«Ул тон, пичи ошмесэ» сценкаысь суред.

Кузебай Герд нимо гимназиысь 1-тӥ-5-тӥ классъёсын дышетскисьёс пыриськизы «Тумошо Лӧпшо» фестивале. Нылпиос тодмо выжыкылъёсысь геройёсты улӟытӥзы.

3-тӥ-5-тӥ классъёсын дышетскисьёслэсь сцена вылын асьсэды артистъёс сямен возьыны быгатэмзэс нимысьтыз дунъяло. Театральной конкурсын вормонзы «Арлэн устоез классэз» огъя ӵошатсконын лыдэ басьтӥськоз. Нош покчиос понна артист кариськон – шудон-серектон, азьланезлы быгатонлыкъёссэс юнматон.

Директорлэн дышетон ужпумъёсъя воштӥсез Татьяна Швецова верамъя, таӵе фестивальёс котькуд аре ортчылозы. Пусйиз конкурсэ трос нылпиослэсь пыриськемзэс, анай-атайёслэсь юрттӥськемзэс.

Нош удмурт сценка возьматыны кык класс гинэ дӥсьтэм – 2-тӥ но 3-тӥ классъёсысь пиналъёс. Покчиослэсь удмурт кылэз ӟечгес дышетыны но сцена вылэ потыны мылкыдзэс бурдъян понна таӵе вамыш туж пусйымон. Соин ик гимназиын удмуртэн дасям ужъёсты нимысьтыз дунъяны кулэ, дыр, мукетъёсыз но мед адӟем карозы. Лӧпшо Педунь но соку удмурт кылын тумошояськоз.

Лия Малых.

Нылпи садэ ветлӥсьёсты нуон-ваён понна автобусын тупась оборудование луыны кулэ.

«Вазисько тӥледлы Дэри ёросысь Вылӥ Постол гуртысь мумы-бубыос сюлэмез чепыллясь югдур кылдэмен сэрен. Гуртамы куке но вал нылпи сад. 1990-тӥ аръёсы нылпиос ичи луэмен, сое ворсазы, нош покчиосты Ӵӧжгуртэ нуллыны автобус висъязы.

Нош кык ар талэсь азьло автобус пиналъёсты ворттылытэмысь дугдӥз. Улон ӟечоме ке но, котькуд семья машинаез ванен ушъяськыны уг на быгаты. Соин «валтэмъёс» нылпизэс садэ пыдын валтоно луо.

Со вакытэ ик школаын дышетскисьёслы гуртамы автобус ысто. Транспортлэсь мышсэ котмем синъёсын келяло 4-7 аресъем нылъёс но пиос. Нош талэсь покчиосыз воксё доразы кылё яке анай-атайёссы келяно луо ни. Нылпи сад интыяськемын школаен артэ. дышетскисьёсты транспорт нуэ, пичиосызгес пыдын вамышъяло. Шонер-а со психология ласянь?

Кылем арын толсур толэзьысен автобусэн нуон-ваён понна уксё бичаны кутскизы. Мынам тыриськонъёсы сотэк но трос люкаськизы – соин ик толшоре пиналъёсы пыдын ветлӥзы. Вылӥ Постолысь покчиосмы жадизы ни, иськемъёс лёгаса. Котькыӵе муген но соос садикез «прогуливать» каро. Директормы шуиз: «Ма карыны быгатӥ – лэсьтӥ ни». Интыысь депутатъёсмы но, югдурез тодытэк, уг уло, дыр. Оло, тӥ изэз вырӟытыны юрттоды?»

Вуэм гожтэт улэ гожтӥськем 8 мурт.

Югдурез валэктыны курыса, жингыртӥм нылпи садлэн кивалтӥсезлы. Ольга Братухина интыяз ӧй вал – больничнойын, пе. Эшшо кык арня бӧрсьысь утчамы на кивалтӥсез – вераськыны ӧз кылды, бурмымтэ на.

Озьы бере, вазиськимы вылӥгес кивалтӥсьёслы. Дэри ёрос администрациысь дышетонъя управлениысь школалэсь азьвыл визьноданъя отделлэн кивалтӥсез Алевтина Иванова югдурез тодэ но киоссэ вӧлъя:

- Нылпиосты садэ автобусэн нуллонъя нимысьтыз программа ӧвӧл.

Алевтина Христофоровна верамъя, азьло Вылӥ Постолысь колхоз ӝутӥз вал нылпи сад. 1990-тӥ аръёсы выль сад пуктӥзы Ӵӧжгуртын – татын 7 группа усьтӥзы. Со муген Вылӥ Постолысь садэз ворсазы. Табере та гуртысь покчиослы 2 иськеме палэнэ ветлоно луэ.

Школалы автобус висъям бере нылпи садысь покчиос но транспортэн ветлыны ӧдъязы. Но кӧня ке ар талэсь азьло ГИБДД-ын ужасьёс чурыт алӥзы: пичиосты школа автобусэ ас понназы пуктыны уг яра.

- Нылпи садэ ветлӥсьёсты нуон-ваён понна автобусын тупась оборудование луыны кулэ. Нырысь ик, медло пукон борды думон е. Автобусэ пуксён понна транспортлэн ватсам тубатэз (подножкаез) луыны кулэ, – вера элькун Прокуратураысь отделлэн кивалтӥсез Ирина Комарова.

Ӵӧжгуртысь автобус таӵе куронъёслы уг тупа. Озьыен, транспортэ нылпиосты пуктыны яра анай-атайёсын ӵош гинэ. Соку вань мылкыд карисьёс автобусэ уг ни тэро. Но районысь дышетонъя управление мукет амал ӵектӥз. Садэ нуллон понна нимысьтыз рейс радъяно. Но таиз понна дун тыроно луоз.

- Вылӥ Постолысь 22 пинал Ӵӧжгуртысь садэ ветлэ, – азьланьтэ Алевтина Иванова. – Пиналъёсты асьсэ понназы гинэ нуыны-вайыны милям правомы ӧвӧл, бадӟымъёс асьсэос пиналзэс келяны кулэ. Ӝытазе автобусэн ик келясалзы но. Таӵе ворттылонлэн дуныз толэзяз 220 манет луэ. Но 22 мурт пӧлысь транпортлы кулэяськисьёс кулэсмизы – 10 пиналъёслэн анай-атайёссы гинэ уксё тырыса ветлыны соглаш. Татын ужпум мукетыз бордын – мумы-бубыослэн мукет гуртэ пиналъёссэс келяса ветлэмзы уг поты, автобус капка азьысен ик мед басьтоз, ӝыт берен мед ваёз. Тазьы уз луы. Тани Ижын но нылпиосты садэ нуллыны нимаз автобус уг сёто, анай-атайёс транспортэ пуксё, билет понна дун тыро.

Вылӥ Постолысь анай-атайёслэсь мылкыдзэс валаны луэ. Уго кун сюлмаське школаын дышетскисьёс пумысен, нош нылпи садэ ветлӥсьёсты уг синйылты. Пыкылыны уг луы интыысь чиновникъёсты но: соос югдурысь потыны амал утчаллям. Зэм, мумы-бубыослы со уг кельшы. Тодӥм мукетсэ но: автобусэн нылпи садэ ворттылӥсьёс та дыре воксё но ӧвӧл. Иське, «валтэмъёс» пиналъёссэс нош ик пыдын валто?

Елена Скворцова.

А. Кузнецов ӟечкыла О. Пепеляеваез.

Йылпумъяськиз «2012-тӥ арын Удмуртиысь устоез дышетӥсь» конкурс. Солэн нырысетӥ этапаз кужымзэ мертаз 500-лэсь ятыр визьнодась, Иже вуиз 40-эз.

Финалэ шедемъёс пӧ-лын туэ тросгес – 25 мурт – луизы Ижлэн палэнысьтыз вуэмъёс. Вал Дэри, Яр, Кез, Каракулино, Пичи Пурга, Камбарка, Вотка, Сарапул, Шаркан, Балезино, Можга, Красногорск ёросъёсысь, Глазов, Вотка, Иж городъёсысь дышетӥсьёс.

40 мурт пӧлын 3-ез – воргоронъёс, та пӧлысь 2-ез – егит дышетӥсьёс. Конкурсэ пыриськемъёс вань сюлэмзэс, тодон-валанъёссэс, быгатэмзэс сӥзё нылпиослы, ваньмон дырзы туж ӧжыт кемдылэ, таӵе дыръя соос лыдӟисько, керттӥсько, куасъёс вылэ султо, кулэ дыръяз сцена вылэ но пото… Куатез дышетӥсь нуэ история но обществознание, технология урокъёсты, вань удмурт кылъя но литературая, англи кылъя, биологияя но мукет предметъёсъя визьнодасьёс.

Жюри уг ваты: номинациосын вормисьёсты бырйыны секыт вал. Но ӵошатскон – со ӵошатскон, кинлы ке но одно устогес луыны кулэ. Озьы уката зол кичабонъёс кылӥзы:

«Егит дышетӥсь» номинациын – Красногорск ёросысь Васильевской школысь англи кылъя дышетӥсь Сергей Владимирович Чернышев;

«Дышетӥсь-мастер» – Глазовысь 8 номеро гимназиысь биологияя визьнодась Ольга Александровна Пепеляева;

«Воспитатель» – Шаркан черкогуртысь 1 номеро нылпи садысь крезьгуръя визьнодась Ольга Васильевна Коробова;

«Ватсаса тодон-валан сётон» – Ижысь «Механик» центрысь дышетӥсь Алексей Николаевич Сопин;

«Вожатой, дышетӥсь-организатор» – Глазовысь нылпиослы но быдэ вуымтэослы центрысь организатор Надежда Николаевна Сычёва;

«Шор профессиональной образование» – Сарапул педколледжысь дышетӥсь Татьяна Вячеславовна Кубонина;

«Начальной профессиональной образование» – Ижысь пищевой промышленностья лицейын тодон-валан сётӥсь Елена Аркадьевна Зайцева;

«Дышетон удысысь лидер» – Каракулино ёросысь Пинязь школалэн директорез Светлана Михайловна Глухова.

Егит дышетӥсьёс пӧлын финалын кужымзэ мертаз Дэри ёросысь Совхозной школаысь удмурт кылъя но литературая дышетӥсь Татьяна Владимировна Васютова. Быръем удысаз нырысетӥ вормонъёс доры со йыгмыт сюрес лёгиз. Нациосын ужан политикая министрлэн воштӥсез Лариса Буранова но солы оскемзэ вераз: нылпиослы усьтоз удмурт дуннее ӧсъёсты…

Кин 2012-тӥ арын устоез дышетӥсь луоз – жюри берпуметӥ секундозь ватыса возиз. Но тани сцена вылэ ӧтизы Глазовысь Ольга Александровна Пепеляеваез! Востэм тусо дышетӥсь бордысь сомында мылкыд, шуныт лыктэ…

- Конкурсэ ӵош пыриськем эшъёсылэсь мон кужмогес шуыса, уг малпаськы, – зӥбытак вераз дышетӥсь. – Та вормонэ – асме ачим вормеме. Аслым котьку шуисько: лэсьты кызьы быгатӥськод, нош мар пӧрмоз – со пӧрмоз.

Таӵе мылкыдын ик Ольга Александровна пыриськоно кариськем конкурсэ но. Гимназиысь нылпиосыз, пе, тодыса ӧз вуттэ дышетӥсьсылэн кытчы пыриськемез сярысь. Со понна дораз туж «висизы» кузпалэз, нылыз но пиез. Часлы быдэ жингыръязы, мылкыдзэ ӝутыны турттӥзы.

- Картэ мынам – зарни, механикая Чепца заводын ужа, – пусъе Ольга Александровна. – Мон понна со ваньзэ сётыны дась: тазалыксэ, тодон-валанъёссэ, чиданзэ… Уйин 2-3 часын но султыса, эскероз: уг пукиськы-а компьютер сьӧрын? Тетрадьёсын, книгаосын согиськемын шуыса, адӟе ке, дорысь вань ужез ас вылаз басьтэ. Малпасько: котькуд дышетӥсь вормонъёс дурыны быгатоз, картэз мынам кадь луиз ке…

Озьыен, Ольга Александровналэн кузпалызлы нош ик дорысьтызы вань ужъёсты ас вылаз басьтоно луоз. Угось Пепеляева табере Удмуртилэсь данзэ Москваын утьыны дасяськоз.

Элина Кумачёва.

Та нуналъёсы Москваын люкаськылӥзы аттестацияя комиссие пырисьёс. Соос юнматӥзы ректоре ӵектӥськись кандидатъёсты. Удмурт кун университетлэн пресс-службаез ивортэмъя, вить кандидатъёс пӧлысь юнматэмын вал куинез: Ижысь Техникая университетысь экономикая, правоя но гуманитарной наукаосъя факультетлэн деканэз Раиль Галиахметов, Удмурт кун университетысь социальной психологияя но конфликтологияя кафедралэн кивалтӥсез Николай Леонов, УдГУ-лэн проректорез Галина Мерзлякова. Кык мурт – университетлэн азьвыл ректорез Семён Бунтов но УдГУ-ысь Педагогикая, психологияя но социальной технологиосъя институтлэн кивалтӥсез Александр Баранов – кандидатъёс пӧлысь, мугзэ валэктытэк, куштэмын вал. Ректорез быръён чакламын 9-тӥ апрельлы.

Ольга Прокопьева.

- Андрей Фурсенко выль сямен радъяны ӵектэ кун экзаменъёсты, – та пумысен мылкыдзэ усьтэ республикаысьтымы дышетонъя но наукая министр Андрей Кузнецов. – Умойтэм малпан ӧвӧл, дыр, со. Угось кун экзаменъёсты али адямия, тодон-валанъёссэ лыдэ басьтытэк, дунъяны секыт ӧвӧл. Со сяна, диплом вузан учыръёс но одӥг-ог пумиськыло. Вань выпускникъёслэсь визьзэс одӥг «сынэн» эскерон умой луыны кулэ уж сётӥсьёслы но, асьсэлы егит специалистъёслы но. Берлоосыз, тодон-валанъёссэс лыдэ басьтыса, уже интыяськозы.

Бен, али та дэмлан гинэ луэ. Туэ вузъёсты йылпумъясьёс, азьло аръёсы сямен ик, кун экзамен сётозы.

Шаерысьтымы школаез йылпумъясь егитъёслэсь тодон-валанзэс выль сямен эскерыны кутскизы ни 2002-тӥ арысен – нырысь со эксперимент чот радъяськылӥз. Специалистъёс верамъя, ЕГЭ-лэн ӟеч палъёсыз ӧжыт ӧвӧл. Бен, куд-ог тырмымтэосыз но вань, но соослэсь кунмы палэнтӥськыны турттэ, солэн радлыказ арысь аре кыӵе ке воштонъёс пыртыса. Озьы туэ нырысьсэ азьло ик тупатэмын тужгес пичи баллъёс – ӟуч кылъя 36-лэсь, математикая 24-лэсь ичигес луыны кулэ ӧвӧл. Олимпиадаосын вормисе потэмъёс вузэ льгота чотын 1 пол гинэ йыгаськыны быгатозы. ЕГЭ-ын басьтэм баллъёсты лыдэ басьтозы Россиысь вань вузъёс.

Дышетонъя но наукая федеральной службалэн сайтаз пусъемын ни ЕГЭ нуналъёс но. Дырызлэсь вазьгес соосты сётыны луоз 20-тӥ апрельысен 4-тӥ маёзь. Но 11-тӥ классэз йылпумъясьёс понна экзаменъёс кускозы 28-тӥ майысен. Та нуналэ егитъёс возьматозы информатикая, биологияя но литературая тодон-валанъёссэс. Математикая ЕГЭ тупатэмын 31-тӥ майлы, ӟуч кылъя – 8-тӥ июньлы. Йылпумъяськозы экзаменъёс 16-тӥ июне, но резерв нуналъёс 21-тӥ июнёзь тупатэмын на.

Элина Кумачёва.

Г. Черепанова, М. Никитина, В. Захарова.

Анай кылэз дышетонъя ужпумъёслы сӥземын вал Ижысь Кузебай Герд нимо гимназиын ортчем бадӟым ужрад.

Конференция герӟаськиз город школаосын удмурт но бигер кылъёсыз дышетыны кутскем дырысен 20 ар тырмонэн. Солэн ужаз, Удмуртиысь сяна, Башкортостанысь, Татарстанысь но Пермь улосысь дышетӥсьёс, воспитательёс пыриськизы.

Берло дыре удмурт кыл сярысь трос вераськиськомы ке но, сое дышетыны мылкыд карисьёслэн лыдзы арысь аре кулэсме. Кызьы пусйиз дышетонъя но наукая министрлэн воштӥсез Зоя Суворова, 1998-тӥ арын шаерысьтымы 428 школаосын (51 процентаз) удмурт, бигер, пор яке чуваш кылъёсъя урокъёс нуиськизы, нош туннэ нуналлы та лыдпус 47 процентозь усемын. Ижысь школаосыз басьтоно ке, 1998-тӥ арын 33-яз национальной классъёс вылӥллям, нош туннэ соослэн лыдзы даслы кулэсмемын. Тросаз школаосын удмурт кылэз факультатив амалъя дышето.

Удмуртлыкез утён понна сюлмаськисьёс суй-пыдзэс уг юско, пӧртэм амалъёсты ужазы кутыны тыршо. Кузебай Герд нимо гимназиын но татысь нылпи садын ужасьёс конференцие люкаськемъёслы мастер-классъёс возьматӥзы. Котырес ӝӧк сьӧрын кенешизы удмурт кыллэн туала улонын, Интернет вотэсын азинскемез сярысь.

Дышетон удысын трос аръёс ӵоже ужам дышетӥсьёсты Дышетонъя но наукая министерстволэн Данъян грамотаосыныз пусйизы. Соос пӧлын вал Можгаысь 1 номеро школаысь Валентина Захарова, Глазовысь 16 номеро школаысь Марина Никитина, К. Герд нимо гимназиысь Глафира Черепанова но мукетъёсыз.

- Удмурт кылэз дышетон шоры глазъёс но кырыж уг учко, нылпиос урокъёсамы мыло-кыдо ветлӥзы, – шуиз Глазовысь Марина Александровна Никитина. – Шуг-секытъёс кылдыны кутскизы нылпилы быдэ коньдон висъяны кутскем бере (подушевое финансирование). Вазенгес бадӟым классъёсмы, кык группалы люкиськыса, англи но удмурт кылъёсты дышетылӥзы, табере анай кылмес быръемзы туж уг поты. Секытгес йӧтэ удмурт кылэз чик тодӥсьтэмъёслы. Монэ мукетыз паймытэ: школаямы азербайджан, узбек семьяосысь нылпиос тодон-валан люкало. Ӟуч пиналъёс сярысь, соос удмуртэз мыло-кыдогес дышето.

Дышетӥсьёс синмаськемын Брангуртысь песянайёслы. Соослы луыса, пе, ӟучомыны кутскем нылпиослэн удмурт кыл шоры учконзы воштӥськыны ӧдъяз.

Город школаос пӧлын ваньмызлы адӟем карымон луэ Ижысь Кузебай Герд нимо гимназия. Татысь удмурт кылъя дышетӥсь Глафира Леонидовна Черепанова верамъя, классысь нылпиос куинь группалы люкисько: удмурт кылэз умой тодӥсьёслы, шуген вераськисьёслы но чик тодӥсьтэмъёслы. Котькудзы нимаз программая дышетско. Дышетӥсьёс удмурт кыллэсь кулэлыксэ котькуд пинал доры вуттыны тыршо.

Валентина Емельянова.

Президент Александр Вол­ков дорын эскеремын­ вуоно огъяулоннилэн про­­ектэз. Люкаськемъёсты соин тодматӥз Удмуртгражданпроектлэн валтӥсь архитекторез Николай Некрасов.

- Общежитие чакламын ог 300 студентлы, пуксёз со Красногеройской ураме, «Зенит» стадионэн артэ. Проектъя 9 этажъем юрт бордын ик луоз спортзал, нырысетӥ этажаз интыяськозы медпункт, буфет, квартиралы тупась куинь номер. 2-тӥ но 3-тӥ этажъёсын чакламын 1 муртэн улон комнатаос. 4-тӥ-9-тӥ этажъёсын студентъёс 2-3 кузя улозы. Котькуд комнаталы – душ но сьӧрос. Сиён пӧран инты – этажлы быдэ…

А. Волковез соку ик паймытӥзы нырысетӥ куинь этажъёслэн проектсы: малы кулэ бадӟым номеръёс, малы 2-тӥ но 3-тӥ этажъёсын студентъёс нимаз улыны кулэ?

Та юанъёслы валэктоно кариськиз УдГУ-лэн ректорез Семён Бунтов:

- Дорамы вуыло мукет вузъёсысь профессоръёс, студентъёслы соос лекциос лыдӟыло – нырысетӥ этажысь кунокуа номеръёс соослы чакламын. Нимаз комнатаос озьы ик висъялляны малпаськом кунгож сьӧрысь вуэм студентъёслы, дунын дышетскись егитъёслы.

Профессоръёслы нимаз улон инты чакланы Президент соглаш кариськиз ик, нош оген студентъёслы комнатаос висъянлы со меӵак пумит луиз:

- Маин пӧртэмесь кунгож сьӧрысь студентъёс? Дорамы дышетскыны лыкто ке, ваньмыныз ӵош мед улозы. Нош дунын дышетскись егитъёс сярысь вераськонды мыным воксё валантэм! Иське, кинлэн коньдонэз вань, соосты висъяны турттӥськоды? Тужгес ӟеч дышетскисьёс сярысь сюлмаськиськоды шуысалды ке, оло, ӧжытак валасал на…

Ӧз кельшы А. Волковлы общежитилэн чаклам вылтусыз но – архитекторъёс сое вож но тӧдьы кирпичъёслэсь ӝутэмен адӟо вал. Мед луоз, пе, со студентъёссылэн мылкыдзыя – пӧртэм буёлъёсын кисьтаськись. Куриз на: тросгес машина пуктылон интыос чаклано, угось общежитие кыдёкын ик уз луы спортъя комплекслэсь.

Архитекторъёс, лэсь­тӥ­ськисьёс малпаськонэ усемын вал: 250 миллион манет тырме общежитиез пуктонлы гинэ, спортзаллы уг кыльы ни. Но та люкетсэ Удмуртия ас вылаз басьтыны дась луиз.

Иван Аркашев.

2000-тӥ арын гинэ Удмуртиысь азьмынӥсь егитъёс 62 кузя лыдъяськизы. Туннэ та лыдпус 9 адямилы тросгес. Озьыен, визь люкъёсмы йыло но йыло. Та понна шумпотэмзэ вераз Александр Волков, нылпиосты данъян дипломен пусйыкуз.

Дунъям дыдыос но экеос – ваньмыз сямен ик Ижын дышетскисьёс. Уноез соос физикая, математикая, экономикая олимпиадаосын вормисе потэмъёс. Нош мукет предметъёсын тодон-валанзэс ӟеч возьматӥсьёс воксё ӧй вал, шуыны луоз.

šож: школьникъёс но студентъёс пӧлын ӧз адӟиське гурт удысэн тунсыкъяськисьёс.

Зэм, бератаз шумпоттӥсьёс шедизы ик. Алнаш ёросысь Асан совхоз-техникумысь Иван Губкин механикаез ӟеч тодэмзэ Россиысь ӵошатсконын возьматэм. Со сяна, висъяськиз Можгалась Анна Зорина шаертодонъя предметэз умой валаменыз. Нош мукетъёсыз? Гуртоосмы сокем лябесь шат? Дышетӥсьёс асьсэ нылпиосынызы туж-туж данъяськыло ук. Дӥсьтонмы-а уг тырмы пӧртэм ужрадъёсы пыриськыны?

Александр Волков пусйиз:

- Ми, кивалтӥсьёс, кыл кутӥськомы но быгатэммыя лэсьтыны выриськомы чебересь юртъёс, паськытэсь стадионъёс. Нылпиосмылы визь люканы луонлык кылдытӥськомы. Соин ик возьмаломы: тӥ эшшо но бадӟымесь вормонъёс мед басьтоды, тӥ понна мед ӝутозы Россилэсь куншетсэ, тӥ понна мед чузъяськоз Россилэн гимнэз!

Елена Фёдорова.

В. Путин котькуд пиналлы 100 книга лыдӟыны дэмла.

Туннэ котькуд пинал но, дышетӥсь но кыл вылын гинэ уг, уж вылын шӧдэ: кун соос сярысь сюлмаське. Ми тае туж дунъяськом но оскиськом: азьланьын озьы ик луоз. Озьы луоз, странамы туннэ сямен огсыр азьлань вамыштӥз ке, властьын воштӥськонъёс ӧз луэ ке. Таӵе мылкыдзэ вераз шаерысьтымы дышетонъя но наукая министр Андрей Кузнецов, Россилы Президентэ кандидатлэн Владимир Путинлэн быръёнъёс азьын бӧрсьысь бӧрсе печатласькись ужъёсыныз тодматскыса.

Мар туннэ шумпоттэ шаерысьтымы дышетон удысын? Кыӵе осконъёсын уло нылпиос, дышетӥсьёс, анай-атайёс?

Визьнодасьлы – улон инты

Шаерысьтымы дышетон удыс огинтыяз лёгаськемысь дугдӥз «Дышетон» нацпроект улонэ пыӵамен валче. 2006-тӥ арын талы кутскон сётӥз вал Владимир Путин, Россилэн соку Президентэз.

Со дырысен республикаысьтымы школаосы вуыны кутскизы компьютеръёс, дышетон пособиос, узырмизы биология, химия, физика но мукет кабинетъёс, устоосыз школаос 1 миллион, устоосыз дышетӥсьёс 100 сюрс манет, кылем арысен 200 сюрс манет басьтыны кутскизы. Классэн кивалтӥсьёслэн уждунзы борды 1 сюрс манетэн ватсаськиз.

«Дышетон» нацпроект азинтӥське туннэ но. Со борды ватсаськизы ни мукет программаос. Одӥгез соос пӧлысь сӥземын дышетон удысэз 2011-тӥ-2012-тӥ аръёсы выльдонлы. Кызьы веразы дышетонъя но наукая министерствоын, талы луыса Россилэн бюджетысьтыз республикаямы кылем арын вуиз 255 миллион манет. 2012-тӥ арын 759 миллион манет висъяны чакламын. Та коньдон, кылем арын сямен ик, кошкоз школаосты тупатъянлы.

Визьнодасьёслэсь данзэс ӝутонэз государствомы туннэ валтӥсь ужпумъёс пӧлы пыртэ. Владимир Путин кылем арын ӵектонэн потӥз: дышетӥсьёслэсь уждунзэс ӝутоно, улосъёсысь шоро-куспо уждунлэсь со пичи медаз луы.

- Озьы кылем арын сентябрьысен шаерысьтымы дышетӥсьёс бадӟыматэм уждун басьтӥзы ни, со 14 сюрс 200 манет котыр луиз, – вераз Андрей Кузнецов. – 2012-тӥ арлы но осконъёс бадӟымесь: та лыдпусэз 15 сюрс 200 манетозь вуттоно.

Эшшо одӥгез пусйымон проект: дышетӥсьёслы юрт пуктон. Та ӵектонэн озьы ик потӥз Владимир Путин кылем арын сентябрь толэзе. Тодон-валан сётӥсьёслы улон инты пуктонэн герӟаськем ужпум шаерамы тыро-пыдо сэрттэмын-пертчемын вал. Вылӥ кивалтӥсьёс дорын кенешонъёсы пыриськылӥзы асьсэос дышетӥсьёс но. Нош туннэ ваньмыз та вераськонъёс уж вылын адӟиськыны кутскизы.

- Ижысь «Столичный» микрорайонын 120 квартираем юртлы инты висъямын ни, – пусъе Андрей Леонидович. – Со быдэсак сётэмын луоз дышетӥсьёслы. Со сяна, али школаын ужасьёслы 8 но ӝыны процентъем кредит сётъян пумысен проект дасяське.

Туала дышетон удыс туж ёрме кадръёслы, уката но выль малпанъёсын, выль адӟонъёсын егит специалистъёслы. Кунмы, республикамы оске: макем сюлмаськом дышетӥсьёсмы сярысь, сокем мыло-кыдо лыктозы специалистъёс дышетон учреждениосы.

Америкаез кельтоно!

«Россия сосредоточивается – вызовы, на которые мы должны ответить» статьяяз Владимир Путин пусъе: туннэ Россия пыре дуннеысь вить кунъёс пӧлы, кытын трос вылӥ тодон-валанэн адямиос. Со умой ни соин но: вылӥ образованиен адями одӥг интыяз лёгаськыны дышемын ӧвӧл, солэн ялан выльзэ тодэмез, выльзэ лэсьтэмез потэ.

Мылкыдзэ вера дышетонъя но наукая министр:

- Хрущёв вакытъёсы ӧтён вал: «Америкаез сутоно!» Таӵе тодон-валанъёсынымы, быгатонлыкъёсынымы туннэ верано ни вал: «Америкаез кельтоно!» Жаляса верано, озьы гинэ уг пӧрмы вылэм. Шонер гожтэ Владимир Владимирович: азинсконъёс басьтон понна чылкак мукет сямен учконо улон шоры.

Кызьы мукет сямен? Нырысь ик, буйгатсконо ӧвӧл, странамы мувӧен, газэн, нюлэсэн но мукет музъем ваньбурен узыр шуыса. Бен, азинскись странаос таин сэрен котьку вожъяськыса учкылӥзы та узырлыкмы шоры. Но асьмеос ушъяськыны мед быгатом ас киынымы вылӥ ӟечлыкен ваньбур поттэменымы. Кылсярысь, Удмуртия котьку но данъяськылӥз обороналы тӥрлык дасяменыз. Иське, республикаямы будэтоно та удысын вылӥ тодон-валанъёсын, кыдёке азьлане учкыны быгатӥсь специалистъёсты.

Жаляса верано, магазинъёсысь ӝажыос вылын али трос Китайын, Европаын, Турциын но мукет кунъёсын поттэм вузъёс. Россиын поттэмъёсыз ӵемгес кыллё тузонӟыса. Но талэн мугез туж огшоры – асьме вуз дуногес. Угось сое дасянлы тросгес кужым, чидан кулэ: Россиын куазь кезьыт, соин ик тросгес кужым быре ужан интыосты шунтонлы, югдытонлы. Вузэз солань-талань нуллонлы эстӥськон кулэ – странамы паськыт, сюресъёс кузесь. Озьы мукет кунъёсын огкадь товар поттӥськом но, сое вузаны секытгес. Мар кароно? Поттоно мукет кунъёсынлэсь пӧртэм вуз. Кылсярысь, шундыпуксён пала мувӧез, газэз келямлэсь азьло сое вылӥ куронъёсъя чылкытатоно. Озьы солэн дуныз вылӥынгес луоз.

Китайёслэсь адӟем кароно

- Вылӥ тодон-валанъёсын специалистъёсты будэтонын нимысьтыз инты басьто пӧртэм предметъёсъя олимпиадаос, – мылкыдзэ вера Андрей Кузнецов. – Совето Союз вакытэ асьме нылпиос ӵемысь нырысетӥ интыос басьязы физикая, математикая, химияя, биологияя но мукет предметъёсъя калыккуспо ӵошатсконъёсын. Али та олимпиадаосты радъян куштэмын улосъёс вылэ. Но мон уг вера, республикаысьтымы туала нылпиос лябесьгес луизы шуыса. Соос озьы ик вормонъёс басьяло Россиын радъяськылӥсь но калыккуспо ӵошатсконъёсын. Та возьматэ: шаерамы дышетон удыс лябӟемын ӧвӧл.

ЕГЭ улонэ пыӵаны кутскем дырысен сизьым ар пала ортчиз ни. Таин сэрен шуге-леке вуонъёс ӧй вал.

ЕГЭ визьмо школьникъёслы мултэс сюлмаськонъёстэк вузэ пырыны сюрес луэ, лыдъя Андрей Леонидович. Асьме республикаысь вылӥ дышетскон заведениосын ӵош соос бырйыны быгато бадӟым городъёсысь, шуом, Москваысь, Санкт-Петербургысь институтъёсты-университетъёсты но. Со понна соослы палэнэ потано ӧвӧл, сюрес вылын сюлмаськонъёс уг луо ни, коньдонзы но шыръяське.

Бен, республикамы вылын выль амалэн сётӥськись экзаменлэн пиртэшез шӧдӥське ик. Тужгес визьмо нылпиосмы табере капчиен дышетскыны кошко палэнысь вузъёсы. Со усто. Но умойтэм соиз: берен уг берытско ни. Соин ик республикаямы кылдытоно сыӵе условиос, сыӵе ужан интыос – егитъёсты соос мед гочатозы. Диплом басьтыса, мед берытскозы вордскем палъёсазы, татын пайда мед ваёзы.

Китайын та ласянь туж быгато: визьмо нылъёссэс-пиоссэс соос дуннеысь тужгес тодмо вузъёсы дышетскыны келяло. Но дор палъёсазы берытскон вылысь. Яке кунгож сьӧры кыльыса но, соос тыршыны кулэ Китай понна. Тӥни кинлэсь дышетскыны кулэ!

- Эшшо мон ватсасал на, – вера министр. – Дышетон удысын «велосипед кылдытоно» ӧвӧл ни. Куддыръя тодэ вайылоно ортчемзэ. Совето вакытысь школаен, соин ӵош вылӥ образование сётонэн но данъяськиськом бере, отысь вань ӟечсэ кельтоно, солэсь палэнтӥськоно ӧвӧл. Кылсярысь, профессия басьтэм егитъёсты ужан интыосы азьло келяло вал направлениея. Асьмелэн туала выпускникъёс пӧлысь бадӟым люкетэз одӥг нунал но уг ужало дышетскем удыссыя. Иське, кароно азьло сямен, яке Китайын сямен-а, шуод: кун чотын образование басьтэм егитъёс куинь арзэ ке но мед ужалозы кун предприятиосын, огазеяськонъёсын – соосты дышетонлы быдтэм коньдонэз мед берыктозы.

Элина Кумачёва.

- 2006-тӥ арысен тӥледлы оскизы Кузебай Герд нимо кун гимназиен кивалтыны. Мар туннэ нуналлы тужгес но пусйымонэз та ужады?

- Гимназия пыд йылаз йыг-йыг сылэ ни, тусызъя но, пуштросэзъя но со трослы выльдӥськиз. Бен, дуно техникаен, компьютеръёсын ми али ушъяськыны ум быгатӥське. Но школалэн сюлмыз ӧз ке луы, нокыӵе дуно арбериос уз юрттэ ӝутӥськыны. Нош али дорамы кин ке лыктэ ке, вожъяськыса кыле: кыӵе, пе, татын умой.

Коллективмы но одӥг герӟет выллем луиз ни. Нош ужаны кутскыкум, кыӵе секыт вал! Гимназия усьтӥськиз 21 номеро школа бордын. Дышетӥсьёс кыклы люкиськемын – оло таиныз, оло соиныз ужалод. Инмарлы тау, ог-огзэс валаны кутскизы. Дышетӥсьёслэн луонлыкъёссы вань гимназиез азьлане нуыны, ӟеч тодон-валанъёссы вылэ пыкиськыса.

Кызьы уд пусйы Валентина Григорьевна Широбоковаез, удмурт кылъя дышетӥсез. Нылпиослы мур тодон-валан сётэ ӟуч кылъя дышетӥсь Нина Арсентьевна Фукалова. Александр Владимирович Катков котькуд нылпиез кылзыны быгатоз, крезьгуранъя но кырӟанъя мылкыдзэс бурдъялоз. Котькуд дышетӥсь сярысь озьы вераны луоз.

- Анжелика Семёновна, мукет школаосын но гимназиосын ӵошатыса, маин висъяське тӥлядэз?

- Дышетскисьёс татын доразы выллем. Ӟучен-а, удмуртэн-а вераськозы, нокин соосты уз алы, вотяк шуыса серекъясь, исась уз луы. Татын дышетско пӧртэм выжы калыкъёслэн нылпиоссы, ог-огзэс вӧсь уг каро, уг ултӥяло. Ужаны кутскеме бере асьсэ понна пыш-пыш карозы вал: опеть со удмурт кырӟанъёссы чузъясько ни! Али со озьы ик луыны кулэ кадь: удмуртэн ӟучен, ваче ки кутскыса, мыно.

Но тодон-валанъя ӟечлыкез ӝутон бордын ужано на. Нылпиос понна кылдытэмын пӧртэм кружокъёс, секциос, отын соос асьсэды котыр ласянь усьтыны быгато.

- Гимназие куриськисьёс пӧлын «куиньлы» дышетскисьёс но вань, дыр. Тодон-валанъёсъя вылӥегес ӝутскон понна лябъёсызлэсь палэнскыны уд турттӥське-а?

- Ӟеч тодон-валан сётон бордын нылпиосын нуналмысь ужаськом, но со вылэ гинэ пыкъяськыны уг яра. Дышетскон интыез «ньыльёсын» но «витьёсын» дунъян шонер ӧвӧл, ваньмызлэн уг пӧрмы котькуд предметъя вылӥ возиськыны. Валтӥсь интыын луыны кулэ пиналлэсь мар ке ласянь но быгатонлыкъёссэ усьтон. Шуом, кин ке творчество ласянь ассэ возьматэ яке киыз котьмарлы мынэ, мукетыз спорт удысын вормонъёс басьтэ. Математикаез но кылъёсты ӟеч тодэмез шоры гинэ дышетӥсь ӧз ке учкы, быгатӥз ке аспӧртэм быгатонлыкъёссэ шедьтыны, усьтыны но дунъяны, со нылпи уз ыштӥськы, эшъёсыз сьӧры кыстӥськоз.

Нылпилэсь быгатонлыкъёссэ усьтон понна дышетӥсьлы ас бордаз но ужаны кулэ, тодон-валанзэ будэтыны. Та пумысен котькуд толэзе гимназиямы лекциос ортчо, нуэ соосты Удмурт кун университетысь Психологияя но педагогикая институтысь психолог Владимир Соловьёв. Малпасько, нылпиос школае шумпотыса лыкто ке, азямы пуктэм ужпумъёсты ми быдэстӥськом.

- Со шумпотон мылкыдъёс тӥ вылэ ӧръясько-а?

- Со туж адӟиське покчиос вылын. Коридоретӥ мыныкум, пумитам шедё ке, Анжелика Семёновна шуыса, киоссэс вӧлъяса ик, пумитам бызё. Троссэ соосты мон тодӥсько садикъя. Гимназиын 522 пинал дышетске, кык нылпи садамы 194 покчиос визь-нод басьто на.

Вуоно арын нырысетӥ классмы кык луоз, одӥгез нылпи садысь выжоз, мукетсэ куриськонъёсъя кутом.

- Анжелика Семёновна, удмурт кылэз дышетон шаерысьтымы школаосын туж шуген мынэ. Удмурт ёросъёсын гинэ но школаос анай кылзылэсь куштӥсько. Нош тӥляд дышетскисьёсты 1-тӥ классысен 11-тӥ классозь удмуртсэ дышето.

- Дышетоно-а, ӧвӧл-а анай кылэз, отысь мон нокыӵе шуг-секытэз уг адӟиськы. Школаен, озьы ик руноен кивалтӥсьлэн та ужпум шоры учконзы бордысь но сыӵе югдур кылдэ. Кивалтӥсь вала ке анай кыллэсь кулэлыксэ, бигер, ӟуч яке удмурт медло со, одно ик огкыл шедьтоз дышетӥсьёсын но, анай-атайёсын но, пиналъёсын но.

Али тросэз чӧлтӥсько урокъёс тырмымтэ вылэ, ЕГЭ-лы. Шуо: мар сётоз кылэз дышетэм, малы со кулэ? Нылпилы секыт уз луы-а? Анай кыллэн кулэлыкез шоры озьы вылтӥз гинэ учкон номыр ӟечсэ уг сёты. Кылэз тодон вераськыны быгатонэн гинэ уг герӟаськы. Кыллэсь люкыса, пиналлэсь пушдуннезэ куашкатӥськом, асваланзэ лябӟытӥськом. Со бордысь но потэ быдэ вуымтэослэн кырыж сюрес вылэ султэмзы.

- Ваньмыз тае уг валало уго. Оло, кун кылъёс сярысь законын гожтэмын луысал ке удмурт кылэз одно ик дышетон сярысь ужпум, соку нокыӵе шуг-секытъёс ӧй кылдысалзы?

- Асьмелэн, бигеръёсын ик ӵошатыса, трос аръёс ӵоже улонамы пыӵамын ӧй вал удмурт кылэз одно ик дышетон йылол. Соин ик сое туж секыт луоз ни пыӵатыны. Кесяськыса, ог-огмес пыкылыса, вӧсь карыса, номыр ӟечез уз пӧрмы, озьы асьмелэсь данмес гинэ нодтэмак каром. Удмуртъёс шоры учкон но таин валче палдурес луэ. Кыӵе законэн али алэмын удмурт кылэз дышетон? Анай-атайёс асьсэос палэнско солэсь, школа азе куронъёс уг пукто, уг вазисько.

Анай кылэз гажан мылкыд нырысь ик пыӵа семьяын. Адямилэсь та пумысен валанзэ воштон понна тросгес потано калык пӧлы, нуналысь нуналэ валэктон уж нуоно. Мон ачим тае ӟечгес валаны кутски, этнопсихологияя, психологияя литератураез лыдӟыса.

Кылэз дышетыны луэ пӧртэм сямен, со озьы ик кулэ но луыны. Кудӥз нылпи золгес тодэ анай кылзэ, кудӥз – лябгес. Сое чакласа, дышетонэз но пӧртэм сямен радъяно, нимаз группаослы люкыса. Кылэз ляб тодӥсь пиналлы урокын тунсыко мед луоз, соин ик удмурт кыл котырын одно кружокъёс кылдытоно.

Шуом, дышетскись кылэз тодэ, вала ке, со школаысь радиолэн ужаз пыриськыны быгатэ, радиопередачаос лэсьтэ. Берыктон ужын но кыл валтӥсь инты басьтэ: англи кылысь ӟуче, ӟучысь удмуртэ берыктонэн выро. Луонлык кылдэ кунгож сьӧры вуылыны. Кылэз тодэм кырӟанъя кружокын но туж кулэ. Нылпилы ассэ усьтыны пӧртэм амалъёс кылдытэмын бере, солэн анай кылзэ дышетон мылкыдыз кылдэ.

Гимназие куриськисьёс ваньмыз тодо: татын одно дышетоно удмурт кылэз, нокин солэсь палэнтэмын ӧвӧл. Дорамы шедён понна кин ке утчаны кутске удмурт ӵыжы-выжызэ. Мукетъёсыз шуо, Удмуртиын улӥськом бере, кылэз тодыны кулэ.

- Нош тӥляд улонады удмурт кыл кыӵе инты басьтэ?

- Мон вордӥськи но будӥ Дэри ёросысь Подшивал гуртын. Витетӥ классысен анай-атае малы ке монэ ӟуч классэ сётӥллям, но семьяямы удмуртэн вераськемысь ӧм дугдэ, эшъёсыным но котьку ас кылме поттылӥ. Гуртысьтымы вылӥ образованиен адямиос тросэз анай кылзэс вунэтӥзы, нылпиосынызы ӟуч сямен вераськыны кутскизы. Удмурт кылын вераськисьёс шоры вылӥысен учкыны ӧдъязы. Мыным со тумошо потэ вал, тау анай-атаелы, монэ ӧз люке ас кылылэсь. Али но та выллем югдур кылдэмын гуртъёсын.

Удмуртэз тодэме мыным ноку ӧз люкетылы, университетын дышетскыкум но, со юрттӥз. Али со туж кулэ школа ужын, депутат луыса калыкен пумиськонъёсын но. Кытӥяз калыклэн депутатъёслы трос лек кылыз люкаськемын, нош шоразы удмурт сямен вазьыса, лякытэн верасько ни. Туж паймо: ма, городын но-а, пе, удмуртэз тодо? Сюлэмзы ик небӟе.

- Шуг-секытъёс дыръя асьтэос кызьы небӟытӥськоды мылкыддэс?

- Мынам туж трос эшъёсы. Мунчое ветлӥськом, кафеын пукиськом, кенешиськом. Но сюлэмме мон ваньзылы уг усьты. Секыт вакытэ Библиез лыдӟисько. Мон соя улонлы дышетскисько, отысь кулэ тодон-валан басьтӥсько. Шуо, аслэсьтыд лулмугордэ, лулпуштэ таза карон понна тушмонэдлы тазалык сӥзёно. Монахъёс юри, пе, асьсэлы тушмон курыса, вӧсясько. Библиез лыдӟытэк, тае сюлмыныд уд вала. Мон Соломонлэсь притчаоссэ лыдӟон бордысен кутски.

Та нуналъёсы мынам улонам пӧртэм шуккетъёс луизы: анае улонысь кошкиз, мон вылэ Прокуратурае чагиськон гожтӥллям. Кинэ ке туж шугъяськытэ, лэся, депутат но директор луэме. Гожтӥллям, школа куашкан калэ вуэмын, пе, нокыӵе удмуртэз ӧвӧл. Мукет но сьӧд кылъёс вераллям. Удмуртъёслэн гимназизы пыд йылаз султӥз шуыса, шумпотыны кулэ кадь! Туннэ юрттэт вань кун ласянь но, быдэсъясь власть ласянь но. Асьмелэн но азинсконъёсмы ӧжыт ӧвӧл.

Кин ке, оло, шуоз: удмурт гимназиын удмурт кыл гинэ мед чузъяськоз. Туала вакытэ озьы луыны кулэ ӧвӧл: пинал ӟеч мед вераськоз ӟучен но, англи кылын но, анай кылзэ но мед тодоз. Азинскыны юрттозы на компьютер технологиос, дебатъёс, котырес ӝӧкъёс. Пинал кышкатэк мед вераськоз калык пӧлын но эшъёсыз азьын. Нош кесяськыса, ог-огедлы вожъяськыса, кыдёке уд мыны. Туала пиналъёслы та урод сямъёс медаз пыӵалэ ни вылэм.

Азьло мыным таӵе гожтэтлэсь секытгес луысал, дыр. Али улон опыт но вань. Собере, аслэсьтыд янгышъёстэ уд ке адӟиськы, та югдур шоры философлэн синмыныз учкыны турттӥськод ни: малпаськиськод, малы озьы луэ? Нош мукет ласянь, та гожтэт дышетӥсьёсмес золгес огазеяз.

- Анжелика Семёновна, дышетӥсь луон сярысь пичи дырысь малпанды ноку ӧз воштӥськылы-а?

- Мукет малпанэ ноку ӧй вал, уже мыным котьку кельшиз. Мамаелэсь Раиса Михайловна Килиналэсь адӟем кари, со туж зол дышетӥсь вал, покчиосын ужаз. Альбомысь фотографиоссэ учкыса но, адӟиськод, макем сюлмаськиз со пиналъёс сярысь. Анай-атайёсын кенешыса пуко яке пичиосын ӵош кариськемын, ваньзы сыӵе чылкытэсь, чебересь.

Мамае котьку шуоз вал, нылпиосты пичиысен ик чылкытлыклы дышетоно: сьӧразы котьку йырсынзы, ныркышетсы мед луоз. Дышетскисьёссэ со гыдьы-гыдьы шуыса вешалоз, чупалоз вал. Мынам аслам но сюлэмы оломар ик луэ, школаысь покчиосты адӟыса: сыӵе соос муспотонэсь, уката ик аляк луэменызы.

- Тӥ кивалтӥсь, политик, нылкышно, анай. Кинэн нырысь ик асьтэды шӧдӥськоды?

- Асме политик ӧй шуысал. Депутат луон – мон понна дышетскон. Коньдонэ мынам ӧвӧл, нош депутат шоры учко кисыезъя, созэ, тазэ куро. Мон адямиез кылзыны быгатӥсько, куд-ог ужпумъёсъя бырйисьёсылы юрттэт сётӥсько. Калыкен пумиськыса, тодӥськод, кыӵе законъёс ужало, кыӵезэ воштыны кулэ. Нош быдэстоно ужпумъёс туж трос дышетон удысын но, культураын но, егитъёслэн улоназы но.

Али мон нырысь ик анай но нылкышно, но кивалтон уже котьку монэн ӵош. Та шоры но анайлэн, нылкышнолэн синмыныз учкыны тыршисько. Валась, чидась луоно, нош кытӥяз, чурыт кыл но вератэк, уг луы. Мон кивалтӥсь но, курон-косонэз быдэсъясь но, огшоры кышномурт но луыны быгатӥсько. Музъемлэсь гинэ люкиськоно ӧвӧл: вылӥысь усьыны секытгес луоз.

Лия Малых.

Туспуктӥз Владимир Беломорских.