карон асьмелэсь странамес дас ар пала ӝокатыса возизы. Сыӵе дыръя тросэз шуо: со вакытъёсты чидано медам ни луэ. Озьы бере, малы выльысь но выльысь калыкез митингъёсы но акциосы ӝуткало, туала обществоез но властез ваче пумит султыто.

Татьяна БАЛАКИНА, Вотка ёросысь Ветеранъёслэн кенешсылэн тӧроез:

- Выль даурлэн кутсконаз кивалтонэ вуизы выль адямиос – зэмос государственникъёс. Соку капчияк шокчыны луиз. Берло аръёсы ортчем воштӥськонъёс понна шумпотыны гинэ луэ. Алигес пусйим Вотка районлэсь 85 ар тырмонзэ. Удмуртиын со огез азинскемез ёрос. Гуртэз азинтон программая вуэ газ, ӝутӥсько коркаос. Верано созэ но: берло 3 ар ӵоже районысь школаосы ужаны лыктӥз 22 егит специалист. Туала государствомы калыклы мышкин уг берытскы – гуртоос тае шӧдо. Нош кун гуртлы таӵе юрттэт ӧз ке сёты, асьмеос нош ик вуомы 90-тӥ аръёсы. Кинлэн потэ тае выльысь чидамез? Шонер вера Патриарх Кирилл – тырмоз странаез зуркатыны, кивалтонэн шудыны, улэп адямиосты кыӵе ке экспериментэ кыскыны. Юнме уг верало калыкын, кулэм скал йӧло луэ шуыса. Вашкалае берытскыса, номыр ӟечсэ ум адӟе. Туала улонмы огсыр луиз ке, ӵуказе нуналмы но выль осконъёсын тырмоз. Тазьы гинэ, мукет сямен уз пӧрмы.

Елена ЧИРКОВА, Эгра ёросысь «Зура агрокомплекс» ООО-лэн кивалтӥсез:

- Асьмелэн калык но власть вискын рос-прос кенешон кылдэмын ӧвӧл. Котькудӥз ас понназ улыны выре. Татысь ик пото ӵашетонъёс. Райцентрын но гуртын улон син шоры йӧтымон висъяське. Нош гурт удыслэн азинскемез нырысь ик потэ калыклэн улэм-вылэмез бордысь.

Кутэмын кысконэз но юонэз вузанэн герӟаськем законъёс. Нош уж вылын со уг шӧдӥськы. Вуз карись кысконэз табере оген-оген вузаны ӧдъя. Котькуд быдэ вуымтэ мурт но тамакез басьтыны быгатэ. Таӵе югдур эшшо огпол возьматэ, калык но власть валче ужаны кулэ шуыса.

Туннэ улонэз ӵошатӥсько огшоры пӧськыен. Сое, выжызэ мургес медаз лэзьы шуыса, дыраз эмъяно. Озьыен, улонын но со ик кулэ. Али быгатӥськом техника басьтыны, выль гидъёс ӝутыны. Тросгес йӧл кыскыны пӧрмытӥськом. Берло 3 арез ӵошатоно ке, табере скаллы быдэ 5 500 кило йӧл кыскиськом – 2009-тӥ арын та лыдпус 4 537 кило вал. Али быдэстоно сое, кытчы киосмы ӧз на вутске, азинсконо, азьлань мыноно.

Елена АГАФОНОВА, Яр ёросысь Пудем школалэн директорез:

- Малпасько, котькыӵе огыр-бугыр вырон – со власть понна нюръяськон. Калыклы таӵе воштӥськонъёс номыр пайдазэ уз вае. 90-тӥ аръёсы берытскон яке мае ке шуак выльдон – мон понна чик кулэ ӧвӧл.

Озьы ке но туала властьлэн пачкатэмез но сюлэмъям туж ик уг тупа. Куддыръя сӧриськем телефонэн шудэм кадь потэ. Вылӥ кивалтӥсьёслэн малпам ужъёсы, калык доры вуытозязы, мукет луо яке воксё но кытчы ке кугӟало. Асьме интыосамы ми тыршиськом, ужаськом, но оскем потэ, дышетон удыс шоры учкон ӟечгес луоз шуыса.

Валентина СЕМАКИНА, Ижысь Механикая заводысь техник:

- Странамылэсь куашкан вакытсэ тодэ но ваем уг поты, куддыръя малпаськод, со туж кемалась вал ни кадь – нош ортчиз ай 20 ар гинэ. Заводэ ужаны лыктӥ 1976-тӥ арын, со вискын техникумын дышетски. 16 ар ужаме бере предприятимы шуг-секытэ вуиз. Уждун ӝыны арен ӧм адӟылэ. Сое но улэп уксёен ӧз сётъялэ – заводысь магазинэ вузъёс, сиён-юон вуттылӥзы – вуоно уждунмы чотын отысь басьяськиськомы вал. Куддыръя ӵектылӥзы предприятилэсь поттэм продукцизэ – кухонной комбайнъёс, электроинструментъёс. Собере та вузъёсты ӵыжы-выжыосмылы вузаны турттӥськомы вал ни. Ярам, анай-атайёсмы пенсиын вал. Няньлы, йӧллы, сакырлы шуыса, соослэсь пунэмаськылӥмы.

Дипломея техник-плановик вал. Выльдӥськон вакытэ сокращение улэ сюри, собере заводын ик контролёрын ужай на. Со вакытэ кыдам тодмоосы сямен заводысь кошкыны ӧй дӥсьты, каллен али но ужаськом. Оскем потэ, заводъёс азинскозы, татчы егитъёс лыктозы шуыса.

Николай БОРОДУЛИН, Кун Кенешлэн депутатэз, Вотка городысь 1 номеро больницаысь хирургия отделенилэн кивалтӥсез:

- Совето Союзын улыкумы, асьмеос данъяськимы тазалыкез дунтэк эмъяны быгатэменымы. Но страна куашказ, экономикаын кутскем реформаос котьку но ӟечесь ӧй вал. Эмъян удыслы но выёнтэм понна выль сюресъёс утчано луиз. Сотэк но пичи уждунъёсты ӝегатылӥзы, егит специалистъёс бадӟым городъёсы уж утчаны кошкылӥзы. Шӧдскымон усиз вордскись нуныослэн лыдзы. Выль больницаос пуктон, туала оборудование басьтон сярысь вунэтоно луиз.

2000-тӥ арын гинэ улонлэн пӧртэм удысъёсаз, озьы ик тазалыкез утёнын но, ӟеч пала воштӥськонъёс тупазы. Табере эмъясьёс дышетско, квалификацизэс будэто. Участковой врачъёслы но медсестраослы уждунзэс ватсазы. Трос лэсьтӥське, больницаосы егит эмъясьёсты ӧтён ласянь, тросэзлы улон инты висъяське. Воткаысь калыклэн но улоназ та шӧдске ни. Тани туэ городын нуны ваён юрт выльдӥськоз. Уго берло дыре шумпоттэ ни вордскисьёслэн лыдзы. 90-тӥ аръёсы кузпалъёс одӥг нылпи сяна вайыны ӧз дӥсьтылэ, нош табере тросаз семьяосын будэ кык яке куинь пинал. Туж оскисько, асьме странамылы политикаын но экономикаын огсыр улон кулэ шуыса. Кунлэн азинскон сюресаз выльдӥськонъёс ӟечсэ гинэ мед ваёзы.

Елена СКВОРЦОВА.

Журналистлэн ужез уката воштонтэм луэ, шуг-секыт югдуръёс кылдыку. Уго котькуд адями понна зэмлыко ивор – сиён-юонлэсь но дуно.

Россиысь Прессалэн нуналэныз валче мылкыдзэс юано кариським ивор вӧлмытон удысын ужасьёслэсь но лыдӟисьёслэсь, кызьы соос учко туала журналистика шоры.

Сергей Васильев, культурая, печатья но иворъёсъя министрлэн воштӥсез:

- Нырысьсэ журналистика сярысь малпан йырам лыктӥз, дыр, 4-5 аресам. Кыллисько «газик» машиналэн бер пуконъёсыз вылын. Уй, зоре, вылам шапыкен-шапыкен ву усе. Малпасько, малы меда мынам буби журналист? Газетын ке ӧй ужасал, мон бер уйин тазьы машинаын ӧй ветлысал. Собере тодам лыкто 70-тӥ аръёс. Соку ачим газетысь яке журналысь лыдӟем статьялы дунъет сётыны тыршисько ни вал. Табере дасо арлэсь кема ни республикаысь печать удысын кивалтӥсько. Туала журналистъёслы бадӟым эрик ӧвӧл, озьы ке но пушказ котькуд гожъяськись мурт шара ужаны мед быгатысал, малпасько.

Людмила Прокошева, Удмуртиысь Журналистъёслэн огазеяськонзылэн тӧроез:

- Туж вылӥ кылъёсын верало, дыр – но мон понна журналистика – со ваньмыз.

Асме солэсь висъяны ноку уг быгаты: огвакытэ быдэс семьяе (4 мурт) та удысын тыршиз. Бадӟым арлыды шоры учкытэк, мон туннэ но отын пӧзисько, мынам котырам лачак егит эшъёсы. Мон ялан сюрес вылын. Пыдъёсы мынытозь, весь ужало.

Данъяськисько, Журналистъёслэн огазеяськонзы шаерысьтымы тужгес бадӟымез творческой огазеяськон луэ, туннэ отын 700 пала ёзчиез. Ваньзэс тодӥсько, дунъясько. Кема кивалтэмысьтым ни, лэся, тросэз журналистъёс монэ «анай» шуо, но мон сое бадӟым дунъетэн лыдъясько. Шумпотӥсько, куке журналистъёслы луыса кыӵе ке югдуръёс сэрттӥсько-пертчисько, калык доры тунсыко ивор вуэ. Кемалась кышкатъясько ни, газетъёс бырозы шуыса. Ойдолэ син азямы пуктом, соос быризы шуыса… Мӧзмыт. Калык соку ик валалоз, мае ыштӥз но выльысь соосты кылдытоз.

Наталья Калинина, Якшур-Бӧдья ёросысь «Рассвет» газетлэн валтӥсь редакторез:

- Журналистика – со мынам кыкетӥ шоканэ. Аслэсьтым улонме та удыстэк син шорам но уг пуктӥськы. Лыдъясько, ёрос газет – со быдэс семьяен лыдӟон издание. Газетэн ӵош адями визьмаське, мылкыдыз умойгес луэ. Милям со понна газетын рубрикаосмы но туж тупало: «Мужики», «Подворье», «36,6». Оген нокыӵе ужез уд берыкты. Газетэз лэсьтэ коллектив, соин издание тырме узыр материалъёсын. Котьку но дунъясько лыдӟисьёслэсь критиказэс – озьыен, соос милям ужмы сярысь сюлмасько, ӵектонъёссэс верало.

Семьяе но ужме дунъя. Пиналъёс Ижысь берто ке, соку ик газет борды кутско, лыдӟо. Соку ужме азинтыны мылкыды уката бурдъяське.

Дмитрий Фёдоров, Ува ёросысь Поршур-Тукля гурт:

- Микрорайонамы сылӥсь кык этажъем, кӧня ке квартираен коркаослы ог ньыльдон ар ни. Сомында арлыд люкам юртъёсмы тупатъямез кулэ карыны ӧдъязы. Пасяськем липеттӥ зор-кот квартираосы пыре, подъездысь борддоръёс ломдыло, электроезъёс вошъямтэ – тани-тани тылпу гомӟоз. Юртъеръёсты возён понна кыл кутӥсь «СтройКомИнвест» огазеяськонэ олокӧня пол ветлӥ, югдурмес тупатыны курыса. Кылэм-адӟем ӧз каре, куддыр кабинетазы ик пырыны ӧз лэзьылэ. Паймыса вазиськи «Удмурт дуннее». Газет югдурмес интыысьтыз ӝог вырӟытӥз. Арня но ӧз ортчы, кылсярысь, микрорайонысь 8 номеро коркась подъездъёс соку ик туссэс воштӥзы, выль счётчикъёс ужаны кутскизы. Со вал ни 2010-тӥ арын август толэзе. Туннэ липетъёсмы но уг вияло ни. Кӧс, шуныт, майбыр. Ваньмыз со – «Удмурт дунне» бызьылэмен.

Лукерья Шихова, Удмурт кун университетысь удмурт филология факультетын дышетскись, «Удмурт дунне» газетлэн егит авторез:

- Газет-журналъёсын кусып тупатӥ пичи дырысеным, анае угось гожтӥськылӥз вань удмурт газет-журналъёслы. Журналистъёслэсь адӟем карыса, ачим но гожъяськыны кутски.

Газет-журналъёс, мон малпамъя, номырин воштонтэм гуртын улӥсьёс понна. Бен, гуртъёсын али Интернет вань ини, но мон тодӥсько, отысь ивор утчаны гуртоос дышемын ӧвӧл на. Та ласянь газетъёс соослы зэмос эш луо – отысь ивор но тодо, сюлмаськытӥсь юанъёсынызы но вазиськыны быгато. Но жаляса верано, егитъёс уг дырто ни газет-журналъёсты киязы кутыны, соослы матынгес ивор вотэс. Со туж ӝож. Мон малпамъя, газетысь материалэз лыдӟиськод но со кемалы йыре кыле. Угось лыдӟиськод гань-гань, газетэз кие кутыса. Интернетэз та ласянь ушъяны уг луы… Оскисько, печать удысын тыршисьёс азьланяз но калыклэсь саклыксэ ас бордазы кыскыны быгатозы.

Поездэн ворттылон дунъёс будӥзы.

Кыӵе выльдӥськонъёс тупалозы котькудмылэн улонамы таяз аре. 1-тӥ январьысен кужыме пыро выль законъёс, куронъёс. Соосын валче кылдозы выль тыриськонъёс, йылозы штрафъёс.

Кызьы басьтоно талон?

Тросэз воштӥськонъёс зуркатозы руль бергатӥсьёсты. Со – техосмотрез ортчон но, эстӥськонлы дунъёс но, сюрес вылын мынон-ветлон куронъёсты тӥям понна йылэтэм штрафъёс но.

Техосмотрез (ТО-ез) радъян понна табере ГИБДД кыл уз ни куты. Та уж выжоз Россиысь автостраховщикъёслэн огазеяськонзылы. Но выль законлэн та дырозь кык пыдыз ик чутэ. Закон йӧназ ужаны мед быгатоз шуыса, эшшо 20 мында нимаз актъёс кутоно на, пе. Туннэ юнматэмын ОСАГО-ен герӟаськем воштӥськонъёс гинэ.

Табере ОСАГО-лэсь полиссэ басьтыны луоз, техосмотр сярысь талонэд вань ке. Соку ик юан кылдэ – нош кызьы табере машинаез ГИБДД-е учётэ пуктоно? Уго вуж куронъёсъя тазьы вал. Машина басьтэм бере соку ик луэ вал вазиськыны ОСАГО полис лэсьтӥсьёслы. Страхование пыр ортчем машинаен ширтылӥзы ГИБДД-е, собере толэзь ӵоже ортчоно вал техосмотр. Табере нырысь техосмотр пыр потоно. Соку кызьы выль басьтэм машинаез вуттоно эскерон пунктэ? Уго ОСАГО сярысь полистэк сюрес вылэ потыны уг яра.

Ватсано на мукетсэ но. Техосмотр дун 380 манетлэсь вылын луыны кулэ ӧвӧл.

Чутрак ӧз воштӥськы ТО-ез ортчон радлык. Выль машиналы талон сётӥськоз 3 арлы. 3-7 аръем «корт валэз» эскероно луоз, 2 ар ортчыса. 7 арлэсь «мӧйы» автомобилез чакланы кулэ арлы быдэ. Но тросгес йыр висёнзы луоз таксиослэн. Соослэн кузёоссы ТО сярысь сюлмаськозы араз кык пол. Таӵе ик сюлмаськон усёз автобусъёс но кышкыт грузъёс ворттӥсь машинаос вылэ.

Машина возисьёс техосмотр ортчыны быгатозы Россилэн пӧртэм сэрегъёсаз. Водительёслы но ичигес документъёс сьӧразы кутоно луоз: право, паспорт яке доверенность, регистрация сярысь свидетельство яке ПТС. Техосмотр ортчытыны луэ Удмуртиысь 10 стационарной но интыысь интые вошъяськись 7 пунктъёсын. Ижын улӥсьёс Маяковский ульчаын но Дэри ёросысь Изгуртысь пунктъёсын машинаоссэс эскерыны быгатозы. Прицеп возисьёс, со чакламын ке 3 но ӝыны тоннаозь груз нуллыны, туэысен техосмотр ортчоно уз луэ ни.

Мынон-ветлон правилосты тӥясьёс ласянь ке верано, горд светофор дыръя сюресэз выжемъёс кисыысьтызы 1 сюрс манетсэс поттоно луозы. Стоп-линиез чакласьтэмъёс понна но дун пуктэмын – 800 манет (та дырозь со ӧй вал на), сюрес вожын пробка кылдытӥсьёслы, нимысьтыз сигналъёсын мынӥсь машинаосты лэзьымтэ водительёслы 2 сюрс манетозь штраф гожтозы. Асфальт сюресъёс медаз уродме шуыса, котькуд тулыс бадӟым машинаослы пыкъет пукто. Тае лыдэ басьтымтэос 2-2,5 сюрс манет тыроно луозы.

Кытчы ышиз такси?

Выль сямен таяз аре ужаны дышетскозы такси кузёос. Нырысь ик, котькуд нуэм-ваемзы бере соос, магазинын сямен, сётыны кулэ чек. Таӵе документ «пыжон» понна котькуд машинаын луыны кулэ таксометр. Со сяна, автомобильлэн урдэсъёсаз – такси пусъёс, липет вылаз – ӵуж фонарь. Эскерисьёслы таксист возьматыны кулэ ужаны лэзись лицензизэ, сюрес вылэ потон документсэ. Таӵе амалэн кивалтӥсьёс оско таксистъёсты вужерысь поттыны. Соос но шара мед ужалозы, выт тырозы, пе.

Но туэ 10 нунал ӵоже таӵе воштӥсь-конъёсты пассажиръёс ӧз на шӧдэ. Праздникъёс ӵоже редакциысь кӧня ке эшъёсмы таксиен ворттылӥзы ни. Озьы ке но машинаос огшорыесь вал – нимысьтыз пусъёсын чебермамтэ. Уксё тыремзы бере пассажиръёслы чек сётӥсь но ӧз шедьы на. Ижын шумпоттэ одӥгез – таксилы дунъёс ӧз воштӥське… Но сюлмаськытэ мукетыз – табере, машина возьмаса, кал быре, пе.

Озьы ке но районысь таксистъёс вужере пегӟыны выро ик. Таослы адӟем кароно вылэм автобус кузёослэсь. Уго та удысын воштӥськонъёс далайгес ортчизы ни, уж рос-прос радъямын. Тани куд-ог ёросъёсын автобус рейсъёс понна кыл куто нимаз адямиос. Пичи Пурга черкогуртысь Николай Санников но нимаз ужбергатӥсь кариськиз. Тазьы ужан понна лицензия басьтӥз – соя 5 автобус ужаны быгатэ. Табере Санниковен артэ эшшо 4 мурт тырше. 6 часын ӵукна рейсэ потон азязы водительёсты чакла врач. Котькуд руль бергатӥсьлэн вань путевой листэз. Машинаосты эскере механик.

- Ми котькудмы налог тыриськом, законъя ужаськом. Котькуд пассажирлы билет сётӥськом. Пеганы но ватӥськыны нокинлэсь, – шуэ Николай Евгеньевич.

Валамон, котькуд таксист таӵе визьмо малпанэ ӧз на вуы. Но таӵеослы малпаськыны дыр трос ӧвӧл – 1-тӥ январьысен ик кужыме пыризы тыриськонъёс. Лицензитэк ворттылӥсь таксистлы 5 сюрс манет штраф лякыны луэ. Машина тусызъя таксилы тупа ке, липет йылаз ӵуж фонарез пиштэ ке, нош таяз учыре но кулэ документъёсыз ӧвӧл ке, таӵе водительлы но 5 сюрс тыриськон лякиське.

Ӟеч лу, милиция

Выль аре Россиын уз ни луы милиция но милиционеръёс. Табере югдурез утён ёз – полиция, ужасьёсыз – полицейскойёс. «Милиция» кыл уг ни адӟиськы ОВД-ослэн пыронзы азьын, машинаос бордын.

- Вошъямын вань печатьёс но штампъёс. «Милиция» кылэз уд ни пумиталэ выль документъёсысь. Нош та ар ӵоже вань ужасьёслы выль форма вуоз, – верало Удмурт Республикая Югдурез утёнъя министерствоын.

Ӝыны ар витёно…

1-тӥ январе ӧз кышкатэ на ЖКХ-лы дунъёс. Июлёзь соос уз будэ. Тросэз тае герӟало мартэ ортчоно Президент быръёнъёсын. Таин валче ик, лэся, ӧз на йылэ Ижын транспортын ветлон дунъёс но. Нош поездэн ворттылон 10 процентлы будӥз. Таӵе «адӟон» тупаз быдэс Россиын. Кылсярысь, Ижевск-Москва поезд котьку но тырмемын луэ – уката ик плацкарт вагонъёс. Тани кылем арын Москвае мынон билет 1 сюрс 800 манет котыр вал. Табере шоркаре вуон понна тужгес ичизэ 2 сюрс 61 манет кулэ.

Куд-ог экспертъёс сӥзё, сиён-юонлы дунъёс усёзы шуыса. Нырысь ик, огъя экономикая герӟетэ пыризы Россия, Белоруссия но Казахстан. Со дыре ик асьмеды бурд улаз басьтӥз ВТО. Мар возьмано? Няньлы дунъёс уз усе, пе. Со дыре ик дунтэманы быгатозы курег но парсь сӥль. Ӝыны ар ортчыса, воштӥськонъёс уката шӧдскымон луыны кулэ. Кин ке возьма, машина но видео-техника дунтэмалоз шуыса. Мукетъёсыз витё ипотекая процентъёслэсь усемзэс – кунгож сьӧрысь банкъёс, пе, Россиын вожвылъяськыса ужаны ӧдъялозы.

Елена СКВОРЦОВА.

Владимир Владыкин, профессор, Удмуртилэн дано муртэз:

- Та учыр тужгес но шукке удмуртъёсты, угось таӵе пӧяськон нырысетӥзэ ӧвӧл ни. Нырысь сӥзё, собере, адямиез пызьыртыса кушто. Луыны кулэ кыӵе ке рос-прос порядок. Таӵе вакытъёсы мон шуисько: ярам, мон огшоры тодосчи, угось политика – со укыр лек шудон. Но отчы мынӥсьёс валаны кулэ: депутат луон – со ним-дан гинэ ӧвӧл, со сыӵе ик профессия, но мукетъёслэсь трослы секытгес. Соин ик отчы мыныны кулэ туж юн сямо, номыр азьын куасалскисьтэм муртъёс гинэ. Жаль, асьме пӧлын сыӵеос ӧвӧл, пӧрме. Но туала егитъёс туж етӥзэсь, золэсь будо кадь потэ.

Виктор Шудегов, Кун Думаысь «Зэмлыко Россия» фракциысь депутат:

- Николай Николаевич Мусалимов «Огъя Россия» партилэн списокезъя депутатэ кандидатэ мынӥз «Удмурт кенешлэн» нимыз улсын. Валамон, со туж юрттӥз партилы куара люканы. Соин ик быгатэ-а вал со мандатэзлэсь тазьы огшоры куштӥськыны? Уг! Солэн ӧй вал сыӵе правоез, малы ке шуоно со вал удмуртъёслэн куараоссы. Нош табере соослэсь правооссэс Думаын чечен воргорон утьыны кулэ. Сокем ӝож ӧй луысал, Мусалимов ӧй ке кивалтысал «Удмурт кенешен», со – валтӥсь удмурт вал ук! Кызьы со табере учкоз калыкез шоры? Бен, али номыр карыны уг луы ни – закон тӥямын ӧвӧл, мандатсэ со сётӥз ас мылкыд каремезъя, но калык быгатэ аслэсьтыз малпанзэ шараяны: мон лыдъясько, «Удмурт кенешлы» одно люкано конференция, кивалтӥсьсылы оскымтэзэ верано – кытчы со валтоз калыксэ?

Нош мон ачим ласянь верасько: удмуртъёслы кулэ ке депутат юрттэт, вазиське, мон уг люкы, кыӵе партия понна тӥ куарадэс сётӥды.

- «Удмурт кенешен» кивалтэмды потэ шуыса вераськонъёс ветло…

- Мыным сыӵе ӵектонэн ӧз вазиськылэ. Зэмзэ ке, политикаын карьера ласянь мынам бадӟымгес малпанъёсы: Думаысь дышетонъя комитетэн кивалтон, отӥяз, кин тодэ, оло, пӧрмоз Россиысь быдэс дышетон удысэз валтыны. Соиз тодмо луоз мартэ ортчем быръёнъёс бере…

Леонид Гонин, Удмуртиысь «Тодосчиослэн юртсы» учрежденилэн кивалтӥсез, политтехнолог:

- Удмуртилэн феноменэз, мар шуод. Тазьы луонэз мон вералляй ни май толэзьысен. Но монэ ваньмыз тушмон интыын адӟылӥзы, ӧз оскылэ. Соку ик ваньзэ лыдъяно-чотано ни вал. Миллионъёсмы ӧвӧл бере, визьмын ужано.

Табере мар ке карыны бер ни – ну «утом» кӧня ке, нош караван-то кошкиз ни. Асьмелэн али рос-прос азьветлӥсьмы но ӧвӧл! Кин сьӧры калык ӝутӥськоз? Бадӟым юан.

Нош «Удмурт кенешен» кусыпъёссэ уретыны мон Николай Николаевичез ӧй лэзьысал: мед ужалоз. Кин табере со ӝукез омыръяны кулэ? Котьма ке но со асьме адями, тышканы уг яра.

Нина Келарева, «Удмурт кенешлэн» Сьӧлта ёросысь ёзэныз кивалтӥсь:

- Нырысьсэ тӥлесьтыд кылӥсько таӵе югдур сярысь. Туж жаль. Николай Николаевич мон понна тужгес гажамон адями. Котькуд адямилы саклык висъяны быгатэ, ноку номыре уг вунэты, лачмыт вераське. «Удмурт кенешен» со кивалтыны кутскем бере гинэ  ёросысьтымы кивалтӥсьёс милемды адӟыны кутскизы – азьвыл ми ӧй ик вал кадь, ужрадъёс ортчытыны юрттэм гинэ ӧвӧл, дасяз но ӧз пыриськылэ, шуыны луоз. Али кивалтӥсьёсынымы огкылысь ужаськом. Конечно, мандат юрттылӥз  удмуртъёсты гажаны. Но мон уг оскиськы, со ас мылкыдызъя озьы лэсьтӥз шуыса.

Зинаида Рябинина.

Туспуктӥз Владимир Беломорских.

Кивалтӥсьёслэн та нуналэ тодазы но ӧз лыкты ни та арын ик март толэзе ортчытэм референдум. Соку СССР-ысь гражданъёс веразы одӥг семьяен улыны мылкыдзэс. Нош Украинаын 1-тӥ ноябре радъязы выль референдум – таяз учыре тросэз украинъёс нимаз улон сярысь малпанзэс шараязы. Соин СССР-ез куашкатон мылкыдын Беловежской пущае вуиз Леонид Кравчук.

Нялтас вераса, куинь вылӥ кивалтӥсьёс возьмазы на Казахстанлэсь азьветлӥсьсэ – Нурсултан Назарбаевез. Таизлэн самолётэз Москваысь аэропортэ пуксиз но Белоруссия пала лобыны ӧз ни ӝутскы – Назарбаев огыр-бугыр выронлэсь палэнскиз.

Ельцин, Кравчук но Шушкевич белорус заповедникысь Вискули нимо интыын ӝытбыт ӝӧк сьӧрын пукизы. Уйшор котырын мунчое потӥзы. Бӧрысь татын ик кылдӥз Совето Союзэз куаштон сярысь документ. Верано на: вылӥ кивалтӥсьёс вӧзын  вал госсекретарь Г. Бурбулис, Белоруссиысь министръёслэн кенешсылэн тӧроез В. Кебич но Украиналэн премьерез В. Фокин.

Мукет нуналаз кисьмам документэз печатланы косӥзы заповедникын ужась машинисткаез Евгения Патейчукез. Нылкышнолы текстэз лыдӟиз Г. Бурбулис, Евгения тачыртыса машинкаен бичаз.

СССР-ез куашкатон сярысь заявление улэ кивалтӥсьёс кинюртэмзэс пуктӥзы 5 журналистъёс азьын. Пӧлазы вал одӥг фотокорреспондент. Озьы быдӟым Союз куашказ 8-тӥ декабре 14 час 17 минутэ.

Выль документэз шампанскоен миськыку, делегациос кенешизы Минскын пресс-конференция ортчытыны. Но ӝытазе куинез ик кивалтӥсь лобиз пӧртэм  пала. Ельцин, Кравчук но Шушкевич та учыр бере огпол но ваньзы ӵош ӧз ни люкаськылэ.

Валентин Тубылов, «Удмурт кенешлэн» вице-президентэз, 1991-тӥ арын Удмурт Республикалэн Вылӥ Кенешезлэн тӧроез:

- СССР-лэн куашкамез сярысь мон но, вань мукет калык сямен, тодӥ газетъёс но телевизор пыр. Та уж лушкаськон кадь шыпыт лэсьтэмын вал. Милесьтым, республикаослэн но областьёслэн кивалтӥсьёссылэсь, нокин но, номыр но ӧз юа. Ярам, та решенилы пумит асьме шаерамы нокыӵе митингъёс но акциос ӧз ортче. Люкамы Вылӥ Кенешлэсь исполкомзэ – татчы 16 мурт пыре вал. Августэ ортчем ГКЧП бере ми огыр-бугырлэсь возиськыны быгатӥмы. Уго соку кӧня зуркатъязы: интыосысь Вылӥ Кенешъёсты улляно, райсоветъёс кулэ ӧвӧл. Со дыре ми кивалтон биньгозыез киысьтымы ӧм лэзе – шуим, кызьы улӥмы но ужамы, озьы ик луоз. Беловежской пущаын гожтэм заявление, валамон ни, мылкыдэз ӧз ӝуты. Но та мыдлань ужез берыктыны бер вал ни.

Аркадий Малков, гурт удысъя но сиён-юонъя министрлэн воштӥсез, 1991-тӥ арын Вылӥ Кенешысь депутат:

- Югдур капчи ӧй вал та иворез тодэммы бере. Кышкыт соиз – нокин но таӵе вамышез ӧз возьма. Туннэ Союз куашка, нош ӵуказе Россия но висъяськыны ӧдъяз ке? Удмуртиын та ласянь огыр-бугыр югдур ӧз луы. Валентин Тубыловлэн котькуд кылыз мертамын но малпамын вал, депутатъёсын со лад-лад но оскымон вераськиз та пумысен. Соин валантэм вамышъёслэсь асьме республикамы утемын вал, ваньмыз возьмазы, мар луоз ни.

Зуркыт ик малпаны али но: сомында аръёс ӵоже огазеям Совето Союзэз кӧня ке мурт куашкатӥз. Мылкыдзэс ӧз юалэ тросэзлэсь союзной республикаослэсь. Валамон, куд-огез соос укыр оскиськизы Москвалы, ас кожазы улыны но коньдон поттыны моӵсы ӧй вал. Кин тодэ, оло, чутрак соосты висъянэз ӧй вал. Туннэ адӟиськом – Белоруссия но Казахстан Россиен ӵош выль огазеяськон кылдыто. Валамон, таиз визаостэк ог-огмы доры ветлон, вуз карон дунъёсты кулэстон понна. Иське, 20 ар талэсь азьло лэсьтэм янгышлэсь бервылзэ тупато ни туала кивалтӥсьёсмы.

Дасяз Елена Скворцова.

Табере быръёнъя система трослы выльдӥськиз. Пӧртэм пумо кивалтон ёзъёсы депутатъёсты ӵекто, кунлы кивалтӥсьёс вожвылъясько. Куара сётон амал но бумага вылын гинэ ӧвӧл – быръён удысэ пыро выль технологиос. 

Ӵуказе – быръёнъёс пумысен чус улон нунал. Озьы ке но Россимылэн вуоно нуналыз сярысь малпаськись но сюлмаськись адямиос уз вунэтэ, арнянуналэ быръёнъя участоке вамыштоно шуыса. 

Сергей Сорокин, лэсьтӥськонъя участокен кивалтӥсь:

- Быръёнъёсы котьку ветлӥсько, но таяз учыре уг мыны. Ӧвӧл открепительной удостоверение. Мон ачим Сибирьысь вуэмын, пропискае Ува районысь ӵыжы-выжыосы дорын пусъемын. Отчы бертылыса ӧй вуы, табере быръёнэ мыныны уг быгаты. Но со пумысен малы ке чик уг куректӥськы. Одӥг партилы но уг синмаськиськы.

Зиновий Опарин, Дэбес ёросысь ветеранъёслэн огазеяськонзылэн тӧроез:

- Быръёнъёсы, огзэ но кельтытэк, ветлӥсько. Ӧд ке мыны, тынэсьтыд куарадэ юатэк но басьтозы. Нош мынам куараме аслам сётэме потэ.

Огнам улӥсько та вие, соин быръёнъёс пумысен дорам нокинэн кенешыны уг быгатӥськы. Но пересьёсын ужасько бере, татын котьку вераськиськом, споръяськиськом. Милям ветеранъёсмы туж мыло-кыдоесь, соин йыгмыт вамышен быръёнэ мыном.

Наталья Шутенко, «Время» пенсиосъя фондлэн кивалтӥсезлэн воштӥсез:

- Котьку мыныны тыршисько быръёнъя участоке. Йырын возисько «кулэ» шуыса малпанэз. Участоке нунал пумынгес вамыштӥсько. Малы ке сыӵе сяммы кылдӥз ни семьяямы. Куара сётон пумысен малпаськиськом, семьяын кенешиськом на. Пимылы 17 арес. Солы но быръёнъёс тунсыко пото. Телевизорын политической реклама кутске ке, ваньмы чорк гинэ сое учкиськом. Собере э! кутскиськом ук мылкыдмес вераны. Ярам, воксё споръяськонозь ум вуиське. Малпасько, кин политика улон шоры чиньы пыртӥз уг учкы, соос семья куспазы но верасько политика сярысь. Дебатъёсты но учким, партиослэсь программаоссэс лыдӟыса потӥ. Телеканалъёсысь споръяськонъёслы луыса туэ аслам но мылкыды воштӥськиз.

Юлия Широбокова, студентка:

- Быръёнъёсы огпол но ӧй на ветлы. Таяз радэ юромо гуртэ берто куараме сётон понна. Уго пропискае вордскем гуртам пусъемын, соин городын куара сётыны уг быгатӥськы. Малпасько, тросэз студентъёс уз вуэ быръёнъёсы мыныны. Малы ке шуоно кинлэн ке бертэмез уз поты, мукетъёс, оло, куара сётысалызы, но открепительной удостоверение сярысь берло гинэ йыразы шуккиз. Озьы ке но университетамы агитация туж зол мынӥз. Пӧртэм партиос сярысь тодӥмы коть.

Виталий Чермокин, Ижысь 3 номеро быръёнъя участоклэн кивалтӥсез:

- Участокмы шоро-куспо лыдъяське. Татын 1 сюрс 600 мурт куаразэ сётыны кулэ. Нырысь ик калыкез ӧтимы открепительной удостоверение басьтыны. Солы тросгес вуо вахта амалэн ужасьёс. Шумпотымон, соос но куаразэс сётыны сюлмасько шуыса. Озьы ик мукет быръёнъя участокъёс борды юнматэм адямиос но таӵе документ курыны лыкто. Огвыллем югдур арысь аре: ваньмыз адямиос та ужез берло нуналлы кельто.

Тросгес ӵектонъёсын вуо пересьёс. Шуо, малы агитация ӧжыт нуиське, малы быръёнъя участокын визьмасьёс ӧвӧл? Валэктӥськом: калыкез ӧтьыны гинэ быгатӥськом, агитация радъяны правомы ӧвӧл.

Елена Скворцова.

Туспуктӥз Владимир Беломорских.

Георгий Грязев, «Удмуртия» издательствоысь редактор, Эрик Батуев нимо премилэн лауреатэз:

- «Удмурт кенешлэн» кулэлыкез туж бадӟым. 20 ар куспын со зэмос кужымлы пӧрмиз. Удмуртъёс понна со – вазиськон инты. Котькыӵе юанъёсын – социальной-а, политикая-я. Тодӥськомы угось: законъёс син куспын вошъясько, соос сьӧры уйиськыны, нош тужгес но кулэез – соосты валаны но улонэ кутыны – туала вакытэ секыт. Кытчы-о вазиськоз удмурт адями? Со вамыштоз удмурт огазеяськонэ – «Удмурт кенеше». Тодэ угось: отын со чылк-чылк анай кылыныз сётыны быгатоз созэ я тазэ юанэз. Валэктон но удмурт кылын чузъяськоз. Озьы калыклэн кылдэ юрттэтлы оскон мылкыдыз. Со туж кулэ асьмелы. Со туж дуно асьмелы.

20 ар куспын «Удмурт кенеш» кыдаз-юнмаз, культурамы но пыд вылаз юн-юн сылэ ини. Кӧня бадӟым ужрадъёс ортчытэмын та дыр куспын! Соин ик, малпасько, «Удмурт кенешлы» дыр вуиз азьлань, эшшо но паськытгес ӧре – политикае – вамыштыны. Отын ӝутӥськысалзы но сэрттӥськысалзы калыкмес тужгес но сюлмаськытӥсь юанъёс-ужпумъёс.

Владимир Котков, Шаркан черкогуртысь нылпи творчествоя центрысь дышетӥсь, кылбурчи но крезьгурчи:

- Котькуд калык ачиз сярысь сюлмаськыны кулэ. Со ласянь «Удмурт кенешлэн» ужез воштонтэм. Пайдаез арысь аре золгес но золгес шӧдӥське. Угось котыраз, мӧйыосты сяна, бине ини егитъёсты но, нылпиосты но. Али школаосын но, клубъёсын но удмурт движенилэн шокамез шӧдӥське. Соин валче саклык висъяно вылэм тани малы: удмурт кылмес калыкмылы валантэм карыны уг яра. Юан кылдэ: выль кылъёсты малпасьёс асьсэос куспазы кылдытэм кылынызы верасько меда? Кылмы бордын асьмелэн кужыммы ук. Сое вань сюлмысь утьыны тыршоно.

…Петуньки гуртысь бускеле кемаласен ини ужа Экваториальной Гвинеяын. Отысь президентсэс со вертолётэн нуллэ. Арлы быдэ сямен вордскем палъёсаз вуылэ. Удмурт кылзэ уг вунэты, чебер вераське. Но куд-ог удмурт изданиосты лыдӟыны уг ни валаськы, шуэ. Радиоез но, пе, уг кылзӥськиськы. Олома кылын вераськыны кутскиллямды, шуэ. Мон малпамъя кылмес узырмытыны кулэ калык. Соку со искусственной уз лу. Азьланяз «Удмурт кенешлы» котькыӵе удысын эсэпсэ валаса тыршыны сӥзисько. Та пумысен вордскизы кылбур чуръёсы но:

Инвис ворсаське.

Инвис усьтӥське - 

Уг дугды улон-колёса.

Шунды но пуксе.

Шунды но ӝужа –

Быдӟым калыкмес данъяса.

Роман Вагинов, «Удмуртия» телерадиокомпаниысь корреспондент:

- «Удмурт кенеш» огазеяськонэз котьку но адӟем потэ бадӟым кужым, удмуртъёсты азьлане нуись, азинтӥсь, ӝутӥсь кужмо ӧр чотын. Солэн куараез арысь аре кужмогес но кужмогес чузъяське. Оскем потэ, «Удмурт кенеш» азьланяз эшшо но паськытгес пыриськоз улонмылэн котькуд удысаз: экономикае, политикае, кивалтон уже. Озьы ик та огазеяськонмес адӟем потэ на вылэм законъёсты кылдытъян удысын но. Кылсярысь, шаермылэсь бюджетсэ чаклаку, удмуртъёсты, анай кылмес ӝутонэн герӟаськем программаосты-законъёсты кутыку. Собере «Удмурт кенешлы» золгес ужано удмурт егитъёсын. Соос но мед пыриськозы солэн ужаз. Та понна нимысьтыз программа дасяно, вылды. Вераме потэ на «Удмурт кенешлэн» съездъёсыз сярысь. Отын кутэм решениос бумага вылэ гинэ медаз кыле, котькудӥз мед пыӵалоз улонэ.

Алексей Фомин, Удмурт кун филармонилэн кивалтӥсез:

- «Удмурт кенеш» сокем интыяз но иназ, йыре малпан ик ӧй лыктысал мукетсэ огазеяськон кылдытыны! Удмуртъёс ке ӧз, кин-о асьме понна сюлмаськоз, кин-о юанъёсмес сэрттыны-пертчыны юрттоз?! Та дырлы трос лэсьтэмын, трос вормонъёс басьтэмын ни. Но таин гинэ буйгатскыны уг яра, азьлань мыноно. Ӵектонэ: бадӟымгес саклык висъяно удмурт пиналъёсмес дышетонлы. Асьмеос али улӥськомы, удмуртлыкез ӝутыны тыршиськомы, нош будӥсь пиналъёсмы азинтозы-а удысмес? Быгатозы-а выжыоссэс дунъяны? Ӵапак та мылкыдэз егитъёслы пыӵатоно.

Шумпотымон, та дырлы ужзэ ӟеч радъя Ижысь К. Герд нимо гимназия, озьы ик пиналъёсты липет улаз люка республикаысьтымы усточи пиналъёслэн школазы. Но мон чакламъя соос ас понназыгес уло-ужало кадь. «Удмурт кенеш» та ласянь огазеясь кужым кадь луыны кулэ. Со сяна, тани таӵе но малпан вань. Ижысь 2 номеро школа-интернатлэн юртэз буш улэ, малы отын усточи удмурт пиналъёсты дышетонъя ёз усьтонтэм? Асьмелы будӥсь пиналъёсмылы тодон-валан басьтыны луонлыкъёс кылдытыны кулэ. Отчы соос мылкыдын, асьсэлы оскыса, мед вамыштозы. Нош бадӟым политикае пыриськон сярысь ке верано, мыным кельше «Удмурт кенешлэн» президентэзлэн Николай Мусалимовлэн мытэм удысэз. Со Кун Думаын кыдам адями, озьыен, малпасько, солы капчиен сётскоз удмуртъёслэсь валтӥсь огазеяськонзэс азинтыны но солэсь удыссэ паськытатыны.

Дасяз Елена Тугашова.

Ижысь транспортын.

Алигес Иже ветлӥ. Ужъёсме йылпумъяса, бертыны потӥ. Троллейбус дугдылонние лыктыса, одӥгезлэсь юасько: «Кыӵе номеро троллейбусэн Ракетной ульчаозь мыныны быгато?» Тани, пе, та лыктӥсеныз ик – матэктӥсь троллейбус шоры возьматӥз со. Пушказ калыкез трос ӧй вал. Мон ӝогак пыри, пыдлось пуконаз интыяськи. Билет басьтэме бере, сумкаысьтым газетме поттыса, пырись-потӥсьёс шоры учкылытэк, лыдӟиськонам выйи.

Кӧня озьы мынӥ, валаса ӧй вутты. Йырме ӝутӥ но, азям кондуктор сылэ.

- Троллейбусмы депое мынэ, тӥледлы васьконо луоз.

Котырак учкисько: салонын, ми сяна, нокинэз ӧвӧл ни.

- Малы депое? – паймыса юасько. – Мон Ракетноёзь мынон вылысь билет басьтӥ ук. Пуксеме бере ик ивортэ вал депое мынэмдэс, мон мукетсэ возьмасал.

- Ӵукна пельёстэ ӧд сузя, дыр, дедуш, – оло серекъяса, оло ӝегатэмелы вожез потыса, валэктэмъяськиз. – Мукетаз пуксёд.

Мукетсэ кема возьмано ӧз луы. Таизлэн буш пукон интыосыз ик ӧй вал, калыкез тачак. Одӥгез егит нылаш аслэсьтыз интызэ ӵектӥз. Тау карыса, пукси. Интыяськыса ӧй на вутты, дорам кондуктор лыктӥз, билет басьтыны куре.

- Мынам билетэ вань ини, – кисыысьтым поттыса, возьматӥсько.

- Малы вужзэ возьматӥськоды? Тӥ мынэсьтым ӧд на басьтэ.

- Тӥлесьтыд ӧй. Билет Ракетноёзь мыныны басьтӥ вал, нош троллейбус депое кожиз. Пуксьыкум ӧз иворты.

- Мукетаз пуксиськод ке, выль билет басьтоно, дедуш. Эн ӝегатэ ужме. Коньдонды ке ӧвӧл, васькелэ.

- Тӥляд льготной проезднойды ӧвӧл шат? – вӧзам пукись юа.

- Гуртысь мон. Поездын документме возьматӥсько но дунтэк мынӥсько-ветлӥсько. Кыкетӥ группаен инвалидносте вань, – кисыысьтым бумагаосме поттыса, возьматӥсько.

- Та документъёстыя городысь транспортын ветлыны уд быгатӥське. Басьтэлэ билет, – нош ик вазе кондуктор.

- Мар тӥ пересь адями, эшшо ик инвалид борды, тэбиниды? Дас куинь манетэн предприятиды узырмоз шат? Мелэ, басьтэлэ коньдонме. Сётэ дедушлы билет но эн ёртэ сое, – одӥгез ӧз чида интыяз пукыны, мыным дурбасьтӥз.

- Кулэ ӧвӧл, мынам коньдонэ вань. Но мыным возьыт… – куараме мырдэм поттӥ.

Пассажиръёслэсь ми шоры берытскыса учкемзэс адӟыса, зэмзэ ик возьдаськи. Тодмоосы ӧй вал кадь. Озьы ке но та троллейбусын мынонме азьланьтэме ӧз ни поты – вуонояз дугдылонние васьки.

Татын мон валай: кондуктор янгыш ӧвӧл, со аслэсьтыз ужзэ лэсьтӥз. Мыным одӥгез гинэ валантэм: малы троллейбуслэсь депое мынонзэ ваньмызлы кылӥськымон верантэмез вал. Аслам пельёсылы, Инмарлы тау, уг ӝожтӥськиськы на. Коньдон, конечно, лыдъямез яратэ. Пенсионеръёс сокем трос пенсия уг басьто угось. Туала арын городэтӥ транспортэн пересадкаосын ветлон кисыез бушатэ вылэм. Бен, дунъёс али зол шудо. Арлы быдэ газовикъёс, нефтяникъёс, электрикъёс дунъёссэс будэтъяло. Узыръёс байко, нош огшоры калык копейказэ чота.

Депутатъёс, калык сярысь малпаськыса, мед ужасалзы вылэм. Быръёнъёс азьын чебер верам кылъёссы кытчы меда ышо, малы меда вуно?

Николай Павлов.