К. Ломагин синмаське вал инкуазьлы... 1970-тӥ аръёс.

Кылем арнянуналэ (пучыарняе) лумбыт нясь-нясь пиштӥз шунды, жильыртӥзы шунась вуос, нош калыкмы понна та нунал пилемо луиз. Берпум сюрес вылэ келямы Удмуртиысь туж тодмо писателез, журналистэз, ӵош ужам гажано эшмес Кирилл Егорович Ломагинэз. Солэн весяк шутэтскон музъемез луиз югыт кызьпуосын но пинал вож кызъёсын котыртэм куш – Якшур-Бӧдья вӧзысь шайвыл. Мылкыдызъя ӧз луы, дыр, таӵе ватон. Дас кык ар талэсь азьло ай К. Ломагин гожтэм вылэм: марысь мар ке, Пичи Пурга ёросысь Брангурт шайвылэ, пе, ватэ – вордскем палъёсаз. Нош кин тодӥз тазьы луонозэ… Со шайвылэ япылак вуосын сэрен пырыны уз луы шуыса, ӵыжы-выжыосыз кӧня ке кырым сюй гинэ отысь вайизы, кыллён музъемаз-гуаз пазьгизы. (Таӵе куронзэ но Кирилл Егорович ачиз верам кадь луэ, Катя нылзэ тазьы вӧтатэм.)

Кирилл Егорович пыраклы «каръяськиз» кузпалызлэн Алевтина Андреевналэн вордскем палъёсаз. Удмурт музъеммылэн шораз. Вожзэ медаз вайы ини… Сое вордскем гуртаз но котыр ёросын чипыен-куреген тодо ке но, Кирилл Ломагин – Пурга пал гожъяськись гинэ ӧвӧл – со Удмуртиысь калык писатель, культура удысысь дано ужась, Калыкъёслэн эшъяськонзы орденэн пусъем мурт, К. Герд нимо премилэн лауреатэз.

* * *

Вордскиз Пичи Пурга ёросысь Бӧдья-Пуро (Сундуково) гуртын 1933-тӥ арын 24-тӥ мае. Татын начальной школаез йылпумъямез бере вамыштӥз Брангуртысь сизьым классъем школае. 1949-тӥ арын сое, усто дышетскисез, Ижысь педучилищее экзаменъёстэк куто, но трос ик дышетскыны ӧз кылды – армие Тихоокеанской флотэ басьтӥзы. Япон зарезьысь Ӟуч шормуӵын службазэ нуэ. Старшой матрос луыса офицеръёслэн ӝыт школаязы дышетске. Гожъяськон борды татысен ик басьтӥське но нырысетӥ кылбурзэ 1956-тӥ арын «Советской Удмуртия» газетын печатла.

Кирилл Ломагин ялан ужа но, дышетске но. Ижысь сельхозинститутэз инженер-механик луыса йылпумъя. 1966-тӥ-1968-тӥ аръёсы Москваысь Вылӥ партийной школаын тодон-валанзэ муромытэ.

Ижысь военкоматын кӧня ке ужамез бере вань улонзэ герӟа «Советской Удмуртия» – «Удмурт дунне» газетэн. Отын гурт удысэз нуыкуз, берлогес культура отделэн кивалтыкуз, шаерысьтымы ваньмаз сямен гуртъёсы вуылӥз. Улонэз мур тодэмез юрттӥз солы лэчытэсь статьяос, устоесь очеркъёс, веросъёс кылдытъяны. Нырысетӥ печатлам книгаез луиз «Лема дурын» (1963) – колхоз председателен ваче вуон сярысь очеркез.

К. Ломагин котьку сямен ик ӟуго ужпумъёсты сэрттӥз-пертчиз, кылбурен шиё чуръёссэ но кылдытъяз, нош сюлэмызъя лирик вал. Та сярысь верало солэн кылбур книгаосыз: «Тылсиос но вужеръёс» (1964), «Кошкиськом революцие» (1969), «Шӧкычен» кенешыса» (1978). Лирика визылэз уката юн шӧдӥське берло поттэм «Мон ке пӧсь шокчи…» (2002) бичетаз. Отысь «Улонлэн вайёсыз», «Тонтэк кин-о мон?», «Пурга ныл» кылбуръёсыз тодмо кырӟанъёс луизы.

Паськыт удысэн мынӥсь писатель басня жанрез но вормыны быгатӥз. Солэн гожъямез сярысь тодмо венгер литературовед Петер Домокош тазьы шуиз: «юн ӵушкась, пӧсектытӥсь» («с сильным критическим запалом»).

Россиысь Писательёслэн огазеяськонзылэн ёзчиез луытозь, «Котьку сюлэмын» романзэ но устооссэ повестьёссэ гожтытозяз (берло аръёсаз но, ма веранэз), К. Ломагин туж уно пӧсез-курытэз чидано луиз. «Кыкетӥ разрядъем» шуэмзы шоры учкытэк, вылысьтыз вылаз выль повестьёссэ гожъяз. Озьы пӧрмизы «Юсь» (1992), «Кусолы мытылӥсь будос» (1992), «Вир» (2000), «Сьӧд тэльын пушъем яратон» (2002), «Гырлыё чиган» (2003), «Ӟыгыръя, киосыд вань дыръя» (2004). Котьма ке но, кызьы гожтэ литературатодосчи Татьяна Зайцева, «солэсь произведениоссэ лыдӟись вите, ас мылкыдъёсыз но малпанъёсыз пумысен авторен кенеше, соин ик вераны луэ: К. Ломагинлэн творчествоезлы нырысь критик луэ калык, огшоры лыдӟись. Пусйыны кулэ, лыдӟисьёслы тужгес но яразы К. Ломагинлэн «Ӟыгыръя, киосыд вань дыръя» но «Вир» повестьёсыз. Та берлоез сярысь вераса, дунъет сётӥсь шуэ: повестьсэ автор лэчыт сюжето, криминал жанрлы, детективлы матын карем ке но, калыкмылэн улонысьтыз суредъёсын тырмытэм. Солэн прозаез узыр кыло, капчиен лыдӟиське, бордаз кыске. Нош огъя верано ке, «Сӥзьыл гудыри» (1976), «Котьку возь сюлэмад» (1983) повестьёсыз бордысен кутскыса, писатель бугыртэ ож темаез: Октябрь революцилэн, Быдӟым ожлэн, Афган но Чечня музъем вылын пӧсь ожъёслэн секыт адӟон-куректон ваемзы. Вераны кулэ на: ас геройёсызлэн улонзы, кусыпъёссы, пуш дуннезы пыр К. Ломагин возьматӥз совето вакытысь зэмос писатель – патриот, интернационалист, гуманист – луэмзэ.

* * *

Писатель аслыз маза ӧз сёты: тросгес гожъяса вуттоно. Со понна тазалыксэ юн чакласа возиз, чылкыт омырен шокаса, пужымъёс пӧлын пыдын трос ветлӥз, гожъяськон дырзэ умой радъяны сюлмаськиз. Сотэк вордскемезъя одӥг пекляен мурт вуттысал-а меда тамында малпам ужзэ быдэстыны? Эмчиос уго 50 аръёс гинэ улон сӥзиллям вылэм…

Солэн туж капчиен ӝутскон сямыз вал. Нош йыбыртъяны ӧз яраты. Соин ик ас гожъямзэ чильк-вальк выло книгаен адӟыны таки ӧз кылды. Ас уксёеныз коть кӧня ке пичи книгазэ дасяз-поттӥз.

Нош журналистика удысын тыршемез кизем мында – газет бамъёсын. Удмурт движениез улӟытонлы но Кирилл Егорович ас кужымзэ сётӥз. Со тыршемен, «Советской Удмуртиын» «Герд» бам печатласькиз.

Солэн дыртӥсь почеркез мыным пинал дырысен туж тодмо: кема гинэ одӥг кабинетын ӵош ужамы. Гожъяськонын пыд йылам султыны юрттӥсе. 1980-тӥ аръёсы газетамы солэн кивалтэмъяз литобъединение нуим, литературалы но искусстволы сӥзем «Тулкым» бамез поттӥм. Атай сямен индылэмез, чуръёсме эскеремез, шуныт тӧл кадь лӧбак ӝутӥськемез котьку син азямы улозы.

Татьяна Чернова.

Удмурт кун университетын дышетскыкумы, Алексей Геннадьевич милям, гуртысь али гинэ вуэм егитъёслэн, сюлмаськисьмы-кивалтӥсьмы вал. 1983-тӥ-1985-тӥ аръёсы со ачиз но тодон-валан люказ Ленинградын, аспирантураын. Валамон ни, ваньмон дырыз ӧвӧлэн милемын шер пумиськылӥз. Нош ми со вакытэ чидатэк витьылӥмы «атаймес», туж мӧзмылӥмы солэсь. Ас поннамы малпаллямы: Алексей Геннадьевич ку меда берытскоз ини Ленинградысь?..

Солэн милемын пумиськылон вакытэз ми понна зэмос шумпотон вал. Аудиторие пырыкуз ик, лулысь-сюлмысь ӟечбуръяськылӥз, шуылӥз милемлы:

- Тӥ мыным вералэ, вералэ асьтэлэсь сюлмаськонъёстэс, кӧткайгуостэс: мон тӥледыз туж шер адӟылӥсько ук…

Валамон ни: ми соку ваньмы мылысь-кыдысь кенешылӥмы соин котькыӵе ужпумъёс сярысь, номыре ватытэк, кисьтылӥмы сюлэм висёнъёсмес…

1986-тӥ-1987-тӥ аръёсы Алексей Геннадьевич милемыз тодматӥз кунгож сьӧрысь литератураен: та аспӧртэм удысысь куд-ог веранъёсыз ми понна, оло, валантэм но йӧспӧртэм вал. Дорамы одӥг пол пыриз но сюлэмшугъяськыса юа:

- Мон тӥледлы верасько-верасько та литература сярысь но, тӥ бон мынэсьтым мадемме анласькоды-а (валаськоды-а), уд-а? Кылсярысь, ма со модернизм?..

Пӧлысьтым туж шӧртчи эшмы, азьветлӥсьмы, мынам Алнаш ёросысьтым ик визь люк Раиса Худякова интыысьтыз лӧбак ӝутскиз но, чик шугъяськытэк, валэктӥз дышетӥсьмылэн юанэзлы. Алексей Геннадьевич шумпотыса шуиз:

- Бен, озьы, озьы, шонер. Валаськоды вылэм…

Удмурт кун университетэз йылпумъяса, улон но ужан сюресъёсмы отӥяз вайяськизы. Но дышетӥсьмы ӧз вунэтылы милемыз. 1990-тӥ арын коньывуон толэзьлэн кутсконаз кӧня ке кузя мынӥськомы пор элькунлэн шоркараз – Йошкар-Олае, фин-угор культурая огазеяськон кылдытонлы сӥзем ужрадэ. Шаерысьтымы трос тодмо тодосчиос, политикъёс, журналистъёс пӧлын ик вал А. Красильников но. Азьпалам пукись адямиелы маке пумысен ӧй-а вазьы? Алексей Геннадьевич, йырзэ мон пала ӝутыса, султӥз но сюлмаськыса сямен юаз:

- Тӥ али кытын ужаськоды?

- Алнашын, – вакчияк валэктӥ мон, улон сюресэным тунсыкъяськемезлы туж паймыса но абдраса…

Таӵе юанэн герӟаськем учыр отӥяз но вал. Тодмо политик 2000-тӥ аръёслэн кутсконазы кивалтӥз ини Кун Кенешысь Дышетонъя, наукая, культурая но егитъёсын ужан политикая комиссиен. Огнуналэ туж дыртыса вамышъясько Культурая министерствое, фин-угор журналистъёслэн ужпумъёссылы сӥзем кенешонэ. Пумитам шедиз Алексей Геннадьевич. Дугдыса нош ик юаз мынэсьтым:

- Тӥ али кытын ужаськоды?

- «Удмурт дуннеын», – нош ик вакчияк ивортӥ мон, таӵе юанэзлы выльысь туж паймыса. Собере верай куронме:

- Алексей Геннадьевич, мынам туж тыршеме потэ Нациосын ужан политикая министерствоысь кылысь кылэ берыктонъя ёзын. Со али кылдытӥське…

- Марысь мар ке – вазиськелэ. Мон юрттыны быгато тӥледлы, Лена…

Тазьы верамезлы соку но туж пайми. Бератаз но ялан малпаськылӥ. Кун Кенешысь собыдӟа ёзэн кивалтӥсь, шаерысьтымы туж тодмо тодосчи, политик монэн вераськиз, аслаз туж матысь но дуно эшеныз кадь…

Зэм, та чебер малпанэ азьло но, берло но ӧз быдэсмы: азьвыл сямен ик вормиз кепыран сямы…

Соку но, берло но весь синмаськылӥ алнаш музъем вылын вордӥськем аспал эшелэн сайкыт тусбуезлы, лэчыт йырвизьмызлы, паймылӥ улон сюресэным тунсыкъяськемезлы…

- Тӥ али кытын ужаськоды?..

Тазьы юасез шер ини…

Сюлэм туж вӧсь но ӝож луэ, таӵе визьмо но йыгмыт адямиос улон сюрессэс такем вазь йылсало ке. Пыраклы уг кысо соос, инмысь кизилиос сямен, весь ворекъяса, пиштыса уло. Улэп дыръязы быдэстэм ӟеч ужъёсынызы тодамы вайытыло яркыт нимзэс.

Елена Виноградова.

А. Красильников нылпиосын писпу мерттыку.

11-тӥ апреле Алнаш черкогуртын бадӟым ужрад ортчоз. Татысь шор ёзо школалы сётозы Кун Кенешысь азьвыл депутатлэсь, философия наукаосъя докторлэсь, филология наукаосъя кандидатлэсь Алексей Красильниковлэсь нимзэ. Ӵапак татысь школаын ас вакытаз визь люказ та дано пиосмурт. Жаляса верано, кылем арын мартэ со улонысь кошкиз. Туэ октябре солы тырмысал 58 арес.

Алексей Красильников – тодмо удмурт писательлэн Геннадий Красильниковлэн пиез. Атаез ас вакытаз ужаз «Алнашский колхозник», «Советской Удмуртия» газетъёсын, кивалтӥз Удмуртиысь Писательёслэн огазеяськонэнызы. РСФСР-лэн но УАССР-лэн Верховной Советсылэн депутатэз вал. Валамон ни, таӵе визьмо буби вӧзын будыса, Алексей Геннадьевичлы ноку маза ӧз сётылы одӥг малпан: атае мон понна медаз возьдаськы, со кадь луыны тыршоно. Школаын но, институтын но дышетскыкуз, ялан атайзэ тодаз уськытъяло вал уго. Алексей Красильников весь возьматыны выриз: ачиз но маке со лэсьтыны быгатэ. Огпол тазьы верамез но вань: атае депутат вал, мон но табере депутат ни, озьы ке но атайме быдэсак ӧй суты на, художественной произведение ӧй гожты на.

Алексей Геннадьевич туж умой тодэ вал англи кылэз. Француз сямен но вераськыны пӧрмытъяз. Кунгож сьӧры кошкон сярысь но огвакытэ малпаськылӥз. 1994-тӥ арын, Удмурт кун университетын ужакуз ай, грант утӥз. Соя чакламын вал Америкае ӝыны арлы стажировкае мыныны. Университет но быръемын, тема но пусъемын.

Ӵапак соку пыриськоно кариськиз Кун Кенеше быръёнъёсы. Отын вормиз. Ижлэн Майской округаз депутат луиз. Соберегес ик Кун Кенеше ужаны ӧтизы. Татын выриз социальной ужпумъёсты сэрттон-пертчонэн. Шаерысьтымы закон кылдытъясь ёзысь Наукая, дышетонъя, культурая но егитъёсын ужан политикая комиссиен кивалтӥз. Америкаен йырин ӧй вал ни. Но Красильниковлэн верамезъя, со огпол но ӧз жаля, улонэз озьы радъяськиз шуыса.

- Со вакытэ атайлы политика матынгес вал, лэся, – тодаз вае Илья пиез. – Сое азьлань валтӥз одӥг малпан: улонэз кызьы меда ӟечгес кароно? Аслыз шуиз, вылды: Америкаын тодон-валанме будэтӥ ке, аслым гинэ пайда басьто, нош депутат луи ке, удмуртъёслы но юрттыны быгато. Соин ик бырйиз берлозэ. Но доре, семьяе со ноку ӧз вайылы ужысьтыз сюлмаськонъёссэ.

Милям апаеным тодамы ик ӧз лыктылы, бубилы али люкетыны уг яра шуыса. Со быгатылӥз дорын ассэ семьялы сӥзьыны, яратэмзэ возьматыны.

Пичигес дыръямы ми бертэмзэ ӧс азьын ик возьмаса сылӥськомы ни вал. Одно ческыт саламен пыроз ук. Будэммыгес бере возьманы кутскимы соин ваче син кенешонъёсты. Философия наукаосъя доктор луэмез юн шӧдӥськылӥз, визь-кенеш сётыкуз. Кыӵе ке югдурез со котыр ласянь сэрттоз-пертчоз вал, оло, тазьы карыса умойгес луоз шуыса, одно юалляз. Кызьы уд кылзӥськы солэсь?

Визьмо книгаосын тодматъя вал. 5-тӥ классын дышетскыкум ик, со мыным дуннеез возьматоно кариськиз. Будӥд ни, пе, корка липет улын гинэ уд пукы. Озьы монэ фин-угор калыкъёслэн ортчись конгрессазы Эстоние нуллӥз. Со сяна, возьматӥз Швециез, Финляндиез, – йылпумъя Илья.

Алексей Красильников дэмламен, Аня нылыз но Илья пиез дышетскизы Москваысь Калык эшъяськонъя университетын. Пиез программист. Нылыз китай кылысь берыктӥсь, 2007-тӥ арысен улэ но ужа Китайын. Нылыз умой интыяськыны быгатэмысь Алексей Геннадьевич туж шумпотӥз. Дыдыез доры куное но мыныны дасяське вал. Дасяськыса ик кылиз. Тазалыкез куашказ уго. Но соку но, семьяосыз верамъя, Алексей Геннадьевич огпол но ӧз ӝожтӥськы. Солэсь ортчыт – матысь ӵыжы-выжыоссэ ялан буйгатылӥз: ваньмыз умой. Берло но весь малпалляз Дышетӥсьёслэсь тодон-валанзэс будэтонъя институт сярысь. Берло аръёсаз со ректор вал уго. Лулӟылӥз: институтлэсь данзэ эшшо вылэгес ӝутоно вал. Но, жаляса верано, пыд йылаз йыг-йыг султыны ӧз быгаты ни…

Таӵе веран вань: адями улэп, со сярысь малпало ке. Алексей Красильников тодмоосыз но ӵыжы-выжыосыз понна гинэ улэп уз луы. Солэсь нимзэ табере нуллоз школа.

Елена Сараматова.

Сяськаян вакытаз Николай Постников улонысь кошкиз. Кӧня кырӟанъёсыз, кылбуръёсыз гожтӥськытэк кылизы. Нош кӧня гожтэм чуръёсыз калык пӧлы ӧз вуэ на. Ӵош ужам эшъёсыз, та дано адямилэсь нимзэ калык медаз вунэты шуыса, ёрос клуб борды мемориал пул юнматон сярысь ӵектонэн потӥзы. Дэмланзэс мукетъёсыз но кылӥзы,коньдонэн юрттӥсьёс шедизы. Соку ик лыдъязы: юнматозы сое вордӥськем нуналаз.

Пулэз усьтыны оскизы агаезлы Виталий Елисеевичлы но ӵош будэм эшезлы, ёрос администрацилэн йырызлы Виктор Бобровлы.

Крезьгурчиез буре вайыса, вераськиз трос аръёс ӵоже ӵош ужам эшез, Удмуртиысь егитъёсын ужан политикая министр Владимир Соловьёв. Котькудӥз пусйыны выриз, макем уг тырмы вӧзамы Постников. Оскыны ик шуг, солэн выль кырӟанъёсыз, выль чуръёсыз уз ни вордӥське шуыса.

Но гожтэмез пыраклы кылиз калык сюлэмъёсы. Сое ӟеч возьматӥз Николай Постниковлы сӥзем нырысетӥез ёрос фестиваль-конкурссы.

Фестивальын быдэстэмын вал 45 кырӟан. Вал пӧлаз ӝожез но, задорез но. Туймыйыл школаысь дышетӥсьёс кырӟазы Татьяна Пчельниковалэн кылъёсызъя гожтэм Вячеслав Адаковлэсь «Сэрегын огназ мӧзме баян» кырӟанзэ. Со чузъяськыку, тросэз залын пукисьёс синкылиоссэс кутыны ӧз быгатэ. Н. Постниковлэсь быдэс улонзэ син азязы пуктӥзы кадь.

Жюрилы туж секыт вал 22 коллектив но 7 солист пӧлысь устозэ бырйыны. Озьы ке но вормисьёс шараямын. Ансамбльёс пӧлын нырысетӥ инты сётэмын Алнашысь нылкышноослэн «Вуюись» ансамбльзылы. 2-тӥ степенё дипломен пусъемын ёрос клубысь «Алнаш мылкыд» калык ансамбль но Ӟатча муниципал кылдытэтысь воргоронъёслэн ансамбльзы. Куинетӥ степенё диплом сётэмын Улын Сырьез клубысь «Азвесь гырлы» но Туймыйылысь дышетӥсьёслэн ансамбльёссылы.

Огназы кырӟасьёс пӧлын куинь нырысетӥ интыосты басьтӥзы Асан техникумысь Катя Богданова, Алёна Михайлова но Байтэрекысь Миша Семёнов. Пусъемын на Алнаш школаын ужась Венера Кубашевалэн но Александр Малковлэн дуэтсы.

Алнаш ёрос администрациысь культурая ёзэтэн кивалтӥсь Наталья Антонова, ужрадлы йылпумъянъёс лэсьтыкуз, пусйиз:

- Конкурслы кутскон сётэмын. Но милям та ужрадэз элькун фестиваль кареммы потэ. Николай Постниковлэсь кырӟанъёссэ быдэс элькунамы туж ярато, соосты мыло-кыдо кырӟало.

Людмила Сурчакова.

Алнаш ёросысь Блатгуртын (Ромашкино) вордӥськем пиосмурт пӧрам чуръёсыз, гуръёсыз пыр ялан вазиськылӥз Валентина кузпалызлы: возьмасько тонэ. Мугез но вал уго: Валентина Постникова аслыз мукет пар шедьтӥз. Николай Елисеевич таин тэрытӥськыны нокызьы ӧз быгаты. Ялан оскиз: сюлэмыз басылалоз но берытскоз ай.

Огпол кышноез кошкылӥз ни вал уго. Зэм, кӧня ке ар талэсь азьло коркаысьтыз пегӟон мугез воксё мукет вал: курытсэ ӟамыръяны кутскем картсэ визьмамез потӥз. Валентина озьы анай-атаез дӥне Якшур-Бӧдья ёросысь Чуре кошкылӥз.

Та учыр пумысен Николай Постниковлэн 2006-тӥ арын февраль толэзе тазьы верамез вань:

- Сазьтӥськеме бере асме каргай, мае ке туж кулэзэ ыштӥ кадь. ӧй чида – сьӧразы мынӥ. Соос кык, мон одӥг ар отын улӥм. Мар бон Чуре ветлӥд ай шуыса, юало но, мон шуисько: тӧдьы кирпич шуккыны дышетски. Кудӥз оске, ява.

Сюлэмзэ тазьы усьтӥз вал со, газетамы «Удмурт кизилиос» рубрикае гожтон пумысен вераськыкумы. Соку ик юылэмзэ валэктыны но выриз:

- Капчи улон утчасько-а, мар-а. Сазьтӥськон вакытъёсам юэме пумысен сюлэмам чидантэм курыт луэ ке но, асме сизьдӥсько ке но, со гуам ик усисько. Секыт дыръя чарка юрттэ уго мылкыдэз капчи карыны. Сыӵе часъёсы умой чуръёс кылдо, крезьгур но кисьтӥське. Озьыен, данэ кык пӧртэм. Кудӟылон дыръёсме алнашъёс тодытэк уг уло ни. Ужын но кырыж учкылэмъёссэс шӧдӥсько. Кудӥз, панясме адӟыса, эх, куанэ, дыр! Оло, кинлэн ке сӧременыз но таӵе луиськиз. Зӥбемзэс шӧдӥсько ук. Монэ погыртыны уг вормо но семьяе борды кутско.

Николай Елисеевичлэсь та кылъёссэ малпаса, тодэ лыктэ мукетыз но. Композитор сярысь материал дасяське шуыса кылэмзы бере алнашъёс нерад каризы: ми сое ужысь мозмытыны турттӥськом, нош тӥ ушъялоды-а?

Быдэс Удмурт шаер кырӟанъёссэ кырӟа шуыса, тодазы но ӧз лыктылы, лэся. Ма, мар удмуртъёс гинэ? Россиысь «Дача»  радиопередача кутске ӵапак Постниковлэн ӟуч кырӟанэныз!

* * *

Зэм, туннэ Постниковен кылдытэм «Алнаш мылкыд» ансамбльлы но композиторлэн нимыз сётэмын. Постниковлэн кырӟанъёсыныз диск поттэмын. Нотаосын «Малпасько тонэ. А мне бы увидеть тебя» книга вордэмын.

Берлозэ Николай Постников ачиз, 50 аресъем юбилеезлы шуыса, дасяз ни вал, ужзэ «Удмуртия» издательстволэн типографияз келяз. 2010-тӥ арын 25-тӥ январе солы тырмыны кулэ вал 50 арес. Но композитор вордӥськем нуналозяз ӧз чида – сюлэмыз кутӥз.

- Книгаезлы ним но Николай Елисеевич, кышнозэ малпаса, понӥз. Валентина бичетэз кияз кутоз но соку ик ваньзэ валалоз, кожаз. Соин валче ик книгазэ но ӟучо-удмурто кариз (кышноез ӟуч уго).

Тазьы вера Алнашысь егит композитор, берло аръёссэ Постниковен артэ ужам Александр Малков. ӵапак та пиосмуртэн берло дыре матэ кариськиз вал Николай Елисеевич. «Пие» шуыса гинэ вазиське вал солы. Ма, ас вакытаз Сашаез баянэн шудыны но дышетӥз вал ай. Кин тодэ, оло, аслэсьтыз экезэ малпаса но, Малковез «пие» карылӥз.

Адямилы оген туж секыт. Солы одно ик кинлы ке но усьтӥськоно – пушказ ваньзэ люказ ке, пилиськоз. Азьвыл Постников вань шумпотонзэ но, куректонзэ но вера вал Владимир Соловьёвлы. Таиныз соос 1986-тӥ арысен ӵош ужаны кутскизы. Но бератаз Соловьёвез Иже кыскизы, Егитъёсын ужанъя кун комитетлэн тӧроезлы воштӥсе пуктӥзы.

- Володя понна мон шум гинэ потӥсько, – шуиз вал пумиськыкумы Постников. – Котьма ке но, сюлэмы вӧсь луыса ик, малпасько: сотэк воксё бушай. Мон ведь кырӟанъёсме гожтэме бере солыгес возьматъясько вал. Володя котьку шонер дунъялляз. Вань шуг-секытъёсты ӵош вормылӥм, концертъёсын ог-огмылы кужым сётъям, нош али – огнам.

* * *

Семьязэ но ыштыса, со уката огназ кылиз.

- Кышноез кошкем бере Николай Елисеевичлэн ымныр тусыз ик воксё воштӥськиз, синъёсыз бездӥзы. Шумпотонэз ӧй вал ни, – вера Александр Малков. – Тодэ лыктэ берпумзэ ӵош ужам нуналмы. Выль ар праздникъёслы дасяськиськом. Постников нуназе котыр клубе вуиз. Шӧмаськемынгес ни. Арганзэ кутӥз но мыным сётӥз: пие, шуд ай. Шулдыр крезьгур кисьтыны ӧдъяй. Со тыпыр-тапыр эктӥз. Сыӵе мылкыдзэ адӟылэм но ӧй вал. Ужын чик дауре мед эктоз ай! Собере шуак чигиськиз, бӧрдыны кутскиз. Монэ, пе, пуныен коӵыше гинэ дорам возьма. «Чик ӧвӧл эшъёсы» шуыса кырӟанзэ мытӥз.  Ымдуръёсыз куалекъяло. ӝӧк вылэ ланьырскиз. Нокудмы но сое исаны ӧм дӥсьтэ ни. Шутэтскоз но буйгалоз, малпамы. Юэм дыръяз кылыз лек уго. Кошким доръёсамы.

ӵукнаяз сое выж вылысь шедьтӥллям. Арня ӵоже, йырсазяз лыктытэк, кыллиз. 1-тӥ январе 3 часын ӵукна кулӥз. Нокин таӵезэ ӧз малпа. Ачиз но Николай Елисеевич ялан шуоз вал: 50 аресэ бере выль улон кутскоз ай. Ялан оскылӥз: кышноез дораз берытскоз. Юн яратэ вал Валентиназэ. Сад-бакчазэ но ӧз аналты. Картошка-кешыр мерттэм сяна, сяськаос но кизиз. Воргорон йырын ачиз ик сылалтӥське но, пыжиське но вал. Мисьтаськон машинаезлы гинэ кема дышыны выриз. Киынгес дӥсьсэ посылӥз. Ноку кырсь ӧз ветлы ке но, нылпиосыз доры адӟиськыны мыныкуз, уката чебергес кариськыны выриз. Кык-куинь бадӟым сумка тыр пӧраськоз но, тыбыраз ныпъяса, пиналъёсыз доры кошкоз вал.

Берытскысал на меда Валентинаез? Ӧйтӧд. Огез тодмо: картэзлэсь кылбуръёсыныз, кырӟанъёсыныз бумагаоссэ со огазе коробкае люкам, туспуктэмъёссэ но отчы тырем, куштыны дасям. ӵапак та коробка син шораз йӧтэм Малковлы. Александр ӧй луысал ке, рукописьёс тӧлъя-буръя кошкысалзы ни. Туннэ соосты Александр зарниез кадь уте. Пӧлазы вань нылпи кырӟанъёс но.

* * *

Пичиослы гур малпаны кутскиз Постников, Ижысь крезьгуръя училищеын дышетскыкуз ик. Кыкетӥ курс. Огназ кыльыса, Николай фортепьяноез улӟытыны выре.

- Уг валаськы, мае шудӥськоды, – вазись луиз.

Пияш куалектӥз. Татьяна Барановская дышетӥсезлэсь пыремзэ чик кылымтэ. Тӥ, пе, асьтэос крезьгур уд кылдытъяське-а? Та юанлы пумит Коля йырзэ мыкыртӥз. Вераны возьыт. Дауртэмъяськисько, шуиз. Нош аслаз кӧня ке пьесаез вал ни. Быгатӥськоды, пе, дышетсконо, шуиз Барановская. Но Постников баянэнгес гинэ шудӥз. Фортепьянолэсь кышказ-а, мар-а. Ма, пичиысен баян борды сюлэмыз кыстӥськиз уго.

Зэм, начаргес улэменызы, Колялы соку ик дуно вуз ӧз донгиськы. Ньыль нылпи. Нэнэйзылэн тазалыкез ушъяськымон ӧвӧл. Аресъем дыръяз ик кышномурт тюрьмаостӥ костаськемын: семьязэ, кулакъёс карыса, курадӟытӥллям. Атаез но пал пыд. Озьы ке но столяркаын, кебитын ужаз. Киыз котьмалы мынэ вал уго. Талы луыса ик, оло, пичи Коля ялан оскиз: атай амал шедьтоз монэ шумпоттыны. Кӧня ке пол вераськон ӝутылӥз: арганэн шудыса, улосмес шулдырто, пе. Нукыртэмысьтыз атаез огпол ӧз чида, шораз кеськиз: апайёсыдлы Кучыран школае ветлыны велик басьтоно, арган вылын ворттылозы шат?

Тулыс ини атаез Алнашын кинлы ке янак пуктылӥз. Копейка вайиз шуыса, Коля кылӥз но сюлворыны кутскиз, бӧрдыса но утчаз. Сое жалязы – басьтӥзы. Озьы, 4-тӥ классэ мыныкуз, Постников кыӵе гурез кылэ, ваньзэ шудэ ни вал.

Кырӟан гожъяны рос-прос кутскиз 1988-тӥ арын. Алла Кузнецовалэн «Малпасько тонэ» кылбурез сюлэмзэ вырӟытӥз. «Солэн кылъёсызъя гожтэм гуре – нырысетӥ йыг-йыг вамыше. Уг тодӥськы: со-а, мон-а сое ӝутӥм», – серектӥз вал Постников.

Николай Елисеевич ноку ӧз вунэтылы нылпиос сярысь. Аслэсьтыз пиналъёссэ малпаса но, ялан гожъяз пичиослы кырӟан. Куд-огез пӧртэм бичетъёсы сюремын. Но ваньмыз рос-прос огазеямын ӧвӧл на.

Сизьымзэ нылпиослы гожтэм ужзэ Постников ачиз ик сётэм вылэм ни Сашалы. Тон, пе, школаын ужаськод ук, тэшкылиослы шудод.

Туннэ Малков уката ӵемгес кутэ дышетӥсезлэсь крезьгуръёссэ. Алнаш шор ёзо школаысь 4-тӥ классысь нылпиосын ансамбль но кылдытӥз ни.

- Экеосын Анайлэн нуналызлы дасяськиськом. Клубын репетиция ортчытӥськом. Кабинетын Николай Елисеевичлэн туспуктэмез. Киям солэн баянэз. Пиос, шӧдтэк шорысь кырӟамысь дугдыса, туспуктэм шоры долкаса, огымысь шуо: со ми шоры учке, умой ӧвӧл.

Нош мыным учкемезлэсь капчи гинэ. Со мыным юрттэ кадь. Рукописьёсыз пӧлысь шедьтӥ Людмила Кутяновалэсь «Дунне мыным» кылбурзэ. Крезьгурез ӧвӧл. Нош чуръёсыз макем умоесь! Уйин вӧтам кылӥсько гурзэ. Султӥ но 4 часын ӵукна ик баянме улӟытӥ. Малпасько, Постников мыным озьы юрттэ.

Елена Сараматова.

Сизьым ар пӧламы ӧвӧл ни Россиысь но Удмуртиысь дано артист, «Шулдыр ӝыт» ансамбльлэн кивалтӥсез, маскарчи Анатолий Ушаков. 17-тӥ декабре, Шаркан ёросэ концерт пуктон сярысь вераськыны мыныкуз, шудтэм учыре шедьыса, быриз. Котьма ке но калык сюлэмысь Очей Толя  туннэ но ӧз поты. Ма веранэз ни матысь ӵыжы-выжыосыз сярысь – соос али но уг оско, яратоно адямизы сюйын кӧлэ шуыса. Та но трос мукетыз сярысь туннэ тодаз вае Анатолий Алексеевичлэн выныз, «Алнашский колхозник» газетлэн валтӥсь редакторезлэн воштӥсез Леонид Ушаков.

Шоккетон

- Газетчилэн улон сыӵе ни – ялан сюрес вылын, ялан утча выль тодматскон. Адямиен вераськон мытыку, аслэсьтыд нимтулдэ поттылытэк уг луы. Гуртоос фамилиме кыло ке, соку ик юало: тон Очей Толилэн ӵыжы-выжыез ӧвӧл-а? Уг танӥськиськы, выныз, шуисько. Ёртыны кутско: тон но сцена вылын Ушаков кадь ик паймытъяськод-а? Юанъёссылэсь акыльтэменым, куд-огезлы вазисько: мон солэсь но зол шудӥсько. Аслам сцена вылэ тубаме но ӧвӧл. Нош паймо: малы адӟеммы ӧвӧл? Вазисько: адӟоды ай.

Кытӥ-отӥ йыр но кур луэ вал: агайме ваньзы тодо, нош монэ – нокин уг. Оло, соин но калыкен озьы серекъяй-шоккетӥ. Но со вал Анатолий Алексеевич улэп дыръя. Туннэ маскаръяськыны кыл уггес берыктӥськы ни.

Жаляса верано, кулэмез бере гинэ ми соин уката матын луимы. Шонергес вераса, мон али соин малпанам ӵемгес вераськисько. Шайгу дораз лыктӥсько но кенешисько. Улэп дыръяз ваче син пукыны ӧзгес кылдылы уго: милемыз люкылӥзы иськемъёс.

Шулдыртон

- Семьяямы ми вить нылпи вал. Пичи дыръямы ик со висъяськылӥз шаянгес луэменыз, сцена котыре кыстӥськеменыз. Гуртамы куинь огъёзо Толяос вал: Ванька Толя, Гирой Толя но агае – Очей Толя. Эшъёсыз пӧлын но со котыр ласянь етӥзгес вал. Арганэн но шудыны ӝог дышиз, гужем юлтошъёссэ ӝыт шудонъёсы поттэ ни вал, шулдыр куазен урамын крезьгур кисьтылӥзы.

Ми, пиналъёс, люкаськем калыклэсь кепыраськом, нош со пӧлазы кыстӥське, ассэ возьматыны, адямиосты шулдыртыны выре. Сцена вылэ тубыны но со ӧз кышкалля.

Быгатонлыкъёссэ адӟыса, дышетӥсьёс мылкыдзэ уката бурдъяллязы, концертъёсы кысканы кутскизы. Огпол, покчи классъёсын визь люкакуз, эктонэ кыскиллям. Кыӵе ке праздник вылэм, лэся. Калык школа тыр люкаськемын. Концертлы шуыса, Анастасия Ивановна нэнэмы Толялы юромо сьӧд сатинлэсь штан вурем. Эшъёсыныз ӵош эктэ ни ай со. Нош резинаез лябгес вылэм, лэся – штанэз весь куашка. Нош агай сое уг но шӧдылы, кожалод – ӝутэ но выльысь эктэ, соиз нош куашка. Учкисьёс кӧтсэс посыса ик гориллям.

Нэнэлэн серекъяса верамез но вань: одӥг шузи пи будэтӥськем. Соку ӧз тодылы уго, макем вылэ ӝутӥськоз экеез. Но Анатолий Алексеевичлэсь та кылъёс мылкыдзэ гинэ ӝуто вал. Со шумпотылӥз кадь калыклэсь пӧртэм луэмезлы. Алнаш ёросысь вордскем Куашкам (Юртошур-Какся) гуртысьтымы ик Анатолий Уваров кылбурчилэсь юморескаоссэ лыдӟыны яратэ вал. Огвакытэ туж сак кылзылӥз маскарчи Аркадий Райкинлэсь серемес чуръёсыныз пластинкаоссэ. Солэсь вераськон манерзэ чаклалляз.

Адямиос но ӧз паймылэ ни, лэся, кытын сыӵе маскарчи будэ шуыса. Атаймы но милям праздник дыръёсы калыкез шулдыртыны быгатэ вал уго. Кылсярысь, адямилэсь кизэ кутыса, вирсэрлэн шуккемезъя тунам карылӥз, солы олокыӵе но зарни улон сӥзьылӥз. Калык со котырын гур-р-р серекъяса сылоз вал. Милемлы, пиналъёслы, котьку шуылӥз: мыкыртэм йыре сиес поныны капчи.

Бурдъяськон

- Пичи дыръяз огпол но ӧз шарая, кин луэмез потэ. Но солы дэмлась сюрем, лэся: сцена вылын шудыны быгатӥськод бере, та сюрес вылысьтыд эн кожы ни. Оло тае пеляз понӥз, оло ас сюлэмзэ кылзӥськиз – Алнаш шор ёзо школаез йылпумъяса, ёросысь культура юртэ ик ужаны интыяськиз. Спектакльёсын геройёссэ усто возьматыны быгатэменыз, сое кысканы кутскизы мукет районъёсы концертъёсын. Москвае но удмурт спектаклен вуылӥз. Ваньзэ тае тодыса, кун филармонилэн азьвыл директорез Николай Зубков ӧтиз Анатолий Алексеевичез Иже. Татын агае нырысьсэ люказ удмурт эстрадая коллектив, ачиз луиз концертэз нуись, кырӟась-верась усточи, «Шулдыр ӝыт» ансамбльлэн кивалтӥсез. Николай Зубков агаелэн табыдӟа вормонъёсыныз данъяськиз. Со уго ас вакытаз келяз Анатолий Алексеевичез Ленинградэ тодон-валанзэ муромытыны.

Агае огпол но ӧз жаля, артистлэсь сюрессэ бырйиз шуыса. Сценатэк улыны уг быгаты ни вал со. Концертъёсыз вискын аслыз инты ӧз шедьтылы. Учкисьёс сое бурдъяло, азьлань улыны кужым сёто вал, лэся. Со серекъятэ, учкисьёс горо – ог-огзылэсь мылкыдзэс озьы капчиятъязы. Шуэ вал: серекъятыны быгатон – туж секыт уж. Зэмзэ но озьы со. Сцена вылэ огпол тубыку но, мар вераны тодэ уг лыкты ай, нош со отысь ӧз васькалля.

Иже улыны выжемез бере Алнаше бертаны ик ӧз ваньмылы ни. ӵемысь вераськылӥм телефон пыр гинэ. «Лёнь, кыӵе улон-вылон Алнашын? Нэнэлэн кыӵе тазалыкез?» Тазьы мытоз вал вераськонзэ.

Собере нырысь-валысь машинаез но аслаз ӧй вал. Автобусэн берталляз. Огпол корка пыриз но серектӥз: гуртысь тодмоме, пе, автостанциын пумитай но, воксё паймиз автобусэн ворттылэмелы. Юаз, пе: Ушаков, тон сыӵе куанер шат?!

Оло, ӵапак та кылъёс ик басьтытӥзы сое машина. Но соку но дорамы часталы гинэ кожалляз. Ужъёс, пе, трос. Со куспын но Алнашетӥ калтыртыны потэ вал, верасько ай, пе, калыкен, юаллясько улэм-вылэмзы сярысь. Озьы со аслыз выль юморескаослы сюжет утчалляз. Куддыр мон но вераськоназы кемдылӥ. Вить минут кенешо, дас… Мынам сюлэм уг чида: «мон кошки, бертод», шуылӥ. ӝыны час я солэсь ятыр ортче но, ӧсэтӥ мыняса пыре вал ини: киос ик, пе, сьӧдэктӥзы ӟечъяськыса.

9-тӥ Май празднике огпол но бертатэк кылемез ӧвӧл. Милям атаймы, Алексей Александрович кык война пыр потэм: финъёсын но, немецъёсын но ожмаськемын. Сое ӟечкыланы одно дыртэ вал. Атаймы кулэм бере но шайвылаз сяська поныны вуылӥз. Отчы памятник но пуктӥз.

Туж яратэ вал Куашкам гурт вӧзысь Вуж Каксяе ветлыны – нэнэмы отысь. Сопалась ӵыжы-выжыосынымы кырӟаса, чорыг лым пӧзьтыса, пукыны яратылӥз. Сое но отын туж возьмаллязы: ӵошен серекъяло но улонлэсь секытсэ огдырлы ке но вунэто.

Люкиськон

- Туннэ ӵемысь тодэ лыктэ 16-тӥ декабрь.  Алнаш-Грак-Кизнер ёросъёстӥ концерт пуктон сярысь вераськыны потэм вылэм Анатолий Алексеевич. Огдырлы дорамы пыраз. Ӝыны час но ӧз пукы, дыртӥсько, пе,  Граке мыноно. Рос-прос вераськыса но ӧм вуттэ. Ӵуказеяз нуназе филармонилэн соку кивалтӥсез Нина Таланова жингыртэ. Сюлэм дырекъяны кутскиз. Малы ай та кузпалыз уг жингырты? Нош солэн ӟигарыз тырмымтэ ни – яратоно адямиез Шаркан сюрес вылын машинаен пазьгиськем шуыса ивор вань кужымзэ быдтэм. Мон но шокчыны ӧй быгаты ни. Соку ик тодэ лыктӥз: толон агай люкиськыны пырам, иське…

Берлогес уйвӧт адӟисько. Шайвылын кадь. Мур гу пыдсын кылле. Котыраз калык сылэ, берпум сюрес вылэ келяло. Нош со султӥз но кошкиз, кезьыт, пе, татын.

Кулэмез бере моргын кезьыт азьын возиллям, оло, соин но озьы вӧтатӥз монэ.

Аръёс ортчемъя кайгу лябомыны кулэ кадь. Нош со монэ весь уг лэзьы. Огезлы шумпотӥсько: Наташа нылыз агаелэсь мытэм сюрессэ азьланьтэ – кырӟа. Галина Платонова нылыныз ӵемысь вуылэ дорамы. Котьку дырто Анатолий Алексеевичлэн шайвылаз. Соос отчы ӵуж сяськаос кизьыса кельто, гужембыт пушъё соос. Зоръёс ӧвӧл дыръя, соос вылэ ву кисьтасько.

Сюлмаськон

- Сюлэмыз ик чигиськыса, Анатолий Алексеевич вера вал клубъёс сярысь. Уйпал ёросъёсы концертэн, пе, вуиськод но паймиськод: залъёссы выжыкылысь дворецлы укшало. Пыдъёс ик сцена вылысь кошкыны уг ӵыдо. Алнашысь сомында артистъёс, тодмо адямиос потэмын, нош клуб малы ке пуктыны ум быгатӥське. Туала культура юртмылы со туж абдрасал, дыр.

ӝожтӥське вал, крезьгуръя инструментъёс уг тырмо шуыса. Аслаз уксёеныз басьтылӥз микрофонъёс но, инструментъёс но. Сотэк кызьы калык азе потод? Огвакытэ репетициос ортчытъяны но интызы йӧнала ӧй вал.

Анатолий Алексеевичлэн туж потэ вал Можга пала улыны бертэмез. Иж город уг кельшы вал солы, кекатэ, пе. Галина Платонова кузпалыз но тапалась ук. Эшъёсыз но Можгаын трос.

Эшшо одӥг малпанэз вал. Анатолий Уваровен ӵош, пе, книга поттоно. Нырысь агае кулӥз, собере – Уваров. Огзэ но малпанзэ улонэ пыӵатыны ӧз вутты.

Елена Сараматова.

Фотокарточкаысь туж чебер тусо, сьӧд синмо пинал пиосмурт учке, ымдураз пальпотон сылмемын. Сергей Пыжъяновлы УдГУ-ысь журналистикая факультетэз йылпумъяны ӧз кылды. Кышкыт висён быдтӥз вуоно талантэз. Югыт дуннеен люкиськонзэ тодыса но, кылбурчи со сярысь нокинлы ӧз вера. Эшъёсызлэн тодэ ваёнъёсазы берпуметӥ нуналозяз пальпотӥсь но ӝутскем мылкыдо кылиз. Егит мурт дыртыса кадь улӥз, дышетскон сяменыз трос кылбуръёс, шаржъёс, фельетонъёс гожъяз, факультетын «Журналист» газет поттонын тыршиз, англи, китай но удмурт кылъёсты дышетӥз. Улонэз бадӟым гучыкъёсын шӧмъяны дыртӥз, котьма борды сюлмысь кутскылӥз, оло, озьы кулонэз пӧяны тыршиз.

Сергей Пыжъяновлэн ӵош дышетскем эшез Елена Петрова тодаз вае сое аспӧртэмлыко, улонэз яратӥсь, котьмае вуттыны тыршись адямиен.

Ангелина Сидорова но Сергей Пыжъяновез студент дыръёсысеныз тодэ:

- Али ке но син азям яркыт тусбуез пуксе. Со интеллигент вал, туж визьмо, капчи мылкыдо. Яратылӥм сое кылзыны, мар гинэ вераны ӧз шедьтылы. Кемалась ик ӧвӧл, дышетскем дырысеным кылем тетрадьёсам бугыръяськыкум, кылбуръёссэ шедьтӥ.

Вордӥськем Якшур-Бӧдья черкогуртаз но туж данъясько егит писателен. Якшур-Бӧдья ёросысь Пушкари гурт библиотекаен кивалтӥсьлэн Зоя Щуклиналэн верамезъя, гурт калык мыло-кыдо басьтэ но лыдӟе Сергей Пыжъяновлэсь книгазэ.

Егит автор одно ик сборникен поттыны курем пичи дыръяз кылдытэм кылбуръёссэ но пумозяз вуттымтэ повестьсэ. Анай-атаез Варвара Еремеевна но Михаил Иосифович пизылэсь мылкыдзэ быдэстӥзы – коньдон люкаса, книга поттӥзы.

Ангелина Снигирёва,

Удмурт кун университетын дышетскись.

Куамын аръёс ӵоже институтын ужатозяз, Ольга Григорьевна пыр туж трос удмурт кылэз но литератураез нуись  дышетӥсьёс ортчизы. Быдэс республикаысь дышетӥсьёсты со нимын-тулын тодэ вал. Кин кыӵе программаен ужа, маин тунсыкъяське. Яратэ вал О. Г. Коновалова аслэсьтыз дышетӥсьёссэ. «Ой, Ольга Григорьевна, кыӵе мӧзмим тӥлесьтыд», – шуо вал соосыз пумитаз.

Кӧня тодмо адямиос удмурт кафедрае ветло вал Ольга Григорьевнаен кенешыны, пумиськыны, выль программаосынызы тодматыны Зоя Витальевна Суворова, Алевтина Николаевна Журавлёва, Юрий Александрович Фомин, Галина Николаевна Шушакова, Геннадий Афанасьевич Ушаков, удмурт писательёс, артистъёс. Со вакытэ ик мон тодматски удмурт учёнойёсын.

Ольга Григорьевна туж тунсыко адями вал. Пинал вакытъёссэ веракуз, кыкнамы бӧрдыса пукылӥм. Серемес учыръёссэ, кӧтмы шуг луытозь, серекъяллям. Али ке но солэн кӧжы кисьтэм кадь кит-кит серекъямез пель сьӧрам шуккиське. Радиоысь яке телевизорысь Елена Образцовалэсь кырӟамзэ кылэ ке, шокам куаразэ но уд кылы. Сокем яратэ вал та кырӟасез. Ачиз но кыӵе чебер кырӟалляз!

Одӥг аре туж кема йӧнатӥськи больницаын. Уж бере ик со мон доры лыктэ вал. Соин вераськыса, вань висёнэ быре кадь. Ольга Григорьевнаен Алнаш палъёсмес ӵемысь тодамы вайылӥм, ас диалектэнымы э-э! вераськиськом вал.

Трамвае пуксем бере Ольга Григорьевна пичи пиналъёсын огъя кыл туж чаляк шедьтэ вал. Нылпиос сюлэмзэс усьтылӥзы солы. Вераськемзэс туж тумошо вал кылзыны.

Аслаз нылпиез ӧй вал, сузэрезлэсь нылзэ но пизэ туж яратӥз. Куд-ог анай-атай вордэм нылпиез сярысь сыӵе уз сюлмаськы. Наташаен Миша но сое туж яратӥзы. Оля апай но, мама но шуылӥзы.

Ужысь кошкемез бере  анайзэ утьыса Алнашын улӥз. Нош декабре одно городэ вуэ вал. ӵош будэм эшъёсыныз, институтын дышетскем эшъёсыныз вордскем нуналзэ пусйыны. Тӥни соку Ольга Григорьевнаеным быдэс час пала телефонэн вераськиськом. Тодэме потылӥз, мар вылез институтын, кинъёс ужало, ужам вакытъёсмес  тодамы вайылӥм. Берлояз но кит-кит серекъяса вераськиз. Умой мылкыдын. Тодысал ке, со берлоез кенешеммы луоз шуыса…

О. Г. Коноваловалы 10-тӥ декабре 72 арес тырмысал. Вордскем нуналмес ми котьку ӵош пусйылӥм, вискамы одӥг нунал гинэ вал. Макем со ческыт пӧраськиз. Нош керттэм дӥсез кинэ гинэ ӧз шунты.

Вождэ эн вайы, кулэ дыръяз ӟеч кыл вераны ке ӧм быгатэ, кылзыны дыр ӧм шедьтэ ке.

Вера Бикузина.

Ижкар.

Улӥнь Юри школаысь 8-тӥ классэз йылпумъямез бере Агрызысь СПТУ-ын электромонтажнике дышетскиз. Практиказэ ортчыны келязы Красноярск пала электроезъёс кысконэ. Соку отын бадӟым лэсьтӥськон мынэ вал. Бӧрысь ини Вячеслав Дмитриевич трос вералляз но, гожъяз но, кызьы кыдёкысь Сибырын удмуртъёсын пумиськылӥз. Армиысь бертыса, Ижысь механикая заводэ электрике интыяськиз. Ужан вакытаз ик дышетскиз Удмурт кун университетлэн кылтодосъя факультетаз.

1971-тӥ арысен Вячеслав Михайловлэн ужъёсыз «Дась лу!» газетлэн котькуд номераз потаны кутскизы. 1979-тӥ арын со «Молот» журналлэн кылбурет но критика ёзаз редактор луиз. Кык ар ортчыса, егит коммунистэз Свердловскысь вылӥ партшколае дышетскыны келязы. Отысь бертэмез бере сое соку ик юнматӥзы «Молот» журналлэн валтӥсь редакторезлы воштӥсе.

Вячеслав Михайлов котькуд удысын ужакуз, маке но выльзэ кылдытыны йӧндырылӥз. Элькунысь профсоюзъёслэн кенешазы пресс-службаын тыршон вакытаз со усьтӥз «Единство» газет. Удмурт Республикаысь Вылӥ Кенешлэн пресс-службаяз ужакуз, депутатъёс юнматӥзы Удмуртилэсь кунпуссэ, куншетсэ но кункрезьзэ. Соос сярысь брошюра поттон но Вячеслав Дмитриевич вылэ усиз. Со бӧрсьы кӧня ке арзэ, 2006-тӥ арын улонысь кошкытозяз ик, «Удмурт кенеш» ассоциацилэн «Герд» газетэзлэн валтӥсь редакторез вал. Журналистлэн общественной ужъёсыз котьку но уно вал: со ик «Удмурт кенешлэн» исполкомезлэн ёзмуртэз, Удмуртиысь Журналистъёслэн огазеяськонзылэн правлениезлэн ёзчиез. Асьме делегациен ӵош Томск улосвылысь ӵыжы-выжыосмы доры но потаз, 2004-тӥ арын 4-тӥ фин-угор конгрессэ Таллинэ вуылӥз. Котькытысь бертэмез бере адӟемъёсыныз-кылэмъёсыныз но ас малпанъёсыныз пыр-поч тодматылӥз газет лыдӟисьёсты, радиокылзӥсьёсты.

Али гинэ пусйимы Удмурт телевиденилы 55 ар тырмонэз. Кӧня ке арзэ Вячеслав Михайлов отын ӟуч но удмурт иворъёсъя валтӥсь редактор вал. Иворысь шорсюлэмзэ шедьтыны но сое вакчияк но валамон кылын калык доры вуттыны трос быгатэм кулэ. Вячеслав Дмитриевич котькуд кыллэсь секталазэ но дунзэ мертаса кадь предложениосы бырттылӥз. Бӧрысь Удмурт радиоын иворъёсты дасякуз но, ӵош ужась егит эшъёсыз солэсь трослы дышетскизы. Газетчи но радиожурналист соосыз куре вал устооссэ радиоверанъёссэс журналлы сямен лэсьтыны. Быгатонды волялоз, шуылӥз. Со вакытэ ик дано журналист Удмурт кун университетын студентъёсын практической занятиос нуылӥз. Диплом ужъёссылэн научной кивалтӥсьсы но вал.

Радиоын ужакуз, Вячеслав Дмитриевич очерке выль шӧм пыртӥз. Тросэз радиожурналистъёс, соос пӧлын ачим но, адямиен кенешиськомы, кутсконаз но пумаз студиысен огъя кылъёс будэтӥськомы но – радиоверан дась. Нош со кенешон висказы монтаж дыръя студиысен ог дасо пол пыра на, аслэсьтыз малпанъёссэ йылтэ. Таӵе амалэн ужан трос дырез но визез кулэ каре. Соин ик Славалэн уно уйёсыз но шутэтскон нуналъёсыз ужлы сётылэмын вал. Нош очеркъёсыз сюлмаськытӥсь ужпумъёслы сӥзьылэмын. Радиолэн «зарни фондаз» соос 50-лэсь уно люкаськемын. Кылсярысь, ю будэтон сярысь очеркъёсыныз сузьет.

Дано адямиосынымы ӟуч калыкез тодматоно шуыса, Вячеслав Михайлов удмуртъёсын но ӟуч кылын очеркъёс дасялляз. «Тарзан по приказу» – кунгож сьӧрын ожмаськем А. Иванов подполковник сярысь, «Хранитель Вечного огня» – батыръёсмылэн ожмаськеменызы тодматӥсь В. Поздеев сярысь но трос мукет. Ленинградлы-Петербурглы 300 ар тырмонлы сӥзем конкурсэ со кӧня ке очеркъёссэ келяз вал. Ваньмыз геройёсыз – Ленинград блокада вакытэ улэмъёс но ожгарчиос. Вормисьёс пӧлы потӥз. Уйпал шоркарысь журналист вуиз зарнивуам лавр куаръёслэсь укоен (коронаен).

Владимир Михайлов.

Ува ёросысь Булай шор ёзо школаын ортчизы Людмила Кутянова кылбурчилы сӥзем лыдӟонъёс. Радъяз соосты удмурт кылъя но литературая дышетӥсь Анна Петровна Дедюхина.

- Кылем арын Дэри ёросысь Изгурт шор ёзо школаын Эрик Батуевлы сӥзем лыдӟонъёс ортчизы, – вера Анна Петровна. – Туж умой радъямын вал. Синмаськыса отысь бертӥ. Со нуналысен сюлэмы висьыны кутскиз. Милям но Людмила Кутяновамы вань ук. Малы солы сӥзем лыдӟонъёс ортчытонтэмез? Со малпан йырысьтым ӧз кошкылы ни. Дышетӥсьёслэсь быгатонлыксэс будэтонъя но выльдонъя институтын ужасьлы Андрей Клементьевлы вазиськи (Эрик Батуевлы сӥзем лыдӟонъёсты со радъяз но нуиз). Таӵе ӵектонлы Андрей Александрович шум гинэ потӥз. Мытэм ужмылы ар пала дасяським.

Зэмзэ но, булайёслэн дасяськемзы зол гинэ шӧдӥськиз. Культура юртазы но, школаын но Людмила Кутянова кылбурчилэн ужъёсыз адӟисько. Котькуд борддорын кылбуръёс но кышетъёс ошылэмын. Куд-огез соос Людмила Дмитриевналэн киосыныз чильпамын. Люкаськем калыклы ӟеч мылкыд сӥзьыса, вераськизы Ува ёрос администрациысь адямиос, Булай муниципал кылдытэтлэн йырыз Ирина Никифорова, «Удмурт кенешлэн» Ува ёросысь ёзэныз кивалтӥсь Зинаида Полянкина, Удмуртиысь Писательёслэн огазеяськонзылэн тӧроез Егор Загребин, Булай шор ёзо школаен кивалтӥсь Елизавета Пантюхина. Кутяновалэсь творчествозэ ӟуч нылкышно кылбурчиослэн – Ахматовалэн но Цветаевалэн – творчествоенызы ӵошатыса, доклад лыдӟиз тодосчи Вера Пантелеева.

Тунсыко малпамын вал соиз но: Людмила Кутяновалэсь эшъёссэ, шаерысьтымы тодмо нылкышно кылбурчиосты сцена вылэ поттӥзы. Котькудӥз кылбурчи Кутяновалэсь кылбурзэ лыдӟиз.

Кылбурчи Людмила Кутянова Ашальчи Оки нимо премилэн нырысетӥез лауреатэз луэ. Нош тодосчи Людмила Айтуганова (Людмила Дмитриевналэн ныл йыр фамилиез) трос кужымзэ но тодон-валанзэ сётӥз удмурт литератураез азинтон понна. Кема аръёс ӵоже УдНИИ-ын ужатозяз, монографиос но статьяос гожтӥз.

Собере возьматӥзы Людмила Кутяновалы сӥзем кинофильм. «Мон – тӧдьы вусяська» фильм бордын ужаллям Булай школаысь дышетӥсьёс Анна Дедюхина но Александр Филимонов.

Шумпотыса пусъёно, Булай муниципал кылдытэтын туэ арысен Людмила Кутянова нимо премиез сётон радъямын. Со дано нимез туэ басьтыны шуд усиз Булай шор ёзо  школаысь 8-тӥ классын дышетскисьлы Лариса Чернышевалы. Та нылаш пичиысен ини быгатыса гожъя аспӧртэмлыко веросъёс но детективъёс.

Собере секциос ужазы. Соос куиньлы люкемын вал. Огаз нылпиос Л. Кутяновалэсь кылбуръёссэ лыдӟизы. Ас сяменызы соосты сэрттӥзы-пертчизы. Нимысьтыз пусйыны кулэ Пичи Пурга ёросысь Бобья-Уча шор ёзо школаысь дышетскись нылпиосты (кивалтӥсьсы Е. Галактионова). Соос, удмурт дэремъёсын дӥсяськыса, гитараен шудыса, кисьтӥзы Людмила Кутяновалэн кылбуръёсызъя гожтэм кырӟанъёсты! Йыртӥянъёс но пӧртэм шудонъёс малпаллям Дэри ёросысь Шор Постол школаысь нылпиос (кивалтӥсьсы Надежда Кабанова). Кылбурчилэн кылбуръёсызъя сценкаос дасяллям Кияса ёросысь Уддяди (Карамас-Пельга) шор ёзо школаысь  пиналъёс (кивалтӥсьсы Светлана Макарова).

* * *

Людмила Кутянова куинь книга поттыса вуттӥз. Нырысетӥ сборникез – «Чагыресь пилемъёс», кыкетӥез – «Вож син», куинетӥез – «Со аръёс». Шумпотыса пусъёно, та нуналъёсы Людмила Кутяновалэн «Удмуртия» издательствоын «Тон-а со?» кылбур бичетэз потӥз.

Отчы пыртэмын солэн уно тодмо кылбуръёсыз, тодэ ваёнъёсыз. Кылбурчилэн тросэз кылбуръёсыз тодмо кырӟан луэмын. Людмила Кутянова одӥгаз кылбураз ассэ усьтӥськымтэ ӵашъёнсяськаен ӵошатэ. Но та конференциын солэн творчествоез трос ласянь усьтӥськиз, шуыны луоз.

Любовь Тихонова.