Сиыса-юыса шуге-леке вуэмъёс Удмурт шаерын кулэсмизы. 2010-тӥ арын сыӵеос 4 сюрс 879 вал ке, 2011-тӥын 3 сюрс 343 кузя люкаськизы. Ог 44 процентэз больницае вуэмын курыт юонэн сэрен.

Тужгес юзырес югдур Яр, Грак, Вавож, Красногорск ёросъёсын. Берлояз шугомыса кулэмъёс уката трос – 100 адями пӧлысь 97-ез. Ӝыныез таос пӧлысь кулэмын алкоголен сэрен. Таӵе лыдпусъёсты шараяз Роспотребнадзорлэн Удмурт ёзэз.

Туала вакытэ кыӵе но юон ӧвӧл ӝажы вылын! Буёлэз но, ӟенеликез но пӧртэм – йыр ик сураське. Котьма ке но саклыкез ыштыны уг яра. Рос-просгес учкиськод ке, умой вина шедьтыны луэ.

- Нырысь ик учконо юонлэсь зол-ляб луэмзэ. 9 градуслэсь ортчемын ке, ӟенелик вылын маркировка луыны кулэ, – шуэ Роспотребнадзорлэн Удмурт ёзысьтыз курыт юонъёслэсь но тамаклэсь ӟечлыксэ эскерись Лидия Зыкунова. – Отын пусъемын медло нимыз, малэсь лэсьтэмын. Кыӵе ке консервантъёсыз вань ке, малпаськоно: тае юыны яра меда? Одно чаклано: кыӵе емышлэсь лэсьтэмын. Со емышез бичан вакыт тупа меда винаез кисьтон дырен? Уг ке, озьыен, со куасьтэм виноградлэсь я эшшо малэсь ке дасямын. Валамон: шӧмыз но тыпак мукет луоз.

Та сяна, ӟенелик вылын акциз марка луыны кулэ. Этикетка вылысь лыдпусъёсын но ивортонъёсын со огкадь медло. Чаклано созэ но: макем ӟеч лэсьтэмын марка. Дуръёстӥз суредэз кырыж-мерыж ке, со лушкем дасям маке луыны быгатоз. Чиньыеныды зыраса утчалэ. Суредэз ӵушиське я буёлэз кутске? Сое басьтэмлэсь возиськоно.

***

Тыро ӟенеликез сэзъялтыса утчалэ. Виналэн пыдэсаз пож ваське, нош водкалэн пыдэсаз тӧдьы маке пуксе ке, со – урод. Озьы ик куд-ог дыръя синйылтоно: курытэз пушкын уя жуг-жаг. Озьыен, юон урод сžсъямын.

Зуркатэм бере юонлэн пульыосыз бадӟымесь ке, суретын вуэз нормалэсь трос. Ӟенелик вылэ тӧдьыалэс пытьы (налёт) пуксе ке, тодэ: посудае понэмын вуэн сурам спирт. Сое усьтӥды ке, эфирлэсь я ацетонлэсь зынзэ шӧдоды.

Ӟенеликез, йырин-чукин берыктыса, эскере. Винаез борддоръёсыз кузя ӝог гылӟе ке, ляб со, кудӟытыны толыкез но, оло, уз тырмы.

Виналэн буёлэз бусӥр ке, озьыен, со олокыӵе но емышъёслэсь лэсьтэмын. Куренялэс ке, чырсаны кутскемын.

Кемагес ӝажы вылын кыллем виналэн буёлэз бездытгес кыле. Кылсярысь, алигес гинэ посудаосы лэзьям юон луэ горд-бусӥр. Сылэмезъя со кирпичлэн буёлэзлы укшаны кутске. Пробкаен ӵоксамын ке но, пушказ омыр пырытэк уг кыльы уго, со ик буёлзэ но воштэ. Тӧдьыез кема кыллемезъя сирлы укшаны кутскоз.

Буёлэз потэ на виноград бордысь но. Шуныт палангес будӥсезлэсь пызьыртэмын ке, яркытгес луоз.

- Мон ачим тӧдьы кӧс винаезгес басьясько. Но гордзэ яратӥсьсэ алэме чик уг поты. Таиз тазалыклы пайда вае. Огзэ чаклано: одӥг пумоез но пожаськемын медаз лу, – шуэ Лидия Зыкунова.

Винаез юыса но эскерыны луэ. Ымдурады вуэмез бере со ческыт шӧм кельтыны кулэ. Ньылэмды бере спирт шӧм кылиз ке, со ӟеч ӧвӧл. Умой виналэн шӧмыз небыт луыны кулэ. Корт шӧм кылдӥз ке, озьыен, винной кислотаез пушказ трос.

Картон пуйыосы лэзьям вина, ӟенеликын сярысь, кемагес утиське. Озьы ке но сое басьянлэсь возиськоно, дыр – ӟечлыкез умой ик ӧвќл. Сое сиён пӧраны, шуом, соус лэсьтыны кутоно. Умой вина 400 манетысен дунъяськыны кулэ. Зэм, татын но саклыкез ыштыны уг яра.

Эскере созэ но. Артэ сылӥсь ӟенеликъёсын ог­мында-а курытэз? Сое автомат лэзья бере, огмында луыны кулэ.

***

- Техрегламентын гожтэмын: сур – шукыё напиток, лэсьтӥське чырсатэм будосъёслэсь, – веранзэ азьланьтэ Лидия Зыкунова. – Пушказ оломар но кулэтэмез тыремын ӧвӧл ке, 5 градуслэсь кужмогес луыны со уг быгаты. Нош асьмелэн 8 процентъемзэ но вузало. Нош отын номыр натуральноез ӧвӧл, со мусэз, пекляосты гинэ быдтэ.

Эшшо одӥгез йырез сура на. Кыӵе но посудае тыремын ӧвӧл сур: корт, пияла, пластик. Азьло ГОСТ-лэн куронъёсызъя сое лэзьяны яра вал пеймыт-вож я пеймыт-курень пияла посудае гинэ. Та куронэз техрегламентысь али малы ке басьтӥзы. Котьма ке но мон ӧй дэмласал сое мукет посудаысь басьяны. Чакласьконо югыт азьын сылӥсь суръёслэсь. Сыӵе юонъёс ӟеч уг луо. Сур пеймытэз яратэ уго, – шуэ Лидия Зыкунова.

***

Трос урод аракы палэнысь ваемез пӧлын. Алигес Роспотребнадзорысь специалистъёс вуылӥзы Ижысь Октябрь ёросысь огаз бадӟым магазинэ. Огзэ водкаез ӝажы вылысь утялтыны косӥзы. Сое басьяськисьёс юыны шедьтӥзы ке, кема йырберзэс кормалозы на, мар та таӵе вал шуыса. Соин ик шонергес луоз, асьме дорын поттэмзэ басьтыса. Асьме дорысез трослы ӟечгес. Вина лэсьтонъя заводъёсты Роспотребнадзор гинэ уг зуркаты уго. Удмуртиысь Вуз каронъя но калыклы улон-вылонын юрттонъя министерство бордын ужась Ӟечлыкъя элькун центр но ужамзэс эскере.

Елена Сараматова.

ДПС машина, ульчаосты эскерыса, Воткинск шоссее кожиз. Угось тросэз водительёс, город сьӧры потыкузы, бадӟым ӝоглыкен вортто. Инспекторъёс кема ик сылыса вуттӥллямтэ – «Визир» приборзы йыртэмасез шараям. Одӥгез инспектор, машинаяз пуксьыса, законэз тӥясь муртлы штраф гожтэм. Нош лейтенант Мышкин прибореныз сюрес дуре вамыштэм.

Город пала лыктӥсь «Ниваез» инспектор дугдытоно кариськем. Но со калык рад дугдыны быгатымтэ – машина доры урдэс гылӟыса вуэм, лымые пырем.

- Та сюрес вылтӥ водительёс часкын 60 иськем ӝоглыкен мыныны кулэ, нош соос 100-эз но ортчо, – шуэ Удмуртиысь ГИБДД-ен кивалтӥсь Альберт Галимов. – «Нива» машиналэн водителез, инспекторлэсь дугдыны косэмзэ адӟыса, тормоззэ зӥбем, но машина кылзӥськемысь дугдэм. «Нива» руль сьӧрын пуке вылэм кышномурт, ӝыны ар гинэ ай ворттылэ. Ачиз со номыр луэмын ӧвӧл. Нош инспекторлэн йырыз зуркамын, пельпум лыэз тӥяськемын, тыэз шуккиськемын. Та вакытэ со йырсазьтэк кылемын.

Алексей Анатольевич Мышкин ДПС-ын ужаны кутскем 20 аресказ – 1999-тӥ арын. Кузпалъяськемын, нылъёсызлы 8 арес но 3 толэзь.

Пусъёно: кык толэзь кус-пын шаерысьтымы сюресъёс вылын 20 мурт быриз, 225-ез сӧсырмиз.

Валентина Емельянова.

Трос шугъяськонъёссы кылдӥзы 271, 273, 275 номеро юртъёсын улӥсьёслэн. Шурлы луыса куд-огез подъездаз пырыны ӧз быгаты, нош улӥ этажъёсысь квартираосы укноостӥзы ву пыриз. Та учырез ГЖУ-ын, МЧС-ын, ГИБДД-ын ужасьёс сак эскеризы. Город администрациысь кивалтӥсьёс оскытӥзы: туннэ нуналлы вань юртъёсын ву сётэмын луоз.

Валентина Емельянова.

С. Шойгу визь тыре Сарапулысь подрядчиклы.

Премьер-министр Владимир Путин косэмъя 6-тӥ феврале Удмурт шаере вуылӥзы Россиысь секыт учыръёсъя министр Сергей Шойгу, улосъёсты азинтонъя министр Виктор Басаргин, Президентлэн Приволжск федерал округъя оскем муртэз Михаил Бабич но музон вылӥ кивалтӥсьёс. Соос эскеризы кылем арын Пугачёво арсеналын пуштылонъёс бере тупатъян-лэсьтӥськон ужъёсты.

Нырысь ик Сергей Шойгу Пугачёвоысь шор ёзо школае вамыштӥз. Школалэн директорез Надежда Быльнова подрядчикъёслэсь ужамзэс ушъяз. Ваньмыз, пе, умой тупатъямын, нылпиос шуныт но югыт классъёсын дышетско. Школамы тодмантэм чебер луиз. Сое тупатъяны 40 миллион манет кошкиз. Одӥгез гинэ сюлэмшугъяськытэ, пусйиз директор, школаен артэ чугун сюрес, секыт поездъёс кошкыку, борддоръёс ик зуркало. Выльысь медам пилиськылэ вылэм соос.

Собере министр военной городокын улӥсь калыкен пумиськиз: вить этажъем коркась одӥгаз квартирае кожаз, мукетаз пыраз. Озьы ик со эскериз нылпи садэз, куд-ог нимаз улон коркаосты.

Яган посёлокын улӥсьёслэн куремзыя министр татысь но куинь-ньыль улон коркаосты эскериз. Крестина Моховалэсь корказэ дырыз дыръя ӧз ӝутэ, кузпалъёс али но ӟоскыт мунчоын уло. Сарапулысь подрядчикъёслы Сергей Шойгу юн-юн вераз: 3 арня куспын улон корказэс вуттоно. Тодады возе: тӥледыз уен-нуналэн чакласа-эскерыса возёзы. Нош кызьы МЧС эскеронъёсты ортчытэ, сое ваньмыз тодо.

Яганын улӥсьёс лэсьтӥськисьёслэн суп-сап быдэстэм ужъёссы пумысен трос гинэ ӝожтӥськонъёссэс шараязы. Министр озьы ик саклык висъяз Яганысь трос нылпиё Ураков кузпалъёслэн семьязылы. Соослэсь квартиразэс матысь дыре тупатъяно, нылпиоссылы кынмыны сётоно ӧвӧл, шуиз.

* * *

Собере кивалтӥсьёс люкаськизы Пичи Пурга ёрос администрацие. Сергей Шойгу Удмурт Республикалэн Президентэныз, министръёсын, Пичи Пурга ёросысь, пуштылонъёсы шедем муниципал кылдытэтъёсысь йыръёсын, лэсьтӥськисьёслэн кивалтӥсьёсынызы кенеш ортчытӥз. Сергей Кужугетович пусйиз:

- 95 процентэз тупатъян ужъёс лэсьтэмын. Со умой. Ӟеч тупатъямын школаос, эмъяськон юртъёс но спортзалъёс. Но эшшо 5 процентсэ тупатъян ужъёсты йылаз-пумаз вуттыны кулэ на. Со понна кылдытоно нимысьтыз штаб, кудӥз ужалоз ӵукна 9 часысен ӝытазе 9 часозь. Штабын пукисьёс юрттэт курыны лыктӥсь котькуд адямиез тыро-пыдо кылзыны кулэ. Тӥледлы татын улоно, асьтэлы ик со сярысь сюлмаськоно. Крестина Моховалы уно синкыли кисьтэмез понна телевизор кузьмалоды.

Россилэн Президентэзлэн ПФО-я оскем муртэз Михаил Бабич меӵак вераз: пуштылонъёс бере тупатъян ужъёсты лэсьтон понна федерал бюджетысь висъям уксё ваньмыз кутэмын ӧвӧл на. Со дэмла уксёез кытчы но малы быдтэм сярысь эскеронъёс (ревизия) ортчытыны, тупатъян ужъёсты йылаз-пумаз вуттыны. Ужано шуге-леке шедем калыкен. Адямиос мед тодозы, мар лэсьтэмын но мар понна уксё быдтэмын. Котькудӥныз ӝожтӥськыны лыктэм адямиен нимысьтыз ужано.

Улосъёсты азинтонъя министр Виктор Басаргин пусйиз: лэсьтӥськонъя организациосты одно ик эскерыса возёно. Соослэн янгышенызы сэрен адямиос курадӟыса но кынмыса ке уло, тупатъян ужъёссы пумозяз лэсьтэмын ке ӧвӧл, кивалтӥсьёссэс кыл кутытоно, асьсэ кисыысьтызы уксёен тупатъян ужъёсты лэсьтытоно.

Журналистъёсын кенешыкуз, Сергей Шойгу пусйиз: пуштылонъёс бере тупатъян ужъёслы висъям уксёез тус-тас карись организациос суд азьын кыл кутозы. Пумисько сыӵе учыръёс: куд-огез амало подрядчикъёс, арлыдо адямиосты пӧяса, соиз но таиз уж быдэстэмын шуыса, актъёсы гожтӥськылыны косылӥзы. Валамон, тросэз уксёзэс асьсэ кисыязы кельтӥзы.

- Тупатъянэн вырись организациослы йылаз-пумаз вуттымтэ объектъёсты быдэстыны толэзь дыр сётӥське, – чурыт шуиз министр Сергей Шойгу. – Со сяна, Удмуртие келямын луоз МЧС-ысь нимысьтыз лаборатория, кудӥз эскероз куинь сю пала улон коркаослэсь ӟечлыксэс. Та лабораториысь специалистъёс дуннеысь тросаз странаосын музъем зурканъёс, мукет кышкыт учыръёс бере эскеронъёс ортчытъязы. Лаборатория возьматэмъя улон коркаос тупатъяны ярантэмесь лыдъямын луизы ке, соосты сэрттозы, нош тупатъяны-лэсьтыны луоноосыз бордын выльысь ужано.

* * *

Ӝытазе Удмурт Республикалэн Президентэз Александр Волков кенеш ортчытӥз на. Тупатъян ужъёсты эскерыса возьыны элькун штабен кивалтӥсе юнматэмын Правительстволэн Тӧроезлэн воштӥсез Людмила Чунаева. Со кусып возёз вань лэсьтӥськись организациосын но соослэн кивалтӥсьёсынызы. Штаб интыяськоз Пичи Пурга черкогуртэ, нош солэн отделениосыз – пуштылонъёсы шедем муниципал кылдытэтъёсы.

- Туннэ сямен ужаны уг яра, – Пичи Пурга ёрос кивалтӥсьлы но муниципал кылдытэтъёсын кивалтӥсьёслы вазиськиз Александр Волков. – Кайгуэн пумиськем адямиос тӥ доры, юрттэт курыса, вазисько, тӥледлы оскисько… Тросэз арлыдоос уг быгато документъёсын вырыны, кытчы но малы гожтӥськемзэс валатэк кылё. Сыӵе адямиосын валэктон уж нуоно. Зэм, мукет адямиос но вань: куронъёссы бадӟымесь. Юрт котыразы тупатъян ужъёс ӟеч ке но лэсьтэмын, кӧтсы уг тыры, эшшо юрттэтлы кураськыса ветло яке уксё куро.

Александр Волковлэн ӵектэмезъя, Удмуртиысь Лэсьтӥськонъя, архитектурая но улон инты политикая министерство алама ужась подрядчикъёсыз быгатэ мозмытыны яке ӟечгес ужатыны. Шойгулэн тупатъян ужъёсты дырыз дыръя лэсьтыны курон-косонэз лыдэ басьтӥськоз, шуиз Александр Волков.

Любовь Тихонова.

Туспуктӥз Николай Глухов.

Вылез юрт ӝутӥське укыр каллен.

Пичи Пурга ёросысь Пугачёво арсеналын пуштылонъёс бере ӝыны ар ортчиз ини. Но тупатъян-лэсьтӥськон ужъёс али ке но йылаз-пумаз вуттэмын ӧвӧл на. Адямиос ӝожтӥсько: лэсьтӥськисьёс дорамы лыктыны уг дырто.

Пичи Пурга черкогуртысь Пугачёвое мынон сяменымы кожано кариськимы посёлоклэсь 2 иськеме интыяськем Миндэрвуко (Постольский) гуртэ. Гуртэ пырон дорын ик, бур киын сылӥсь нюлэс вӧзын, корка ӝуто. Плёнкаен шобыртэм липет йылын одӥг гинэ воргорон адӟиське. Мон солэсь юатэк ӧй чида: пуштылонъёсын герӟаськем ужъёсын выриськоды-а яке выль корка ӝутӥськоды? Воргорон липет йылысь васькиз. Нош кыӵе ке комиссия, дыр, шуэ. Нунал потэм, пе, ветло. Кинэз гинэ татчы ӧз вуы ни. Номыр умой пала уг воштӥськы, учко но кошко. Азбаре пырыса, мӧйы нылкышноен пумиським. Со Екатерина Ивановна Ашихмина вылэм.

Кытысь вуэммес тодыса, вань сюлэм висёнзэ со милемлы кисьтӥз. Та кык квартираем улыно-вылыно коркан солэн Гриша но Алексей пиосыз семьяосынызы уло вылэм. Асьсэос ик соос та корказэс пуктӥллям но. Паймытӥз сюлэм вӧсь луымон суред: Григорий Михайлович улэ теплицаын. Ульчаын лымыя, ымнырез кезьыт чепылля. Воргоронлэсь улон интызэ адӟыса, сюлэм шымырске.

Теплица пӧрмиз коркалы.

- Гуртмес Пугачёво посёлокен Пӧсьтолшур гинэ висъя, – веранэз пӧсьтӥз кышномуртлэн. – Ож тӥрлык пуштылон дыръя пиосылэн корка сигазы снаряд  усьыса, юрт улыны ярантэм луиз, бакчаязы но снарядъёс  усьылэмын вал. Куинь нунал корка котыртӥзы ветлыны ик ӧз лэзе. Сапёръёс юртъер котырзэс снарядъёслэсь утялтӥзы ини.

Пиосы та аръёсы каллен-каллен пыд йылазы султӥзы ни вал, огсямен улӥзы, кышнояськизы, корка ӝутӥзы, гид тыр пудо-живот вордӥзы. Быгатэмея пиосылы юрттыны тырши. Ужам ужмы тӥни тӧлъя кошкиз.

- Малы бен татчыозь тупатъянды кыстӥське? – юасько Григорий Михайловичлэсь. – Ужасьёс висъязы, дыр, ук?

- Ми дорын Сарапулысь лэсьтӥськисьёслэн бригадазы ужа. Кивалтӥсьсы Денис Курбатов. Ужан висказы материалзы быриз. Кирпич тырмыт сётӥзы вал, коркамылэсь коробказэ ӝутӥмы ик. Азьлоез кадь со бадӟым уз луы ни, пичигес карыны шӧтамы. Лэсьтӥськисьёслэн ужзы туж ӝегаса мынэ. Талэсь азьвыл празднике куинь нуналлы доразы кошкылӥзы. Табере тани, лэсьтӥськон материал ваемзэс возьмаса, пукиськом. Милям чиданмы быриське ини. Ярам, мемеймылэн туж бадӟым выжы-кумыез. Нуналлы быдэ соос милемлы юрттыны ветло. Пӧлазы электрикез но, сварщикез но, малярез но вань. Лапасъёс но гидъёс куашкам понна 35 сюрс тыр изъян адӟимы шуыса, смета лэсьтӥзы вал. Кытын со уксё? Али ке но ми сое ӧм басьтэ на. Документъёс ӧвӧл на вуэмын, шуо.

Гурт пумысь гурт пуме...

Дӥськут но, мебель но, зор улын котмыса, яралозы на меда? Лапас улэ соосты донгамы вал. Мар пайдаез, липеттэм ке соос сыло.

- Куазь кезьыт, нош тӥ теплицаын кӧласькоды, тазалыкты воксё лябӟоз.

- Толон гинэ ёросысьтымы Норья монастыре ветлӥ. Мунчоын улыны но кӧланы яра-а шуыса юамысьтым баӵко мыным валэктӥз: обросъёс басьты, соосын кышкыт но кӧшкемыт уз луы. Тани туннэ мунчо гурме кесяй. Жаль ке но,  мар карод, сотэк койка но отчы уг тэры. Обогревателен шунтӥськоно луоз ини. Тылэз туж зол со кыскоз ини.

- Нош малы одно ик татын кӧласькоды? Семьяды мемейды дорын улэ шуиськоды кадь.

- Кызьы юртъерез огназэ кельтод? Пудо но, мар но татын ук. 6 скал вордӥськом. Гуртмы бадӟым сюрес вылын сылэ. Юрт котырдэ ӧд ке чакла, маид вань, сое но нуыса кошкозы.

Алексей агае семьяеныз Пичи Пурга черкогуртэ кунокуае улыны интыяськиз. Ма, солэн вань дырыз татын ортче ини. Мемеймы бутылкаосты бадӟым сумкае тыре но велосипедэн ву ворттэ пудоослы шуыса. Угось татын ву гумыосмы тан-тан кынмизы. Лариса кузпалэным ӵош ужасьёсмылы со нуналлы быдэ сиён пӧра.

- Инмар понна, гужемзэ тӥни сояз теплицаын 7 ужасьёсты сюдӥмы, – чигтӥськыса ик вера Екатерина Ивановна. – Юри ужасьёс понна одӥгзэ скалмес вандоно луимы. Адямиез сӥльтэк уд сюды ук. Сютэм медаз ужалэ кадь потэ.

Пайми: со ужась бригадаосты сюдон понна нимысьтыз уксё висъяло ук. Ашихминъёслэн кызьы кынарзы тырме сомында адямиез сюдыны. Григорий Михайлович «Юськи» санаторийын возьмаськись луыса тырше. Куинь толэзьзэ ини, уждун басьтытэк, дораз ужа. Лариса кузпалыз  Пугачёво посёлокысь нылпи садын ужа. Али дыре, калыкез сюдоно шуыса, дораз пуке.

- Таӵе куректонэн гинэ ортчысал ке, ярасал ай, – ӧпкельыса вера Екатерина Ивановна. – 16 аресъем Павлик нунокелэсь алигес 40 уйзэ ортчытӥм. Та секытъёслы но куанер ӧз чида кадь потэ. Мукетыз но сюриз: Иже дышетскыны кошкиз вал, востэм муртлэсь уксёзэ кысканы кутскиллям. Кытысь со уксё поттоз: анай-атаез уг ужало, пырон-бертон коркаез ӧвӧл.

* * *

Ашихмин вынъёслэн корка пырон нуналзы кематэк уз луы на, дыр. Коробка пушкын тӧл шула, укно пасьёстӥ лымы пыры пыре. Но Григорий Михайлович оске: укно но ӧсъёсты пуктылысалзы ке, выжез но вӧлдэтэз вань бере, ӧй чидасал ни, гурме ачим ӝутысал, шуэ. Коркае, пе, соку шуныт луысал ни. Липетсэ гинэ, пе, умой мед липозы.

Григорий Михайлович алигес уйвӧтаз Павликсэ адӟем: корка палазы, пельпумаз лопатка поныса, пе, лыктэ. Чалякгес лэсьтоно ни коркаез, юрттыны лыктӥсько, шуэ.  Жаль ук,  пичи вынъёсы будо, соослы улон сэрег кулэ, кынмыса медаз улэ.

Сизьым аресъем Сергей но кык но ӝыны аресъем Саша шоры учкыса, эшшо но сюлэм шымырске. Песянай доры ум мынэ ни, дорын улом, шуо соос. Песянайзылэн угось коркаез туж ӟоскыт, не шудод отын, не бызьылод.

- Ачим но акыляк луи ини, – шуэ 64 аресаз мынӥсь песянай. – Нылпиосты туж яратӥсько. Соосты мон чидасько. Но огпалась огпала ветлыса, воксё оломар луи ини, олокызьы моӵ тырмоз на. Арлыд пинал ӧвӧл ни, суй-пыдъёс уг чидало.

- Нырысь нуналъёсаз ик дорамы вуылӥз Удмурт Республикаысь Адямилэсь правооссэ утёнъя оскем мурт Михаил Кокорин, – вера Григорий Михайлович. – Тау шуэм потэ солы. Соку ик Михаил Константинович ужасьёсты дорамы келяз. Но, кызьы адӟиськоды, уж али ке но интыяз сылэ.

* * *

Пичи Пурга ёрос йырлэн лэсьтӥськонъя воштӥсез Радик Рамазанов но Постольский муниципал кылдытэтлэн йырыз Надежда Прокошева оскытӥзы: Ашихминъёслэн корказы матысь дыре вуттэмын луоз. Та нуналъёсы укноос, ӧсъёс, профнастил но сайдинг материалъёс тырмыт ваемын луозы.

Любовь Тихонова.

Туспуктӥз Владимир Беломорских.

Шаерысьтымы Сюресъёс вылын кышкытлыклэсь утиськонъя кун инспекциын тыршисьёс шуэрскемын: нуналлы быдэ адямиос быро. Сентябрь толэзьлэн нырысетӥ ӝыныяз гинэ 16 мурт улонысь кошкиз, эшшо 80-эз сӧсырмиз. Югдурез ӧжыт ке но тупатон вылысь ДПС-ын но ППС-ын тыршисьёслэсь ужан нуналзэс 12 часозь кузёмытӥзы.

- 8 толэзь ӵоже лыдпусъёсты басьтоно ке, соос уг шумпотто, – шуиз ГИБДД-лэн кивалтӥсез Альберт Галимов. – 173 мурт улонысь кошкиз. Ортчем арен ӵошатыса, 22 муртлы тросгес. Сюлэмез вырӟыто пиналъёс. Кылем арын сюресъёс вылын 4 нылпи быриз ке, туэ – 18! Инспекторъёс водительёсты ӵем дыръя ало нылпи креслооссы ӧвӧлысь. Шуккиськон учыръёс дыръя со туж юрттэ.

Бен, кудӟем йырын ворттылӥсьёслэн лыдзы ӧжытак кулэсмиз, но шуккиськон учыръёс нуналысь нуналэ йыло. Тае валэктыны шугъясько асьсэос кивалтӥсьёс но. Сӥзьыл вазь пеймыт луэ. Оло, соин но тросэз шофёръёс саклыксэс ышто. Мукетыз муг – берло дыре сюресъёс вылын сылӥсь инспекторъёс ӧжытгес кылизы. Машинаен ворттылӥсьёс сое шӧдо – мынон-ветлон правилоосты тӥяло.

Сюлмаськыто гуртын улӥсьёс – техосмотр ортчымтэ транспортэн ворттыло. Егитъёс ӝыт шулдыръяськемзы бере  руль сьӧры шӧмаськыса пуксё. Гурт сюресъёс вылын 680 шуккиськон учыр луэмын. Мотоен ворттылӥсьёслы луыса 141 шуккиськон учыр вал, 15 мурт бырыны шедиз.

Совето вакытэ кудӟыса ворттылӥсьёсты инспекторъёс араз кык пол куто ке, пыраклы правозэ талаллязы. Нош али бадӟым штрафъёсын гинэ кышкато. Законэз тӥясьёслэн тыриськонъёссы 84 миллион манет люкаськемын. 8 толэзь куспын 154 уголовной уж ӝутэмын, 91 мурт пытсэт сьӧры келямын.

Аслэсьтыз улонзэ утён понна адями ачиз сюлмаськыны кулэ. Сӥзьыл нуналъёс вакчиесь, нылпиостылэн но асьтэлэн дӥсьты вылэ пиштӥсь арбериос бырттэ. Мынон-ветлон правилоосты тӥясь пиналъёсты алыны эн жаде.

Ноябрь толэзьлэн куинетӥ арнянуналаз буре ваё сюресъёс вылын бырыны шедемъёсты. Со нуналэ вань черкъёсын нимысьтыз службаос ортчозы. Кызьы пусйиз Ижысь но Удмурт епархиысь баӵко Виктор Костенков, вылӥ верам лыдпусъёс ваньзэс сюлмаськыто, та уж борды дэмен басьтӥськоно.

Валентина Емельянова.

Озьы ке но эскеронъёс дыръя 395 учырын кышкытлыклэсь утиськонэз тодаз возись ӧз луы. Тросгес куронъёс тӥямын автотранспортэз пуктылонэн сэрен. Югдурез утёнъя министр Александр Первухин верамъя, дышетскон юртъёс котырын нокин уг чакла, кытчы кельтэмын машина, малы тӥямын кенеръёс.

Та ужпумъя кылем арняе ортчиз Терроризмен нюръяськонъя комиссилэн но Оперативной штаблэн огазеям кенешонзы. Уго дышетскон ар кутскон сяна, матэктэ Кун Думае депутатъёсты быръён но. Соин югдурез утён удысын тыршисьёслы уката сак кариськоно но дасяськоно экстремизмен но терроризмен нюръяськонлы.

Дышетон юртъёсты кышкытлыклэсь утёнлы сӥзем программа быдэсъяське тупен-тупен. Соя садъёсын но школаосын пуктыло «ивортӥсь» кнопкаос, видеокамераос, вераз дышетонъя но наукая министр Андрей Кузнецов. Озьы ик мынэ рос-прос эскерон, кыӵе транспорт пыриз дышетон заведенилэн азбараз, ку отысь потӥз со.

Выль дышетскон ар кутскемен валче кылдэ мукетыз но ужпум – пиналъёсты сюрес вылын вӧсь луонлэсь утёно. Уго туэ 8 толэзь куспын машина шуккиськонын быриз ни 19 пинал. Соин 1-тӥ сентябрьысен ГИБДД-ысь инспекторъёс вань школаосын радъялозы визьман-кенешонъёс.

Со сяна, тужгес сак утёно нырысетӥ классэ мынӥсьёсты. Туэ парта сьӧры пуксе 18 сюрс пинал. Соос ваньзы ик вуылозы Ижысь цирке. Удмуртилэн Президентэз Александр Волков куриз золгес чакланы нылъёсты-пиосты вуттон транспортэз, республикаысь но шоркарысь сюресъёсты, шуге-леке вуон учыръёс медаз луэ шуыса.

Елена Скворцова.

ӵошатсконын вормисьёс - 12-тӥ частьысь команда.

Ижысь «Динамо» стадион кема дыр ӵоже ворсаськыса улӥз. Отын тупатъян ужъёс мынӥзы. Но кылем арня вискын со ӧсъёссэ усьтӥз Удмуртиысь тылпу кысӥсьёс понна. Ӵошатсконын асьсэлэсь чырткем луэмзэс но быгатэмзэс возьматӥзы Удмуртиысь вань городъёсысь но ёросъёсысь вуэм командаос – ваньмыз 48, сомында ик автомашина.

Котькуд командаын быдэн вить адями: караулэн кивалтӥсь, водитель но куинь боец. МЧС-ысь подполковник Александр Пермяков валэктэмъя, таӵе ӵошатсконъёс арлы быдэ ортчыло.

Стадионын шундыё ке но сӥзьыл кадь пельтӥсь тӧл мугорэз сӥсъя. Но тылпу кысӥсьёслы пӧсь йӧтэ. Пожарной машина дорысь вить метр кемын пуктэмын ӟус, отын командалэн тылпуэн нюръяськонъя нимысьтыз дӥсез лач-лач интыямын. Боецъёс майкаен кожысь сыло. Тани водитель автомобильзэ улӟытэ, ӝуатэ сигнализациез, боецъёс дӥсьсэс но снаряженизэс туж ӝог дӥсяло но кабинае пуксё. Машина ӝог мынэ 60 метр кемын ву басьтон инты доры. Отысен команда ӝуась интые кыске ву гумыез. Коркалэн ньылетӥ этажаз сюрон понна ӝутоно кузь тубат. Огез боец сьӧраз ик кутэ на вакчизэ тубатэз, таиз думиське ньылетӥ этажлэн укноез борды. Та пагӟаетӥ ик ӝуто ву гумыез но. Усьтӥське кран, ву ньылетӥ этажын ни. Ӵошатскон йылпумъяське, огез боец, ӝуан интыысь гозыен васькыса, музъем вылэ султэ ке. Секундомер чалме. Табере лыдъяно дырез. 2010-тӥ арын 47 команда пӧлысь сизьымез ӧз быдэсты нормативез. Туэ но ваньмызлы та бызьылон капчиен ӧз сётӥськы. Тани Эгралась команда препятствиез ортчиз 3 минут 50 секундскын. Со борды судьяос 40 секунд штраф ватсазы на.

- Дыртонъямы ву кранмы быдэсак ӧз усьтӥськы. Ву каллен бызиз, нош со бадӟым янгыш луэ, – валэкто пиос асьсэлэсь янгышсэс.

Удалтӥз Ижысь тылпу кысонъя 12-тӥ частьысь командалы. Таосызлэн дырзы 2 минут но 30 секунд котырын гинэ. Зэм, шексы вал – ӧжытак гинэ тубатсы ӧз усьы.

Владимир Бердяев – та частьысь инструктор.

- Арлы быдэ та выллем ӵошатсконъёс ортчо, но препятствие ноку капчиен уг сётӥськы, – шуэ старший прапорщик. – Ми, адямиосты сяна, утиськом пуныосты, коӵышъёсты.

- Нош сьӧд коӵышлэсь уд кышкаське-а?

- Сюрес вылын палэнскыны тыршиськом, нош юрттэт кулэ ке, утчаськом сое но.

Городъёсысь тылпу кысон частьёс пӧлын вормисе потӥз 12-тӥ частьысь команда, кыкетӥын – 3-тӥ частьысь, 3-тӥын – 1-тӥ частьысь. Ваньмыз Ижевскысь. Ёросъёс пӧлын нырысетӥ интыын дэбесъёс, кыкетӥын пичи пургаос, куинетӥын яръёс. Вормисьёслы сётэмын коньдон премиос но дипломъёс.

Иван Аркашев.

Туспуктӥз Владимир Беломорских.

Россиысь МЧС-лэн Удмурт Республикая кышкыт югдуръёсъя центрын тулыс дасяськон сярысь кенеш ортчиз. Шаерысьтымы кивалтӥсьёс сяна, отчы пыриськиз Россиысь МЧС-лэн Приволжск улос центреныз кивалтӥсьлэн воштӥсез Андрей Ковтун.

Лымы шунаса ӧз быры на, нош МЧС-ын ужасьёсты али ик кышкато ини тулыс праздникъёс. Трос калык шутэтскыны потэ инкуазе, нош  пыжем сӥль сиён сяменызы бервылзэс утялтыны вунэто. Туэ но гужем пӧсь улӥз ке, бадӟым тылпулэсь нокин утемын ӧвӧл. Туннэ шаерысьтымы 314 гурт, 162 сад-бакча, 43 шутэтскон инты сикъёслы матэ интыяськемын. Соин ик муниципал кылдытэтъёслы бадӟым саклык висъяны куремын тулыс-сӥзьыл вакытлы.

ӵектэмын на гуртъёс котыре постъёс кылдытыны, дежурствоос радъяны. 2010-тӥ ар пӧсеныз катьтэммытӥз. Тае лыдэ басьтыса, шаерысьтымы кивалтӥсьёс муниципал кылдытэтъёслы 25 миллион манет тыр субсидия висъяны чаклазы.

Та вакытэ кышкытлыклэсь утиськонъя ёзъёсын ужасьёсты лымы шугъяськытэ. Липетъёс уг чидало кот «мамыкез». Иж город администрациысь жилищно-коммунальной управленилэн кивалтӥсезлэн воштӥсез Надежда Баль ивортӥз ке но, вань липетъёс сузямын шуыса, вазьгес буйгатскимы. Ракетной ульчаысь 18 номеро юртлэн липетэз куашказ. Сое куинь ар талэсь азьло гинэ пыр-поч тупатъязы-выльдӥзы вал.

Лымы тылпу кысӥсьёсты но курадӟытэ. Кез ёросысь Гонку гуртын 22-тӥ мартэ уйшор бере корка гомӟиз. Тылпу кысӥсьёс отчы вуытозь, юртъерын «горд атас» кузёяське ини вылэм. Юрттӥськыны вуизы артысь ёросъёсысь тылпу кысӥсьёс. Соос тылэз кык часлэсь ятыр кысыны выризы. Ньыль муртлэсь семья но бускельзы ӝокаса быризы. Кызьы ивортӥз Россиысь МЧС-лэн Удмурт Республикая валтӥсь управлениезлэн пресс-службаяз ужась Вероника Митрофанова, тылпу гомӟиз тамак пум бордысь. Курытсэ шӧмъяны яратӥсь семьялэсь гуртоос вазенгес ик кышкало вылэм ни. Тылпу кысӥсьёслы пыд пуктыны выриз пелляськись куазь.

Нош утчанъя-утёнъя службаын ужасьёсты сюлмаськыто чорыгасьёс. Мартэ кык мурт бырыны шедиз, нош кӧняезлы юрттэт сётэмын вал. Куд-огез, вырӟылытэк кема пукыса, интыяз ик пуме – я сюлэмзы кутэ, ӵем дыръя шӧмаськемын луо. Соин ик ӝытлы пумит чорыганлэсь возиськоно, нош ляб тазалыкоослы йӧ вылэ оген потаны уг яра.

Спасательёс сак эскерыса возё шуръёсты. Та вакытэ нимысьтыз отрядъёс эскеризы ни Ижысь, Глазысь, Каракулиноысь но Гольянысь ӵыпетъёсты. Арлы быдэ бадӟым шуръёс вылын пуштытъян ужъёс нуисько. Туэ соосты ортчытыны чакламын Дэбес, Кез, Шаркан, Сюмси, Глаз, Вотка но Балезино ёросъёсын.

Валентина Емельянова.