Война азьын. М. Гаврилова - мумизлэн алвылаз.

Басма юдэслы вожъяськон

Война кутскыку, мон куатям мынӥсько вал. Ма со сыӵе – валаса но ӧй быдты, дыр. Корка тыр калык люкаськиз. Кин кырӟа, кин синву кисьтэ. Ми сузэреным полатьысен учкиськом.

Бадӟымез сузэре кияз лента но басма юдэсъёсын тятямы дӥне лыктӥз. Кин ке пукон вайиз. Бубымы отчы тубиз, кисыысьтыз азвесь коньдон поттӥз но калык кырӟам улсын сое мумы коре молотэн шуккиз. Макем вожъяськыса учкимы коньдонэн ӵош шуккем басма юдэсъёс шоры: мунёен шудыны соос милемлы туж ярасалзы. Сузэреным валаса ик ӧм вуттэ: калык азбере, ульчае потӥз. Тятямы выльысь берытскиз, милемды ӟыгыртӥз-чупаз но ӝогак потӥз. Коркан чал-чал луиз. Ми шумпотыса гур котыртӥ бызьылӥськом. Со куспын акаосы – бадӟым сузэръёсы – пыризы.

- Ма бызьылӥськоды? Чалмытске! – вазиз одӥгез.

- А кытын мамаен тятя? – юаськомы.

- Тятямес войнае келязы ук, ӧд-а валалэ? Таре со кематэк уз берты, а мамамы сое валэн келяса мынӥз: ӝытазе-а, ӵукна-а вуоз.

Мумымы ӵуказеяз вуиз. Ми нош ик гур котыртӥ ворттылӥськом. Гурысь шыдэз поттӥз но милемды ӝӧк сьӧры ӧтиз. Мудоръёс шоры кӧня ке пол кирос карыса, милемын артэ пуксиз. Вылаз чебер бирдыё кофта, гурулаз сяськаё сьӧд кышет керттэмын. Таӵе дӥсен ми мамамес ӵем ӧм адӟылэ.

- Нош малы синвуосыд васько? – соосты киосынымы ӵушылыса, юаськом.

- Тятядэс войнае нуизы ук. Кызьы таре уломы? Искалмес но воштыса ӧм вуэ.

Йӧӟектэм укно

Гуртэ огнамы кылим. Бадӟымъёсыз ваньзы кошко ужаны. Мамамы пичи чугунын векчи картошка пӧзьтэ но, азбар палась укно янак вылэ сылал посудаен артэ пуктыса, кельтэ. Бадӟымез акамы Чуре сик коранэ келямын, мукетыз Дэбесэ дышетскыны кошкемын, Тамара бабусямы уй но нунал вал гидын ужа.

Нунал ӵоже укномы йӧӟектэ, ми сое ӵабъяны турттӥськом. Укно янак вылын пукыса, асьмеос но ӟонгыраськом, озьы ке но ум васькиське. Та укноысен гинэ адӟиське мамамылэн ужысь бертэмез. Туж кынмыны кутскиськом ке, бубымылэсь кунояны ветлон сьӧд дублёнказэ выламы золтӥськомы. Куддыръя бадӟымъёслэсь кылылэм кырӟанэз нёжъяны ӧдъяськом:

- Эх, отцы, отцы,

вы жестокие,

Вы сгубили немало

детей.

Только слышится, только

видится,

Как сиротки страдают одне…

Ми та куплетысь кык кылзэ гинэ валаськом: «отцы» но «сиротки». Ӟуч кылэз ум тодӥське вал.

Я, картошкамес кӧ-мыныз ик сиыса, кынмыса но кырӟаса, юн кема кыстӥськись нунал кызьы но озьы ортче. Кутсаськонзэс быдтыса, пичи ульчаысь оген-оген кышноос пото. Куско шубаен дӥсяськем мумымес адӟыса, корка пырытозяз ик черекъяса но серекъяса, зӧк (бадœым) гур котыртӥ бергаськом.

Вормонэз данъясь горд кышет

Арлыд пичиен ми войналэсь секытсэ, оло, сокем ӧм но валаллялэ, ваньмыз сямен ик потэн, клеверен, пул пызен пыжем нянь ке но сиим, скал вордыса вылысь йӧлэз ке но ӧм адӟылэ, ужаны туж вазь ке но кутским. Мыным туж жалесь акаосы. Ӟеч сиёнтэк секыт ужез быдэсъязы, быдэ вуон аресъёсазы яратонэз адӟытэк ортчизы. Котьма ке но вормонэз пичиез но, бадӟымез но чидатэк витиз.

Война быремлы ми мукетъёсыныз ӵош шум­потӥмы. Со нуналэ ӧм дышетске. Дышетӥсьёсмы Еле­на Семёновна но Алевтина Степановна шумпотыса веразы:

- Война быриз, ойдолэ гурт пыртӥмы строен кырӟаса ортчомы! Кинлэн гуртаз горд кышетэз вань, бызьса бертылэ но вае – сое флаг интые боды борды думом.

Мумилэн вал гужем нуллон горд кышетэз. Мон со дуре ветлӥ, дышетӥсьёс та куспын кузь боды шедьтӥллям. Отчы со горд кышетэз думизы.

Школамы гурт пумын вал. Колоннае султыса, ульчалэн мукет пумозяз кырӟаса мынӥмы. Тодам лыктэ на «Лымы тӧдьы», «Вало дурын, возь вылын», «Гулял по Уралу Чапаев-герой» кырӟанъёсты кырӟаммы, мукетъёссэ уг тодӥськы ни. Туж чебер кылӥськиз дышетӥсьёсмылэн куаразы. Али малпасько, кызьы меда мынӥз но кырӟаз Елена Семёновна? Будэме бере гинэ тодӥ: солэн картэз ожмаськонын быремын.

Бензин зыно одеколон

Война бырем бере фронтэ кошкемъёс бертыны кутскизы. Туж тросэз ӧз вуэ гуртазы. Соос пӧлын артэ коркась киросное Анатоль, вадьсысьтымы Митя Вася, Петыр Виктор, Горей Вася, Ондыръян, Горей Коля – ваньзы егитъёс. Бертӥзы арлыдоосызгес. Соослэн но тазалыксы юн ӧй ни вал.

Тятяе Ленинград фронтын ожмаськиз, медальёсыз но вал. Контузие шедьылэмын. Верамзэ тодӥсько на: эшъёсыз сое окопысь, сюез копаса, поттыны ӧй ке быгатысалзы, отчы ик бырысал. Сӧсырмыса госпитальын кыллемъёссэ но верамез вал. Кык чалепез озьы ик нуиз сьӧраз шайгуэ. Но тятямылэн ожмаськемез сярысь туж ик мадемез ӧз потылы. Ма со сярысь вераса улод, шуылӥз.

Гуртэ вуэмез бере ик монэным серемес учыр луиз. Дунне вылын одеколон вань шуыса, кылэме вал ке но, ма со, кыӵе зыно – ӧй тодылы. Тятяе, вещмешокысьтыз котырзэ поттыса, ӟус вылэ тыриз. Нош куинь сэрего пичигес ӟенеликез укно янак вылэ пуктӥз. Ӟенелик вылын юн чебер суредэз вал: горд векчи сяськаос но нылмурт ымныр. Ма та юамысьтым, одеколон, шуиз.

Мон тятяелэсь палэнскемзэ гинэ возьмаса улӥ. Кинэн ке вераськыкуз палэнскиз но, солэсь кузьмам ныркышетсэ сэрытак гинэ со одеколон шуонэн коттӥ. Аслым сокем ик ческыт зын ӧз поты, но малпай: одеколонлэн сыӵе зыныз. Шумпотыса бергасько акаосы вӧзын, ушъяськисько: мон ныркышетме одеколонэн коттӥ. Соос монэ серекъязы. Ныркышетме зажигалкалы дасям бензинэн коттӥськем.

Со нуналэ нош ик корка тыр калык люкаськиз. Тодам на, картъёссы доразы вуымтэ кышноос тятяелэсь юало: ӧз-а адӟылы кытысь ке соослэсьсэ? Бертэмез пумысен кӧня ке кумышка юизы но уйбыт кырӟаса пукизы. Куинь нунал ортчыса, бригадир тятяме уже потыны косӥз.

Коньдон люкай… тятяме ватыны

Ми, пиналъёс, малпаллям: война быриз ке, ӵуказеяз ик майбыр улон вуоз. Сурамтэ тӧдьы нянь мылмы потэмъя сиёмы, пряник, печення, канфет ымамы шедёз. Но малпанмы ӵуказеяз ик ӧз быдэсмы. Озьы ик сиимы турын куарен суралтэм нянь, уриськимы гольык пыд, ветлӥмы ӟугырес дэралэсь вурем дэремен. Школае пыдын сизьым иськеме, берло дас вить иськеме кутэн ветлӥмы. Ог ньыль-вить ар ортчыса гинэ, улон умой палагес воштӥськыны кутскиз. Но тятяе сое ӧз ни адӟы.

Дышетскыкум ик ужаны кутскыса люкам коньдонэным трактор улэ лёгаськыны шедем тятяелы костюмлы но гимнастёркалы материал басьтӥ. Вадьсысьтымы вуриськись кык нунал куспын вуриз соосты. Мукет номырин юрттыны мон тятяелы ӧй ву.

Тӥни сыӵе сюрессы вал фронтысь бертэм тросэзлэн воргоронъёслэн. Эшшо но секытгес вал картъёссы бырем кышноослэн. Али соос но туж ичи кылемын. Дэбес ёросысь Омелят (Роготнево) гуртамы одӥгез но ӧвӧл ни.

Милитина Гаврилова.

Татарстанысь Утор гуртысь Платон Исаклэн кузпалыз 1914-тӥ арын пи вордӥз. Пияшлы Василий ним понӥзы, но гуртоосыз удмурт пиёкез Васюрка гинэ шуо вал.

Кызь одӥг аресказ Васюрка Дарьяез кышно басьтӥз. Одӥг ар ортчыса, Лиза нылзы вордӥськиз. Фронтын дыръяз гуртысь басьтылэм гожтэтъёссэ Васюрка трос пол лыдӟылӥз. Ваньмыз кутско вал одӥг кадь: «Ӟечбур, Василий Исакович!» Собере ини кошко саламъёс: «Салам верало тыныд Педор песятай, Павол агай, кузпалыд Дарья, атаед но анаед, вань бускельёс но иськавынъёс». Котькуд гожтэтлэн ӝыныез саламъёсын тырмытэмын вал. Собере гинэ вакчияк гожтэмын улон-вылонзы сярысь: «Скал кунян вайиз, йӧлзэ узыр сётэ, улмоез (картофкаез) бичаса быдтӥм ини. Сергей агай жугиськонысь бертӥз, гадь тыросаз орденъёс но медальёс, чибинь но пуксьыны инты уз шедьты».

Лыдӟе Васюрка со гожтэтъёсты но, син азяз чебересь суредъёс адӟисько: вож-вож гуждорен шобыртэм урамзы, гурт котырысь бусыос но нюлэсъёс, анаезлэн гур котырын бергамез, Дарьялэн ӵукна ик быдэс ведра йӧлэн пыремез, Лиза нылызлэн гидкуазьын чырткем бызьылэмез, атаезлэн колхозэ ужаны кошкемез. «Эх, берты вал соос доры али ик!» – сюлэмыз чигиськылӥз ожгарчилэн.

* * *

Война бырем бере полксэс Германиысь Чопау городэ лэзизы фашистъёслэсь танкъёс лэсьтон заводзэс сэрттыны. Чопауэз гуртэн ӵошатыны луысал. Вань коркаос татын одӥг этажо, отын но татын атасъёслэн кырӟам куараоссы кылӥсько.

Офицеръёсты но солдатъёсты немецъёс доры патере интыязы. Фрау Вольф коркасьтыз одӥг висъетсэ Василийлы сётӥз. Нырысетӥ ӝытаз ик майор возьытэ усиз. Кузё кышнолэн ог дас сизьым аресъем нылыз кувшинэн ву но пичи гинэ таз пыртӥз.

- Герр офицер, кидэс миське, – вазиз со немец кылын.

Василий мар верамзэ ӧз вала, одӥг гучыкен сямен ӝыны кувшин вуэз юиз. Криста, серемзэ возьыны быгатытэк, бызьыса потӥз висъетысь.

- Со вуэз кидэ но бамдэ миськыны пыртӥзы – немецъёслэн сямзы сыӵе, – ӵуказеяз валэктӥзы Василийлы эшъёсыз.

Криста ӝытлы быдэ пыраз Василийлэн висъетаз. Нылаш ву кисьта, Василий кизэ но бамзэ миське. Пумен Васюрка ӝыт вуэмез чидатэк возьманы кутскиз. Одӥг пол, ачиз но шӧдытэк, Кристаез ӟыгыртӥз но чупаз. Соиз пумит ӧз луы.

Ӝоген Платонов Россиысь семьязэ но вунэтӥз. 1946-тӥ арын августэ Василий но Криста ог-огзылы чиньыосазы зарни зундэсъёс бырттӥзы. Табере Васюркалы Кристалэсь дуно адями ӧй вал ни дунне вылын.

Одӥг нуналэ Василиез командирзы дораз ӧтиз.

- Тыныд али ик сьӧлыклэсь палэнэгес кошконо.

- Кыӵе сьӧлыклэсь?

- Яратонэд пумысен особой отдел тунсыкъяське. Ӵуказе ӵукна Союзэ эшелон кошке, документъёсыд дасесь, – чурыт вераз командир.

Одӥг толэзь пала гинэ кылиз на вал Кристалы нылпи вордыны. Ма кароно, кызьы верано Германиысь кошконэз пумысен?

- Номыр карыны уг быгатӥськы, приказ, – буйгатыны выриз Василий Кристаез. – Мон кемалы уг кошкы, возьма монэ.

- Возьмало, – шыпытак вазиз Криста, синвузэ ватыны быгатытэк.

- Ныл ке вордскиз, Катюша нима, пи ке – Коля, – ватсаз на Василий, аслэсьтыз фотографизэ сётӥз.

* * *

Особой отделын Платоновен кык час пала вераськизы.

- Аслад улонэд дуно ке ӧвӧл, анай-атаед, семьяед сярысь малпа. Нылдэ но эн вунэты. Солы укмыс арес гинэ, вань улытозяз тушмонлэн нылыз луоз, – Василийлэн синмаз учкыса, вераз особист.

Воргорон валаз: «Таос мыным Криста доры мыныны эрик уз сётэ».

Бертэмез бере Васюркаез Пыкет гуртысь колхоз председателе бырйизы. Вить ар пала ужаса, Поповкаысь больницаын завхоз вал. Отысь ини сое ӧтизы «Марс» колхозэ кролик фермаен кивалтыны.

Васюрка семьяез доры бертӥз ке но, Германие кылем Криста сюлмысьтыз ӧз кошкылы. Зундэссэ чиньыысьтыз ӧз куялля. Солэн пушпалаз гожтэмын вал: «Криста Вольф. 3 августа 1946». Дарья картсэ немец кышноезлы туж вожаз, нырысь керетон но поттылӥз. Но семьязэ утён понна нылкышно сюлэм буйгаз, Кристалэсь фотографизэ но борддоре ошыны лэзиз.

Куинь ар ӵоже Васюрка нуналлы быдэ сямен гожтэтъёс ыстылӥз Германие. Но Кристалэсь ивор ӧз вуылы. Василий Платонов улонысь кошкиз 1965-тž арын. Быдэс улонзэ курадœиз ожын сќсырмем тыэныз.

* * *

Криста Василийлэсь одӥг гожтэтсэ но басьтымтэ. Дас ар возьмаз со Васюркаез. Дас ар тыршиз мар ке но тодыны со сярысь, гожъяз пӧртэм учреждениосы, нош ивор нокытысь но ӧвӧл ыстӥллям. Собере улонзэ мукет пиосмуртэн герӟаз, эшшо одӥг нылпи вордӥз на.

Василийлэн куремезъя Криста нылзэ Катюша шуиз. Но школае мынэмез бере нимзэ воштоно луиз. Германиын улӥсьёслы со кыл тодэ вайытылӥз уго шимес ожъёсты. Ваньмыз понна нылаш луиз Коля. Нокинлэн но йыраз ӧз лыктылы, со пи ним шуыса. Нош пинал муртлы та ним ӟуч атайзэ котькуд нунал тодэ вайытылӥз. Быдэ вуыса ини документъёсаз со ассэ Инга гожтэ. Анаез сямен ик со но кӧня ке дасо аръёс ӵоже пӧртэм интые гожъяз, нокытысь ивор ӧз вуы. Берло ини «Аргументы и факты» газетлэн редакцияз гожтӥз. «Ӝыны даур ӵоже ини аслэсьтым атайме утчасько – советской офицерез Василий Платоновез. Со тодматскиз мынам анаеным Криста Вольфен война бере Германиын. Мон уг тодӥськы солэсь атай нимзэ но ку вордӥськемзэ. Малпасько, со улӥз Москвалы матын. Тӥлесьтыд газеттэс быдэс дуннеын лыдӟо, оло, ӵош ожмаськем эшъёсыз, бускельёсыз, ӵыжы-выжыосыз тодо атайме? Война вакытысь фотографиез сяна, мынам номыриз но солэн ӧвӧл. Тӥ мынам берпум осконэ…» Таӵе гожтэтэн вазиськиз «АиФ» газетэ Германиысь госпожа Кеплер.

Паймод, ява, Васюрка кулэм дырысен куамын арлэсь но трос ортчем бере атаезлэн ӵыжы-выжыосыз солы вазиськиллям. «АиФ»-лэн иворез туж бадӟым шумпотон луиз Ингалы. Со кык пол вуылӥз Россиысь ӵыжы-выжыосыз доры. Нырысьсэ пумиськизы 2004-тӥ арын. Ингаез удмурт ӵыжы-выжыосыз туж шуныт пумитазы. Атаезлэн шайвылаз немец кышномурт зар-зар бӧрдэм. Ӝыны даур пала утчаз атайзэ, нош улэпен адӟыны ӧз кылды.

Кыкетӥзэ Инга Татарстанэ вуылӥз 2007-тӥ арын Франциска внучкаеныз. Россиысь ӵыжы-выжыосыз но Германие куное ветлӥзы – Васюркалэн Клава нылыз картэныз но внучкаеныз. Соку соос Кристаен но пумиськиллям, ӵош улэм корказэс но адӟиллям. 2006-тӥ аре Германие вуылӥзы Лизалэн нылъёсыз Римма но Людмила, Ингалэн куатьтон арес тырмон юбилеяз. Васюркалэн немец нылыз кылем арын август толэзе кулэм, пыктосэн висьыса. Солэн анаез Криста та дырозь улэп вал ай.

Дарья, Васюркалэн кузпалыз, кызь куать ар улӥз на картэз кулэм бере. Нош Лиза анаез бере одӥг ар гинэ улӥз на. 1992-тӥ арын бер сӥзьыл коркаязы тылпу ӝутскем. Шимес кулонэн бырем Васюркалэн но Дарьялэн нырысетӥ нылзы.

Васюркалэн Дарья кузпалыз берло аръёссэ улӥз Клавдия нылыз дорын Челябинск улосысь Чебаркуль карын. Кулэмез бере сое отчы ик ватӥллям, нош кылем аръёсы мугорзэ, Утор гуртэ вайыса, Васюрка вӧзы ватӥллям. Озьы тӥни, кызь ар ортчыса, Платоновъёс нош огинын луизы.

Алексей Пронин.

Нылпиосмы уз вунэтэ вормон дурисьёсты.

Вормон Нуналэ шаерысьтымы вань ёросъёсын но городъёсын ужрадъёс ортчизы, синпелетъёс дорын митингъёс радъяськизы, отын сӥлы каризы вормон кузьмасьёсты.

Ижын ужрадъёс 9 часысен Ялан ӝуась тыл дорысен кутскизы, нош 10 часын Пушкин ульча калыкен тымиськиз. Парадэ пыриськиз 1 сюрс 500 пала адями. Люкаськемъёсты ӟечкылаз Удмуртилэн Президентэз Александр Волков. Вормон Нунал котьку сюлмамы улоз. Балтикаысен Сьӧд зарезь дорозь ож бусы кыстӥськиз. Вормон кузьмасьёслы музъемозь йыбырттӥськомы, шуиз Александр Волков.

Та нуналэ синпелетъёс азе тюльпанъёслэсь, гвоздикаослэсь но розаослэсь шобрет кылдӥз. Ожын быремъёсты буре вайизы быдэс семьяосын, сяська керттэтъёс кузьмазы калык пӧлы потэм ветеранъёслы.

13 часын Вормон Нуналлы сӥзем эстафета кутскиз. Школаосын, ссузъёсын но вузъёсын дышетскисьёс сяна, ӵошатсконэ нырысьсэ пыриськизы Ижысь ёросъёсысь огазеям командаос. Вормисе потӥзы 88-тӥ школаысь, УдГУ-ысь, ИжГТУ-ысь, Устинов ёросысь бызьылӥсьёс. Та ӵошатсконын витетӥ инты басьтӥз Вавож ёросысь команда.

17 часысен Шор площадьын шулдыръяськонъёс кутскизы, нош ӝыт Вормон Нуналэз данъяз яркыт фейерверк.

Ижын Вормон Нуналлы сӥзем ужрадъёсы 70 сюрс пала адями пыриськиз. Югдурез утизы 700-лэсь ятыр полицейскойёс, 100 пала дружинникъёс. Йыртэман учыръёс пусъемын ӧй вал. Куазь но шумпоттӥз шулдыр шундыё нуналэныз.

Валентина Кутузова.

1942-тӥ ар, декабрь.
Пальтоме, сапегъёсме, ул дэремме, изьыме лэзи. Дӧдьы сулъёсме кортэн кыскатъялэ, куняндэс эн кынтэ. Салам верасько ас вордэм мемеелы. Эй, тон, мемее, мон понна чигиськиськод, дыр, ини. Туж эн чигиськы, мемей, мон гинэ ӧвӧл татын, кык пол ветлэмъёсыз но вань. Одӥген йыре лыктэм уж ӧвӧл, кызьы карод на. Вӧсяськелэ Инмарлы, может, кызьы ке но берто. Салам ваньдылы ик. Ӟеч возьмалэ, ӟеч улэлэ, мусо пиналъёсы. Та гожтэтэлэсь кылисько таза, тӥледлы но озьы ик малпасько.
Ӟеч тазалыкен ул, мемей, ӟеч возьма монэ.

1943-тӥ ар, 10-тӥ январь. Гожтэмын, вагонын мыныкуз.
Ми мынӥськом, кытчы мыныны кулэ милемлы. Ваньдылы ик туж но туж мусо салам верасько – мемейлы, Колялы, Ольгалы, Машалы, Катялы, Римкалы, Лидалы но тыныд, Анна, эшшо салам верасько вань роднялы но бӧлякъёслы. Эй, Анна, тӥ кыӵе меда улӥськоды, нянь но сёто-а меда тӥледлы? Мар меда тӥ сииськоды, мар меда малпаськоды тӥ? Мон тӥлесьтыд туж мӧзмисько, бурды ке луысал, лобӟыса бертысал.

1943-тӥ ар, 17-тӥ февраль. Башкирия, Уфа,  госпиталь.
Мон мӧзмисько пиналъёслэсь, тазалыксы вань-а? Мар сииськоды тӥ, няньды но ӧвӧл ни, дыр, коньдон поттонды но ӧвӧл тӥляд. Кунянды но вань-а ни? Мон раниськи 30 январе. Пыды бурмиз ини, но суйы висе али.

1943-тӥ ар, 29-тӥ апрель.
Гожтэт гожтӥсько вордӥськем дуннеям. Ӟеч-а улӥськоды, мынам вордэм мемее, тазалыкед вань-а тынад? Лидады чырткем-а ни? Вот, Анна, мон нош ик мынӥсько азьло ветлэм сюрес кузям. Мон ӟеч ке ветлӥ, берто, тӥ мон понна эн бӧрдэлэ, эн кайгыре, монэ тӥ ӟеч возьмалэ.

1943-тӥ ар, 21-тӥ май.
Гожтэт гожтӥсько вордскем дуннеям, мӧзмем сюлэмме буйгатыса. Вот, Анна, мон тӥледлы туж кыдёкын но фронтлы туж матын. Мон тӥлесьтыд туж мӧзмисько. Мон ӝоген пыро оже, тӥ монэ ӟеч возьмалэ.

1943-тӥ ар, 16-тӥ июнь.
Та гожтэтме гожъясько туж капчи мылкыдын, туж шумпотыса. Яра, тӥ тырмашиллямды, бакчадэс но мерттӥллямды, пыш но чабей кизиллямды. Кияр но мерттӥллямды. Мон но озьы ик малпасько вал. Мон ӟеч ке ветлӥ, мемее, одӥг пол берто али тынэсьтыд пыжем няньдэ, кизем киярдэ сиыны.
Мынам эшъёсы туж умоесь ӟучъёс но бигеръёс, асьме палъёс ӧвӧл нокин но. Директор школаын Гордей Николаевич на? Пред колхоза Колесников ик на?

1943-тӥ ар, 29-тӥ июль.
Мон кыллисько Москваын госпитальын, раниськемын 17 июле. Мынам ранае туж бадӟым ӧвӧл. Асьтэос кыӵе улӥськоды? Кизем ю-нянь кыӵе, ӟег но чабей? Скалдылэн йӧлыз потэ-а? Ӟазегпиды но ӵӧжпиды вань-а?

1943-тӥ ар, 9-тӥ август.
Вот, Анна, мон гуртысь кошки, матэ сюрес вылэ гинэ мынӥсько кадь потыса, кошкем бере чаляк гинэ бертыны уг луы ни вылэм.

1943 ар-тӥ, 17-тӥ август.
Та гожтэтме гожтӥсько ӵукна султэм берам. Вот, Анна, мон тӥледыз уй но нунал малпасько, уез но иземе уг луы. Тӥ, ӵукна султыса, колхоз уже пӧрмытскиськоды, дыр. Анна, мон тынэсьтыд туж мӧзмисько, туж адӟиськеме потэ тӥледын. Кыӵе улӥськоды ини? Мемей но тазалыкен улэ-а? Пиналъёслэн тазалыксы вань-а? Лида но чырткем, дыр, ини? Бусыын кизем ю кыӵе?
Анна, мон госпитальысен фотокарточка лэзи, басьтӥды-а, вераса лэзь.

1943-тӥ ар, 23-тӥ август.
Та гожтэтме гожтӥсько ӵукна султэм берам. Эй, мусо вордэм мемее, мон гуртын дыръям ӟечелэсь но трос уродэ вал, дыр. Тон мынэсьтым урод кылъёсме вунэты, мемей. Анна, тыныд но озьы ик ӟечелэсь но уродэз трос вал, дыр. Тон но мынэсьтым урод кылъёсме вунэты, ява. Эй, мусо пиналъёсы, бертыса тӥледын огазьын мусояськыса улоно мед луоз вал. Мон тӥлесьтыд ваньдылэсь ик туж мӧзмисько. Колхозысь нянь сёто-а?

1943-тӥ ар, 11-тӥ сентябрь.
Вот, Анна, вань уж, вань малпаськон, тыныд секыт ини, но чида ини. Ачим бертысал ке, ваньмыз вунысал али, ачим гинэ тазалыкен мед берто вал. Анна, ваньмыз тынад сюлмад сиён сярысь но дӥськут сярысь но сюлмаськонэд.

1944-тӥ ар, 2-тӥ январь.
Гожтэт гожтӥсько сюрес вылысен, асьтэос тодэлэ ини мынэсьтым кытчы мынэмме. Анна, мон тӥлесьтыд басьтӥ 3 гожтэттэс. Отысь тодӥ кыӵе улэмдэс. Туж секыт вылэм тӥляд улонды, особенно нянь сярысь, кызьы меда улоды ни, мар меда сиёды ни тӥ? Ачим бертытозь, мед чидалоды ини. Ачим ке бертӥ, кызьы ке но луоз али.

1944-тӥ ар, 8-тӥ июнь. Берпуметӥ гожтэтэз.
Мон, Анна, тынэсьтыд гожтэттэ ке басьтӥсько, асэныд вераськем кадь потӥсько. Вераса лэзь, мар сииськоды, гуысь картофкады умой-а толйиз, бакчаяды чабей кизиды-а? Таре ваньдылы ик туж но туж мусо салам верасько: мемейлы, Анна, мон тыныд, Колялы, Ольгалы, Машалы, Катилы, Римкалы но Лидалы. Мусо нуныёсы, тӥ мыным туж жаль потӥськоды.
Атаелы вордскем гуртаз бертыны ӧз кылды ни. Белорус музъемез немецъёслэсь мозмытыкузы, 1944-тӥ арын 24-тӥ июне, со бырыны шедиз. Мемее басьтӥз похоронка, но вань улытозяз возьмаз Петырезлэсь бертэмзэ. Ватэмын со вынлыко шайгуын Могилёв областьысь Дрибинской районысь Рясно гуртын. Быремезлэсь азьло гинэ пусъемын «За отвагу» медален, кудзэ солы сётӥллям 1944-тӥ арын 8-тӥ июне.
Ортчизы ини трос аръёс, нош сюлэм малы ке но весь оскыса улэ, куке но мон атаелэн шайгу вылаз ветлыны быгато шуыса. Одӥг пол ке но отчы понысал сяська керттэт но асьме музъем вылысь ваем сюй. Соку гинэ, дыр, мынам сюлмы гань-гань интыяз пуксёз. Мемее азьын верам кылме быдэстыны мед быгато. Атаелы верасал таӵе кылъёсме: «Атае, ӟеч кӧл, ми ваньмы шедьтӥмы та улонын асьмелэсь ужмес, яратонмес, нылпи вордӥм. Тынад выжыед ӧз быры, со пушъе, азьлань вамыштэ. Ми тонэ ноку ум вунэтэ».

Лидия Петрова.
Пичи Пурга ёрос,
Вуж Мӧнья гурт

Вӧзамы трос пӧртэм адямиос уло. Но тодод шат, ма соослэн сюлэмазы, кыӵе малпанъёсын-сюлмаськонъёсын уло. Нош кузь улон сюресэз ортчем муртлэн веранэз люкаськемын. Тани Мария БОЯРОВАЛЭН но улэм-вылэмез киноын выллем.

Кизнер ёросысь Арвазь-Пельга гуртын 1923-тӥ арын вордскем Мария Лаптева (кузпалызъя Боярова) Быдӟым ож кутскон аре 10-тӥ классэз йылпумъяз. Егит нылмуртлы Вормон Нуналозь фронтын сӧсырмемъёсты эмъяны кылдӥз.

- Анае туж дышетыны турттэ вал. Аслым дышетскыны ӧз кылды бере, тыныд сюрес усьто, пе. Ваньзэ вузало, коркамес но, нош тонэ дышето, шуылӥз. Но 1941-тӥ арын висьыса кулӥз. Сюратаен улӥськомы вал, со выль кышно вайиз. Маняез Оксиння дышетыны малпа вал, солэсь мылкыдзэ быдэсто, шуиз сюратае Анна сюранаймылы. Но война кутскон азьын сое Шольяе переподготовкае нуизы. Кошкыкуз сюранаймылы вераз: «Анна, та коркан Маня кузё кылёз, тон солэсь кылзӥськы». Со берпум кылъёсыз вал. Шольяысь соосты фронтэ нуизы. Ленинград котырын эшелонзы бомбаос улэ сюрыса, быремез сярысь ивор вуиз. Соку сюранаймы ас дораз бертӥз. Ми укмыс аресъем сузэреным валче кылимы.

- Нош кызьы тӥ фронтэ шедиды?

- Война кутскиз, вань пиосъёсты оже басьтӥзы. Милемыз трактор ужлы дышетӥзы. 10-тӥ класс бере экзамен сётъякумы, тракторен ужаны лэзись удостоверение но басьтӥмы. Кема ужаны ӧз кылды, повестка вуиз. Мыноно, пе, Бемыжысь военкоматэ, фронт мышкын служить карон вылысь медкомиссия ортчоно. Шуисько военкомлы: «Мынам атае мобилизовать каремын, агае действительнойын служить каре. Покчи сузэрме кинэн кельтом?» Евдокия ӵужапаеныд, пе, улоз. Нылпиез ӧвӧл бере, солы эш луоз.

Кизнер станциозь нуизы поездэн. 25 кузя Удмуртиысь нылмуртъёс люкаськизы. Татариын Бугульма дивизия кылдытэмын вылэм, отчы келяло. Но ми вуытозь, со кошкыса вуэм. Гжатск городысен гинэ сутӥм на. Пумитаны лыктӥз дивизилэн штабеныз кивалтӥсь Краснов. Москваез потыкумы, бомбёжка улэ сюримы. Ми, егит нылъёс, туж кышкамы. Дивизие вуимы уйин. Пыртӥзы шалашъёсы. Осто, Инмаре, шуиськомы. Пыд улын но, йыр улын но – кыз вайёс. Нырысь уйзэ озьы ик кӧлӥм. 436-тӥ медико-санитарной батальонын санитар луыса капчи сӧсырмемъёс ужало вылэм. Ми вуыса, соосты передовое келязы. «Тон мар ужалод война бере?» – юало. Враче дышетскыны пыро, шуисько. Соку тонэ, пе, операционно-перевязочной взводэ каромы.

Секыт но зол ужано луиз. Сӧсыр­мемъёсты ваё но ваё. Секыт вӧсь луэмъёсты передовойысь санитаръёс поттыло вал, собере ми доры вал дӧдьыен яке уробоен вайылӥзы. Кинлэн пыдыз-киыз ӧвӧл, кинлэн лыэз пыргытэмын… Сыӵеосты фронт мышкы келяны уг луы ини: вирыз кошкоз, сӥльыз сисьмыны кутскоз, зуркалоз, сюрес вылын кулоз. Пыдзэ вандӥськомы но биниськомы. Милемлы вуэммы бере ик ӝогак медкурсъёс ортчытӥзы, дышетскеммы сярысь справка но сётӥзы.

Война бырытозь, одӥг батальонын ик служить кари. Фронт город пумын гинэ ай, асьмелэнъёс немецъёсыз улляса но ӧз вуттэ на – ми городэ пыриськомы ини. Наступление зол мыныку, вал дӧдьыосын сьӧразы ум вуиське ке, дивизия машинаос висъялляз.

- Нырысетӥзэ сӧсырмем ожгарчидэс тодӥськоды на-а?

- Огнам малпаськыса пукисько ке, ваньмыз син азям пуксе. Нырысетӥез ик ожгарчие узбек воргорон вал. Мина вылэ сюрыса, пыд лызэ пыргытэм. Хирургмы – сибиряк, капитан Бадьин, туж етӥз вал. «Машка, – шуэ, – тон туж шӧртчи, возь талэсь пыдзэ, ампутировать каромы. Вандомы пыдес вылланетӥ. Заман операция лэсьтоно но госпитале келяно». Доктор вандэ, мон возисько. «Осто, Инмаре, нош атаелэсь но пыдзэ тазьы вандо ке, агаелэсь но куксэ тазьы басьто ке…» – йырам берга. «Машка, держи!» шуэмзэ Бадьинлэсь тодӥсько на, йырсазьме ыштыса, уси. Вандэм пыд мынам ымныр вылам сачак усиз. «Маша, умме усид-а, мар-а?!» – кеське эше Лиза Галичанина. Капитан Бадьин мыным «Удмурт калыклэн нылыз» ним сётӥз.

Собере, дышетсконзэ йылпумъяса, ми доры вуиз доктор Кац. Со – офицер, мон – рядовой. Пуля, лыэз йӧтытэк, сӥлетӥ ортче ке, со интыез шаплы сузяськод, миськиськод но биниськод. Кац пайме вал мыным: «Ма, кызьы сыӵе ӝог быгатӥськод?» Солэн угось нырысь интыын теория вал, нош мынам – практика. Взводлэн командирез шуылоз вал: «Доктор Маша оперирует, доктор Кац ассистирует». Удмурт шаерад бертӥд ке, мединститутэ мынод, пе. Но озьы ӧз луы.

Мария Михайловналэн али но син азяз на утьыны быгатымтэ куд-ог сӧсырмемъёс. Вунонтэм кылизы егит воргоронлэн синкылиосыз. Москваысь ас мылкыдызъя фронтэ куриськем. Быдэс войнаез батальонлэн комсоргез луыса ортчем. Ож йылпумъяськон азьын ини, мина вылэ лёгиськыса, пуштэм. Кинлы мон кулэ на табере шуыса, ӧпкельыса бӧрдэм пиосмурт. Нош кӧня сыӵеос вал 4 ар ӵоже? Со шимес суредъёсты йырысь нокызьы уд ӵушы.

- Дивизия шаплы азьлань мынэ, нош подкрепление уг вуы. Трос вутто секыт сӧсырмемъёсты. Вир уг тырмы. Соин ик кинлэн вир группаез тупа, артэ ӝӧк вылэ выдтыто но, вирмес сётӥськом. Война бере но соослэсь трос гожтэтъёс басьямы на: «Тау, сестра, тынад виреныд татчыозь улӥсько на». Котьмар но тодэ лыктэ. Дивизия азьлань мыныку, 2-3 нунал пукылонэз адӟытэк, изьытэк ужано луылӥз. Трос вир сётэм бере шорем нянь вӧйын но сутка ӵоже шутэтскон шедьылӥз ик.

- Нош сиён-юон ласянь кыӵе вал?

- Дивизия оборонаын ке – сиён вань. Нош азьлань золгес мынэ ке – сиёнэн уг вутско ни. Котыртэме сюриськод ке, одӥг шорем нянен сутка ӵоже улылӥм. Сӧсырмем мурт ваемзы бере ик кулэ ке, мынӥськом солэсь котомказэ учкыны. Паёкез сиыса быдтымтэ ке, сое басьтӥськом но люкиськом: огез куртче, мукетыз, куинетӥез…

Нош немецез зол улляку, сиён но, юон но тодэ уг лыкто ни. Дырлэсь ортчемзэ ик шӧдыны уг луы, ар вакытэз но уд валаськы кадь – гужем-а, тол-а. Туж секыт вал, но тау Инмарлы – улэп кылиськиз.

Фронтын огдырлы чус луыку но, эмъясьёслы шутэтскыны дыр ӧз шедьылы. Котькудзылы сётӥзы карабин, соин ыбылӥськыны дышетӥзы, азьлань нюжтӥськыса мыныны валэктӥзы. Ожын олома но луэ, котькыӵе шуг-секыт югдурын астэ утьыны быгатоно. Фронтысен ик Мария Боярова партие но пыриз. Соку нырысь ик атакае коммунистъёс ӝутскылӥзы, котьма ласянь адӟем карымон луыны тыршылӥзы.

- Война бере тӥледыз соку ик гуртады лэзизы-а?

- 5-тӥ-6-тӥ мае тодмо ни вал, капитуляция луоз шуыса. «Ура! Ура! Улэп кылимы!» – ми Германиын озьы шумпотӥм ни. Берлинозь 200 иськемын вал – Лаубан городын. Мышкамы кылемын Латвия, Литва, Польша, Чехословакия, Карпат гурезьёс. Кинлэн медицина специальностьлы дышетскемез ӧвӧл, соосты гуртазы лэзизы. Нош милемыз, куинь нылмуртъёсыз, одӥг толэзьлы офицеръёслэн столовоязы ужаны кельтӥзы на. Дивизилэн командирез генерал-майор Максутов Казаньысь вылэм. Нырысь нуналаз ик сюдэммы бере со старшой поварлы верам: «Мыным таиз официант сиён мед пуктылоз».

ӵуказеяз повар шуэ:

- Солдат Лаптева, генерал ӝӧк сьӧры пуксиз.

- Дядя Паша, мон уг мыны, мон возьдаськисько.

Батальонлэн командирез дорам лыктӥз:

- Кызьы озьы? Генерал пуке ни, нош тон уд нуиськы солы сиён?

Повар дышетэ монэ, кызьы лыктоно со доры, кызьы тусьты-пуньыосты азяз пуктылоно. Ӝӧк сьӧрын генерал кык адъютантъёсыныз ӵош пуке вал. Ма карод – пуктылӥ сиён. Генерал ньылетӥ порция вайыны косэ. Асме но вӧзаз пуктӥз но ӟыгыртӥз. Ачиз бӧрдыны кутскиз. Мон му пыр вияно кадь луи.

- Эн курда, нылы, – шуэ. – Мынам воксё тон кадь ик одӥг гинэ нылы вал. Казаньысь мединститут бере фронтэ мыныкузы, бомбаос улын быриз. Тон кадь ик сьӧдкысъем, мунё кадь пичи мугоро вал, ымнырын но тыныд кельше. Тонэ адӟи гинэ, малпай: тон мынам нылы луод. 10 класс дышетскемед вань, мон тонэ Москвае враче дышетскыны лэзё.

- Ой, мон дорам берто, – шуисько.

- Ярам, берталод, адскод но выльысь татчы лыктод.

- Мон сюрес уг шедьты ни татчы.

- Мон тонэ пумитаны Кизнере солдатэз келяло.

- Ой, генерал эш, гуртэ бертэме потэ.

- Мон бертай ни Казане, отын номыр но шедьтыны уг луы. Мар веранэз на гуртэд сярысь? Кин тонэ, нылы, гуртын возьма? Анаед ӧвӧл, атаед быремын.

- Кытысь тодӥськоды, генерал эш?

- Мон тынэсьтыд личной делодэ учки, тон табере мынам нылы луод, – шуэ.

Нуналлы быдэ монэн вераськылӥз. Тани келяло ни милемыз дорамы, сюрес вылэ довольствие сётӥзы, оркестр шудэ. Эшелон дорысь стройысь поттыса, генерал юа на:

- Малпад-а? Соглаш-а? Мон али но быгатӥсько тонэ кельтыны.

- Мон гуртэ берто.

- Ярам. Казане вуид ке, кышное доры пыра. Мон солы телеграмма сётӥ, со тонэ вокзалын пумиталоз. Кузпалы но нылмес адӟем кадь мед луоз.

Максутовлэн огез Жора нимо адъютантэз сирота вылэм. Война вакытэ генерал сое аслаз пиез чотын утем-вордэм. Маша Лаптеваез но, нылыз чотэ карыса, кыкназэс ик дышетыса, паръяны медэ вылэм. Но улонын ваньмыз малпамъя уг луы. 22 аресъем фронтовичка бертӥз вордскем гуртаз.

- Генерал шуиз вал, дорад вуэмед бере гожтэт ысты. Нош Казане вуыса, кышнозэ но ӧй утча ни, ӝоггес дорам бертэме потӥз. Генераллы но ӧй гожты. Солэсь вуэм гожтэтэзлы но номыр валэктон ӧй ысты. Ваньзэс пӧям выллем луиз. Вордскем коркае сисьмемын ни. Ӵужапайлы мединститутэ пырон сярысь поттылӥ. Бӧрдыны кутскиз. Номырин но юрттыны уг быгаты, пе. Мар дӥськутэ вылам вань, со сяна, нокыӵе ваньбурмы ӧвӧл. Война вылтӥ ваньзэ вузано луиз, шуиз.

Озьы мон ужаны кутски сельсоветын. Собере армиысь бертӥз школаын ӵош дышетскем егит воргорон Андрей Бояров. Фронтын со разведчик вылэм. 1948-тӥ арын огазе кариським. Со дыре роноен кивалтэ вылэм мынам азьвыл дышетӥсе. Пумиськыкумы школаын ужаны ӵектӥз, каньылля институтын но дышетскод, шуиз. Пумит луи. Кышкай пиналъёсын ужаны. Собере Кизнер ёрос больницаысь валтӥсь врач дораз ӧтиз. Сыӵе бадӟым опытэд, пе, ойдо, операциос дыръя юрттӥськод. Улон инты но сётом. Кузпалылэн анаез пумит луиз: «Одӥг гинэ пиме но бордысьтым басьтод-а? Уг сёты». Озьы чик дышетскытэк кыли.

Бояровъёслэн огез бӧрсьы мукетыз вить пиоссы но одӥг нылзы вордскизы. Быдэс гвардия милям, шуылӥзы кузпалъёс. Асьсэлы дышетскыны ӧз кылды бере, ваньзылы вылӥ тодон-валан сётӥзы. Жаль, али куинез гинэ улэп на, кузпалыз но улонысь кошкиз ни.

Андрей Алексеевич Бояров Кизнер ёросысь Кармыж гуртысь «Заветы Ильича» хозяйствоын 28 арзэ комбайнёр луыса тыршиз, Мария Михайловна татын пенсие потытозяз ик пӧртэм ужъёсты быдэсъяз.

- Пудо возьмасьысен сельсовет предозь – одӥг уж но мынэсьтым ӧз мыльы, – шуэ со. – Партия косӥз. Бригадирын ужаны куризы – мынӥ. Ферма куашкамын, сое ӝутыны кивалтӥсь коммунист кулэ. Мынӥсько. Комплексын ужась бригадаос кылдылыны кутскизы – отчы бухгалтер, пе, кулэ. Уг быгаты, шуисько. У-у, тынад мылкыдыныд ваньмыз пӧрмоз. Нош ик мынӥсько. Гуртысь коммунистъёсын кивалтӥ. Партилэн райкомезлэн но, Удмурт обкомлэн но ёзчиез вал. Пенсие потонме пусйыку, вань нылпиосы люкаськизы но, огез кенэ шуэ: «Тырмоз анай-атаймес татын возьыны. Турын, пу дасянын юрттӥськыны ум вутскиське бере, кудмы ке доры басьтоно». Но ми Андрееным пиналъёсын ӵош улыны ӧм кариське. Ижкаре корка басьтӥмы. Татчы вуыса, 75 аресам но ай 24-тӥ СПТУ-ын ужай. Калык пӧлын улэм потӥз, адямиосын шулдыр ук.

Мария Бояровалэн война вакытэ басьтэм кык орденэз но медальёсыз вӧзы ватсаськизы на мукетъёсыз но. Кизнер ёросын нырысьёсыз пӧлын солы сётэмын вал «Ужысь ветеран» медаль.

Кизнер ёросысь Кармыж гуртын ужам, Быдӟым ожын кыдам, котькыӵе удысын синмаськымон тыршем Мария Боярова кадь адямиос вылын возиське быдэс Россия.

Владимир МИХАЙЛОВ.

Туспуктӥз Владимир БЕЛОМОРСКИХ.